Gebou in Nairobi stort ineen

Nooddienspersoneel op soek na oorlewendes in die puin van ’n toringgebou in Nairobi.

Ten minste vier mense is dood, 40 beseer en verskeie ander word vermis ‘n dag nadat ‘n ses-verdieping residensiële gebou ineengestort het in die Keniaanse hoofstad, sê amptenare.

Onder die dooies was ‘n een-dag-oue baba, het reddingswerkers gesê.

Die hoop vervaag dat nog lewendes onder puin van die woonstelblok gevind sal word wat Sondagaand in die Haruma-buurt meegegee het.

Die Keniaanse Rooi Kruis het bevestig dat vier mense dood is en 40 beseer in die ineenstorting.

President Uhuru Kenyatta het intussen gewaarsku dat bouers krimineel aangekla sal word as hulle boureëls verontagsaam.

Hy het die “grootskaalse wetteloosheid” deur ontwikkelaars wat “basiese wette en regulasies” ignoreer, veroordeel.

Verlede jaar het ‘n gebou van 16 verdiepings in Dar-es-Salaam in Tanzanië ineengestort met talle slagoffers.

 

Swartrenoster kan uitsterf in 2015

Die swartrenoster is een van 13 spesies wat die wêreld dalk vanjaar moet groet en nooit weer lewendig gesien gaan word nie, het die Republikein berig.

Met net meer as 4 800 swartrenosters in die wêreld oor, sal selfs die vurigste bewaringspogings nie help om stygende renosterstropery en die verhoogde aanvraag na renosterhorings op die swartmark in veral Asië, te verminder nie.

Volgens dr. Derek Tittensor, ’n marine ekoloog van die Wêreldbewaringmonitorsentrum in Cambridge, Engeland, is die swartrenoster een van 13 spesies wat moontlik vanjaar kan uitsterf.

Verlede jaar is minstens 24 renosters, waarvan die meerderheid swartrenosters, in Namibië gestroop.

Tittensor sê die wêreld is besig om dosyne spesies daagliks te verloor en kundiges noem dit die sesde massa-uitwissing in die geskiedenis van die aarde. Soveel as 30% tot 50% van alle spesies beweeg na uitwissing in die middel van die eeu. Vingers wys na net een skuldige: die mens.

“Habitatverwoesting, besoedeling en onwettige visvang dood wilde diere en plante of los hulle in ’n erg verswakte toestand. Die probleem is die bykomende bedreiging van klimaatverandering gaan in komende dekades vererger en nog meer van hierdie oorlewendes laat vrek,” sê Tittensor.

Sowat 190 nasies het einde verlede jaar die Verenigde Nasies (VN) se beraad oor klimaatverandering in Lima, Peru bygewoon vir optrede om stygende groenhuisgasse te verminder.

Korrupsie en onwettige aanlynhandel bedreig ook bewaringspogings. Die onwettige handel in wildlewe word op sowat U$10 miljard per jaar bereken. Dit is die vyfde grootste smokkelhandel ná dwelms, aangevuur deur die stygende vraag na wilde diere as troeteldiere, trofeë en bestanddele in medisyne, voedsel en ander produkte.

“Dit is ’n opdraande stryd teen die mens se onvolhoubare gierigheid en verbruik, maar dit is ’n geveg wat ons nie mag verloor nie,” sê Tittensor.

Die ander 12 spesies wat moontlik vanjaar kan uitsterf, is die oostelike luiperd (net sowat 30 is in die wildernis oor), die Sumatra-olifant, Java-renoster, leerskilpad, die westelike laelande gorilla (wat ook veral weens die Ebola-virus gevrek het), die saola, vaquita (nog net sowat 100 oor), die Siberiese tier, berggorilla, die groter bamboeslemur (sowat 60 in die wildernis en 150 in aanhouding op Madagaskar), die Sumatra oerangoetang en die Yangtze vinlose tornyn.

Wêreldleiers veroordeel dodelike aanval op satiriese tydskrif

Wêreldleiers het ‘n dodelike aanval veroordeel by die kantore van die satiriese Franse tydskrif Charlie Hebdo waarin minstens 12 mense doodgeskiet is Woensdag.

President François Hollande het gesê die aanval was “ongetwyfeld” ‘n terroriste-aanval.

