praag.co.za

Tag: SAL

  • Karel Combrinck: De Klerk doen dit weer

    Karel Combrinck: De Klerk doen dit weer

    Êrens op die internet sien ek in ‘n koerantberig ‘n foto van FW de Klerk met die opskrif:  “Ek sal dit weer doen .” Ek het nie die berig gelees nie, want ek was bang vir naar word. Om te weet wat De Klerk sou doen as hy weer die kans kry, het ‘n mens nie ‘n koerantberig nodig nie en behoef ‘n mens ook nie te veel verbeeldingskrag nie. Jy hoef net maar rondom jou heen te kyk en te wonder, is die man dan totaal gek?

    Die lys dinge wat mnr De Klerk sou herhaal as hy weer die kans kry, is oneindig : Geleidelike uitmoor van ons mense, uitrangering van witmense, veral wit mans uit die werkplek, aftakeling van ons ekonomie (pas weer ‘n afgradering van die RSA se kredietwaardigheid na benede rommelvlak, ‘n erestatus wat die land maande lank reeds beklee), ineenstorting van plaaslike regering, verval van groot staatskorporasies soos die SABC, die SAL en Eskom, vernietiging van ons taal en kultuur, diefstal van ons grond, korrupsie op feitlik elke vlak, jammerlike agteruitgang van infrastruktuur, paaie en brûe, kortom, rampspoedige wanbestuur van ons land op bykans elke gebied.

    “Bravo,” sê mnr De Klerk, “ek doen dit weer.”

    Maar nou, net ‘n paar woorde oor die ergste verraad van mnr De Klerk., naamlik die oorhandiging van ons weermag aan ons vyand, die ANC, wat ons vir jare geteister het met terrroriste-aanvalle in onder meer restourante en kerke. Dit is byna ondenkbaar. Mnr De Klerk het ons verdedigings- en polisiemag aan die ANC geskenk met alles wat dit behels : wapentuig, vegvliegtuie, pantservoertuie, wapenstelsels met al die tegnologie wat daarmee saamgaan en wat ons oor jare opgebou het, insluitende ‘n kernpotensiaal. En dít alles gedoen met ons belastinggeld.

    En, kom ons vergeet veral nie die jongmense, dienspligtiges en staandemaglede, wat hulle lewens nou tevergeef geoffer het in die stryd teen die ANC en hulle buitelandse bondgenote.

    Mnr De Klerk sê: “Ek voel vere. Ek doen dit dit weer.”

    Deur ons Weermag en Polisiemag aan die ANC te oorhandig, het mnr De Klerk ons die vermoë ontneem om ons te verdedig en ons uitgelewer aan geweldenaars wat ons mense byna na hartelus uitmoor en verkrag — veel meer as voor mnr De Klerk se oehoeroe. Terselfdertyd het hy die ANC se vermoëns om ons te oorheers eindeloos versterk. Vir die persoon wat by uitstek verantwoordelik was vir ons veiligheid, naamlik die Staatspresident, is dit ‘n onvergelyklik laakbare daad. Trouens dit is sekerlik die mees uiterste geval van verraad in die geskiedenis van die mensdom. Sonder om melodramaties te probeer wees: hy het die swaard van die volk gelê in die skoot van ‘n kommunistiese terroris.

    Om te dink ons het eens leiers gehad soos Genl Hertzog, dr Malan, adv Hans Strydom en dr Verwoerd. En voor hulle was daar ook nog  Genl De la Rey en Gen Christiaan de Wet. In hulle tyd was daar ook verraaiers, maar wie onthou hulle nog? Genl Smuts was ook ‘n verraaier, nie so erg soos De Klerk nie en kyk wat het van hom geword.

