bedreigde spesie – praag.co.za

Swart wildbewaarder skop ietermago genadeloos vir foto

‘n Video van ‘n swart veldwagter se vreemde houding teenoor ‘n ietermago is op YouTube gelaai.

Die veldwagter het tydens ‘n nagrit by Punda Maria in die Kruger Nasionale Park uit sy voertuig gespring en die dier hardhandig begin skop sodat hy ‘n foto kon kry.

“Hy het later gesê hy wil teruggaan om die dier te vang, sodat hy die publiek geld kan vra om dit te sien,” het Jason Janse van Vuuren in beskrywing van die video wat hy opgelaai het, gesê.

Volgens Reynold Thakhuli, die waarnemende hoof van kommunikasie by Sanparke, is hulle bewus van die video en ondersoek tans die voorval.

Elke spesie van ietermago is tans bedreig, deels as gevolg van die vraag na ietermagovleis en -skubbe in Asië.

“In sommige kulture word geglo dat ietermagoë genesende kragte besit en om hierdie rede hulle word gereeld in tradisionele medisyne gebruik. Ietermagoë word ook beskou as ‘n lekkerny en is in groot aanvraag in lande soos China en Viëtnam. Dit is wat hulle die meeste verhandele dier in die wêreld maak, “volgens Sanparke.

Afrikaspesies word toenemend geteiken weens die skerp afname in die bevolkings van hul Asiatiese neefs.

Volgens bewaringsinstansies is vier ton Afrika-ietermagoskubbe deur die Hong Kong owerhede in beslag geneem in Junie.

Dit verteenwoordig ongeveer 1100 tot 6600 individuele diere.

‘Samelewing ag leeu hoër as mens’

Dit is betreurenswaardig wanneer die samelewing ’n vlak bereik waar ‘n leeu se waarde hoër is as die van ’n mens.

Dit is volgens toerismekenner, Melville Saayman, en volg op die omstredenheid rondom die onwettige doodmaak van Cecil die leeu deur die Amerikaanse jagter Walter Palmer, verlede maand.

Saayman het kommentaar gelewer nadat dié gebeurtenis in ‘n mediasirkus van emosiebelaaide onsinnighede ontaard het.

Saayman het verder gesê die herrie rondom die Zimbabwiese maanhaar is ironies, gegewe die lot van hongerlydendes in dié land en ander Afrika-lande.

Saayman meen verder dit is sleg dat die jagbedryf soveel negatiewe aandag kry.

Hy sê renosterjag behoort eerder beperk te word aangesien die renoster só bedreig word. Saayman sê trofeejag is baie meer as net leeujag of die Groot Vyf.

Bloukraanvoëls se vergiftiging maak opslae

Agri-Noord-Kaap het die vergiftiging van meer as 200 bloukraanvoëls veroordeel. ’n Boer in die Richmond-distrik het vermoedelik sedert 2012 die voëls met “Two Step” of Aldicarb vergiftig.

Henning Myburgh het aan OFM-nuus gesê indien dit blyk dat die skuldige party een van Agri-Noord-Kaap se lede is, die nodige stappe na afloop van ’n polisieondersoek gedoen sal word.

Toerismekenner Melville Saayman sê hy hoop dat die skuldige party swaar gestraf word, aangesien die bloukraanvoël deel van Suid-Afrika se erfenis is, en ook omdat daar geen rede vir sulke gedrag is nie.

Die Griffon Gifinligtingsentrum se Gerhard Verdoorn het bevestig dat monsters van die voëls reeds geneem is om te bepaal wat die voëls se dood veroorsaak het.

Omgewingsake se Lesego Pule was nog nie vir kommentaar beskikbaar nie.

Swartrenoster kan uitsterf in 2015

Die swartrenoster is een van 13 spesies wat die wêreld dalk vanjaar moet groet en nooit weer lewendig gesien gaan word nie, het die Republikein berig.

