korrupsie – Bladsy 10

SOE-hoof wat Zuma kwytskeld, bedank

Die Presidensie het bevestig dat hy die hoof van die Spesiale Ondersoek-Eenheid, Vas Soni, se bedanking ontvang het.

Terwyl Soni aan die hoof van die Spesiale Ondersoekeenheid was het die eenheid die President kwytgeskeld van oorbesteding by sy privaatwoning in Nklandla.

President Jacob Zuma sê in ‘n verklaring dat hy Soni se bedanking aanvaar, maar dat dit ‘n verlies is omdat Soni goeie werk gedoen het. Soni is in Augustus 2013 deur President Zuma aangestel.

Hy het Maandag aangekondig dat hy bedank om meer tyd saam met sy vrou, wat siek is, deur te bring. Zuma het Soni en sy vrou sterkte toegewens.

Volgens Zuma het Soni die Ondersoekeenheid verander in ‘n effektiewe instrument in die stryd teen wanadministrasie en korrupsie.

Soni het gesê sy werk was baie stresvol. “Ek dink dit was stresvol en dit is ‘n ernstige uitdaging … Ek het amper my hele loopbaan in die private sektor spandeer en het nie besef wat ‘n uitdaging dit is om in die openbare sektor te werk nie,” het hy in ‘n onderhoud met eNCA gesê.

Soni het aangedui dat hy weer in die private sektor sal werk. Hy het vroeër gesê korrupsie en wanadministrasie skep “groot probleme” in die land.

Twee metropolisielede in omkooplokval gevang

Twee Tshwane-metropolisiebeamptes is in kennis gestel dat hulle geskors kan word hangende ‘n ondersoek nadat hulle glo omkoopgeld van Yusuf Abramjee, hoof van die teenmisdaadveldtog Crime Line, geëis het.

‘n Lokval is glo vir die beamptes gestel. Die twee beamptes moes ‘n spoedkamera in Centurion beman. Hulle was nie veronderstel om motoriste van die pad af te trek nie maar slegs met die kamera spoedoortreders af te neem en boetes dan later per pos uit te reik.

Volgens ‘n woordvoerder van die Tshwane-metropolisie het Abramjee Maandag die owerhede in kennis gestel dat die twee beamptes hom van die pad af getrek het en omkoopgeld geëis het. Hy het geweier om te betaal en die beamptes het hom laat gaan.

“Die beamptes het egter motoriste van die pad af getrek en aan motoriste gesê hulle moet omkoopgeld betaal sodat hulle nie later ŉ boete ontvang nie,” het die woordvoerder aan Sapa gesê.

Hulle het R200 gevra.

Die twee beamptes is onmiddellik in hegtenis geneem. Daar is R1 200 by een van die beamptes gevind en R710 by die ander beampte. Hulle kon nie rekenskap gee van die geld nie, vermoedelik omdat dit omkoopgeld was.

Die twee beamptes het intussen kennisgewings van skorsing ontvang.

Hulle sal sewe dae hê om daarop te antwoord voor ŉ besluit geneem sal word oor of hulle geskors moet word.

Zuma-trust se stigter slaan R406 miljoen se vlootkontrakte los

‘n Stigter van die Friends of Jacob Zuma-trust is voorsitter en mede-eienaar van ‘n maatskappy wat vlootkontrakte ter waarde van R406 miljoen ontvang het, berig die Sunday Times.

Don Mkhwanazi het ontken dat sy verbintenis aan die president gehelp het met die toeken van kontrakte aan ‘n maatskappy waarvan hy 48% se aandele besit.

“Die president ken nie tenders toe nie,” het Mkhwanazi skriftelik aan die Sunday Times gesê. “Enige verhouding met die president kan nie gekoppel word aan enige kontrakte wat deur ŉ openbare tenderproses toegeken is nie.”

Die koerant berig dat die departement van verdediging skipinstandhouding en -herstelwerk uitgekontrakteer het aan Southern African Shipyards, die privaatmaatskappy waarvan Mkhwanazi mede-eienaar is.

Die maatskappy het glo die afgelope drie jaar reeds ses multi-miljoen rand se kontrakte ontvang.

Transnet het in Augustus ook ‘n kontrak ter waarde van R1.4 miljard aan Southern African Shipyards toegeken vir sleepbote.