    Waaraan ‘n mens jou met sekerheid kan troos, is dat die tyd mnr De Klerk sal inhaal en beoordeel volgens sy verdienste en hom sal verdoem tot die verfoeilike verraaier wat hy is. Want niemand, nie eers jou vyand nie, het enige respek vir ‘n verraaier nie. Miskien sal van ons daardie heuglike dag nie belewe nie, want mense neem tyd om te verstaan, maar verstaan sal hulle uiteindelik  en so seker soos daglig sal mnr De Klerk en sy rommeldemokrasie op die vullishoop van die geskiedenis eindig.

  • SAL: ‘SEB is net ‘n verskoning vir steel’

    SAL: ‘SEB is net ‘n verskoning vir steel’

    SAL (die Suid-Afrikaanse Lugdiens) betaal drie keer te veel vir die huur van vliegtuie omdat die ekstra geld in die sakke van die bestuur se vriende en SEB-begunstigdes verdwyn. Die miljoen liter branstof wat die lugdiens daagliks verbruik, word ook nie teen ‘n markverwante prys aangekoop nie omdat ‘n verskaffer sy “kommissie” daarby voeg.

    PRAAG het met bronne diep binne-in die sukkelende lugredery gepraat. Terwyl Ethiopian Airlines die SAL van sy troon gestoot het as “beste lugredery in Afrika”, lyk dit nie asof die plaaslike lugdiens ooit sy probleme en reusebedrae kontant wat dit gedurig opslurp te bowe gaan kom nie.

    Volgens een van PRAAG se bronne, iemand wat al jare lank by SAL werk, is SEB (swartekonomiesebemagtiging) die wortel van die probleem. “SEB is eintlik net ‘n verskoning onm te steel,” sê die bron. “Ons mag nie soos enige normale lugredery waar ter wêreld ook al ons vliegtuie of brandstof van erkende verskaffers aankoop nie; alles moet deur SEB-entiteite en tussengangers geskied wat ons soos bloedsuiers uitmergel.

    Voor 1994 is SAL as ‘n nasionale bate en “lugdiens” — ‘n diens aan die land — bedryf. Selfs direkteure van SAL het destyds soos gewone middelklasmense geleef, met hul kinders op staatskole en ‘n gewone bestuurder se salaris waarmee ‘n middelklashuis en -motor bekostig kon word.

    “‘n Direkteur van SAL bly vandag in ‘n sestienmiljoenrandhuis in Sandhurst en ry ten minste ‘n Porsche,” sê die bron. “Hy verdien vier miljoen rand per jaar en leef soos ‘n koning. Daarom kan die arme redery nie die mas opkom nie.”

    Gewoonlik kos dit ongeveer $300 000 per maand om ‘n groot passasiersvliegtuig vir internasionale vlugte te huur; dis wat die meeste internasionale rederye betaal. Tot onlangs het SAL egter $900 000 per maand per vliegtuig betaal, omdat al die middelmanne en SEB-plunderaars gevoer moes word. Dié huurooreenkomste is egter intussen effens afwaarts hersien, maar is nog veel duurder as wat die meeste ander rederye betaal.”

    Eens op ‘n tyd het die SAL oor sy eie vliegtuie beskik, onder andere ‘n hele vloot Boeing 747’s. “Daardie vliegtuie was klaar betaal!” sê die bron. “Hulle moes net onderhou word. Maar toe is daar gesê: nee, ons kan nie met ou vliegtuie winsgewend wees nie. Ons moet nuwes kry, nuwes huur. Daardie Boeings is vir appel en ‘n ei verkwansel, weereens deur middelmanne wat geld gemaak het…”

    Dat die Boeings nie meer geskik was nie, was ‘n leuen. “SAL kan nie meer met enige vliegtuig ‘n wins maak nie. Maar British Airways, Quantas, hulle vlieg nog elke dag Suid-Afrika toe met Boeing 747’s! Hulle kry dit reg om hul vliegtuie winsgewend aan te wend.”

    Meer en meer roetes word ook gesluit, weereens omdat “hulle nie winsgewend is nie”. Maar ander rederye vind steeds dieselfde roetes winsgewend, dis net SAL met sy swaar ballas van SEB-plunderaars wat dit nie meer kan bekostig nie.