Met net meer as 4 800 swartrenosters in die wêreld oor, sal selfs die vurigste bewaringspogings nie help om stygende renosterstropery en die verhoogde aanvraag na renosterhorings op die swartmark in veral Asië, te verminder nie.

Volgens dr. Derek Tittensor, ’n marine ekoloog van die Wêreldbewaringmonitorsentrum in Cambridge, Engeland, is die swartrenoster een van 13 spesies wat moontlik vanjaar kan uitsterf.

Verlede jaar is minstens 24 renosters, waarvan die meerderheid swartrenosters, in Namibië gestroop.

Tittensor sê die wêreld is besig om dosyne spesies daagliks te verloor en kundiges noem dit die sesde massa-uitwissing in die geskiedenis van die aarde. Soveel as 30% tot 50% van alle spesies beweeg na uitwissing in die middel van die eeu. Vingers wys na net een skuldige: die mens.

“Habitatverwoesting, besoedeling en onwettige visvang dood wilde diere en plante of los hulle in ’n erg verswakte toestand. Die probleem is die bykomende bedreiging van klimaatverandering gaan in komende dekades vererger en nog meer van hierdie oorlewendes laat vrek,” sê Tittensor.

Sowat 190 nasies het einde verlede jaar die Verenigde Nasies (VN) se beraad oor klimaatverandering in Lima, Peru bygewoon vir optrede om stygende groenhuisgasse te verminder.

Korrupsie en onwettige aanlynhandel bedreig ook bewaringspogings. Die onwettige handel in wildlewe word op sowat U$10 miljard per jaar bereken. Dit is die vyfde grootste smokkelhandel ná dwelms, aangevuur deur die stygende vraag na wilde diere as troeteldiere, trofeë en bestanddele in medisyne, voedsel en ander produkte.

“Dit is ’n opdraande stryd teen die mens se onvolhoubare gierigheid en verbruik, maar dit is ’n geveg wat ons nie mag verloor nie,” sê Tittensor.

Die ander 12 spesies wat moontlik vanjaar kan uitsterf, is die oostelike luiperd (net sowat 30 is in die wildernis oor), die Sumatra-olifant, Java-renoster, leerskilpad, die westelike laelande gorilla (wat ook veral weens die Ebola-virus gevrek het), die saola, vaquita (nog net sowat 100 oor), die Siberiese tier, berggorilla, die groter bamboeslemur (sowat 60 in die wildernis en 150 in aanhouding op Madagaskar), die Sumatra oerangoetang en die Yangtze vinlose tornyn.

Twee stropers doodgeskiet

Twee renosterstropers is doodgeskiet en ses is in hegtenis geneem, het RSG berig.

SanParke sê in die eerste voorval het veldwagters van Krokodilbrug op drie vermeende renosterstropers afgekom.

Hulle is agterna gesit en twee is noodlottig gewond, terwyl die derde oor die grens na Mosambiek gevlug het.

‘n Jaggeweer, ammunisie en ander toerusting is gekry.

In die tweede operasie is ses verdagtes buite die westelike grens van die Nasionale Krugerwildtuin deur SanParke se Omgewingsmisdaad-ondersoekeenheid in hegtenis geneem.

Daar is beslag gelê op ‘n jaggeweer, ammunisie en twee motors.

Die inhegtenisnemings is die jongste in twee weke van suksesvolle operasies, waartydens 35 vermeende renosterstropers aangekeer is.

Veertien stropers oor die naweek vas

Dit was ‘n slegte naweek vir stropers. Veertien renosterstropers is in hegtenis geneem in die Kruger Nasionale Park het sedert die begin van die naweek, het SANParke gesê.

SANParke het drie hoogs suksesvolle operasies Vrydagoggend geloods wat gelei het tot die inhegtenisneming van 14 vermeende renosterstropers, het ‘n woordvoerder Raynold Thakhuli in ‘n verklaring gesê.

