Duitsland – Bladsy 9

‘Soos ‘n hond doodgeskiet’

’n Bekende inwoner van Grootfontein, mnr. Peter (Piet) Jakob (52), is Dinsdagaand op sy ma se kleinhoewe buite die dorp doodgeskiet.

“Hy is soos ’n hond doodgeskiet,” het ’n bekende sakeman van dié Noordedorp, mnr. Seeff Oosthuizen, gesê. Hy was een van die eerste mense op die toneel.

“Ek het omstreeks 17:24 ’n oproep van Brian Scott van Bank Windhoek oor die voorval gekry en ons het altwee na die plot gejaag en gelyktydig daar aangekom. Daar het ’n bloedkol by die hek in die veiligheidsheining gelê, so dit lyk of Piet daar geskiet is,” het Oosthuizen gister aan Republikein vertel.

“Die hek was oop en ons het ingestap en vir Piet op die grasperk voor die huis, sowat 15 treë van die heining, gekry. Hy het op sy maag gelê. Daar was ’n skietwond in sy agterkop en een aan sy regterblad.”

Oosthuizen sê Jakob se polsslag was toe al reeds baie swak en hy het vir Scott gevra om by hom te bly.

“Ek het in die huis ingegaan na Piet se ma toe. Sy het gesê Piet was met die werkers in dorp toe en toe sy bakkie buite stop, het sy skote gehoor en die honde hoor tjank,” vertel Oosthuizen.

“Sy het tydens die skietery die huis gesluit en met haar sekuriteitsflits wat ’n alarm het, groot lawaai gemaak. Sy het gesê sy het vier jong, onbekende mans by die hek sien uithardloop.”

Oosthuizen het met die swaargewonde Jakob hospitaal toe gejaag, maar hy was met sy aankoms dood verklaar.

Volgens Oosthuizen was daar goeie samewerking van die buurtwag en boere en selfs spoorsnyers is ingespan.

“Jaco van Dyk se helikopter is laat kom, maar dit was te laat, want die donker het ons gevang,” het Oosthuizen gesê.

Hy sê teen gister was een van die swart verdagtes by die weermagkamp vasgetrek.

Die woordvoerder van die polisie van die Otjozondjupastreek, adj.off. Maureen Mbeha, het gister die voorval bevestig en gesê dat die polisieondersoek steeds voortduur.

“Ek kan bevestig dat een van die verdagtes ondervra word en die polisie werk baie hard om die ander verdagtes aan te keer,” het Mbeha gister aan Republikein gesê.

“Een van die groot honde is doodgeskiet. Dit is ook nog nie vasgestel of enigiets gesteel is nie,” het sy gesê.

Die Jakobse het voorheen Bäckerei Jakob op Grootfontein besit waarvan Peter se pa, mnr. Fritz Jakob, die eienaar was. Sy pa het verlede jaar gesterf. Peter het by sy bejaarde ma, me. Gisela Jakob, op die plot naby die koeldrankfabriek op die pad na Rundu gebly.

Jakob was ’n verkoopsverteenwoordiger, maar volgens Oosthuizen wou hy in Februarie volgende jaar bedank om voltyds by sy ma op die plot te gaan bly om na haar om te sien.

Volgens sy niggie, me. Hildegard Brenner, het sy die skoknuus Dinsdag omstreeks 19:00 gekry. Sy het weer gesê twee van die groot honde is ook saam met Jakob doodgeskiet. Een van Jakob se broers, mnr. Günther Jakob, ook ’n bakker, is van Duitsland op pad.

Jakob was ongetroud en het geen kinders gehad nie. Hy word deur sy ma, drie broers en ’n suster oorleef.

Hy word deur Grootfonteiners as baie sagmoedig en vriendelik beskryf. “Hy was iemand wat niemand leed sou aandoen nie.”

Grieke betaal IMF-skuld

Die president van die Europese Sentrale Bank (ESB), Mario Draghi, meen Griekeland kan wel die €3,5 miljard terugbetaal wat hy die bank skuld.

Die ESB het vroeër meer geld vir Griekse banke beskikbaar gestel om te keer dat hulle ondergaan.

