seksuele teistering – praag.co.za

ANC-ampsdraers verdink van ernstige aanranding, seksuele teistering

‘n Swart ANC-raadslid het ‘n minderjarige meisie so erg aangerand dat sy inwendig gebloei het, het die hof gehoor.

Dilahlwane Njodina, het in Bultfontein in die Vrystaat in die streekhof verskyn op ‘n aanklag dat sy ‘n 14-jarige meisie ernstig aangerand het.

Die aanval het gevolg op ‘n stryery tussen die meisie en die raadslid se dogter.

‘n Groot groep polisie-lede moes ‘n oproerige skare buite die hof in toom hou.

Lede van opposisiepartye, wat die verhoor wou bywoon, is nie in die hof toegelaat nie.

Die verhoor is tot 18 Februarie uitgestel.

Intussen is die Wes-Kaapse provinsiale leier, Marius Fransman uit sy pos verwyder hangende ‘n ondersoek na die klag van seksuele teistering teen hom.

Die ANC sê hy glo hy het die regte besluit geneem om hul provinsiale leier te skors.

Die party se Nasionale Werkskomitee en die Wes-Kaapse leiers hou Maandag ‘n vergadering om die skorsing te bespreek.

Fransman is oor die besluit ingelig. Die Hoof van die ANC se Wes-Kaapse uitvoerende komitee, Jabu Mfusi sê hulle wag vir die werkskomitee om die redes vir die besluit te verskaf.

Die klagte teen Fransman is sowat drie weke gelede deur ‘n twintigjarige vrou naby Rustenburg in Noordwes gelê.

Skole: Aanranding, seksuele teistering, patetiese wiskunde

Aanranding en seksuele teistering vier hoogty in Suid-Afrikaanse skole en slegs 3% van Gr 9 leerlinge kry 50% vir Wiskunde volgens die Jaarlikse Nasionale Asseseringsverslag, ANA.

Die Suid-Afrikaanse Raad van Opvoedkundiges sê 346 klagtes is sedert April vanjaar teen onderwysers gelê. Die raad het in November vergader.

‘n Woordvoerder van die raad, Thembinkosi Ndlovu sê die meeste klagtes hou verband met seksuele mishandeling en aanranding tussen kollegas.

Hy het bekendgemaak dat daar 270 ondersoeke teen onderwysers gedoen is, en 50 verhore en drie dissiplinêre verhore het plaasgevind, waarna 31 onderwysers onbepaald geskors is.

Dit is nie bekend of dié onderwysers steeds vergoed word nie.

Die Wes-Kaapse departement van onderwys het skole intussen gewaarsku dat hulle nie leerders se rapporte mag terughou weens wanbetaling nie.

In ‘n verklaring sê die provinsiale minister, Debbie Schafer in vorige jare het sommige skole leerders se uitslae teruggehou indien hul skoolgeld nie betaal is nie.

Schafer sê finansiële redes kan nie aangevoer word om teen leerders te diskrimineer nie.

Sy het ook ‘n beroep op ouers gedoen om alle uitstaande skoolgelde te betaal.

Polisiebeampte in hof oor vrou hom teister

’n Kaapse metropolisiebeampte het hom tot die gelykheidshof gewend nadat ’n vroulike kollega hom na bewering herhaaldelik seksueel geteister het.

Die 39-jarige superintendent het die Stad Kaapstad daarvan beskuldig dat hy versuim het om hom van die beampte te beskerm. Die vrou het glo herhaaldelik seksueel uitlokkende opmerkings gemaak en sy bobeen gestreel, berig The Times.

Die man het gesê hy is raadop en het hom tot die hof gewend omdat sy bestuurders nie sy klagtes ernstig opgeneem het nie.

Luidens hofdokumente het die probleme in Januarie begin toe hy sy rekenaar moes verstel sodat hy haar nie kan sien nie.

Die vrou het glo ook gevra om op sy skoot te sit en voorgestel dat sy voor hom uittrek.

