praag.co.za

Tag: Libië

  • Om presidente te onthoof: Chelsea Clinton se grinnik het verdwyn

    Om presidente te onthoof: Chelsea Clinton se grinnik het verdwyn

    Hillary Clinton het laggend gekekkel: “Ons het gekom, ons het gesien, hy het gesterf” oor die moord op Muammar Gaddafi van Libië nadat die VSA onder haar toesig sy bewind omver gegooi het. Maar haar dogter Chelsea vir een, waardeer nie sulke grappe oor die dood van presidente nie:

    Die voormalige Amerikaanse minister van buitelandse sake Clinton was die argitek van die rampspoedige NAVO-ingryping in Libië en ‘n Amerikaanse regsprofessor Francis Anthony Boyle beskou haar as ‘n oorlogsmisdadiger volgens die internasionale reg.

    ISIS-terroriste-indringers regeer Libië sedert president Obama en Clinton saamgesweer het met NAVO om Gaddafi in 2011 te verwyder. Clinton se aanval op Libië is die ernstigste van haar baie oortredings van die wet.

    Behalwe dat die Amerikaanse federale wet verbreek is, het haar oorlog in Libië ‘n bloedspoor gelaat wat tot vandag toe bly, met ISIS-onthoofdings van Christene wat die wêreld in skok gelaat het. In Februarie 2015 het ISIS ‘n verslag vrygestel in hul aanlyn-tydskrif Dabiq wat foto’s toon van 21 Egiptiese Koptiese Christen-konstruksiewerkers wat hulle in Sirte, Libië ontvoer en onthoof het. In hul gruwelike, vreeslike video het die gevangenes die “mense van die kruis” genoem.

    Die Amerikaanse komediant, Kathy Griffin, het onlangs bekend gemaak dat sy van plan is om in die moeilikheid te kom toe sy ‘n foto van ‘n bloedige afgesnyde kop van president Donald Trump opgehou het.

    Dit het dus as geen verrassing gekom toe haar werkgewer CNN, die Amerikaanse publiek en die Eerste Gesin, sowel as die Amerikaanse Geheimediens, dit as ‘n doodsbedreiging teen die president geïnterpreteer het nie.

    By ‘n perskonferensie het Griffin haarself probeer verdedig teen die politieke stortvloed van kritiek as gevolg van haar “grap”.

    Maar selfs Chelsea Clinton kon niks vind om oor te kekkel nie. Die beeld van Griffin is soortgelyk aan dié van die ware Mohammed Emwazi, die Britse burger wat bekend staan ​​onder die skuilnaam “Jihadi John”, wat in verskeie video’s van die Islamitiese staat, sy Christelike gyselaars onthoof.

    Griffin se idee van “grap” oor ISIS-agtige onthoofdings was ook nie baie oorspronklik nie. Die Duitse nuusblad Der Spiegel het in Februarie vanjaar kontroversie veroorsaak met ‘n voorblad wat Amerikaanse president Donald Trump uitbeeld wat die afgesnyde bloedige hoof van die Statue of Liberty in een hand en ‘n bloedige mes in die ander vashou.

    “Op ons voorblad hou die Amerikaanse president die simbool wat immigrante en vlugtelinge sedert 1886 tot nou in die Verenigde State verwelkom is, met demokrasie en vryheid,” het Spiegel se hoofredakteur, Klaus Brinkbaeumer, aan die Duitse nuusagentskap DPA verduidelik. Maar sy onverkwiklike siening oor migrasie in wêreldpolitiek, is klaarblyklik besig om hom ook vinning in te haal soos wat mesaanvalle deur Moslems oor Europa spoel.

  • Tobruk stem teen Libië se VN-regering

    Tobruk stem teen Libië se VN-regering

    Opponente van Libië se eenheidsregering, wat die ondersteuning van die Verenigde Nasies geniet, het Maandag teen ’n mosie van vertroue in die Tripoli-bewind gestem in ’n rare sessie van die parlement wat in die ooste van die land gevestig is.

    Die stemmery is ’n vars terugslag vir die regering van nasionale eenheid, wat vir maande na dié parlement se bekragtiging streef, terwyl dit probeer om invloed en gesag tot buite sy basis in die hoofstad uit te brei.

    Die stemmery was die eerste sedert Januarie toe die parlement die aanvanklike lys ministers wat deur die eenheidsregering voorgestel is, verwerp het en die eerste sedert die eenheidsregering in Maart vanjaar aan bewind gekom het.

