praag.co.za

Tag: weermag

  • Karel Combrinck: De Klerk doen dit weer

    Karel Combrinck: De Klerk doen dit weer

    Êrens op die internet sien ek in ‘n koerantberig ‘n foto van FW de Klerk met die opskrif:  “Ek sal dit weer doen .” Ek het nie die berig gelees nie, want ek was bang vir naar word. Om te weet wat De Klerk sou doen as hy weer die kans kry, het ‘n mens nie ‘n koerantberig nodig nie en behoef ‘n mens ook nie te veel verbeeldingskrag nie. Jy hoef net maar rondom jou heen te kyk en te wonder, is die man dan totaal gek?

    Die lys dinge wat mnr De Klerk sou herhaal as hy weer die kans kry, is oneindig : Geleidelike uitmoor van ons mense, uitrangering van witmense, veral wit mans uit die werkplek, aftakeling van ons ekonomie (pas weer ‘n afgradering van die RSA se kredietwaardigheid na benede rommelvlak, ‘n erestatus wat die land maande lank reeds beklee), ineenstorting van plaaslike regering, verval van groot staatskorporasies soos die SABC, die SAL en Eskom, vernietiging van ons taal en kultuur, diefstal van ons grond, korrupsie op feitlik elke vlak, jammerlike agteruitgang van infrastruktuur, paaie en brûe, kortom, rampspoedige wanbestuur van ons land op bykans elke gebied.

    “Bravo,” sê mnr De Klerk, “ek doen dit weer.”

    Maar nou, net ‘n paar woorde oor die ergste verraad van mnr De Klerk., naamlik die oorhandiging van ons weermag aan ons vyand, die ANC, wat ons vir jare geteister het met terrroriste-aanvalle in onder meer restourante en kerke. Dit is byna ondenkbaar. Mnr De Klerk het ons verdedigings- en polisiemag aan die ANC geskenk met alles wat dit behels : wapentuig, vegvliegtuie, pantservoertuie, wapenstelsels met al die tegnologie wat daarmee saamgaan en wat ons oor jare opgebou het, insluitende ‘n kernpotensiaal. En dít alles gedoen met ons belastinggeld.

    En, kom ons vergeet veral nie die jongmense, dienspligtiges en staandemaglede, wat hulle lewens nou tevergeef geoffer het in die stryd teen die ANC en hulle buitelandse bondgenote.

    Mnr De Klerk sê: “Ek voel vere. Ek doen dit dit weer.”

    Deur ons Weermag en Polisiemag aan die ANC te oorhandig, het mnr De Klerk ons die vermoë ontneem om ons te verdedig en ons uitgelewer aan geweldenaars wat ons mense byna na hartelus uitmoor en verkrag — veel meer as voor mnr De Klerk se oehoeroe. Terselfdertyd het hy die ANC se vermoëns om ons te oorheers eindeloos versterk. Vir die persoon wat by uitstek verantwoordelik was vir ons veiligheid, naamlik die Staatspresident, is dit ‘n onvergelyklik laakbare daad. Trouens dit is sekerlik die mees uiterste geval van verraad in die geskiedenis van die mensdom. Sonder om melodramaties te probeer wees: hy het die swaard van die volk gelê in die skoot van ‘n kommunistiese terroris.

    Om te dink ons het eens leiers gehad soos Genl Hertzog, dr Malan, adv Hans Strydom en dr Verwoerd. En voor hulle was daar ook nog  Genl De la Rey en Gen Christiaan de Wet. In hulle tyd was daar ook verraaiers, maar wie onthou hulle nog? Genl Smuts was ook ‘n verraaier, nie so erg soos De Klerk nie en kyk wat het van hom geword.

    Waaraan ‘n mens jou met sekerheid kan troos, is dat die tyd mnr De Klerk sal inhaal en beoordeel volgens sy verdienste en hom sal verdoem tot die verfoeilike verraaier wat hy is. Want niemand, nie eers jou vyand nie, het enige respek vir ‘n verraaier nie. Miskien sal van ons daardie heuglike dag nie belewe nie, want mense neem tyd om te verstaan, maar verstaan sal hulle uiteindelik  en so seker soos daglig sal mnr De Klerk en sy rommeldemokrasie op die vullishoop van die geskiedenis eindig.

