praag.co.za

Tag: Egipte

  • Sweedse terreuraanval: Jihadis het kinders aspris probeer raakry

    Sweedse terreuraanval: Jihadis het kinders aspris probeer raakry

    Die Sweedse media het die identiteit van die man van Uzbekistan bekend gemaak wat na bewering Vrydag ‘n groep voetgangers in Stockholm doodgery het.

    Uzbekistan se bevolking is bykans 90 persent Moslem. Die res is Ortodoks.

    Rakhmat Akilov is volgens berigte ‘n Moslem-konstruksiewerker en pa van twee wat die owerhede ontduik het om te keer dat hy gedeporteer word.

    Hy het na bewering ‘n vragmotor met ‘n vrag bier gesteel en in ‘n besige straat vol voetgangers gejaag voordat hy in ‘n winkel vasgery het. Vier mense is dood en vyftien is beseer.

    Volgens ooggetuies het die terroris opsetlik kruis en dwars oor die pad geswenk om spesifiek kinders raak te ry. Die elfjarige dogtertjie wat doodgery is, was doof en het nie die vragmotor hoor aankom nie, het Sweedse media berig.

    Die Sweedse vrou by wie die Moslem gewoon het, het aan die media gesê sy het nie geweet hy is ‘n jihadis nie, want “hy het gedrink”. Sy het blykbaar niks van sy ideologiese jihadisme geweet nie.

    Die Noorweegse polisie het intussen in Oslo ‘n toestel, soortgelyk aan ‘n bom, in die middestad gekry. Die BBC berig ‘n gekontrolleeerde ontploffing is toe uitgevoer.

    ‘n Verdagte is ook in hegtenis geneem. Die land se veiligheidspolisie het die ondersoek oorgeneem. Geen besonderhede oor die verdagte is bekendgemaak nie.

    Die polisie in Oslo en in ander Noordweegse stede het Vrydag begin om wapens te dra in reaksie op ‘n beweerde terreuraanval in Swede toe ‘n vragmotor tussen mense ingery het. Vier mense is dood en 15 is beseer.

    Verskeie verdagtes is reeds in hegtenis geneem ná die vragmotor-aanval, maar die Sweedse polisie is besonder versigtig om nie Islam as die rede vir die aanval uit te sonder nie.

    In Egipte het die president Abdul Fattah al-Sisi ‘n noodtoestand vir drie maande afgekondig nadat meer as 40 Christene dood is in twee bomaanvalle by Koptiese kerke.

    Die eerste bom het in die St. George-kerk in die stad Tanta ontplof en die tweede aanval was buite die Koptiese katedraal in Alexandrië.

    Die weermag sal ontplooi word om die polisie by te staan om noodsaaklike infrastruktuur te bewaak. Die Islamitiese Staat het vroeër aanspreeklikheid vir die aanvalle aanvaar.

  • Egiptiese polisie skiet twee van Moslembroederskap

    Egiptiese polisie skiet twee van Moslembroederskap

    Egiptiese polisie het twee lede van die Moslembroederskap doogeskiet.

    Een was die senior leier van die onwettige Islamitiese groep, het ‘n woordvoerder van die ministerie van binnelandse sake Dinsdag bekend gemaak.

    Volgens die ministerie was Mohamed Kamal die hoof van die militêre vleuel van die beweging van afgesette pres. Mohamed Morsi, al het die groep dit nog altyd ontken.

    Volgens die ministerie is Kamal en nog ‘n lid van die Broederskap, Yasser Shehata, Maandag dood in ‘n skietgeveg toe die polisie ‘n klopjag op hul skuiling in die suidooste van Kaïro uitgevoer het.

    Die Moslembroederskap het ‘n opstand gereël in 2011 teen die Egiptiese leierskap, as deel van die Amerikaans-geleide “Arabiese Lente”.

    Maar op 3 Julie 2013, het die minister van verdediging, genl Abdel Fattah El-Sisi, van Morsi en sy fanatiese ondersteuners ontslae geraak.

    Sedertdien het die Egiptiese owerhede Morsi-ondersteuners genadeloos gejag.

  • Egipte muilband polisie

    Egipte muilband polisie

    Egipte se parlement het Dinsdag beperkings op die polisie goedgekeur wat hulle onder meer verhinder om inligting aan die media te verskaf.

