Tag: Johannesburg

Dan Roodt: Dalk kan blankes steeds in SA wegkruip?

Ek het so pas teruggekeer van ‘n effense vakansie in Plettenbergbaai. Op pad terug het ons motor se koppelaar ingegee en vanweë die langnaweek verlede week is ons gestrand gelaat op Graaff-Reinet. Maar dit was allermins ‘n straf om dié historiese Afrikanerdorp te voet te verken.

Anders as in Johannesburg en Pretoria — die hele Gautengprovinsie soos dit deesdae alte aaklig heet — is daar geen hoë mure en elektriese drade rondom huise op Graaff-Reinet nie. Dit dui aan dat daar nie soveel misdaad soos in ons groot stedelike gebiede is nie.

Wat ‘n mens ook tref as jy so 1200 km of meer deur ons land ry, is hoe léég dit is. Nêrens in Wes-Europa, byvoorbeeld, sal mens soveel kilometer aflê sonder om huise, geboue of mense teë te kom nie.

Soos ek reeds iewers in ‘n YouTube-video gesê het, is dit te laat om uit die land te wil emigreer. Dit is ook te laat om elders ter wêreld ‘n veilige hawe te vind, want alle tekens dui daarop dat ten minste die hele Westerse wêreld, d.w.s. Wes-Europa, Noord-Amerika, selfs Australië en Nieu-Seeland, binnekort dieselfde soort verval in wet en orde, asook amptelike anti-blanke diskriminasie, as Suid-Afrika gaan ervaar.

Joe Biden het aangekondig dat hy $2,3 triljoen vir nuwe behuising in die VSA beskikbaar gaan stel, maar dié geld gaan gebruik word om swartes en gekleurde Spaanssprekendes in die oorblywende blanke voorstede in te voer sodat “segregasie” die nekslag toegedien kan word. Vele groot stede in Amerika se misdaadsyfers is in elk geval reeds so hoog soos dié in Suid-Afrika.

Verder gaan Biden natuurlik die deure oopgooi vir immigrante, ook uit Afrika en ander swart lande soos Haïti.

In ‘n neutedop: blanke bevolkings wêreldwyd verkeer onder beleg, behalwe miskien in Oos-Europa. Maar gaan Hongarye, Pole en selfs Rusland onder die aanslag vanuit ‘n geradikaliseerde, multikulturele Amerika kan staande bly?

Die Russiese minister van buitelandse sake, Sergei Lawrof, het hom onlangs hieroor uitgelaat:

Russian Foreign Minister Sergei Lavrov on Thursday warned against growing anti-white racism in the United States and said that political correctness “taken to the extreme” would have lamentable consequences.

Terwyl blanke bevolkings demografies kwyn, vind ‘n bevolkingsontploffing in Afrika plaas, tesame met die opkoms van aggressiewe anti-blanke rassisme en ideologieë in die hoofstroommedia, in die akademie (sg. “witheidstudies”) en in die politiek.

In een van haar onverskrokke dog insiggewende rubrieke, praat die Suid-Afrikaans-gebore skryfster Ilana Mercer van “die sistemiese oorlog teen blankes”. (Lees Wake up. Systemic anti-whiteness is deadly. Witness South Africa.) Sy skryf:

“America is indeed racially divided. Blacks, for the most, hate whites for a variety of unjust reasons, not least the incessant, institutionalized, propagandizing by other progressive whites. They want to hurt them and make them pay. For what? For everything; for whatever is wrong with their lives.”

Die punt is: Hoewel ons in Suid-Afrika die ergste vorms van anti-blanke diskriminasie ter wêreld moet verduur, beskik ons oor geen illusies meer nie. “Demokrasie” en “menseregte” gaan ons nie red nie. Daarom “trek ons laer” of trek ons eenvoudig weg van die probleem af: ons woon in veiligheidsbuurte of agter hoë mure met elektriese heinings, behandel ons motorruite met film teen grypdiewe of, les bes, trek Wes-Kaap toe of na plattelandse dorpe wat nie so erg deur misdaad geteister word nie.

Kortom, in Suid-Afrika kan ‘n blanke nog wegkruip. Vele van die groot Westerse stede in Wes-Europa of Noord-Amerika is glad nie daarvoor toegerus nie. Die misdadiger gebruik gesubsidieerde openbare vervoer om by sy slagoffer uit te kom. Linkse en liberale politici wil die samelewing “integreer” en “meer gelyk maak”, daarom neem hulle dieselfde tipe anti-blanke wetgewing as in Suid-Afrika aan.

In Frankryk kon mens tot onlangs nog in klein dorpies, waar slegs blankes en geen immigrante bly nie, gaan wegkruip. Maar Emmanuel Macron, die president, het besluit dat immigrante nou oral oor die land heen versprei moet word sodat selfs die klein plekkies aan misdaad en geweld blootgestel gaan word.

Nêrens in die Weste word enige vorm van segregasie of apartheid vandag geduld nie. Selfs kritiek op derdewêreldimmigrante word gekriminaliseer en ‘n mens kan maklik tronk toe gaan as jy jou teen byvoorbeeld Moslems uit die Midde-Ooste uitspreek.