    Parlementêre sessies in Tobruk is herhaaldelik uitgestel of geblokkeer, met teenkanting teen die eenheidsregering wat in die ooste van die land aan die toeneem is.

    Ondersteuners van die regering, van wie baie nie Maandag se sitting bygewoon het nie, het voorheen gekla dat opponente met fisieke geweld dreig ten einde te verhoed dat stemmery plaasvind.

    Altesaam 161 afgevaardigdes het die sitting bygewoon met 61 wat teen die mosie gestem het, 39 wat buite stemming gebly het en net een wat ten gunste van die mosie gestem het.

    Die eenheidsregering is die gevolg van ’n VN-onderhandelde ooreenkoms wat in Desember onder­teken is. Die ooreenkoms was daarop gemik om ’n einde aan konflik te maak, wat opgevlam het toe ’n gewapende alliansie in 2014 beheer oor instansies in Tripoli oorgeneem het en die nuutverkose parlement na die ooste van die land uitgewyk het.

    Westerse magte maak op die eenheidsregering staat om Libië se veiligheidsvakuum die hoof te bied, olieproduksie te herstel en die stroom migrante te keer wat die Middellandse See vanuit Libië onder­weg na Europa oorsteek.

    Magte lojaal aan die eenheidsregering het byna die hele kusstad Sirte van die Islamitiese Staat-groep (ISIS) herower, maar die regering­ sukkel om elders ’n impak te hê.

    Die regering­ se onvermoë om die krisis op te los, kragonderbrekings en ander probleme het bygedra dat die regering wyd steun verloor het.

    Die minister van buitelandse sake van die Libiese tussentydse regering in Tobruk het in ‘n verklaring gesê die VN-gesant vir Libië, Martin Kobler (foto bo) moet vervang word met ‘n meer neutrale en doeltreffende figuur.

  • Kerry na Afrika te midde van stygende Moslembedreiging

    Kerry na Afrika te midde van stygende Moslembedreiging

    Met die vredesooreenkoms in Suid-Soedan wat aan die uitrafel is en djihadiste wat voortgaan met aanvalle in Somalië, het die Amerikaanse minister van buitelandse sake, John Kerry, in Nairobi aangekom om met Kenia se pres. Uhuru Kenyatta samesprekings te voer.

    Die twee het veiligheid in die streek en terrorisme bespreek voordat Kerry ministers van buitelandse sake van Kenia, Somalië, Suid-Soedan en Uganda vir samesprekings ontmoet het.

    Die Amerikaanse vredesending na Oos-Afrika is bekommerd oor die verswakkende toestand in Suid-Soedan en ander lande in die streek.

    Die ontmoeting was gefokus op die herstel van die mislukte vredesooreenkoms in Suid-Soedan en verkiesings in Somalië wat voor die deur is.

    Suid-Soedan sal intussen ‘n Amerikaanse hulppakket van $138-miljoen ontvang, is voorwaardelik aangekondig.

    In ’n verklaring wat voor die besoek deur die Keniaanse presidentskantoor uitgereik is, is verduidelik dat die ontmoeting met Kenyatta op streekveiligheid en stabiliteit sal fokus.

    Verkiesings vind volgende maand in Somalië plaas en Burundi beleef sedert April 2015 ’n politieke krisis.

    Terrorisme was ook op die agenda, vanweë die bedreiging wat Somalië se Al-Sjabaab-militante vir die streek inhou.

    Kerry se vorige besoek aan Kenia in Mei 2015 het die weg gebaan vir ’n besoek van pres. Barack Obama, twee maande later.

    Die hoë-profiel Amerikaanse diplomatieke sendings beklemtoon Kenia se belangrikheid as streekvennoot vir Amerika, veral wat sekuriteit betref, en is ook ’n aanduiding dat betrekkinge met Kenia aan die verstewig is.

    Dié betrekkinge was vir ’n geruime tyd gespanne terwyl Kenyatta voor die internasionale geregshof vir vermeende misdade teen die mensdom tereggestaan het.

    Kerry wil die jaaroue vredesooreenkoms in Suid-Soedan, wat tot dusver nie daarin kon slaag om ’n einde aan die konflik te maak nie, weer laat herleef.

    Kerry sal ook na Nigerië reis voordat hy Afrika môre onderweg na Saoedi-Arabië verlaat.

    Hy sal samesprekings met President Muhammadu Buhari in Abuja voer. Amerika het sedert Buhari verlede jaar aan bewind gekom het, groter veiligheidsondersteuning aan Nigerië gegee teen die Moslemterreurgroep Boko Haram (foto bo).

