Category: Sokker

Engeland in sak en as oor sokkerneerlaag teen kleine Ysland

Die Engelse sokkerspan het gisteraand met 2-1 teen Ysland, een van die kleinste volkere ter wêreld, in ‘n uitspeelwedstryd vir die Europese sokkerbeker verloor. Ysland beskik oor net meer as 300 000 burgers teenoor Engeland se 55 miljoen mense wat in die suide van Groot Brittanje woon.

Op die vooraand van die wedstryd het die Sun-koerant geskryf: “Vir Engeland om teen Ysland te verloor, sou die grootste verleentheid OOIT wees.”

Na afloop van die wedstryd het Engelse ondersteuners gesing: “Julle is dit nie werd om die trui te dra nie.” Die Engelse afrigter, Roy Hodgson, het direk na die wedstryd op sy swaard geval deur sy bedanking in te dien. Ysland sal Sondag in die laaste-agt teen Frankryk, die gasheerland, te staan kom.

Ysland is 34ste op die wêreldsokkerranglys. Wat dit nog erger maak, is dat hulle oor geen professionele sokkerliga beskik nie. Trouens, die Yslanders kan net vir ‘n paar maande per jaar sokker speel as hul sokkervelde nie toegesneeu is nie. Dis ook nie eens hul nasionale sport nie. Hulle verkies handbal en visvang bo sokker.

Nadat Wayne Rooney vir Engeland ‘n strafdoel in die eerste paar minute aangeteken het, kon Engeland vir presies 34 sekondes feesvier totdat die Yslandse voorspeler Ragnar Sigurdsson dit gelykop 1-1 gemaak het, vanaf ‘n lang ingooi deur Gunnarsson.

In die agtiende minuut het Kolbeinn Sigthorsson die Engelse doelwagter Joe Hart gepypkan en die tweede doel in die hoekie van die net ingerol.

Na afloop van die wedstryd was die Engelse span so verslae dat hulle net op die veld bly lê het, terwyl die hele Ysland met reguit arms in die lug hande geklap het in wat die “Yslandse haka” genoem word. Dit was dié klein Skandinawiese landjie se beste vertoning nog in internasionale sokker deur “elf Engelse miljoenêrs in kortbroeke” te wys waar Dawid die wortels gegrawe het.

Op Twitter en ander sosiale media het Engelse sokkerondersteuners hul misnoeë betoon. Baie het getwiet dat hulle nou “Wallis toe wil emigreer”. Wallis is na dese die laaste span uit die Britse koninkryk wat nog nie uitgeskakel is nie.

28 June 2016
Euforie in Duitsland ná sokkeroorwinning

Miljoene mense dwarsdeur Duitsland het gisteraand tot in die vroeë oggendure feesgevier ná hul span dié van Argentinië met 1-0 geklop het om die voetbalwêreldbeker in te palm.

Die jong speler Mario Götze, wat gisteraand vir die eerste keer sy buiging in die nasionale span gemaak het, het in die tweede helfte van ekstratyd met ‘n manjifieke doel die Argentynse ondersteuners letterlik in trane gehad. Hoewel Duitsland voortdurende meer balbesit gehad het, kon hulle tot op daardie stadium nie daarin slaag om punte aan te teken nie. Ook Argentinië het ‘n paar gulde geleenthede verbrou en hul voetbalster, Lionel Messi, die hoogs besoldigde speler ter wêreld, kon nie aan die hoë verwagtinge wat van hom gekoester is, voldoen nie.

Mario Götze teken die wendoel vir Duitsland aan

‘n Kwartmiljoen mense het in die hoofstad, Berlyn, die wedstryd op ‘n groot skerm gevolg. Presies om 23:36 werp wildvreemde mense hul jubelend in mekaar in se arms op straat, in kroeë, stadions en biertuine.

Die kleure van die Duitse vlag, swart, geel en rooi is oral te siene. In die groot stede soos Berlyn, Hamburg, München en Frankfurt is klappers en vuurwerke afgevuur. Juigliedere soos “Oh, wie ist das schön”, “So ein Tag, so wunderschön wie heute” of die klassieke “Deutschlaaaand, Deutschlaaaand” het die nag oorheers.

Voor die Brandenburgpoort vier die ondersteuners fees

In weerwil van die groot vreugde het ‘n woordvoerder van die polisie egter bevestig dat daar geen probleme was nie en dat, vanuit ‘n wetsoortredingsoogpunt, alles “rustig gebly” het.