  • Zuma bekommerd oor sy veiligheid

    Zuma bekommerd oor sy veiligheid

    Media 24 berig dat president Jacob Zuma nou deur die polisie se spesialis taakmag-eenheid én swaar gewapende weermagsoldate opgepas gan word.

    Dit is glo ‘n aanduiding dat daar kommer heers oor sy veiligheid.

    Rapport het berig dat die nuwe veiligheidspersoneel beteken dat Zuma se motorgevolg nou gereeld uit meer as 20 voertuie en motorfietse bestaan.

    Volgens die Sondagkoerant se inligting is daar sowat twee maande gelede ’n vergadering by die Waterkloof-lugmagbasis besluit dat die nuwe verskerpte veiligheidsmaatreëls nodig is.

    Die motorkade sluit in ‘n ambulans en ‘n aparte voertuig vir Zuma se militêre dokter. Geen vorige staatshoof het nog van dieselfde aantal personeel gebruik gemaak nie.

    Weermagwoordvoerder Xolani Mabanga het ná navrae van die koerant gesê die weermag sal nie Zuma se veiligheidsmaatreëls met die media bespreek nie.

  • Turkye se ‘staatsgreep’ lyk na Islamitiese suiweringsveldtog

    Turkye se ‘staatsgreep’ lyk na Islamitiese suiweringsveldtog

    Nagenoeg drieduisend vermeende militêre samesweerders is in Turkye in hegtenis geneem, ná ‘n mislukte staatsgreep Vrydagnag.

    Duisende regters, staatsaanklaers, militêre leiers en soldate is gevange geneem en lasbriewe vir die ander se inhegtenisname is uitgereik.

    Verskeie regsgeleerdes, onder wie tien regters en twee lede van die die grondwethof word ook aangehou in wat deur ontleders bestempel word as ‘n Islamitiese oorname van ‘n sekulêre staat wat deur die president self gelei word.

    Rusland het Turkye vroeër daarvan beskuldig dat hulle ISIS steun deur die internasionale terreurgroep se gesteelde olie te herverkoop.

    Die Turkse president, Tayyip Erdogan het intussen gewaarsku dat daar streng opgetree sal word teen diegene wat die staatsgreeppoging aangehits het.

    Vrese dat Erdogan met mening gaan toeslaan op sy sekulêre teenstanders, het intussen opgevlam.

    Minstens 265 mense is dood toe rebellesoldate Vrydagaand tenks, helikopters en vegvliegtuie ingespan het in ‘n powere poging om Erdogan se regering omver te werp.

    Min van die vereistes vir ‘n suksesvolle staatgreep is egter nagekom en die vermeende poetsjiste het glo selfs gesorg dat die president nie tuis is nie. Hulle het ook geen ander leier in sy plek voorgestel nie.

    Volgens die jongste syfers is 265 mense dood, wat 104 samesweerders insluit.

    Die Amerikaanse president, Barack Obama het intussen sy land se steun aan die Turkse regering herbevestig.

    Die president van die Turks-Suid-Afrikaanse Vriendskapsinisiatief, Abubekir Salim, het die mislukte staatsgreep veroordeel.

    Salim sê hulle sal voortgaan om enige “demokratiese metodes” te ondersteun om die situasie te stabiliseer. Hy het Turkse burgers by die ambassade in Pretoria toegespreek.

    Salim het ook gesê hulle sal “enige verkose regering” in Turkye steun.

    Chaos het ten minste agt uur lank in Istanboel en Ankara geheers terwyl rebelle brûe, die parlementegebou en ander sleutelgeboue probeer beset het.

    Van die soldate wat gevang is, het gesê hulle was onder die indruk dat hulle aan ‘n militêre oefening deelneem.

    Die Turkse president het beroep op Amerika gedoen om Fethullah Gulen, sy eertydse bondgenoot, uit te lewer omrede Gulen glo die staatsgreep “georkestreer” het.

    Gulen het die aantygings met minagting verwerp.

    Erdogan het by sy vakansiebestemming geskuil toe hy op sosiale media ‘n beroep op die publiek gedoen om hom te steun. Duisende Turke het hierop die strate ingevaar om die rebellesoldate te konfronteer.

