Karin Roodt – Bladsy 100

Kerry mislei Senaatskomitee oor rebelle

By die Senaatskomitee oor buitelandse betrekkinge waar Kerry die saak vir president Barack Obama se plan om Sirië aan te val gestel het, het Kerry beweer dat die gewapende opposisie “toenemend deur sy gematigheid en uitgebreide lidmaatskap gekenmerk word, hulle gehoorsaamheid aan demokratiese prosesse, inklusiwiteit en ‘n grondwet wat minderhede beskerm”.

“En die opposisie word sterker by die dag,” het Kerry bygevoeg.

Intelligensiebronne en kundiges oor die Siriese konflik sê dié assessering is nie korrek nie.

Hulle sê Islamitiese groepe soos die Al-Kaida se Nusra Front is beter georganiseer, gewapen en opgelei.

Kerry se opmerkings verteenwoordig ‘n verandering in gesindheid deur die Obama-administrasie, wat vir meer as twee jaar versigtig was om nie aan rebelle Amerikaanse wapens te verskaf nie.

So onlangs as die einde van Julie, op ‘n sekuriteitskonferensie in Aspen, Colorado, het die adjunk-direkteur van die Pentagon se verdedigingsintelligensie-agentskap, David Shedd gesê hy is “baie bekommerd dat die mees radikale elemente sal oorneem”.

Die Amerikaanse en geallieerde intelligensiebronne het egter gesê die soort radikale aanslae waarna Shedd verwys het, het nie verander nie.

In ‘n tweede verhoor Woensdag, is Kerry uitgedaag deur ‘n Republikeinse verteenwoordiger Michael McCaul, Texas .

“Wie is die rebelle? Wie is hulle? Ek vra dit die hele tyd in my inligtingsessies,” het McCaul gevra. “En elke keer word ek ingelig dit is net erger en erger, want die meerderheid van die rebelle – en ek sê hier meerderheid – is radikale Islamiete wat instroom van oor die hele wêreld.”

Kerry het McCaul se stelling probeer afmaak as verkeerd en gesê dat “gematigde” groepe oorneem.

Top Amerikaanse intelligensie en militêre amptenare het onlangs ook ‘n somber openbare evaluering van die relatiewe sterkte van matige en godsdienstige ekstremistiese Siriese rebelle gedoen.

As anekdotiese bewys is ‘n video op YouTube uit Sirië ‘n paar dae gelede gesmokkel deur ‘n voormalige rebel wat die rebelle se laggende bevelvoerder gedokumenteer het in afgryslike toneel.

Dit is met walging begroet en bied ‘n donker insig in hoe baie rebelle ‘n wrede en genadelose houding teenoor gevangenes openbaar.

Hierdie video, geskiet in April, sluit aan by ‘n groeiende aantal bewyse van ‘n toenemend kriminele omgewing bevolk deur bendes van plunderaars, opportuniste, ontvoerders en moordenaars.

Talewet geminag in staatsdiens

robdavies — Rob Davies, minister van handel en nywerheid

Die VF Plus het enkele weke gelede met ‘n geskrewe vraag die onderverteenwoordiging van Afrikaans in die staatsdiens belig en veral in sekere afdelings van die department van handel en nywerheid waar nie ‘n enkele Afrikaanssprekende personeellid is nie.

Die nuwe Talewet laat die gevaarligte nou rooi flikker vir die oorlewing van Afrikaans by staatsinstellings, sê adv. Anton Alberts, die Vryheidsfront Plus se parlementêre woordvoerder oor kuns en kultuur.

Volgens adv. Alberts het regstellende aksie daartoe gelei dat Afrikaanssprekende personeel al hoe meer onderverteenwoordig raak in die staatsdiens. Die realiteit is dus dat daar bloot nie meer personeel beskikbaar is om Afrikaanssprekendes te help nie, ongeag die welklinkende beloftes van die ANC in dié verband.

Ingevolge die Talewet moet elke nasionale department, -openbare entiteit en -openbare onderneming ‘n taaleenheid stig en ‘n taalbeleid hê wat bepaal in watter tale diens gelewer en gekommunikeer moet word en die instellings kan besluit watter drie van die elf amptelike tale gebruik sal word.