    Kritici sien dit as ‘n poging om menseregteskendinge en korrupsie toe te smeer.

    Kragtens wysigings aan die polisiewet moet polisiebeamptes voortaan geskrewe toestemming van die ministerie van binnelandse sake hê, alvorens hulle inligting mag verskaf of enige dokumente, verslae of foto’s mag publiseer wat met hul werk verband hou.

    Die straf vir oortreders is ongespesifiseerde gevangenisstraf en boetes tot so hoog soos 20 000 Egiptiese pond.

    In Februarie, het die Egiptiese president Abdel Fattah el-Sisi gelas dat voorstelle aan die parlement voorgelê word nadat ‘n junior polisiebeampte ‘n taxibestuurder oor ‘n nietige tariefargument doogeskiet het en inwoners woedend gereageer het.

    Maar dié maatreëls kom vermoedelik nadat daar botsende verklarings uitgereik is oor die lugramp op 19 Mei deser, toe EgyptAir vlug MS804, vanaf Parys na Kaïro, in die Middellandse See neergestort het en 66 passasiers dood is.

    Die Franse minister van buitelandse sake Jean-Marc Ayrault het Egipte se minister van buitelandse sake Sameh Shoukry verlede week geskakel en gevra om aandag te skenk aan die stygende kommer van die families van die slagoffers van die ramp.

    Hy het gesê dat die families van die slagoffers nog steeds wag vir die terugkeer van menslike oorskot en persoonlike besittings, en hulle het steeds nog geen duidelike uiteensetting van die redes wat gelei het tot die ongeluk ontvang nie.

    Intussen is die oorskot van die Egipties-Amerikaanse Nobelpryswenner vir chemie, Ahmed Zewail, deur Kaïro se strate gelei.

    Zewail het ’n begrafnis met volle militêre eer gekry wat deur Egipte se president en topregeringsleiers bygewoon is.

    Zewail, wat pres. Barack Obama se raadgewer oor wetenskap en tegnologie was, het verlede Dinsdag in Amerika gesterf. Hy was 70 jaar oud

  • EgyptAir voer noodlanding uit na bomdreigement

    EgyptAir voer noodlanding uit na bomdreigement

    ‘n Egiptiese passasiersvliegtuig van EgyptAir, onderweg van Kaïro na Beijing, het gisteroggend ‘n noodlanding in Urgench in Oesbekistan uitgevoer nadat ‘n bomdreigement ontvang is.

    Die vliegtuig het 118 passasiers en 17 bemanningslede aan boord gehad en almal is na veiligheid gebring, het ‘n Oesbeekse woordvoerder gesê.

    ‘n Woordvoerder van EgyptAir het later aangekondig dat geen bom aan boord die Airbus A-330-220 gevind is nie.

    Passasiers is ook deursoek voordat die vliegtuig, vier ure nadat dit geland het, weer opgestyg en die vlug na die Chinese hoofstad hervat het.

    Volgens amptenare het die Kaïro-lughawe ‘n anonieme telefoonoproep ontvang waarin aangevoer is dat ‘n bom aan boord van die vliegtuig is.

    Amptenare het die vlieënier gekontak en opdrag gegee om by die naaste lughawe te land.

  • EgyptAir het glo skerp geswenk sê Griekse lugbeheer

    EgyptAir het glo skerp geswenk sê Griekse lugbeheer

    Die hoof van Egipte se forensiese owerheid het ’n gevolgtrekking verwerp dat slegs klein stukkies liggaamsdele ná die EgyptAir-ramp gevind is omdat ’n ontploffing aan boord plaasgevind het.

    ’n Intensiewe ondersoek is aan die gang waarom die Airbus 320 van EgyptAir Donderdagoggend vroeg met 66 passasiers aan boord in die Middellandse See neergestort het.

    Die grootste deel van die wrak, sowel as die vlugopnemers, is nog nie gevind nie.

    ’n Egiptiese forensiese amptenaar het gesê 23 sakke liggaamsdele is sedert Sondag gevind, het Reuters berig.Die opnemers se batterye hou net 30 dae.

