praag.co.za

Tag: brande

  • Brande vlam weer op langs Tuinroete

    Brandbestryders langs die Tuinroete probeer steeds om veldbrande tussen Rheenendal en KaRatara buite Knysna te blus wat gisteraand weer opgevlam het.

    Sowat 60 brandbestryders is in die gebied ontplooi, het RSG berig.

    Die plaaslike brandweerhoof, Clinton Manuel sê die brande het die potensiaal om opnuut verwoesting te saai indien die wind begin waai. Dit brand ook by Plettenbergbaai. Geen huise of lewens word in die stadium bedreig nie.

    Vroeër vandeesmaand is sewe mense dood en meer as 400 huise vernietig in brande in die gebied.

    Knysna Toerisme sê intussen planne word beraam om alle besoekers te huisves wat die jaarlike Oesterfees volgende maand wil bywoon.

    Vier-en-twintig gastehuise is tydens die onlangse wegholbrande in puin gelê. ‘n Woordvoerder van die Toerismeraad, Elmay Bouwer sê daar is genoeg akkommodasie.

  • Vier vas wat ontruimde huise in Knysna besteel

    Vier vas wat ontruimde huise in Knysna besteel

    Vier verdagtes is in hegtenis geneem op Knysna vir die beweerde besit van gesteelde goedere wat behoort aan inwoners wat hul huise moes ontruim het weens die brande.

    ‘n Woordvoerder van die polisie, Chris Spies, sê hulle het vermoed dat eiendom gesteel is by huise wat die vorige dag deur die nooddienste ontruim is.

    Die verdagtes is in die besit van goedere ter waarde van R80 000 gevind. Hulle sal aanstaande week in die hof verskyn.

    ‘n Rooikop-brandslaner, die 24 jarige Bradley Richards word deur kollegas beskryf as toegewyd en altyd gereed om te gaan help brand slaan wanneer nodig.

    Richards is oorlede nadat hy deur vlamme oorval is, terwyl hy en nog ‘n spanmaat besig was om brande te bestry in die Harkervillebos in die Plettenbergbaai omgewing, Woensdagoggend.

    Die brande, oor ‘n groot gebied, het reeds groot skade aan eiendom en skole aangerig en duisende mense moes hul huise verlaat. Knysna is tot ‘n rampgebied verklaar.

    Duisende inwoners van Knysna het vir ‘n tweede agtereenvolgende nag in skole en sale in die dorp deurgebring vir hul eie veiligheid. Nagenoeg eenhonderd huise, ‘n kerk en ‘n skoolkoshuis is in die brande vernietig.

    Brandbestryders en lede van die weermag was deur die nag steeds besig om die brande te blus wat deur ‘n sterk wind aangeblaas word.

    ‘n Woordvoerder van die organisasie Working on Fire, Linton Rensburg, sê die brande woed oor ‘n groot gebied, wat pogings bemoeilik om dit onder beheer te kry. Rensburg sê verskeie groepe werk egter saam om die brande te blus.

    Nog ‘n brandbestryder het ernstige brandwonde opgedoen in die verwoestende brandende in Knysna. Dit bring die dodetal in die gebied op vyf te staan.

    Die brande is meestal onder beheer langs die Tuinroete tot by Nelson Mandelabaai waar vier brande steeds woed, maar onder beheer is.

    Brandbestryders en weermagsoldate het deurnag in Knysna die vlamme onder beheer probeer bring waar vyftig hutte ook in die slag gebly het.

    Veertig brandbestryders sal vandag vanaf die O R Tambo Internasionale Lughawe in Johannesburg vertrek na die Suid-Kaap om te help met brandbestryding in Knysna.

    ‘n Johannesburgse sakeman, Diederichs Stopforth het die span brandbestryders byeengekry. Hulp het intussen ingestroom en vliegkaartjies is gekoop om die brandbestryders met hul toerusting in die Suid-Kaap te kry.

    Groot sakeondernemings het ook hulp beloof met vervoer, kos, komberse en tweerigtingradios.

