Dan Roodt – Bladsy 40

Swartman wat klip van brug afgooi ‘n ‘sadis’: aanklaer

Beeld berig dat die swartman wat ’n klip van ’n brug oor die N1-snelweg in Pretoria na ’n motor geslinger het, dit vir “sy eie sadistiese plesier gedoen het, om mense seer te maak”.

Só het die aanklaer in die saak, Ashwin Ramnarain, In die Pretoriase Streekhof gesê.

Landdros Solomon Mkhabela het die beskuldigde, Alpheus Qwabe, agterna op ‘n klag van poging tot moord skuldig bevind en tot ‘n totaal van ses jaar gevanisstraf gevonnis. Die feit dat Qwabe reeds drie jaar lank as verhoorafwagtende aangehou is, by die vonnisoplegging in berekening gebring.

Op 9 Mie 2010 het Qwabe ‘n enorme klip vanaf die Kerkstraatbrug oor die N1 op die motor van mnr. Paulo Franzao laat val. Franzao het die aanval oorleef, maar sy motor is dermate beskadig dat hy nie verder kon ry nie. Nie die polisie nie, maar lede van ‘n buurtwag het Qwabe in hegtenis geneem.

Twee weke voor dié voorval is ‘n motoris tydens ‘n soortgelyke insident gedood toe ‘n klip vanaf dieselfde brug sy motor verpletter het.

Volgens die landdros moes Qwabe voorsien het dat sy optrede die dood van Frantzao kon veroorsaak het en het hom daarom tien jaar gevangenisstraf opgelê, waarvan vier jaar opgeskort is.

Klipgooiers beskadig 18 busse in Pretoria

Byna 18 busse wat aan die Pretoriase Busdiens behoort, is gedurende die week onder die klippe gesteek, het die stad gister laat weet.

“Busse van die stadsraad is sedert Maandag onderworpe aan klipgooiery wat sowel bestuurders as passasiers beseer het,” het die woordvoerder Blessing Manale in ‘n verklaring gesê.

Manale het gesê leë en volgelaaide busse is lukraak deur skares met klippe op verskeie plekke en tye geteiken.

Ander busoperateurs, waaronder Putco, Starline en Gautrein, is nie geteiken nie, het Manale gesê.

“Party van die bestuurders en passasiers is erg beseer en moes dringend hospitaal toe geneem word,” het hy gesê.

Die motief vir die klipgooiery is nie bekend nie. Die daders is ook nog nie geïdentifiseer nie.

‘n Saak van kwaadwillige saakbeskadiging is by die polisie aangemeld. – Sapa

Helen en Joe hou kajuitraad oor die bevryding

deur Skoppensboer

Die toneel is ‘n suite in ‘n vyfsterhotel in Johannesburg. Satan het so pas vir Joe Slovo (gebore Yossel Mashel Slovo, in Obeliai, Litaue) pas gegee om vir ‘n paar dae weer die ondermaanse te kom bewandel waar hy sy handewerk kan gadeslaan.

Helen Zille (gebore Helene Otta Zille in Hillbrow, Johannesburg) strek haarself uit om Slovo te omhels.

Helen: “Joe, Joe, hoe wonderlik om jou weer te sien! Hoe gaan dit daar bo met jou?”

Joe: “Baie goed. Al my beste vriende is hier, al die ou bomplanters uit Rivonia se dae. En ou Bram Fischer, hy is die enigste Boertjie hier, ons spot hom daaroor.”

Helen: “Dit klink wonderlik! Wel, ons gee die Boere sommer hel hier in die nuwe Suid-Afrika. Het jy die DA se nuwe manifes gesien? Grondhervorming is heel bo! En swart ekonomiese bedrog. Ons gaan die skroewe nou aandraai.”

Joe: “Ek het so skrams iets gesien, ja. Die revolusie loop klopdisselboom en jy verrig wondere. Ons het sommer nou twee sosialistiese partye in die land, ons en julle!”

Helen: “Presies, Joe! Vryheid lê net om die draai.”

Joe: “Ek kan nie wag nie. (Sy oë raak mistig agter sy dik brilglase.) Die dag as die laaste Afrikanerboer van sy plaas af is, sal ek voel my taak is volbring.”

Helen: “Dis wat ek ook sê, Joe. Ons sal hulle sommer gou-gou verjaag en ons kolgosse oral in die land oprig: in Noordwes, die Vrystaat, Limpopo, oral. Die werkers sal regeer!”

Joe (grinnik): “Vertel my nou: is die Afrikaners nog so dom?”

Helen: “O ja, geen bekommernis daar nie. So dom soos altyd. Dié dat hulle as die ‘dumb Dutchmen” bekendstaan. Hulle is net so… onnosel en naïef. Goedgelowig. Mens kry hulle amper jammer.”

Joe (onthuts): “Jammer? Jy moet hulle nie jammer kry nie. Hulle is die klassevyand! Die fascistiese kleinburgery!”

Helen (paaiend, verskonend): “Nee, nee, Joe. Ek grap net. Natuurlik kry ek hulle nie jammer nie. Ek lees elke dag met genoegdoening hoe ons kaders hulle daar op die plase uitmoor. Of sommer in hul voorstedelike huisies. Die revolusie is asemrowend, bloedig, jy is ‘n genie dat jy dit vir ons gebring het.”

Joe (verleë): “Nee wat, Helen, iemand moes dit doen. Die teenstrydighede het revolusie onafwendbaar gemaak. Ek was maar net die instrument wat die triomf van die proletariaat verseker het.”

Helen: “Ons triomf is naby, Joe. Dit sal groter as ooit wees. Hulle sal finaal vernietig word, die klassevyand.”

Joe: “Sê my, Helen, is dit waar dat al die Afrikaners vir jou stem? Dis nou jammer ek het dit nooit probeer nie. Hulle sou seker vir my ook gestem het, as ek hulle net gevra het. Hulle kan mos nie ‘nee’ sê nie, haha.”

Helen (laggend): “O ja, Joe, hulle is uiters getrou. Getrou soos honde. Niks ter wêreld sal hulle daarvan weerhou om vir my te stem nie. Maar ons het mos Naspers ook aan ons kant, die grootste mediagroep in die land. Die arme stommerike aanvaar alles wat Naspers vir hulle vertel.”

Joe: “Maar wat nou van die internet? Ek hoor daar is van dié Afrikanergroepe wat los en vas allerlei dingetjies op webblaaie skryf? Hoe gaan ons dit keer? Ons wil nie hulle moet nou op die vooraand van die slotbedryf van die revolusie hergroepeer nie?”

Helen (verbaas): “Maar Joe, is jy dan nie op hoogte nie? Kameraad Jeff Radebe het reeds die wetgewing gereed. Dis mos nou die dag aangekondig: haatspraak gaan ‘n kriminele oortreding raak! Dus as enigeen op ‘n webwerf iets teen my of jou of die revolusie sê, gaan hy van haatspraak aangekla word en in die tronk beland.”

Joe (verlig): “Haatspraak! Watter wonderlike idee! Ek moet sê, ek is siek en sat daarvoor dat hulle my ‘n terroris noem, net omdat ons daardie Kerkstraatbommetjie laat afgaan het. Dit sal die swernote ‘n les leer. Haatspraak! Moet sê: ek hou daarvan!”