    Inligting wat verskaf is deur die lugvaartowerheid in Griekeland, wat die vliegtuig gemonitor het voordat dit Egiptiese lugruim bereik het, verskil van die Egiptiese inligting oor die vliegtuig se laaste oomblikke.

    Panos Kammenos, Griekeland se minister van verdediging, het Donderdag gesê die Griekse radarnetwerk het skerp bewegings raakgesien voordat die vliegtuig hoogte verloor en toe verdwyn het.

    Ehab Mohieldin Azmi, hoof van Egipte se lugnavigasiediens­, het gesê Egiptiese amptenare het nie opgemerk dat die vliegtuig swenk of hoogte verloor nie.

    “Natuurlik het ons meer as een keer probeer om die vliegtuig te roep, maar daar was geen reaksie nie. Ons het vliegtuie in die omgewing gevra om ook te probeer, maar dit was onsuksesvol,” het hy gesê.

    Egipte se openbare vervolger het Griekeland gevra om transkripsies van gesprekke tussen die vlieënier en die Griekse lugverkeerbeheer te oorhandig, asook dat amptenare ondervra word of die vlieënier ’n sein gestuur het dat die vliegtuig in die moeilikheid is.

    Tot dusver is geen aanduidings van plofstof gevind nie. Hisjam Abdelhamid, hoof van Egipte se forensiese owerheid, het gesê dit is te vroeg om tot enige gevolgtrekking te kom.

    Minstens twee ander bronne met regstreekse kennis van die ondersoek het gesê dit is te vroeg om te sê wat die oorsaak van die ongeluk was. Franse ondersoekers het gesê die vliegtuig het ’n reeks waarskuwingseine oor rook aan boord, asook ’n moontlike rekenaarprobleem, gestuur net voordat die vliegtuig van die radarskerms verdwyn het.

    Lugvaartkenners het gesê sabotasie of ’n tegniese probleem kan nie uitgeskakel word nie. Ondersoekers maak staat op die wrakstukke, sakke en klere, sowel as chemiese ontledings om die spore van ’n ontploffing te probeer vind.

    ’n Span wat deur Egipte se burgerlugvaartowerheid saamgestel is, doen die tegniese ondersoek.

    Drie amptenare van Frank­ryk se burgerlugvaart-­ondersoekeenheid en ’n kenner van Airbus is ook sedert Vrydag in Kaïro om te help. Egipte het ’n robotduikboot gestuur en Frankryk ’n skip om na die vlugopnemers te soek.

    Teen druktyd was daar nog nie sprake dat die opnemers gevind is nie. Hulle lê in ’n gebied waar die see tot 3 000 m diep is.

    Familielede van slagoffers gaan tuis in ’n hotel naby die Kaïro-lughawe. Hulle gee nou DNS-monsters om te help om die liggaamsdele te identifiseer.

    Amjad Haqi, ’n Irakiër wie se ma, Najla, omgekom het, het ­gesê die families is nie amptelik ingelig dat liggaamsdele gevind is nie.

    “Al waaraan hulle kan dink, is om die vlugopnemers en die wrakstukke te kry. Dis hul probleem, nie myne nie.”

  • Geen plofstof op menslike oorskot van EgyptAir-ramp nie

    Geen plofstof op menslike oorskot van EgyptAir-ramp nie

    Egipte het Sondag ’n duikboot gestuur om te help met die soektog na die vlugopnemers van die straler van Egypt­Air wat in die Middellandse See neergestort het. Al 66 mense aan boord het gesterf.

    Honderde mense het Sondag in die Koptiese Christelike kerkgebou in Kaïro vergader om vir naasbestaandes onder die slagoffers te bid.

    Daar is nog geen aanduiding wat tot die neerstorting van vlug 804 van Parys na Kaïro gelei het nie, ten spyte van spekulasie oor plofstof.

    Egipte se pres. Abdel-Fattah el-Sissi sê dit sal tyd neem om vas te stel wat presies aan boord van die Airbus A320 gebeur het.

    Menslike oorskot dui daarop dat daarop dat geen plofstof gebruik is nie, het ‘n Egiptiese forensiese beampte en ondersoekbronne gesê.

