Dipuo Peters – praag.co.za

Suid-Afrikaners sterf soos vlieë op die paaie

Volgens die minister van vervoer, Dipuo Peters, is daar reeds 924 noodlottige padongelukke tot op 28 Desember aangemeld. In KwaZulu-Natal was daar 211 ongelukke waarin 249 mense dood is. In Gauteng was daar 156 noodlottige ongelukke waarin 174 mense omgekom het. In die Oos-Kaap was daar 129 noodlottige ongelukke waarin 161 mense die lewe gelaat het.

Die totale aantal sterftes in al dié ongelukke beloop “minstens 1 143 mense”.

In Limpopo was daar 106 noodlottige ongelukke waarin 138 mense dood is terwyl daar in Mpumalanga 90 ongelukke was waarin 110 mense dood is. In die Vrystaat was daar 63 noodlottige ongelukke waarin 95 mense dood is en in die Wes-Kaap was daar 78 noodlottige ongelukke waarin 91 mense dood is.

Peters sê dat daar 50 minder noodlottige ongelukke en 25 minder sterftes as in die ooreenstemmende tydperk verlede jaar was. Sy meen egter dit is “kommerwekkend dat daar sedert 23 Desember ŉ toename was in die aantal ongelukke en sterftes”. Daar was van 1 Desember tot 23 Desember 539 noodlottige ongelukke waarin 677 mense omgekom het.

Peters meen dit is “opvallend dat 31% van noodlottige ongelukke tussen 22:00 en 06:00 plaasvind”. Sy het gesê daar is teen 28 Desember reeds 415 mense vir spoedoortredings in hegtenis geneem. Die vinnigste spoed wat aangeteken is, was 265 k.p.u. in die Vrystaat. Minstens 904 mense is reeds vir dronkbestuur aangekeer.

Minister keer Sanral wat plakkers uitsit

Die minister van Vervoer, Dipuo Peters het gelas dat die afsetting van plakkers in die Wes-Kaap deur Sanral tydelik opgeskort word.

Die plakkers by Lwandle by die Strand en Peters het Dinsdagaand ‘n vergadering gehou. Die mense word intussen in gemeenskapsale gehuisves.

Die balju, polisie en ander wetstoepassingsbeamptes van die Kaapstad-metro, het Dinsdag vir ’n tweede dag die informele nedersetting by Lwandle buite die Strand ingevaar om krotte af te breek.

Die nasionale padagentskap Sanral het in Januarie ‘n hofbevel gekry om die onwettige besetters van die grond af te sit.

Peters hou vol dat die gebied geoormerk is vir die bou van paaie en hoewel sy die mense namens Sanral om verskonig gevra het, sê Peters die regering verwag dat die besetters hulle samewerking sal gee.

Peters sê die afsettings is opgeskort omdat hulle bekommerd is oor die mense wat geraak word. Sy sê die koue, nat winter is die verkeerde tyd daarvoor.

“Dit is die verkeerde tyd . . . dit is koud en nat,” het sy gesê.

Gauteng skuld meer as halfmiljard aan e-tol

Gauteng se motoriste skuld agterstallige e-tolgelde van meer as ‘n halfmiljard rand in die provinsie sedert die ongewilde e-tolstelsel op 3 Desember begin het.

Volgens die minister van vervoer Dipuo Peters is minder as 10% betaal.

Sy het op ‘n geskrewe vraag in die parlement geantwoord.

Die VPC is vir die invordering van die Suid-Afrikaanse Nasionale Padagentskap ( Sanral ) se agterstallige e-tolskuld verantwoordelik.

Vusi Mona van Sanral het gesê die R543.5 miljoen sluit beide dié van motoriste met e-skyfies se agterstallige rekeninge in, asook dié wat opgetel word deur die elektroniese hekke, maar nie geregistreer het vir die tolstelsel nie.

Mona kon nie dadelik sê watter persentasie van Gauteng se motoriste tot dusver aangeteken het nie.

In Peters se antwoord op die vraag in die parlement is ook onthul dat ‘n bedrag van R54 735 638 [ BTW uitgesluit ] op die insameling van die skuld uitgegee is.

Hierdie syfer sluit R32.8 miljoen posgeld en druk van fakture in, asook ‘n verdere R21.9 miljoen vir die insamelingsproses.

Die Bondgenootskap teen Stedelike Tol, OUTA, het die uitklaring deur die Johannesburgse metropolisie verwelkom dat onbetaalde e-tol rekeninge nie kan lei tot die weerhouding van voertuiglisensies, swak krediet of kriminele rekords nie.

Die versekering is deur die direkteur van lisensiëring en vervolging, Gerrie Gerneke gegee.