    Vier brande woed steeds in die Nelson Mandelabaai-metrogebied in die Oos-Kaap, maar brandbestryders is op die toneel by Colleen Glen, Bushbuck Ridge, Sardiniabaai en Elandsrivier. Die wind is glo besig om te bedaar.

    Die polisie van Walmer ondersoek intussen ‘n saak van brandstigting ná ‘n verklaring van ‘n ooggetuie wat na bewering gesien het dat verdagtes petrol in die veld by Sardaniabaai uitgegooi het.

    Die Bitou-munisipaliteit by Plettenbergbaai huisves 48 mense in gemeenskapsale nadat hulle daarheen geneem is weens brande en rook in die gebied.

    ‘n Woordvoerder, Howard Swartz, sê die een brand het gedurende die nag naby Airportweg opgevlam, maar is nou onder beheer. Onderbrekings in watervoorsiening in sommige gebiede is ook reeds herstel.

  • SMS lei tot grootskaalse onrus suid van Johannesburg

    SMS lei tot grootskaalse onrus suid van Johannesburg

    Geweld het uitgebreek tydens ‘n diensleweringbetoging in Eldoradopark, suid van Johannesburg. Byna al die toegangsweë is gesluit.

    Motoriste is gevra om die N12 en die Goue Hoofweg te vermy uit vrees dat hulle veiligheid nie gewaarborg kan word nie. Volgens berigte is brande vroegoggend in strate gestig om dit te versper.

    Onbevestigde berigte lui dat inwoners oor swak dienslewering ontevrede is.

    “Daar is geen manier om uit Eldoradopark uit te kom nie, daar is vure, die paaie is sedert baie vroegoggend, sedert 4:00 afgesper. Al die snelweë is geblokkeer en inwoners neem die strate oor. Ons het gisteraand ‘n SMS gekry wat gesê het alle paaie sal geblokkeer word weens swak dienslewering in die omgewing en dit is eintlik waar,” sê ‘n inwoner.

    Dit is nie duidelik wie die SMS uitgestuur het aan al die inwoners nie. Inwoners eis glo dat huise toegewys word aan hulle.

    Verskeie snelweë is geraak en verkeer word na alternatiewe roetes gelei, aangesien inwoners rommel en brandende bande gebruik het om paaie af te sper. Maar die onluste het totale verkeerschaos in Johannesburg veroorsaak.

    Die afrit wat lei tot die N12 en die N1 oprit, oorkant Vryheidspark, is heeltemal gesluit.

    Die Goue Hoofweg is ook geraak. Sommige motoriste en vragmotorbestuurders maak u-draaie op die paaie om alternatiewe roetes te probeer vind.

    ‘n Rookwolk van brandende voorwerpe kan van verskillende rigtings gesien word. ‘n Polisiehelikopter is ook in die lug.

  • Nog ‘n brand breek naby Wellington uit

    Nog ‘n brand breek naby Wellington uit

    Nog ‘n brand het in die Wes-Kaap in Bainskloofgebied naby Wellington uitgebreek.

    Volgens die brandweerhoof van die Kaapse Wynlande, Ian Ross, het die brand weens ‘n sterk suidooste wind vinnig in die rigting van die Doolhof-gebied versprei.

    Brandbestryders kon verhoed dat enige skade aan geboue aangerig is, maar diere moes na veiligheid geneem word.

    Vyf-en-dertig brandbestrydingspanne is ontplooi, terwyl vliegtuie ook op gereedheidsgrondslag is.

    Die brand wat sedert verlede week in die Du Toitskloofpas in die Boland woed is intussen so te sê geblus. Dit brand nog net hoog op in die berg.

    Die bevelvoerder van die Wynland-brandweerdiens, Heinrich Louw sê die brande het bykans 1 500 hektaar plantegroei afgebrand. Hy wou egter nie bespiegel oor die moontlikheid van brandstigters nie.

    Die Wes-Kaapse minister van Omgewingsake, Anton Bredell het ‘n waarskuwing uitgereik oor die risiko van brande aan die Weskus weens die hoë temperature in die gebied.

    Bredell sê in ‘n verklaring daar is ‘n hoë risiko van veldbrande in die streek.

