Stad Kaapstad – praag.co.za

Plakkers in opstand oor Kaapstad se karige hulp

Die Stad Kaapstad het besluit om behuising vir dakloses tydelik te laat vaar nadat betogings uitgebreek het oor die karige bystand.

Planne is nou van die baan geskuif om blyplekke vir inwoners van Agstelaan in Valhallapark op te rig nadat brande honderde plakkers dakloos gelaat het.

Oproer en chaos het Donderdag in die gebied uitgebreek met inwoners wat buitebande aan die brand gesteek het toe die Stad Kaapstad “net vier sinkplate” aan Maandag se brandslagoffers gegee het.

Die Stad het met voorheen beloftes gemaak oor hoe hulle die lewens van mense gaan verbeter met die nuwe wonings.

Brandende bande en versperrings is op die Robert Sobukwe-pad aangebring.

Van die mense bly tans in die Nooitgedacht-gemeenskapsaal.

Inwoners het gesê dat hulle eintlik ou skeepshouers verkies. Hulle sê die sinkplate sal maar net een of ander tyd weer afbrand.

Die woordvoerder van die Kaapstadse rampbestuur, Wilfred Solomons-Johannes sê die moeilikheidmakers is ‘n klein minderheid.

Die meerderheid dakloses is bereid om die stad se hulp te aanvaar. Samesprekings word tans met die gemeenskap gevoer om die probleem te besleg.

Aanvanklik is besluit om die ramp as ‘n “geleentheid” te sien om 580 nuwe sinkkaias te bou. Dit sou deel uitmaak van ‘n twee-jaar plan om munisipale opknappings in die woongebied te bespoedig.

Dit is alles egter voorlopig van die baan geskuif nadat die besluit tot oproer gelei het met plakkers wat paaie in die gebied afgesper het en aandring op beter behuising of baksteenhuise.

Polisiebeampte in hof oor vrou hom teister

’n Kaapse metropolisiebeampte het hom tot die gelykheidshof gewend nadat ’n vroulike kollega hom na bewering herhaaldelik seksueel geteister het.

Die 39-jarige superintendent het die Stad Kaapstad daarvan beskuldig dat hy versuim het om hom van die beampte te beskerm. Die vrou het glo herhaaldelik seksueel uitlokkende opmerkings gemaak en sy bobeen gestreel, berig The Times.

Die man het gesê hy is raadop en het hom tot die hof gewend omdat sy bestuurders nie sy klagtes ernstig opgeneem het nie.

Luidens hofdokumente het die probleme in Januarie begin toe hy sy rekenaar moes verstel sodat hy haar nie kan sien nie.

Die vrou het glo ook gevra om op sy skoot te sit en voorgestel dat sy voor hom uittrek.

Hy het tydens ’n ander voorval met ’n stresbal in die kantoor gesit, waarna sy by die deur gaan staan het.
“Sy het haar bene oopgemaak en voorgestel dat ek die bal tussen haar bene boul.”

Die voorvalle het hom “emosionele en professionele probleme, vernedering en moeilikheid in my huwelik veroorsaak en ook my goeie naam in oneer gebring”. – Sapa

Kaapstad gasheer vir Nobel-beraad

Kaapstad is gekies as die gasheerstad vir die 14de Wêreldberaad van Nobel vredespryswenners wat volgende jaar plaasvind. Die aankondiging is in Warskou, Pole gemaak waar die 13de beraad tans plaasvind.

Volgens ‘n verklaring deur die Stad Kaapstad, is dit ‘n eer vir alle Suid-Afrikaners om dit aan te bied en sal daar seker gemaak word dat dit net so vlot soos vanjaar se beraad verloop.

Voorbereidings het glo alreeds begin vir dié groot beraad oor presies 350 dae.

Vier Suid-Afrikaners het al die Nobelprys vir vrede gewen: Albert Luthuli, die voormalige leier van die ANC (1960) , Aartsbiskop Desmond Tutu (1984) , asook voormalige Presidente FW de Klerk en Nelson Mandela, saam in 1993.

Die toekenning was al dikwels in omstredenheid gehul. Sedert Mandela en De Klerk hulle gedeelde prys ontvang het, het geweld en misdaad in Suid-Afrika dramaties toegeneem.

President Obama, die Nobelpryswenner vir Vrede in 2009 het gesorg dat hy Afghanistan, Libië, Egipte, Jemen en nou Sirië met geweld teister.

Obama se verdienstelikheid as ontvanger is veral vertroebel deur ‘n voorgestelde militêre aanval op die Siriese regering waarvoor nòg sy bondgenote, nòg sy landgenote enige aptyt gehad het.