    Egipte se lugvaartnywerheid is onder die interna­sionale vergrootglas sedert 31 Oktober verlede jaar. Toe het ’n Russiese Airbus A321 onderweg van die Rooi See oord Sharm el-Sheikh onderweg na St. Petersburg, in die Sinai-skiereiland neergestort.

    Altesame 224 mense het in daardie ongeluk die lewe gelaat.

  • Brittanje gaan glo nie in Libië ingryp nie

    Brittanje gaan glo nie in Libië ingryp nie

    Brittanje het geen planne om die stuur van troepe na en lugaanvalle op Libië te verleng nie.

    Die verklaring deur die ministerie van verdediging volg ná ’n komitee van wetmakers gesê het die land kan tot ’n 1000 troepe ontplooi.

    Die laerhuis se komitee vir buitelandse sake het gesê Brittanje kan deel wees van ’n internasionale weermag bestaande uit 6 000 troepe in Libië wat onruste sedert die val van Moeammar Ghaddafi in 2011 hanteer.

    Die verwagting was dat die minister van verdediging, mnr. Michael Fallon, vandeesweek tot Brittanje se bydrae tot die weermag by ’n konferensie in Europa sou instem, het die komitee gesê.

    ’n Woordvoerder van die regering het egter gesê die komitee vir buitelandse sake was “op verskeie punte verkeerd”.

    “Daar is geen planne om die lugaanvalle op Libië te verleng nie en daar is geen planne om Britse troepe te stuur om sekuriteit aan troepe op die grond in Libië te verskaf nie,” het die woordvoerder gesê.

    “Dit is daarom verkeerd om te impliseer die minister van verdediging gaan vandeesweek tot enige Britse bydrae instem.”

    Britse premier David Cameron sou na verwagting by ‘n EU-beraad sy bereidwilligheid verklaar om militêr in te gryp in die ondersteuning van Libiese opkomende eenheidsregering.

    Egipte se president Abdel Fattah el-Sisi het egter gewaarsku dat die Weste moet uitbly.

    Cameron het die EU-leiers gewaarsku oor ‘n nuwe golf Libiese migrante na Europa in die somer nadat dit bekend geraak het dat ISIS uit Sirië na Libië vlug.

    Woensdag, moes die Foreign Office toegee dat soldate nie ontplooi sal kan word sonder die goedkeuring van die parlement nie.

  • ANC-appèl teen bepalings van Roomse Statuut misluk

    ANC-appèl teen bepalings van Roomse Statuut misluk

    Die ANC is oor die vingers getik nadat die Appèlhof teen hulle beslis het omdat hulle Soedan se president Omar al Basjir laat gaan het.

    Die Suid-Afrikaanse appèlhof in Bloemfontein het dié week beslis dat die regering se oortreding van ’n plaaslike hofbevel, dat Al-Basjir die land nie mag verlaat nie, onwettig was.

    Suid-Afrika is ‘n ondertekenaar van die Internasionale Strafhof (IS) se Roomse Statuut, waarin misdade wat onder die jurisdiksie van die hof val gelys word asook die prosedures en die meganismes vir lande om saam te werk met die hof.

    Die IS in Den Haag het voorheen lasbriewe vir die Soedanees se inhegtenisneming op grond van misdade teen die mensdom uitgereik.

    Die volbank van vyf Suid-Afrikaanse appèlregters het beslis dat die regering se besluit strydig was met Suid-Afrika se internasionale verpligting en daarom onwettig was.

    Die hof het beslis dat die Suid-Afrikaanse regering onder ‘n verpligting was om gehoor aan die lasbrief te gee, maar die ANC-regime het op sy beurt in hofstukke aangevoer dat dit “onwettig” is om ’n dienende president in hegtenis te neem.

    Al-Basjir het in Junie verlede jaar die hasepad gekies nadat die hooggeregshof in Pretoria gelas het hy mag nie die land verlaat nie.

    Al-Basjir was in Suid-Afrika vir ’n konferensie van die Afrika-Unie.

    Die Appèlhofbesluit is mosterd na die maal, aangesien Soedan se leier oral kuier en hom nie steur aan die Strafhof se lasbriewe nie. Hy was onlangs in Egipte en kuier in China.

  • Internasionale Strafhof val vas met Kenia-saak

    Kenia se adjunkpresident, William Ruto, se regsgeleerde het die Internasionale Strafhof (ICC) aangeraai om die klagte van misdade teen die mensdom teen hom te laat vaar.

