Category: Sport

Vir slegs die tweede keer in die geskiedenis het die eens trotse Springbokrugbyspan oor die naweek teen die Argentynse Poemas in die stad Salta verloor met 24-26 verloor. Die plaasvervangerlosskakel Santiago González Iglesias het in die 78ste minuut van die wedstryd die laaste spyker in die Springbokdoodskis geslaan toe hy met ‘n strafskop geslaag het.

Dit was die eerste oorsese toetswedstryd onder die afrigting van Allister Coetzee wat begin het om die skroewe van rassetransformasie aan te draai, soos wat die ANC en die hoofstroommedia van hom vereis, met die resultaat dat Suid-Afrika nie eens teen die swakste span in die suidelike halfrond kan wen nie. Teen Nieu-Seeland sou Suid-Afrika baie ver verloor het.

Nicolás Sanchez het twee strafdoele behaal, nadat Elton Jantjies die Springbokke aanvanklik laat voorloop het, en het ook ‘n uitstekende drie deur Joaquin Tuculet verdoel sodat Argentinië teen rustyd met 13-3 voorgeloop het.

Kenners is dit eens dat sowel Jantjies as Morné Steyn swak geskop het. Nietemin het Jantjies na rustyd met ‘n strafskop geslaag en het Bryan Habana ‘n drie gedruk, om die telling gelyk te maak. Kort hierna het Argentinië egter weereens met tien punte voorgeloop toe Juan Martin Hernández ‘n voortreflike kruisskop in die rigting van Juan Manuel Leguizamon geloos het, wat oorgeduik het. Hernández het die drie verdoel en agterna nog ‘n strafskop oorgeskop.

Morné Steyn het met twee strafskoppe geslaag, terwyl Pieter-Steph du Toit in die 68ste minuut ‘n drie gedruk het om Suid-Afrika met 24-23 te laat voorloop, alvorens Iglesias die laaste woord met sy strafskop ingekry het.

Argentinië: Drieë Tuculet, Leguizamon. Cons Sánchez, Hernández. Strafskoppe Sánchez 2, Hernández, González Iglesias.

Suid-Afrika: Drieë Habana, Du Toit. Doelskop Jantjies. Strafskoppe Jantjies 2, Steyn 2.

Die Austalies gebore Eddie Jones wat die Stormers in 2016 sou afrig, is vrygestel van die pos om vir Stuart Lancaster as die Engelse nasionale rugby afrigter ta vervang. Die Engelse rugbyunie het die Stormers sowat R2,1 miljoen betaal vir Jones se dienste.

Jones wat wêreldwyd beskou word as een van die mees ontortodokse afrigters, het met die pas afgelope rugbywêreldbeker weer sy staal gewys toe sy span, Japan, die magtige Springbokke in een van die rondtewedstryde ten aanskoue van die wêreld effens afgestof het. Dit was seker een van die grootste rugbyverrasings van alle tye en dan een wat ons en alle Springbokondersteuners baie gou sal wil vergeet. Jones was ook Jake White se regterhand tydens die Springbokke se tweede wêreldbekeroorwinning in 2007.

Alle rugbyoë sal vandag op Engeland gerig wees waar na verwagting die aankondiging dat Eddie Jones die nuwe Engelse afrigter is waarskynlik binne enkele ure gemaak gaan word. Dit sal die eerste keer in die geskiedenis wees dat Engeland ‘n oorsese afrigter aanstel.

Wie sal nou nee sê vir die klomp ponde wat na jou kant toe gaan kom as jy so ‘n aanbod van die wêreld se rykste rugbyunie ontvang?

Die befaamde All Black rugbykaptein Ritchie McCaw het aangekondig dat hy na 14 jaar sy rugbysteuwels ophang. Daar was baie spekulasie oor die dubbele wêreldbekerwennerkaptein se toekoms na die 2015-wêreldbeker.

Ritchie het ‘n ongelooflike loopbaan met net so ‘n ongelooflike klomp statistieke in sy tyd in die swart trui bymekaargemaak. Van die 413 oorwinnings wat die All Blacks sedert 1903 oor almal in die wêreld behaal het het McCaw 131 oorwinnings gesmaak oftewel 32% van alle All Black-wenne. McCaw het 148 toetse vir sy land gespeel waarvan hy in 110 toetse die kaptein was. McCaw het 27 drieë gedruk wat hom algeheel in plek nommer 13 plaas: een drie meer as sy spanmaat Conrad Smith.

McCaw het in 2001 vir die eerste keer vir die All Blacks gespeel en sedert sy debuut in die swart trui het hy slegs 37 toetse misgeloop as gevolg van beserings van een of ander aard. Ritchie het 37 toetse teen die Wallabies gespeel, die meeste ooit deur enige land se speler teen die Aussies, waarvan hy slegs 6 toetse verloor het. Daar het 132 nuwe All Blacks hul debuut vir die swart truie gemaak sedert McCaw in 2001 die swart trui oor sy kop getrek het. McCaw het die Bledisloe-beker nie minder nie as 10 keer bo sy kop gelig en in die Drienasieskampioenskap was hy vier keer die seëvierende kaptein. Voeg daarby dat hy twee keer die wêreldbeker kon lig. In 61 toetse in Nieu-Seeland het McCaw slegs twee keer verloor. McCaw was ook al drie keer die wêreldrugbyspeler van die jaar. McCaw het insgelyks al teen 18 van die top-20-rugbynasies toetse gespeel; die enigste twee lande waarteen hy nog nooit gespeel het nie is Uruguay en die VSA. Ritchie MCaw het ook al op 39 verskillende stadions toetse gespeel. Hy was 12 keer vir toetse in Suid-Afrika en het al 12 keer op jaareindtoere na Europa getoer.

McCaw het in sy loopbaan slegs teen 4 nasies ooit verloor: Suid-Afrika (6 keer), Australië (6 keer), Engeland (2 keer) en Frankryk (1 keer).

Hierdie nommer-7-flank is werklik een van die heel grootste nommer sewes ooit! Die rugbywêreld groet Ritchie McCaw met ‘n glimlag!