Hy het tydens ’n ander voorval met ’n stresbal in die kantoor gesit, waarna sy by die deur gaan staan het.
“Sy het haar bene oopgemaak en voorgestel dat ek die bal tussen haar bene boul.”

Die voorvalle het hom “emosionele en professionele probleme, vernedering en moeilikheid in my huwelik veroorsaak en ook my goeie naam in oneer gebring”. – Sapa

Vierde Wits-dosent bedank oor teistering

Die Universiteit van die Witwatersrand (Wits) het ‘n ondersoek na die laaste saak van seksuele teistering voltooi nadat ’n vierde dosent bedank het.

’n Tugproses teen dié dosent was nog aan die gang, maar hy het besluit om sy bedankingsbrief in te dien voordat hy sy lot gehoor het, berig Eyewitness News.

Twee dosente is in Julie afgedank en ’n derde dosent is verlede maand afgedank nadat hulle skuldig bevind is aan seksuele teistering.

Prof. Adam Habib, visekanselier van Wits, het gesê ’n nuwe ondersoekproses is in werking gestel om in die toekoms voorvalle van seksuele teistering beter te hanteer.

Derde Witsdosent afgedank oor seksuele teistering

‘n Derde dosent aan die Universiteit van die Witwatersrand (Wits) is skuldig bevind aan seksuele teistering, en afgedank.

Adam Habib, visekanselier, het gesê die instelling het ‘n beleid van zero-verdraagsaamheid tov seksuele teisteraars aanvaar. Twee ander dosente is in Julie oor dieselfde klagtes afgedank.

“Ons hoop dat die daadwerklike optrede in die gevalle ‘n duidelike voorbeeld stel dat seksuele teistering nie in enige vorm op ons kampusse geduld sal word nie.”

Die universiteit is besig met ‘n ondersoek teen nóg ‘n dosent. ‘n Taakspan is saamgestel om die oortredings te ondersoek.

Habib het Woensdag gesê hy aanvaar volle verantwoordelik vir die mishandelings wat op die kampus plaasgevind het.

“Ek wil om verskoning vra aan al diegene wat seksuele teistering ervaar het. Wits moet ‘n veilige plek wees en ons sal verseker dat dit is.” – Sapa

Vavi se klag van afpersing staan steeds

Die vrou wat ‘n klag van seksuele teistering teen Zwelinzima Vavi, hoofsekretaris van Cosatu, ingedien het, het die klag teruggetrek, maar Vavi oorweeg nogtans regstappe teen haar.

Die vrou het klag twee uur ná die begin van ‘n tugverhoor by Cosatu teruggetrek.

Vavi is bly dat die klag van seksuele teistering teen hom teruggetrek is, het hy Maandag gesê.

“Ek is bly die verhoor is gefinaliseer,” het Vavi in ‘n verklaring gesê.

“Ek hoop ons kan almal die sage agter ons sit sodat ons kan konsentreer op die werklike kwessies van die dag – om te verseker dat ons ‘n dinamiese vakbondfederasie het wat Suid-Afrika en die belange van werkers bevorder.”

Vavi het erken dat hy seks gehad het met die getroude vrou, wat ‘n werknemer is van Cosatu, en beweer sy het later probeer om R2 miljoen van hom te eis.

Hy het ontken dat hy haar verkrag het en gesê sy het ingestem om seks met hom te hê.

Sy het ‘n klag van seksuele teistering teen hom ingedien, maar Maandag tydens ‘n tugverhoor teruggetrek.

Hy het gesê hy sal met sy prokureur vergader om te sien of enige verdere stappe gedoen kan word oor die klag. Vavi sê sy aanklag van afpersing teen ‘n 26-jarige vrou wat hom van verkragting beskuldig het, staan steeds.

“In die lig van die skade wat my reputasie berokken is, sal ek met my prokureurs vergader om enige verdere stappe oor die kwessie te oorweeg.” – Sapa