Daar was geen onmiddellike verklaring vir die aanval op die tydskrif se kantoor waar medewerkers byeen was vir ‘n vergadering nie.

Charlie Hebdo se karikature van die profeet Mohammed het dikwels swaar veroordeling van Moslems uitgelok.

Die Paryse aanklaer se kantoor het bevestig dat 12 mense tot dusver doodgeskiet is, insluitend vier van Frankryk se bekendste spotprenttekenaars asook die tydskrif se direkteur, Stephane Charbonnier (ook bekend as Charb).

Twintig mense is glo beseer, vier van hulle is in ‘n kritieke toestand.

Frankryk het sy sekuriteitsweerbaarheid tot sy hoogste vlak aangepas en beskermende maatreëls versterk op plekke van aanbidding, winkels, mediakantore en op openbare vervoer.

Top regeringsamptenare is tans byeengeroep vir ‘n noodvergadering en Hollande sal na verwagting ‘n TV-verskyning maak teen vanaand.

Die Wit Huis het die aanval in die “sterkste moontlike terme” veroordeel terwyl die Britse Eerste Minister, David Cameron dit “walglik” genoem het.

Die Europese Unie het hul solidariteit met Frankryk bevestig en gesê die stryd teen terreur gaan voort.

Donald Tusk, die nuwe president van die Europese Raad het sy skok uitgespreek.

“Die Europese Unie staan by Frankryk na hierdie verskriklike daad. Dit is ‘n wrede aanval op ons fundamentele waardes en teen die vryheid van uitdrukking, ‘n pilaar van ons demokrasie,” het die voormalige Poolse premier in ‘n verklaring gesê.

Terwyl ander wêreldleiers, waaronder ook die Duitse kanselier Angela Merkel en die Russiese president Vladimir Poetin, die aanval veroordeel het, het ondersteuners van die militante Islamitiese Staat die wrede moorde as welverdiende wraak teen Frankryk geprys.

Praag het voorheen berig oor aanvalle op die tydskrif.

 

Swart bediende wat wit baba aanrand kry borg

‘n Video waarin ‘n swart bediende ‘n baba van sewe maande afgeknou en aangerand het, is binne enkele dae reeds deur meer as 50,000 mense te siene gekry.

Annami Linde van Welkom het ‘n bediende op 1 Desember verlede jaar aangestel om na haar seuntjie Nico, wat sewe maande oud is, te kyk.

Op 21 Desember moes sy en haar man Org, uitgaan en net om seker te maak dat dinge nie by die huis verkeerd gaan nie, het sy die kleinding op ‘n mat in die sitkamer gesit en ‘n kamera opgestel om dit wat in die huis plaasvind, op te neem.

Tot haar skok moes sy sien hoe die bediende haar gemaklik op die bank sitgemaak het en die kleintjie geslaan het toe hy begin huil.

Mafsehediso Lisbeth Makashea, is intussen in hegtenis geneem. Die bediende is na ‘n hofverskyning op borg van R1000 vrygelaat.

Sy moet op die 29ste Januarie weer verskyn.

Linde is ‘n verpleegster en het by talle kundiges kers opgesteek. Van die dokters het gewaarsku dat kinders van ses maande tot ‘n jaar maklik breinswelling en -skade opdoen as hulle rondgepluk en teen die kop geslaan word.

‘n Kliniese sielkundige het gesê dat selfs op so ‘n jong ouderdom ervaar kinders wel trauma want dit word in die senuweestelsel vasgevang.

Bron: Die Vryburger

Verbruikers slaak sug van verligting na olieprys tuimel

Brent ru-olie het Dinsdag ‘n nuwe laagtepunt bereik toe dit tot net bó 51 dollar per vat verhandel het. Dit het later in die dag effens herstel.

Die dalende olieprys en voortgesette vrese oor die veerkragtigheid van die wêreldekonomie het ‘n verdere vloeibaarheid op aandelemarkte geskep.

Sukkelende verbruikers kan egter verligting smaak nadat die brandstofprys om middernag met meer as ‘n rand per liter gedaal het.

Die internasionale olieprys het vroeër die week tot op sy laagste vlak in vyf-en-‘n-half jaar geval.

