‘n Suid-Afrikaanse kameraman en fotograaf, Adil Bradlow, word in Egipte aangehou, het Al Jazeera berig.
Bradlow word glo saam met drie ander kollegas deur die militêre junta in Kaïro aangehou.
Al vier joernaliste Wayne Hay, Russ Finn en Baher Mohammed werk vir Al Jazeera en is sedert Dinsdag in aanhouding.
Al Jazeera het die Egiptiese owerhede versoek om die vier onvoorwaardelik vry te laat.
Die weermag kon nie bewerings bevestig of ontken deur die militêre vakbond SANWU dat Suid-Afrikaanse skerpskutters, wat in diens van die Verenigde Nasies is, ses M23-rebelle in die ooste van die Demokratiese Republiek van die Kongo doodgeskiet het nie.
Die vakbond se nasionale sekretaris, Pikkie Greeff, sê die voorval het in die Goma-gebied gebeur.
‘n Weermagwoordvoerder, brigadier Xolani Mabanga, het bevestig dat Suid-Afrikaners betrokke was, maar wou nie sê of hulle skerpskutters is nie.
Meer as 1 300 Suid-Afrikaanse soldate is deel van ‘n VN-eenheid, wat ‘n mandaat het om teen Kongolese rebelle op te tree. – RSG
“‘n Plan om ‘n belonging te betaal aan mense wat inligting oor beplande misdaad in die Stad Kaapstad aan die polisie verskaf, is positief en kan lei tot pro-aktiewe optrede om misdaad te bekamp,” sê mnr. André Fourie, Vryheidsfront Plus-raadslid vir die Stad Kaapstad.
Hy sê dit was lankal nodig aangesien Suid Afrika se publiek begin om vertroue in die land se veiligheidsmagte te verloor en almal gebuk gaan onder die uiters gevaarlike misdaad-situasie in die land.
Volgens mnr. Fourie skep daaglikse beriggewing oor misdaad die indruk dat mense nêrens meer veilig voel nie, nie eens in die hul eie wonings nie.
“Inbrake, aanrandings, verkragting en moord raak selfs in sogenaamde veilige woongebiede ‘n alledaagse. Voorvalle van klipgooi en die oprigting van padversperrings op openbare roetes kom gereeld voor en paaie, selfs hooftoevoerroetes soos die N2, word meer as ooit om hierdie rede gesluit en herinner byna aan ‘n ‘oorlogsituasie’.
“Die optrede van ontevredenes het selfs al gelei dat ontlasting voor regeringsgeboue en in die Kaapstad Internasionale Lughawe uitgegooi is en brandende motorbande is ‘n gereelde verskynsel.
“Dit voel asof misdadigers ons gyselaar in ons eie land hou.
“Nie eens die stad se burgemeester kon ‘n bevredigende antwoord verskaf oor probleme wat oproermakers op die N2 veroorsaak nie. Dit blyk dat daar bloot nie die mannekrag is om die pad heeltyds te patrolleer nie,” sê mnr. Fourie.
Volgens hom is ’n oplossing hiervoor ‘n inligtingsintelligensie-eenheid wat inligting kan inwin oor probleempunte sodat daar pro-aktief opgetree kan word. Hy sê as die kwaaddoeners drie-uur soggens opstaan, moet die veiligheidsmagte reeds inligting daaroor hê en hulle inwag.
“Maar dit gebeur nie. In baie gevalle word oortreders net verjaag en nie eens aangekeer nie. Die plan on ‘n belonging uit te reik vir inligting oor misdaad kan hier van groot nut wees en kan bydra om weer ordelikheid in Kaapstad te bewerkstellig,” sê mnr. Fourie.
Dit is nou duidelik dat Aarto ‘n mislukking is en niks minder is nie as ‘n peperduur Wit Olifant en die Vryheidsfront Plus versoek opnuut dat dit afgeskaf word om verdere onnodige vermorsing van geld te vermy, sê adv. Anton Alberts, die Vryheidsfront Plus se parlementêre woordvoerder oor vervoer. Die VF Plus het ‘n parlementêre vraag in die verband aan die minister gerig.
Volgens adv. Alberts is dit duidelik dat Aarto (die Wet op die Administratiewe Beregtiging van Padverkeersmisdrywe) nie in sy doelwit slaag om paaie veiliger te maak nie, en dit kan nie meer ontken word dat die projek nie lewensvatbaar is nie.
In die media is nou berig dat Aarto-boetes van meer as R2 miljard nog nie ingevorder is nie. Dit is luidens ’n verslag wat vandeesmaand aan Dipuo Peters, minister van vervoer, oorhandig is.