Helen (vertederend): “Jy sien, Joe, ons hou jou erfenis lewendig. Ons sit die stryd voort en binnekort is al die plase, al die myne, die banke, ons s’n! Die revolusie snel voort, onstuitbaar! Viva SACP! Viva!”

Terwyl hulle oor die boomryke voorstad van Johannesburg uitkyk, slaan Helen en Joe ‘n veglustige soort proletkult-houding in, met vuiste in die lug, terwyl hulle luid om die beurt “Amandla!” en “Viva SACP!” skree…

Afrikaans kort ‘n nuwe mediamodel

deur Dan Roodt

[followbutton username=’danroodt’ count=’true’ lang=’en’ theme=’light’]

Hou van Dan Roodt se Facebookblad

Moontlik was daar ‘n tyd in die negentiende eeu toe mense koerante gelees het bloot om ingelig te word. As deel van jou koerant het jy sommer op die koop toe die jongste aflewering van ‘n vervolgverhaal deur Charles Dickens of Honoré de Balzac, twee van die gewildste skrywers in die negentiende eeu, ontvang.

Daardie tye is egter vir goed verby. Toenemend in die twintigste eeu, maar veral nou in die een-en-twintigste, het media byna ‘n vorm van “oorlog met ander middele” geword. Joernalistieke objektiwiteit en selfs integriteit het plek gemaak vir belange wat deur media gedien word. Individuele joernaliste en meningsvormers is “penvegters” wat elke dag teen ‘n opponent in die kryt tree. Trouens, laasgenaamde is die titel van ‘n biografie deur Jaap Steyn oor Piet Cillié, een van die bekende historiese joernaliste van Die Burger.

Twee onlangse onderhoude wat hier op die praagwebblad gevoer is, is verhelderend sover dit die hedendaagse rol van media betref. Die eerste is dié met Margarita Simonjan, die uitvoerende redaktrise van die Russiese TV-netwerk, Russia Today. Die tweede gesprek, met dr. Christo Landman, verskyn vandag.

In haar onderhoud vergelyk Simonjan die rol van haar internasionale nuusnetwerk met dié van die Russiese departement van verdediging en sê: “…as Rusland gaan oorlog maak… dan sal ons by die geveg betrokke raak, ja. Dit is op die land se regte, gewapende konflikte van toepassing. Onthou u die oorlog in Augustus 2008? Op daardie tydstip het die meeste Westerse mediahuise gereageer asof hulle Georgië se departement van verdediging was.”

Aansluitend hierby verduidelik dr. Christo Landman: “As jy onder die aandag kom, dan moet jy aanvaar dat daar strategieë in werking gestel sal word om jou te neutraliseer. Sodra jy ‘n faktor word, is jy ‘n teiken.” Met ander woorde, Individue en groepe wat vir Afrikaans of die Afrikanersaak standpunt inneem, sal geteiken word.

In die Engelse rubriek wat ek gister geskryf het, sê ek in die eerste sin: “South Africa’s multiracial and multicultural society is exploding into a never-ending Kulturkampf or American-style culture war.” Hierdie kultuuroorlog gaan oor idees, maar ook oor ons reg op voortbestaan, ons reg om ons privaateiendom te behou of om ons kinders na Afrikaanse skole te mag stuur. Dit is alles “regte” wat in die brandpunt van hierdie stryd staan. Aan die oorkant is daar twee radikale standpunte: een beskou ons as “nie deel van die Afrika-kontinent nie” en daarom behoort al ons bates gewoon genasionaliseer te word en ons uit die land verdryf te word. Die ander “laat ons toe” om aan te bly, maar op voorwaarde dat ons geheel en al in die meerderheidsamelewing integreer en op die duur geassimileer word.

In hierdie oorlog is geen metode taboe nie: ‘n persoon kan geëtiketteer word, vir ‘n idioot uitgeskel word, sy privaatlewe kan oopgevlek word en soos ons in die onlangse Amerikaanse geval van Paula Deen gesien het, as jy dertig jaar vantevore die K-woord (die N-woord in die VSA) gebruik het, kan jou reputasie vandag daardeur geruïneer word.

Dit is ook ‘n reële oorlog want dit gaan om klimaatskepping, propaganda, om haat en vyandigheid teen die geteikende groep op te wek. Geweld geskied agterna byna outomaties. Ek verstout my om te sê dat plaasmoorde in dié land nie sou plaasgevind het indien die Afrikanervyandige media nie oor baie jare soveel nyd en gif teen boere gesaai het nie. Die internasionale propagandastryd wat tans om Sirië gevoer word, is ‘n ander insiggewende voorbeeld. Of Amerika, Frankryk en Brittanje daardie land gaan aanval, gaan uitsluitlik bepaal word deur die soort klimaat wat hulle in die media kan skep. Daar geskied manipulasie van feite, oor en weer beskuldigings van chemiese wapengebruik, oorlogsmisdade en dergelike meer.

Daar is feitlik geen “redaksionele onafhanklikheid” nie, want elke orgaan, elke koerant, TV-kanaal of radiostasie het reeds kant gekies, sowel plaaslik as internasionaal en dis maklik om sy partydigheid uit sy beriggewing en kommentaar af te lei.

Om maar een bekende voorbeeld te noem: Die Naspersgroep volg openlik die Britse en Amerikaanse regerings se standpunte in sy internasionale beriggewing en daarom steun Naspers blindelings ‘n aanval op Sirië. In hul plaaslike nuusdekking word alles weer so geplooi om die DA en die groot sakeondernemings, waaronder die mynhuise, te pas. Afrikanerskap is vir Naspers ‘n onding en word telkens met “rassisme” en ander ongure begrippe verbind.

‘n TV-kanaal soos Russia Today word deur die Russiese regering befonds. Hier sit Afrikaners met ‘n probleem, want geen regering ter wêreld gaan vir ons media betaal nie. Plaaslike adverteerders mag ‘n bydrae lewer, maar te eniger tyd kan adverteerders deur veiligheidsdienste of vyandelike media geteiken word en kan sodanige fondse summier afgesny word. Suid-Afrikaanse korporatiewe advereerders is ook geheel en al verbind tot die multikulturele samelewing, regstellende aksie, swart ekonomiese bemagtiging en alles wat daarmee saamgaan, dus gaan hulle ook maar langtand wees om in media te adverteer wat krities teenoor dié beleidsrigtings staan. Boonop verkies Suid-Afrikaanse reklame-agentskappe steeds om op papier of in uitsaaimedia soos radio of TV te adverteer, pleks van op die internet. Volgens beskikbare statistiek, word slegs 2% van alle reklame in ons land aan digitale media bestee.

Hoewel digitale media soos webblaaie, ens., dus aan die agterspeen suig sover dit advertensie-inkomste betref, is gedrukte koerante besig om te kwyn en word hulle deur aanlynmedia vervang. Dit skep ‘n geweldige finansiële krisis vir die mediahuise, want niemand maak werklik geld uit die internet nie, behalwe enkele reuse- internasionale groepe soos Google of Facebook wat oor honderde miljoene gebruikers beskik.

In Afrikaans is die toestand des te meer akuut, vanweë die klein mark wat deur Afrikaanse media bedien word. Hoewel Afrikaanse media redelik sterk staan teen Engelse media in Suid-Afrika, kan ons glad nie met die groter tale, veral natuurlik Engels, internasionaal meeding nie. ‘n Webwerf soos die Britse mailonline beskik byvoorbeeld oor 70 miljoen gebruikers wat aan hom ‘n aardige advertensie-inkomste besorg.

