praag.co.za

Tag: DRK

  • VN-ondersoekers na mensregteskendings in DRK se liggame in vlak graf gekry

    VN-ondersoekers na mensregteskendings in DRK se liggame in vlak graf gekry

    Die Amerikaanse en Sweedse VN-ondersoekbeamptes se liggame is in ‘n vlak graf in die Demokratiese Republiek van die Kongo ontdek.

    Die twee het blykbaar nie besef dat hulle nie tussen ‘n Afrika-despoot en sy geld moet kom met praatjies van menseregte nie.

    Die twee is “sinneloos vermoor,” het die Amerikaanse ambassadeur, Nikki Haley by die Verenigde Nasies in reaksie Dinsdag gesê en gelas dat ‘n ondersoek na hul dood aan die gang kom.

    “Dit is met groot hartseer dat ons vandag bevestiging ontvang het van die dood van Michael Sharp en Zaida Catalan,” het Haley in ‘n verklaring gesê.

    Catalan was die jeugleier van die Groen-linkses in Swede.

    Die twee het meer as twee weke gelede verdwyn. Hul liggame – en dié van hul Kongolese tolk Betu Tshintela – is gevind in die provinsie Sentraal Kasai, het plaaslike amptenare Dinsdag gesê. Die twee ondersoekbeamptes was op soek na grootskaalse geweld en beweerde menseregteskendings deur die Kongolese weermag en plaaslike burgermag groepe.

    Daar heers ontevredenheid in die provinsie teen die president, Joseph Kabila. Regeringsamptenare het Saterdag gesê sowat 40 polisiebeamptes is keelaf-gesny in die dodelikste aanval op die veiligheidsmagte sedert die opstand verlede jaar begin het.

    VN-syfers dui daarop dat meer as 400 mense reeds dood is in geweld waarin militante die skuld vir gruweldade op regeringsmagte pak wat daarvan beskuldig word dat hulle burgerlikes uitroei.

    Suid-Afrikaanse doeanebeamptes het intussen ‘n Ferrari ter waarde van meer as 13 miljoen rand onderskep wat na Suid-Afrika gesmokkel is deur ‘n burger van die DRK.

    Volgens die Suid-Afrikaanse Inkomstediens staan die motor sedert 2014 in ‘n pakhuis in Suid-Afrika. Die SAID sê toe die motor vir die eerste keer die land ingebring is, het die eienaar nie die regte invoerprosedure gevolg nie en die motor is in die pakhuis gehou.

    Die eienaar het in Februarie dokumente ingedien om die motor na die DRK te neem, maar ‘n dag later is daar gepoog om die Ferrari deur dieselfde grenspos terug na Suid-Afrika te bring. Die motor is intussen geskut.

  • Geweerskote in DRK se hoofstad na Kabila se ampstermyn verstryk

    Geweerskote in DRK se hoofstad na Kabila se ampstermyn verstryk

    Werkers en skoolkinders het Maandag tuis gebly en soldate op patrollie was aansienlik meer as die burgerlikes in Kinshasa se strate, het AFP berig.

    Geweervuur is Dinsdagoggend gehoor in verskeie dele van die Kongolese hoofstad, Kinshasa, met betogers in die strate wat eis vir die bedanking van die huidige president Joseph Kabila.

    ‘n Gespanne atmosfeer het in die hoofstad van die Demokratiese Republiek van Kongo (DRK) geheers, ‘n dag voor die Kongolese president se amptelike termyn vandag ten einde loop.

    Kabila se tweede termyn moes op 20 Desember geëindig het, maar hy toon geen teken dat hy bereid is om die tuig neer te lê nie. Bemiddelingsgesprekke het misluk en dit het die vrees laat opvlam dat politieke geweld opnuut in die mineraalryke land kan uitbreek.

    Openbare vervoerdienste het die minimum diens gelewer en winkels in die stad se

    hoofplein was gesluit, met ‘n gepantserde polisievoertuig wat op die een straathoek gestaan het.

    Kabila (45) kan grondwetlik nie vir ‘n derde termyn as staatshoof oorweeg word nie, maar hy het aangedui dat hy wil aanbly totdat sy opvolger gekies is. Geen verkiesings is egter beplan nie en sommige opposisieleiers wil hê Kabila moet die mag aan ‘n oorgangleierskap oorhandig totdat verkiesings gehou kan word.