Die probleem met die invordering van verkeersboetes word veroorsaak deur die verouderde eNatis-stelsel wat motoriste se kontakbesonderhede bevat en wat veroorsaak dat boetes ingevolge Aarto nie by oortreders uitkom nie, lui die verslag.
Volgens adv. Alberts word feitlik geen boetes meer ingevorder nie en die verslag aan minister Peters bevestig dit. “Dit maak geen sin om daarmee te volhard nie. In die boekjaar 2011-12 is byna 90% van boetes nie betaal nie en in 2012-13 slegs 87%.
“Die VF Plus het onlangs ook gewaarsku teen ‘n voorstel om met verhoogde verkeersboetes die publiek te dwing om die mislukte stelsel van ondergang te red. Dit was nadat die Agentskap vir Padverkeersmisdrywe (RTIA) voorgestel het dat verkeersboetes verdubbel word om Aarto te red.
“RTIA het toe ook erken dat die Johannesburgse metro-polisiediens (JMPD) sedert Desember verlede jaar meer as R60 miljoen bestee het om 2,4 miljoen Aarto-verkeersboetes per geregistreerde pos uit te stuur. Nie eens 5% daarvan is binne die erste maand betaal nie.
“Hierdie boetes het verval aangesien RTIA nie die posgeld kan bekostig nie. Dit is duidelik ‘n chaotiese stelsel wat van die begin af gedoem was tot mislukking.
“Aarto is niks meer nie as ‘n sinlose vermorsing van geld sonder enige resultate, en ons versoek die minister om dit nou stop te sit,” sê adv. Alberts.
Suid-Afrikaanse skerpskutters wat deur die Verenigde Nasies in die ooste van die Demokratiese Republiek van die Kongo ontplooi is, het ses M23-rebelle doodgeskiet.
“Skerpskutters het teikens op minstens ses geleenthede raakgeskiet,” het adv. Pikkie Greeff van die Suid-Afrikaanse Nasionale Weermagunie (Sanwu), gesê.
“In een geval was die teiken 2,2 km weg.”
Brig. genl. Xolani Mabanga, woordvoerder van die weermag, het bevestig dat Suid-Afrikaanse magte op rebelle losgebrand het, maar kon nie uitbrei oor die berigte van die skerpskutters nie.
‘n Tanzaniese soldaat van die Verenigde Nasies (VN) is dood en twee Suid-Afrikaanse soldate is Woensdag gewond in gevegte met M23-rebelle.
Volgens Reuters is verskeie burgerlikes ook in die gevegte dood.
Pres. Jacob Zuma het Donderdag bevestig dat drie Suid-Afrikaanse soldate sedert die naweek gewond is in gevegte in die land.
Suid-Afrikaanse soldate is deel van die VN se ingrypingsmag in die land. – Sapa/AFP
Gauteng kan die naweek snerpende koue verwag.
Saterdag, die laaste amptelike wintersdag voor lente aanbreek, gaan ‘n behoorlike wintersdag wees en Sondag, wat lentedag is, gaan dit oor groot dele van die land steeds bitter koud wees.
Die Suid-Afrikaanse Weerdiens (SAWD) het gesê ’n bielie van kouefront wat die laaste twee dae swaar reëns in die Wes-Kaap gebring het, sal Vrydagaand in Gauteng arriveer en sal Saterdag 11ºC kouer as Vrydag wees.
In dele van Johannesburg sal die kwik Vrydagnag en Saterdag-aand tot -2ºC daal. Drie mense is reeds dood weend die koue in die Kaap.
Die verwagte minimum- en maksimumtemperature vir Vrydag en Saterdag is -2ºC/13ºC en -2ºC/15ºC in Johannesburg en 2ºC/15ºC en 0ºC/18ºC in Pretoria.
Reën word nie vir die noordelike dele van die land voorspel by die bibberweer nie.
Die verswakkende rand en die stygende olieprys het gelei tot baie bespiegelings dat die Suid-Afrikaanse motoris ‘n massiewe brandstofprysstyging in die gesig staar. Die ekonoom Mike Schüssler sê die toename in September sal ‘n paar sent wees, maar het gewaarsku dat ‘n massiewe toename vir Oktober te wagte is.
“Dit is baie donker op die oomblik vir Oktober, maar synde alles politieke dinge, is dit baie moeilik om te voorspel wat gaan gebeur met die olieprys, maar ek dink in alle waarskynlikheid gaan ons ‘n baie groot toename in die prys sien van brandstof vanaf Oktober, waarskynlik 40 tot 50 sent.“
Oor die voortgesette stakings in die land, sê Schüssler hulle nie help om die geldeenheid bestendig te hou nie.