    Die rol wat moskees regoor die land gespeel het in die mobilisering van Erdogan se ondersteuners soos die staatsgreep ontvou het, was deurslaggewend, maar ook ‘n teken van die ondergang van sekulêre Turkye.

    Honderde Erdogan-ondersteuners het Saterdagaand op pleine, die lughawe in Istanboel en buite sy paleis bymekaargekom om hul steun te wys.

    Turkye, ‘n lid van NAVO met graag deel van die Europese Unie (EU) wil word, is die deurgang vir die miljoene migrante wat jaarliks na die EU stroom.

    Tans pers die president die EU af vir hulpgeld om die migrantestroom onder beheer te hou, maar met die jongste gebeure wat lyk na ‘n gereëlde toneelopvoering om van sekulêres ontslae te raak, kan die immigranteprobleem in Europa verder vererger.

    Onstabiliteit in Turkye, wat as buffer tussen Europa en Sirië dien, kan met die voortslepende vlugtelingkrisis enorme gevolge vir Europa inhou.

    Die Turkse Grondwet is intussen verander om net verwysings na Allah alleen te bevat.

    Gulen het die staatsgreep veroordeel en bygevoeg dat dit aan Erdogan ‘n verskoning bied om met mening op enigeen toe te slaan wat van hom verskil in wat hy as ‘n suiweringsveldtog bestempel eerder as ‘n staatsgreep.

    John Kerry, die Amerikaanse minister van buitelandse sake, het gesê Washington sal met die Turkse owerheid saamwerk, maar dat Gulen nie uitgelewer sal word sonder bewyse dat hy betrokke was nie.

    Kerry het ook verbaas gereageer op hoe onbeholpe die vermeende staatsgreep uitgevoer is.

    Honderde soldate word in Ankara aangehou, onder wie die bevelvoerder wat spesifiek in beheer is van die beveiliging van Turkye se grens met Sirië, Irak en Iran.

    Erdogan se Islamitiese ideologie is in stryd met die weermag, wat al meermale staatsgrepe gebruik het om moderne Turkye se sekulêre grondslag te beskerm.

    Die Franse regering het gewaarsku dat die mislukte staatsgreep nie president Recep Tayyip Erdogan rede gee om van die opposisie ontslae te raak nie.

    Die minister van buitelandse sake Jean-Marc Ayrault het aan die Franse media gesê daar moet binne die raamwerk van die wet opgetree word.

    Vanoggend het die Turkse nuusagentskap gesê bykomende polisiebeamptes is na Istanbul ontplooi in die lig van Vrydag se mislukte staatsgreep.

    Hulle patrolleer die strate en het opdrag gekry om enige helikopter af te skiet wat oor die stad vlieg.

    Die Turkse president oorweeg tans om die doodstraf weer in te stel.

  • Heksejag teen Wouter Basson kos belastingbetaler miljoene

    Heksejag teen Wouter Basson kos belastingbetaler miljoene

    Die raad op gesondheidberoepe sal voortgaan met sy heksejag teen die biologiese oorlogvoeringskenner, Wouter Basson, ten spyte daarvan dat dit die belastingbetaler al R15 miljoen uit die sak gejaag het.

    Basson poog tans om die voorsitter van die Tugkomitee, Professor Jannie Hugo deur die Hooggeregshof aan sy verhoor te laat onttrek.

    Hugo was nie opreg oor sy lidmaatskap van SA Mediese Vereniging nie, een van die 27 organisasies wat ‘n oproep gedoen het vir Basson se verwydering van die rol van mediese praktisyns.

    Hugo het vroeër ‘n aansoek deur Basson om te onttrek weens beweerde vooroordeel van die hand gewys.

    Indien Basson met sy aansoek slaag, sal die ses-jaar-lange tugverhoor teen hom van voor af moet begin.

    Basson is sedert Desember 2013 met Projek Kus verbind. Die saak duur vandag in Pretoria voort.

    Die bekwaamde kardioloog sê hy is skuldig bevind aan onprofessionele gedrag voordat enige getuienis teen hom gehoor is.