    Intussen het Libië se regeringsmagte, met die steun van Amerikaanse lugaanvalle, verdere vordering met die herowering van Sirte gemaak, het woordvoerders gesê.

    Die magte het die sekuriteitsgebou wat deur die Islamitiese Staat-groep (ISIS) as gevangenis gebruik is, die hof, die Al-Naga-distrik en Dubaistraat herower.

    Die nuutste oorwinning is in gevegte Sondag “in die aangesig van desperate weerstand van die djihadiste” behaal, lui ’n verklaring.

    ISIS se skerpskutterposisies is in twee Amerikaanse lugaanvalle geneutraliseer en regeringsmagte het, sonder enige verlies in eie geledere, twee motorfopvaltoestelle onskadelik gestel.

  • As Sirte val, is Aleppo dalk volgende djihadistiese vesting

    As Sirte val, is Aleppo dalk volgende djihadistiese vesting

    Libiese magte wat lojaal is aan die regering wat deur die Verenigde Nasies ondersteun word, vuur mortiere af op posisies van die Islamitiese Staat-groep (ISIS) in Sirte, Libië.

    ISIS het probeer om ‘n basis in Sirte te vestig, maar ‘n Amerikaansondersteunde militêre offensief vanjaar het byna al die lede van die groep uit ISIS se voormalige hoofkwartier verdryf.

    Volgens Libiese amptenare is 70 persent van die stad bevry en net ‘n paar honderd van die aanvanklike 6 000 militante is nog in enkele plekke in die stad vasgekeer.

    Omdat die djihadiste uit Libië verdryf word, val hulle terug na Sirië.

    Die Russe het sedert April gewaarsku dat ‘n groot aanval op Aleppo in Sirië op hande is, terwyl hulle in gesprek getree het met die Obama-administrasie.

    Maar die Amerikaanse gewilligheid om Russiese afgevaardigdes te ontmoet was grootliks ‘n misleiding ter ondersteuning en voorbereiding van die aanval.

    Die weste van Aleppo is steeds onder beheer van die Siriese regering waar ongeveer 1,5 miljoen mense woon. Oor die afgelope twee weke dreig die stad om in djihadiste se hande te kom.

    Groot voorrade van nuwe wapens, ammunisie en intelligensie toon dat ongeveer 10,000 radikale djihadiste, gelei deur Al-Qaeda in Sirië, ‘n aanval op Aleppo beplan en hulle het reeds deurgebreek.

    Die dhihadiste se veldtog het ten doel om die hele Aleppo te beset. Indien hulle daarin slaag sal duisende burgerlikes waarskynlik sterf, waaronder talle Christene en ander minderhede.

    Die stryd om Aleppo is “een van die mees verwoestende stedelike konflikte in die moderne tyd,” het Peter Maurer, president van die Internasionale Komitee van die Rooi Kruis (ICRC) aan Reuters gesê.

    “Niemand is nêrens veilig nie. Kanonvuur is konstant, met huise, skole en hospitale almal in die spervuur. Mense leef in ‘n toestand van vrees. Kinders is getraumatiseer. Die omvang van die lyding is ontsettend,” het Maurer in ‘n verklaring gesê.

    Intussen het RT berig dat honderde ISIS-soldate deur die Amerikaanse magte toegelaat is om Manbij in Sirië te verlaat.

  • ISIS-djihadiste byna uit Sirte verdryf

    ISIS-djihadiste byna uit Sirte verdryf

    Magte lojaal aan Libië se eenheidsregering maak vordering binne die djihadiste se vesting, Sirte nadat die eerste Amerikaanse lugaanvalle, posisies van die Islamitiese Staat (ISIS) in die stad geteiken het.

    Die soldate het die sentrale distrik, Al-Dollar, ingeneem nadat gevegte die lewens van vyf soldate geëis het. Sewentien ander is gewond.

    Die regering in Tripoli het in Mei ‘n operasie van stapel gestuur om Sirte te herower, wat sedert Junie 2015 deur die djihadiste beheer word.

    Die val van die kusstad, ongeveer 450 kilometer oos van Tripoli, sal ‘n reuseslag vir ISIS wees, wat ook terugslae in Sirië en Irak beleef.

    Maandag het die hoof van die eenheidsregering, Fayez al-Sarraj, pro-regeringsmagte in Misrata, 190 kilometer noordwes van Sirte, besoek.