Mkhwanazi, wat al sedert 2006 ŉ aandeelhouer in Shipyards is, was tussen 2010 en 2012 ‘n direkteur by Transnet. Hy het gesê die sleepboot-kontrak is aan die maatskappy toegeken twee en ŉ half jaar nadat sy termyn as direkteur van Transnet verstryk het.

Slegs een van die vier frigatte en een van die drie duikbote wat tydens die land se wapentransaksie gekoop is, steeds operasioneel is.

Die regering het in 1999 onder meer 26 Gripen-vegvliegtuie vir die lugmag en frigatte en duikbote vir die vloot aangekoop onder ‘n wolk van korrupsie.

LP’s eis dat SABC-voorsitter afgedank word

Die parlementêre portefeuljekomitee oor kommunikasie het Woensdag besluit dat Ellen Tshabalala, SABC-voorsitter, uit haar amp verwyder moet word.

‘n Ondersoek deur die komitee of Tshabalala oor haar akademiese kwalifikasies gelieg het, het haar skuldig bevind op twee aanklagte van wangedrag. “Ons beveel aan dat sy uit die SABC se raad as voorsitter en raadslid verwyder moet word,” het Joyce Moloi-Moropa, voorsitter van die komitee gesê.

Tshabalala het 14 werksdae om te reageer op ŉ verslag wat die komitee se bevindinge en aanbevelings bevat. Die verslag en Tshabalala se repliek sal aan die Nasionale Vergadering gestuur word vir goedkeuring.

Slegs president Zuma kan haar uiteindelik afdank.

Intussen sal LP’s die speaker versoek om Zuma skriftelik te vra om haar onmiddellik te skors.

Die komitee het sy beslissing gemaak nadat ‘n UNISA-amptenaar aan die ondersoekspan dokumente voorgelê het oor die gebrek aan Tshabalala se akademiese prestasie.

Sy het vir ‘n BComm-graad en ‘n diploma in arbeidsverhoudinge geregistreer, maar het geen van die kwalifikasies behaal nie.

Jan van Wyk, uitvoerende direkteur van Unisa, het getuig dat Tshabalala in 1988 en 1996 vir haar BComm-graad geregistreer het, maar nie haar studies voltooi het nie. Volgens UNISA het sy in 1995 vir ŉ diploma in arbeidsverhoudinge geregistreer.

Tydens haar akademiese jaar het sy twee modules geslaag, twee gedruip en nie eksamen afgelê vir twee van die modules nie.

In Januarie 1996 kon sy aan ŉ hereksamen deelneem vir die twee modules wat sy nie die vorige jaar afgelê het nie.

Sy het 13% behaal vir die menslikehulpbronne-module en 35% vir arbeidsverhoudinge. Unisa het toe ‘n brief aan haar geskryf om aan te dui dat sy nie kwalifiseer om weer die kursus te doen nie. “Die brief sê dat sy so swak gevaar het dat sy nie weer toelating sal kry nie,” het Van Wyk uitgewys.

Tshabalala is skuldig bevind op twee aanklagte van wangedrag. Die een klag hou verband met inligting op haar CV dat sy die twee kwalifikasies behaal het toe sy aansoek gedoen het vir haar pos as voorsitter van die SABC.

Die tweede klag is in verband met ‘n beëdigde verklaring wat sy afgelê het en by die parlement ingedien het waarin sy beweer haar kwalifikasies is tydens ‘n diefstal uit haar huis gesteel. Sy was nie Woensdag by die ondersoek teenwoordig nie.

Michael Tillney, vir Tshabalala, het vroeër sy kliënt se verklaring aan die komitee voorgehou waarin sy “prosedurele onbillikheid” as rede vir haar afwesigheid aanvoer.

Sy het onskuldig gepleit, maar dit is van die hand gewys.

Gautrein-werknemer pleeg glo bedrog van miljoene

‘n Voormalige swart werker van die Gautrein se bestuursagentskap is op ‘n reeks aanklagte, insluitend bedrog, in hegtenis geneem, het RSG berig.

Die woordvoerder van die Valke, Paul Ramaloko sê hulle het die 30-jarige man by sy huis in Ga-Rankuwa, noord van Pretoria, aangekeer.