Om verskeie redes is Afrikaanse media nie volhoubaar nie. Naspers het ‘n sogenaamde “betaalmuur” vir sy dagblaaie se aanlynweergawes ingestel. Behalwe vir die Wall Street Journal en ‘n paar ander internasionale voorbeelde, wil lesers eenvoudig nie vir aanlyninhoud betaal nie. Die internet is veronderstel om gratis te wees.

Dit is egter waar dat aanlynmedia tans nog op die gedrukte media parasiteer. Vanweë die groter advertensie-inkomste van gedrukte media, kan hulle bekostig om meer joernaliste in diens te hê, ondersoekende joernalistiek te doen en bepaalde groot stories oop te vlek. Aanlynmedia maak meesal gebruik van die groot nuusdienste wat die stories van gedrukte koerante herverpak en teen ‘n breukdeel van die oorspronklike koste te koop aanbied. Andersins het sulke nuusdienste hul eie joernaliste in diens wat berigte skryf wat weer aan die gedrukte koerante en aanlynmedia verkoop word.

Maar wat gebeur wanneer gedrukte koerante heeltemal tot niet gaan en al daardie joernaliste wat danksy papier steeds ‘n salaris verdien, eensklaps sonder werk gaan sit? Ek vermoed dat ons in Afrikaans slegs vyf jaar van so ‘n situasie verwyder is, gouer indien die huidige vervreemding tussen die Nasperskoerante en Afrikaanse lesers wyer uitkring. Danksy sy oorsese belange, onder meer in Hong Kong, kan Naspers al sy Afrikaanse media sluit sonder dat dit sy winsgewendheid noemenswaardig sal beïnvloed.

Wat ons by praag probeer regkry, is om die gratis model wat reeds op die internet gevestig is, só aan te wend dat dit op die duur volhoubaar kan raak. Niks is egter ooit heeltemal gratis nie en in die reël moet vyf persent van gebruikers bereid wees om vir ‘n diens te betaal vir so ‘n diens om te kan voortbestaan.

Die netwerk wat praag gevestig het, met sowel ‘n Afrikaanse as ‘n Engelse webwerf, asook ‘n sterk teenwoordigheid op sosiale media soos Facebook en Twitter, beskik oor die potensiaal om daardie “departement van mediaverdediging” te word wat Afrikaners so broodnodig het. Veral vanaf ons Engelse webblad loods ons kritiese kommentaar en berigte wat hard slaan en konsternasie onder ons vyande veroorsaak, omdat Afrikaners nou vir die eerste keer in ‘n lang tyd hulle teen propaganda-aanvalle verdedig.

Beide webwerwe verteenwoordig ‘n formidabele navorsingsbron waar die aantal moorde, verkragtings en ander geweld in ons land daagliks weerspieël word. Dit maak dit vir navorsers, aktiviste en kommentators moontlik om sulke inligting altyd byderhand te hê.

Die internet beskik beslis oor die potensiaal om ons te bevry, want ons kan ook ekonomiese netwerke, handel, beleggings, betalings en wat nog van hier af bedryf. Daar moet egter ‘n nodale punt wees waar al hierdie dinge ontmoet.

Dat hierdie webblad moet aanhou bestaan en moet groei, is van wesentlike belang. Word deel van die vyf persent deur op die onderstaande banier te klik!

Plaaswerkers geregtig op gratis aandele in plase

In ’n voorgestelde beleidsdokument oor die vrywillige toekenning van aandele aan plaaswerkers van die Dept. van Landelike Ontwikkeling en Grondhervorming word o.m. voorgestel dat ’n plaaswerker met 10 jaar diens op ’n kommersiële plaas geregtig moet wees op 10% aandele in die eienaarskap van die grond. Voorts word bepaal dat ná 25 jaar diens ’n werker geregtig moet wees op 25% aandele en op 50% ná 50 jaar.

Geen melding word gemaak oor wat gebeur as daar verskeie werkers op ’n plaas is wat al langer as 10 jaar daar is nie. Die stelsel sal nie “afdwingbaar” wees nie, maar boere word aangemoedig om “vrywillig” deel te neem. Die doel van die voorgestelde beleid is “om ongeregtighede sedert die 19^de eeu reg te stel”.

Volgens die dokument het plaaswerkers, insluitende tydelike en seisoenwerkers, oor die jare heen vir “hongerlone” gewerk en is daarom nou geregtig op aandele in die plase waar hulle woon en werk. In reaksie op die beleidsdokument is kritiek fel, o.a. van Agri SA, TLU SA en Graan SA.

Pieter Groenewald van die VF Plus sê die voorstelle “kom neer op niks minder nie as die brutale onteiening van grond soortgelyk as wat in Zimbabwe gebeur het. Dit is duidelik dat die grondhervormingsprogram ‘n klaaglike mislukking is en dat ander planne nou beraam word om grondeienaars sonder vergoeding te onteien.” – Ditsem Nuus

Moneyweb dagvaar Fin24 vir beweerde plagiaat

Caxton se aanlynsakenuusdiens Moneyweb, dagvaar vir Fin24,d ie aanlynsakediens van Media24 vir beweerde kopieregskending, plagiaat en die wederregtelike gebruik van Moneyweb se inhoud, het Beeld Vrydag berig.

Moneyweb, ‘n mededinger van Media24, argumenteer in hofstukke dat Fin24 sy eksklusiewe inhoud wederregtelik oorgeneem en as sy eie aangebied het.

Sonder toestemming het Fin24 inhoud gepubliseer wat Moneyweb duisende rande gekos het om te produseer, “met slegs enkele sinne wat verander is’, sê Moneyweg se redakteur, Ryk van Niekerk.

Moneyweb beweer in hofstukke dat Fin24 herhaaldelik en sonder behoorlike erkenning Moneyweb se inhoud en onderskep en op sy eie webblad geplaas het.

Moneyweb verklaar dat:

• Fin24 se publikasie van inhoud wat Moneyweb-joernaliste na bewering geskryf het, onwettig verklaar word;

• die hof ’n interdik uitreik wat Fin24 sal verbied om Moneyweb-artikels op dié manier te gebruik;

• Fin24 aanspreeklik gehou word vir die skade wat Moneyweb gely het; en

• Fin24 die regskoste betaal.

Moneyweb voer ook aan Fin24 het sedert Julie 2012 “grootskaalse plagiaat” gepleeg.

Van Niekerk lys in die hofstukke sewe Moneyweb-artikels wat Fin24 na bewering onregmatig gebruik het. Telkens is klein veranderings aan die opskrifte van die berigte aangebring, terwyl die inhoud na bewering grootliks ooreenstem sonder dat daar pertinent na Moneyweb verwys word.

Van Niekerk beweer Fin24 ry op Moneyweb se rug vir kommersiële gewin omdat hy nie in staat is om genoeg eie, unieke inhoud te genereer nie.

Afgesien daarvan dat dit glo ’n oortreding van die Wet op Outeursreg is, voer Moneyweb aan hy verloor duisende lesers op sy webblad en sodoende ook aansienlike advertensie-inkomste.

Van Niekerk het Fadia Salie, Fin24-redakteur, in Maart gekontak nadat hy maande lank opgemerk het dat Fin24 sy nuusdiens se berigte kopieer, lui die hofstukke.