    Basson sê hy was reeds skuldig bevind toe sy verhoor in 2007 begin het, omdat die respondente reeds besluit het op sy vervolging,.

    “Dit is duidelik dat die siening van die respondente is dat die blote feit dat ‘n mediese dokter gedurende die 1980’s in die weermag was, onetiese en onprofessionele gedrag verteenwoordig, ten spyte van verpligte wetgewing met dien effekte.”

    Hy het gevra hoe hy ‘n onbevooroordeelde verhoor onder sulke omstandighede kan verwag.

    “Ek was duidelik reeds skuldig in die subjektiewe persepsie van die respondente, voordat enige getuienis aangehoor is,” het hy gesê.

    Open Stellenbosch het ook verlede jaar te velde getrek teen Basson omdat hy klas gee vir vierde jaar mediese studente by Durbanville fasiliteite van die Mediclinic-hospitaalgroep.

  • Stropers in Namibië voer skrikbewind

    Stropers in Namibië voer skrikbewind

    Die eienaar van Emanya Lodge tussen die Etosha Nasionale Park en Oshivelo, sê sy “wil weghardloop” uit moedeloosheid omdat stropers ’n skrikbewind voer en dit lyk of die polisie nie veel daaraan gaan doen nie.

    Dertien van haar 18 swartwitpense van etlike miljoene Namibiese dollar is al deur die stropers doodgeskiet, terwyl sy in die afgelope agt maande ook 35 beeste verloor het, vertel me. Nelie Lewies, wat benewens die lodge ook ’n boerdery bedryf.

    Sondagnag het ’n span wat vermoedelik Maandag ook vyf beeste geslag het op die gasteplaas Sachsenheim van haar bure, mnr. en me. Gerd en Maria Sachse, by die lodge ingebreek en die rekenaarbediener asook al die sekuriteitskameras gesteel.

    “Ek het by my kamervenster uitgekyk en die vier mans gewaar. Toe ek vir hulle skree ‘haai, wat maak julle hier’, het hulle nie eens weggehardloop nie,” vertel Lewies.

    Volgens Maria Sachse het haar man Maandag omstreeks twaalfuur op vier vermeende stropers in die veld afgekom nadat hulle vyf beeste geslag het.

    “Die stropers het gelê en slaap en hy het stilletjies terugbeweeg en my gebel sodat ek die polisie kan ontbied.”

    Sy sê die polisie van Oshivelo het eers vieruur die middag daar aangekom en die stropers het toe al spore gemaak.

    “Een van die polisiemanne het een van die spore geëien as dieselfde spoor wat hulle gewaar het toe hulle vroeër die dag die inbraak by Emanya ondersoek het.

    “Hy het vir ons gesê die mans is gewapen.”

    Volgens haar het die polisie die spore gevolg en in ’n stadium drie mans met vleis by hulle gewaar, maar die mans het hulle glo ontglip.

    Sachse vertel verder dat een van die plaaswerkers verlede jaar deur ’n vermeende stroper met ’n mes in die rug gesteek is. “Ons het die saak by die polisie aangegee, want die man het gedreig om ons dood te maak, maar daar het niks van die ondersoek gekom nie.”

    Lewies sê hulle het verlede jaar een aand in die restaurant by die Emanya Lodge gesit toe stropers lostrek en van die swartwitpense doodskiet. “Die werkers was vreesbevange en het in die wynkelder gaan wegkruip.”
    Ook dié ondersoek het op niks uitgeloop nie, sê sy.

    “Ons voel die weermag moet ingestuur word en die plase skoonmaak. Ons kan dit nie meer hou nie. Ek voel ek wil weghardloop. Aan die een kant baklei ons teen die droogte, want ons het nog nie eens 100 mm vir die seisoen gehad het. En aan die ander kant ly ons onder die strooptogte,” sê ’n moedelose Lewies.

    Dit het haar N$100 000 gekos om haar rekenaarbediener en sekuriteitskameras te vervang. “Ons besoekers is meestal oorsese toeriste. Ons het nou al die inligting verloor van besprekings wat reeds gedoen is. Ek moes dadelik weer hierdie toerusting aanskaf.”