    Onderhandelinge om ‘n oplossing vir die dooie punt te vind, het die naweek skipbreuk gely. Dit sal na verwagting môre hervat word wanneer Katolieke biskoppe, wat as bemiddelaars optree, van ‘n beplande besoek aan Rome terugkeer.

    Kabila is aan bewind sedert sy pa, Laurent Kabila, in 2001 in ‘n sluipmoordaanval doodgeskiet is. Hy is in 2006 en weer in 2011 as president verkies in ‘n verkiesing wat die opposisie beweer mee gekul is.

    Die sekretaris-generaal van die Verenigde Nasies, Ban Ki Moon het sy medelye met die regering en die mense van Suid-Afrika betuig nadat ‘n Suid-Afrikaanse soldaat wat deel is van ‘n VN-vredesmag in ‘n rebelle-aanval in die Demokratiese Republiek die Kongo dood is.

    Nog twee Suid-Afrikaanse soldate is gewond en ‘n Kongolese polisiebeampte is ook dood. Ban Ki Moon het die aanval deur Mayi Mayi-rebelle op die weermagbasis by Butembu in die Noord-Kivu provinsie, ten sterkste veroordeel.

    Ban sê die veiligheid van VN-personeel, insluitend lede van die vredesmag, is ‘n groot prioriteit, maar meer as ‘n honderd vredesoldate is die afgelope jaar tydens die uitvoering van hul pligte dood.

  • DRK staak nadat verkiesing uitgestel word

    DRK staak nadat verkiesing uitgestel word

    Die Kongolese hoofstad Kinshasa is Woensdag lamgelê deur ‘n staking uit protes teen president Joseph Kabila wat aan bewind sal bly ofskoon sy termyn teen die einde van Desember verstryk.

    Die opposisie het die stakings aangevra nadat die president ‘n ooreenkoms bereik het om tot April 2018 aan bewind te bly deur vanjaar se presidentsverkiesing uit te stel.

    Kabila het in 2001 aan bewind gekom en in 2006 het ‘n nuwe grondwetlike bepaling in werking getree wat die president tot twee termyne beperk. Kabila se termyn verstryk op 20 Desember.

    Die land se hoofopposisieparty, die UDPS, sê die ooreenkoms tussen die owerheid en rand-opposisiepartye is ‘n “flagrante skending van die grondwet” en sê die betoging wys vir Kabila ‘n “geel kaart.”

  • Chevron-helikopter-ongeluk eis ses

    Chevron-helikopter-ongeluk eis ses

    ‘n Bell 430 helikopter van die Amerikaanse oliemaatskappy Chevron het Maandag met ses mense aan boord het neergestort.

    Vier Angolese is dood en die twee wat vermis word, is glo buitelanders. Maar die nasionaliteit van die vlieënier is nog steeds nie bekend gemaak nie.

    Die helikopter was onderweg na die Tombua-Landana-olieboor toe dit volgens Angolese veiligheidsmagte in swak weersomstandighede neergestort het.

    Vyf van die ses mense was werknemers by Chevron en die sesde was die vlieënier van Heli-Malongo, die helikopterverhurings­maatskappy.

    ‘n Reddingsoperasie is geloods en nadat die oorskot van vier personeellede gevind is, is die soektog uitgebrei om die helikopter se dataopnemer asook wrakstukke op te spoor.

    Die ongeluk het laat Maandag naby die olieryke enklave van Kabinda plaasgevind, het kaptein Armando Nzawisa van die Angolese weermag wat die reddingsoperasie lei, aan AFP gesê.

    Die helikopter is gebruik as ‘n vervoermiddel tussen olieplatform en aanlandige fasiliteite van Chevron in Kabinda, het die openbare uitsaaier TPA berig.

    Kabinda grens aan die Republiek van die Kongo na die noorde, en is geskei van die res van Angola in die suide deur ‘n stukkie grondgebied wat deel uitmaak van die Demokratiese Republiek van die Kongo.

    Die provinsie lewer 60 persent van Angola se olie, een van die grootste olieprodusente in Afrika.