Salie het glo erken sy het self een van die berigte saamgestel waaroor hy ontevrede is, maar ontken dat die inhoud “gesteel” is.

Jannie Momberg, News24-redakteur, het volgens Van Niekerk geweier om die inhoud te verwyder en gesê dat Moneyweb se inligting nie onregmatige gebruik behels nie. – Sapa

Motorfietsryer dood in Krugersdorp

“n Motorfietsryer het gisteraand gesterf toe hy agter in ‘n bakkie vasgery het in Sterkfonteinweg, Krugersdorp, het paramediese personeel Sondag gesê.

“Netcare 911-paramedici het op die toneel aangekom en die motorfietsrywer, ‘n man in sy vyftigerjare, op die pad gevind met lewensgevaarlike beserings,” het die woordvoerder van Netcare 911, Chris Botha, gesê.

“Paramedici het vir byna ‘n uur gepoog om hom op te wek maar die pasiënt het tragies op die toneel gesterf weens die uitgebreide beserings wat hy opgedoen het.”

Die ongeluk het Saterdagaand omstreeks 19:40 plaasgevind.

Die oorsaak van die ongeluk is onbekend en word deur die polisie ondersoek. – Sapa

Word Afrikaanse media deur veiligheidsdienste gemanipuleer?

In die lig van die vreemde verskynsel dat Afrikaanse media en meningsvormers dikwels standpunt inneem téén die belange van Afrikaners of hulle daarvan probeer oortuig om van hul bates afstand te doen, het praag die volgende vrae aan ‘n kenner gevra: Is Afrikaanse media geïnfiltreer? Is daar joernaliste wat ook agente van die staat of selfs buitelandse inligtingsdienste is wat die niksvermoedende koerantlesers of radioluisteraars se sienings probeer beïnvloed?

Ons het oor hierdie en ander kwessies met Dr. Christo Landman gesels. Hy is ‘n voormalige hoof van koverte projekte by die departement van buitelandse sake en was ook hoof van missie in Berlyn. Onder die P.W. Botha-regering het hy in die Staatsveiligheidsraad gedien en is dus vertroud met die modus operandi van veiligheidsdienste.

praag: Dr. Landman, speel veiligheidsdienste steeds ‘n groot rol in ons land?

Landman: Onthou, veiligheidsdienste is vrygestel van regstellende aksie. Dit beteken dat hulle nog steeds mense uit die ou orde gebruik om hul projekte te doen. Hoe kan dit anders wees?

Dink maar aan die Boeremagsaak – daar is ernstige bewerings dat die aangeklaagdes deur veiligheidsdienste verlei is.

praag: Is veiligheidsdienste ook by propaganda betrokke, beïnvloeding van die openbare mening, ens.?

Landman: Vir seker is hulle! In die operasionele werk van die vorige regering het ons van dieselfde tegnieke gebruik gemaak. Ons het frontorganisasies gestig, en ons het betaalde persone gehad wat propagandawerk gedoen het. Op grond van hierdie stand van sake, is hierdie proses steeds aan die gang… Dis ‘n internasionale proses en hoogs onwaarskynlik dat dit nié hier gedoen word nie.

praag: Hoe weet ‘n mens of ‘n spesifieke persoon ‘n agent is?

Landman ‘n Mens ontwikkel ‘n neus vir hierdie goed. Só het ek byvoorbeeld in my loopbaan as amptenaar verskillende mense teëgekom wat gepoog het om ‘n houvas op my te kry en om my dop te hou. Hulle het my konstant dopgehou. Mense het my kom sien met bedenklike motiewe.

praag: En as dit gaan oor die inwin van menings, hoe werk dit?

Landman: ‘n Mens ontwikkel ‘n neus as iemand skielik opduik en ‘n meningsmous word. Wat motiveer hom? Word hy gebruik om ‘n sekere effek daar te stel, so ‘n persoon? Ek praat nie van ‘n spesifieke persoon nie. Dit kom verdag voor as ‘n ou skielik orals opduik. In die jongste geledere is daar ‘n buitelander wat gedurig oor sus en so kom kers opsteek. Hoe bekostig iemand dit om ses of sewe keer per jaar Suid-Afrika toe te vlieg omdat jy kamstig so lief is vir die land?

praag: Hoe word die media deur veiligheidsdienste gebruik?

Landman: Die mediamense is soos assuransiemense; dis mense wat by jou aankom vir ‘n storie. Hulle is dus gemaklike pionne van veiligheidsdienste.

praag: U sê dat ‘n mens ‘n neus ontwikkel… Wat sou u sê is tekens dat iemand in die media dalk vir ‘n veiligheidsdiens werk?

Landman: As hy ‘n meningsmous begin raak en herwaarts en derwaarts begin uitsprake maak. Hoekom is dit so? Wat motiveer hom? Hoekom het hy soveel toegang tot media? Ek of u het nie soveel toegang nie. Hy begin orals opduik.

praag: Sou dit reise deur die land of oorsee insluit?

Landman: Ek sou so sê. As ‘n ou so wyd en syd begin opduik, moet jy weet daar is ‘n slang in die gras. Hy beskik oor middele, asook toegang. Wie befonds hom en wie skep vir hom daardie vermoë?

praag: Hoe werk dit in die praktyk?

Landman: In die praktyk is daar ‘n drievlakstelsel: Die eerste vlak is kantoorpersoneel, wat gewoonlik aan almal bekend is. Die tweede vlek werk onder dekking. Die persoon het een of ander alibi. Byvoorbeeld, die hoof van die buitelandse veiligheidsdiens in Nederland het hom in my tyd as ‘n IT-handelaar voorgedoen. So ‘n persoon beskik oor hanteerders, koverte hanteerders. Hanteerders het op hul beurt weer agente. Die derde vlak is die inligtingsversamelaars. Hulle werk geheel en al kovert. Die houvas wat ‘n regering op sulke mense het, is ‘n uiters geheime veiligheidsklaring. Daar is ook drie vlakke van geheimhouding: vertroulik, geheim en uiters geheim.

praag: Gebeur dit dat meningsmouse, soos u hulle noem, die openbare mening probeer beïnvloed?

Landman: Ja, absoluut, dis hulle taak! Hulle versamel inligting maar is ook besig met infiltrasie. Hulle bedryf propaganda en infiltreer organisasies onder dekking dat hulle konserwatief is en lei mense in lokvalle.

praag: Sou dit hulle taak wees om bepaalde mense en instansies te diskrediteer?

Landman: Hul take is so wyd soos die Heer se genade. Geheime organisasies wat in die NP se tyd gestig is om die konserwatiewe politici te diskrediteer, het miljoene rande daarvoor ontvang. Disinformasie is ‘n wetenskap wat deur die Russe in die Nazi-tyd vervolmaak is. Om ‘n onlangse voorbeeld te noem: die Afrikanerbond het ‘n verslag in die parlement oor landbou en grond gaan lewer. En nou is daar ‘n klomp mense wat nooit die verslag gelees het nie, wat hul menings op koerantberigte baseer. Beriggewing is absoluut oppervlakkig, terwyl die verslag baie goed is.

Daar is nog ‘n ander meganisme. Inligting moet deur ‘n spesiale liggaam vertolk word. Feite word vergelyk met mekaar om ‘n waarheidselement te postuleer. ‘n Teenstrategie kan nie op valse inligting gegrond wees nie. Die teenstrategie word gebruik om jou te neutraliseer.

praag: Watter soort mens of organisasie word gewoonlik geneutraliseer?