    Die aanklaers nie daarin kon slaag om sy rol in verkiesingsverwante bloedvergieting te bewys nie.

    “Die bewyse is nie daar nie,” het Karim Khan die drie regters wat op die bank was verlede week meegedeel, waar Ruto teregstaan vir sy aandeel in die dodelike 2007-2008 verkiesings­geweld.

    Ruto (49) en sy medebeskuldigde, die eienaar van ’n radiostasie, Joshua arap Sang (40) staar drie klagte van misdade teen die mensdom, insluitende moord, gedwonge deportasie en vervolging in die gesig.

    Pogings in Suid-Afrika om Soedan se president voor die Hof te daag, is besig om stoom te verloor.

    Suid-Afrika het ‘n plig ingevolge die internasionale reg om die immuniteit van ‘n dienende hoof van ‘n vreemde staat te respekteer.

    Onder Suid-Afrikaanse reg, sou dit ‘n misdaad wees om hierdie immuniteit te skend.

    Die Hooggeregshof in Pretoria het in Junie verlede jaar bevind dat die regering se besluit om nie die Soedanese president Omar al-Basjir aan te hou nie, strydig is met die grondwet.

    Egipte het intussen dié week ‘n amptelike uitnodiging aan Al-Basjir gerig om ‘n Afrika-beraad in Egipte by te woon.

  • GERD: Waterpolitiek raak warm

    Soedan, Egipte en Ethiopië het ‘n ooreenkoms bereik oor die bou van die omstrede “Grand Ethiopian Renaissance Dam” (GERD).

    Die projek het betrekkinge tussen Kaïro en Addis Abeba versuur, het AP berig.

    Afvaardigings van Egipte, Ethiopië en Soedan het die byeenkoms bygewoon in Kartoem waar die ooreenkoms onderteken is.

    Die ooreenkoms bevat ‘n “verklaring van beginsels” wat riglyne gee vir die opklaar van verskille oor die GERD-projek.

    Die drie lande het ooreengekom op ‘n tydperk van tussen agt en 12 maande waarin tegniese studies van die operasionele meganismes en die gevolge van die konstruksie van die dam bepaal moet word.

    Kaïro en Kartoem vrees dat die bou van die dam die hoeveel water in die Nylrivier wat hulle toekom aansienlik kan verminder.

  • VSA, Brittanje sê bom het tot Russiese ramp gelei

    VSA, Brittanje sê bom het tot Russiese ramp gelei

    Amerikaanse en Britse owerhede meen ‘n bom aan boord van ‘n Russiese passasiersvliegtuig het tot die lugramp oor Egipte gelei.

    Die Airbus 321 het in die lug verbrokkel en wrakstukke is oor kilometers heen versprei.

    Die Islamitiese Staat (ISIS) kon glo daarvoor verantwoordelik gewees het, maar wou geen finale gevolgtrekkings oor die ongeluk gemaak nie.

    ‘n ISIS-geaffilieerde terreurgroep het Woensdag verantwoordelikheid vir die voorval aanvaar. Dit was glo “in reaksie op Russiese lugaanvalle wat honderde Moslems in Sirië doodgemaak het”.

    Rusland het in September lugaanvalle teen internasionale terroriste van stapel gestuur.

    Die Airbus 321 het Saterdag bo die Sinai-skiereiland in die lug verbrokkel kort nadat dit van die vakansieoord Sharm el-Sheikh op pad na die Russiese stad St. Petersburg opgestyg het. Al 224 mense aan boord is dood.

    Rusland het intussen vlugte beskikbaar gemaak om Russiese vakansiegangers in die Egiptiese stad te ontruim.

    Ondersoekers het reeds gesê dit is onwaarskynlik dat die vliegtuig van buite getref is. ISIS beskik vermoedelik nie oor die tegnologie om ’n straler van ’n kruishoogte bo 10 000m voet neer te skiet nie.

    Die Russiese lugvaartowerheid het ook ‘n veiligheidsklaring vir van Boeing se vliegtuie teruggetrek.

    Die Russiese vliegtuie het by Al Arish, naby die grens van Israel, neergestort, baie naby aan Eenheid 8200, geleë op Kibbutz Urim.