    Hy sê die onlangse brande in die Skiereiland en die Wynland het uitgebreide skade aangerig. Bredell sê rampbestuurspanne monitor die situasie aan die Weskus.

    Bewerings dat brande in en om Kaapstad opsetlik gestig is, wil nie gaan lê nie.

    Talle bewerings en ooggetuieverslae van brandstigting wat in die sosiale media die ronde doen, versterk die vrae oor sowat twintig brande in en om Kaapstad, die Weskus en die Kaapse Wynland wat feitlik gelyktydig ontstaan het.

    Grondgryp-aktiviste het die brandstigting geloof as ‘n manier om grond “terug te kry”.

    Swart Eerste Grond Eerste (BLF) nasionale woordvoerder Lindsay Maasdorp, het met verwysing na die onlangse verwoestende brande in die Wes-Kaap, gesê dat, omdat wind en vuur Godgegewe elemente is, kan dit gesien word as ‘n vorm van geregtigheid vir swart mense.

    Maasdorp het vroeër ‘n omstrede stelling gemaak op Facebook oor die brande en is beskuldig van aanhitsing van geweld teen wit plaaseienaars.

    Die kêrel het al voorheen dreigemente teen wittes gemaak.

  • Brandbestryding sukkel met Du Toitskloof se vlamme

    Brandbestryding sukkel met Du Toitskloof se vlamme

    Die Du Toitskloof-pas bly gesluit terwyl brandbestryders steeds poog om ‘n brand te blus wat oornag bo teen die bergpas buite die Paarl uitgebreek het.

    Ten minste vier helikopters en 50 brandbestryders is ontplooi.

    Inwoners is uit nabygeleë huise na veiligheid geneem met die brand wat buite beheer woed en oor die pad gespring het.

    Motoriste word aangeraai om die Hugenote-tonnel op dit N1 as alternatiewe roete te gebruik.

  • Polisie soek na Overberg se brandstigters

    Polisie soek na Overberg se brandstigters

    Die Kaapse Metroraad sê die polisie se hulp is ingeroep om die onlangse brande naby Somerset-Wes en Grabouw in die Overberg te ondersoek.

    Owerhede glo dat van die brande met opset gestig is, het RSG berig.

    Die skade word op sowat 54-miljoen geraam. Brandbestryders was gisteraand nog besig om te verhoed dat die brand in die Hottentots-Hollandsberge na Stellenbosch versprei.

    Die burgemeesterskomiteelid vir veiligheid en sekuriteit, JP Smith sê hulle werk saam met die polisie ná inligting van ooggetuies ontvang is.

    Smith het mense met inligting gevra om na vore te kom. Hy sê twee van die brande wat in Grabouw gewoed het, is moontlik die werk van brandstigters.

  • Oproer in Noordwes, Kaapstad oor dienste

    In oproer by Kopela buite Delareyville in Noordwes het drie skole en ‘n kliniek aan die brand gesteek omdat lokasiebewoners nie water en elektrisiteit ontvang nie.

    Intussen is die N18 tussen Stella en Mahikeng Noordwes ook versper. Dit het daartoe gelei dat inwoners van Makhubung buite Mafikeng nie by die werk kan kom nie.

    Oproermakers eis water- en kragvoorsiening en beter paaie.

    Die situasie is kalm in Masiphumelele naby Vishoek buite Kaapstad, na Dinsdag se gewelddadige betogings.

    Oproeriges het bande gebrand en die polisie met klippe bestook. Hulle het geëis dat sewe mense wat in hegtenis geneem is in verband met ‘n beweerde vigilante-moord, vrygelaat word.

    Hulle eis ook hulle eie polisiestasie, weens ‘n toename in misdade soos moord, verkragting en dwelm- en alkoholmisbruik.

    Paaie in die gebied is gesluit en die polisie het rubberkoeëls en traanrook gebruik om die oproeriges uiteen te jaag.

    Vyf-en-dertig mense is in hegtenis geneem op aanklagte van openbare geweld, maar is intussen vrygelaat. Die polisie monitor steeds die situasie.