“Ek dink dit is meer as net ‘n staking. Daar is beslis ‘n bekommernis oor alle ontluikende markte op die oomblik. So die meeste ontluikende markte is tans onder druk. Sekerlik sal die stakings nie help om die Suid-Afrikaanse geldeenheid te bestendig nie.“
Die rand het voortgegaan om te sleg presteer. Die geldeenheid het ‘n nuwe vier–jaar laagtepunt bereik vroeër in die sessie met R10,51 teenoor die Amerikaanse dollar Woensdag.
”n Rukkie gelede was die rand op R10,31 teenoor die dollar. Die rand se wisselvalligheid het voortgegaan omdat beleggers senuagtig is oor die krisis in Sirië en daarom ontluikende markte se geldeenhede verkoop het.
Die Suid-Afrikaanse regering sê die Verenigde Nasies se wapeninspekteurs moet meer tyd gegun word om hulle ondersoek na bewerings dat chemiese wapens in Sirië gebruik is, te voltooi.
Die regering sê hy is bekommerd oor wat hy noem die gevaarlike retoriek deur Westerse regerings soos Amerika en Brittanje oor die moontlikheid van militêre ingryping in Sirië.
Volgens die regering sal meer geweld nie bydra tot ‘n volhoubare oplossing vir die oorlog-geteisterde land nie. Die regering het ‘n beroep op die VN Veiligheidsraad gedoen om saam te werk om ‘n onderhandelde skikking vir die krisis te bereik.
Intussen het Desmond Tutu in ‘n verklaring gesê Egipte en Sirië het eerder humanitêre hulp as militêre hulp nodig. “Diegene wat selfsugtig ekonomiese, ideologiese en godsdiensmag uitoefen kan nie volhou om die wense van die meerderheid van gewone en goedbedoelende lede van die gemeenskap te saboteer nie.”
Die sekretaris-generaal van die VN, Ban Ki Moon, sê intussen die inspekteurs behoort teen môre hulle werk af te handel. Hy sê hulle sal Saterdag uit die land vertrek.
Die assistant-redakteur van City Press, Adriaan Basson, is as die nuwe redakteur van Beeld aangestel, het Sapa Woensdag berig.
“Ek is baie opgewonde om by Beeld aan te sluit. Die koerante is ‘n bedryf wat deur reuse-uitdagings in die gesig gestaar word wat betref die sakemodel,” het Basson gesê.
“Ongeag in watter taal jy skryf, jy moet die beste wees in wat jy doen en my enigste doelwit is om Beeld die beste in die land te maak,” het hy gesê.
Basson het bygevoeg dat hy op 1 Oktober die leisels by Peet Kruger, die uitgaande redakteur, sal oorneem.
Vroeër vanjaar het die Suid-Afrikaanse Nasionale Redakteursforum (Sanef) Basson as voorsitter van sy mediavryheidskomitee aangestel.
Hy is ‘n ondersoekende joernalis en die skrywer van die boek Finish & Klaar: Selebi’s Fall from Interpol to the Underworld oor die ondergang van Jackie Selebi, eertydse Suid-Afrikaanse polisiehoof en president van Interpol. – Sapa
Die Sentraal-Afrika president moes Woensdag krygshere van sy voormalige rebellie dreig om hul gebiede in die hoofstad Bangui te ontruim om weerspannige gewapende groepe te onderdruk .
In een van die grootste pogings nog om orde te herstel na Maart se staatsgreep kom ‘n dag nadat die Franse president François Hollande gesê het dringende optrede is nodig dat die Sentraal-Afrika Republiek nie in ‘n mislukte staat verval nie.
Die land se nuwe opperhoof, hoof van die voormalige rebellegroep Seleka, Michel Djotodia, het sy oproerige vegters – wat van verkragting, teregstellings en plundering beskuldig is – van hul verantwoordelikhede gestroop. Hy het die polisie en gendermerie ingestuur om orde te probeer herstel.
Gerugsteun deur troepe van die Afrika-Unie se Internasionale sending ( MISCA ).
Boy-Rabe is een van die knelpunte en word beskou as ‘n vesting van ondersteuners van Francois Bozize, die voormalige president wat deur die Seleka staatsgreep verdryf is na 10 jaar in die mag.
In die aangrensende distrik van die krotbuurt Boeing, het duisende mense gevlug van die gevegte en plundering en toevlug gevind op Bangui-lughawe se aanloopbane, het ‘n lughawe-amptenaar het gesê op voorwaarde van anonimiteit .