Die Griekse banke het Maandag weer hul deure geopen nadat hulle hul deure vir drie weke moes sluit. Die land se effektebeurs bly egter steeds gesluit.

Volgens nuusagentskappe word lang toue by banke ondervind waar slegs 420 Euros weekliks gestrek kan word.

Griekeland het intussen €4,2 miljard aan die Europese Sentrale Bank terugbetaal nadat hy tydelike finansiering gekry het, terwyl ‘n groter reddingsboei onderhandel word.

Sonder die betaling sou die Sentrale Bank nie meer Griekse banke met kontantvloei kon bystaan nie. Griekeland het ook sowat €2 miljard aan die Internasionale Monetêre Fonds terug betaal.

Griekeland het aan die einde van verlede week finansiering van €7 miljard ontvang om sy dringendste skuld te betaal.

Verskeie besuinigingsmaatreëls het in Griekeland in werking getree. Belasting op Toegevoegde Waarde, BTW, op voedsel en vervoerdienste is ook van 13 na 23 persent verhoog.

Die besuinigingsmaatreëls is goedgekeur as deel van ‘n ooreenkoms met die land se krediteure.

Die oorbruggingslening van €7 miljard verseker onder meer dat Griekeland sy skuld sal kan betaal tot tyd en wyl die derde hulppakket onderteken is.

Dié hulppakket van tot €86 miljard kan wel beding word nadat die Griekse parlement al die voorwaardes goedgekeur het waarop die land se krediteure aangedring het.

Dit sluit in pensioenhervorming, hoër belastings, bestedingsperke, die onafhanklikheid van die land se statistieke-instelling en meer.

Altesame 229 uit die 300 parlementslede (meer as 76%) het ten gunste van die hervormings gestem ná ’n debat wat tot ná middernag geduur het. 32 Syriza-lede het nee gestem en nog 6 het buite stemming gebly.

Die Grieke het vroeër in ‘n algemene referendum téén besuiniging gestem.

Intussen het dr. Angela Merkel, Duitse kanselier, steun begin monster onder haar partylede en koalisievennote vir die hulppakket. Die Duitse parlement moes dit Vrydag goedkeur, nes ander lande in die eurogebied wat daartoe bydra.

Wolfgang Schäuble, Duitse minister van finansies, het Woensdag in ’n radio-onderhoud voorgestel dat Griekeland tog tydelik die eurogebied verlaat omdat dit die afskrywing van skuld moontlik sal maak. Dit is ingevolge eurogebiedreëls nie moontlik nie.

Nazi aan massamoord skuldig bevind

’n Duitse man (94) wat as boekhouer in die Auschwitz-strafkamp gewerk is, is dié week in ’n hof in Lueneburg in Duitsland daaraan skuldig bevind dat hy ’n medepligtige aan die moord van 300 000 mense was.

Hy is tot vier jaar gevangenisstraf gevonnis in wat waarskynlik een van die laaste hofsake oor die Tweede Wêreldoorlog se behandeling van Jode kan wees.

Oskar Groening het egter nie self enigiemand doodgemaak terwyl hy in die Nazi-besette Pole gewerk het nie.

Aanklaers het aangevoer dat deur die geldnote te sorteer afkomstig van treinvragte vol Jode wat by die kamp aangekom het, hy bygedra het om die bewind se “massamoord” te ondersteun.

Groening was 21 jaar oud en volgens sy eie erkenning ’n entoesiastiese Nazi, toe hy in 1942 in die kamp begin werk het.

Die klagtes teen hom hou verband met die tydperk tussen Mei en Julie 1944 toe 137 treine met ongeveer 425 000 Jode van Hongarye in Auschwitz aangekom het. Minstens 300 000 van hulle is glo reguit na die gaskamers gestuur.

Duitsland erken Namibiese volksmoord

Of daar ’n formele Duitse verskoning sal wees of nie, is onbekend, maar die federale regering in dié land het uitdruklik erken dat die gruweldade teen die Nama en die Ovaherero wel volksmoord was.

Volgens internasionale media het die Duitse Bundestag president, mnr. Norbert Lammert, Woensdag reeds van volksmoord gepraat, het die Republikein berig.