“Dit bring die totale aantal van stroperverdagtes vanjaar wat in hegtenis geneem is in die Kruger Nasionale Park (KNP) te staan op 113.”

In ‘n gesamentlike operasie met die lede van die SA Polisiediens het SANParke se veldwagters ‘n voertuig naby Skukuza onderskep en vyf verdagtes in hegtenis geneem.

Daar is op ‘n .375-jaggeweer, ammunisie en stropertoerusting, sowel as ‘n voertuig beslag gelê. Later gedurende die middag van dieselfde dag, is drie ander verdagtes in die Malelane-omgewing in hegtenis geneem.

Op Saterdag, in die Punda Maria-gebied van die KNP, kort ná sonop, in ‘n gesamentlike SANParke en SAPD-ontplooiing, en ondersteun deur die Suid-Afrikaanse Nasionale Weermag se lugvleuel, is kontak gemaak met drie vermeende wilddiewe.

Twee van die verdagtes is ernstig gewond en in hegtenis geneem terwyl die derde ongedeerd in hegtenis geneem is.

Een van die gewonde verdagtes is later in die hospitaal aan sy beserings dood. Die oorblywende gewonde verdagte is onder polisiebewaking in die hospitaal.

‘n Jaggeweer, ammunisie en stropertoerusting is gekonfiskeer op die toneel, het SAPA berig.

Tsjegge verbrand renosterhoring

‘n Tsjeggiese dieretuin het sowat 60 kilogram se renosterhoring verbrand as deel van ‘n internasionale veldtog wat daarop gemik is om die aandag te vestig op dié diere wat deur uitwissing bedreig word, het RSG berig.

Die Tsjeggiese Republiek het die afgelope paar jaar ‘n belangrike deurgangsroete geword vir die handel in renosterhoring van Afrika na Asië.

Die Tsjeggiese owerheid het verlede jaar op die horings van 24 wit renosters van sowat 60 miljoen rand beslag gelê, en 15 lede van ‘n beweerde internasionale smokkelnetwerk aangekla.

Die Dvur Kralove-dieretuin wat sowat 150 kilometer noordoos van Praag is, het die verbranding van die renosterhoring georganiseer op die vooraand van Wêreldrenosterdag wat vandag gevier word.

Intussen is drie SANParks-werkers Sondag in hegtenis geneem vir beweerde renosterstropery in die Krugerwildtuin.

Die drie was in die laer Sabie-gebied bedrywig, het die waarnemende uitvoerende bestuurder van SANParks, Abe Sibiya, gesê,

‘n Jaggeweer, ammunisie, ‘n voertuig en stropertoerusting is in hul besit gekry. Hulle is gevang kort nadat ‘n vernielde renoster in die gebied waar die drie gewerk het, opgespoor is.

“Dis jammer dat diegene aan wie die welstand van die diere toevertrou word, na bewering nou dieselfde nalatenskap wat hulle moet bewaar, vernietig,” het hy gesê.

Greenpeace weier walvisvleisvragskip in Durban

Greenpeace, die internasionale omgewingsorganisasie, het ‘n beroep op die Suid-Afrikaanse regering gedoen om Ysland se vragskip in hul hawens te verbied en ander Afrikalande tot soortgelyke stappe te oorreed.

Suid-Afrika is gevra om druk op Afrika-lande uit te oefen sodat die vragskip met bedreigde vin-walvisvleis aan boord, nie toegelaat word om by hulle hawens aan te doen nie.

Die skip is in Durban geweier en kon nie in die hawe aandoen nie, nadat sowat 21.000 Suid-Afrikaners Greenpeace in die protesaksie gesteun het.

Die skip, Alma, is met die walvisvleis op pad na Japan. Die vleis van die bedreigde walvis is veronderstel om in Tokio afgelaai te word en die skip moet halfpad brandstof inneem.

Die protesaksie volg nadat die Internasionale hof van Justisie Japan twee weke gelede gelas het om die jag van walvisse dadelik te staak.