Reeds voor die aanvang van die wedstryd is die Berlynse toeskouersplek voor die Brandenburgpoort heeltemal beset en moes tienduisende aankomelinge teleurgesteld omdraai om die wedstryd elders te gaan kyk.

Ook in Hamburg het 50 000 op die Heiligegeesplein saamgedrom om die wedstryd te volg. Sekere hoofstrate is vir verkeer gesluit om die skares te kan hanteer.In Keulen, Stuttgart, Nürnberg en Freiburg vier duisende geesdriftiges fees. In Darmstadt word die verkeerstonnel gesluit weens juigende voetbalondersteuners wat dele van die stad vir motorverkeer ongegaanbaar maak.

Plekke by die Frankfurtse Commerzbank-Arena en die Olympiastadion in München was dae voor die tyd reeds uitverkoop: 50 000 aan die Mainrivier aanskou die triomf van hul span en 33 000 in München.

14 July 2014
Brasilië ontvang sokkerles auf Deutsch

Die Duitse sokkerspan het gisteraand vir Brasilië, die gunstelinge, met 7-1 doele in die halfeindstryd van die wêreldsokkerbeker geklop. Dit is die grootste neerlaag wat Brasilië in 100 jaar in ‘n internasionale wedstryd gely het.

Omdat sokker, soos rugby, ook die afgelope aantal jare deur FIFA verpolitiseer is, het die Duitse vertoning insgelyks skokgolwe deur die wêreld gestuur, met vele liberale kommentators op Twitter en elders wat verslae is dat ‘n hoofsaaklik blanke Europese span die multikulturele span van Brasilië so ver kon wen.

Die gewilde Duitse koerant, Bild, het ‘n foto van twee triomfantelike Duitse spelers, Miroslav Klose en Toni Kroos, op sy voorblad geplaas met die eenvoudige opskrif: “Danke! Wir lieben euch!” (Dankie! Ons is lief vir julle!)

Opvallend is egter dat die Duitse span sy triomf amper probeer wegsteek het en agterna die Brasiliese spelers omhels en vertroos het, asof daar vooraf opdragte was dat hulle nie die gasheerland – waar daar reeds onluste rondom sokkerkwessies plaasgevind het – moes aanstoot gee nie.

Ook in Brittanje en die VSA, waar anti-Duitse gevoelens en afguns oor Duitse ekonomiese prestasie gewoonlik net onder die oppervlak is, was daar groot teleurstelling dat Brasilië dermate verloor het. Sokker word in die VSA gesien as ‘n sport wat meer deur liberale, immigrante en ondersteuners van die Demokratiese Party gevolg word, dus was die Duitse oorwinning ‘n bitter pil om te sluk.

Swart Suid-Afrikaanse vroue op Twitter het grappe begin maak onder die hutsetiket #goodbyebrazilianhair en dat hulle op soek is na pruike met “Duitse hare”. Die Suid-Afrikaanse minister van sport, Fikile Mbalula, wat blykbaar met ‘n groot gevolg na Brasilië afgereis het, het op #goodbyebrazilianhair met die woord “Shame” geantwoord.

Die swart sokkerkommentators van die SAUK het hul egter verlekker in die Brasiliaanse vernedering, aangesien Brasilië voorheen die Bafana met 5-0 verpletter het. “Nou weet hulle hoe dit voel,” het een van hulle gesê.

Die linkse Londense koerant, The Guardian, beskryf die wedstryd só:

“Tot op dié stadium was Brasilië se wedstryde ‘n viering van kleur en geraas. Maar (gisteraand) was daar die onheilspellende geluid van stilte, asook ander geluide. By tye was dit iets naby aan vrees, ‘n vreemde gorrelgeluid wat telkens gehoor kon word as Duitsland elegant vorentoe gebreek het, met meer vernedering wat dreig. Die gesig van Brasilië, met hul ryk voetbalgeskiedenis, wat op dié wyse vermorsel word, was werklik skokkend.”

SAPA-AP het die wedstryd só beskryf:

“Brasilië het in sy 100 jaar van sokkergeskiedenis nog nooit so ’n groot nederlaag gely in enige internasionale toernooi nie en het nog nie so chaoties verdedig soos in die eerste 18 minute van die eerste helfte nie toe Duitsland vier doele aangeteken het, drie van hulle in net 179 sekondes.”

En verder:

“Stilte het oor die skare in die Mineirao-stadion neergedaal en party mense wat nie kon glo wat hulle sien nie, het in trane uitgebars.