    Volgens die bron gaan SAL binnekort “nóg vyf miljard rand benodig om staande te bly. Solank as wat dié praktyke geduld word en solank as wat SEB bestaan, gaan die staat SAL moet onderhou,” sê die bron.

    Dit gaan egter oor meer as swak bestuur. Die hele stelsel van “bemagtiging” en gewettigde diefstal maak dit onmoontlik om ‘n lugredery met sakebeginsels te bedryf.

    Ethiopian Airlines maak ‘n wins van $300 miljoen per jaar, waarskynlik met minder winsgewende roetes as die SAL. Dié redery verkeer ook in staatsbesit. “Die verskil is,” sê die bron, “die Ethiopiese regering het ‘n hoofbestuurder aangestel wat die redery in belang van die aandeelhouer, die staat, bedryf. Sy woord is wet. Daar vind geen regeringsinmenging in die redery plaas nie. Anders as by SAL waarmee die minister en die staat hul gedurig bemoei.”

  • Ethiopian Airlines steek SAL as grootste Afrika-lugdiens verby

    Ethiopian Airlines steek SAL as grootste Afrika-lugdiens verby

    Die Suid-Afrikaanse Lugdiens (SAL), wat voor die revolusie een van die bes bestuurde lugdienste ter wêreld was, maar tans aanhoudende verliese ly, is verlede jaar deur Ethiopian Airlines as die grootste lugredery in Afrika verbygesteek. Die jongste uitgawe van die Britse Economist bevat ‘n lowende artikel oor Ethiopian, maar vermeld oor SAL: “Suid-Afrika se nasionale redery, wat verlede jaar deur Ethiopian in grootte verbygesteek is, is al sedert 2011 onwinsgewend, en sou sonder regeringswaarborge insolvent wees.”

    In die mees onlangse boekjaar het SAL onder die voorsitterskap van Dudu Miyeni ‘n verlies van anderhalf miljard rand gemaak. Dit was ‘n “verbetering” op die vorige jaar se verlies van R2,5 miljard. SAL het ook in die openbaar gesê dat hy waarborge van R16 miljard nodig het.

    The Economist het al voorheen oor die onbekwame bestuur by Suid-Afrikaanse openbare maatskappye, waaronder SAL, berig en die volgende grafiek oor hul finansies gepubliseer.

    sa_state_enterprisesEthiopië is ‘n arm Afrikaland wat nie eens oor ‘n stabiele regering beskik nie. Desnieteenstaande het Ethiopian Airlines daarin geslaag om ‘n winsgewende lugdiens op te bou wat vriendelike diens aan ‘n toenemende aantal kliënte lewer. Volgens The Economist het Ethiopian verlede jaar bykans $300 miljoen (R4,5 miljard) wins gemaak en is vanjaar bestem om $500 miljoen (R7,5 miljard) se winste te lewer.

    ethiopian_airlinesBenewens Suid-Afrika, is ander Afrikalande waar die nasionale rederye in ‘n haglike toestand verkeer, onder andere Kenia en Zimbabwe. Trouens, Ethiopian Airlines verdien nou meer geld as al die ander rederye in Afrika saam. In 2015 het die Ethiopiese lugdiens 82 internasionale bestemmings bedien, waarby nog 13 vanjaar gevoeg is.

     

  • Zuma met SAL na NY maar vrae oor duur vlugte bly

    Zuma met SAL na NY maar vrae oor duur vlugte bly

    President Jacob Zuma en sy afvaardiging van sewe ministers het intussen in New York aangekom vir die 71ste sitting van die Verenigde Nasies se Algemene Vergadering.

    Die president het Saterdag die nasionale lugdiens SAL, wat diep in die rooi is, na die VSA gevlieg.

    Zuma, wat graag vliegtuie te duurste huur vir reise, het SAL se diens geloof.