‘n Woordvoerder vir OUTA, John Clarke sê motoriste kan ook nie in hegtenis geneem word vir uitstaande e-tol rekeninge nie.

Hy sê die nie-betaling van e-tol rekeninge is nie ‘n verkeersoortreding wat kan lei tot die weerhouding van voertuiglisensies nie.

Wie kry die e-tol-rente?

Sanral is gelas om die rekeningkopseer in die Gautengse e-tol-stelsel op te los, het die minister van vervoer, Dipuo Peters, Dinsdag gesê.

Peters het die parlement se portefeuljekomitee vir vervoer toegespreek en toegegee daar is ernstige probleme met die ongewilde elektroniese tolstelsel wat ondermeer die rente op internetbetalings insluit.

Peters se opmerkings het gekom ná ‘n reeks klagtes deur padgebruikers in die provinsie oor rekeninge en registrasie.

“My instruksies aan Sanral … is duidelik en helder. Hulle moet die probleme met rekeninge uitsorteer en hulle moet dit dadelik doen.

“Daar is steeds ’n behoefte om padgebruikers op te voed oor hoe die stelsel werk en die verskeie registrasie- en betalingmetodes wat beskikbaar is,” het sy gesê.

“’n Positiewe uitkoms van die toepassing van die stelsel was die uitkenning van gekloonde lisensieplate, ongeregistreerde voertuie en voertuie sonder nommerplate,” het Peters gesê.

Sy het alle LP’s aangemoedig om te registreer, aangesien hulle as wetmakers die eerste behoort te wees wat registreer.

Peters het LP’s wat nie skyfies gekoop het nie, berispe en gesê hulle minag hul eed van getrouheid aan die Grondwet. Sy het egter ook haar eie onkunde oor die stelsel onbloot.

‘n Opposisielid het aan Peters gesê dat sy valshede in die openbaar versprei. “Die wet vereis nie van enige van ons om ‘n e-tol-skyfie te koop nie. Suid-Afrikaners kan kies om nie ‘n e-tol-skyfie te koop nie en eerder ’n rekening wil ontvang,” het hy gesê.

Nazir Alli, uitvoerende hoof van Sanral, het gesê daar is ook probleme met mense wat elektronies via die internet hul rekeninge wil betaal.

Hy sê dit kan enigiets van twee tot vyf dae neem voor die oordrag in die ontvanger se rekening aangedui word.

Dít lei volgens hom tot frustrasie, aangesien die geld “iewers in die kuberruim lê”. Volgens Alli het hy die banke oor die probleem genader.

“Wie kry daardie rente? Niemand gee vir ons daardie antwoord nie,” het hy gesê.

Bomdreigement derde teen Sanral

‘n Bomdreigement is Sondag ontvang by die Suid-Afrika Nasionale Padagentskap Beperk ( Sanral ) se hoofkantoor in Samrand, naby Midrand.

Dit is die derde dreigement teen Sanral. Die dreigemente spruit vermoedelik voort uit ontevredenheid met die Gautengse e-tolstelsel.

Wetstoepassers sal ondersoek instel na drie dreigemente wat binne ‘n week by Sanral se kantore in Gauteng ontvang is.

Die perseel is verlede week twee keer ontruim nadat ‘n verdagte poeier – wat volgens berigte moontlik antraks kon gewees het – gevind is.

ETC (Elektroniese Tolinvordering) het later berig dat die stof skadeloos is.

Die minister van vervoer Dipuo Peters het die dreigemente veroordeel as pogings om Sanral se werksaamhede te ontwrig.

Sy het ‘n beroep op wetstoepassers gedoen om die skuldiges so spoedig moontlik te vervolg.

Diegene wat geraak is deur die ontvangs van die poeier sal van die nodige aandag en hulp voorsien word in die hantering van die traumatiese ervaring van die afgelope week, het Peters gesê .

Jamie Surkont, die uitvoerende hoof van ETC, het gesê die gebou is Sondagaand deursoek en indien nodig, sal die betrokke dienste na rugsteunpersele verskuif word.

Outa vra dat e-tol opgeskort word

Die Bondgenootskap teen Stedelike Tol, Outa het ‘n beroep op die Minister van Vervoer, Dipuo Peters, gedoen om die e-tolstelsel op te skort.

Outa sê die voortdurende verset deur die publiek om op te dok vir ‘n stelsel wat nie na behore werk nie, maak dit onmoontlik om voort te gaan.

Outa se voorsitter, Wayne Duvenage, sê hy is nie verbaas dat die hoof van die elektroniese tolmaatskappy, Ben Theron, intussen bedank het nie.

Elektroniese Tolinvordering het (ETC) Vrydag bevestig dat Theron bedank het. Hy sal deur Mark Ridgeway opgevolg word.