  • VSA vra dat SA politieke geweld in DRK keer

    VSA vra dat SA politieke geweld in DRK keer

    Die Verenigde State het Dinsdag ‘n beroep op Suid-Afrika gedoen om sy spesiale invloed in die Demokratiese Republiek van die Kongo (DRK) te gebruik om hierdie week se ontploffing van politieke geweld te keer en te sorg dat dit nie buite beheer raak nie.

    Polisie het traangas gebruik talle ondersteuners van opposisiepartye in Kinshasa te verwilder in geweld wat weer opgevlam het omdat die verkiesing uitgestel is.

    Die ontevredenes eis dat pres. Joseph Kabila vanjaar die tuig moet neerlê en verhinder moet word om ‘n derde termyn te dien.

    Die hoofkwartiere van drie opposisiepartye in die Demokratiese Republiek van Kongo (DRK) is oornag en in die vroeë oggendure Dinsdag aan die brand gesteek.

    Die brandstigting kom net ‘n dag ná dodelike botsings tussen die polisie en opponente van pres. Joseph Kabila.

    Opposisiegroepe het gesê meer as 50 mense is dood Maandag in botsings in die hoofstad, Kinshasa. Die regering het gesê ten minste 17 mense is dood, maar gewaarsku dat die dodetal verder kan styg.

    Ooggetuies het gesê betogers het ten minste een polisiebeampte doodgeslaan.

    Vier mense is ook dood toe die hoofkwartier van drie opposisiepartye oornag en vroeg Dinsdag aan die brand gesteek is, het Agence France-Presse berig.

    Ooggetuies het aan Reuters gesê die polisie het in die skare in gevuur.

    Die DRK se grondwet verbied ‘n derde termyn.

  • Suid-Soedan se rebelleleier in SA?

    Suid-Soedan se rebelleleier in SA?

    Suid-Soedan se voormalige rebelleleier en visepresident, Riek Machar, het die land verlaat ná die gewelddadige botsings verlede maand en is nou in ’n “veilige” land in die streek.

    In ’n verklaring deur Mabior Garang de Mabior, ’n woordvoerder vir Machar se SPLM-IO party, word nie gespesifiseer in watter land Machar hom bevind nie.

    Maar gerugte wil dit hê dat hy in Suid-Afrika is en nie na Ethiopië sal reis nie.

    ‘n Burgeroorlog het in Desember 2013 in Suid-Soedan uitgebreek toe pres. Salva Kiir sy adjunk, Machar, daarvan beskuldig het dat hy ’n staatsgreep beplan.

    Die gevegte het die land langs etniese lyne verdeel en tot op die rand van totale ineenstorting gedryf.

    ’n Vredesooreenkoms tussen die regering en rebelle byna ’n jaar gelede, kon nie daarin slaag om ’n einde aan die konflik te maak nie.

    Die Verenigde Nasies het Woensdag ’n ondersoek gelas na ’n aanval op ’n hotel in Suid-Soedan waar soldate vrouens verkrag en noodlenigingwerkers aangerand het, terwyl VN-vredebewaarders oënskynlik niks gedoen het om dit te stuit nie.

    Die Verenigde Nasies (VN) het bevestig dat Machar in die Demokratiese Republiek van die Kongo (DRK) aangekom het, maar wou nie sy ligging onthul nie.

    Dit kom ook te midde van berigte dat die leier van die opposisie ná ‘n mislukte sluipmoordaanval deur magte lojaal aan president Salva Kiir saam met sy vrou en ‘n konvooi van sowat 60 gewapende mans moes vlug.

  • Herrie oor minister vrou glo na SA smokkel

    Herrie oor minister vrou glo na SA smokkel

    Die ministerie van Verdediging het berigte ontken dat die minister, Nosiviwe Mapisa-Nqakula ‘n jong vrou van Burundi met ‘n vervalste paspoort op ‘n staatsvliegtuig in die land ingesmokkel het.

    Volgens die Sunday Times het die minister in Januarie 2014 haar invloed gebruik om te verseker dat Michelle Wege uit aanhouding vrygelaat word, het RSG berig.

    Wege is in die Demokratiese Republiek van die Kongo aangehou in verband met vervalste reisdokumente wat gebruik is om uit Burundi te reis.

