Die hoofopposisieparty in die Demokratiese Republiek van Kongo (DRK) sê onderhandelinge met pres. Joseph Kabila vóór verkiesings, het ’n dooie punt bereik.
Kabila, wat sedert 2001 die staatshoof is, is grondwetlik nie toegelaat om in volgende jaar se verkiesings te staan nie.
Sy tweede verkose termyn loop dan ten einde. Sy teenstanders beskuldig hom egter daarvan dat hy aan die mag wil vasklou, het AFP berig.
Kabila het in Junie met beraadslaging met opposisiegroepe begin, maar net die Unie vir Demokrasie en Maatskaplike Vooruitgang (UDPS) het ingestem om dit by te woon. Twee ander belangrike groepe boikot die beraadslagings.
Die veteraan UDPS-president, Etienne Tshisekedi (82) het in ’n verklaring wat van sy huis in Brussel uitgereik is, gesê die onderhandelinge het misluk en dat hy sy party se afgevaardigdes opdrag gegee het om “die onderhandelingstafel onmiddellik te verlaat.”
Tshisekedi, wat in 2011 deur Kabila verslaan is in ’n verkiesing wat waarnemers as “deurspek met bedrog” bestempel het, het politieke en maatskaplike magte aangemoedig om te veg vir ’n geloofwaardige verkiesingsproses om ’n vreedsame oordrag van gesag te verseker.
Hoelank nog voordat die mensdom gaan besef dat die demokratiese stelsel nie vir almal werk nie. En ek dink nie net aan Afrika en die midde ooste nie maar die westminister stelsel werk nie eers vir alle westerse nasies nie. Europa staar ‘n krisis in die gesig die duitse regering tree 100% teen sy burgers se belange op en die volk sit magteloos en toekyk en wag vir die volgende verkiesing om net weer deur die media gebreinspoel te word om vir dieselfde narre te stem. Hoeveel lande sit net in die weste presies nou in dieselfde posisie? Dan praat ons nie eers van Afrika en by name Suid Afrika. Hier by ons word al die blaam op Zuma en die ANC geplaas terwyl hulle moet opereer in ‘n onwerkbare stelsel.