Ontleders meen dat oliepryse later vanjaar tot ‘n nuwe laagtepunt van sowat 40 dollar per vat kan daal.

Twee metropolisielede in omkooplokval gevang

Twee Tshwane-metropolisiebeamptes is in kennis gestel dat hulle geskors kan word hangende ‘n ondersoek nadat hulle glo omkoopgeld van Yusuf Abramjee, hoof van die teenmisdaadveldtog Crime Line, geëis het.

‘n Lokval is glo vir die beamptes gestel. Die twee beamptes moes ‘n spoedkamera in Centurion beman. Hulle was nie veronderstel om motoriste van die pad af te trek nie maar slegs met die kamera spoedoortreders af te neem en boetes dan later per pos uit te reik.

Volgens ‘n woordvoerder van die Tshwane-metropolisie het Abramjee Maandag die owerhede in kennis gestel dat die twee beamptes hom van die pad af getrek het en omkoopgeld geëis het. Hy het geweier om te betaal en die beamptes het hom laat gaan.

“Die beamptes het egter motoriste van die pad af getrek en aan motoriste gesê hulle moet omkoopgeld betaal sodat hulle nie later ʼn boete ontvang nie,” het die woordvoerder aan Sapa gesê.

Hulle het R200 gevra.

Die twee beamptes is onmiddellik in hegtenis geneem. Daar is R1 200 by een van die beamptes gevind en R710 by die ander beampte. Hulle kon nie rekenskap gee van die geld nie, vermoedelik omdat dit omkoopgeld was.

Die twee beamptes het intussen kennisgewings van skorsing ontvang.

Hulle sal sewe dae hê om daarop te antwoord voor ʼn besluit geneem sal word oor of hulle geskors moet word.

Angie Motshekga gee Hitler-saluut!

Suid-Afrika se minister van onderwys, Angie Motshekga, is op ‘n foto vasgevang waar sy die Hitler-saluut gee. Die antifa-koerant, Beeld, is ook reeds daarvan bewus en daar word verwag dat sy redakteur, mnr. Adriaan Basson, van môre af ‘n intense veldtog teen Motshekga van stapel gaan stuur.

Angie Motskhekga gee die Hitler-saluut.
Angie Motskhekga gee die Hitler-saluut.

Steve Hofmeyr-webblad glo deur kuberkrakers aangeval

Volgens berigte is Steve Hofmeyr se webblad deur ‘n kuberkrakergroep wat hulself “Anonymous Africa” noem, aangeval. Hulle beweer dat hulle ‘n DDOS- (Distributed Denial of Service) aanval op die sanger se webblad uitgevoer het. Tans is die webblad egter steeds aanlyn.

Anonymous Africa het Sondagoggend getwiet: “You will be happy to know we are currently running miniop [mini operation] against the racist @steve_hofmeyer.”

‘n DDOS-aanval behels die rig van ‘n oormaat verkaar aan ‘n webblad totdat die netwerk wat dit huisves oorweldig raak. Dit kan egter nie onbepaald volgehou word nie en gewoonlik hou dit ná enkele ure of dae weer op.

praag.co.za is effens meer as ‘n jaar gelede insgelyks deur kuberkrakers of selfs regeringsinstansies met ‘n DDOS-aanval geteiken.

Steve Hofmeyr is tans met vakansie en nie vir kommentaar beskikbaar nie.

Kuberaanvalle in Suid-Afrika is onwettig aangesien dit ‘n ootreding van die Wet op elektroniese kommunikasie en transaksies verteenwoordig.

Anonymous Africa het voorheen al soortgelyke aanvalle op die ANC se webblad, asook dié van die Zimbabwiese staatskoerant, The Herald, geloods.

Swart prestasie oral ‘n kopseer

Onderwyskenners in Suid-Afrika sê die matriekuitslae weerspieël die swak besluite deur taakspanne en sogenaamde onderwyskundiges wat deur die ANC en hul handlangers aangestel is.

Uitkomsgerigte onderrig (UGO) het kennelik misluk asook die uitsluiting van meetkunde as deel van wiskunde, sê hulle.

Swart Suid-Afrikaners kan blykbaar nie eerstewêreld-onderrigmetodes en –benaderings baasraak nie, sê prof. Kobus Maree, van die Universiteit van Pretoria.