    Dit is ‘n militêre intelligensie-eenheid, ‘n belangrike satellietseinintelligensiefasiliteit wat minder as 60 myl NNO van die plek is waar die Russiese vliegtuig verbrokkel het.

    Eenheid 8200 is die sentrum van Israel se kuberaanvalsvermoëns in die Negev-woestyn, en ‘n leier in hoë-tegnologie oorlogvoering.

    Sowat 40 mense is ook dood nadat ’n vliegtuig met Russe aanboord van ’n lughawe in Suid-Soedan neergestort het.

    Dit is onduidelik presies hoeveel mense aan boord die vliegtuig was.

    Ooggetuies sê dele van die vliegtuig het aan die oewer van die Witnylrivier naby die lughawe in die hoofstad, Juba, gelê.

    Die South Sudan Tribune, ’n plaaslike koerant, het getwiet dat die vliegtuig ’n vragvliegtuig met vyf Russiese bemanningslede en sewe passasiers aan boord was.

    ’n Presidensiële woordvoerder sê egter die vliegtuig het omtrent 20 mense aan boord gehad.

  • VSA, Rusland sê terreurorganisasie nie betrokke by jongste lugramp nie

    Amerikaanse intelligensie-owerhede sê daar is nog geen regstreekse bewyse dat daar terreur betrokke was by ‘n Russiese vliegtuig wat in Egipte se Sinai-skiereiland neergestort het nie.

    Die Russiese lugdiens sê dat eksterne faktore moontlik Saterdag se ongeluk veroorsaak het, waarin 224 mense dood is.

    Die Amerikaanse direkteur van nasionale intelligensie, James Clapper sê hoewel ‘n groep wat bande het met Islamitiese Staat-militante aanspreeklikheid aanvaar het, is daar geen direkte bewyse dat hulle betrokke was nie.

    Hy sê daar kan geen gevolgtrekkings gemaak word voordat die inligting op die vliegtuig se vlugopnemers ontleed is nie.

    Rusland het bewerings dat die militante-groep betrokke was, verwerp.

    ‘n Amerikaanse satelliet het na wat berig berig word ‘n hitte-flits oor die Sinaï-skiereiland opgemerk waar die Russiese Kogalymavia-vliegtuig neergestort het wat ooreenstem met die tyd toe die ongeluk plaasgevind het.

    Die getuienis van die satelliet ondersteun nie die teorie dat die vliegtuig afgeskiet is deur ‘n oppervlak-tot-lug missiel nie, het NBC News sowel as CBS News berig.

    “Die spekulasie dat die vliegtuig deur ‘n missiel getref is, is van die tafel af,” het ‘n senior Amerikaanse verdedigingsamptenaar aan NBC News gesê.

    Amerikaanse intelligensie-ontleders glo die flits kon ‘n bomontploffing gewees het of ‘n brandstoftenk wat ontvlam.

    Die Amerikaanse satelliet sou die hittespoor van enige missiel met sy infrarooi-opsporingstoerusting kon volg, maar daar was geen aanduiding daarvan nie.

    Indien dit bevestig word, sal die Amerikaanse verslae waarskynlik ondersoekbeamptes in die rigting van ‘n bom rig, waarskynlik een met ‘n barometriese sneller, wat suksesvol in die vragruim van die vliegtuig gesmokkel is voordat dit opgestyg het.

  • VSA teen die toue in Sirië

    VSA teen die toue in Sirië

    By ‘n geskiedkundige byeenkoms op 30 Oktober 2015 in Wene, Oostenryk, het die wêreld se groot moondhede ooreengekom dat die staatlike integriteit van Sirië behoue sal bly.

    Die besluite by die vergadering het die VSA se planne om Sirië te destabiliseer, erg geknou.

    China, Egipte, Frankryk, Duitsland, en ander EU-lidlande, Iran, Irak, Jordanië, Libanon, Oman, Qatar, Rusland, Saoedi-Arabië, Turkye, die Verenigde Arabiese Emirate, die Verenigde Koninkryk, die Verenigde Nasies, asook die Verenigde State [“die deelnemers”] het vergader om die ernstige situasie in Sirië te oorweeg.