Ten minste twee vlugte is vertraag deur die aanloopbaan-inval, het die bron gesê , een ‘n Air Maroc-vliegtuig en ‘n ander van Air France .
Djotodia se staatsgreep is met gedempte internasionale kritiek begroet en die voormalige rebellebaas is uiteindelik ingesweer as president vroeër vandeesmaand met die taak om die land tot ‘n verkiesing te lei binne 18 maande.
Hollande ‘n beroep op die Verenigde Nasies en die Afrika-Unie gedoen om die “Somalisering” van die verarmde landte keer.
SAR met 4,6 miljoen inwoners, word gekenmerk deur die verslae van wydverspreide verkragtings, werwing van kindersoldate, wapenssmokkel, groot bevolkingsverplasings en ernstige wanvoeding sedert die staatsgreep in Maart.
Die land is vol onontginde minerale rykdom en grens aan ander chronies onstabiele lande soos die Kongo , Tsjad en Suid-Soedan. Frankryk het nie meer die militêre spierkrag om sy eertydse kolonies tot gehoorsaamheid te dwing nie, maar probeer sy invloed herstel deur van internasionale invloed gebruik te maak.
Die Suid-Afrikaanse weermag sê geen Suid-Afrikaanse soldate is dood in gevegte in die Demokratiese Republiek van die Kongo nie.
‘n Woordvoerder, brigadier-generaal Xolani Mabanga het berigte dat Suid-Afrikaanse soldate dood is, as propaganda afgemaak.
Mabangu sê die weermag sal binnekort ‘n mediakonferensie hou om die publiek op datum te bring met Suid-Afrika se deelname aan ‘n Verenigde Nasies-mag in die DRK.
Die weermag het gister aangekondig dat ‘n vyfde Suid-Afrikaanse soldaat gewond is in gevegte met rebellemagte.
Intussen sê die VN ‘n Tanzaniese lid van die VN-vredesmag is dood terwyl hulle die Kongolese weermag ondersteun het in gevegte met rebelle naby die oostelike dorp, Goma. – RSG
Die vier maande oue baba wat vroeër vandeesmaand in Ceres verkrag is, is steeds in die Rooikruis-kinderhospitaal en dokters weet nie wanneer sy ontslaan sal word nie.
‘n Aantal gekoördineerde bomontploffings in die Irakkese hoofstad, Bagdad, het die lewe van minstens 80 mense geëis en duisende mense beseer.
Die ontploffings wat tydens spitsverkeer plaasgevind het, het glo Sjia-woonbuurte geteiken. In die noordelike omgewing van Kadhimiyah, die tuiste van ‘n prominente, goudkoepel Sjia–heiligdom, is die ergste getref.
Twee bomme het afgegaan in ‘n parkeerterrein, gevolg deur ‘n selfmoordbommotor wat toeskouers wat op die toneel saamgedrom het, geteiken het. Polisie het gesê 10 mense is dood en 27 gewond in die aanval.
In nog ‘n ontploffing, Dinsdag, is sewe mense in die suidooste van Bagdad dood.
Geweld het in onlangse maande weer in Irak opgevlam te midde van verhoogde spanning tussen Soenni- en Sjia-Moslems.
Sover vanjaar het geweld die lewe van meer as 4 000 burgerlikes geëis; nog bykans 1 000 is beseer.
Die snerpende koue in die Wes-Kaap het sy eerste lewe geëis.
Paramedici van ER24 sê hulle het Dinsdag van ‘n ongeluk in Kuilsrivier teruggekeer toe die polisie die beamptes versoek het om stil te hou.
Polisiebeamptes het op twee mans afgekom wat bewegingloos in ysige toestande onder kartonhouers gelê het.
Een van hulle het reeds verkluim.
Die tweede man was in ‘n kritieke toestand en is in die Tygerberg-hospitaal opgeneem, waar hy nog herstel.
Die Suid-Afrikaanse Weerdiens sê die kouefront sal die Wes-Kaap tot Vrydag teister en die reënweer sal tot Saterdag voortduur.
Twee hoofpaaie in die Kaapse Metro en Bolandstreek is gesluit weens swaar reën die afgelope 24uur.
‘n Woordvoerder van die provinsiale departement van vervoer sê die pas tussen Franschhoek en Villiersdorp is gisteraand gesluit na ‘n modder- en rotsstorting.
Verkeer van Franschhoek na Villiersdorp word herlei na die N2.
Chapmans Peak rylaan tussen Houtbaai en Noordhoek ook gesluit na ‘n modderstorting. Albei paaie sal gesluit bly tot verdere kennisgewing. – Sapa