Dr. Joyce Sukumane, direkteur van taalbeplanning en- ontwikkeling by die department van kuns en kultuur, het die week gesê daar sal nie teen een van die elf amptelike tale ‘gediskrimineer’ word nie, en Afrikaanssprekendes sal ‘steeds daarop kan aandring’ om in hul taal gehelp te word.

Volgens adv. Alberts is dié beloftes van dr. Sukumane betekenisloos en sonder enige waarborg.

“Hier word beloftes gemaak dat Afrikaans gehandhaaf sal word en dat mense daarop sal kan aandring om in Afrikaans gehelp te word.

“Die tragiese ironie is dat Afrikaans by staatsinstellings reeds ‘n worstelstryd om oorlewing voer en in sommige departemente reeds glad nie meer gebruik word nie omdat dat daar bloot geen Afrikaanssprekende personeel is nie. Die ANC se beloftes moet teen hierdie agtergrond gesien word.

“Dit is reeds algemeen bekend dat Afrikaans ‘n rare kommoditeit by alle staatsinstellings geword het.

“Ondervinding het duur lesse geleer dat dit maklik is om beloftes te maak, maar dat dit weinig indien ooit uitgevoer word. Ons sal die situasie fyn dophou en sal nooit die handdoek ingooi waar dit kom by die stryd om Afrikaans nie,” sê adv. Alberts.

Veestropers wat miljoene se beeste buit, voor

‘n Vermeende veedief, wat klaarblyklik in drie provinsies bedrywig was, verskyn vandag in die Modimole landdroshof.

Die vee wat in Limpopo, Gauteng en Noordwes gesteel is beloop sowat R2,1 miljoen.

Volgens die polisie het ‘n boer van Beestekraal in Noordwes in Junie vanjaar beeste ter waarde van R270 000 verloor en ‘n jaar vroeër ‘n kudde ter waarde van R400 000.

Verlede maand is 51 Brahmaan-koeie ter waarde van ‘n half miljoen rand naby die Kranskoptolplaza gesteel.

In al die gevalle is dieselfde metode en dieselfde vragmotor gebruik. Die vee is na Gauteng geneem, maar dit is onduidelik of dit daar afgelaai is.

Die polisie vermoed dat ‘n sindikaat betrokke is. – RSG

Swart bestuurder wat Thomas Ferreira omry, weer voor

Die swart motorbestuurder van die Gautengse LUR vir behuising het weer verskyn in die Krugersdorpse landdroshof op aanklagte van roekelose of nalatige bestuur, en dat hy nie ‘n beseerde persoon gehelp het nie.

Die saak hou verband met ‘n ongeluk in 2011 toe Motsami Semitje in ‘n ongeluk betrokke was waarin Thomas Ferreira, wat op ‘n motorfiets was, ernstig beseer is.

‘n Neuroloog het intussen verklaar dat Ferreira nooit ten volle sal herstel van die breinskade wat hy opgedoen het nie.

Die hof het gister gehoor dat Semitje nie ‘n gevorderde bestuurskursus geslaag het nie.

Hy het na bewering deur ‘n rooi verkeerslig gejaag en in die middel van ‘n kruising teen Ferreira gebots.

Die saak is gister uitgestel sodat die verdediging nog getuies kan roep.

Wilgehof: Klaer vas vir winkeldiefstal

Die wit pa wat ‘n rasseherrie by die Laerskool Wilgehof begin het, Craig Thiem, het toe nie opgedaag vir sy afspraak met die skool se beheerraad nie.

Hy sou by dié geleentheid die beweerde rassisme van onderwysers in die skool wat hy in ’n ellelange brief uiteengesit het, met die beheerraad bespreek het, berig die Volksblad.

Victor Goliath, voorsitter van die skool se beheerraad het gesê Thiem het egter op kort kennisgewing die beheerraad laat weet dat hulle die inhoud van die brief maar sonder hom moet bespreek.

Die waarnemende skoolhoof, Louis van Biljon, sal nou in opdrag van die beheerraad aan Thiem ’n brief skryf om te hoor wanneer dit hom sal pas om met die beheerraad oor die inhoud van die brief te vergader.