    Besprekings oor veiligheid in Afrika en Suid-Afrika as beleggingsbestemming is op die VN-agenda.

    Die president spreek môre die Algemene Vergadering toe en Woensdag sal hy die Amerika-Afrika-sakeforum bywoon.

    Die Siriese oorlog, vlugtelingskwessies en klimaatsverandering is op die VN-agenda. Dit sal Ban Ki-moon se laaste hoëvlakvergadering wees voordat sy vyf-jaar-ampstermyn aan die einde van die jaar ten einde loop.

    Intussen het die Minister van Verdediging en Militêre Veterane, Nosiviwe Mapisa-Nqakula, aangedui dat R100 miljoen opsy gesit is om ‘n straler vir die boekjaar 2016/17 te huur.

    Zuma wil glo volgens berigte R4 miljard bestee aan ‘n nuwe vliegtuig vir hom en sy gevolg, terwyl die lugdiens ‘n yslike R4 miljard in die rooi is.

    Afrika het ‘n swak veiligheidsrekord as dit by swart leiers en vliegtuie kom.

  • OUTA gaan SAL-kontrak met BnP Capital bekyk

    OUTA gaan SAL-kontrak met BnP Capital bekyk

    Die burgerregte-organisasie OUTA beplan om ‘n ‘n hofbevel te bekom oor ‘n omstrede kontrak tussen die Suid-Afrikaanse Lugdiens en die maatskappy BnP Capital.

    Vroeër is berig dat die SAL nie die korrekte verkrygingsprosedures gevolg het met die aanstelling van BnP nie.

    Die voorsitter van OUTA, Wayne Duvenage sê die ooreenkoms kan aandeelhouers van BnP Capital R256 miljoen ryker maak.

    Die lugdiens kon die diens teen ‘n vyfde van die koste bekom het.

    ‘n Woordvoerder van die SAL, Tladi Tladi, sê die ooreenkoms voldoen aan die voorgeskrewe verkrygingsprosedures.

    Duvenage sê hy sal dokumentasie vrystel wat sal aantoon dat daar familiebande is tussen BnP Capital en lede van die raad van die SAL.

    In OUTA se verklaring sonder hulle Dudu Myeni, ‘n Zuma-vertroueling, uit as die onbevoegde party.

    Daniel Mahlangu, die uitvoerende hoof van BnP Capital (foto hierbo) kon nie vir kommentaar bereik word nie. Hy het vroeër gesê hy bedryf ‘n “boetiek” vir finansiële advies wat die “mark ken”.

    Alhoewel die “hele” Raad die sogenaamde tender op 24 Mei goedgekeur het, het twee lede eers op 27 Mei hul handtekeninge op die dokument geplaas.

  • SAL-aanvaar Nene-plan op die nippertjie

    Die Suid-Afrikaanse Lugdiens het ter elfder ure besluit om die Airbus-transaksieplan te aanvaar.

    Die plan is soos dié een wat deur die voormalige minister van Finansies Nhlanhla Nene, goedgekeur is.

    Die lugdiens het die Tesourie ingelig dat sy raad gestem het soos in Julie toe Nhlanhla Nene die plan goedgekeur het.

    Die lugdiens het sodoende die spertyd gehaal om nie ‘n duur boete te betaal nie. SAL sou sowat R600 miljoen rand moes opdok vir vliegtuie wat hy nie kan bekostig nie.

    Dit wil voorkom asof die heraangestelde minister van finansies, Pravin Gordhan die voorsitter van die SAL-raad, Dudu Myeni vasgevat het.

    Myeni wou die ooreenkoms heronderhandel, wat die oorspronklike ooreenkoms sou laat verval het en die betaling van miljoene rand sou noodsaak.

    Nene se weiering om Myeni se plan te aanvaar, het waarskynlik sy kop laat rol.