Hy het dit tydens ’n herinnering aan die slagting van die Duitse koloniale troepe in die voormalige Duits-Suidwes-Afrika gedoen.

“Die oorlog van uitwissing in Namibië tussen 1904-1908 was ’n misdaad en volksmoord,” het Lammert glo gesê.

Dit volg ná afgevaardigdes van die nasate van die volksmoordslagoffers verlede week in Duitsland was vir die oorhandiging van ’n petisie met 2 000 handtekeninge van nie-regeringsorganisasies aan die Duitse regering.

Hoewel die Duitse regering nie amptelik met die nasate van die volksmoordslagoffers oor hierdie erkenning gekommunikeer het nie, het prof. Phanuel Kaapama, een van die volksmoordkomiteelede, gesê die regering se erkenning kan aan dié petisie toegeskryf word.

Die woordvoerder van die Duitse ministerie van buitelandse sake, mnr. Martin Schaefer, het Vrydag aan verslaggewers in Berlyn gesê dat hierdie kwessie die afgelope jare deel van die gesprekke tussen die federale en Namibiese regerings is.

Toe hy gevra is of daar ’n amptelike verskoning sou wees, het Schäfer slegs vir geduld tot die einde van die onderhandelinge gevra.

Onder wetenskaplikes, wat ook deel vorm van die 2 000 mense wat die petisie onderteken het, bly die term ‘volksmoord’ grootliks onbetwis.

Die twee Ovaherero/Ovambanderu-volksmoordkomitees en dié van die Nama’s sal vandag ’n amptelike nuusverklaring in hierdie verband uitreik.

Volgens opperhoof Tjinaani Maharero van die Tjamuaha-Maharero-koningshuis, het hulle ooreengekom om ’n gesamentlike mediakonferensie oor hul besoeke in die buiteland te hou.

Die Nama-, Ovambanderu- en Ovaherero-volksmoordkomitees was in Duitsland, terwyl die OCD-1904-raad in Londen was om internasionale steun te wen vir hul poging om ten opsigte van reparasies druk op die Duitse regering uit te oefen.

Derde reddingsboei vir Grieke

Europese leiers het ‘n ooreenkoms met Griekeland bereik vir ‘n derde reddingsboei in ‘n poging om die land in die euro-gebied te hou.

Die nuwe maatreëls wat ingestel is kan egter lei tot die val die linksgesinde regering van Alexis Tsipras.

EU-leiers het eenparig besluit op ‘n Europese Stabiliseringsmeganisme vir Griekeland wat teen Woensdag sekere maatreëls deur sy parlement moet voer en duidelike tydsraamwerke vir hervormings moet voorlê.

Die ooreenkoms behels onder meer dat die Griekse parlement teen Woensdag hoër beslasting hef, pensioene verminder en nuwe indiensneming-wetgewing instel.

Eurosoneleiers het vroeër deur die nag in Brussel, België, beraadslaag in ‘n poging om ‘n kompromis te vind om te keer dat Griekeland se geldvoorraad opdroog.

Die Griekse regering is tot Woensdag tyd gegee om nuwe wetgewing deur te voer as voorwaarde vir verdere onderhandelinge oor ’n nuwe hulppakket wat die land nodig het.

Die noodberaad is ure lank onderbreek vir samesprekings tussen die Griekse eerste minister, Alexis Tsipras, die Duitse kanselier, Angela Merkel, Frankryk se president Francois Hollande en die president van die Europese Raad, Donald Tusk.

Tsipras het intussen met sy kabinet in Athene vergader om die nuwe besuinigingsmaatreëls te bespreek waaroor die Europese Unie ooreengekom het in ruil vir die reddingsboei.

Volgens berigte is ondersteuners van die Griekse premier woedend dat Griekeland die knie voor Duitsland se vereistes gebuig het.

Die ooreenkoms is met gemengde reaksie deur die res van die land begroet, met die staatsdienswerkersvakbond wat ‘n 24-uur staking afgekondig het.