Dit wil tewens lyk dit of sekere presidente nie naastenby genoeg aandag aan die geskiedenis van die soort wêreldleiers wat gewen het, skenk nie.

Hierdie internasionale eer is voorheen aan groot geeste soos Henry Dunant, die stigter van die Internasionale Rooikruis, Amerikaanse sosiale hervormer Jane Addams, en George Marshall, die argitek van ‘n vreedsame post-1945 Europa, toegeken.

Van die aanvallers van 9/11, al-Kaida, het Obama gesê dat die groep in werklikheid vreedsame naastebestaan in Sirië nastreef. Daarmee het die glans van die prys finaal verdof.

Die 1953 Nobelprys vir Letterkunde aan die destydse Britse premier Winston Churchill vir sy memoirs, het Churchill genoop om na bewering op te merk: “Ek hoop dit is nie vir vrede nie!”

Indringende vrae aan Kaapstad oor tenderkonkelary, MyCiti-busprojek

‘n Konstruksiemaatskappy wat by die multimiljoenrand gekonkel met tenders voor die Wêreldbeker-sokkertoernooi betrokke was, het ook die tender vir die ontwikkeling van die peperduur MyCiti-busprojek van die Stad Kaapstad ontvang.

Mnr. André Fourie, raadslid van die Vryheidsfront Plus vir Kaapstad, het sy ernstige kommer hieroor uitgespreek in ‘n lys indringende vrae wat op die volgende Kaapstadse raadsvergdering op 30 Oktober aan die burgemeester voorgelê sal word vir beantwoording.

Volgens mnr. Fourie is die tender vir die ontwikkeling toegeken aan die konstruksiemaatskappy Group Five nog voordat die gekonkel rondom die Wêreldbeker-tenders aan die lig gekom het.

In dié reuse tenderbedrogspul het maatskappye gekonkel oor projekte soos die Bergrivierdam, snelweë, sokkerstadions, ’n deel van die Sishen-spoorlyn en selfs universiteitskoshuise.

Van die grootste konstruksiemaatskappye in die land het aan die Mededingingskommissie erken hoe tenders onder mekaar “uitgeruil” is vir projekte dwarsoor die land, maar veral in die Wes-Kaap en Gauteng.

Grootbase van konstruksiemaatskappye het bymekaargekom om spesifiek self te “besluit” wie kry watter tender. Die wat teruggestaan het, sou ‘n vergoedingsbedrag van R500 000 ontvang.

Mnr. Fourie sê die VF Plus wil daarom nou van die Stad Kaapstad weet wat hy gedoen het om seker te maak daar was geen ongerymdhede en prys-sameswering by die MyCiti-projek nie en dat ‘n eerlike en mededingende tenderproses gevolg is.

“Die burgemeester sal die versekering moet gee dat die proses eerlik was, veral aangesien dit nou duidelik blyk dat die stad sy finansiële verantwoordelikhede gruwelik versuim het deur nie kontrakte wat deel gevorm het van die vorige sameswering, behoorlik na te gaan nie.

“Ons moet nou aanvaar dat die Stad alles wat aan hom opgedis is deur die nasionale regering, Fifa en die kontrakteurs, sonder meer aanvaar het en dat daar op reuse skaal ‘n gekonkel met tenders plaasgevind het sonder dat die Stad daarvan bewus was.

“Nou moet die Stad moontlik regstappe neem wat die belastingbetalers nog miljoene kan kos om vermorste geld te verhaal,” sê mnr. Fourie.

Mnr. Fourie se vrae is as volg:

1. Kan die Burgemeester aan die raad verduidelik of die tenderproses – en of die Group Five-tender in die besonder, behoorlik ondersoek is vir soortgelyke tender-sameswering en prysvasstelling by die toekenning van die MyCiti-infrastruktuurtender? Indien wel, wanneer kan die verslag van so ‘n ondersoek verwag word? Indien nie, waarom nie? en

2. Kan die burgemeester aan die raad en Kaapstad se belastingbetalers die versekering gee dat daar nie met hierdie tender weer soos in die geval van die stadion-tenders onregverdige, onregmatige, onbillike en onnodige gelaaide kostes ingebou is nie?

Beloon misdaadinligting

“‘n Plan om ‘n belonging te betaal aan mense wat inligting oor beplande misdaad in die Stad Kaapstad aan die polisie verskaf, is positief en kan lei tot pro-aktiewe optrede om misdaad te bekamp,” sê mnr. André Fourie, Vryheidsfront Plus-raadslid vir die Stad Kaapstad.