  • Spertyd vir SAL-ooreenkoms verstryk vandag

    Die Suid-Afrikaanse Lugdiens se spertyd vir ‘n ooreenkoms met Airbus om vyf vliegtuie te huur, verstryk vandag, het RSG berig.

    Meer as 600 miljoen rand sal teen vandag betaal moet word tensy die Tesourie en SAL ‘n ooreenkoms kan bereik oor die kontrak.

    Vroeër is berig dat die Europese vliegtuigvervaardiger bereid is om voort te gaan met ‘n ooreenkoms wat deur die regering goedgekeur is om vyf A330-vliegtuie aan die Suid-Afrikaanse Lugdiens te verhuur.

    Die afgedankte minister van Finansies, Nhlanhla Nene het ‘n ruiltransaksie beding waarvolgens die SAL nie die vliegtuie hoef te koop nie.

    Die voorsitter van die SAL-raad, Dudu Myeni het egter probeer om die ooreenkoms te heronderhandel ten spyte van teenkanting van die Tesourie.

    Die Lugdiens moet teen vandag ‘n regsbindende ooreenkomsbrief aan die maatskappy stuur om die huurooreenkoms te verseker.

    Alle oë is op die heraangestelde minister van Finansies, Pravin Gordhan om te sien of hy Nene se standpunt gaan handhaaf.

    Nene het Myeni op 3 Desember beveel om voort te gaan met die ooreenkoms, maar hy is ses dae later afgedank.

    Volgens ‘n SAL-memorandum kan die redery nie dié duur uitgawe bekostig nie.

    Deur die vyf A330-200-langafstandvliegtuie te huur sal die redery miljarde rande bespaar.

  • Cosatu waarsku David van Rooyen oor kerntransaksie

    Cosatu waarsku David van Rooyen oor kerntransaksie

    Cosatu het Donderdag die nuwe minister van finansies, David van Rooyen, gemaan dat hy nie behoort voort te gaan met die staat se beplande kernkragtransaksie nie.

    Die Franse Areva-kerntender vir Eskom is pas deur ‘n appèlhof ter syde gestel.

    Volgende maand sal die reuse kernkragtender aan die Russe, onder aanvoering van Tina Joemat-Pettersson, die minister van energie, beslis word.

    Joemat-Pettersson sê die tender moet reeds voor die begin van die volgende finansiële jaar in April aan die suksesvolle bieër toegeken word.

    Die vorige minister van finansies Nene was gekant teen die beplande tender en het in ‘n onderhoud gesê die regering se plan om 9,600MW van kernkragkapasiteit te bekom, sal eers goedkeur word as dit bekostigbaar is.

    Ontleders meen Nene is in die pad gesteek oor sy besware. Die waarde van die kernkragtransaksie sal na verwagting tussen R650 miljard en R1000 miljard wees.

    Kommer heers in sekere kringe oor die kernkragplanne wat deur die presidensie ondersteun word, omdat dit reuse geopolitieke implikasies het.

    Gordon Mackay, die DA se woordvoerder oor energie, het Donderdag gesê Zuma se besluit om ontslae te raak van Nene hou direk verband met Nene se teenstand teen die kernkragplanne.

    Die tesouriedokument waarin die finansieringsmodel vervat is, is steeds geklassifiseer sodat die portefeuljekomitee oor energie nog nie insae daarin gehad het nie.

    Die kernkragkontrak wat Suid-Afrika met Rusland wil sluit, sal glo mbv ‘n leningskema gefinansier word.

    Alhoewel die SAL-kontrak van R6 miljard voorgehou word as die rede waarom Zuma van Nene ontslae geraak het, meen ontleders dat die kernkontrak die werklike rede is.

    In ANC-besprekingsdokumente voor sy nasionale algemene raadsvergadering het die party verklaar dat ‘n deursigtige bekostigbaarheidstudie oor kernkrag gedoen behoort te word.

    Wat duidelik is, is egter dat sulke besluite weens politieke oorwegings geneem sal word.