Kommer oor Prasa-ingenieur se kwalifikasies neem toe

Die Passasier-spooragentskap van Suid-Afrika (Prasa) sê hy is baie tevrede met sy hoofingenieur, dr. Daniel Mtimkulu, al is hy nie amptelik as ingenieur geregistreer nie.

Netwerk24 het gister onthul dat Mtimkulu nie by die Ingenieursraad van Suid-Afrika geregistreer is nie.

Ingevolge wetgewing moet ingenieurs wat vir die staat werk, by die raad geregistreer wees.

Die Vryheidsfront Plus gaan ook die Staatsdienskommissie versoek om ondersoek in te stel na die geldigheid van die kwalifikasies van Mtimkulu.

Mtimkulu beweer hy het ’n ingenieursgraad by die Universiteit van die Witwatersrand en ’n doktorsgraad in Duitsland behaal, maar Wits se registrasiekantoor kon geen rekord van hom as student opspoor nie.

Mtimkulu, die hoof van ingenieursdienste by Prasa, is aangedui as die ontwerper van die Afro 4000-lokomotiewe wat as ongeskik vir Suid-Afrikaanse infrastruktuur verklaar is. Hy het die foutiewe aankope op ‘n perskonferensie verdedig.

Die hoogte van die treine is nie geskik vir Suid-Afrikaanse spore nie, omdat hulle 4.264m hoog is terwyl die nasionale limiet 3.965m is.

By dieselfde perskonferensie het Prasahoof Lucky Montana gesê dat die bohaai te danke is aan ‘n rassismeveldtog teen Mtimkulu, wat as onbevoeg voorgehou word omdat hy swart is.

Hy het gesê Prasa-werknemers word uitgebeeld “as ‘n klomp onbevoegdes [en] dit is waarskynlik ‘n rassekwessie”.

Ovaherero-volksmoord laat Duitsland koud

Nóg Duitsland se president Joachim Gauck nóg enige amptenaar in sy kantoor was beskikbaar om Maandag ’n petisie van nasate van die volksmoord van die Duitse koloniale bewind in die voormalige Duits-Suidwes-Afrika te ontvang, het die Republikein berig.

’n Hooggeplaaste afvaardiging van die Ovaherero tradisionele owerheid en die Nama Tegniese Komitee onder leierskap van Ovaherero-opperhoof advokaat Vekuii Rukoro is tans in Duitsland in die hoop om onder andere met ministers oor vergoedingseise van nasate van die volksmoord te vergader.

Volgens ’n verklaring wat deur NGO-Alliansie Geen Amnestie Op Volksmoord uitgereik is, was Gauck vooraf ingelig dat die petisie by sy kantoor oorhandig sou word.

“Is dit hoe die nageslag van slagoffers van die volksmoord behandel moet word?” het me. Ida Hoffmann, ’n Namibiese parlementslid en lid van die Nama Tegniese Komitee, gesê.

Hoffmann, wat saam met Rukoro in Duitsland is, het gesê min aandag is voor die hekke van die presidentskantoor aan hulle geskenk. Sy het haar teleurstelling uitgespreek dat Gauck die afvaardiging nie ingenooi het nie, ondanks ’n vroeë aankondiging van hul besoek aan sy kantoor.

Sy het bygevoeg: “Ek is baie bekommerd oor Namibiese-Duitse betrekkinge. Ongelukkig het die aanmatigende houding van die Duitse staat homself gewys. Ons sal sien wat die Namibiese regering oor sulke behandeling van sy burgers te sê het.”

Die Nama- en Ovaherero-groep het in die middel van Junie met onbepaalde aksie gedreig as die Duitse regering teen 2 Oktober nie die volksmoord erken of aan hul eise om vergoeding voldoen nie.

Duitse popster wil Namibiese renosters red

‘n Derde witrenoster is op die wildsplaas Okamahoro wes van Okahandja in Namibië gestroop, het die Republikein berig.

Volgens die polisie van die Otjozondjupastreek is die renoster met 10 geweerskote neergevel. In Mei is ook twee witrenosters op dié plaas gestroop. Niemand is nog in hegtenis geneem nie en die ondersoek duur voort.