  • Oproeriges brand skole, beskadig 50 voertuie

    Oproeriges brand skole, beskadig 50 voertuie

    Spanning in Alberton het daartoe gelei dat die Ekurhuleni Metropolisie op ‘n hoë gereedheidsgrondslag geplaas is.

    ‘n Metropolisiewoordvoerder, Wilfred Kgasago, sê dit is nog nie duidelik waaroor die oproer handel nie, maar hy sê staatsgeboue word geteiken.

    Gewelddadige oproer in die Albertongebied het Dinsdag tot brandstigting gelei. Amptenare sê oproeriges het in die nag die strate ingevaar en skole aan die brand gesteek.

    Talle oproermakers is intussen weens openbare geweld in hegtenis geneem.

    Vier skole en ‘n gemeenskapsaal is in brande beskadig en strate is versper. ‘n Raadslid se huis is tot op die grond afgebrand.

    Polisie is ook ontplooi buite Sasolburg weens klipgooiery.

    Tussen Sasolburg en Koppies is meer as vyftig voertuie op die R82-pad deur klipgooiers beskadig. Die toestand is steeds gespanne.

    Nog motors is op die pad tussen Sasolburg en Heilbron geteiken in die onrus oor kragvoorsiening.

    Oproermakers van die Amelialokasie by Sasolburg het paaie met klippe en brandende buitebande versper om te eis dat elektrisiteit aan hulle voorsien word.

    Hulle eis ook dat die Metsimaholo-munisipaliteit woonerwe aan plakkers beskikbaar stel.

  • Kaapse brande glo doelbewus gestig sê ondersoeker

    Brande wat groot verwoesting gesaai het in die Kaapse Skiereiland en die lewe van ‘n brandbestryder geëis het, is glo doelbewus gestig.

    Twee van die drie brande in Maart is kwaadwillig gestig en die derde een, die grootste van die drie by Houtbaai, is moontlik per ongeluk deur bergies gestig.

    ‘n Forensiese ondersoek deur dr. David Klatzow, ‘n forensiese ondersoekbeampte, het glo aangetoon dat bergies die vuur aangesteek het.

    Hy sê daar is geen moontlike elektriese oorsake vir die ander twee brande nie. Meer as 3 000 hektaar en huise het in die slag gebly.

    Die brande kan die belastingbetaler tussen R20 miljoen en R40 miljoen uit die sak jaag, alhoewel nog geen amptelike beraming van die skade gedoen is nie.

  • Heilbron loop onder brandstigters deur

    Heilbron in die Vrystaat het Sondag onder brandstigters deurgeloop.

    ‘n Polisiewoordvoerder het bevestig dat daar die naweek vyf voorvalle in die dorp plaasgevind het.

    Die brandweer is in die vroeë oggendure uitgeroep nadat ‘n brandende motor voor die hotel in die dorp opgemerk is.

    Die stadsaal is later aan die brand gesteek en is in puin gelê.

    Vure is by ‘n plaaslike winkel gestig, asook onder ‘n bakkie en by die munisipale kantore, maar kon betyds gekeer word. Die kantore is ongeskonde.

    Volgens die brandweer is ‘n woonstel ook aan die brand gesteek.

    Die landdroskantoor het in Februarie afgebrand.

    Niemand is nog in verband met die voorvalle in hegtenis geneem nie.

  • Heli-ongeluk eis twee

    Die Burgerlugvaart-owerheid en die polisie ondersoek ‘n helikopter-ongeluk waarin twee mense in Bainskloof naby Wellington in die Boland dood is.

    ‘n Woordvoerder van Working on Fire, Linton Rensburg sê die slagoffers was besig om brande in die Wynland-omgewing te bestry toe die vlieënier ‘n noodlanding moes uitvoer, het RSG berig.

    Rensburg sê die slagoffers se name kan nog nie bekendgemaak word nie, omdat hulle naasbestaandes eers in kennis gestel moet word.

  • Brande vlam weer op in Jonkershoek

    ‘n Sterk wind oornag het die brand by die Jonkershoekvallei by Stellenbosch in die Boland weer laat opvlam, het RSG berig.