    ‘n Woordvoerder van die ministerie, Mike Ramagoma sê die jong vrou was ‘n vriendin van die minister se kinders, en het uit Burundi gevlug om weg te kom van haar pa wat haar mishandel het, en haar geldige paspoort gekonfiskeer het.

    Volgens Ramagoma was die minister op ‘n amptelike besoek aan die DRK, en het bloot aangebied om die vrou saam met haar na Suid-Afrika te neem.

    Hy sê bewerings dat staatshulpbronne misbruik is en dat die vrou gesmokkel is, is ongegrond.

    Mapisa-Nqakula het in die DRK met ‘n hoëvlak afvaardiging van meer as vyf amptenare van haar kantoor opgedaag, insluitend ‘n lugmag luitenant-generaal om Wege se vrylating te onderhandel.

    Na Wege se vrylating het die groep na Addis Abeba gereis saam met haar om ‘n konferensie by te woon voordat hulle na Suid-Afrika teruggekeer het.

    Wege is in hegtenis geneem deur die amptenare by die Internasionale Lughawe van Kinshasa 10 dae tevore, toe sy probeer het om ‘n vlug van die Suid-Afrikaanse Lugdiens na Johannesburg te haal.

    Sy is in hegtenis geneem omdat sy dokumente wat vervals was gebruik het.

    Die dokumente is na bewering gereël deur Mapisa-Nqakula se suster, Nosithembele Nontobeko Mapisa, wat in die Burundi by die ambassade gewerk het ten tyde van die voorval.

    Op die vals paspoort van Wege is sy as ‘n Kongolees by name Amina Yambayamba aangedui. Maar amptenare het onraad vermoed toe sy nie die Franse of enige van die ander plaaslike tale kon praat nie.

  • SA stuur nog troepe na DRK na 50 dros

    Sowat 500 soldate van die Suid-Afrikaanse Nasionale Weermag vertrek eersdaags vir twaalf maande na die ontstuimige Republiek van die Kongo.

    Die soldate sal na hul bestemming vlieg met VN-huurvlugte. Selepe het gesê die gebruik van VN-huurvlugte is nie as gevolg van ‘n gebrek aan kapasiteit in die SANW nie.

    “Dit is ‘n verantwoordelikheid van die Verenigde Nasies om lede na eksterne bedrywighede te vervoer,” het hy gesê.

    “Selfs die soladte wat terug huis toe kom sal teruggebring word deur die VN,” het hy bygevoeg.

    Norman Yengeni het tydens die oorhandiging van welwillendheidspakkies by De Brug buite Bloemfontein, aan soldate wat op pad is na die DRK, gesê dissipline is belangrik.

    Hy sê soldate wat by die weermag aansluit verstaan dat ontplooiing deel van hul take is en dat lewensverlies soms onvermydelik is.

    Yengeni sê die veilige terugkeer van soldate gaan gepaard met dissipline, geluk en die genade van God.

    In September is sowat 50 SANW-soldate van die VN-sending in die DRK voor die krygshof gedaag.

    Die groep het na bewering gedros in die ooste van die DRK waar hulle gestasioneer was, het brigadier-generaal Xolani Mabanga vroeër aan ANA gesê.

    Omdat die Verenigde Nasies oor hul lot besluit, moes die SANW aan VN toestemming vra om hulle te onttrek uit die ontplooiingsgebied.

    Die SANW het ongeveer 900 troepe gestasioneer in die ooste van die DRK as deel van Monusco se sending.

    Suid-Afrika handhaaf ‘n konstante teenwoordigheid in die mineraalryke DRK al sedert 1999.

    Intussen het die Verenigde Nasies gesê minstens veertien vroue is tydens een voorval in September deur Kongolese soldate verkrag.

    Die VN sê dit is die grootste voorkoms van seksuele geweld deur Kongolese soldate. ‘n Voorlopige ondersoek wat in ‘n verslag vervat is, toon die seksuele geweld het tydens ‘n weermagoperasie teen ‘n militêre groep in die ooste van die land plaasgevind.

    Die gebied is berug vir hoë syfers van seksuele geweld deur beide gewapende magte en regeringsoldate. Nog inligting word ingesamel met die hoop op ‘n hofsaak.

  • DRK se hoofopposisie-party stap uit onderhandelinge

    Die hoofopposisieparty in die Demokratiese Republiek van Kongo (DRK) sê onderhandelinge met pres. Joseph Kabila vóór verkiesings, het ’n dooie punt bereik.