Ramaloko sê die verdagte se kontrak by die agentskap is twee weke gelede opgeskort nadat ‘n interne ondersoek bevind het dat hy waarskynlik betrokke was by verliese van miljoene rand by die agentskap.

Die man verskyn vandag in die Johannesburgse gespesialiseerder handelsmisdaadhof. Nog mense kan aangekeer word.

Omkopery en bedrog groei die vinnigste

Omkopery en bedrog is die ekonomiese misdade wat die vinnigste groei in Suid-Afrika sedert 2011, het RSG berig.

Dit is volgens die wêreldwye ekonomiese misdaad-opname wat onlangs uitgereik is.

Die kwessie sal van die fokuspunte wees tydens die Internasionale Bedrog-week wat van die sewentiende van die maand af in die Vrystaat aangebied word.

Deel van die veldtog is die bewusmaking van die stryd teen bedrog in die private- en openbare sektor.

PriceWaterhouseCoopers se senior bestuurder vir forensiese- en risiko-dienste, Hjalmar Gerber sê om die probleem te takel, moet daaroor gepraat word.

Taakspan sal glo onderwyspos-bedrog oopvlek

Die Departement van Basiese Onderwys het bekend gemaak dat ‘n taakspan begin het om die beweerde verkoop van onderwysposte te ondersoek.

‘n Woordvoerder van die Departement, Elijah Mhlanga, sê verskeie onderhoude is reeds gevoer, het RSG berig.

Minister Angie Motshekga het die span op die been gebring na talle gerugte dat amptenare, insluitende van vakbonde, poste verkoop.

Die span se opdrag is in Junie gefinaliseer. Die duur van die ondersoek sal bepaal word nadat die omvang van die probleem vasgestel is. ‘n Verslag sal daarna aan die Minister voorgelê word.

Vroeër vanjaar het gerugte die ronde gedoen dat lede van die vakbond SADOU poste vir hoofde- en adjunkhoofde vir soveel as R30 000 elk verkoop het.

SADOU het herhaaldelik enige betrokkenheid daarby ontken.

Die vakbond se sekretaris-generaal, Mugwena Maluleke, het gesê individue wat SADOU se naam misbruik, was betrokke by die bedrogspul.

Die Nasionale Kongres van Skoolbestuursliggame het in Mei vanjaar gesê hy is van mening dat verskeie vakbonde by die beweerde poste-bedrogspul betrokke kan wees.

‘PW het niks vir eie gewin gedoen nie’

Oudpres. PW Botha het geweier dat belastinggeld vermors word om ’n ondergrondse bunker by sy aftreehuis in Wildernis te bou.

Barbara Botha, sy weduwee, het pres. Jacob Zuma se bewering dat die staat destyds die lughawe in George gebou het omdat Botha daar gewoon het, as snert afgemaak.

Botha se weduwee het aan Media24 vertel dat daar planne opgetrek was om ‘n bunker by Die Anker, die Bothas se aftreehuis in Wildernis, in te rig as ‘n veiligheidsmaatreël.

“Hulle het gesê die departement is besig om ondergrondse kamers by verskeie BBP’s se huise regoor die land in te rig, maar PW het net geweier. Hy het gesê dit is ’n mors van geld,” het sy gesê.

Botha het Die Anker eers in die laat sewentigs gekoop ná die besluit om die lughawe te bou, reeds geneem is.

Vandag gebruik meer as 560 000 passasiers jaarliks die lughawe.

“PW het niks vir eie gewin gedoen nie,” het sy weduwee ontstoke gesê.

Luidens die Hansard het Lourens Muller, destydse minister van vervoer, op 8 Februarie 1977 in ’n parlementêre antwoord gesê die lughawe word gebou deur die Suid-Afrikaanse lugmag, die departement van openbare werke en die departement van vervoer “vir die verskaffing van ’n meer gereelde en gerieflike lugdiens tussen gemeenskappe in die Suid-Westelike distrikte en die res van die Republiek asook vir strategiese verdedigingsdoeleindes.”

Die regering in Maart 1973 besluit om die lughawe te bou en dit is in Junie 1977 voltooi.

Daar is oorweeg om die lughawe in Oudtshoorn te bou, maar “uit ’n praktiese en veiligheidsoogpunt” is daar op George besluit, het Muller gesê.