Intussen het die opbrengs van ’n potjie poker op Swakopmund die boerpot van die Red die Renosterfonds (SRT) geword.

Die wedgeld beloop N$100 000 en is deur ’n merkwaardige seun van dié dorp tot die laaste sent vir die bewaring van die bedreigde swartrenosterspesie geskenk.

Die jong man, Christoph Thesen, ’n Duitse popster met die verhoognaam T-Zon, se pa, mnr. Werner Thesen van Swakopmund, het die oorhandiging van die geld aan die voorsitter van die SRT, mnr. Simson !Uri?Khob, waargeneem.

Saam met die oorhandiging was daar ’n onderneming van die jong kunstenaar met Duitsland aan sy voete dat soortgelyke ondersteuning ook in die toekoms van hom verwag kan word.

Die potjie poker is vanjaar in Mei in Hamburg gespeel en Christoph was as “baie belangrike kunstenaar” genooi om daar op te tree. Dit was ’n spel in belang van liefdadigheid wat deur ’n internetmaatskappy, pokerstar.de, aangebied is. Toe stap Christoph met die wedgeld weg.

“Dis ’n mannetjie met ’n groot hart,” het sy pa tydens die oorhandiging gesê. “Hy is deurentyd bewus van sy welsynsverpligtinge. Hy het gehoor van die renosterstropery in sy geboorteland en het onmiddellik besluit om tot die bewaring van die swartrenosters by te dra.”

Christoph is in 1993 op Swakopmund gebore en het ná drie jaar in Windhoek in 2011 aan die DHPS gematrikuleer. As 12-jarige seun het hy reeds sy eerste liedjies geskryf en vrygestel. In 2012 het hy by die Makro Media-akademie in Keulen ingeskryf en in 2015 was hy gekwalifiseer om spesiale geleenthede aan te bied.

Sy loopbaan het as YouTube/rap/hip-hop kunstenaar ontwikkel. In 2014 het sy eerste album, Doppelleben.

Vroeër vanjaar het hy meer as 20 verhoogoptredes in Duitsland en Oostenryk gelewer. Sy tweede album is op pad en teen September behoort sy tweede Europese toer te begin.

BRICS kan G7 binnekort inhaal

Die BBP van die BRICS-lande kan dié van die G7 binne twee of drie jaar oortref, het die Doema se hoof van Buitelandse Betrekkinge, Aleksei Pusjkof gesê.

“In 2014, het die totale bruto binnelandse produk van BRICS-lande 30 persent bereik [van die BBP van die wêreld]. Dit is minder as dié van die G7, maar die verskil is sewe of agt persent. Die gekombineerde BBP van die BRICS-lande, volgens die Internasionale Monetêre Fonds is $32,5 triljoen [met koopkragpariteit bereken]. Die G7 s’n is $34,7 triljoen. Gegewe dat die BRICS-lede meestal veel hoër groeikoerse as die G7 toon, kan ons aanvaar dat in die volgende twee of drie jaar die totale BBP van die BRICS-lande meer as die G7 sal wees,” het Pusjkof aan verslaggewers by die eerste BRICS Parlementêre Forum in Moskou gesê.

Hy het verder gesê dat BRICS die Forum verkieslik jaarlikse moet hou, en as dit gebeur, sal dit help om die wêreld meer regverdig en multipolêr te maak, gebaseer nie op die superioriteit van een land oor die ander nie, maar op die balans van belange.

Die ekonomiese sentrum van die wêreld is aan die verander, en die ontwikkelde Weste sal sy invloed en gesag in die internasionale arena met spelers soos BRICS moet deel, het Pusjkof gesê.

Westerse lande het ten minste €40 miljard verloor weens Amerikaans-geleide sanksies teen Rusland.

Duitsland word veral belemmer om produktiewe samewerking uit te brei.

Die EU verloor ten minste €21 milard weens die sanksies volgens die Spaanse minister van buitelandse sake. Volgens skattings van Japanese ekonome kan die syfer tot soveel as €30 miljard wees.

Die sanksies is ingestel nadat die MH17-vlug bo die Oekraïene afgeskiet is en die VSA Rusland vir die tragedie blameer het.