Vandaar die begrip “Islamo-linksheid” wat veral in Wes-Europa posgevat het. Linkses en radikale, anti-blanke Moslems het ‘n bondgenootskap gesmee.

Hier in Suid-Afrika geld daar egter steeds, in weerwil van ‘n kwarteeu van ANC-heerskappy, ‘n natuurlike segregasie. Blankes woon steeds in enklawes, of dit nou eksplisiet soos in Orania of in veiligheidsbuurte in Johannesburg of Pretoria is.

Ons kan nog steeds wegkruip vir die gevaar daarbuite wat soos Raka buite die kraal rondsluip. In ons groot land wat deur so ‘n klein groepie Afrikaners oor eeue heen beset en makgemaak is, is daar steeds duisende vierkante kilometer grond of ruimte wat braak lê, onbeset, waar ‘n mens afgesonderd kan gaan woon. Mits jy oor ‘n goeie internetverbinding beset, kan jy selfs van daar af werk en jou dienste globaal verkoop.

Jy kan Orania of Kleinfontein toe trek, of jy kan jou eie Orania skep net waar jy wil. Dit maak ons in vele opsigte vryer as ander blankes in Europa of Noord-Amerika. Of selfs ‘n land soos Nieu-Seeland waar ‘n polities korrekte staat jou binnekort gaan dwing om te “integreer” en ondergeskik aan die swartman en die Arabier te raak.

Die tweede element waaroor ons beskik, benewens ruimte, is ons volksheid of etnisiteit. Op ‘n dorp soos Graaff-Reinet kom ‘n mens onder die indruk van ons lang geskiedenis van stryd teen ons plaaslike en buitelandse vyande soos Groot Brittanje. Deur geskiedenis, afkoms en taal word ons aan mekaar verbind. Ons beskik oor ‘n sterk identiteit, anders as die Australiër of die Nieu-Seelander of die Kanadees byvoorbeeld wat willoos die polities korrekte hoofstroomkultuur vanuit die VSA navolg. Die staat definieer sy identieit, nie sy verhouding tot ‘n organiese volkseenheid nie. Ons staat is revolusionêr verander of, in die jargon van die verdrukker, “getransformeer”.

Maar die Afrikaner, nou staatloos, het gebly. En bly steeds, op allerlei plekke waar die vyand ons nie verwag of selfs raaksien nie. Wegkruipplekke, skuilplekke, toevlugsoorde.

Plekke waar ons in staat is om te oorleef. Want dit is inderdaad waaroor dit tans gaan: oorlewing. Niks meer en niks minder nie.

2 May 2021
Sydney Gregan: Johannesburg, o Johannesburg!

Elders lees ek op Judy Ward, ‘n vriendin van my uit die jare toe beide van ons dosente was in Johannesburg, se Facebook-blad, oor die verval in Krugersdorp. Foto’s is natuurlik die beste bewys van die verval wat nie alleen daar nie, maar in die res van ons land so opmerklik (en grusaam om te aanskou), aan die orde van die dag is. Die reaksie van mense is al voorspelbaar: “skande”. Tog wil ons nie erken dat ons hulpelose toeskouers van hierdie verval geword het nie.

En voor mens die vraag probeer beantwoord; “waar gaan dit eindig?”, kom ons ervaar so bietjie “heimwee” oor wat was, ten einde opnuut te besef hoe dramaties dinge verander het. In net sowat 27 jaar.

In 1982 het ek, na my 2-jaar diensplig, in “Johies” beland om in te skryf aan die RAU, die Afrikaanse universiteit in die “Engelse” stad. My koshuis was Afslaan wat toe geblyk het ‘n uithalerkoshuis te wees wat jaar na jaar sangfeeste, die “Baron Gawie” (die Jooltrofee) en talle sportkompetisies, waaronder natuurlik koshuisrugby, gewen het. Waar braaivleisvure omtrent gebrand het soos die “Ewige Vlam van Mamajef Kurgan in Stalingrad”. Ja, ons het selfs die akademiese trofee jaar na jaar gewen…

En waar die Weermag van jou ‘n “man” gemaak het, veral “basiese opleiding” en jy intens bewus geword het van ons land se stryd met die “vyandelike” magte wat hierdie vaderland van ons “onregereerbaar” wou maak, het jy aan die RAU die idilliese van die lewe intens beleef en allerlei akademiese argumente gehad waarom die vyande nie in hulle doel sou slaag nie. Dis nou, as mense net na jou sou wou luister!

Dit was wonderlike jare (sekerlik van die heel beste) en die RAU het dan ook beslis die mooiste meisies in ons land gehad. Daarom was dit baie lekker om klasse by te woon waar die proffie nie altyd al die aandag gekry het nie… Ja selfs in die HF Verwoerd-biblioteek (jy het reg gelees, ja!) het jou kop gereeld gedraai as jy veronderstel was om “navorsing” te doen!