Honderde mense het hul duur sitplekke al voor die rustyd, toe die telling 5-0 was, verlaat.

’n Deel van die skare het onwelvoeglikhede teen die span en pres. Dilma Rousseff gedreunsing.”

Vele Brasiliese vroue het geween oor hul span se ineenstorting voor die Duitse aanslag. Selfs die troosdoel wat byna per ongeluk in die doodsnikke van die wedstryd deur Brasilië se Oscar aangeteken is, het min reaksie ontlok.

Miroslav Klose, links, en Toni Kroos ná die wedstryd

Miroslav Klose het met sy doel in die eerste helfte die rekordhouer vir die meeste doele in wêreldbekersokker geword. Maar wat aangaande die Duitse span beïndruk het, is nie soseer die briljansie van die individuele spelers nie, hoe professioneel en goed hulle hul ook al van hul taak gekwyt het, maar die dissipline en goeie spanwerk. Die moeitelose en akkurate aangeë waaruit soveel doele binne slegs enkele minute opgetower is, laat enige ander span na amateurs lyk.

Sowel Nederland as Argentinië, wat vanaand om 22:00 SA tyd in die ander halfeindronde uitspeel, sal hul sokkies moet optrek as hulle nie Sondag ‘n ewe vernietigende voetballes van Die Mannschaft wil ontvang nie.

Doele het gisteraand só verloop:

Vir Brasilië:

Oscar (#11) 90′

Vir Duitsland:
Thomas Müller (#13) 11′
Miroslav Klose (#11) 23′
Toni Kroos (#18) 24′, 26′
Sami Khedira (#6) 29′
André Schürrle (#9) 69′, 79’

9 July 2014
Sokkersterre se inkomste laat rugbyspelers na armblankes lyk!

Die ontsteltenis in Brasilië oor die onlangse besering van die jong Brasiliaanse speler Neymar maak ook sin as die finansiële implikasies in ag geneem word. Die oordragfooi wat die Spaanse klub Barcelona betaal het om hom van die Brasiliaanse klub Santos te bekom, was nie minder nie as €57,1 miljoen (ongeveer R855 miljoen) nie.

Lionel Messi in 2009

Dié bedrag is deur die visevoorsitter van Barcelona, Josep Maria Bartomeu onthul. Die bedrag om Neymar van sy verpligting teenoor Barcelona vir die volgende vyf jaar vry te stel, is €190 miljoen (ongeveer R2,9 miljard). Neymar se oordragfooi is egter maar tiende op die lys van oordragfooie wat al in sokker betaal is.

Die hoogste oordragfooi wat tot dusver betaal is, was vir Gareth Bale. Real Madrid het in 2013 tussen €90 en €100 miljoen (ongeveer R1,5 miljard) betaal om hom van die Britse klub Tottenham Hotspur te bekom. Real Madrid hou ook die rekord vir die naasduurste speler van alle tye, die Portugees Cristiano Ronaldo wat hulle vir €94 miljoen van Manchester United bekom het.

Die jaarlikse salarisse van die spelers is feitlik ewe astronomies. ‘n Speler by een van die top- Europese klubs kan tot €20 miljoen (R300 miljoen) per jaar aan salaris en borgskappe verdien. Op die jeugdige ouderdom van 22 bevind Neymar hom reeds in dié kategorie, maar hy word slegs as die 13de rykste voetbalspeler ter wêreld gereken.

In Maart 2010 het die tydskrif France Football die Argentyn Lionel Messi, wat ook in die huidige wêreldbeker te siene is, bo-aan die lys van die rykste voetbalspelers geplaas, voor David Beckham en Cristiano Ronaldo. Op die daardie stadium het Messi €33 miljoen (ongeveer R500 miljoen) per jaar aan salaris, bonusse en borgskappe verdien. In Mei vanjaar het Forbes egter vir Messi tweede ná Cristiano Ronaldo geplaas. Oor die afgelope jaar het Messi blykbaar $65 miljoen verdien.

Messi se “uitkoopklousule” soos dit genoem word, is €250 miljoen. Hy speel insgelyks vir Barcelona en vir ‘n ander klub om hom uit te koop, sou dus €250 miljoen, oftewel ‘n verbysterende R3,75 miljard kos. Dit is meer as wat sommige genoteerde Suid-Afrikaanse maatskappy op die aandelebeurs werd is.