Rusland het ontken dat hulle verantwoordelik is vir die ramp en dadelik inligting vrygestel wat hulle van blaam onthef. Die VSA weier steeds om inligting oor die gebeurtenis bekend te maak, maar hou steeds vol met sanksies.

Zuma, Poetin hou samesprekinge

Die Russiese president, Vladimir Poetin, en president Jacob Zuma het hulle bilaterale samesprekings in Moskou afgesluit, het RSG berig.

Die twee leiers het tydens die vieringe van die 70 ste herdenking van die oorgawe van Nazi-Duitsland in die Tweede Wêreldoorlog samesprekings gevoer.

Volgens ‘n verklaring deur die Presidensie het die twee leiers die status van die Interregeringskomitee oor Handel en Ekonomiese Samewerking vir die komende BRICS-beraad in Julie in Moskou bespreek.

Poetin en Zuma het ook ooreengekom om onderlinge samewerking in mynwese, energie en landbou te verskerp.

Rusland het die oorwinning van die Geallieerdes oor Duitsland met ‘n luisterryke militêre parade gevier.

Dit was ‘n verleentheid vir die oorwinnaars oor Nazisme in die Weste wat nie die geleentheid wou bywoon nie.

Duisende Basters vier hulle geloftedag

Sedert 1977 vier die Rehoboth Basters fees by Sam !Khubis, sowat 80 km suid-wes van Rehoboth ter herdenking van hul volk se bestaan wat amper uitgewis is deur die Duitse koloniale magte.

Nagenoeg 5 000 mense het dié week na die Sam !Khubis-terrein naby Rehoboth opgeruk om die 100ste herdenking van die geskiedkundige Slag van Sam !Khubis te vier, wat volgens die eeufeeskomitee die grootste fees ooit was.

Die Rehoboth Basters het vroeër ‘n gelofte afgelê om die twee dae elke jaar te herdenk.

Die Duitse Schutztruppe het op 7 Mei en 8, 1915 in die koppies van Sam !Khubis vanweë goddelike ingryping skielik en inderhaas teruggetrek, sê die Basters.

Die Basters se ammunisie het tydens die geveg opgeraak. Die beleërde Basters het daarin geslaag om enkele wapens van hul aanvallers te steel, maar het gou besef dat die ergste hulle in die gesig staar en hulle het glo begin bid dat God hulle moet spaar.

‘n Aantal geskiedkundiges beweer dat die skielike Duitse besluit om terug te trek te wyte was aan die naderende Suid-Afrikaanse geallieerde troepe wat met die Eerste Wêreldoorlog teen Duitsland in Suidwes-Afrika opgetree het.

In 2002, toe die land se Swapoleier Sam Nujoma, dit bygewoon het, was daar skaars 2000 mense.

Die voorsitter van die eeufeeskomitee, mnr. Jacky Britz, was oorweldig deur die deelname van hoofsaaklik Basters wat van heinde en verre gery het vir die geleentheid.

“As voorsitter voel ek ons het ons hoofdoel bereik en dit met 300% oorskry. Die doel was om ons mense hier te kry om die gelofte wat hulle teenoor God gemaak het, vir die 100ste jaar te herdenk en om in vrede en eenheid saam te wees. Dit is die gevoel wat mens hier kry. Meer spesifiek is hierdie ‘n goddelike oomblik.”

Die dag se program het begin met die hysing van die rooi, swart en wit vlag van die Rehoboth Bastergemeente (RBG) en die Namibiese vlag, gebede en eerbetoon aan dié wat op 8 Mei 1915 by Sam !Khubis gesterf het. Aan al die slagoffers van die Eerste Wêreldoorlog is ook hulde gebring.

Daar was verduidelikings van die betekenis van die feesvlam wat op ‘n hoë paal teen een van die koppies aan die brand gesteek is, die betekenis van die RBG-vlag, die doel van die byeenkoms en die simboliek van die program wat ‘n sterk godsdienstige inslag gehad het.

‘n Gedenknaald is ook onthul. Bo-op die gedenknaald is twee biddende hande met drie pilare en die inskripsies “geloof”, “hoop” en “liefde”, asook “in tere herinnering aan hulle wat die hoogste prys betaal het tydens die stryd van Sam !Khubis” aangebring.