    Meer as 300 lede van die pro-regeringsmag is reeds dood en meer as 1 500 gewond sedert die aanvang van die stryd om die herowering van Sirte.

    Die magte bestaan grootliks uit milisies van die weste van Libië, Hulle het in 2011 tot stand gekom tydens die opstand wat die bewind van die diktator, Moeammar Ghaddafi, omvergewerp het.

  • Brittanje gaan glo nie in Libië ingryp nie

    Brittanje gaan glo nie in Libië ingryp nie

    Brittanje het geen planne om die stuur van troepe na en lugaanvalle op Libië te verleng nie.

    Die verklaring deur die ministerie van verdediging volg ná ’n komitee van wetmakers gesê het die land kan tot ’n 1000 troepe ontplooi.

    Die laerhuis se komitee vir buitelandse sake het gesê Brittanje kan deel wees van ’n internasionale weermag bestaande uit 6 000 troepe in Libië wat onruste sedert die val van Moeammar Ghaddafi in 2011 hanteer.

    Die verwagting was dat die minister van verdediging, mnr. Michael Fallon, vandeesweek tot Brittanje se bydrae tot die weermag by ’n konferensie in Europa sou instem, het die komitee gesê.

    ’n Woordvoerder van die regering het egter gesê die komitee vir buitelandse sake was “op verskeie punte verkeerd”.

    “Daar is geen planne om die lugaanvalle op Libië te verleng nie en daar is geen planne om Britse troepe te stuur om sekuriteit aan troepe op die grond in Libië te verskaf nie,” het die woordvoerder gesê.

    “Dit is daarom verkeerd om te impliseer die minister van verdediging gaan vandeesweek tot enige Britse bydrae instem.”

    Britse premier David Cameron sou na verwagting by ‘n EU-beraad sy bereidwilligheid verklaar om militêr in te gryp in die ondersteuning van Libiese opkomende eenheidsregering.

    Egipte se president Abdel Fattah el-Sisi het egter gewaarsku dat die Weste moet uitbly.

    Cameron het die EU-leiers gewaarsku oor ‘n nuwe golf Libiese migrante na Europa in die somer nadat dit bekend geraak het dat ISIS uit Sirië na Libië vlug.

    Woensdag, moes die Foreign Office toegee dat soldate nie ontplooi sal kan word sonder die goedkeuring van die parlement nie.

  • Die EU het geen antwoord op ISIS nie

    Die EU het geen antwoord op ISIS nie

    Wat Libië betref blameer president Obama vir Frankryk en Brittanje dat hulle die bal laat val het nadat Gaddafi vermoor is. Maar dit was die Obama-administrasie wat die oorlog begin het, die meeste lugaanvalle geloods het en 7 700 bomme op Libiërs laat reën het.

    Dit was Obama se mense wat opleiding en organisasie aan die djihadiste verskaf het vir aanvalle op regeringposisies.

    Obama is dus besig om fluks die bloed van sy eie hande af te was en om sy bondgenote te blameer vir wanneer die onvermydelike gevolge van die oorlog, naamlik die vernietiging van die funksionerende staat Libië, duidelik raak.

    Meer as 6000 ISIS-militante is na raming in Libië teenwoordig, twee keer soveel as wat net kort gelede geglo is.

    Hul getalle-aanwas styg nadat Al Bagdadi, die leier, vragte vol terroriste na Libië en Tunisië oor land en see gestuur het om te ontkom aan Russiese en Siriese oorwinnings, en ISIS nie meer in Turkye en Sirië gevestig kan hou nie. Assad se weermag is vandag net enkele kilometer vanaf Rakka, die Kalifaat se “hoofstad”.

    Die val van Gaddafi het die weg gebaan vir djihadistiese groepe soos Ansar-al-Sjaria wat die Amerikaanse konsul in Benghazi in September 2012 vermoor het, asook vir Al-Kaida in die Islamitiese Magreb. Ten minste 36 000 “buitelandse vegters” van 120 verskillende lande het daar aangesluit.

    Die strategie wat Al Bagdadi gebruik, is om Libië te omskep in ‘n basis van waar oorlog gevoer kan word in die Eurasiese skiereiland deur ‘n reeks noukeurig beplande gebeurtenisse: Die eerste, terrorisme, dan die manipulasie van Islamitiese minderhede in die EU en uiteindelik guerrilla-oorlogvoering in Europa self.