Landman: As jy onder die aandag kom! As jy onder die aandag kom, dan moet jy aanvaar dat daar strategieë in werking gestel sal word om jou te neutraliseer. Sodra jy ‘n faktor word, is jy ‘n teiken.

Ek staan by my standpunt wat ek destyds tydens die heel eerste vergadering van die Vryheidsfront gestel het. As jy ‘n volk wil bevry, moet jy iets soos ‘n privaatveiligheidsorganisasie oprig, maar ook ‘n elitekorps om luistervinke uit te vang. Daar moet ook ‘n geheime strategie wees om vyandelike strategieë tre neutraliseer. Ons het ‘n geheime Broederbond nodig wat kovert werk. Op die oomblik is ons feitlik magteloos: voor jy iets kan doen, word dit geneutraliseer.

praag: U praat van “neutraliseer”… Hoe word dit gedoen?

Landman: Daar is nie ‘n magtiger wapen as die pen om dít te doen nie. Dis met ‘n pen wat daar ‘n streep deur jou getrek word, klaar!

Nasperskoerante in vryval weens politieke korrektheid, Afrikanerhaat

Die jongste sirkulasiesyfers van die ouditburo vir sirkulasie toon ‘n algemene afwaartse neiging vir gedrukte koerante, met die Nasperskoerante wat die meeste aan sirkulasie inboet. Nadat mnr. Koos Bekker, die hoof van Naspers, besluit het om ter ere van die voormalige leier van die Kommunisteparty, Bram Fischer, meer linkse en selfs marxistiese sienings in sy koerante te bevorder, bevind koerante in die Media24-stal hul feitlik in vryval.

Die vervreemding tussen Afrikaanse lesers en Naspers het uiting gevind in ‘n spontane boikotgroep wat op Facebook ontstaan het en 23 000 lede sterk is. Sover ons kan vasstel, is die Nasperskoerante die enigste ter wêreld wat aktief deur hul eie lesers en kultuurgroep geboikot word.

Media24 het onlangs ‘n bekende Afrikanerhater van hul Engelstalige – en ook erg anti-Afrikaanse – Sondagblad City Press, Adriaan Basson, na Beeld “herontplooi”. City Press het die afgelope jaar 17,9% van sy sirkulasie verloor. Die daaglikse Beeld het 12,8% aan sirkulasie ingeboet en die Saterdaguitgawe 15,8%. Dis veral in die Saterdaguitgawe se bylaes dat Beeld sy kultuurmarxisme bedryf, met die propagering van swart-nasionalistiese geskiedenis, Afrikanerhaat, homoseksualiteit en ander “liberale” temas. In die geval van Die Volksblad, wat in die meer konserwatiewe landelike provinsie van die Vrystaat versprei word, het die Saterdaguitgawe van die koerant met sy linkse propagandabylaes met 16,7% gedaal.

Rapport, wat eens op ‘n tyd die grootste koerant in Suid-Afrika was, het tot onder 200 000 teruggesak. Politieke korrektheid weeg swaarder as sirkulasie of selfs finansiële welslae.

Koerant	Uitgewer	2de kwartaal 2013	1 jaar verandering	1 jaar verandering %	3 jaar verandering	3 jaar verandering %
Beeld, Daagliks	Media 24	63 016	-9 248	-12.8%	-27 569	-30.4%
Beeld, Saterdag	Media 24	59 317	-11 153	-15.8%	-24 743	-29.4%
Burger, Die Daagliks	Media 24	57 696	-562	-1.0%	-13 286	-18.7%
Burger, Die Saterdag	Media 24	72 788	-4 315	-5.6%	-20 471	-22.0%
Business Day	TMG	26 300	-3 172	-10.8%	-5 802	-18.1%
Cape Argus	INMSA	30 310	-1 989	-6.2%	-13 825	-31.3%
Cape Times	INMSA	32 428	-2 520	-7.2%	-9 069	-21.9%
Citizen, The (Daily)	Caxton	49 731	-4 103	-7.6%	-8 266	-14.3%
Citizen, The (Saturday)	Caxton	28 145	-846	-2.9%	-9 974	-26.2%
City Press	Media 24	119 959	-26 095	-17.9%	-47 508	-28.4%
Daily Dispatch	TMG	25 748	-777	-2.9%	-2 559	-9.0%
Daily News	INMSA	29 385	-1 548	-5.0%	-5 251	-15.2%
Daily Sun	Media24	287 222	-61 043	-17.5%	-146 002	-33.7%
Diamond Fields Advertiser	INMSA	8 066	-29	-0.4%	-635	-7.3%
Herald, The	TMG	20 962	-172	-0.8%	-1 783	-7.8%
Ilanga	Ind	107102	-21 775	-16.9%	4 107	4.0%
Ilanga Langesonto	Ind	59 152	-18 193	-23.5%	-19 618	-24.9%
Independent on Saturday	INMSA	41 645	-2 967	-6.7%	-7 377	-15.0%
Isolezwe	INMSA	110 753	-3 023	-2.7%	12 001	12.2%
Isolezwe ngeSonto	INMSA	91 359	1 276	1.4%	23 940	35.5%
Isolezwe ngoMgqibelo	INMSA	79 874	3 747	4.9%
Mail & Guardian	Ind	41 116	-4 773	-10.4%	-4 014	-8.9%
Mercury, The	INMSA	28 396	-1 374	-4.6%	-3 783	-11.8%
Pretoria News	INMSA	14 393	-2 520	-14.9%	-7 424	-34.0%
Pretoria News Saturday	INMSA	8 814	-1 478	-14.4%	-5 117	-36.7%
Rapport	Media24	192 293	-28 192	-12.8%	-83 095	-30.2%
Saturday Dispatch	TMG	20 117	-406	-2.0%	-3 786	-15.8%
Saturday Star, The	INMSA	63 844	-3 098	-4.6%	-29 954	-31.9%
Son (Daily)	Media24	91 735	-8 596	-8.6%	-29 403	-24.3%
Son op Sondag	Media24	54 367	-5 012	-8.4%	-9 923	-15.4%
Sondag	Media24	32 867	-7 015	-17.6%	-14 257	-30.3%
Sowetan	TMG	95 068	-2 692	-2.8%	-17 773	-15.8%
Star, The	INMSA	80 303	-11 129	-12.2%	-54 961	-40.6%
Sunday Independent	INMSA	30 842	-872	-2.7%	-1 317	-4.1%
Sunday Sun	Media24	170 843	-36 451	-17.6%	-60 012	-26.0%
Sunday Times	TMG	368 974	-8 233	-2.2%	-4 783	-1.3%
Sunday Tribune	INMSA	70 312	-5 228	-6.9%	-14 971	-17.6%
Sunday World	TMG	123 515	-27 776	-18.4%	-36 967	-23.0%
The Times*	TMG	50 236	2 403	5.0%
Volksblad – Daagliks	Media24	19 949	-1 873	-8.6%	-6 312	-24.0%
Volksblad – Saterdag	Media24	17 988	-3 617	-16.7%	-5 853	-24.6%
Weekend Argus	INMSA	55 731	-2 974	-5.1%	-19 403	-25.8%
Weekend Post	TMG	20 778	-962	-4.4%	-3 674	-15.0%
Weekend Witness	Media24	19 035	-1 366	-6.7%	-4 442	-18.9%
Witness, The	Media24	17 151	-1 185	-6.5%	-3 257	-16.0%

VSA se Kerry ‘verloor nie slaap oor Poetin se leuenaar-opmerking’

Die Amerikaanse ministerie van buitelandse sake het die verklaring deur die Russiese president, Wladimir Poetin, as “belaglik” afgemaak, dat staatsekretaris John Kerry aan die Kongres oor Al-Kaida se rol in Sirië sou gelieg het.