Frans Swarts (94), SAL-hoof toe die lughawe gebou is, het aan Media24 gesê vlugte het destyds gesukkel met weerstoestande in Kaapstad en kon weens lae wolke nie in Kaapstad land nie. Daar was nie vandag se moderne toerusting om sulke hindernisse te oorkom nie.

Vlugte moes noodgedwonge dan in Bloemfontein land en dus was die lughawe in die Suid-Kaap ‘n noodsaaklikheid om ’n alternatiewe landingsplek te hê wanneer Kaapstad nie beskikbaar was nie.

Hennie Smit, wat van 1981 tot 1983 LPR vir George was en later vir Botha as LV vir George opgevolg het, het gesê daar was geen druk van Botha se kant om die lughawe te bou nie.

“Inteendeel, hy (Botha) het destyds ’n onafhanklike komitee aangestel om te kyk waar die beste plek is om die lughawe te bou. Daar is gekyk na Mosselbaai, George en Oudtshoorn. Verskeie faktore, waaronder veiligheidsoorwegings en weersomstandighede, is in ag geneem.”

Volgens Smit wou Botha gehad het dat die lughawe na die destydse minister van vervoer, Louwrens Muller, vernoem word.

Nkandla is ’n privaatwoning en die lughawe is in staatsbesit, het kritici gesê.

Rooftogte by winkelsentrums styg 142% en polisie is ‘verlore’

Korrupsie, wanadministrasie en ‘n gebrek aan inligting kortwiek die stryd teen misdaad, het sprekers gister by ‘n konferensie oor misdaadvoorkoming gesê. Die hoof van die spesiale ondersoekeenheid, adv. Vas Soni, het sover gegaan soos om te vereis dat alle bates wat deur misdadigers verkry word, onteien behoort te word.

Volgens ‘n ander spreker by die konferensie, dr. Johan Burger van die Instituut vir Sekerheidstudies, het rooftogte by winkelsentrums binne ‘n jaar meer as verdubbel. Trouens, die persentasiestyging in dié misdaadkategorie is ‘n skrikwekkende 142%.

Burger het veral die polisie se misdaadinligtingseenheid gekritiseer vir hul gebrek aan inligting oor dié tipe misdaad: “Sonder intelligensie is ons verlore (by die aanpak van dié misdade), maar ons misdaadintelligensie sukkel. Dit is duidelik dat diewe iets nuuts gekry het om op te fokus.”

Soos wat privaatveiligheidsmaatskappye sekere vorme van misdaad moeiliker maak, verskuif misdaadaktiwiteit na ander terreine.

“Misdadigers kyk na hul risiko’s en kyk waar hulle meer wins kan maak teen minder risiko,” sê dr. Johan Burger. Hy vind die neiging vir misdaad om jaarliks toe te neem “kommerwekkend” en voeg by: “Ons moet bekommerd wees; ons moet antwoorde kry.”

Soni het voorts gesê dat “Suid-Afrikaners ongeduldig is as dit by korrupsie kom”. Sy eenheid is veral betrokke by die bekamping van korrupsie en omkopery.

Hy meen dat wanadministrasie en korrupsie ‘n bedreiging vir demokrasie inhou omdat dit die regstaat ondermyn.

Dit is egter nie meer genoeg om die oortreders van korrupsiewette in die openbaar uit te wys en skaam te maak nie.

“Die afgelope 20 jaar van ons demokrasie het genoegsaam gewys dat dit nie genoeg is om diegene wat van korrupsie verdink word in die openbaar te beskaam nie,” sê Soni

Baie meer as net openbare hoon is nodig. “Ons het ’n skaamtelose geslag geword.”

Die openbare beskermer Thuli Madonsela en Emiritusaartsbiskop Tutu het insgelyks die konferensie toegespreek.

Tutu het die polisie bedank dat hulle hul lewens waag om Suid-Afrikaners te beskerm, terwyl Madonsela ‘n beroep op Suid-Afrikaners gedoen het om teen korrupsie te verenig.

Groen-aanbieder verras deur Rwanda

Dave Pepler is die aanbieder ‘n natuurprogram Groen, op TV. Hy skryf uit Rwanda:

Hulle president in Rwanda, sê die mense met trots, wil hê hulle moet gesond wees deur baie groente te eet. Geen oorgewigprobleme nie en baie min diabetes.