    Bron: Die Republikein

  • Forensiese ondersoek na soldaat by Lohatla se dood

    Forensiese uitslae sal bepaal onder watter omstandighede ‘n Suid-Afrikaanse soldaat, wat tydens die Amani Africa II-oefening by Lohatla in die Noord-Kaap doodgeskiet is, die lewe gelaat het.

    Sersant Sello Modisane, van 21 SA Infanteriebataljon (SAI), is gedood tydens ‘n lokval tussen die bystanddienste en ‘n “rebellegroep”. Hy is van Lenz in Johannesburg.

    Sowat 21 lande, onder leiding van die Afrika-Unie en die Suid-Afrikaanse Nasionale Weermag (SANW) is tans by die leërgevegsopleidingsentrum by Lohatla byeen vir ‘n gereedheidsoefening.

    SANW-woordvoerder, Jaco Theunissen, sê hulle wag vir uitslae om vas te stel hoe Modisane gedood is aangesien daar loskruitpatrone in die wapen moes wees.

    Theunissen sê die SANW betreur die voorval.

    Ammerikaanse bondgenote het die weermagintegrasie van SAOG en Ekonomiese Gemeenskap van Sentraal-Afrika geloof en gesê nou sal Afrika-magte as ‘n eenheid optree sonder hindernisse.

    Die VN sal glo 25% van die koste van ontplooiings dra terwyl die res van die betrokke streek sal afhang.

  • Mugabe lyk oud en afgeleef

    Zimbabwiese diktator, Robert Mugabe, 91, het na bewering Dinsdag tydens dié land se Weermagdag-vieringe besonder moeg en afgeleef gelyk, het News Day berig.

    Volgens dié berig het hy gesukkel om te stap tot by die podium waar hy sy toespraak in minder as 30 minute gelewer het.

    Hy het ook vir ’n paar minute tydens inspeksie van die parade stilgestaan. Net die vorige dag, by die heldeakker, het sy toespraak langer as ’n uur geduur, lui die berig.

    Die swart pimpernel wat reeds sedert die land se onafhanklikwording in 1980 aan bewind is, sê hy is blakend gesond.

    Zanu-PF, Mugabe se party, het vroeër bevestig dat hy weer in die 2018-verkiesing as president verkiesbaar is.

    Volgens die staatsbeheerde Zimbabwe Broadcasting Corporation (ZBC) het Mugabe die Zimbabwiese weermag (ZDF) geprys vir sy “rol om die land se territoriale integriteit, soewereiniteit, maat­skaplike en ekonomiese ontwikkeling te be­skerm”.

    Hy het ook gesê die weermag is die ekonomies geknelde land se trots.

  • Prins vra dat diensplig terugkom

    Brittanje se prins Harry het versoek dat diensplig weer in dié land ingestel word, het Reuters berig.

    Hy sê sy militêre loopbaan het hom en die soldate onder sy bevel gehelp om op die regte pad te bly.

    Die 30-jarige Harry, vyfde in die ry vir die Britse kroon, het aan die Britse Sunday Times gesê sy loopbaan van tien jaar in die Britse weermag het “wonderlike dinge” vir hom gedoen.

    “Bring diensplig terug. Ek ys as ek dink waar ek sonder die weermag sou wees.

    “En nog belangriker, ek het gesien wat dit vir die jong manne beteken.”

    Harry se weermagloopbaan eindig in Junie, nadat hy vroeër vanjaar gesê het hy is by ’n kruispad in sy lewe en dat hy meer koninklike take moet hanteer waarvoor hy nie tyd sal hê as hy ook nog in die weermag is nie.

    Hy het ook gesê dat hy nie nou enige spesiale vriendin in sy lewe het nie en dat hy tevrede is met sy alleenloper­status.

  • Zuma-familie ontken dat hulle in weermag-helikopters reis

    Die presidensie het Sondag ontken dat pres. Jacob Zuma se familie van weermag-helikopters gebruik maak om tussen Durban en Nkandla in KwaZulu-Natal te reis.

    “Die presidensie verwerp die bewerings wat vandag in die City Press gemaak is,” het Mac Maharaj, woordvoerder vir die presidensie, in ʼn verklaring gesê. “Die president se reisreëlings word deur die presidensie getref en dit word duidelik gestel dat die vliegtuig of helikopter bespreek word vir sy gebruik.”