“Dit is ‘n wonderlike geleentheid. Dit lê sterk fondamente vir Rehoboth,” het ‘n feesganger gesê.

“Ek voel so vry; ek is vir niks bang nie. As kind het ons nie die geleentheid gehad om aan so ‘n groot viering deel te neem nie,” het mnr. Camazane Mouton aan die Republikein gesê.

“Dit is ‘n belewenis en ek hoop dat die volgende nageslag sal voortbou op goeie dinge,” het mnr. Tier van Wyk gesê.

Hoewel sy naam op die program verskyn het, het president Hage Geingob nie die geleentheid bygewoon nie.

Daar was ook kritiek uit sekere geledere dat die vieringe te godsdienstig is. “Dit is veronderstel om ‘n godsdienstige geleentheid te wees,” het mnr. Gino van Wyk, ‘n lid van die komitee, gese.

Nazi-verhoor te midde van openlike Nazisme in Europa

‘n Sogenaamde oorlewende van Auschwitz, me. Eva Pusztai-Fahidi, is die klaagster in die verhoor van die voormalige Nazi-offisier Oskar Groening, in Lueneburg, Noord-Duitsland.

Die 93-jarige man, wat die bynaam die “Boekhouer van Auschwitz” het, word aangekla as medepligtige tot moord in 300 000 gevalle van gedeporteerde Hongaarse Jode wat na Duitse kampe gestuur is.

Intussen steun die EU, waaronder ook Duitsland, asook die VSA openlik Nazi’s in die Oekraïne dmv ‘n NAVO-veldtog.

Die Nazi-party, Svoboda, geniet die beskerming van die Kiëf-junta wat ontken dat daar ekstremiste in die oorlog teen hul eie bevolking ontplooi is.

Die verklaring van die Oekraïense intelligensiebaas dat geen sulke groepe “geregistreer” is in Kiëf nie, kom net twee weke nadat die leier die ekstremistiese groep, Regse Sektor, Dmitri Jarosj, aangestel is as ‘n adviseur vir die weermaghoof.

Jarosj, ‘n internasionale krimineel, word ook deur Interpol gesoek. Hy het ingestem om duisende Nazi’s te ontplooi wat ondergeskik aan die junta se weermag sal wees om die Russiessprekende minderheid in die ooste van die land wat graag wil afstig, te terroriseer.

‘n Aansienlike teenwoordigheid van Oekraïense Nazi’s is al by verskeie geleenthede uitgewys deur die media. In die begin van Maart het USA Today berig dat van die Azof-vrywilligerbataljon se lede openlik die Nazi-ideologie aanhang. Hulle dra openlik SS-wapens en swastikas.

Daar is die afgelope maand reeds drie joernaliste in die konflikgebied vermoor nadat hulle berigte die lig laat sien het wat Kiëf in ‘n swak lig stel.

Gedenkdiens vir Germanwings-slagoffers in Köln

‘n Gedenkdiens vir die slagoffers van verlede maand se Germanwings-vliegtuigongeluk in die Alpe, sal vandag by Köln-katedraal gehou word.

Daar word sowat 1 500 mense by die diens verwag, insluitende families van die slagoffers, sowel as die Duitse Kanselier, Angela Merkel.

Die Ministers van Vervoer van Frankryk en Spanje, sowel as Lufthansa-hoof, Carsten Spohr, sal ook na verwagting die diens bywoon.

Medevlieënier Andreas Lubitz het na bewering die Germanwings Airbus op 24 Maart doelbewus laat verongeluk en die dood van 150 mense veroorsaak omdat hy glo “depressief” was.

Die deur van die kajuit het gesluit nadat die vlieënier ‘n draai gaan loop het en nie kon terugkeer nie.

Inhoud van die tweede swart vlugopnemer wat meer lig op die saak sou kon werp, het glo “weggeraak” volgens ‘n verklaring deur die Franse president Francois Hollande.

‘n Kers vir elk van die slagoffers sal aangesteek word en vlae regoor Duitsland sal halfmas hang.