“Staatsekretaris Kerry is, soos u almal weet, ‘n gevesveteraan met toekennings vir dapperheid,” het ‘n segsvrou vir buitelandse sake, Jen Psaki, gesê, met verwysing na Kerry se diens tydens die Viëtnamoorlog. “Hy het al meer as woorde gehad wat in sy rigting gemik is.

“Dus verloor hy nie slaap ná so ‘n belaglike reaksie wat op ‘n onakkurate aanhaling gegrond is en geheel en al vedraai is nie,” het sy bygevoeg.

Woensdag het Poetin vir Kerry daarvan beskuldig dat hy oor die militante Al-Kaida-groep se betrokkenheid by die Siriese konflik gelieg het.

“Hulle lieg natuurlik pragtig. Ek het debatte in die Kongres dopgehou. ‘n Kongreslid vra mnr. Kerry: “Is Al-Kaida daar?” Hy sê: “Nee, ek sê dit nou met vertroue dat hulle nie is nie,” het Poetin tydens ‘n vergadering van die menseregteraad in die Kremlin gesê.

“Al-Kaida-eenhede is die hoof-militêre groepering, en hulle weet dit,” het hy gesê, met verwysing na die Verenigde State. “Dit was onaangenaam en onthutsend vir my – ons praat met hulle, ons gaan van die standpunt af uit dat hulle ordentlike mense is. Maar hy lieg en weet dat hy lieg. Dis treurig.”

Poetin het nie nie verdere besonderhede verstrek nie.

Tydens ‘n meningswisseling met ‘n senator, is Kerry gevra of dit “eintlik waar is” dat die Siriese opposisie “met tyd meer deur Al-Kaida geïnfiltreer is”. Kerry het gesê: “Nee, dit is eintlik nie waar nie. Dit is eintlik inkorrek.” – Reuters

Stand van die Praagse lente/kultuuroorlog

deur Dan Roodt

[followbutton username=’danroodt’ count=’true’ lang=’en’ theme=’light’]

Hou van Dan Roodt se Facebookblad

Met die boikot teen Naspers in volle swang, soek die magtige mediagroep nou raad by die Engelse, want hulle weet nie meer hoe om ons te hanteer nie. Die pas aangestelde redakteur van Beeld, Adriaan Basson, voorheen van City Press, is slegs in naam Afrikaans. Anders deel hy al die vooroordele van ultralinkse Engelssprekendes jeens Afrikaners.

Ek korrespondeer steeds met die dekaan van die letterefakulteit by UJ om uit te vind waar Piet Croucamp aan sy opvatting kom dat konserwatiewe Afrikaners “inherent dom” of “van laer intelligensie” is. Ook wil ek weet wat die universiteit se standpunt rondom spraakvryheid en akademiese vryheid is, gegewe Croucamp se heksejagte teen dosente by ander universiteite wat uitsprake oor babaverkragtings in SA maak.

So pas het ek aan die SA korrespondente van die New York Times en die Londense Guardian getwiet dat SA se naam verander moet word na “The Sadists’ Apocalypse”, gegewe babaverkragtings, foltering van bejaardes en rituele moorde.

Om ‘n intellektuele basis vir hierdie stryd te verskaf, voel ek daar moet twee kort eboeke geproduseer word wat ons gratis op die internet kan versprei:

1. Naspers en die marxisme

Hierin moet aangetoon word hoe Naspers die vernaamste propagandamedium vir die idees van Goldberg, Wolpe, Slovo, Bram Fischer, ens. geword het. Naspers se siening van sowel die SA geskiedenis as die Afrikaner is ‘n marxistiese siening. Dit moet aan ‘n meedoënlose kritiek onderwerp word. Soos ‘n sekere vroulike dosent van Tukkies dit onlangs op die praag-webwerf gestel het: “daar moet maalvleis van gemaak word”.

2. The Sadists’ Apocalypse – understanding violence in post-1994 South Africa

Hierin moet ‘n teorie geformuleer word wat die verskynsels van babaverkragtings, plaasmoorde, marteling van bejaardes, wydverspreide seksuele geweld en die algemene psigopatologie van die Suid-Afrikaanse samelewing verklaar en aantoon waarom demokrasie onder sulke toestande onmoontlik is.

Ek het ‘n ou hoërskoolgeskiedenisboek van my pa hier en op skool moes hulle leer, nie van die ANC soos nou nie, maar van die Groot Trek en Europese geskiedenis, waaronder die Franse omwenteling. Geen revolusie is moontlik sonder ‘n intellektuele omwenteling waardeur die vyand se konstellasie bankrot idees omvergewerp en met ‘n nuwe insig en waardestelsel vervang word nie.

Hier en daar sal ons ‘n paar uur se slaap inkry, maar daar moet dag en nag gewerk word om dit te laat gebeur…

Die oomblik is nóú! Carpe diem!

[followbutton username=’danroodt’ count=’true’ lang=’en’ theme=’light’]

Hou van Dan Roodt se Facebookblad

‘n Afrikanerkalkoen se eiertjie oor die demockracy

deur Manfred Delport

[followbutton username=’ManfredDelport’ count=’true’ lang=’en’ theme=’light’]

Volg Manfred op Facebook.

Ek het dit geniet om prof Danie Goosen se rubriek oor die demokrasie te lees. Alhoewel ek seker is Dan sal hom ook beantwoord, sal ek ook my eiertjie lê, al is ek ‘n selferkende leek in die politieke wetenskap.

Eerstens sou ek reageer deur te sê dat Afrikaners en Boere na my mening diep in ons harte demokrate is, selfs diegene wat miskien as vêrregs afgemaak kan word. Die Geloftevolkbeweging het immers onlangs die VVK in die lewe geroep, wat ‘n verkiesing gehou het. Goed; linkse gillers sal weliswaar probeer sê die VVK se verkiesing het misluk, maar hoe suksesvol daardie verkiesing was in numeriese terme, is nie eintlik vir hierdie gesprek ter sake nie. Die VVK se verkiesing is immers privaat befonds, anders as die luukse wat die OVK het om belastinggeld te kan gebruik. Die punt is wel dat selfs bewegings soos die Geloftevolk insien dat die gewone man op straat se stem gehoor moet word, al word hulle deur die libverkramptes as ekstremiste geëtiketteer.

Die geneuk kom egter in by hierdie deel van prof Goosen se rubriek: “Ingevolge Aristoteles se omskrywing dui laasgenoemde op daardie politieke orde waar die eie gemeenskap aan gemeenskaplike sake deelneem met die oog op die verwesenliking van hulle gemeenskaplike goed (bonum commune).”