Die swak prestasie van kandidate in veral wiskunde word toegeskryf aan die feit dat Wiskunde vraestel 3 eers opsioneel was.

Dit het die hoërvlak-vaardighede in die vak getoets, maar tans word dit by die gewone twee wiskunde vraestelle ingesluit wat waarskynlik heeltemal te hoë eise aan leerlinge gestel het.

Swart onderwysers het nie die akademiese agtergrond of die nodige opleiding om sleutelvakke aan te bied nie.

Kenners meen voorts dat die departement geld wil vermors op allerlei tegnologiese foefies, terwyl basiese foute met bywoning, dissipline en tydsbestuur nooit reggestel word nie.

Die kwessie van swart prestasie in die res van die wêreld word egter nooit deur die sogenaamde kenners in ons land aangespreek nie.

Die prestasiegaping tussen swart van wit studente is lank reeds gedokumenteer.

In die VSA word dit ook dikwels as ‘n sosiale kloof voorgehou wat dit uiters ingewikkeld maak vir beleidmakers, aangesien dit weinig met gerief te make het.

Maar ‘n verslag wat fokus op swart mans dui daarop dat die prentjie selfs droewiger is as wat algemeen bekend is.

Slegs 12 persent van swart Graad 4 seuns is vaardig met lees, in vergelyking met 38 persent van wit seuns, en slegs 12 persent van swart Graad8  seuns is vaardig in wiskunde, in vergelyking met 44 persent van wit seuns.

Armoede alleen kan ook nie die verskille verduidelik nie: Arm wit seuns doen net so goed soos die Afro-Amerikaanse seuns wat nie in armoede leef nie, gemeet aan of hulle kwalifiseer vir gesubsidieerde skoolmiddagetes.

‘Aanvullende eksamens sal vergoed vir swak uitslae’

Die minister van basiese onderwys, Angie Motshekga sê aanvullende eksamens sal gebruik word om te vergoed vir die daling in die matriek slaagsyfer, het RSG berig.

Dit volg nadat sy bekend gemaak het dat die 2014 slaagsyfer met 2,4% tot 75,8% gedaal het. Sy het ‘n beroep op provinsies gedoen om alles in hul vermoë te doen om te verseker dat leerders dié eksamens slaag. Die eksamens word in Februarie en Maart geskryf.

Motshekga sê die leerders wat van graad 11 na graad 12 deurgesit is, moet moet nie die skuld kry vir die daling in die 2014 matriek-slaagsyfer nie.

Die leerders is deurgesit ten spyte van besware van skole. Mosthekga sê sommige van dié leerders het baie goed gedoen.

Die daling in die slaagsyfer vir die 2014 matriek-eindeksamen is die eerste daling in vyf jaar.

Die onderwysersvakbond, Sadou sê die departement van basiese onderwys moet dieselfde klem op ander grade plaas as wat op matriek geplaas word. Die vakbond het gereageer op die aankonding dat die 2014 matriek slaagsyfer gedaal het.

Sadou sê die daling kan daaraan toegeskryf word dat onderwysers nie opgelei is om die nuwe CAPS-leerplan te implementeer nie.

Kommer is ook uitgespreek oor die onreëlmatighede wat by eksamensentrums voorgekom het.

Die minister het vroeër bekend gemaak dat verskeie eksamensentrums in KwaZulu-Natal en die Oos-Kaap wat van onreëlmatighede met die eksamen beskuldig is, na ondersoeke van blaam onthef is.

Die ondersoeke deur die department en Umalusi het bevind dat elf van die 39 sentrums in KwaZulu-Natal en 19 in die Oos-Kaap nie aan onreëlmatighede skuldig was nie.

Die oorblywende 28 sentrums in KwaZulu-Natal en 16 in die Oos-Kaap sal verder ondersoek word en ‘n verslag behoort teen einde van die maand beskikbaar te wees.

Nog elf sentrums in ander provinsies word ook vir onreëlmatighede ondersoek.

Die slaagsyfer vir wiskunde het met ses persent tot 53 persent gedaal.

Die direkteur-generaal van die departement, het ook bekend gemaak dat die slaagsyfer vir fisiese wetenskap van sowat 67 persent tot 61,5% in 2014 gedaal het.