“ETC se uitvoerende bedryfshoof Ben Theron het bedank om persoonlike redes,” het Anne Mardon hul woordvoerder in ‘n verklaring gesê.

Duvenhage het gesê die kompleksiteit van die stelsel sal selfs vir die mees ervare personeel ‘n uitdaging wees.

Die woordvoerder van die presidensie, Mac Maharaj, het verlede week in ‘n verklaring uitgereik gesê nuwe paaie te bou en opgradering van bestaande paaie, is noodsaaklik.

Duvenage het Maharaj se stelling oor die opgradering van alternatiewe roetes verwerp en sê dit is in elk geval ‘n noodsaaklike vereiste.

Padongelukke eis ekwivalent van drie Boeings wat neerstort

Die werklike dodetal weens padongelukke is pas bevestig: Die afgelope Feesseisoen het meer as 1.500 lewens op die paaie geëis.

Dipuo Peters, die minister van vervoer, het vroeër gesê die slagting op die land se paaie was die ekwivalent van drie Boeing 747’s wat in Suid-Afrika verongeluk.

“Stel jou voor wat sal gebeur as drie vliegtuie van die grootte neergestort het in Suid-Afrika. Dit sal ‘n katastrofe wees,” het sy gesê.

Peters het gesê die Departement van Vervoer en sy agentskappe is verbind tot Verenigde Nasies se doelwit om padsterftes teen 2020 te halveer.

KwaZulu-Natal was heel bo-aan met 307 sterftes, gevolg deur Gauteng met 302.

Drank en spoed was die hoofoorsake van die sterftes, het ‘n woordvoerder van die Padverkeersbestuurskorporasie, Thato Mosena, gesê .

Sy sê daar is 1.287 noodlottige ongelukke aangemeld, wat tot 1.537 sterfgevalle gelei het.

Die minste padongelukke het in die Noord-Kaap, waar die paaie minder besig is, voorgekom. Daar was slegs 49 sterftes.

Mosena het ook ‘n beroep op motoriste gedoen om die padreëls na te kom.

Kamer van Koophandel steun e-tol

Die uitvoerende hoof van die Suid-Afrikaanse Kamer van Koophandel en Nywerheid, Neren Rau, het sy lede gevra om met die e-tolstelsel saam te werk wanneer dit in werking gestel word.

Die Minister van Vervoer, Dipuo Peters, het vroeër die week aangekondig dat die multimiljardrandse projek op die derde van aanstaande maand ‘n aanvang sal neem.

Dit het tot wydverspreide woede en ‘n dreigement van ‘n boikot gelei. Rau sê groot sake-ondernemings behoort nie die wet te oortree nie.

Die voorsitter van die Bondgenootskap teen Stedelike Tol (OUTA), Wayne Duvenage, sê hy is van mening dat maatskappye sal voldoen maar hoop dat lede van die publiek die stelsel sal teenstaan. – RSG

Pinetown-gru-ongeluk: Bestuurder voor

Die vragmotorbestuurder die gru-ongeluk wat 22 lewens geëis het in Pinetown veroorsaak het, KwaZulu-Natal, verskyn vandag in die hof.

Sy voertuig het teen vier minibustaxi’s en ‘n motor gebots. Aanvanklik is geglo dat 27 mense omgekom het.

Die bestuurder, ‘n 23-jarige burger van Swaziland, is Vrydag in hegtenis geneem. Hy sal op aanklagte van strafbare manslag en roekelose of nalatige bestuur in die Pinetown-landdroshof verskyn.

Die gru-ongeluk het verlede Donderdag omstreeks 19:00 op die hoek van Fieldshillweg (M13) en Richmondweg in Pinetown gebeur. Die gebeurtenis is deur ‘n kameratjie op ‘n motoris se truspieëltjie verfilm.

‘n Beampte van die KwaZulu-Natalse padverkeersdirektoraat, het aan Jeff Radebe, waarnemende president, gesê die vragmotor se lisensie het op 31 Augustus verval.

Dipuo Peters, minister van vervoer, het ’n hoëvlak-ondersoek na die ongeluk gelas. – Sapa

VF+ vra dat Aarto dadelik afgeskaf word

Dit is nou duidelik dat Aarto ‘n mislukking is en niks minder is nie as ‘n peperduur Wit Olifant en die Vryheidsfront Plus versoek opnuut dat dit afgeskaf word om verdere onnodige vermorsing van geld te vermy, sê adv. Anton Alberts, die Vryheidsfront Plus se parlementêre woordvoerder oor vervoer. Die VF Plus het ‘n parlementêre vraag in die verband aan die minister gerig.