Hierteenoor kan ‘n toprugbyspeler en Springbok soos Victor Matfield tot R6 miljoen per jaar op die kruin van sy loopbaan verdien, minder as ‘n honderdste van wat Lionel Messi of Ronaldo jaarliks inoes…

8 July 2014
‘Uitbarsting van rassisme’ tydens wêreldbekersokker ná Neymar-besering

Nadat ‘n swart speler van Colombië die jong Brasiliese sokkerster, Neymar (volle name Neymar da Silva Santos Júnior) beseer het, het ‘n “uitbarsting van rassisme” gevolg en het die Colombiaan etlike doodsdreigemente ontvang.

Brasiliërs op Twitter vaar uit teen die swart Colombiër, Juan Camilo Zuniga, wat Neymar se rugwerwel gekraak het en huiwer nie om na sy ras te verwys nie. In die sokkerwêreld – ook in Europa – bestaan daar ‘n algemene opvatting by ondersteuners dat swart spelers makliker as blankes die reëls oortree en daarmee die spel bederf, asook beserings veroorsaak.

Daarom is die wêreldbekertoernooi in Brasilië tot “die toernooi teen rassisme” verklaar en word daar by elke wedstryd ‘n eed deur die spelers teen rassisme afgelê en word baniere teen rassisme op die veld vertoon.

Zuniga se vuilspel teen Neymar, wat nou in ‘n rassevoorval ontwikkel het

Dit lyk egter asof dit geen uitwerking gehad het nie, want die Brasiliërs is woedend vir Zuniga, dermate dat ‘n Franciskaanse monnik van Sao Paulo, David Santos, dit nodig geag het om sy landgenote te betig. “Dit mag verrassend wees vir buitestaanders, maar die wyse waarop ons Colombiese broer behandel word, toon weereens dat Brasilië een van die mees rassistiese lande ter wêreld is.” Santos is hoof van ‘n liggaam genaamd Educafro, wat swart en voorheen benadeeldes vir universiteitstoelatingseksamens voorberei.

Die swart Colombiër is deur FIFA kwytgeskeld, wat aangekondig het dat daar geen tugstappe teen hom gedoen sal word nie.

Die New York Times, die wêreld se mees invloedryke liberale koerant, het insgelyks die voorval aangegryp om Brasilië daarvan te beskuldig dat hy nog nie die “erfenis van slawerny verwerk het nie”. Die koerant kritiseer ook die feit dat blankes steeds die topvlakke van die regering en die privaatsektor “oorheers”.

Brasilië het in 1888 slawerny afgeskaf en daarmee gelykheid aan sy swart inwoners verskaf. Meer as die helfte van die land se inwoners is egter swart of van gemengde ras, wat die land die grootste swart bevolking van enige land buite Afrika gee.

In navolging van die VSA, Brittanje, Suid-Afrika en ander Engelse lande, het Brasilië onlangs ook regstellende aksie ingestel om die aantal swart studente aan openbare universiteite te verhoog en kwotas vir swartes in die staatsdiens in te stel. Die land beskik ook oor wetgewing wat rasse- en etniese diskriminasie verbied.

Vroeër vanjaar was daar egter ‘n rassevoorval in die land wat volgens linkses tot slegs ‘n “ligte straf” gelei het. Tydens die voorval het ondersteuners van die suidelike klub Esportivo op ‘n swart skeidsregter, Marcio Chagas da Silva, geskree dat hy moet “teruggaan oerwoud toe” en het piesangs op sy motor gesmeer. ‘n Sokkerhof het die klub beveel om ‘n kleinerige boete te betaal en om vyf wedstryde weg van hul tuisveld te speel. In Sao Paulo het ondersteuners vroeër vanjaar blykbaar “rassistiese beledigings” aan die middelveldspeler Marcos Arouca da Silva geskree.

8 July 2014
Frankryk, Duitsland deur na kwarteindronde van wêreldbekersokker

Sowel Frankryk as Duitsland het gisteraand geseëvier in hul uitspeelwedstryde, onderskeidelik oor Nigerië en Algerië, en sal mekaar in die kwarteindronde van die wêreldsokkerbeker in Brasilië ontmoet.

Beide Europese spanne het egter gesukkel om die mas teen hul swakker opponente op te kom. Nigerië se reusesokkerspelers het die baan op en af gehardloop en het by tye die Franse span, wat insgelyks uit ‘n meerderheid swart spelers bestaan, oorheers. Eers toe Frankryk ná rustyd met ‘n behoorlike wedstrydplan vorendag kom, het hulle begin om die doelhok van die Nigeriërs te bedreig. Ná verskeie mislukte pogings het Paul Pogba ‘n kopskoot met slegs 11 minute speeltyd oor, ingekry.