Goliath sê in die brief is daar niks nuuts nie, behalwe ou bewerings. Hy sê verder word daar ook “wilde bewerings” oor ander personeellede van die skool gemaak, maar hul name word nie genoem nie.

Thiem (51) van Thomas Leithstraat, Wilgehof, moet weer eerskomende Maandag in die Bloemfonteinse landdroshof op ’n aanklag van winkeldiefstal verskyn. Hy word daarvan aangekla dat hy kruideniersware van R524 in die Pick n Pay Hypermarket in Fichardtpark gesteel het.

‘Boere moet nie paniekerig raak oor radikale grondhervormingsuitsprake nie’

Max du Preez het die “disinformasie, swak analise en politieke opportunisme” van instansies soos die Afrikanerbond en sekere ANC-faksies, skerp gekritiseer en gesê dit vertraag konsensus oor grondhervorming.

Du Preez het die Afrikanerbond as “erg onsensitief, en aanstootlik in sy a-historiese ontleding van grondeienaarskap en hervorming” afgemaak nadat hulle uitgebreide kritiek teen die ANC se opvatting van die 1913-wet gelewer het

Du Preez het die Nasionale Ontwikkelingsplan (NOP) se voorstel dat plaaslike liggame van belanghebbendes in elke distrik die oordrag van ongeveer 20 persent van landbougrond aan opkomende swart boere gee en kommersiële boere dwing om hulle te voorsien van ondersteuning, as die beste oplossing beskryf.

Die voormalige president Thabo Mbeki het onlangs gewelddadige grondbesetting in Zimbabwe geprys, en ANC-LP en Mandela-opvolger Mandla Mandela het dreigemente dat kommersiële plase onteien sal word, herhaal. Mbeki se opmerking is by ‘n lesing by die Thabo Mbeki African Leadership Institute by Unisa op 23 Augustus gemaak.

Die NOP-voorstel dat die staat boere gaan “aanmoedig” om aandele in hul plase aan plaaswerkers te gee, het tot konsternasie in georganiseerde landbou-kringe gelei.

Dit stel onder meer dat ’n plaaswerker met tien jaar se “gedissiplineerde diens” op ’n kommersiële plaas, geregtig is op 10% aandele in die eienaarskap van die grond. Ná 25 jaar diens is ’n plaaswerker geregtig op 25% aandele en op 50% ná 50 jaar.

Geen melding word gemaak oor wat gebeur as daar verskeie werkers op ’n plaas is wat al langer as tien jaar daar is nie. Plaaswerkers, wat tydelike en seisoenwerkers insluit, is nou geregtig op aandele in dié plase waar hulle woon en werk.

TLU SA het in sy reaksie gesê hoewel boere “vrywillig” deelneem is verwagtinge geskep waaraan nie voldoen kan word nie en sal dit tot spanning tussen grondeienaars en werkers lei. Dié organisasie het ook gesê die staat se voorgestelde model druis in teen ‘n vryemarkopset.

Jannie de Villiers, uitvoerende hoof van Graan SA, sê die voorstel is een van twee “grondplate in die aardkors diep onder die see” wat Suid-Afrikaanse landbou kan tref.

Die ander “grondplaat”, is Tina Joemat-Pettersson, minister van landbou, bosbou en visserye, se voorgestelde wetswysings aan die Bemarkingswet waarmee sy weer staatsbeheer wil instel.

“As een van dié twee grondplate skuif, gaan dit beslis ’n ‘tsoenami’ in landbou teweegbring,” het De Villiers gesê. Hy het gesê die plaaswerker-voorstel is ’n aanslag op privaatbesit en eiendomsreg en die wetswysiging aan die Bemarkingswet as ‘n “aanslag op die vrye mark” beskryf.

Agri SA het in reaksie gesê die Grondwet sal boere beskerm. Dié organisasie meen die gedwonge beskikbaarstelling van aandele sonder vergoeding sal “heel waarskynlik” in stryd wees met die Grondwet en hulle het individuele ooreenkomste tussen boere en plaaswerkers as ’n beter alternatief voorgehou.