    Of ‘n sogenaamde eenheidsregering in Libië gevestig is of nie, is irrelevant. Wat belangrik is, is dat dit geen werklike mag moet hê nie en ook nie in staat moet wees om etniese verskille te oorbrug soos wat Gaddafi reggekry het nie.

    Franse, Italiaanse en Britse ingryping, met Amerikaanse ondersteuning, kan dié vooruitsig net verhaas, omdat hulle nie dieselfde oogmerke het nie.

    Daar sal ‘n oproep om hulp deur die Libiese regering van “nasionale eenheid” wees, gevolg deur ‘n resolusie van die Veiligheidsraad van die Verenigde Nasies. Daarna sal die militêre ingryping volg. Deesdae lyk die VN in elk geval soos ‘n supermark vir enige soort lugaanval, wat hommeltuie insluit.

    Maar die VN se vermaarde “vredesoperasies” is ‘n oorblyfsel van die Koue Oorlog en uitgedink toe Islamitiese terreur nog nie eens in sy kinderskoene was nie.

    Vir ISIS, is Libië die tweede front, asook ‘n basis van waar olie gesmokkel kan word om hul internasionale, let wel, veldtog te bestuur.

    En daar lê die knoop. Terwyl ISIS oor ‘n globale strategie beskik, het Europa geen strategie nie. Die vals stemme in die koor het reeds opgeklink toe Merkel lidlande vertel het om hul kwota immigrante te aanvaar.

    Europa se anti-immigrasiebeleid is boonop naïef en kortsigtig, want die destabilisering van die hele Noord-Afrika wat migrante produseer moet bestuur word en kan nie deur lande op hul eie aangepak word nie.

    Frankryk se bedrywighede in Senegal en Mali hou hulle besig genoeg. Groot-Brittanje sal in elk geval nie die Middellandse See verlaat sodat Frankryk en Italië die Libiese kus kan terugneem nie.

    Die drie uiteenlopende belange van die drie lande wat veronderstel is om saam te staan, voorspel niks goeds vir ‘n noodsaaklike gesamentlike strategie nie.

    Die Verenigde State sal waarskynlik voortaan minder intervensionisties wees, en die klein en medium-grootte Europese moondhede sal ‘n nuwe globale speler moet soek om na die partytjie toe te kom.

    China is natuurlik die nuwe globale speler en hulle beskik oor uitstekende betrekkinge met Israel. China het ook ‘n strategiese verhouding met die Russiese Federasie.

    China het intussen deur Israel die mees gevorderde tegnologie aangeskaf.

    Die Europese Unie sal dus ‘n nuwe geopolitieke en ekonomiese aanslag moet bedink, een wat die heersende oliepolitiek sal kan oorleef, want ISIS kan tot China se voordeel ingespan word om Noord-Afrika van Westerse en Russiese invloed te suiwer.

  • Tunisë en Libië raak by grens slaags

    Tunisë en Libië raak by grens slaags

    Tunisiese veiligheidsmagte het die week met gewapende soldate naby die grens met Libië slaags geraak, minder as ’n week nadat vyf militante wat oor die grens gekom het, deur veiligheidsmagte doodge­skiet is.

    Die gewapende mans het probeer om ’n pos van die nasionale wag en weermagbarakke in die dorp, Ben Guerdane, aan te val toe die gevegte uitgebreek het.

    Minstens vier burgerlikes is in die gevegte gewond.

    Die gevegte het omstreeks 04:30 uitgebreek en teen dagbreek het dit steeds gewoed. Troepe in die grensgebied is op ’n hoë gereedheidsgrondslag sedert ’n Amerikaanse lugaanval op 18 Februarie ’n opleidingskamp van die Islamitiese Staat (ISIS) groep in Libië gebombardeer het.

    Altesaam 18 Tunisiese militante is in die aanval dood.

    Minstens vier van die vyf militante wat verlede Woensdag naby Ben Guerdane dood is toe hulle hul vaderland vanuit Libië binnegesypel het, was Tunisiërs.

    Dodelike aanvalle op buitelandse vakansiegangers verlede jaar het die Tunisiese toerismebedryf ’n ernstige knou toegedien.

    Die skermutselinge het vrese laat ontstaan dat die geweld in Libië kaan oorspoel na hul buurland.

  • VSA beplan lugaanvalle op Libië

    VSA beplan lugaanvalle op Libië

    Die Verenigde Nasies sê alle partye in die Libiese konflik is waarskynlik skuldig aan oorlogsmisdade, insluitende marteling, verkragting en die moord op gevangenes.