Joseph Yobo van Nigerië het sy span se lot verseël toe hy ‘n eie doel aangeteken het, om Frankryk met 2-0 te laat wen.

Franse sokkerspan vier fees ná die wedstryd teen Nigerië

Die wedstryd tussen Duitsland en Algerië was volgens kenners een van die opwindendstes tot dusver en is eers gedurende ekstratyd beslis. Beide spanne het nie minder nie as 38 keer probeer punte aanteken – 28 keer deur Duitsland. Dit verteenwoordig ‘n rekord vir ‘n wedstryd tydens die huidige wêreldbeker.

Andre Schürrle het kort ná die aanvang van ekstratyd in die 92ste minuut ‘n doel vir Duitsland aangeteken en só verligting gebring. Hy het die bal van Thomas Müller vanaf ‘n kruisskop ontvang en dit toe met sy hak verby die Algerynse doelwagter Rais M’Bholhi in die net ingeskop.

In die 119de minuut slaag Mesut Ozil vir Duitsland met ‘n hoë skop na die dak van die doelhok en laat sy span sodoende met 2-0 voorloop.

‘n Minuut of twee later teken Abdelmoume Djabou ‘n doel vir Algerië aan sodat die Algeryne met eer uit die stryd tree, nadat hulle Duitsland vir twee ure goed besig gehou het.

Vanmiddag om 18:00 speel Switserland teen Argentinië om te bepaal wie na die kwarteind deurdring. Die wedstryd word regstreeks op SABC2 uitgesaai. Switserland, wat vanjaar ‘n baie goeie span het, het nog nooit vantevore teen Argentinië kon wen nie. Beroepswedders stel die kanse vir vanmiddag se wedstryd só:

Argentinië wen: 1/2

Switzerland wen: 13/2

Gelykop: 17/5

Lionel Messi in 2009

Die Argentynse span word aangevoer deur Lionel Messi, wat gewoonlik vir die Barcelona-klub speel en naas Cristiano Ronaldo van Portugal tans as die beste speler ter wêreld beskou word.

In vanaand se tweede wedstryd speel België uit teen die VSA, om 22:00 Suid-Afrikaanse tyd. ‘n Kykertal van tussen 13 en 16 miljoen word op die sportkanaal ESPN verwag en blykbaar raak die Amerikaners ook toenemend sokkermal, veral as hul span op die veld is.

1 July 2014
Gauteng bestee R4m aan sokkerkaartjies

Die provinsie Gauteng het R4 miljoen aan 4613 kaartjies vir die sokkerwêreldbeker bestee, het die premier Nomvula Mokonyane gister laat blyk.

Die besluit om die kaartjies te koop was gegrond op “die behoefte van die regering om stappe te neem om die geleentheid te bied aan inwoners van Gauteng wat nie die kaartjies kan bekostig nie om sekere van die wêreldbekerwedstryde by te woon,” het sy in Johannesburg tydens die provinsie se uitvoerende raadsvergadering gesê.

Meer as 3000 kaartjies is aan skole, weeshuise, spesiale tuistes en amateursportklubs versprei.

“Ons het dié R4 miljoen as ‘n provinsie bestee, nie vir onsself nie en nie vir ons famlilies nie.

Die res van die kaartjies was bestem vir “strategiese vennote”.

“LUR’e (provinsiale ministers) het kaartjies ontvang vir die doel om met die regering se strategiese vennote te netwerk en as gasheer op te tree.”

Mokonyane het die mense van Gauteng geloof vir die sukses van die toernooi. Die provinsie het omtrent 60% van die wedstryde aangebied, waaronder die openings- en sluitingswedstryde.

Die provinsiale regering het die Gauteng-stadstreekobservatorium gevra om die suksesse wat tydens die toernooi behaal is te bestudeer en te bepaal hoe om daarop voort te bou.

15 July 2010
Oranje deurgeroes

Nederland en Spanje was tagtig jaar lank in ‘n oorlog gewikkel. Nou het dit Spanje 120 minute op die sokkerveld geneem om die manne van Oranje te klop, en as wêreldkampioene van die veld te stap.