Beeld berig dat ‘n gereelde RSG-kommentator, prof. Dirk Kotzé van Unisa, op Agri Noordwes se kongres in Rustenburg gesê het boere moenie paniekerig raak oor radikale uitsprake oor grondhervorming nie. Die ware stand van sake is “positiewer”.

Appèluitspraak oor Kaapstad-asielkantoor voorbehou

Uitspraak is in die Appèlhof in Bloemfontein voorbehou in die saak oor die sluiting van die vlugtelingontvangskantoor in Kaapstad.

Die departement van Binnelandse Sake appèlleer teen ‘n uitspraak van die Wes-Kaapse hooggeregshof wat bevind het dat die departement se sluiting van die kantoor onregmatig was.

Die departement hou vol dat die besluit regmatig was en dat voldoende raadpleging plaasgevind het.

Sedert die sluiting kan duisende asielsoekers in Kaapstad nie aansoeke indien nie en loop die gevaar om gedeporteer te word. – RSG

ANC sê DA-saak teen buitelandse kiesers maak nie sin

Vuvuzille blaas teen buitelandse kiesers — Vuvuzille blaas buitelandse stemme aan

Die ANC sê die DA het oorreageer deur hom tot die Hooggeregshof te wend oor ‘n wetsontwerp wat mense wat in die buiteland woon kan verhoed om vir die provinsiale verkiesings te registreer.

Die ANC se hoofsweep, Stone Sizani, sê die DA se besluit om hom tot die hof te wend oor ‘n wetsontwerp wat nog deur die parlement oorweeg word, maak nie sin nie.

Die DA en nog nege applikante het hofstukke oor die saak by die Wes-Kaapse hooggeregshof ingedien. Die DA se uitvoerende voorsitter, James Selfe sê hulle wil hê dat Suid-Afrikaners wat in die buiteland woon, stemgeregtig is vir sowel die nasionale as die provinsiale verkiesings.

Hulle glo dat die wet ongrondwetlik mag wees omdat dit die reg tot ‘n provinsiale stem uitsluit. Die DA wil sodoende verhoed dat kiesers in die buiteland net in 2014 hul stemme uitbring.

Die Vryheidsfront Plus het aan Suid-Afrikaners die reg om te registreer en te stem in aanstaande jaar se algemene verkiesing besorg. Dr. Corné Mulder, VF Plus-woordvoerder oor binnelandse sake, sê dit is belangrik dat voornemende kiesers in die buiteland opnuut bewus gemaak word van hul regte.

In hierdie verband sal die VF Plus van sosiale media soos Facebook en Twitter gebruik maak om die bepalings en implikasies van die nuwe opsie om wel in die buiteland te registreer en te stem, sterk uit te dra.

Dr. Corné Mulder sê hierdie vergunning is bereik nadat die party tot in die Grondwethof daarvoor geveg het.

Met die vorige verkiesing het die VF Plus ‘n groot aksie gedryf om Suid-Afrikaners in die buiteland bewus te maak van die feit dat hulle mag stem en die party was ook aktief betrokke om voornemende kiesers behulpsaam te wees met administratiewe prosesse om hul stem uit te bring.

“Die VF Plus het vir hierdie reg van alle Suid-Afrikaners tot in die Grondwethof gestry. Ons sal hierdie nuwe werklikheid onder die aandag van Suid-Afrikaanse burgers wêreldwyd bring omdat die 2014-verkiesing baie belangrik gaan wees.

Voor die VF Plus se oorwinning was net Suid-Afrikaanse regeringspersoneel, toeriste, studente en sportlui wat aan internasionale wedstryde in die buiteland deelgeneem het, toegelaat om te stem.

Polisielid en SAID-werknemer vas vir dwelmsmokkel

‘n Polisielid en ‘n amptenaar van die Suid-Afrikaanse Inkomstediens verskyn vanoggend in die landdroshof op Komatipoort op aanklagte van dwelmsmokkelary.

Hulle is by die Lebombogrenspos in Mpumalanga in hegtenis geneem omdat hulle blykbaar ‘n taxibestuurder van Mosambiek gehelp het om dwelmmiddels na Suid-Afrika te smokkel.