    Kabila, wat sedert 2001 die staatshoof is, is grondwetlik nie toegelaat om in volgende jaar se verkiesings te staan nie.

    Sy tweede verkose termyn loop dan ten einde. Sy teenstanders beskuldig hom egter daarvan dat hy aan die mag wil vasklou, het AFP berig.

    Kabila het in Junie met beraadslaging met opposisiegroepe begin, maar net die Unie vir Demokrasie en Maatskaplike Vooruitgang (UDPS) het ingestem om dit by te woon. Twee ander belangrike groepe boikot die beraadslagings.

    Die veteraan UDPS-president, Etienne Tshi­sekedi (82) het in ’n verklaring wat van sy huis in Brussel uitgereik is, gesê die onderhandelinge het misluk en dat hy sy party se afgevaardigdes opdrag gegee het om “die onderhandelingstafel onmiddellik te verlaat.”

    Tshisekedi, wat in 2011 deur Kabila verslaan is in ’n verkiesing wat waarnemers as “deurspek met bedrog” bestempel het, het politieke en maatskaplike magte aangemoedig om te veg vir ’n geloofwaardige verkiesingsproses om ’n vreedsame oordrag van gesag te verseker.

  • Zuma ontmoet Al-Basjir en Kabila in China

    President Jacob Zuma is tans in China vir die herdenking van China se oorwinning oor Japan tydens die Tweede Wêreldoorlog.

    Afrikaleiers het die 70ste herdenking van die einde van die Tweede Wêreldoorlog bygewoon wat deur die meeste Westerse staatshoofde vermy is.

    Vroeër by dieselfde geleentheid het Zuma samesprekings gevoer met die Soedannese president Omar Al-Basjir.

    Zuma het intussen ‘n uitnodiging aanvaar om Soedan te besoek met die oog daarop om betrekkinge tussen die twee lande te versterk.

    Suid-Afrika se president het met ook die leier van die Demokratiese Republiek van die Kongo, Joseph Kabila in Beijing vergader.

    Zuma en Kabila het die veiligheidsituasie in die mineraalryke oostelike-DRK bespreek.

    Suid-Afrika en die DRK werk ook saam aan die implementering van die Groot Inga-verdrag.

    Die twee lande het in 2011 ‘n memorandum van verstandhouding oor die Kongorivier-projek onderteken wat sal meebring dat Suid-Afrika hidro-elektriesekrag van die Inga-damopwekkingsaanleg sal kan invoer.

  • Aardbewing tref DRK

    ‘n Aardbewing van 5,6 het in die vroeë oggendure in die oostelike deel van die Demokratiese Republiek van die Kongo getref.

    Op Vrydag, plaaslike tyd, teen ‘n relatief vlak diepte van 10 km, het die Amerikaanse Geologiese Opname Donderdag berig dat die aardbewing na aan die land se grens met Rwanda voorgekom het.

    Die aardbewing het 39km noord van Bukavu, plaasgevind, het die USGS gesê.

    Die USGS aanvanklik berig die aardbewing het 5,8 op die Richterskaal gemeet.

    Verdere besonderhede is nog nie beskikbaar nie.

  • VN-verslag sê SA-troepe ergste seksuele oortreders

    VN-verslag sê SA-troepe ergste seksuele oortreders

    Die Weermag sal ‘n verslag deur die Verenigde Nasies bestudeer, waarin beweer word dat Suid-Afrikaanse troepe die ergste oortreders ten opsigte van seksuele misdrywe op vredesendings is.

    Die weermag sê hy sal nie enige wangedrag deur sy lede duld nie, en sal sy samewerking aan die VN gee om die bewerings te ondersoek.

    Die verslag fokus op seksuele misdrywe deur vredesmagte in die Demokratiese Republiek van die Kongo, Soedan, Liberië en Haiti.

    Dit kom na die omstredenheid oor soorteglyke bewerings deur die VN van seksuele misbruik van kinders deur Franse soldate wat ontplooi is in die Sentraal-Afrikaanse Republiek.

    The Times het berig dat Suid-Afrika sowat 2 000 troepe gestasioneer het in die DRK, Soedan en Suid-Soedan.

