stropers – praag.co.za

Miljoene rande se perlemoen gevind

Dit lyk asof Chinese seekosstropers steeds voortgaan met hul misdadige bedrywighede, waarskynlik met die hulp van die plaaslike bevolking.

Tien mense wat tydens klopjagte in en om Kaapstad in hegtenis geneem is vir die besit van gedroogde perlemoen ter waarde van viermiljoen rand, verskyn vandag in landdroshowe in Kaapstad en Bellville.

Die Valke se woordvoerder, Loyd Ramovha, se die klopjagte was gelyktydig by ses eiendomme in Durbanville, Plattekloof, West Beach, Atlantic Beach, Table View en Parklands uitgevoer.

Hy se hulle het ook op droogmaak toerusting en geld beslag gelê. Die leier van die groep is ook in hegtenis geneem.

In ‘n afsonderlike voorval oor die naweek, het die polisie beslag gelê op ‘n besending perlemoen ter waarde van bykans 40 miljoen rand by ‘n stoorfasiliteit in Paardeneiland.

Die perlemoen sou na bewering uitgevoer word. Dit is onduidelik of die twee voorvalle verband hou met mekaar.

Twee weke gelede is twee Malawiërs vasgetrek in die Kaap. Hulle is onder die 16 mense wat in ses afsonderlike voorvalle met betrekking tot die onwettige uithaal van perlemoen deur die polisie in hegtenis geneem is. Al die voorvalle het plaasgevind in die Wes-Kaap.

“Dit is baie frustrerend, want die onwettige perlemoen is gewoonlik baie, baie klein, wat is nutteloos in elk geval en sal waarskynlik weggegooi word,” het departementele woordvoerder Palesa Mokomele gesê.

In ‘n ander voorval op 2 Februarie, is klopjag uitgevoer op ‘n onwettige perlemoen verwerkingsaanleg in Milnerton en Montague Gardens.

Olifante se toekoms lyk donker

’n Meerderheid van twee derdes van Cites se lidlande het by die 17de Vergadering (COP17) van die Konvensie op Internasionale Handel in Bedreigde Spesies (Cites) in Johannesburg besluit om ivoorhandel finaal die nekslag toe te dien.

Hulle het ‘n raamwerk waarbinne ivoorhandel bespreek en bedryf kan word, verwerp.

Amerika se afgevaardigdes op die beraad het aanbeveel Cites moet sy hulpbronne fokus daarop om olifante te “beskerm”, iets wat ivoorhandel beslis sou kon doen.

Namibië, Zimbabwe en Suid-Afrika het daarom gehoop om Cites te oorreed om van hul verbod teen ivoorhandel af te sien, maar tevergeefs.

Dié lande in Suider-Afrika wil graag hul groot voorraad ivoor van die hand sit om die geld in bewaring terug te ploeg, maar Cites wou geen rede insien nie.

Die Internasionale Fonds vir Dierewelsyn (Ifaw) het gesê dit kom daarop neer dat Suid-Afrika, Namibië en Zimbabwe hul ivoor nie sal kan verhandel nie.

Alhoewel ‘n amptelike besluit hieroor nog geneem moet word, is dit glo blote formaliteit.

Jason Bell, direkteur van Ifaw se olifantprogram, het die nuus as “fantasties” beskryf en gesê “redelikheid” het uiteindelik geseëvier.

Die toekoms van olifante lyk volgens hom nou rooskleuriger, maar die teendeel is egter waar. Daar is slegs 450 000 olifante oor weens stropery. Gereguleerde handel sou die stropers se taak bemoeilik het.

Kenia, die Demokratiese Republiek van Kongo en Tsjad, het die aanslag teen Suid-Afrika gelei.

Krugerpark-bewaarder vasgetrek vir stropery

Twee mans wat getaak was met anti-stroperbedrywighede in die Kruger Nasionale Park het Donderdag in die Bosbokrand-landdroshof op aanklagte van renosterstropery verskyn, het SANParke gesê.

Die veldwagter en ‘n veeartstegnikus in dieregesondheiddirektoraat van die landbou en bosbou departement in Skukuza is na bewering op heter daad betrap Woensdag. SANParke-woordvoerder William Mabasa kon nie hul name of hul volgende hofdatum gee nie.

Veldwagters op ‘n daaglikse patrollie het drie skote gehoor en gaan ondersoek instel.

“Toe hulle die toneel nader, het hulle twee mans, een in ‘n groen veldwagteruniform en die ander een in kakieklere sien hardloop in die rigting van ‘n bakkie wat daar naby geparkeer was.”