    Die deelnemers het vergader oor hoe om so gou as moontlik ‘n einde aan die geweld te bring dmv ‘n openhartige en konstruktiewe bespreking oor knelpunte.

    Terwyl aansienlike verskille steeds onder die deelnemers heers, het hulle ‘n wedersydse begrip oor ‘n aantal kwessies uitgespreek:

    Sirië se eenheid, onafhanklikheid, territoriale integriteit en sekulêre karakter fundamenteel is.

    Staatsinstellings sal dus ongeskonde bly en die regte van alle Siriërs, ongeag etnisiteit of godsdienstige denominasie, moet beskerm word.

    Dit is noodsaaklik om al die diplomatieke pogings om die oorlog te beëindig, te bespoedig.

    Humanitêre toegang sal verseker word oor die hele gebied.

    ISIS en ander terreurgroepe, soos deur die Veiligheidsraad van die VN aangewys, moet verslaan word.

    Ingevolge die 2012 Geneva Communique en VN-resolusie 2118, moet ‘n politieke proses lei tot geloofwaardige, inklusiewe, en nie-sektariese landsbestuur, gevolg deur ‘n nuwe grondwet en verkiesings.

    Hierdie verkiesings moet onder VN-toesig plaasvind, maar die Siriese mense sal oor die toekoms van Sirië besluit.

    Die Amerikaanse president, Barack Obama het intussen dosyne Spesmagte in Sirië ontplooi om ISIS-terroriste te beskerm teen Russiese lugaanvalle.

    Obama het die onderneming gegee dat Amerikaanse soldate nie by gevegte betrokke sal raak nie.

    Obama sê die ontplooiiing is net ‘n voortsetting van die hulp wat Amerika reeds aan “gematigde” insurgente, oftewel ISIS, verskaf.

    Die Wit Huis het Vrydag aangekondig dat byna 50 lede van die Spesmagte na Sirië gestuur word om opposisiemagte op te lei, raad te gee en by te staan.

    Nadat die VSA se betrokkenheid in Sirië met ISIS-terroriste op die lappe gekom het, moet die Pentagon bontstaan om vure dood te slaan.

  • Egipte sê Russiese vliegramp was tegniese fout

    Die Russiese ministerie van buitelandse sake het gewaarsku dat dit nog te vroeg is om te bespiegel oor die moontlike verloop van die gebeure wat gelei het tot die vliegramp in Egipte.

    Die Russiese passasierstraler, ‘n Airbus A321, met 224 mense aan boord het Saterdagoggend vroeg in Sinaï, Egipte, neergestort.

    Die vliegtuig, ‘n huurvlug, het van die toeristemekka Sharm el-Sheikh in Egipte opgestyg maar kort daarna het die vlieëniers glo ’n tegniese fout by lugruimbeheerders aangemeld.

    “Hoe kan ons praat oor enige weergawes, as ons spesialiste pas begin het om deur die wrakstukke van die ongelukstoneel te sif?” het die ministerie se woordvoerder Maria Zakharova aan Rossiya 1 TV-kanaal gesê.

    Zakharova het geduld gevra en gesê feite eerder enige spekulasie rondom die tragedie moet oorweeg word. Sy het gesê dat die Egiptiese owerhede hul volle ondersteuning en samewerking gee.

    Egiptiese owerhede het vroeër gesê dat die vliegtuig nie afgeskiet is nie, en vuilspel uitgesluit.

    Alhoewel die Russiese regering nog geen ‘n omvattende verklaring vrygestel het nie, het Reuters berig dat ‘n “groep verbonde aan die Islamitiese Staat” verantwoordelikheid vir die ongeluk aanvaar het.

    Intussen het die VSA ook bekendgemaak dat ‘n Duitse klets­rymer in ‘n lugaanval in Sirië gedood is.

    Denis Cuspert, wat sy naam na Abou Maleeq verander het, is in Berlyn gebore en was eens ’n gewilde rapper wat opgetree het onder die naam Deso Dogg. In 2012 het hy glo by ISIS aangesluit en lede gewerf.

    In een propagandavideo hou Cuspert selfs afgekapte kop vas.

    Volgens Amerikaanse beamptes is Cuspert en twee ander mense dood in ’n lugaanval wat op 16 Oktober uitgevoer is.