“Die polisieman het ‘n taxi wat van Mosambiek op pad was, deursoek terwyl die bestuurder sy paspoort laat stempel het. Kokaïen met ‘n geraamde straatwaarde van meer as R3 miljoen is in ‘n plastiekhouer gevind,” sê kol. Leonard Hlathi, polisiewoordvoerder in Mpumalanga.

Die konstabel het na bewering die SAID-werknemer, wat nie aan diens was nie, gebel om die dwelms na sy huis te neem.

‘n Polisie-operasie was reeds aan die gang nadat beamptes ‘n wenk ontvang het oor die taxi wat die land binnekom. Die polisiebeampte is in hegtenis geneem.

“Nadat die konstabel aangekeer is, het hy ons na die ander verdagte se huis geneem, waar hy die dwelms oorhandig het en in hegtenis geneem is.”

Die drie verskyn Donderdag in die Komatipoort-landdroshof.

Amerikaanse aanval op Sirië: Eerste hindernis oorgesteek

‘n Amerikaanse Senaatskomitee oor buitelandse betrekkinge het ‘n resolusie aanvaar ten gunste van militêre ingryping in Sirië, in weerwil van groot teenkanting wat onder gewone kiesers heers.

Tien senatore het ten gunste van die resolusie gestem, sewe daarteen en een het aangedui dat hy “teenwoordig” is.

Die Senaat, wat deur die Demokrate beheer word, sal later dié week oor direkte Amerikaanse militêre betrokkenheid in Sirië stem. Die VSA steun reeds Al-Kaida-vegters wat die Siriese president probeer ontsetel.

Die huis van verteenwoordigers wat onder Republikeinse beheer is, moet ook oor die maatreël stem alvorens pres. Barack Obama dit kan bekragtig. Die meeste Republikeine is daarteen gekant. Dit word slegs deur Neo-Konserwatiewes ondersteun wat nou betrokke is by die industriële en militêre kompleks.

Obama het die kongres gevra om goedkeuring te gee vir oënskynlik beperkte aanvalle op Sirië, in reaksie op president Bashar al-Assad se vermeende gebruik van chemiese wapens teen burgerlikes. Kritici meen egter dat die goedkeuring die president se magte veel verder sal uitbrei.

Daarbenewens is sommiges skepties oor die getuienis wat deur die Obama-administrasie voorgehou word vir die gebruik van gifgas, aangesien John Kerry foto’s van Irak gebruik het om die aantal sterftes in Sirië aan te dik. Die foto is terugetrek.

Intussen het ‘n voormalige Britse ambassadeur, Craig Murray, te kenne gegee dat Britse intelligensie geen aanduiding van Sirië se betrokkenheid by die gifgasaanval kon vind nie. Murray het sy verbasing daaroor uitgespreek en gesê die inligting is deur Israel aan die VSA verskaf wat nie dieselfde insamelingskapasiteit het as die VK se Troodos-fasiliteit wat die Midde-Ooste betref nie.

Groot dele van Johannesburg sonder krag

Groot dele van Johannesburg is sedert Woensdag sonder elektrisiteit. Dit sluit die SAUK in wat reeds meer as 18 uur op noodkrag loop.

Duisende betalende inwoners is verontrief weens die kragonderbreking wat talle woonbuurte lamlê. Die woonbuurte wat geraak word sluit Houghton in waar oudpresident Nelson Mandela tans glo tuis aansterk, asook Alexandra.

Privaatkontrakteurs is ingeroep om die krag te herstel. City Power se segspersoon Louis Pieterse sê tegnici weier om na-ure te werk en het vieruur uitgestap ten spyte van die toevoerprobleem.

Afrikaanssprekende dele soos Cresta en dele van Roodepoort is ook geraak. Sommige woonbuurte se krag is laat gistermiddag herstel.

Pieterse sê hulle werk met ‘n groot agterstand en het gebruikers gevra om geduld te gebruik. Hy sê hulle probeer hul bes, want daar is onder normale omstandighede onderbrekings, maar met die onwettige staking, het die aantal opgehoop.