Geen outomatiese besproeiing, slegs leivore waaruit die kinders ritmies per plastiekemmer die lande natmaak. Reusesakke aartappels word deur kinders van ongeveer 12-14 jaar per fiets mark toe aangery . Jy kan jou oë nie glo nie.

Ons het gemerk dat almal lig oranje “Crocs” dra. Hulle verduidelik hulle president voel as jy skoene aan het, het jy waardigheid. Elke Rwandees wat nie skoene het nie, kry by die regering crocs. Die skoene word dan by plaaslike markte vervang met nuwes teen ’n lae prys.

Ons was die laaste Saterdag van die maand daar. Alle winkels, banke, kafees en net mooi alles is toe . Dit is “we clean our country”- dag. Vanaf die president tot elke kind wat kan, maak skoon, verf huise, vee strate, en ons het mense gesien wat op lang brandweer-tipe lere die lamppale skrop, en mense wat padtekens was. Ons laat ons vertel dat President Kagame en sy seuns saam skoonmaak op straat.

Nie een kind het ooit by ons gebedel nie. Hulle kom nuuskierig nader en vra: “Where are you from? Welcome to Rwanda.” Vra nooit vir iets nie.

Interessant . . . hulle praat sag met mekaar, nooit ’n skreeuery nie. In winkels is gedempte geluide hoorbaar, nooit luid nie.

As die politieke wil daar is, en korrupsie is uitgeroei, is enige iets moontlik.’n Merkwaardige ondervinding.

Pepler is verras deur dié Afrikaland:

Na al die jare ken julle my mos as een van die aarde se mees deurweekte bitterbekke, en ook as uitgesproke sinikus. Ek beskou die meeste mense as reddeloos verlore, oninteressant en gewetenloos, en dit geld veral vir die inwoners van onse kontinent. Bykans elke stad in Afrika is ‘n nagmerrie van besoedeling, onvoltooide projekte, opdrifsels van vuilgoed en lugbesoedeling. Chaotiese verkeer, onpadwaardige voertuie en varkagtige gedrag van bestuurders bevestig elke keer dat hier geen beplanning is nie, dat elke mens eenvoudig net vir homself sorg, en dat omgee vir jou medemens nie meer bestaan nie.

En toe, ‘n paar dae gelede, land ek vir die eerste keer in my lewe met ‘n groepie eko-toeriste van Live the Journey in Kigali, die hoofstad van Rwanda. Toe ons by die lughawe uitry, het dit dadelik doodstil in ons bus geword, en almal het sprakeloos na buite gestaar en eers minute later tot hul sinne gekom. Dis nou drie dae later, en steeds kan my gaste nie uitgepraat raak nie – in die stede, langs die nasionale paaie is daar nie ‘n stukkie papier of rommel te bespeur nie. Net waar jy kyk is daar groot plakkate wat uitroep: Keep our Country Clean! Reg deur die land tel mense rommel op, vee stof en blare op hopies en sny heinings netjies.

Maar dit hou nie by netheid op nie, dis net die begin van een van die mees verrassende en verfrissende sosiale rewolusies wat ek al ooit gesien het. Mens kan jou beswaarlik indink dat, so onlangs soos 1994, Rwanda betrokke was in een van die mees skrikwekkende volksmoorde in die geskiedenis van die mensdom. Die slagting was op ‘n byna ondenkbare skaal en het mens laat dink aan die gruwels van die Middeleeue. Uit die puin van vernietiging en ondenkbare lyding het die leiers van die land besluit om die herstel tot vrede en welvarendheid opnuut aan te pak. Die eerste teiken was korrupsie, en binne twee jaar het hulle dit wortel en tak uitgeroei deur eenvoudig lokvalle vir korrupte amptenary te stel en hul brutaal uit die sisteem te boender.

Die boodskap was klokhelder – indien ons land wil groei met vertroue, moet ons saamstaan teen misbruik en diefstal. Alle motorfiets-bestuurders wat ‘n taxidiens bedryf, dra ‘n veiligheidshelm met ‘n spaarhelm vir die passasier. By taxi-staanplekke staan almal netjies in ‘n ry en wag hul beurt geduldig af. Ek is stomgeslaan oor die orde in hierdie land.