Vriende van Lubitz, veral mense van sy tuisdorp Montabaur wat hom persoonlik geken het, sê intussen hy word doelbewus as ‘n moordenaar voorgehou, maar dit is ‘n valse voorstelling.

Groot bevolkingstudies dui daarop dat Lubitz se geestelike ongesteldheid nie die waarskynlikheid van geweld teen ander verhoog nie,” sê die psigiater Michael Peterson, ‘n assistent-professor in die departement van psigiatrie aan die Universiteit van Wisconsin se Skool vir Geneeskunde en Openbare Gesondheid in Madison, VSA.

Dit verhoog eerder die waarskynlikheid dat die pasiënt homself sal kwaad aandoen.

Lubitz se ondersteuners het ‘n Facebook-bladsy geskep met die titel (in Duits): “Andreas Lubitz A320, ons is teen die heksejag” om hul teorieë te deel oor die oorsake van die ramp in die Franse Alpe.

Verskeie kommentare op die bladsy het gesê ondersoekbeamptes se stellings dat Lubitz, 27, doelbewus die vliegtuig verongeluk het, is deel van ‘n sameswering deur Lufthansa om sekere meganiese probleme weg te steek.

Sommige van die Facebook-bladsy se honderde volgelinge het voorgestel dat daar ook deur Lufthansa met die eerste vlugopnemer gepeuter is.

Kommentators het voorts daarop gewys dat ‘n tweede vlugopnemer gevind is maar sonder inhoud, ‘n duidelike bewys van ‘n toesmeerdery.

Taalraad vier Basters se ‘Bloedrivier’

’n Afvaardiging van die Afrikaanse Taalraad (ATR) in Suid-Afrika het Namibië verlede week besoek om bande met die Afrikaanssprekende gemeenskappe in die land te verstewig, het die Republikein berig.

Dr. Hendrik Theys, ondervoorsitter van die ATR, sê die ATR is ’n burgerlike sambreelorganisasie in die buurland.

Theys, wat Namibië saam met twee van die ATR se direksielede, mnre. Danie van Wyk en Waldy Kastoor, besoek het, sê die raad sou graag wou sien dat ’n taalvereniging vir alle Afrikaanssprekendes in Namibië gestig word om saam met dié moederorganisasie in Suid-Afrika, op inklusiewe wyse na die belange om te sien van die onderskeie Namibiese gemeenskappe wat Afrikaans in die huis praat.

Hulle het daarom besoek gebring aan die Afrikaanse departement van die Universiteit van Namibië, Afrikaanse media-instellings, skole, die Bastergemeenskap van Rehoboth, die organiseerders van die Windhoek Woordfees en ander kultuurorganisasies.

“Ons hoop verteenwoordigers van hierdie groepe sal nou ’n verkennende vergadering reël met die oog daarop om so ’n taalvereniging te stig,” sê Van Wyk.

Die afvaardiging is veral opgewonde oor die honderdjarige herdenking van die Slag van Sam //Kubis op 8 Mei vanjaar en beplan om dit by te woon. Dit is ’n belangrike geleentheid vir die Bastergemeenskap, wat die eerste mense was wat Afrikaans na hierdie land gebring het, sê Theys.

Sam //Kubis is ’n sirkelvorminge bergreeks sowat 60 km vanaf Rehoboth.

Die Basters is op 8 Mei 1915 deur die Duitsers daar aangeval met twee kanonne en drie Maxim-masjiengewere in ’n geveg wat heeldag geduur het. Ná ’n gebed en gelofte wat glo ooreenkomste toon met dié van die Boere tydens die Slag van Bloedrivier, het die Duitse troepe glo teruggeval. Die Basters herdenk jaarliks dié dag.

Theys sê die ATR verstaan dat Afrikaans “in verskillende kleure en geure” kom.

“Alle variëteite van Afrikaans het sy unieke plek en moet gekoester word. Ons moet dit gebruik, opteken, erken, waardeer en in woordeboeke opneem. Maar ons moet terselfdertyd ander taalsprekers se tale en kultuur erken en respekteer,” sê hy.