    Volgens hom het die Suid-Afrikaanse Lugmag ook die presidensie in kennis gestel dat geen so misbruik van die helikopters plaasgevind het nie.

    “Die presidensie verwerp die ongegronde en kwaadwillige bewerings in City Press en die departement van verdediging het ons in kennis gestel dat daar geen waarheid in die gerug steek nie, maar die koerant het dit steeds gepubliseer,” het Maharaj gesê.

    “Die presidensie is besorg oor die blatante verslaggewing van so onwaarheid, en die doel kan slegs wees om by te dra tot die stereotipering van die president en sy familie.”

    Die City Press het Sondag berig dat die lugmag die bystandhelikopterdiens opgeskort het wat vir Zuma se familie en vriende tussen Durban en Nkandla gebruik is.

    Die Oryx-helikopter van 15 Eskader, wat gewoonlik saam met Zuma se weermagondersteuning vlieg, is opgeskort weens ʼn gebrek aan fondse, volgens berigte.

    Die koerant het berig dat bronne gesê het die spesialeondersoekeenheid het die beweerde misbruik begin ondersoek.

    Volgens die berig is die bystand-Oryx, waarvoor die presidensie R63 000 per uur aan die weermag betaal in plaas van die gewone R70 000 kommersiële tarief, glo gebruik deur familie en vriende in plaas van veiligheidspersoneel.

    Zuma se lyfwagte is glo ‘n “paar keer” gedwing om die reis van drie ure te onderneem.

    Die presidensie het gister gesê Zuma se familie het nie alleen militêre helikopters gebruik om te reis tussen Durban en Nkandla nie.

    ‘n Eggenoot of kind mag saamvlieg indien die president self per helikopter reis, maar nie alleen nie.
     

  • Kommer dat weermag nie uitslag in Lesotho aanvaar nie

    Dit is nie seker of adj.pres. Cyril Ramaphosa se pogings om stabiliteit in Lesotho te bewerkstellig, suksesvol sal wees nie.

    Rama­phosa is deur die Suider-Afrikaanse Ontwikkelingsgemeenskap aangewys om as hooffasiliteerder op te tree wat tot die verkiesing gelei het.

    Terwyl die ver­kiesing Saterdag vreedsaam verloop het en die leiers van die vier die grootste partye aan internasionale waarnemers die versekering gegee het dat hulle wel die uitslag van die verkiesing sal eerbiedig, bestaan kommer dat senior weermagoffisiere nie die uitslag sal aanvaar nie.

    Mothetjoa Metsing van die Lesotho Congress of Democrats (LCD), die party wat Lesotho tussen 1993 en 2012 regeer het, geniet steeds steun onder senior weermagoffisiere, terwyl premier Tom Thabane, van die All Basotho Convention, homself voortdurend teen die weermag verset.

    Sy herverkiesing kan dus tot geweld lei. Hy het gewaarsku dat Lesotho nie ‘n “eiland” is nie en moet kennis neem van die wense van SAOG.

    Thabane het die weermaghoof, lt.genl. Thali Kamoli, vroeër van sy pos onthef en sy afdanking het uiteindelik tot die mislukte staatsgreep gelei toe soldate wat ‘n polisiekantoor in Maseru aangeval het, Thabane se huis bestorm het, en die premier gedwing het om na Suid-Afrika te vlug.

    Thabane het onderneem om die aanstigters van die mislukte staatsgreep in Augustus verlede jaar te vervolg, wat die moontlikheid van geweld na die verkiesing verhoog.

    Indien geen party ‘n volstrekte meerderheid behaal nie, sal partye tot koalisiesamesprekings gedwing word.

    Intussen loop die party van Thabane ver voor, selfs in wyke waar sy teenstander tradisioneel goed gevaar het.

    Die stemme word nie elektronies getel nie, maar met die hand, het ‘n OVK-amptenaar Rethabile Pholo gesê.

    Volgens die plaaslike media, het sowat 1,2 miljoen mense – uit ‘n bevolking van 2,2 miljoen – geregistreer om te stem.