    Die VN het die internasionale gemeenskap gevra om meer te doen om die skuldiges te laat vervolg.

    ‘n Verslag wat pas bekendgestel is, en fokus op vergrype in Libië tussen 2014 en 2015 sê die situasie het drasties in dié tydperk verswak.

    Die regstelsel in die land het ook in duie gestort.

    Die VN sê die Internasionale Strafhof behoort in staat te wees om ondersoeke uit te voer en beskermingsprogramme vir getuies behoort ook ingestel te word.

    Intussen wag Siriese rebelle en burgerlikes vir die aankoms van ’n noodbystand-konvooi van die Siriese Rooi Halfmaan en die Verenigde Nasies in die beleërde Kafr Batna asook Moadamiyeh.

    Dit is in rebelle-hande en aan die buitewyke van Damaskus geleë.

    Washington en sy NAVO-bondgenote, Brittanje, Frankryk en Italië, het intussen militêre optrede na Libië verskuif.

    Die Amerikaanse lugmag het verlede week op ‘n beweerde ISIS-oefenkamp wes van Tripoli aanvalle uitgevoer, het die Obama-administrasie gesê en bygevoeg dat meer sulke lugaanvalle beplan word.

    Verskeie verslae dui ook daarop dat die VSA voorbereiding tref vir ‘n groot militêre inval in Libië.

    Ontleders meen Libië sal die broodnodige afleiding vir Washington se rampspoedige koverte oorlog in Sirië verskaf.

    Die konflik het vir 4,6 miljoen vlugtelinge gesorg.

  • Vyf olie-opgaartenks brand in Libiese hawens

    Met die olieprys wat ‘n laagtepunt bereik het, is brandstofbergingsplekke oorvol.

    Maar in Libië woed brande tans by die opgaartenks van Es Sider en Ras Lanuf. Twee van die brande is begin toe olie-opgaartenks deur ISIS-mortiere getref is. Die brande het toe na drie ander tenks versprei.

    ‘n Hawewoord­voerder, Ali al-Hassi, het gesê die wagte wat gemoeid is met die ­veiligheid van petroleumopslagplekke was teen Woensdagmiddag in beheer van die hawens Es Sider en Ras Lanuf, maar dat gevegte met die ­Islamitiese Staat-groep (ISIS) ­voortduur.

    Minstens nege wagte is dood en in gevegte Maandag en Dinsdag aan die buitewyke van die hawens is meer as 40 beseer, het Reuters berig.

    Die oorskot van 30 ISIS-terroriste is ook gevind. Die wagte het ook daarin geslaag om beslag op twee militêre tenks en ander voertuie van die militante te lê.

    Mohamed al-Manfi, ’n oliebeampte in die ooste van Libië sê elk van die brandende opgaartenks bevat tussen 420 000 en 460 000 vate olie.

    Es Sider en Ras Lanuf is sedert Desember 2014 gesluit. Die hawens is tussen die stad Sirte wat deur ISIS beheer word en die oostelike stad, ­Benghazi geleë.

    Libië is verdeel tussen politieke faksies en ­gewapende groepe wat veg om beheer van die land se olierykdom, vier jaar ná die afsetting van Moeammar Ghaddafi.

    Sedertdien het ­olieproduksie afgeneem na minder as ’n kwart van wat dit in 2011 was toe 1,6 miljoen vate per dag geproduseer is.

    ISIS het munt geslaan uit die veiligheidsvakuum en sy teenwoordigheid uitgebrei, maar nog nie daarin geslaag om beheer oor olie-installasies in die land te neem nie.

    Die ekstremiste het die wagte by Es Sider ook in Oktober 2015 ­aangeval, maar vandeesweek se aanvalle is oënskynlik ’n baie feller en meer gefokuste aanslag op die hawens.

    Mustafa Sanalla, die voorsitter van die ­nasionale oliekorporasie (NOC) in Tripoli, het die hoop uitgespreek dat die geweld “politieke leiers aan albei kante in Libië tot die besef sal bring van die omvang van die ­bedreiging wat die land in die gesig staar.”

    “Ons moet verenig teen ’n gemeen­skaplike vyand, nie môre of ­volgende week nie, maar nou.”

    Die NOC het in ’n ­afsonderlike ­verklaring gesê dit sal alles in sy vermoë doen om ­kontrakte na te kom en Libië se oliebronne te beskerm.