Volgens adv. Alberts is dit duidelik dat Aarto (die Wet op die Administratiewe Beregtiging van Padverkeersmisdrywe) nie in sy doelwit slaag om paaie veiliger te maak nie, en dit kan nie meer ontken word dat die projek nie lewensvatbaar is nie.

In die media is nou berig dat Aarto-boetes van meer as R2 miljard nog nie ingevorder is nie. Dit is luidens ’n verslag wat vandeesmaand aan Dipuo Peters, minister van vervoer, oorhandig is.

Die probleem met die invordering van verkeersboetes word veroorsaak deur die verouderde eNatis-stelsel wat motoriste se kontakbesonderhede bevat en wat veroorsaak dat boetes ingevolge Aarto nie by oortreders uitkom nie, lui die verslag.

Volgens adv. Alberts word feitlik geen boetes meer ingevorder nie en die verslag aan minister Peters bevestig dit. “Dit maak geen sin om daarmee te volhard nie. In die boekjaar 2011-12 is byna 90% van boetes nie betaal nie en in 2012-13 slegs 87%.

“Die VF Plus het onlangs ook gewaarsku teen ‘n voorstel om met verhoogde verkeersboetes die publiek te dwing om die mislukte stelsel van ondergang te red. Dit was nadat die Agentskap vir Padverkeersmisdrywe (RTIA) voorgestel het dat verkeersboetes verdubbel word om Aarto te red.

“RTIA het toe ook erken dat die Johannesburgse metro-polisiediens (JMPD) sedert Desember verlede jaar meer as R60 miljoen bestee het om 2,4 miljoen Aarto-verkeersboetes per geregistreerde pos uit te stuur. Nie eens 5% daarvan is binne die erste maand betaal nie.

“Hierdie boetes het verval aangesien RTIA nie die posgeld kan bekostig nie. Dit is duidelik ‘n chaotiese stelsel wat van die begin af gedoem was tot mislukking.

“Aarto is niks meer nie as ‘n sinlose vermorsing van geld sonder enige resultate, en ons versoek die minister om dit nou stop te sit,” sê adv. Alberts.

Eskom kry mededinging

Onafhanklike kragverskaffers sal nou danksy die Nasionale Geïntegreerde Hulpbronplan met Eskom kan meeding.

Dipuo Peters, minister van energie, het Donderdag in Pretoria gesê: “Dié plan bepaal wat Suid-Afrika teen 2013 moet hê om kragsekerheid te verseker.”

Peters sê die hulpbronplan maak voorsiening vir tot 1 020 MW krag uit die private sektor in 2011.

’n Nuwe entiteit, die Onafhanklike Stelseloperateur (OSO), wat nie in Eskom gesetel is nie, is deur die departement van energie geskep.

“Die OSO sal verantwoordelik wees vir sake soos elektrisiteitsaankope van onafhanklike kragverskaffers en sal dit moontlik maak om die potensiaal van onafhanklike verskaffers behoorlik te benut. Dié nuwe entiteit kan reeds binne drie maande op die been wees en sal beteken dat Eskom nie langer die speler en die skeidsregter in die plaaslike kragwêreld is nie.”

Eskom se planne om die bou van die Kusile-kragstasie te vertraag om geld te bespaar is ook van die baan.

Volgens die hulpbronplan sal die Kusile-kragstasie nie vertraag word nie en steeds teen 2013 die eerste keer elektrisiteit aan die nasionale netwerk lewer.

Twee hernieubare-kragprojekte, ’n windkragprojek van 100 MW en ’n sonkragprojek van nagenoeg 50 MW, is ook veronderstel om aan die begin van 2010 op dreef te kom.

“Verder is daar voorsiening gemaak vir 1 145 MW se krag vanaf hernieubare-energieprojekte uit die private sektor teen 2012. Dié bepaling in die hulpbronplan beteken kontrakte vir dié elektrisiteit kan nou toegeken word,” het Peters gesê.

“Waar die geld vandaan kom, moet Eskom en sy aandeelhouers uitwerk. Ons kan nie ophou beplan omdat daar nie geld is nie. Ons moet die plan opstel en dan moet die geld gevind word. Kragsekerheid is nie onderhandelbaar nie,” het Peters gesê.

Omphi Aphane, waarnemende direkteur-generaal van elektrisiteit, kernkrag en hernieubare energie, sê die hulpbronplan maak voorsiening vir ’n deurtastende elektrisiteitsbesparingsprogram.

Tot 30% van die krag wat nasionaal opgewek word, word tans vermors volgens Aphane. “Die potensiaal om te spaar is dus enorm.”

Hy het gesê dit is goedkoper om krag te bespaar as om nuwe vermoë te bou.

online casino no topcargo отзывы