In ‘n taai wedstryd waarin beide spanne blapse na die doelhok gemaak het, het die Spanjaarde vlak voor die einde van 30 minute bykomende tyd ‘n Nederlandse span wat tot tien man uitgedun is, die doodskoot toegedien.

Die Spanjaarde het deurgaans beter daarin geslaag om balbesit te behou. Die Nederlanders se pogings om balbesit te wen is erg bemoeilik deur ‘n skeidsregter wat geelkaarte soos parkeerkaartjies aan veral die manne van Oranje uitgedeel, en uiteindelik ‘n rooi kaart opgediep het.

Soos verwag is, was dit ‘n affêre so taai soos ‘n outydse Wilsontoffie. Die hoogte bo seespieël het duidelik by die manne gespook, wat moes asem oorhou vir ‘n moontlike bykomende dertig minute, wat toe ook gerealiseer het.

Uiteindelik was Spanje net daardie titseltjie beter daaraan toe. Tog het Nederland so amper-amper die knoop deurgehaak toe Arjen Robben se doelskop in gewone speeltyd die Spaanse doelwagter se hakskeen getref en wyd getrek het. Uit ‘n duisend pogings sou Robben nie daardie titseltjie teenspoed verwag het nie, en moes dit juis in die belangrikste wedstryd van sy loopbaan gebeur.

Die eindfluitjie het heel waarskynlik vir Jabulani die tokkelossiebal geblaas. Min van die deelnemers aan die toernooi in Suid-Afrika sal graag weer met ‘n bal met so ‘n wil van sy eie wil speel. Ook in die eindstryd is verskeie balle bo-oor of langs die doelhok verby, of is spanmaats heeltemal “misgeskop” wanneer aangeval is. Dié effens meer aërodinamiese bal het in die binneland baie anders as by kusvlak gereageer, en spanne wat heen en weer kus toe en binneland toe gepiekel is om wedstryde te speel, moes deurlopend aanpas.

Фильчаков

12 July 2010
Deutschland Jawohl, Uruguay Eisj

Gietende reën en ‘n sopnat veld in Port Elisabeth was waarskynlik die vernaamste rede hoekom Duitsland en Uruguay nie die tipiese vrye spel gelewer het wat tradisioneel in die uitspeelwedstryd uitgestal word om die wêreldbeker se derde en vierde plekke te bepaal nie.

Maar dan was daar ook die Duitsers se vasbeslotenheid om met ‘n titseltjie eer uit die toernooi te tree (en Paul die seekat van ‘n calamari-einde te red), en Diego Forlàn, Uruguay se besielende kaptein.

Forlàn het soos ‘n Trojaan gespeel, self ‘n doel aangeteken en in die doodsnikke byna die telling gelykop gemaak toe hy Jabulani die tokkelossiebal teen die doelhok se bokant vasgeskop, en die bal oorgeseil het.

Die eindtelling van 3 – 2 in die Duitsers se guns was ‘n getroue weergawe van die wedstryd.

Nou lê die grote voor. Met ‘n alles-of-niks-situasie sal vanaand se wedstryd waarskynlik ‘n toffietaai affêre wees. Niemand, behalwe Paul, sal die uitslag met oortuiging voorspel nie.

Мильстрим

11 July 2010
Geskenke uit Spanje vir Oranje?

Suid-Afrikaanse kinders word vertel Kersvader bring kersgeskenke van die Noordpool af. Nederlandse kinders glo Sinterklaas kom van Spanje af…

Nou speel Oranje in die eindstryd teen Spanje, en Nederland sal ‘n behoorlike Piet Hein uit die hoed moet pluk om die span met kwiksilwer voetwerk te sink.

Spanje het Duitsland wat sonder sy voorste angels moes speel, met een nul geklop. Die Spanjaarde het met vernuftige voetwerk die Duitsers baie snoep met die bal behandel. Met die suinige balbesit kon die Duitsers nie hul strooptogte loods wat hulle die toernooi se doelevrate gemaak het nie.

Maar…die Duitsers het ook met veel minder vuur gespeel en hul aangeewerk was ook nie suiwer nie. So is Duitse besit gou nek omgedraai en nou speel Spanje in sy eerste wêreldbeker-eindstryd ooit.

Op papier is Spanje, die Europese kampioene, die gunsteling om Nederland te troef. Die Nederlanders het egter nog nie op alle silinders gevuur nie, en tog onoorwonne van die eindstryd deurgedring. Spanje self is gereeld die wisselvalligheid self en ‘n afdag gaan die een of ander tyd aanbreek. Maar selfs al speel Spanje soos Woensdag, behoort Nederland die pyp te kan rook.