  • Twee nuwe verdagtes vir Lockerbie-bom uitgewys

    Britse media berig dat die Libiese owerhede die ondervraging van twee verdagtes in die 1988 bomaanval op Pan Am vlug 103 sal toelaat.

    ‘n Libiese woordvoerder het die week aan die BBC gesê ondersoekbeamptes kan na Libië kom en die verdagtes ondervra wat weens onverwante klagte in die gevangenis is.

    Skotse aanklaers het verlede week aangedui daar is twee nuwe verdagtes in die bombardering van die vliegtuie wat oor Lockerbie neergestort het en die lewe van 270 mense geëis het.

    Die twee verdagtes is nie geïdentifiseer nie, maar die BBC berig beamptes in Tripoli het hulle as Mohammed Abouajela Masud en Abdullah al-Senoussi geïdentifiseer.

    Abdelbaset al-Megrahi, die enigste persoon wat skuldig bevind is aan die bomaanval, is in 2012 aan kanker oorlede.

  • Tunisiërs wen Nobelvredesprys vir Arabiese Lente

    Tunisië se Nasionale Dialoogkwartet het Vrydag die Nobelvredesprys gewen vir sy bydrae om demokrasie te bevorder.

    Die Arabiese Lente in Tunisië, is deur die Nobelkomitee voorgehou as ‘n voorbeeld van vreedsame oorgang in ’n streek wat onder geweld en opstand gebuk gaan.

    Die kwartet, bestaande uit die Tunisiese algemene werkersvakbond, die konfederasie van nywerheid, handel en kunshandwerk, die menseregteliga en die orde van regspraktisyns, het in 2013 tot stand gekom.

    Die kwartet het die demokratiseringsproses ondersteun toe dit die gevaar geloop het om in duie te stort, het die Nobelkomitee gesê.

    “Dit is ’n blye en trotse dag vir Tunisië, maar ook ’n dag van hoop vir die Arabiese wêreld,” het Hussein Abassi, hoof van die Tunisiese werkgewersvakbond, Vrydag gesê.

    “Die prys stuur ’n boodskap na ons streek om wapens neer te lê en ’n gesprek om ’n onderhandelings­tafel te voer.”

    Met sy nuwe grondwet, vrye verkiesings en ’n politiek van kompromie tussen Islamitiese en sekulêre leiers, word Tunisië voorgehou as ’n model vir die oorgang van ’n diktatorskap na ’n demokrasie.

    “Dit is wonderlik. Tunisië is ’n Arabiese land wat uitstekend gevaar het sedert die Arabiese Lente,” het Ahmad Fawzi, ‘n woordvoerder van die Verenigde Nasies, gesê.

    Intussen het die Libiese konflik oorgespoel na Tunisië met ‘n gewapende groep in die noordwestelike Libiese kusstad Sabratha wat honderde Tunisiërs Maandagnag ontvoer het.

    Die aantal gyselaars is nog nie bevestig nie, maar volgens plaaslike nuusberigte is 300 Tunisiërs ontvoer.

    Militante uit Libië het verantwoordelikheid vir die ontvoering aanvaar.

    Die ontvoering was glo uit wraak teen die Tunisiese regering, omdat Tunisiese veiligheidsmagte onlangs ‘n Libiese politikus in hegtenis geneem het weens sy betrokkenheid by terreur.

    Betogings is in Libië gehou dié week op Martelaarsplein in sentraal Tripoli teen die nasionale eenheidsregering wat deur die Verenigde Nasies se gesant, Bernardino Leon, voorgestel is.

    Libiese politici­ het ingestem tot ’n nuwe nasionale regering onder leiding van eerste minister Fayez el-Sarraj ná maande van uitgerekte onderhandelinge.

    Libië is sedert die val van Moeammar Ghaddafi in chaos gedompel. Die land het twee mededingende parlemente en verskeie groepe veg om beheer van die land se energiehulpbronne.

  • Skoppensboer: Obama en Mandela wen Nobelprys vir ‘n tweede keer

    Skoppensboer: Obama en Mandela wen Nobelprys vir ‘n tweede keer

    In ‘n verrassende skuif het die Nobelpryskomitee sy vorige besluit hersien en die 2015 Nobelprys vir Vrede gesamentlik aan die Amerikaanse president Obama en postuum aan Nelson Mandela toegeken.

    “Die besluit was nie ‘n maklike een nie,” het ‘n woordvoerder van die Noorse Nobelpryskomitee verduidelik.

    “Beide Obama en Mandela het bygedra tot globale vrede!”