  • Begrotingsyfers laat ekonome verward

    Die kans op belastingsverligting vir besighede en individue volgende Februarie lyk bitter skraal.

    Dit is volgens ekonoom André Mellet en volg nadat die Minister van Finansies, Nhlanhla Nene, Woensdagmiddag in die parlement sy aansuiweringsbegroting ter tafel gelê het.

    Volgens Mellet verskil die syfers wat Nene in sy Februarie begrotingsrede vanjaar verskaf het, hemelsbreed met díé wat hy vandag voorgelê het, met die inkomste wat hy voorsien R119 miljard laer as voorheen gaan wees.

    Verder, sê Mellet, verskil sy beramings van uitgawes vir die huidige boekjaar met R105 miljard.

    Mellet meen met dit alles inaggenome, sowel as die druk vanaf die regering om gratis onderwys te verskaf en die gesondheidsektor te finansier, is kanse op belastingsverligting volgende jaar hoogs onwaarskynlik.

    R200 miljoen is opsygesit vir die regering se kernkragprogram omdat elektrisiteitsvoorsieningsprobleme die jaarlikse bruto nasionale produk tot een persentasiepunt aan groei kos, het die minister gesê.

    Nene het gesê Medupi, wat reeds 800 MW aan die elektrisiteitsverskaffingsnetwerk voeg, het die druk intussen verlig.

    Hy het gesê die tesourie en die departement van energie bekyk voorstelle en finansieringsopsies om bykomende kernkragkapasiteit te bou.

    ‘n Samewerkingsooreenkomste is vanjaar met onder meer Rusland se Rosatom gesluit vir kernaanlegte.

    Wetgewing is nodig om voorsiening te maak vir die bestuur van staatsondernemings soos SAL wat in die moeilikheid is, het Nene gesê.

    Die SAL moontlik eers oor 5 jaar winsgewend wees al word al die tesourie se huidige maatreëls om die lugdiens te verbeter suksesvol toegepas.

    Die staat het ’n waarborg van R14,4 miljard aan SAL toegeken waarvan R11,4 miljard reeds opgebruik is.

  • SAL ontken dat hulle aan China verkoop word

    Die Suid-Afrikaanse Lugdiens het ontken dat hy in gesprek is om aan ‘n ander lugredery te verkoop te word of gedeeltelik verkoop te word, het Reuters berig.

    Dié verklaring kom nadat Bloomberg bronne na aan die saak aangehaal het wat beweer dat China SAL gaan oorkoop.

    Ondanks berigte oor samesprekings met die Chinese-lugredery Air China en Hainan Airlines om ‘n hoofkantoor in Wes-Afrika tot stand te bring, wou SAL nie kommentaar lewer op wat hulle as “private gesprekke” bestempel het nie.

    Hainan is die vierde grootste Chinese diens en het op 25 Maart 30 Boeing 787 vliegtuie ter waarde van $7.7 miljard bestel van die Amerikaanse vervaardiger.

    Die Suid-Afrikaanse maatskappy wat onwinsgewend is en van staatskredietwaarborge afhanklik is, het verlede jaar gesê hulle sal ‘n vennoot soek in hulle herstelplan.

    Ethiopian Airlines Enterprise en Kenya Airways toon glo groei in Afrika, terwyl China se toegang tot die kontinent sal verbeter indien hulle met SAL saamwerk.

    Nico Bezuidenhout, waarnemende hoof uitvoerende beampte, het gesê die afskaffing van swakker langafstand-roetes was deel van ‘n 90-dag reddingsplan wat geëindig op 24 Maart. Die besluit om die Beijing-roete af te skaf, sal R400 miljoen per jaar spaar.

    Die dieper Chinese vennootskap kan ook samewerking op tegnologiese gebied sluit, het een van die bronne gesê.