Sodra jy die stad verlaat, sien jy verder tekens van innoverende denke om landbouproduksie op te stoot, mense te laat saamwerk in kooperasies en om die produkte teen regverdige pryse te bemark. Nuwe damme word gebou vir visplase met hoender- en haashokke bo die water. Die mis val in die water, die water word verryk en so word die visse vinniger groter as gevolg van die alge wat in die vrugbare water groei. Daar is byeplase, landerye vol piritieen vir die produksie van organiese en eko-vriendelike insekdoder, en mielielande wat die Vrystaat sal laat bloos.

Hiermee wil ek net dit sê, waar daar ‘n gesonde politieke wil is, is daar ‘n menslike en beskaafde weg. Dit maak my triestig om te sien dat die politieke bestel in Suid Afrika uitsluitlik gefokus is op selfverryking terwyl ons hierdie lieflike voorbeeld aan eie deur het. Ek voorspel dat die geskiedenis ons gaan verdoem en Rwanda gaan verheerlik. Laat die wat oë het om te sien en ore het om te hoor, nou kennis neem van die suksesse van Rwanda.

Sakelui gaan Nkandla-geld betaal

‘n Groep Durbanse sakelui wat aangebied het om ‘n gedeelte van die geld terug te betaal wat aan opknappings aan President Jacob Zuma se privaatwoning op Nkandla bestee is, meen die land moet van die saak af aanbeweeg.

Die Openbare Beskermer, Thuli Madonsela het in haar verslag bevind dat die president en sy familie onregmatig uit die opgraderings voordeel getrek het, het RSG berig.

Die projek het meer as R200 miljoen gekos en Madonsela het aanbeveel dat Zuma van die koste dra.

Die voorsitter van die groep, wat as die Public Members Unit Team bekend staan, Vumelani Mchunu sê hulle wil eerder daarop fokus om saam met die president ‘n beter Suid-Afrika tot stand te bring as om op een kwessie te hamer.

Die groep sê hulle gaan fondse begin insamel sodra daar op ‘n gepaste bedrag besluit is.

‘Hani-moord om wapenomkopery toe te smeer’

Terry Crawford-Browne het Woensdag beweer dat die moord op Chris Hani in 1993 verband hou met die korrupte wapenstransaksie.

Hani wou glo die betrokkenheid van Joe Modise bloot lê. Modise sou later minister van verdediging word.

Hoewel Hani vermoor is voordat Modise die minister van verdediging geword het, en ses jaar voor die kontrakte vir die verskaffing van militêre toerusting onderteken is, sê Crawford-Browne hy glo die moord was gekoppel aan die wapentransaksie.

As getuie voor die wapenaankopekommissie in Pretoria, het Crawford-Browne gesê daar is bewerings dat Janusz Walus, wat Hani vermoor het, in diens was van die Britse wapenmaatskappy BAE Systems.

“In daardie scenario, was die betrokkenheid van Clive Derby-Lewis bloot misleiding om die wit regses te blameer, en so die aandag van die Britse wapenbedryf af te lei,” het Crawford-Browne gesê.

Die tweede adjunk-sekretaris van die SAKP, Solly Mapaila, het gister gesê dat hoewel die party Crawford-Browne se getuienis met agterdog bejeën, hoop hulle om meer uit te vind oor Hani se dood deur met hom te gesels.

“Hoekom het hy stilgebly met sulke inligting, terwyl ons gevra het vir ‘n ondersoek na Chris Hani se dood? … Ons sal hom vra of hy bewyse het want ons kan dit nie net [summier] ignoreer nie,” het Mapaila gesê.

Crawford-Browne het ook intussen beweer dat Winnie Madikizela-Mandela vertroulike wapentransaksie dokumente uitgelek het. Die ANC het die bewerings ontken.

Gister het hy gesê dit is bekend dat daar ‘n aansienlike vyandigheid tussen Modise en Hani was wat dateer uit hul tyd in ballingskap.

Crawford-Browne het gesê hy is vertel deur Bheki Jacobs, ‘n belangrike bron van inligting oor die beweerde korrupsie in die wapentransaksie, dat Modise vergiftig is, en dat die gesamentlike ondersoekspan se verslag oor korrupsie in die wapentransaksie gedokter is voor Modise se dood.