‘n Jaagtog het gevolg en meer veldwagters is ingeroep om te help. Hulle het die bakkie tot stilstand gedwing en die twee is in hegtenis geneem. ‘n Vars witrenosterkarkas, twee horings, ‘n geweer, en ander stropertoerusting is in hulle besit gevind.

SANParke se hoof uitvoerende beampte Fundisile Mketeni het die veldwagters se optrede verwelkom, en gesê dit is “hartseer en verskriklik” dat twee van hul eie na bewering betrokke was by stropery.

Valke maak nie hond haaraf teen stropers nie

Die Valke in die Noord-Kaap se ondersoek na twee afsonderlike voorvalle waarin twee renosters onlangs op ‘n plaas naby Kimberley doodgeskiet is, het nog niks opgelewer nie.

‘n Witrenosterkoei se ontbinde karkas is gekry. Die koeikarkas wat op 7 April op ‘n wildsplaas gevind is, het nog albei horings gehad.

Die Valke se provinsiale woordvoerder, Philani Nkwalase, sê nóg ‘n karkas is op 9 April op dieselfde plaas gevind.

Dié van die witrenosterkoei is vermoedelik geskiet ‘n paar dae voordat haar karkas gevind is en die gewonde dier het glo weggehardloop daar waar sy gevind is, gevrek.

Die ligging van waar die karkasse gevind is, gaan nie bekendgemaak word nie om verdere voorvalle te voorkom. Dié dier se horings is ook nie verwyder nie.

Nog niemand is in hegtenis geneem nie. Die polisieondersoek duur voort. Nkwalase kon nie bevestig of ‘n renosterkoei of –bul in die tweede voorval doodgeskiet is nie.

Dié dier se karkas het ook al begin ontbind, sê hy. Dit is ook steeds onduidelik of dieselfde booswigte betrokke is by albei voorvalle.

Intussen sê ‘n polisiewoordvoerder in Bloemfontein, Wendy Nkabi, die polisie soek steeds na stropers ná ‘n voorval waarin ‘n witrenosterkoei en haar kalf vermoedelik in Maart doodgeskiet en van hul horings op die Bloemfonteinse dieretuinplaas buite die stad gestroop is.

Die koei en haar kalf se karkasse is op 31 Maart deur ‘n veldwagter in ‘n kamp op dié plaas gevind.

Die polisie se forensiese eenheid en ander betrokkenes werk nou saam met streng veiligheidsmaatreëls wat in plek is op die plaas, wat goed omhein is.

Dit gaan nog verder opgeskerp word.

Nkwalase doen opnuut ‘n beroep op plaaseienaars en werknemers in die Noord-Kaap om meer paraat te wees teen renosterstropers.

Volgens hom moet gemeenskappe enige verdagte mense of voertuie wat by plase in die provinsie opgemerk word, by die polisie aanmeld.

Intussen word ‘n stryd ook om van die Valke se hoof, Berning Ntlemeza ontslae te raak.

Die voorsitter van die drukgroep Freedom Under Law, oudregter Johann Kriegler sê die hoofaansoek om te bepaal of Ntlemeza se aanstelling as hoof van die Valke wettig was, gaan voort.

Valke soek stropers wat witrenoster skiet

Die Valke in die Noord-Kaap ondersoek ‘n voorval waarin ‘n witrenoster by Kimberley doodgeskiet is.

Woordvoerder, Philani Nkwalase, sê die witrenosterkoei is in die regterskouer geskiet. Volgens hom is haar ontbinde karkas verlede Vrydagoggend op ‘n plaas buite die stad gevind. Sy het nog albei haar horings gehad.

Nkwalase sê dit wil voorkom of die renoster ‘n week gelede geskiet is. Die gewonde dier het toe weggehardloop en op die plek op die plaas waar sy verlede Vrydag gevind is, gevrek.

Die ligging van waar haar karkas gevind is, gaan nie bekendgemaak word nie om verdere voorvalle te voorkom, sê Nkwalase.

Die Valke in die Noord-Kaap doen als in hul vermoë om voorvalle waarin renosters doodgeskiet word, te ondersoek.

Nkwalase sê plaaseienaars en werknemers moet meer paraat wees om veral renosters te beskerm teen uitwissing.

Hy doen ‘n beroep op gemeenskappe om enige verdagte mense of voertuie wat by plase in die provinsie opgemerk word, by die polisie aan te meld.

Dit kan ‘n groot bydrae lewer in die stryd teen renosterstropery, sê hy.

Nog niemand is in verband met die voorval in hegtenis geneem nie.

Twee renosters in Noordwes doodgeskiet

Twee renosters is in die Mafikeng Private Natuurreservaat in Noordwes deur stropers doodgeskiet.