    ‘n Woordvoerder van die SAL het aan die nuusagentskap Reuters gesê die samesprekings met Air China sal daartoe lei dat hulle met ‘n diens tussen Beijing en Johannesburg begin waar die Chinese gebruikmaak van SAL se vlugkodes.

  • Sluipmoord ruk vakbondwese

    Die Vervoerwerkersvakbond – Satawu – vermoed dat die skietdood van sy Gautengse sekretaris, Chris Nkosi, gisteraand, ‘n sluipmoordaanval was.

    Nkosi, wat van die vakbond se kantore onderweg was huis toe, is by ‘n verkeerslig in Germiston aan die Oosrand doodgeskiet.

    Die skote is afgevuur vanuit ‘n motor wat langs hom by ‘n verkeerslig stilgehou het. Paramedici het sy lewe probeer red, maar hom na sowat ‘n halfuur dood verklaar.

    Satawu se woordvoerder, Vincent Masoga sê hulle glo dat die aanval polities-gemotiveerd is.

    Die vakbond sê Nkosi het pas sy lyfwag afgedank. Hy is drie jaar gelede aangestel om hom te beskerm.

    Satawu was die dryfveer om Numsa uit die vakbondfederasie Cosatu te skop, met die argument dat die Numsa sy lede tot “uitwissing” stroop.

    Die vakbond sukkel om salarisse te betaal as gevolg van ‘n kontanttekort. Volgens ‘n klag deur personeellede, het Satawu mediese fonds- en pensioenbydraes afgetrek, maar nie die betalings aan die onderskeie skemas oorbetaal nie.

    Groot ongelukkigheid heers oor miljoene rand wat egter glo aan investeringsinstansies oorbetaal is.

    Satawu is in Februarie ingelig dat die vakbond nie meer by die SAL erken word nie. Hoewel dit nie sy grootste werkersunie was nie, was dit die sektor se mees strategiese unie.

    Paramedici beweer dat minstens twee verdagtes gisteraand van die moordtoneel gevlug het waartydens Nkosi doodgeskiet is.

    ‘n Paramedikus van Emer-G-Med, Ray Ellis, was toevallig ook by dieselfde verkeerslig in Germiston aan die Oosrand en sê hy het gesien hoe ‘n vuurwapen afgevuur word. Hy het Nkosi te hulp gesnel.

    Ellis sê die verdagtes het in ‘n silwer BMW gevlug nadat hulle eers teen ‘n ander voertuig gebots het.

  • Begroting teiken wit belastingkoeie

    Die regering het in sy begrotingsrede die bekommernisse van die gewone belastingbetaler herbevestig.

    Staatskuld wat in 2017 tot ‘n enorme R2,3 triljoen gaan styg, was een daarvan. Reeds R153 miljard word begroot net om die rente op staatskuld vir 2015 te dek.

    Die grootte van hierdie bedrag is nie onbenullig nie, veral in die lig gesien van ontwikkelende lande soos Griekeland wat tans ten gronde gaan weens skuld.

    Vrese groei dat die regering met ‘n ekonomiese groeikoers van 2% nie in staat sal wees om Suid-Afrika op die lang termyn uit ‘n skuldput te kry nie.

    Die ANC moes daarbenewens vir die eerste keer in twintig jaar die persoonlike belasting met een persentasiepunt opstoot.

    Brandstofheffings sal ook aansienlik verhoog word binne die volgende twee maande om die sukkelende Padongelukfonds (RAD) te red.

    BTW, ‘n baie meer regverdige belasting wat op alle Suid-Afrikaners gehef kan word, is egter nie verhoog nie. Twee persentasiepunte sou ten minste ‘n deel van die nypende tekorte aangespreek het, te wete byna R40 miljoen.

    Die klem bly egter om die die krimpende groepie wit belastingbetalers te straf vir die ANC se spandabele landsbestuur.

    Persoonlike belastingbetalers word geteiken om die las van wanbesteding, korrupsie en gebrek aan bestuur te dra.