Om vir die Nederlanders te kom Sinterklaas speel is egter nie in die Spanjaarde se gedagtes nie.

mega joker

7 July 2010
Kaap weer Hollands

Die Kaap is weer Hollands, en nou rus die taak op die Duitsers om hul lywe Piet Hein te hou en die gedugte Spaanse Silwerfloot te kelder om ‘n stamland-eindstryd te verseker.

Oranje het hul kleure voor die kroonprins Willem-Alexander en prinses Maxime getoon, en hul vinnigste wedstryd van die toernooi gespeel.

Maar Uruguay het nooit gaan lê nie, en die wedstryd was kort voor die einde skielik weer in die weegskaal toe die Suid-Amerikaners ‘n laat-doel aangeteken en die telling na 3 – 2 laat krimp het.

Die Nederlanders het hul hande vol gehad met die spoed oor die veld van die manne van Uruguay. Die spoed het menige Nederlandse strooptog in die stof laat byt.

Die wedstryd het twee van die toernooi se indrukwekkendste kapteinsdoele opgelewer. Eers het Oranje se kaptein, Van Bronckhorst ‘n langafstandmissiel in die net in gesool, en later het Uruguay se kaptein, Diego Forlàn ‘n bal gekerf wat soos ‘n mamba in die doelhok in gepik het.

Wesley Sneijder het hierna sy vyfde doel van die reeks behaal.

Arjen Robben, wat die opponente aanvanklik oorhoops gehad het deur in amper enige denkbare posisie op die veld op te duik en van die verkeerde voet af vreemde aanvalshoeke te skep, het Nederland se derde doel met ‘n kopskoot afgerond, en is kort hierna ‘n blaaskans gegee. Met die telling op 3 – 1 en die eindfluitjie op hande is gereken die koeël is deur die katedraal, maar Uruguay het ander planne gehad en Maxi Pereira het ‘n tonneltjie doelhok toe gevind en toegeslaan.

Vir die Suid-Afrikaanse toeskouers wat nie werklik met fynproewersokker vertroud is nie, sal dit manna uit die hemel wees as Duitsland die eindstryd haal. Die Duitsers het met strooptog-sokker ‘n doelefees beleef, en met Nederland wat aangesteek het, kan die twee spanne met verbete aanvallende spel die skare en kykers trakteer. Fynproewers mag die neuse optrek, maar dis rugbywêreld dié waar aanvallende spel as die beter soort spel beskou word.

Maar…dan sal Duitsland eers met Spanje moet afreken. En op papier is Spanje verreweg die gunsteling. Maar dis op papier, en die Duitsers is nog die span van die oomblik wat vrypostig genoeg was om ook ander spanne wat veronderstel was om hul meerdere te wees, in doelefeeste te verneder.

slots online casino

7 July 2010
Deutschland über (amper) alles

Die afranseling wat Argentinië by die Wêrelbekertoernooi se doelevraat, Duitsland, gekry het verbeter die kanse by die wedstryd dat Duitsland en Nederland se Oranje mekaar in die eindstryd die stryd gaan aansê.

Nederland kom in die halfeindstryd teen Uruguay te staan, terwyl Duitsland met die wenner van die wedstryd tussen Spanje en Paraguay sal moet afreken.

Nederland lyk byna verseker van ‘n plek in die eindstryd, met Uruguay wat ietwat gelukkig was om met die “laaste hoop van Afrika, Ghana,” af te reken.

Spanje het sy sokkies opgetrek toe dit begin lyk het of hierdie toernooigunsteling Italië en Engeland huis toe sou volg. Kenners is dit egter nie eens dat Spanje ‘n maklike taak sal hê nie.

Duitsland was in die derde minuut danksy ‘n kopskoot op die telbord, maar hierna het die doele lank opgedroog. Na rustyd het dit gelyk of die Argentyne die saak gou wou omkeer en beklink, maar dit was gou duidelik dat die Argentyne se asems gejaag het. Duitsland het hierna nog drie doele ingeryg, om sy reputasie as die toernooi se doelevraat gestand te doen.

Die ophef wat van Ghana gemaak is, het dié Afrikaland se dapper spelers geen guns gedoen nie. Net te veel van die voorspraakmakers vir Ghana het die span as swart span beklemtoon, en ‘n onsmaaklike rassekwessie van die saak gemaak. Wat hierdie voorspraakmakers betref, was die Algeryne nooit deel van die toernooi se Afrika-aanslag nie.