Jacobs het gesê Modise se dood sou lyk na kanker. Jacobs is self aan kanker oorlede in 2008.

In sy kruisondervraging, het Jaap Cilliers SC wat vir Fana Hlongwane verskyn en Crawford-Browne uitgedaag om te bewys dat die Britse regering lank reeds aandadig is aan omkopery deur BAE Systems.

Verskeie bronne beweer dat die sakeman Hlongwane miljarde betaal is aan kommissies wat verband hou met die wapenaankope, kommissies wat hy steeds namens sekere hoë amptenare en politici bestuur om hulle die verleentheid te spaar.

Crawford-Browne beweer die Britse sekretaris vir handel en nywerheid Patricia Hewitt het, in Junie 2003, erken dat BAE Systems omkoopgeld betaal het om kontrakte in Suid-Afrika te verseker.

Hy het gesê bewyse het getoon dat Barclays Bank van Engeland die verkryging van die BAE Hawk en die BAE/Saab Gripen-vegvliegtuie gefinansier het. Commmerzbank Duitsland het die aankope van die vier fregatte en drie duikbote gefinansier. Die vliegtuie sou in 2012 afbetaal word, maar is verleng tot 2021.

Crawford-Browne het die bewerings van vergiftiging na die adjunk-kommissaris van die polisie in die Wes-Kaap geneem, “maar geen optrede het gevolg nie,” het hy gesê.

Geskoolde personeel sal glo munisipaliteite regruk

Die regering beplan om hoogs geskoolde personeel in gebiede ontplooi waar die bestuursvermoë in sukkelende plaaslike munisipaliteite ontbreek.

President Jacob Zuma het die Presidensiële Koördinerende Komitee vroeër gelei.

Dié komitee het die Uniegebou in Pretoria vergader om senior regeringsamptenare, premiers en die vereniging van plaaslike regerings, of SALGA byeen te bring.

Die minister van Samewerkende Regering en Tradisionele Sake, Pravin Gordhan, het die media na die vergadering ingelig.

Die Ouditeur-Generaal, Kimi Makwetu het reeds in September aangekondig dat ongemagtigde en verkwistende uitgawes in baie munisipaliteite buitensporig is.

Die ontplooiing van geskoolde personeel is daarop gemik om dienslewering te verbeter en ‘n einde aan ongemagtigde uitgawes te bring.

Winnie lek glo inligting oor wapentransaksie

Die Kaapstadse burgemeester, Patricia de Lille, het haar gedistansieer van ‘n verklaring dat die ANC-veteraan, Winnie Madikizela-Mandela, inligting laat uitlek het.

Madikizela-Mandela was glo een van verskeie Parlementslede wat inligting oor die 1999 wapentransaksie gelek het.

Die inligting was vervat in die sogenaamde De Lille-dossier. Die vraag voor die kommissie het gehandel oor wie die dossier help opstel het.

‘n Teenstander van die wapentransaksie, Terry Crawford-Browne, het vroeër aan die Seritikommissie van Ondersoek gesê Madikizela-Mandela het getuienis oor moontlike bedrog en korrupsie met die wapentransaksie laat uitlek.

Crawford-Browne het gevra om die name aan Regter Seriti vertroulik te oorhandig, maar die regter het daarop aangedring dat hy die name in die openbaar noem. “Ek wil hê dat jy die name in die openbaar gee.”

De Lille sê sy het Crawford-Browne nooit vertel dat Madikizela-Mandela aan haar dokumente oorhandig het nie. Maar De Lille wou nie verdere vrae beantwoord oor of sy Madikizela-Mandela wel in die dossier noem nie.

De Lille was destyds ‘n Parlementslid van die PAC. De Lille het haar van verklarings deur Crawford-Browne gedistansieer.

Hy het vroeër aan die kommissie gesê inligting in die sogenaamde ” De Lille-dossier” is versamel deur intelligensie-agente van die ANC wat met LP’s saamgewerk het.

De Lille het vroeër vanjaar voor die kommissie getuig en haar dossier as getuienis ingedien.

Madikizela-Mandela wou nie navrae beantwoord nie.