Dáár het ons die Guptatopiese demockracy se doodsteek, in daardie een woordjie: Gemeenskap. Daar is geen Guptatopiese gemeenskap nie. Buiten vir selfone, geldgierigheid en ‘n voorliefde vir bier, het die inwoners van Suid-Afrika bitter, bitter min in gemeen. Daar is bloot ‘n vrugteslaai en deurmekaarspul van radikaal-uiteenlopende gemeenskappe, elkeen met unieke en meestal botsende belange. Die gebrek aan enige identifiseerbare Guptatopiese gemeenskap, maak dat die een-man-een-stem demockracy hopeloos en fundamenteel wanfunksioneel en gedoem is tot mislukking.

‘n Vereiste vir ‘n suksesvolle, moderne demokrasie is dat daar ‘n min-of-meer eenvormige gemeenskap moet wees, wat stem vir sake van gemeenskaplike belang. Wanneer daar egter ‘n mengelmoes van gemeenskappe bestaan, met botsende belange. en met uiteenlopende beskawingspeile, en veral wanneer die demografie teen kleiner gemeenskappe opgestapel is, is deelname aan so ‘n demockracy vir die kleiner gemeenskappe eintlik sinneloos.

Vir die voordeeltrekkers uit regstellende aksie is dit byvoorbeeld belangrik dat daar ‘n Spesiale Olimpiade vir hulle in die werkplek of op universiteit geskep moet word, want anders sou hulle nooit op gelyke voet met ander kon meeding nie. Ander groepe, wit mans spesifiek, word egter regstreeks benadeel deur die voorgee wat op hulle deur hierdie Spesiale Olimpiade afgedwing word. Gegewe die getalle-oorwig van diegene wat ‘n onregverdige en rassistiese voordeel benodig, misluk die Guptatopiese demockracy volledig en klaaglik daarin om diegene aan die ontvangkant van die Spesiale Olimpiade se belange te dien.

Die ironie is dus dat die VVK se verkiesing, onderbefonds en kleinerig soos hy was, in een sin meer suksesvol was as wat enige van die Guptatopiese verkiesings oor die afgelope 20 jaar was. Die VVK se verkiesing se teikenmark was ‘n min-of-meer eenvormige en identifiseerbare gemeenskap, en die leiers wat daartydens verkies is, is verteenwoordigend van daardie gemeenskap. Vergelyk mens die VVK se verkose leiers met diegene waarvoor baie Afrikaners amper by verstek stem; die onheilige drie-eenheid van Helen Zille, Lindiwe Mazibuko en Patricia de Lille, word dit duidelik dat daar iewers ‘n groot skroef los is.

Hoe kan vreemdes wat niks met my gemeenskap uit te waai het nie; ‘n Engelssprekende vrou van Duits/Joodse afkoms, ‘n Afro-Sakser en ‘n voormalige PAC-lid, wat sogenaamde setlaars wou verjaag, ooit in der ewigheid my as Afrikaner se belange wil dien? Die antwoord is dat hulle self nie eens voorgee dat hulle so wil maak nie. Die einste rassistiese Spesiale Olimpiade, regstellende aksie, wat ek hierbo genoem het, is immers amptelike DA-beleid. Die DA staan ook grondroof voor, en kon nie wag om onskuldige straatname in Kaapstad te teiken bloot omdat hulle Afrikaans was nie. Die leierskap van die DA praat eerder Spaans as Afrikaans, en skree soms, soos Athol Trollip, dat Afrikaners “idiots” is.

Waarom stem Afrikaners dan vir die DA, eerder as vir ‘n party soos die VF+, wat sekerlik meer verteenwoordigend van die Afrikanergemeenskap is, kan mens dan vra? Waarom sou Afrikaners dan willens en wetens, soos kalkoene vir Kersfees, eerder stem vir ‘n party wat niks met hom te make het nie, en wat beleidsrigtings voorstaan wat teen Afrikaners se belange indruis?

Die antwoord is sekerlik dat dit weer eens ‘n bekentenis is dat die Guptatopiese demockacy eenvoudig nie werk nie. ‘n Stem vir die DA is bloot ‘n teken van wanhoop, gebou op die vae hoop dat enige iemand beter sou wees as die ANC-bewind, en dat genoegsame opposisie eendag die ANC sal ontsetel. Geen rasionele DA-stemmer glo egter in sy hart dat die DA binne die volgende 50 jaar die ANC by die stembus sal kan klop nie. Die ANC sal eerder van die linkerkant af verslaan word, deur splinterfaksies en populistiese partye, maar sulke partye gaan weer eens niks met die Afrikanergemeenskap se belange uit te waai hê nie.

Wat is die oplossing dus vir Afrikaners? Omdat Afrikaners demokrate is, was die VVK op die regte pad, en identifiseer prof Goosen dit ook in sy stuk se laaste paragraaf, al verwys hy eerder na gemeenskappe as volke en selfbeskikking. Die enigste volhoubare langtermynoplossing is ‘n regering vir Afrikaners, deur Afrikaners, oor Afrikaners, deur leiers wat ons self kon verkies. Selfbeskikking, dus. Indien dan nie in ‘n volkstaat nie, dan moontlik in die vorm van ‘n eie owerheid of, les bes, in die opbreek van die Guptatopiese gedrog in ‘n federale bestel (alhoewel die ANC-bewind totaal hierteen gekant is).

Die tweede-beste oplossing, indien selfbeskikking nie haalbaar is nie, is reeds deur honderde duisende Afrikaners aangegryp. Hulle het geëmigreer na lande waar die gemeenskappe meer lyk soos wat Afrikaners lyk. Die kloof wat gemeenskaplike belange betref tussen ‘n Kiwi en ‘n Afrikaner is veel, veel kleiner as dié tussen ‘n Afrikaner en Lindiwe Mazibuko.

Gaan stem dus maar gerus in 2014 se Guptatopiese verkiesings. Ek is egter skepties, indien nie sinies nie, of deelname aan die Guptatopiese demockracy vir my as Afrikaner iets in die sak gaan bring. Hierdie kalkoen gaan nie in 2014 vir Kersfees stem nie.

[followbutton username=’ManfredDelport’ count=’true’ lang=’en’ theme=’light’]

Volg Manfred op Facebook.

Brand by ANC-hoofkantoor

Luthuli-huis, die ANC-hoofkantoor

‘n Brand het Dinsdag in die ontvagslokaal van Luthuli-huis ontstaan, sê die ANC.

“Die brand het die ontvangslokaal beskading en ‘n rusbank verbrand… ‘n Gebreekte bottel is op die vloer gevind,” sê die woordvoerder van die African National Congress, Jackson Mthembu.

“Veiligheidspersoneel het brandblussers gebruik om die tierende vlamme te blus wat amper plafonhoogte in die ontvangslokaal bereik het,” meen hy.

Volgens Mthembu ondersoek die polisie die voorval, maar nóg die polisie, nóg die Johannesburgse nooddienste kon dit bevestig. – Sapa

Wat bedoel Dan Roodt met sy kritiek op die demokrasie?

deur Danie Goosen

Dan Roodt het onlangs ‘n belangrike artikel oor die gebreke van die ‘demokrasie’ geskryf. Uit die algemene strekking van sy artikel is dit duidelik dat Dan enigsins skepties oor die demokratiese gedagte is. Omdat die tema so belangrik is, kan ten minste die volgende kort opmerkings daaroor gemaak word:

1. Watter doel het Dan in gedagte met sy kritiese opmerkings oor die demokrasie? Impliseer hy daarmee dat daar – volgens sy ideale beeld op die toekoms – groter vorme van nie-demokratiese gesag in Suid-Afrika moet wees? En as dit inderdaad die geval is, wie moet hierdie groter gesag uitoefen?