Die bestuurder van die reservaat, Louis Coetzee, sê die renosters is Woensdagoggend gekry.

Albei koeie se horings is ook verwyder. Coetzee sê ‘n .375-geweer is gebruik.

Hy sê vier renosters is sedert die begin van die jaar in die Mafikeng-reservaat vir hul horings afgemaai.

In 2015 het stropers 1 175 renosters in Suid-Afrika doodgemaak.

Stropers teiken Etosja

Stropers het die Etosja Nasionale Park in Namibië geteiken met 29 karkasse wat reeds in 2016 gevind is.

Verlede jaar het Namibië 80 renosters aan wilddiewe afgestaan. Oor die afgelope 20 jaar is die Afrika-leeus, olifante, kameelperde en renosters se getalle gehalveer.

Altesaam is 34 renosterkarkasse in die eerste twee maande van 2016 gevind waarvan verreweg die meeste in Etosja. Dié skoksyfers is pas bekendgemaak.

Vyf van die 34 karkasse is volgens die Namibiese polisie se adjunk-inspekteur-generaal van operasies, genl.maj. James Tjivikua, tydens lug- en voetpatrollies in die omgewing van Kliprivier naby Grootberg Lodge in die Kunenestreek ontdek.

Meer as 30 verdagtes is reeds in hegtenis geneem en hul vuurwapens is gekonfiskeer, maar die stropery gaan onverpoosd voort.

Volgens Tjivikua is die karkasse wat gevind is meer as een jaar oud.

Vier Namibiërs is in verband met die stroop van een renoster naby Kliprivier in Desember in hegtenis geneem en hulle word ook verbind met nog renosterstropery.

Voorts is die Chinese burger met perlemoen en renosterhorings vasgetrek.

Zhi en sy vermeende medepligtige, James Barron Wallace, is Vrydag borgtog in die Windhoekse landdroshof toegestaan.

Geen olifantkarkasse is vanjaar nog gevind nie, maar ’n Zambiese burger is in Januarie op Kongola in verband met die besit van drie olifanttande in hegtenis geneem.

Die oorsprong van die olifanttande is egter nog nie vasgestel nie.

Stropers in Namibië voer skrikbewind

Die eienaar van Emanya Lodge tussen die Etosha Nasionale Park en Oshivelo, sê sy “wil weghardloop” uit moedeloosheid omdat stropers ’n skrikbewind voer en dit lyk of die polisie nie veel daaraan gaan doen nie.

Dertien van haar 18 swartwitpense van etlike miljoene Namibiese dollar is al deur die stropers doodgeskiet, terwyl sy in die afgelope agt maande ook 35 beeste verloor het, vertel me. Nelie Lewies, wat benewens die lodge ook ’n boerdery bedryf.

Sondagnag het ’n span wat vermoedelik Maandag ook vyf beeste geslag het op die gasteplaas Sachsenheim van haar bure, mnr. en me. Gerd en Maria Sachse, by die lodge ingebreek en die rekenaarbediener asook al die sekuriteitskameras gesteel.

“Ek het by my kamervenster uitgekyk en die vier mans gewaar. Toe ek vir hulle skree ‘haai, wat maak julle hier’, het hulle nie eens weggehardloop nie,” vertel Lewies.

Volgens Maria Sachse het haar man Maandag omstreeks twaalfuur op vier vermeende stropers in die veld afgekom nadat hulle vyf beeste geslag het.

“Die stropers het gelê en slaap en hy het stilletjies terugbeweeg en my gebel sodat ek die polisie kan ontbied.”

Sy sê die polisie van Oshivelo het eers vieruur die middag daar aangekom en die stropers het toe al spore gemaak.

“Een van die polisiemanne het een van die spore geëien as dieselfde spoor wat hulle gewaar het toe hulle vroeër die dag die inbraak by Emanya ondersoek het.

“Hy het vir ons gesê die mans is gewapen.”

Volgens haar het die polisie die spore gevolg en in ’n stadium drie mans met vleis by hulle gewaar, maar die mans het hulle glo ontglip.

Sachse vertel verder dat een van die plaaswerkers verlede jaar deur ’n vermeende stroper met ’n mes in die rug gesteek is. “Ons het die saak by die polisie aangegee, want die man het gedreig om ons dood te maak, maar daar het niks van die ondersoek gekom nie.”

Lewies sê hulle het verlede jaar een aand in die restaurant by die Emanya Lodge gesit toe stropers lostrek en van die swartwitpense doodskiet. “Die werkers was vreesbevange en het in die wynkelder gaan wegkruip.”
Ook dié ondersoek het op niks uitgeloop nie, sê sy.