Hy sê dit was lankal nodig aangesien Suid Afrika se publiek begin om vertroue in die land se veiligheidsmagte te verloor en almal gebuk gaan onder die uiters gevaarlike misdaad-situasie in die land.

Volgens mnr. Fourie skep daaglikse beriggewing oor misdaad die indruk dat mense nêrens meer veilig voel nie, nie eens in die hul eie wonings nie.

“Inbrake, aanrandings, verkragting en moord raak selfs in sogenaamde veilige woongebiede ‘n alledaagse. Voorvalle van klipgooi en die oprigting van padversperrings op openbare roetes kom gereeld voor en paaie, selfs hooftoevoerroetes soos die N2, word meer as ooit om hierdie rede gesluit en herinner byna aan ‘n ‘oorlogsituasie’.

“Die optrede van ontevredenes het selfs al gelei dat ontlasting voor regeringsgeboue en in die Kaapstad Internasionale Lughawe uitgegooi is en brandende motorbande is ‘n gereelde verskynsel.

“Dit voel asof misdadigers ons gyselaar in ons eie land hou.

“Nie eens die stad se burgemeester kon ‘n bevredigende antwoord verskaf oor probleme wat oproermakers op die N2 veroorsaak nie. Dit blyk dat daar bloot nie die mannekrag is om die pad heeltyds te patrolleer nie,” sê mnr. Fourie.

Volgens hom is ’n oplossing hiervoor ‘n inligtingsintelligensie-eenheid wat inligting kan inwin oor probleempunte sodat daar pro-aktief opgetree kan word. Hy sê as die kwaaddoeners drie-uur soggens opstaan, moet die veiligheidsmagte reeds inligting daaroor hê en hulle inwag.

“Maar dit gebeur nie. In baie gevalle word oortreders net verjaag en nie eens aangekeer nie. Die plan on ‘n belonging uit te reik vir inligting oor misdaad kan hier van groot nut wees en kan bydra om weer ordelikheid in Kaapstad te bewerkstellig,” sê mnr. Fourie.

Kommer oor Stad Kaapstad se buitensporige salarisverhogings

Daar heers kommer oor die buitensporige las wat salarisse op die begroting van die Stad Kaapstad plaas. Salarisse beloop tans sowat ‘n derde van die stad se begroting en daarbenewens is ‘n gemiddelde salarisverhoging van 6.84% nou ook goedgekeur, sê mnr. André Fourie, Vryheidsfront Plus-raadslid vir Kaapstad.

Volgens mnr. Fourie is die besluit om salarisse te verhoog tydens ‘n raadsvergadering op 31 Julie (verlede maand) geneem.

Hy sê die Vryheidsfront Plus verwelkom daarom die realistiese erkenning van mnr. Ian Nielson, Kaapstad se onderburgemeester en burgemeesterskomiteelid vir finansies, dat die kwessie van salarisse ‘ernstige gevaarligte’ laat flikker.

“Niemand wil amptenare, veral dié wat ‘n swaar las dra en briljant presteer, salarisverhogings ontsê nie. Dit is egter jammer dat die aanbevelings vir die verhogings vir die stadsbestuurder en uitvoerende direkteure noem dit word gedoen om salarisse ‘markverwant’ te hou.

“Munisipale amptenare regdeur Suid-Afrika en nie net in Kaapstad nie, verdien 30% tot 40% meer as hul eweknieë in die private sektor en dit maak so ‘n stelling absurd. Dit is harde feite wat nie weggepraat kan word nie,” sê mnr. Fourie.

Volgens mnr. Fourie sal SALGA (die vereniging vir plaaslike regerings) net soos ander vakverbonde wat onrealistiese looneise najaag, harder aangepraat moet word oor sy roekelose, blatante en voorskriftelike aanbevelings wat net so op alle stadsraads-amptenare en deur die Stad Kaapstad nagevolg en toegepas word.

Hierdie aanbevelings word voorgelê terwyl die Stad en sy amptenare geen simpatie het met Jan en Alleman wat swoeg om te oorleef nie.

“Daar is by duisende pensioentrekkers, gemiddelde werknemers en andere geen hoop om naby ‘n jaarlikse 6.84%-verhoging te kom nie maar hul belastings in Kaapstad het gemiddeld met meer as 100% gestyg oor die laaste ses jaar.

“Daar is stede in Amerika wat bankrot raak en die gevaar loop om bankrot te raak en die Britte het vir ‘n paar jaar reeds ‘n moratorium op munisipale begrotingsverhogings geplaas. Ons kan in hierdie opsig nie bekostig om oorgerus te raak nie,” sê Mnr. Fourie.