Dis hier waar die sportgogga my werklik gebyt het en ek die voorreg kon smaak om aan SAU’s deel te neem aan onder meer atletiek en landloop. Oral in die land. Sorgvrye, kommervrye dae. Behalwe nou as eksamens aanbreek en jy inderhaas jou notas agtermekaar moes kry. Dis veral hier waar jy vriende ontmoet wat lewenslank jou vriende sou bly. Al bly baie van hulle nou regoor die wêreld…

Wat was lekkerder om ‘n meisie uit te neem en by Café de Paris in Hillbrow koffie te gaan drink, daarna in boeke by Estoril Books rond te snuffel of saam met pelle ‘n hoender by Fontana (wat 24 uur van die dag oop was) te gaan verorber? Ja, Hillbrow was ‘n baie veilige plek in daardie dae en die Afrikaanse kerk waarvan ek lidmaat was het selfs daar ‘n kerkgebou gehad en het ons talle eredienste daar bygewoon. Sal ek ooit die dag vergeet toe ds Tony Simpson oor die “wil van die Here” gepreek het? Hy’t onder andere gesê dat as jy teen 120 km/h in Eloffstraat af jaag met ‘n motor en jy verongeluk, jy nie moet redeneer dat dit die Here se wil is nie. Sulke onvergeetlike oomblikke wat onuitwisbare indrukke gelaat het en daar was so baie! Is dit nie trouens waar dat die meeste daarvan uit ons studentedae kom nie?

Ons universiteitslied het gepraat van “die Rand so tuis so anders”. Hoe waar was dit nie! Johannesburg met sy aangename somers en, vir ‘n Bosvelder, snerpende winters. Ek was nooit een dag spyt dat ek by die RAU studeer het nie. Uitstekende professore, waaronder my promotor professor Barrie, onder wie se bekwame leiding ek my doktorsgraad voltooi het en wat vandag al 80 jaar oud is; professor JC Sonnekus, dalk een van die beste akademici wat hierdie land ooit opgelewer het, en professor JC van der Walt wat, in my oë een van die beste dosente was wat ek ooit teëgekom het. ‘n LLB-graad wat aan die RAU verwerf is, was hoog in aansien! In elk geval, in daardie dae.

Só kan mens voortborduur oor die Goudstad. Intervarsities, ja die dag toe ons die magtige Tukkies die eerste keer die loef af gesteek het. Ons het in daardie dae nog lekker gesing op die pawiljoen met ‘n rasieleier van formaat.

Waar Koos du Plessis die lof van Pretoria besing met sy “Pretoria, Jakarandastad” het ons na Johannes Kerkorrel geluister met sy “Gee jou hart vir Hillbrow!” Dit was in daardie dae ‘n skoon, ordelike en lieflike stad om in te woon. So sou ek onder meer in Crosby (Brixton), Aucklandpark, Triomf (Sophiatown) en Florida-Glen bly voor ek einde 1994 die pad terug Bosveld toe gevat het. Ja, en selfs die Engelse van “Johburg” was nie te “onaardig” nie. ‘n Paar van ons vriende was sommer baie tuis by Pirates Club in Greenside (waar die Engelse besigheidsmanne ons arm studente se drank op Dinsdae-aande betaal het na die 8 km “time trial” en ons tot laataand in die “pub” gekuier het. Met trots het ons (ek, Deon, die twee Andre’s en Martin) in die Pirates-frokkie menige Comrades-marathons kafgedraf. My heel eerste Comrades was dan ook as ‘n lid van Pirates en nogal in ‘n silwer! Gaan kyk maar in hulle klubhuis as julle my nie glo nie!

Maar toe daal die “nuwe” Suid-Afrika op ons neer. Oor die politiek agter daardie besluit wil ek hier nie veel uitwei nie, behalwe dat elkeen wat nugter oor die saak nadink vandag moet erken, dat dit ‘n fatale besluit was gesien die gevolge wat dit nie net vir die Afrikaner inhou nie, maar vir al die mense van ons land. RAU het geheel en al verengels en sy naam verloor, so ook die bekende strate van “ons” stad, waaronder DF Malanrylaan en selfs Jan Smutsrylaan. Toe ek die ander dag verby my Alma Mater ry, was dit asof dit ‘n wildvreemde plek was. Of iemand besig is om fisies my herinneringe uit te vee. Iets in my wou weerstand bied, maar dan die besef jy jy is weerloos. Jy is tandeloos. Jy is uitgelewer.

Uitgelewer aan wat? Aan die realiteit van Afrika wat niks en niemand ontsien nie. Waar regerings nie ‘n flenter omgee vir hulle onderdane nie. Die mense (onderdane) plunder en breek omdat die regering dit doen. Dis tog die voorbeeld! Ja, in ‘n tyd waar almal so versigtig is om reguit en openlik te praat, het ek daardie eienskap nog nooit verloor nie. Dit het my my hele lewe lank “gekos”, maar my nog nooit gestuit nie. Ja, ons besluit om die welvarende land in die hande van swart meerderheidsregering te plaas, was fataal. Dit was dwaas. En wat ons moet besef — dit sal onder hierdie swart regering, waar ‘n klein groepie politici al die mag ten alle koste sal behou — tot ewige nadeel en verdriet van almal in hierdie land, nie verander nie. Ons gaan dit nie reg praat nie en is weens die getallefaktor verdoem tot ‘n hulpelose minderheid wat jaar na jaar sal kla en hier en daar probeer regstel; maar waarvan die uiteinde, tensy ons weer oor onsself kan regeer, uitwissing is. Dis nie iets wat mense wil hoor nie en ‘n onderwerp wat baie nie wil aanraak nie, maar ek daag enigeen tot ‘n debat uit om die teendeel te bewys.