    Die assistent-brandweerhoof van die Kaapse Wynlanddistriksmunisipaliteit, Jaco Thuynsma sê die brand woed nou in die rigting van Stellenbosch en talle eiendom word bedreig.

    Die brand, wat reeds ‘n duisend hektaar plantegroei vernietig het, is Dinsdagmiddag glo onder beheer gebring.

    Brandbestrydingspanne het egter in die gebied aangebly weens kommer dat sterk wind die brand weer kan laat opvlam.

    Thuynsma sê sowat 150 brandbestryders is op die toneel.

    Geen beserings is tot dusver aangemeld nie.

  • Omstandighede by heli-ongeluk nie bekend nie

    Die helikopter-vlieënier wat verongeluk het, Hendrik “Bees” Marais was glo ‘n hoogservare vlieënier.

    Marais moes Sondag ‘n noodlanding in Kaappunt uitvoer waar hy met brandbestryding namens Working on Fire besig was.

    Die omstandighede en redes waaronder Marais die noodlanding met sy helikopter by Kaappunt moes maak, is nie bekend nie.

    Evelyn Holtzhausen, woordvoerder van Working on Fire, het gesê die ongeluk het naby Olifantsbos in die Tafelberg Nasionale Park uitgebreek. Marais en van sy kollegas is na die gebied uitgeroep toe brande daar uitgebreek het.

    Hy is na die ongeluk onderweg hospitaal toe oorlede. Dié tragedie kom na die onbaatsugtige werk wat deur brandbestrydingspanne die afgelope week verrig is om brande in die Skiereiland te blus.

    Talle openbare figure het hul medelye betuig met Marais se dood betuig en gesê Marais was ‘n deskundige op sy gebied.

    Marais was voorheen ook ‘n vlieënier vir die Suid-Afrikaanse Lugmag, die Suid-Afrikaanse Polisiediens en die Suid-Afrikaanse Rooikruis.

    Die Burgerlugvaart-owerheid ondersoek intussen die omstandighede rondom die dood van die vlieënier.

    Die Kaapstadse Metro het vroeër aangedui dat hy ‘n leidende rol sal speel in die ondersoek na die oorsaak van die ongeluk.

  • Meer as 2000 brandslaners swoeg teen Kaapse brande

    Meer as 2 000 brandslaners is ingespan om ‘n brand wat oor die naweek in Muizenberg ontstaan het, onder beheer te bring en ongeveer 2 miljoen liter water van 2 000 waterbomme is gebruik om vure te probeer blus.

    Nog ‘n brand het Woensdag in die Kaappunt-natuurreservaat uitgebreek.

    Ten minste 13 eiendomme is deur die brand geraak. “Drie van die eiendomme is totaal verwoes waarvan twee in Constantia en een in Noordhoek,” het Zolile Nqayi, woordvoerder van die departement gesê.

    Boyesrylaan en Chapmanspiekpad bly gesluit vir verkeer. Sowat 500 mense is reeds sedert Sondag ontruim.

    “Die [2000 brandslaners] sluit 150 lede van die departement van omgewingsake se Working on Fire (WoF)-program in,” volgens Nqayi. “Altesaam 50 mense van Volunteer Wildfires Services en 250 WoF-brandbestryders is van ander provinsies ontbied om plaaslike owerhede by te staan.”

    Ses-en-twintig vliegtuie is sedert Sondag ingespan in die brandbestrydingspoging . “Elf helikopters, ses vastevlerkvliegtuie en nege waarnemers van Tulbagh, Porterville, Donkerhoek, Stellenbosch, Bredasdorp, Stilbaai, Newlands, Plettenbergbaai en Knysna is ontplooi om die 11 brande te bestry.”

    Die sowat 198 vlugure beloop reeds ‘n geraamde R2.4 miljoen.

    Die stad se rampbestuursentrum het vroeër Woensdag gesê die reën in Kaapstad bring verligting. “As dit hard genoeg reën, is dit ‘n bonus vir ons. Maar as dit net liggies reën, help dit nie veel nie. Daar is baie min wind in die gebied,” het woordvoerder Charlotte Powell gesê.

    “As dit reën is sigbaarheid ‘n groot probleem vir die helikopters.”