“Ons voel die weermag moet ingestuur word en die plase skoonmaak. Ons kan dit nie meer hou nie. Ek voel ek wil weghardloop. Aan die een kant baklei ons teen die droogte, want ons het nog nie eens 100 mm vir die seisoen gehad het. En aan die ander kant ly ons onder die strooptogte,” sê ’n moedelose Lewies.

Dit het haar N$100 000 gekos om haar rekenaarbediener en sekuriteitskameras te vervang. “Ons besoekers is meestal oorsese toeriste. Ons het nou al die inligting verloor van besprekings wat reeds gedoen is. Ek moes dadelik weer hierdie toerusting aanskaf.”

Bron: Die Republikein

Vyf vas na Britse vlieënier se dood

Pres. John Magufuli van Tanzanië het die dood van die Britse bewaringskundige wie se helikopter afgeskiet is toe hy vermeende stropers agtervolg het, veroordeel, en gesê vyf mense is in hegtenis geneem, het AFP berig.

Die Brit Roger Gower (37) het gesterf toe sy helikopter Vrydag tydens ’n patrollievlug oor die Maswa Natuurreservaat naby die wêreldbekende Serengeti Nasionale Park afgeskiet is.

Hy het vir die Friedkin Bewaringsfonds gewerk en was besig om vermeende stropers te agtervolg nadat hy die vars karkasse van olifante opgemerk het.

“Dit is ’n hartseer voorval en moet ten sterkste veroordeel word,” het Magufuli gesê.

Volgens hom is vyf verdagtes in hegtenis geneem en deur die polisie ondervra.

Gower se Suid-Afrikaanse vennoot, die safarigids Nicky Bester, was ook in die helikopter en het die ongeluk oorleef.

Pascal Shelutete, woordvoerder van nasionale parke in Tanzanië, sê die stropers “kan swaar gewapen wees met gesofistikeerde militêre wapentuig”.

Twee renosterstropers, wildbewaarder doodgeskiet

Twee vermeende renosterstopers is deur bewaarders in die Nasionale Kruger-wildtuin doodgeskiet.

‘n Woordvoerder van die wildtuin sê toeriste het ‘n bewaarder daarop bedag gemaak dat ‘n man met ‘n swaar kaliber jaggeweer in die Napi-gebied naby Pretoriuskop rondloop.

Helikopters met honde en die polisie is na die gebied gestuur. Hulle het twee mans gevind wat op die polisie begin skiet het.

Die polisie en bewaardes het teruggeskiet en die mans gedood.

In nog ‘n skietvoorval vroeër is ‘n lid van die teenstropings-eenheid in die wildtuin per ongeluk deur ‘n kollega doodgeskiet.

Die voorval het in die Malelane-deel van die park plaasgevind.

Die man is glo geskiet nadat ‘n buffel hom gejaag het en die veldwagter probeer het om die buffel te neutraliseer.

Sy kollega het glo in die spervuur beland. Hy is na die hospitaal gehaas, maar is in die teater oorlede.

Nog 22 olifante in Zim vergiftig

Minstens 22 meer olifante is dood nadat hulle deur vermeende wilddiewe naby Zimbabwe se grootste wildreservaat vergiftig is, het AFP berig.

“Ons het Maandag 22 olifantkarkasse in die Sinamatela-gebied ontdek en tot dusver het ons 35 olifanttande gevind,” het Caroline Washaya,die woordvoerder van die bestuursowerheid vir parke en natuurlewe, gesê.

Die onlangse sterftes volg skaars twee weke nadat 26 olifante weens vergiftiging in twee afsonderlike gevalle buite die Hwange nasionale park naby Kariba en na aan die grens met Botswana dood is.

Verlede maand is minstens 14 olifante aan vergiftiging in verskillende aanvalle dood.

Wilddiefstal is algemeen in Zimbabwe se nasionale parke met olifante en renosters wat vanweë hulle tande en horings, die hoofteikens is. Dit word dan na lande in Oos-Asië gesmokkel.

Verlede jaar is meer as 300 olifante dood nadat wilddiewe sianied naby hul watergate geplaas het.

Hakkejag lei daartoe dat stropers sit

Die mede-eienaar van ‘n wildplaas naby Bray by die Botswana-grens in Noordwes, het boere en hul werknemers, aook die polisie bedank wat vier vermeende renosterstropers vasgetrek het.

Tommie van Vuuren sê ‘n plaaswerker het twee weke gelede vier vreemde mans onder ‘n boom op sy plaas sien lê. Hulle het ‘n jaggeweer met ‘n knaldemper gehad.