Sonder ‘n vryheidsideaal lewe ons bloot van dag tot dag en jaar tot jaar. Kan ons dalk weer eie universiteite bou, dorpe skoonmaak en hofsake wen, maar weens die mag van die politiek, die hoogste kroonrat in ‘n volk en ‘n land se bestaan, sal ons deurgaans “tyd wen”, soos ‘n bekende politieke party in die tagtigerjare gepraat het, maar die finale oorwinning nie behaal nie. Trouens, sonder ‘n vryheidsideaal is die skrif vir seker aan die muur.

Johannesburg sal, tensy ons tot die besef kom dat ons êrens ‘n streep in die sand moet trek, nie net verder verval wat betref sy strate en sy geboue nie, maar dit sal by uisttek die kriminele mekka van hierdie land word. Onregeerbaar, onrehabiliteerbaar, en aan die genade van die Malema’s en hulle juigkommando’s oorgelaat.

Die vuur brand nie meer net nader aan ons nie, die rewolusionêre vuur brand nou om ons. Ons voel die hitte daarvan. Dit sal ons weldra verteer. Ja, saam met Judy treur ek ook oor ons stad van weleer, dog staan ek verwonderd oor ‘n volk wat sy durf, waarvoor hy so bekend was, verloor het!

2 April 2021
Johannesburgse middestad ‘n spookdorp ná kabeldiefstal

Groot dele van die Johannesburgse middestad was gister ‘n spookdorp nadat kabeldiewe blykbaar verlede naweek “etlike kilometers ondergrondse koperkabels” gesteel het. Die wetteloosheid in Suid-Afrika het so ‘n erge graad bereik dat kabeldiefstal feitlik ‘n alledaagse verskynsel geword het.

Volgens ‘n woordvoerder van City Power, die nutsmaatskappy wat krag aan die stad voorsien, het die diewe verlede Sondag toegang verkry tot ondergrondse tonnels waarin die kabels gehuisves word. Eers is die kabels aan die brand gesteek om ‘n elektriese kortsluiting te veroorsaak wat sekerings sou laat afgaan ten einde die hele netwerk af te skakel. Daarna was dit vir die diewe veilig om die elektriese kabels te knip en weg te dra.

‘n Groot deel van die middestad is deur die kragonderbreking getref, vanaf die Carlton-sentrum tot Selbystraat. Ook die land se besigste Hooggeregshof, die Gautengse plaaslike afdeling in Pritchardstraat, is getref en het vanaf die begin van die week met behulp van noodkragopwekkers gefunksioneer. Gister teen etenstyd het die diesel egter opgeraak en is hofsale tesame regters, advokate en prokureurs eensklaps in donkerte gehul. Verskeie dringende sake moes tot later in die week uitgestel word, in die hoop dat die kragtoevoer herstel sou word.

Alle winkels in die Carlton-sentrum is al heel week lank gesluit, met veiligheidswagte wat ingange bewaak. Die parkeergarage van die Carltonsentrum, Afrika se hoogste gebou, was gister nog oop en die gedruis van die noodkragopwekkers was in die kelderverdieping hoorbaar, met ‘n swaar reuk van diesel wat in die lug hang.

Met verkeersligte oral buite werking, het groot verkeersopeenhopings motoriste en voetgangers geteister.

Vanoggend het City Power aangekondig dat die kragnetwerk waarskynlik eers teen Saterdag herstel sal word.

Maandagaand het brande steeds in die tonnels gewoed, wat tegnici daarvan weerhou het om die nodige herstelwerk te doen.

Die omvang van die skade wat die brande en kabeldiefstal veroorsaak het, is nog nie bepaal nie, maar die tonnels waarin kabels gehuisves word, is volgens Wayne Minnaar, superintendent van die Johannesburgse Metropolisie, “nege kilometer lank”.

Minnaar het verskoning aangeteken teenoor alle kliënte van die munisipaliteit en gesê: “Ons doen ons bes om die situasie so gou moontlik op te los.”

Honderd-en-vyftig verkeerspolisiemanne is ontplooi om die verkeer te help reël.

So pas het ons via Twitter verneem dat die koperdiewe blykbaar aangekeer is. ‘n Foto van die burgemeester Herman Mashaba op die toneel van ‘n koperskrootwerf is getwiet (foto hier bo).

Volgens ‘n e-pos wat later vanmiddag deur die munisipaliteit uitgestuur is, sal die krag nie meer teen Saterdag nie, maar eers teen Sondag herstel wees.

7 September 2017
LUR van Vervoer sorg dat Johannesburg lamgelê word deur taxi-geweld

Die polisie is in groot getalle in Soweto, Johannesburg, ontplooi waar ten minste vyf taxistaanplekke van vandag af gesluit sal wees.