    Die deurlopende hulp aan openbare ondernemings soos Eskom en SAL, sonder planne om dié instellings na behore te reg te ruk, is net nog geld in die water.

    Die regering het pas aangekondig dat die aankope van skoolboeke gesentraliseer sal word is ‘n poging om korrupsie hok te slaan.

    Die staatsdiens beskik egter reeds nie oor die administratiewe vaardighede om so ‘n aankoopproses suksesvol te implementeer nie.

    Die enigste goeie nuus is dat klein sakeondernemings ‘n aantal belastingvrystellings kan verwag.

    Rokers en drinkers sal moet hoes en proes, met whiskey wat byna R4 per bottel duurder sal word en ‘n pakkie sigarette met byna R1.

  • Waarnemende SAL-hoof sê grade-fout is reggestel

    Die Suid-Afrikaanse Lugdiens se waarnemende uitvoerende hoof, Nico Bezuidenhout, het sy stilswye verbreek ná bewerings dat hy soos sekere swart aanstellings oor sy akademiese kwalifikasies gelieg het.

    Die SAL het vroeër die week toegegee dat sy jaarverslae vir 2011 en 2012 nie korrek was om aan te dui dat Bezuidenhout ‘n B Comm-graad in Vervoerekonomie en Bedryfsielkunde het en ook oor ‘n MBA beskik nie.

    Dit is in 2013 reggestel. Bezuidenhout het nie sy tersiêre studies voltooi nie.

    Bezuidenhout het gesê ook Mango-personeel en Mango se direksie waar hy in 2006 aangestel is, het nog altyd geweet dat hy het nie ‘n graad nie. Hy het niemand daaroor om die bos gelei nie.

    Vroeër op Dinsdag, het die SAL se direksie in ‘n verklaring gesê dat hulle by hulle waarnemende hoof uitvoerende beampte (HUB) staan.

    Bezuidenhout het aan die media gesê sy huidige personeel sowel as kollegas het nog altyd geweet dat hy nie ‘n graad het nie.

    Bezuidenhout het op sy beurt gesê sy ervaring en bewese diensrekord is goeie plaasvervangers vir akademiese kwalifikasies.

  • Minister waarsku dat belastinglas gaan verhoog

    Die ANC het die minister van Finansies, Nhlanhla Nene se eerste begrotingsrede vir die mediumtermyn verwelkom en gesê die regte balans is getref tussen die behoeftes van die armes en die noodsaaklikheid om staatsbesteding in te perk.

    Nene het sy toespraak afgeskop met ‘n waarskuwing dat beleidsveranderinge ‘n nog swaarder las op belastingbetalers kan plaas.

    Nene het die land se groeivooruitsigte beduidend afgeskaal met ‘n voorspelling van slegs 1,4%.

    Volgens Nene is dit te wyte aan faktore soos stakings, hoë elektrisiteitskostes en ‘n afname in privaatbeleggings.

    Hy het voorts die regering aangeraai om groeiende skuld te verminder en sy fiskale sake reg te ruk.

    Die minister het ook beleërde staatsbeheerde instellings soos die Suid-Afrikaanse Lugdiens en die Poskantoor gewaarsku dat hulle geen regeringshulp moet verwag nie.

    Nene het gesê hulle sal nie verdere reddingspakette ontvang nie, maar sal herstruktueer word om hulle finansieel volhoubaar te maak.

    Hy sê enige kapitalisasie sal deur middel van die verkoop van oortollige bates geskied.

    Daar sal na verwagting sowat R1,1 miljard rand oor die volgende drie jaar aan nuwe grondeise bestee sal word, het Nene aangekondig.

    Kenners meen dié bedrag is nie voldoende nie.

    Die departement van landelike ontwikkeling en grondhervorming sal die fondse daarvoor in sy bestaande begroting moet vind.

    Die nuwe vyfjaar termyn vir eise sal teen 31 Junie 2019 ten einde loop.