    Die VN het in die verslag gesê daar is 480 bewerings van seksuele uitbuiting en misbruik met betrekking tot sy vredes- en spesiale politieke missies tussen 2008 en 2013 aangemeld.

    Die DRK-vredesending het 45% van hierdie klagtes ontvang, terwyl net meer as ‘n derde van die 480 bewerings minderjariges betrek.

    [Fotobron]

  • Twee mynbase sterf onder vreemde omstandighede in VSA

    Twee Suid-Afrikaners wat hoë poste in ’n omstrede Kazakstanse myngroep beklee het, is dood in ’n hotel in die VSA aangetref.

    Die myngroep Eurasian Natural Resources Corporation (ENRC) het gesê albei mans was in hul diens, het die Guardian berig.

    Gerrit Strydom (45) en James Bethel (44) is Saterdagmiddag 10 Mei in afsonderlike kamers van die La Quinta Inn in Springfield-noord, Missouri, dood aangetref.

    Volgens die owerhede was daar geen teken dat ’n misdaad gepleeg is nie, het Netwerk24 berig.

    Dit is nie bekend hoe en presies wanneer hulle dood is nie en bloedmonsters is vir toksikologiese toetse gestuur.

    Strydom en Bethel het volgens Lisa Cox, polisiewoordvoerder, op 6 Mei by die hotel ingeteken. “Ons vermoed hulle is op 8 of 9 Mei dood, want hotelwerkers het vroeër kontak met hulle gehad,” het sy gesê.

    Volgens ’n woordvoerder van ENRC was Bethel tot 30 September verlede jaar hoof van die maatskappy se koper- en kobaltbedrywighede in die Demokratiese Republiek van die Kongo (DRK).

    Strydom was ten tye van sy dood hoofbestuurder van die myngroep se filiaal Congo Cobalt Corp in die DRK.

    Die Britse kantoor vir ernstige misdaad (SFO) het in 2013 ’n ondersoek na bewerings van bedrog, omkopery en korrupsie in Kazakstan en Afrika gelas wat nog nie afgehandel is nie.

    ENRC is die laaste paar jaar deur verskeie skandale geraak, met bewerings van korrupsie, ’n hofsaak oor geldwassery en vervalsing in België wat ná jare uiteindelik geskik is.

    Ses jaar nadat ENCR goeie opgang op die Londense aandelebeurs gemaak het, moes hy denoteer. Sy drie stigters, Alexander Magkewitsj, Patok Kodiëf en Alijan Ibragimof, het die maatskappy gedenoteer.

  • Ooste van DRK raak onrustig

    Vyf mense is dood in ’n aanval wat vermoedelik deur Ugandese rebelle­ naby Beni in die ooste van die Demokratiese­ Republiek van Kongo (DRK) uitgevoer is, het amptenar­e gister bekend gemaak, het AFP berig.

    Meer as 300 mense het in sewe maande van menseslagtings in die onluste geteisterde Noord-Kivu-provinsie­­ deur rebelle van die Allied Democratic Forces (ADF) omgekom­.

    ’n Woordvoerder van die Kongolese­ weermagoperasie teen die rebelle­ sê een groep guerrillas het ’n weermagpos­ aangeval terwyl ’n ander burgerlikes geteiken het.

    Die veiligheidstoestand in die gebied­ het die afgelope week aansienlik­ agteruitgegaan met nog sewe mense wat Vrydag in ’n soortgelyke menseslagting­ op Mavivi gesterf het.

    Twee lede van die Verenigde Nasies se vredesmag, MONUSCO, is op 5 Mei in ’n lokval doodgeskiet.

    ‘n Vlugtelingkrisis dreig in die DRK nadat 4000 vlugtelinge uit Burundi die afgelope week in Uvira aangekom het volgens ‘n Katolieke nuusdiens. Die hoofstad van Burundi is ongeveer 15 km van die Kongolese stad geleë.

    Die Burundiërs vrees dat die krisis in hul land kan eskaleer in ‘n golf van geweld, of nog erger, in ‘n nuwe burgeroorlog.

    Volgens die VN se Hoëkommissaris vir Vlugtelinge, is daar meer as 7000 asielsoekers in die gebiede van Uvira en Fizi in Suid-Kivu.