Dit volg te midde van die voortgesette geweld en moorde oor roetes tussen die strydende taxiverenigings, Nanduwe en WATA.

Die Gautengse LUR vir Vervoer, Ismail Vadi het vroeër besluit dat die betrokke taxistaanplekke gesluit en roetes opgeskort word totdat ‘n oplossing gevind kan word. Die Metropolisie asook die Gautengse verkeerspolisie is in die gebied ontplooi.

Talle mense is ook reeds in die beseer. Die Gautengse departement van Paaie en Vervoer het vroeër aangekondig dat daar besluit is om die staanplekke en roetes vir ‘n maand te sluit. Dit raak die twee taxiverenigings Nanduwe en WATA.

Die taxi’s is geaffilieer by die Nancefield Dube West-taxi-vereniging (NANDUWE) en die Witwatersrand-taxi-vereniging (WATA).

Die sluiting is Dinsdag aangekondig ná ‘n geskil tussen die twee taxi-verenigings wat maande lank al woed.

Ismail Vadi het gesê hulle moet nou die lewens van onskuldige mense wat in die kruisvuur beland, red omdat die oorlog tussen die mededingende verenigings net verder uitkring.

Dit is duidelik dat Vadi geen beheer meer het oor die geweld nie en dit nou maar ‘n probleem van die hele stad gemaak het. Johannesburg lyk vanoggend soos ‘n spookdorp.

“Onlangs is twee onskuldige mense doodgeskiet,” het Vadi gesê en bygevoeg dat 30 mense in hegtenis geneem is van albei strydende groepe.

“Wetstoepassingsagentskappe ondersoek minstens 13 moordsake. As jy die sak knyp, maak dit die meeste seer,” het Vadi verklaar, kennelik onder die indruk dat geldsake die geweld regverdig.

Vadi het gesê dat hierdie besluit geneem is nadat swaar gewapende mans wat aan beide verenigings gekoppel is, in die teenwoordigheid van wetstoepassers gebots het.

“Hulle het die paaie in die Johannesburgse sakegebied onwettig geblokkeer. Die sluiting van die betrokke roetes begin 13 Julie tot 13 Augustus.”

13 July 2017
Jhb-middestad: Swart inwoners trek terug na brand in gekaapte gebou

Die swart inwoners van ‘n gekaapte gebou in die middestad van Johannesburg, Cape York, is besig om daarin terug te trek ondanks die onveiligheid en gevaar. Die gebou is in die middestad van Johannesburg op die hoek van Nugget- en Jeppestraat geleë. Van die name van dié strate is intussen deur die Johannesburgse munisipaliteit verander, maar meeste mense gebruik nog die ou name.

‘n Brand in die gebou het Woensdag die dood van sewe inwoners veroorsaak, waarna die munisipaliteit gelas het dat die gebou ontruim moes word. Cape York is berug vir prostitusie en dwelmhandel.

Blykbaar is die gebou deur ‘n inwoner aan die brand gesteek nadat dié sy kamer daarin kwyt was.

Volgens ‘n amptelike ondersoek is die gebou nie meer geskik vir menslike huisvesting nie; nietemin het inwoners dit weereens beset omdat hulle glo nie oor ander huisvesting beskik nie.

Die ANC-raadslid vir die gebied, Nokuthula Xaba, sê dat die gebou die toneel van ‘n misdaad was en dat niemand toegang daartoe behoort te geniet nie. Volgens haar moet die gebou weens die aard van die misdaad vir ten minste drie dae leeg staan.

Nokuthula Xaba was enkele jare gelede in die nuus omdat sy self gratis huisvesting in ‘n woonstel vir verpleegsters in Hospitaalstraat, Johannesburg geniet het. Sy was voorheen ‘n verpleegster maar toe sy as raadslid verkies is, het sy nagelaat om as verpleegster te bedank en het steeds haar gratis woonstel behou.

Uitsettings het Woensdag kort ná die brand plaasgevind, maar vele inwoners het kort daarna na die gebou teruggekeer.

Liefdadigheidsorganisasies is tans besig om komberse en voedsel aan die inwoners te verskaf wat weer die gebou betrek het.

Nokuthula Xaba het ‘n beroep op die publiek gedoen om geld te skenk. “Ons het oop hande nodig; help, help, asseblief,” het sy aan die media gesê.

7 July 2017
Bruce Fordyce aangeval terwyl hy op straat draf

Die Suid-Afrikaanse langafstandatleet en herhaalde Comrades-wenner, Brucy Fordyce, is op straat in Johanensburg aangeval en beroof terwyl hy vanoggend besig was om te oefen.

Volgens ‘n vriend, mnr. Ray de Vries, is Fordyce, aangeval en van sy hardloopskoene en horlosie deur gewapende rowers beroof.

Die rowers het in ‘n motor langs Fordyce stilgehou en hy het aanvanklik gedink dat hulle padaanwysings wil vra, toe hulle ‘n vuurwapen te voorskyn haal en hom beveel om sy horlosie en skoene te oorhandig.

Maar blykbaar het Fordyce hom nie van stryk laat bring nie en het, nadat hy tuis ‘n ander paar skoene gaan aantrek het, sy oggenddraffie voortgesit.