Genoemde vrae kan ook spesifiek met betrekking tot die Afrikaners gevra word. Wat beteken Dan se kritiek vir die Afrikaners? Beteken dit dat laasgenoemde hulleself gereed moet maak om hulself aan selfs nog groter vorme van voorskriftelike gesag moet onderwerp as wat die bestaande orde kenmerk? Uit die artikel is dit nie duidelik watter antwoorde Dan op hierdie vrae gee nie.

2. Is dit nie vir Afrikaners vandag van die allergrootste belang om juis nou – in hierdie spesifieke historiese konteks – vir die demokratiese gedagte voorspraak te maak nie? Uiteraard draai enige antwoord hierop rondom die vraag wat presies met die “demokrasie” bedoel word.

Anders as wat Dan impliseer, kan ‘n veelheid van selfs radikaal uiteenlopende betekenisse daaraan geheg word. Indien ‘n mens dit dus sonder meer afwys, word – te midde van ander betekenisse – ook die tipiese Klassieke en in die besonder Aristoteliese opvatting van die demokraties-republikeinse gedagte afgewys. Ingevolge Aristoteles se omskrywing dui laasgenoemde op daardie politieke orde waar die eie gemeenskap aan gemeenskaplike sake deelneem met die oog op die verwesenliking van hulle gemeenskaplike goed (bonum commune). As sodanig verskil die demokrasie op ‘n radikale wyse van die hedendaagse liberale demokrasieë waar die ou demokratiese gedagte van deelname ingekort is tot die trek van ‘n kruisie agter ‘n – meestal vooraf vasgestelde – lys van kandidate.

Maar is dit nie vir Afrikaners nou van die allergrootste belang om juis hierdie ou opvatting van die demokrasie te herontdek nie? Indien die demokrasie as sodanig afgeskiet word, word hierdie moontlikheid egter by voorbaat van die historiese tafel afgevee.

3. Nogmaals rondom die betekenis van die begrip ‘demokrasie.’ Dan beroep hom in sy kritiek op die demokrasie onder meer op die denke van die Duitse politieke filosoof, Carl Schmitt (188-1985).

Nou, oor Schmitt kan ‘n mens uiteraard baie dinge sê, omdat hy ‘n magdom boeiende werke gepubliseer en sekerlik een van die mees toonaangewende politieke denkers van die 20ste eeu was. (Sien die hedendaagse stortvloed van publikasies oor hom). Dan maak egter ‘n fout om Schmitt as bondgenoot teen die demokrasie op te roep. Schmitt het in talle van sy vroeë werke (maar in die besonder in sy werke oor die diktatuur, die politieke teologie en die krisis van die parlementêre demokrasie) ‘n skerp skeiding tussen die “liberale” en die “demokratiese” gehandhaaf. Schmitt neem deurgaans in hierdie werke die demokratiese juis teen die liberale in beskerming. Volgens hom is dit nie die demokrasie wat in ‘n krisis verkeer nie (soos wat Dan impliseer), maar eerder die liberale tradisie met sy klem op die regte van die individu. Eersgenoemde hou nog die moontlikheid in van gemeenskaplike besluitneming. Daarenteen is dit die liberale tradisie wat ons aan die absurditeit van ‘n kruisie elke nou en dan uitgelewer het, terwyl die werklike gesag in die liberale ordes by die burokratiese ordes en tegnokrate lê.

Nog meer (kan mens byvoeg), dit is die liberale tradisie wat nie die dinamika van gemeenskappe begryp nie, terwyl dit juis die demokratiese gedagte is wat begryp dat die politieke geskiedenis rondom die wel en wee van gemeenskappe draai. Vanuit hierdie gesigspunt beoordeel moet die demokratiese gedagte – veral as dit verwys na die deelname van en inspraak in die gemeenskaplike sake van gemeenskappe – omhels word.

4. Daarmee gee ek geensins voor dat daar aan die demokratiese gedagte ‘n soort utopiese betekenis geheg moet word nie. Ook die demokratiese is nie sonder sy probleme nie. In hierdie verband kan ‘n mens gerus kennis neem van ‘n ander groot politieke denker van die 20ste eeu, naamlik Leo Strauss.

Alhoewel die denke van Strauss (net soos Schmitt) nie sonder probleme is nie, het hy tereg aangetoon dat die politieke werklikheid deur die voortdurende spanning tussen die beginsels van “voortreflike gesag” (leierskap) en “instemming” (o.a. demokratiese deelname) gekenmerk word.

Ingevolge hierdie onderskeid kan ‘n mens aanvoer dat indien daar eensydig klem gelê word op demokratiese deelname (ten koste van die beginsel van voortreflike gesag) dit ook tot die nadeel van die demokrasie self strek. Want dan loop die demokrasie die gevaar om alles tot ‘n laagste gemene deler te reduseer. (In die verlengde hiervan kan ‘n mens ook sê dat die beginsel van voortreflike gesag ook die demokratiese nodig het, want sonder laasgenoemde loop dit die risiko om in die tirannieke te verval).

Met betrekking tot ons eie mense dink ek behoort ons klem op beide beginsels te lê, sowel die beginsel van voortreflikheid as die beginsel van demokratiese deelname. Afrikaners beskik nie tans oor geloofwaardige leiers en (veral) ‘n voortreflike elite nie. Kortom die beginsel van gesag ontbreek onder Afrikaners, eintlik op ‘n dramatiese wyse. Daarom die voortdurende neiging om die laagste gemene delers op te soek. Maar Afrikaners ly ook aan ‘n gebrek aan demokratiese deelname met die oog op die verwesenliking van die gemeenskaplike goed.

5. Ten slotte, die swart politiek word tans gekenmerk deur ‘n steeds ernstiger wordende spanning tussen “gesag” en “instemming”. Die swart elites is op elke vlak van regering besig om te verkrummel. Geen wonder dat daar soveel demokraties-populistiese opstande daarteen is nie. Hoe moet Afrikaners hierop antwoord? Moet hulle daarop antwoord deur ‘n pleidooi vir die beginsel van gesag te lewer? Of moet hulle die demokraties-populistiese impulse ondersteun?

Volgens die Straussiaanse denke moet ons telkens die “goeie oordeel” gebruik om hierop te antwoord. Maar wat beteken dit? M.i. behoort Afrikaners ‘n derde alternatief anderkant sowel die demokraties-populistiese beweginge as die bestaande gesagstrukture in te neem. Eersgenoemde is ideologies bedenklik, terwyl laasgenoemde die afgelope dekades getoon het dat dit weinig begrip het vir ‘n plurale demokratiese orde met sy ingeboude sin vir die erkenning van ‘n veelheid van kultuurgemeenskappe.

So ‘n derde alternatief is een waarin die demokratiese gemeenskapsgedagte omhels word. Afrikaners is nie vreemd daarmee nie. Inteendeel, hulle eie republikeinse erfenis was in vele opsigte reeds ‘n manifestasie daarvan.

Prof. Danie Goosen is dosent in Godsdienswetenskap aan UNISA en voorsitter van die FAK. Sy boek, Die nihilisme, is deur PRAAG uitgegee.