Duitsland het sy oorwinning tot die duidelike vreugde van kanselier Angela Merkel behaal, wat die gas van ‘n duidelike dikbek pres. Jacob Zuma was.

пескоструй для karcher

3 July 2010
Oranje deur na halfeind

“Oranje mag nou glo in die eindstryd.” So berig Trouw oor Nederland se historiese oorwinning oor Brasilië.

Die Oranje-masjien het Vrydagmiddag gewys dat die span die versneller nog dieper kan trap, en het die sokkerreus Braslië met die kous oor die kop huis toe gestuur.

Vooraf was tot die Nederlandse pers vol vraagtekens of Nederland sy oninspirende, maar wenpogings, nog ‘n stappie verder sou kon voer. Om Brasilië te troef sou dit nodig wees.Vir nege minute het dit gelyk of die manne in Oranje geglo het ‘n stadige tempo sal die ding doen, maar toe word ‘n langafstand-skop dwarsdeur die Nederlandse span tot by Robinho voor die doelhok geskop, en die bal tot agter in die net aangehelp.

Hierna het die Nederlanders wakkergeskrik, die poer-poer was iets van die verlede en kon die toeskouers na spel kyk wat die klien eindstryd waardig was. Hoewel Brasilië ‘n paar keer amper die doelhok gevind het, was dit die Nederlanders wat punte gekry het. Wesley Sneider, die derde keer die man van die wedstryd, het in beide doele ‘n voetjie in gehad. Die tweede keer het hy self sy kop gebruik en die doel syne gemaak.

Beide Kaka en Arjen Robben is goed opgepas, en daar was slegs kort periodes waarin die twee baltowenaars hul kunsies kon uitstal.

Nederland kan nog aanvallender speel, maar of die Oranje-masjien in hierdie toernooi waar ‘n aanvalsglips die span die wedstryd kan kos, werklik voluit sal baljaar is te betwyfel. Tot dusver het die span die versneller net diep genoeg getrap om die opponente te klop, anders as byvoorbeeld Duitsland wat meer tot ‘n alles-of-niks wedstrydstrategie ingestel is.

casino online no

2 July 2010
Oranje-optog: Klein eindstryd Vrydag

Baie mense sou dié twee spanne graag in die eindstryd wou sien sake uitspook, maar die loting het bestem dat net en span na Vrydag nog ‘n aanspraakmaker in die wêreld-sokkertoernooi sal wees.

Die Oranje van Nederland stamp Vrydag in Port Elisabeth koppe met Brasilië, nadat dié twee spanne nog ‘n stappie verder gevorder het. Nederland het ‘n mede-Europese land, Slowakye die loef afgesteek, en Brasilië het met ‘n mede-Suid-Amerikaanse span, Chili afgereken.

Dit is ‘n groot jammerte dat dié twee spanne nie later in die toernooi swaarde kruis nie. Brasilië is die span wat miskien die mees flambojante spel tot dusver opdis, terwyl Nederland elke keer genoeg voet op die petrol sit om opponente uit te skakel. Hieruit kan maklik afgelei word dat Brasilië die absolute gunsteling moet wees, maar in die proses word vergeet dat die Nederlanders self ernstige doelevrate kan wees, soos die ses doele wat in ‘n oefenwedstryd teen Pole getuig.

Vrydag se kragmeting beteken ook dat twee van die wêreld se beste spelers teen mekaar te staan kom – Brasilië se Kaka en Nederland se Arjen Robben. Hoewel Robben na ‘n besering nog min speelkans gehad het, het hy in die tyd wat hy op die veld was gewys dat hy ‘n yster is. Teen Kameroen was Robben skaars op die veld, of hy skep vir ‘n spanmaat ‘n doel, en teen Slowakye het hy weer na die middelveld gespeel en self die doelhok opgesoek.

Kaka moes self ‘n wedstryd na twee geelkaarte uitsit, en was teen Chili miskien ietwat minder sprankelend, maar ‘n handgranaat is ook doodstil voor dit afgaan.

Hoewel Chili by tye behoorlik deur Brasilië oorskadu is, het dié jong span sy veel meer geroemde teenstander ook lang tye goed besig gehou, en selfs met veral lang aangeë daarin geslaag om balbesit lank te behou. Nederland behoort veel stywer teenstand te bied.

29 June 2010