Op die hoogtepunt van sy loopbaan as marathonatleet het Fordyce nege keer die moordende Comrades-wedren gewen.

23 June 2017
Oproeriges by Krugersdorp steek huis aan die brand

Die polisie ondersoek ‘n saak van brandstigting nadat oproeriges van die Princess-plakkerskamp in Roodepoort, Dinsdagaand ‘n huis aan die brand gesteek het.

Tydens oproer en onluste, wat RSG beskryf as ‘n “diensleweringsbetoging”, is verbygaande voertuie en motoriste ook met klippe bestook.

Motoriste word aangeraai om Ontdekkersweg of die N12 te gebruik. Tot dusver is geen beserings nog aangemeld nie.

Die Johannesburgse Metropolisie sê Albertina Sisuluweg langs die plakkersgebied in die rigting van Krugersdorp, bly gesluit.

Die polisie wil duidelik nie kanse waag nie want drie maande gelede het plakkers van Princess aan die Wes-Rand ‘n vragmotor gekaap en aan die brand gesteek ná ‘n gewelddadige protes deur inwoners. Die vragmotor vol groente en vrugte op die Hoofrifpad is eers geplunder en daarna aan die brand gesteek.

Die polisie het gereageer met rubberkoeëls en skokgranate om die skare te verjaag en van die gesteelde goedere terug te vind.

Die inwoners sê hulle wil hê die regering moet hul belofte van behuising, water en elektrisiteit nakom.

Terwyl kalmte op Hoofrifweg herstel is, was dit lank gesluit aangesien beamptes moes werk om te verwyder wat oorgebly het van die brandende vragmotor, bande en sementblokke.

Gemeenskapsleier David Mathibe sê die protes sal nie ophou nie, want die regering het voortgegaan om leë beloftes te maak.

“Die regering luister nie na ons nie, wat beteken dat hulle nie omgee vir ons mense nie.”

“Ek is al so lank hier, ek behoort nou in ‘n pragtige huis te bly. Hulle neem ons nie ernstig op nie. Laat hulle dus doen soos hulle wil, en ons sal dieselfde doen,” het ‘n inwoner gesê.

Die polisie sê hulle sal in die omgewing bly om seker te maak dat protes nie weer opduik nie.

In Maart het betogers ‘n gedeelte van Elsburgweg en ander strate wat na die Ramaphosa-plakkers en Reigerpark gelei het, met brandende bande, gemors, boomtakke en vullis afgesper.

“Ons het besluit om ons griewe na die strate te neem, want daar is nog steeds geen ontwikkeling in ons omgewing nie, alhoewel ons baie keer gestem het,” het een van die inwoners gesê.

Ramaphosa word nie ontwikkel nie, terwyl ontwikkelings in ander gebiede langs hul area in die bruin gebied plaasvind, sê hulle.

“Skole, ‘n biblioteek, gemeenskapsale, sportgeriewe, teerpaaie en ander dienste is aan die orde van die dag in Reigerpark, maar nie Ramaphosa nie.

“Ons het nie eens sportgeriewe om jongmense van die strate te hou wat verslaaf is aan dwelms nie.”

7 June 2017
SMS lei tot grootskaalse onrus suid van Johannesburg

Geweld het uitgebreek tydens ‘n diensleweringbetoging in Eldoradopark, suid van Johannesburg. Byna al die toegangsweë is gesluit.

Motoriste is gevra om die N12 en die Goue Hoofweg te vermy uit vrees dat hulle veiligheid nie gewaarborg kan word nie. Volgens berigte is brande vroegoggend in strate gestig om dit te versper.

Onbevestigde berigte lui dat inwoners oor swak dienslewering ontevrede is.

“Daar is geen manier om uit Eldoradopark uit te kom nie, daar is vure, die paaie is sedert baie vroegoggend, sedert 4:00 afgesper. Al die snelweë is geblokkeer en inwoners neem die strate oor. Ons het gisteraand ‘n SMS gekry wat gesê het alle paaie sal geblokkeer word weens swak dienslewering in die omgewing en dit is eintlik waar,” sê ‘n inwoner.

Dit is nie duidelik wie die SMS uitgestuur het aan al die inwoners nie. Inwoners eis glo dat huise toegewys word aan hulle.

Verskeie snelweë is geraak en verkeer word na alternatiewe roetes gelei, aangesien inwoners rommel en brandende bande gebruik het om paaie af te sper. Maar die onluste het totale verkeerschaos in Johannesburg veroorsaak.

Die afrit wat lei tot die N12 en die N1 oprit, oorkant Vryheidspark, is heeltemal gesluit.

Die Goue Hoofweg is ook geraak. Sommige motoriste en vragmotorbestuurders maak u-draaie op die paaie om alternatiewe roetes te probeer vind.

‘n Rookwolk van brandende voorwerpe kan van verskillende rigtings gesien word. ‘n Polisiehelikopter is ook in die lug.