Eskom het die kragonderbrekings aan baie hoë verbruik Woensdag toegeskryf.

Wetsontwerp op Regspraktisyns is ANC-transformasieslenter

Pogings van die ANC om debat rondom die omstrede Wetsontwerp op Regspraktisyns in die parlement te vermy, is ‘n bewys daarvan dat die wetsontwerp bloot ‘n rookskerm van die ANC is om die regsprofessie te transformeer tot ANC-beheer, sê adv. Anton Alberts, die Vryheidsfront Plus se parlementêre woordvoerder oor justisie en grondwetlike ontwikkeling.

Die wetsontwerp het dit ten doel om ’n enkele landwye regsliggaam tot stand te bring om die bestaande prokureursordes en balierade te vervang.

Adv. Alberts sê benewens die feit dat dit prokureurs en advokate se grondwetlike regte van vryheid van assosiasie en die eiendomsregte van bestaande prokureursordes en balierade tot niet sal maak, is dit ‘n kwalik verbloemde poging van die ANC om groter beheer te verkry oor die regsberoep.

Hy sê die huidige stelsel van prokureursordes en balierade is oor eeue gevestig en dien die belange van die publiek goed, nieteenstaande die hoë kostes in hoër howe.

“Die VF Plus is gekant teen die wetsontwerp en beskou dit as deel van die ANC se oorhoofse transformasie-poging om beheer oor die regsprofessie te verkry.

“Indien die ANC ernstig was oor die verbetering van toegang tot regshulp, moes hy ‘n algemene regsfonds gestig het wat almal tot die vlak van middelklas kan finansier in ernstige sake soos kriminele sake en groot siviele eise.

“Indien die wetsontwerp deurgevoer word, sal dit sleg inwerk op die regbank van Suid-Afrika en sal dit tot nadeel wees van al die land se mense,” sê adv. Alberts.

Goudstaking skop af

Werksaamhede word vanoggend ingekort by die Goldfields South Deepmyn op Westonaria suidwes van Johannesburg. Sowat 80 000 werkers wat tot die NUM behoort het die Kamer van Mynwese se verhoogde salarisaanbod van 6,5 persent verwerp en begin staak. Slegs kontrakwerkers het vandag vir diens aangemeld. Daar is onbevestigde berigte dat hulle met die opsegging van hul kontrakte gedreig is indien hulle sou wegbly. Om twaalf-uur vanmiddag gaan daar ‘n massabyeenkoms en betoging by die suidelike skag wees, waar die mynbestuur, die SAKP, Cosatu en die burgerlike organisasie, SANCO die werkers sal toespreek. Sekuriteit is by die myn verskerp.

Die Suid-Afrikaanse kamer van koophandel en nywerheid sê intussen goudprodusente se salarisaanbod moet in die regte perspektief gesien word. Goudprodusente sê die huidige ekonomiese toestande in Suid-Afrika het bygedra tot die finale salarisaanbod. ‘n Woordvoerder van die kamer, Peggy Drosky sê beide werkgewers en vakbonde moet bereid wees om opofferings te maak. Drosky sê werkers het dalk werklike behoeftes, maar maatskappye moet ook winsgewend wees om te kan voortgaan om mense in diens te neem. Volgens Drosky moet daar ‘n duideliker definisie wees van wat ‘n ordentlike lewenspeil in Suid-Afrika is.

In ‘n afsonderlike voorval, het betogers myngereedskap by ‘n skag van Anglo-Platinum se Twickenhammyn buite Burgersfort in Limpopo aan die brand gesteek en verskeie voertuie beskadig. ‘n Plaaslike munisipale raadslid, Vincent Mpofela sê ‘n elektriese transformator is ook afgebrand. Inwoners verkwalik die myn omdat plaaslike werkers afgelê word, terwyl werkers uit ander provinsies aangestel word. Die myn-bestuur was nie beskikbaar vir kommentaar nie.