  • Zuma loof Weermag oor landelike veiligheid

    President Jacob Zuma het lede van die Suid-Afrikaanse Nasionale Weermag wat saam met die polisie gewerk het, geloof vir die “sukses” van die Landelike Veiligheidstrategie.

    Dié strategie word tans landwyd by 117 polisiestasies geïmplementeer om veiligheid en sekuriteit in landelike gebiede en in die besonder in landbougebiede te bevorder.

    Zuma het die Gewapende Magtedag-vieringe in Potchefstroom in Noordwes bygewoon. Die Leër, Lugmag, Vloot en Mediese Gesondheidsdienste was deel van die verrigtinge wat in 2012 as ‘n jaarlikse instelling afgekondig is.
     
    Hy het die bydrae van soldate in anti-misdaad-oorgrensoperasies hoog aangeskryf. Die SANW is in dertien sub-eenhede ontplooi ter ondersteuning van Operasie CORONA in Limpopo, Mpumalanga, KwaZulu-Natal, die Vrystaat, Oos-Kaap, Noord-Kaap en Noordwes.
     
    Zuma het gesê die Operasie is ‘n groot sukses aangesien daar op onwettige wapens beslag gelê is, asook gesteelde voertuie en vee.

    Minister Nosiviwe Mapisa-Nqakula het voor die verrigtinge uitgewei oor die weermag se beleidshersiening wat tans sloer.

    Sowat R11-miljoen is aan die hersieningsbeleid vir die weermag spandeer. Van die voorstelle wat in die 380-blad verslag gemaak is, is dat die weermag sy begroting verdubbel na R88-miljoen.

    Die regering wil die Suid-Afrikaanse Weermag aanwend om werkloosheid onder swartes aan te spreek. Zuma het gesê jongmense word in ‘n verskeidenheid beroepe opgelei wat van ingenieurswese tot kommunikasie insluit.

    Die program word in samewerking met die Departement van Landelike Ontwikkeling en Grondhervorming aangebied en staan bekend as die Nasionale Landelike Jeugdienskorps.

    Die vieringe is ter herdenking aan 21 Februarie 1917 toe sowat 600 Suid-Afrikaanse soldate dood is toe die hulle skip – die SS Mendi – gesink het. Daar was meestal swart soldate op die skip wat in die Eerste Wêreldoorlog in Frankryk geveg het.

    Die SS Mendi het in die Engelse kanaal gesink nadat dit teen ‘n ander skip gebots het. President Zuma het verskeie soldate vereer vir hulle rol in die Weermag en ook in lande soos die DRK en die Kongo.

  • Zille verdedig geheime SAID-eenheid

    Die Presidensie het ten sterkste beswaar gemaak teen bewerings van die DA-leier, Helen Zille oor die president se verbintenis met die inkomstediens.

    Zille het president Jacob Zuma verbind met die skorsings van amptenare van die Suid-Afrikaanse Inkomstediens.

    Volgens die Presidensie is haar pogings om die president daarmee te verbind, moedswillig. Klaarblyklik wil sommige koerante Zuma ook by die saak insleep.

    Die Presidensie sê die president is nie gemoeid met enige van die bewerings wat teen die geskorste lede gemaak word nie.

    Zille het in haar jongste nuusbrief gesê Zuma is “dalk” besig om die SAID oor te neem om homself en die ANC teen die betaling van belasting te beskerm.

    Sy sê die huidige konflik in die diens het ontstaan nadat Zuma Tom Moyane in September as die nuwe kommissaris aangestel het.

    Moyane het vroeër vandeesmaand die adjunk-kommissaris Ivan Pillay en die hoof van strategie, Peter Richer afgedank.

    Onder die leiding van dié twee figure, het hulle glo toegelaat dat SAID afgepers word om R3 miljoen te betaal om stil te bly oor die geheime intelligensie-eenheid wat Zuma se private huis in Forest Town, Johannesburg dopgehou het en meeluistertoestelle geplant het.

    Sulke optrede is onwettig want dit oortree die Nasionale Strategiese Intelligensie Wet wat bepaal dat alleen Suid-Afrika se weermag, polisie en intelligensie-strukture geheime intelligensie mag insamel.