8 May 2017
Dak wat ineenstort by akademiese hospitaal is ‘verouderde boutegnologie’

Die boumaatskappy wat opknappingswerk by die Charlotte Maxeke-hospitaal in Johannesburg gedoen het, sal aanspreeklik gehou word nadat ’n stuk van die hospitaal se dak ingestort en minstens vyf mense beseer is.

Verskeie dokters by die akademiese Hospitaal in Johannesburg het aan Eyewitness News gesê hulle het al geruime tyd oor strukturele probleme by die fasiliteit gekla, maar hul waarskuwings is geïgnoreer.

Ontlasting lek glo in die pedriatiese afdeling, behalwe die daklekke oral en probleme by intensiewe sorg.

Die Gautengse LUR van Infrastruktuurontwikkeling, Jacob Mamabolo sê die kontrakteurs het by die struktuur waaraan hulle gewerk het, betondele uit die dak sonder toestemming verwyder.

Vyf mense is beseer toe ‘n dak by die ingang ineengestort het Donderdagmiddag.

“Die hospitaal is ‘n geruime tyd gelede gebou, met verouderde konstruksietegnologie wat gebruik is,” het hy gesê. Dit lyk egter eerder of dit veroorsaak is deur die onbekwaamheid van die swart kontrakteur.

Mamabolo, sê Thandzanani Trading Enterprise is ook die terrein verbied ná die voorval gister.

Hy sê bouers het blykbaar stukke beton verskuif en dit op ’n dun, onversterkte stuk van die dak gesit. Mamabolo sê egter die hospitaal bly oop vir die publiek en alle sale is funksioneel.

Blykbaar gaan die owerhede dit “oorweeg” om die kontrakteur te swartlys oor die ramp.

Die Departement van Arbeid gaan glo eise teen die kontrakteur ondersoek vir nalatigheid deur beroepsveiligheidsinspekteurs .

Die premier van Gauteng, David Makhura, sê die vyf wat gister in die ongeluk beseer is, is almal buite gevaar.

Hy het die hospitaal ná die ongeluk besoek en gesê dit is onverklaarbaar waarom die kontrakteur materiaal wat hy vir die herstelwerk aan die hospitaal se dak gebruik het, op ‘n deel van die dak geplaas het wat geen versterkings het nie.

Opruimingswerk by die hospitaal is intussen afgehandel.

3 March 2017
Waterbeperkings in Gauteng kan opgehef word

Waterbeperkings in Gauteng kan binnekort iets van die verlede wees ná die wydverspreide reën die afgelope twee weke in die provinsie.

Munisipaliteite in Gauteng het sedert laat verlede jaar 15 persent minder water van Rand Water gekry omdat damvlakke tot slegs 26 persent gedaal het.

Die Vaaldam, die belangrikste waterbron in Gauteng, is byna 100% vol, het gesê Departement van Waterwese se woordvoerder Maandagoggend verklaar. Maar “ons is steeds in ‘n droogte,” sê die woordvoerder.

“Vanoggend die Vaaldam was op 97,89 persent vol en nog sluise is oopgemaak. Hulle sal oop wees vir ten minste die volgende twee dae,” het hy gesê.

Die opheffing van waterbeperkings sal in die Staatskoerant gepubliseer word Maandag met onmiddellike effek.

“Dit sal uiteensit watter beperkings in Gauteng opgehef word.”

Sluise is sedert Vrydag by die Bloemhofdam in Noordwes oopgetrek.

Hoofsaaklik Gauteng, dele van Noordwes en kleiner dele van Mpumalanga en die Vrystaat het droogteverligting gehad..

Die minister van Waterwese, Nomvula Mokonyane, sê die vlakke van die geïntegreerde Vaalrivierstelsel het aansienlik verbeter, wat die opheffing van waterbeperkings moontlik maak.

27 February 2017
Johannesburgse lughawegebou vol water weens stortreën

Benewens die chaos wat op die N3-snelweg en die R24 na die lughawe deur gistermiddag se wolkbreuk veroorsaak is, het die lughawegebou skade gely. Water het by die dak ingestroom en verskeie vloere van die gebou het plasse water getoon.

Stukke van die dak en plafon het ook plek-plek na benede getuimel. Skoonmaakpersoneel het allerlei houers op die vloere geplaas om van die lekkende water op te vang.

Verskeie ingange van die lughawegebou is ook deur die reën beskadig.

10 November 2016
Johannesburg tot laat gisteraand ontwrig deur N3-vloedramp

Tonele wat met dié uit die distopiese roman Bodem vergelyk kan word, het hul gister op die N3-snelweg oos van Johannesburg afgespeel, met dele van die snelweg wat in ‘n rivier verander is. Motors het begin dryf, teen mekaar gebots en ten minste twee mense het gesterf.

Die toneel gister op die N3 naby Gilloolys. Foto: Twitter

‘n Geweldige donderstorm het laat gistermiddag oor Johannesburg losgebars wat deur sommige as ‘n “wolkbreuk” beskryf is. Verkeer in die omgewing van die N3 wat ook die R24 na Jan Smuts-lughawe insluit, het heeltemal tot stilstand gekom.

Gisteraand laat om halftwaalf was verkeerspolisie en nooddienste steeds besig om gestrande motors en vragmotors van die snelweg te verwyder. Sowel die R24 van die lughawe af en die N3 was steeds plek-plek gesluit met verkeer wat botstil staan.