Hy sê natuurbewaring en die polisie is ontbied en boere was binne ‘n japtrap daar. Die vier het die hasepad gekies.

In ‘n stadium is tot 30 bakkies in ‘n hakkejag ingespan.

Volgens Van Vuuren het spoorsnyers om die beurt voor ‘n Unimog, wat gebruik is in die digte bos, gehardloop, terwyl boere met hul bakkies die gebied afgesper het. Die vier verdagtes is voor 21:00 dieselfde aand nog vasgetrek.

Die eerste verdagte is omstreeks 17:00 op ‘n buurplaas vasgetrek. Lede van die polisie se honde-eenheid en boere het daarna op ‘n tweede verdagte wat in ‘n erdvarkgat weggekruip het, afgekom, waarna twee spoorsnyers omstreeks 20:00 ‘n derde verdagte vasgetrek het.

‘n Vierde verdagte is later die aand deur die polisie naby Vryburg in ‘n wegkomvoertuig in hegtenis geneem.

As die boere en hul plaaswerkers nie daar was nie, sou die booswigte nie nou agter tralies gewees het nie, sê Van Vuuren.

Die verdagtes Michael Hlongwane, Simon Sithole, Aurolle Mathabela, en Giyane Maringa het reeds in die hof verskyn en sal na verwagting op 6 November om borgtog aansoek doen.

Hulle staan tereg op aanklagte van oortreding, die rig van ‘n vuurwapen en poging tot die stroop van renosters.

Twee renosters in Vrystaat geskiet

‘n Renostereienaar en talle helpers is warm op die spoor van drie stropers wat gisteraand twee renosters op die plaas Brakfontein tussen Wesselsbron en Bultfontein geskiet het.

Japie Pienaar sê die bul en koei is nie onthoring nie, maar wel ernstig gewond.

Hy sê hy hoop dat sy koei gered kan word, veral omdat sy ‘n een-maand-oue kalf het. Hy sê die bul se prognose is glad nie goed nie – een van sy bene is deur ‘n swaarkaliber-koeël versplinter.

Pienaar sê hy en sy vrou was besig om op die plaas te kamp toe hulle skote hoor. Hulle het dadelik met hul bakkie in die rigting van die skote gejaag en op die gewonde diere afgekom.

Spoorsnyers volg die stropers van die Vetrivier in die rigting van Bultfontein. ‘n Soekgeselskap, insluitend ‘n helikopter, is ingespan.

Pienaar sê hulle is hoopvol dat die booswigte vasgetrek sal word.

Groep wil handel in renosterhoring gewettig hê

‘n Groep Suid-Afrikaanse renostertelers het die regering hof toe geneem om die plaaslike verbod op renosterhoringverkope opgehef te kry, het voorsitter van die groep Donderdag gesê.

Wettiging van horinghandel sal help om die bedreigde spesies te red, het die Private Rhino Owners Association (PROA) Pelham Jones aan dpa gesê.

Honderde Suid-Afrikaanse renosters word gestroop van elke jaar weens ‘n groot aanvraag vir hul horings, veral in Asië, waar daar geglo word dat seksuele potensie hupstoot kry daardeur maar ook in tradisionele medisyne.

‘n Verbysterende 1 215 renosters is verlede jaar in Suid-Afrika geslag, wat ‘n geskatte 25 000 swart en wit renosters huisves, die tuiste van die wêreld se grootste troppe.

Dit beteken ‘n toename van 21% in stropery van die vorige jaar.

“Ons sien dit duidelik dat die handelsverbod nie stropery in enige manier laat afneem nie. In teendeel, dien dit as stimulasie vir die swartmarkhandel,” het Jones gesê.

Die groep beplan ‘n regsgeding teen ‘n moratorium van 2009 wat die handel in renosterhoring in Suid-Afrika verbied. Internasionaal, is die verkope sedert 1977 verbied.

Die vereniging, wie se 320 lede sowat ‘n vyfde van renosters van die land se bevolking besit, sê horingverkope sal fondse vir die bewaring van die bedreigde spesies genereer.

“Net meer as 1 000 renosters is dood op private grond sedert 2008,” het Jones gesê. “Dit beteken R400 miljoen se renosters is verloor, plus R300 miljoen wat bestee is aan sekuriteit om hulle te beskerm.”

Die wettiging van binnelandse handel sal beteken dat renosterhoring aangekoop sal kan word deur kommoditeitspekulante wat die horings geneties sal kodeer en in veilige bewaring sal kan stoor totdat die internasionale handelsverbod opgehef word.