    ‘n Uittreksel uit die lofprysingstoespraak:

    Ons bewonder die Amerikaanse president soveel te meer omdat hy aan al die verwagtinge voldoen het wat ons van Obama in 2008 gekoester het.

    Om al sy suksesse saam te vat: Daar was die eerste omvattende troeponttrekking uit Afghanistan en Irak, net soos hy belowe het. En daar was die bevryding van Libië, sonder enige ongevalle en sy vredesendings in Sirië en die Oekraïne.

    Obama het onlangs oneindig bygedra tot vrede, vryheid en voorspoed in die Midde-Ooste en die Oekraïne. Die belangrikste kwessie vir Obama was om demokrasie en Westerse waardes aan dié lande te bring, en hy het nooit demokrasie versaak nie, ook nie in Suid-Afrika nie.

    Obama en Mandela is nou twee van net vyf individue wat die Nobelprys twee keer ontvang het, ‘n buitengewone eer!

    Na aanleiding van hierdie kriteria was dit nie moeilik vir ons om ‘n ander kandidaat en mede-wenner van 2015 se Nobelprys vir Vrede te kies nie. Ons het ‘n dapper man postuum in Mandela ontdek.

    Verder was hierdie dapper man in staat om ‘n vredesooreenkoms te wring uit ‘n wit Suid-Afrika en dit was slegs moontlik met die energieke ondersteuning van die swart Amerikaanse president Obama.

    En die Nobelpryskomitee het beklemtoon dat Mandela opgestaan het teen ​​die voortgesette afskuwelike oorheersing van wittes in die wêreld.

    Hy het sy stem hard verhef teen die daaglikse ongekende wreedhede in wit lande.

    Mandela kon die maklike pad geneem het en Afrikaners voor die voet uitgewis het, waar dit maklik was om die teenwoordigheid van Amerikaanse militêre teenwoordigheid te demonstreer.

    Maar Mandela het gekies vir die moeilike alternatief. Hy het plaasmoorde van stapel gestuur om agteraf van Afrikaners ontslae te raak en hul bates te vervreem.

    Hierdie meesterskuif om Amerikaanse satellietfoto’s van landelike Suid-Afrika te laat lyk asof dit afkomstig is van die 60’s van die vorige eeu, was ongetwyfeld die rede hoekom die prys postuum aan hom toegeken moes word.

    Misdaad het duisendvoudig toegeneem in Suid-Afrika, maar Mandela kon dit verbloem met swart baasskap, sonder dat ‘n enkele skoot tydens die bevryding geskiet is.

    Dit is presies die stoffasie waarvan Nobelprysbekroondes gemaak word!

    [Waarskuwing: Satire]

  • Zuma, Merkel bameer NAVO vir vlugtelingkrisis

    President Jacob Zuma het herhaal dat die aanval op Libië deur ‘n NAVO-geleide koalisie in 2011 tot die huidige vlugtelingkrisis in Europa bygedra het.

    Hy het by ‘n funksie by die Verenigde Nasies se hoofkantoor in New York gepraat, waar Suid-Afrika as gasheer opgetree het Vrydag.

    Die byeenkoms is gehou om Suid-Afrika se leierskap van die G77 Plus China te vier.

    Dié groepering van ontwikkelende lande is deur Zuma aangemoedig om samewerking oor sekere kwessies te bevorder.

    Nadat die Veiligheidsraad – ondersteun deur Suid-Afrika – militêre ingryping gemagtig het in Libië, “is onsekerheid geskep in daardie deel van die wêreld, en dit is die rede vir die vlugteling-intog,” het Zuma gesê.

    Hy het gesê die vlugtelingkrisis is ‘n “mensgemaakte probleem”. Die G77 Plus China, ontwikkelende lande en die ontwikkelde lande moet “beweeg na ‘n ooreenkoms oor ‘n paar kwessies”.

    Die funksie is bygewoon deur verskeie staatshoofde, insluitende die Duitse kanselier Angela Merkel, wat, in teenstelling met Suid-Afrika, teen die Veiligheidsraadresolusie om militêre optrede teen Libië te magtig, gestem het.

    Die uitgaande Tanzaniese president Jikaya Kikwete, Lesotho se premier Pakalitha Mosisili, Mosambiekse staatshoof President Filipe Nyusi, Ekwatoriaal-Guinee se President Obiang Nguema, Liberiese president Ellen Johnson Sirleaf en ministers en ambassadeurs van verskeie lande, insluitend van die Afrika-unie self, was teenwoordig.