Gisteraand om halftwaalf tussen Edenvale en Gilloolys was nooddienste steeds besig om voertuie te verwyder. Foto: Praag

10 November 2016
Van Wits se mooi voornemens kom nog brandstigting, geweld

Oproeriges het Dinsdagaand ‘n bus van die Rea-Veya busdiens aan die brand gesteek buite die hoofkampus van die Universiteit van die Witwatersrand in Johannesburg.

Vroeër die aand is ‘n polisievoertuig aan die brand gesteek nadat die polisie skynbaar deur onlusmakers mislei is.

Die swart betogers het volgens berigte op die bus toegeslaan terwyl die polisie aandag geskenk het aan die toneel van die brandende polisievoertuig.

Die voorvalle volg op gewelddadige betogings gistermiddag waarin betogers die verkeer ontwrig en strate met klippe en asdromme versper het.

Hulle het motors met klippe bestook. Die gewelddadige betogings duur al langer as ‘n maand terwyl die voormalige Openbare Beskermer, Thuli Madonsela die oproeriges aanhits omdat hulle kwansuis “regmatige griewe” het.

Wits het nou reeds verskeie seremonies met hooggeplaasdes soos Madonsela gehou ter afsluiting van die geweld waar allerlei mooiklinkende voornemens uitgespreek is, maar daarvan het dadels gekom.

Madonsela word steeds voorgehou deur die liegpers as ‘n nastrewenswaardige openbare figuur.

26 October 2016
ANC-raadslid slaan dood neer toe DA Johannesburg oorneem

‘n ANC-raadslid in Johannesburg, Nonhlanhla Mthembu, het tydens die stemming om ‘n nuwe burgemeester aan te wys, ineengesyg en gesterf, blykbaar aan ‘n hartaanval. Hierna is die aanwysing van die burgemeester en die hoofsweep van die stad gekombineer (foto hier bo), en is Herman Mashaba en Kevin Wax onderskeidelik as eerste burger en hoofsweep aangewys. Beide Mashaba en Wax is van die DA, wat die ondersteuning van die EFF tydens die stemmery geniet het.

Mashaba het egter dadelik belowe om nóg meer fondse op die stad se nie-betalende swart inwoners te bestee deur te verklaar dat hy “die waardigheid van inwoners gaan herstel deur werk te skep en dienslewering te verbeter, veral in lokasies soos Alexandra”.

Mashaba het insgelyks belowe om korrupsie in Johannesburg hok te slaan, ‘n stad waar omkopery en ‘n geknoei rondom tenders algemeen is. Mashaba het gisteraand net voor sy verkiesing as burgemeester gesê:

“Van vanaand af word korrupsie tot openbare vyand nommer een verklaar. Ek verbind my en lê ‘n belofte af dat ons sal omsien na openbare geld wat misbruik is, en dit sal gebruik om waardigheid aan mense te verskaf. Ons gaan ‘n regering bedryf wat na u geld sal kyk.”

Oor dienslewering het hy gesê: “Mense sonder toilette wat verwag om in ‘n stad te woon wat wêreldklas is, is nie regverdig nie. Ons wil hê dat Johannesburg daardie voortreflike stad moet wees waarin mense sal wil woon.”

Mashaba is met 144 stemme teenoor die 125 van Parks Tau, die ANC se uitgaande burgemeester, verkies. Die hoofsweep sal Kevin Wax wees en die speaker Vasco da Gama, al drie van die DA.

Da Gama se naam het al vir heelwat gekorswel op sosiale media gesorg, aangesien dit dieselfde as dié van die beroemde Portugese seevaarder is.

Uit eerbied vir die ontslape Mthembu, het Mashaba besluit om nie gisteraand ‘n lang toespraak te lewer nie en dit eerder uit te stel na 13 September, wanneer hy sy inhuldigingstoespraak sal lewer.

EFF-lede op die openbare galery het voortdurend gesing om die DA se kandidate te ondersteun. Telkens as ‘n ANC-raadslid se naam uitgeroep is, het hulle geboe.

Amptenare van die Onafhanklike Verkiesingskommissie het die raadslede bygestaan om die verkiesings vir die drie posisies te hou.

Enkele kere het chaos gedreig sodat die stadsbestuurder Trevor Fowler sy hande vol gehad het om die ondersteuners van die EFF en ANC op die openbare galery te beheer. Tydens die stemmery vir die speaker, het verskeie raadslede hul stembriewe aan die publiek getoon alvorens hulle in die stembus geplaas is. Van die party-amptenare het hierteen beswaar gemaak. Die OVK het beslis dat die stemmery in die geheim moes plaasvind en dat, indien dit weer sou gebeur, die stemmery oorgedoen sou moes word.

Toe die ANC-lid wat voorheen daarvan beskuldig is dat hy EFF-raadslede wou omkoop om vir die ANC te stem, Dan Bovu, se naam aangekondig is, het die skare hom uitgejou. EFF-ondersteuners het hom as ‘n “gesoekte misdadiger” beskryf.

23 August 2016