    Die spioen, bekend as “Skollie”, wie se regte naam aan die Sunday Times bekend is, was die hoof van SAID se koverte Spesiale Projekte Eenheid, later hernoem na die National Research Group.

    Zille het die bestaan van die geheime eenheid in die Inkomstediens verdedig en gesê dit het duidelik geword dat Zuma nie wil hê die diens moet ondersoek instel na sy belastingsake nie.

  • Spuende generaal wat wittes haat kos SANW halfmiljoen

    Die hooggeregshof in Kimberley het beslis dat swart weermaglede adjudant-offisier At Malan onregmatig in hegtenis geneem en aangerand het omdat hy sy werk gedoen het.

    Hy is deur die weermaglede aangerand en daarna weer deur ‘n swart vroue brigadier-generaal wat aan hom gesê het dat sy wittes haat terwyl sy op die grond langs hom gespuug het.

    Dié siviele saak wat meer as vier jaar geduur het, kan die Suid-Afrikaanse Weermag sowat ‘n halfmiljoen rand kos.

    Dit volg na ‘n hofuitspraak dat lede in die weermag se topstruktuur onregmatig opgetree het en hulle mag misbruik het.

    Die brigadier-generaal wat by die voorval betrokke was, is glo ‘n kandidaat om die nuwe hoof van die leër te word.

  • SANW in ‘kritieke verval’

    SANW in ‘kritieke verval’

    sandf
    ‘n Kritieke gebrek aan modernisering

    Suid-Afrika se gewapende magte is volgens ‘n militêre strategie-oorsig in kritieke verval wat minstens ‘n dekade nodig sal hê om omgekeer te word.

    Volgens Reuters kan die agteruitgang in die land se verdedigingsvermoë ‘n invloed hê op alles van grensveiligheid tot handel- en vredessendings op die vasteland.

    Dit kan ook beteken dat binnelandse veiligheid nie verseker is nie, maar die verslag is onheilspellend stil daaroor.

    Suid-Afrika het op die oomblik soldate in die Demokratiese Republiek van die Kongo en Soedan, en sy skepe ondersteun anti-seerowerpogings naby die kus van Mosambiek.

    In die Suid-Afrikaanse Verdedigingsoorsig van 2014 word gesê sulke ontplooiings word ook bedreig.

    Volgens die verslag is daar ‘n gebrek aan behoorlike ammunisie, verouderde militêre vragvliegtuie en uitgediende toerusting soos vragmotors.

    In die verslag word ook daarop gewys dat die gebrek aan fondse die modernisering van ‘n gewapende mag van 97.000 lede terughou.

    Sonder meer geld, kan Pretoria se diplomatieke en kommersiële uitbreiding in Afrika misluk, waar die ou koloniale magte soos Frankryk, en ‘n nuwe een soos China teenwoordig is.

    “Daar moet óf ‘n groter begrotingstoewysing of ‘n aansienlik afgeskaalde vlak van ambisie en toewyding wees,” lui die verslag.

    Massiewe beleggings in swaar wapenvermoë, asook die handhawing van vrede in hoë-risiko situasies moet oorweeg word.

    Kenners het gesê dit beteken Suid-Afrika se aanvalshelikopters en tenks moet aandag geniet.

    Dit kan die militêre begroting na R74 miljard in 2030 van sowat R40 miljard in 2013 byna laat verdubbel.

    Dit is gelykstaande aan sowat 1% van die BBP , ‘n verhouding ver onder ander ontwikkelde en ontwikkelende lande.

    Militêre veiligheid benodig volgens die verslag die jaarlikse befondsing van R116 miljard of 3,3 % van die bruto binnelandse produk.

    Onder apartheid was Suid-Afrika het een van die mees gevreesde gewapende magte op die vasteland, maar die hele militêre kompleks het intussen in duie gestort na ‘n doelbewuste gesamentlike poging van die NP en ANC om dit tot niet te maak.

    Die ontplooiing van die Suid-Afrikaanse Weermag wat aan anti-seerowery-operasies naby die kus van Oos-Afrika deelneem, is intussen vir nog ‘n jaar verleng.

    Altesaam 220 lede van die Weermag is aktief in die Mosambiekse en Tanzaniese gebiedswaters.