Die vakbond die NUM gaan nie afsien van sy eis vir ‘n 15 persent verhoging vir sy lede in die konstruksiebedryf nie. Dit volg nadat die vakbond BCAWU vroeër ‘n aanbod van ‘n 10 persent verhoging deur die Suid-Afrikaanse federasie van kontrakteurs in siviele ingenieurswese aanvaar het. BCAWU verteenwoordig 40 000 konstruksiewerkers. Die NUM, wat die meerderheidsvakbond is, eis ook ‘n minimumloon van R5 500, bonusse en ‘n mediese fonds pakket. Die vakbond se sekretaris in KwaZulu-Natal, Bongani Manyoni sê vakbondleiers gaan na verwagting môre byeenkom om te bespreek hoe die staking uitgebrei kan word. Manyoni sê hulle wil hê werkgewers moet besef dat hulle ernstig is oor hulle eise.

Werknemers by die OR Tambo Internasionale Lughawe in Johannesburg kla dat hulle toegang tot die SAL-kantore sowel as die tegniese perseel geweier word. Dit wil voorkom asof dit deur stakende tegniese personeel veroorsaak word. Werkers wat aan die vakbond, Satawu verbonde is, staak reeds twee weke lank omdat hulle op hoër salarisse aandring. Na bewering is gisteraand se nagskofwerkers ook nie toegelaat om die gebou te verlaat nie. – RSG

Libië staar oor die afgrond

‘n Bietjie minder as twee jaar gelede het Philip Hammond, die Verdedigingsekretaris, Britse sakemanne uitgenooi om te deel in die heropbou van Libië en die verwagte aanvraag in natuurlike hulpbronne te ontgin .

Libië het egter intussen feitlik heeltemal die produksie van olie laat vaar omdat die regering beheer verloor het oor groot dele van die land .

Muiters het die olieterminale op die Middellandse See oorgeneem en verkoop ru-olie op die swart mark in weerwil van die regering se dreigemente dat hulle enige tenkers wat dit dra, sal bombardeer.

Die wêreld se aandag is gefokus op die staatsgreep in Egipte en die gifgasaanval in Sirië oor die afgelope twee maande. Libië wat tans gedompel is in sy ergste politieke en ekonomiese krisis sedert die nederlaag van Gaddafi twee jaar gelede, is heeltemal vergete.

Regeringsgesag is besig om te disintegreer in alle dele van die land.

Stellings deur Amerikaanse, Britse en Franse politici dat NAVO se militêre optrede in Libië in 2011 ‘n uitstekende voorbeeld van ‘n suksesvolle buitelandse militêre ingryping is wat in Sirië herhaal behoort te word, klink teen hierdie agtergrond waansinnig.

Libië se gesogte hoëgehalte ru-olie het van 1,4 miljoen vate per dag vroeër vanjaar tot net 160,000 vate per dag teruggesak.

Libiërs is toenemend aan die genade van krygshere wat optree buite die wet oorgelaat.

Die internasionale gemeenskap ïgnoreer die toenemende geweld. Die buitelandse media, wat eens die hotelle van Benghazi en Tripoli volgepak het, het heeltemal belangstelling verloor in die naderende ineenstorting van die sentrale regering.

Buitelanders het gevlug uit Benghazi sedert die Amerikaanse ambassadeur, Chris Stevens, vermoor is in die Amerikaanse konsulaat verlede September toe hy wapens na Sirië probeer smokkel het.

Anargie heers oral in die hoofstad. Die regering het ‘n beroep op die Veiligheidsmagte gedoen, bestaande uit voormalige anti-Gaddafi-groepe om orde te herstel.

Diplomate het reeds onder skoot gekom in Tripoli met die EU-ambassadeur se konvooi wat in ‘n lokval gelei is buite die Corinthiahotel op die waterfront . ‘n Bomaanval het die Franse ambassade vernietig.

Een van die talle mislukkings van die post-Gaddafi regering is sy onvermoë om die sterwende ekonomie te laat herleef. Libië is geheel en al afhanklik van sy olie- en gasinkomste en sonder hierdie sal die owerheid nie in staat wees om sy staatsamptenare te betaal nie.

‘n Lid van die parlementêre komitee oor energie, het aan Bloomberg gesê dat “die regering op sy reserwes staatmaak. As die situasie nie verbeter nie, sal hulle nie in staat wees om salarisse te betaal teen die einde van die jaar nie.”