Etiket: ekonomiese groei

Graderingsagentskap halveer SA se groeivooruitsigte

Die graderingsagentskap Fitch het Suid-Afrika se groeivooruitsigte vir 2017 gehalveer tot 0,6 persent weens die land se swak ekonomiese vertoning en voortgesette politieke veldtog teen president Zuma.

Fitch waarsku dat die beoogde verandering aan die wetgewing oor myneienaarskap dui op radikale populisme wat dreig om ekonomiese beleid te oorskadu.

Fitch het ook die Minister van Finansies, Malusi Gigaba, se 14-punt-plan om ekonimiese groei te bevorder gekritiseer, en gesê baie van die voorstelle is ou nuus wat waarskynlik geen verskil sal maak nie.

Die plan om byvoorbeeld ook ‘n Nasionale Gesondheidsversekering in te stel, sal ‘n ramp wees, omdat die regering nie genoeg geld sal hê om dit te befonds nie, sê die Vryemarkstigting.

‘n Enkele verpligte mediese skema word voorgestel, terwyl privaat mediese skemas slegs aanvullende dienste sal lewer. ‘n Woordvoerder sê só ‘n nasionale versekeringsplan sal ‘n reuseskema wees, 25 keer groter as byvoorbeeld Discovery Health, en boonop onder staatsbestuur. Staatsinstansies soos die SAL en die Poskantoor sukkel reeds om kop bo water te hou omdat sulke instellings nie doeltreffend bestuur word nie, sê hy.

Sedert Maart verkeer Suid-Afrika in ‘n resessie te wyte aan voortdurende wanbestuur wat beleggersvertroue verder knou. Fitch het die land se skuld ná President Jacob Zuma se omstrede kabinetskommeling tot rommelstatus afgegradeer en dit in Junie herbevestig.

Intussen toon ‘n opname onder ekonome deur Bloomberg dat slegs drie uit 23 voorspel dat die Suid-Afrikaanse Reserwebank die repokoers vandag sal verlaag.

Volgens inflasiesyfers wat gister bekendgemaak is, het inflasie in Junie meer as verwag teruggesak tot 5,1 persent vanaf die vorige maand op 5,4 persent. Die beleidskomitee sal later vandag sy besluit bekend maak.

Die meeste ekonome verwag dat die uitleenkoers onveranderd gelaat gaan word.

SA se rol in BRICS sink weens gebrek aan navorsing

Indien ‘n mens die verklaring van die Streekverteenwoordiger vir Asië en die Stille Oseaan-gebiede van die FAO
ná afloop van die 7de vergadering van die Ministers van landbou van die BRICS-lande op 16 Junie in Nanjing, China, verlede week saamlees met die jongste ekonomiese vooruitskatting van die OECD, dan dink ‘n mens onwillekeurig aan die Aspoestertjie-sprokie.

Die FAO maak groot gewag van die rol wat die vyf BRICS-lande kan speel in die globale heropbou van die ekonomie vanweë die omvang van die vyf lande se bydraes tot die wêreld. Brasilië, Rusland, Indië, China en Suid-Afrika huisves gesamentlik meer as 40% van die wêreld se bevolking en is vir meer as 20% van globale GBP verantwoordelik. Meer as een derde van die wêreld se graan word deur dié vyf geproduseer en Rusland het in 2015 die wêreld se grootste koring-uitvoerder geword. Daar kan dus verwag word dat die BRICS-lande ‘n betekenisvolle en leidende rol kan speel om honger en armoede te verlig, soos vervat in die Millennium-doelwitte vir 2030.

Die jongste vooruitskatting van die OECD dui op matige positiewe, beduidend ongelyke globale ekonomiese groei, maar dat die verwagte voordele nie genoeg mense outomaties kan bevoordeel nie.

Wat verblydend is, is die betekenisvolle sterk groei wat in van die BRICS-lande verwag word – van meer as 7% in Indië en China se net meer as 6.5% (al sal die groeikoers na verwagting verder maar gering daal). Vir Brasilië verwag die OECD ‘n positiewe groeikoers van 1.6% vanjaar, terwyl Suid-Afrika die bus verpas met afwaarts aangepaste groeiverwagtinge. Die vraag na uitvoer uit die BRICS-lande kan kop optel met die Euro-ekonomie wat meer as 2% kan groei, terwyl Amerika ook kan uitsien na die voordele van positiewe ekonomiese groei. Wat egter van fundamentele belang is, is dat verwagte groei ander drywers gaan hê, met duidelike waarskuwings aan die regering om nie selfvoldaan agteroor te sit nie.

Ekonomiese groei sal hoofsaaklik tegnologies gedrewe wees met kwalitatiewe verbetering in die gehalte van die kapitaal wat aangewend gaan word. Dit sal die nodige produktiwiteit ‘n hupstoot gee met gevolglike uitsetspronge, wat nou so nodig is. Waardekettings gaan verdiepende integrasie ervaar, met selfs ‘n verlies aan werkgeleenthede, maar verbeterde opbrengste op die nuwe kapitaal wat belê moet word. In ontwikkelende lande kwel die onvermoë om te kan bestee en hoe dié verwagte surplus witmielie-oes in Suid-Afrika dus weggeëet kan word.

Die FAO maak gewag van die goeie status van landbounavorsing in die BRICS-lande, maar in April 2017 se ASTI verslag deur Nienke Beintema en Gert-Jan Stads: “A Comprehensive Overview of Investments and Human Resource Capacity in African Agricultural Research”, is die ontoereikende besteding op navorsing opvallend. Dit is ten spyte van die ondernemings van lande suid van die Sahara om jaarliks 10% van hul landboubegrotings op navorsing te spandeer – die Comprehensive Africa Agriculture Development Programme (CAADP) – ten einde 6% sektorale groei te bewerkstellig. Suid-Afrika is ‘n navorsing-arm land en bepaald nie in dieselfde liga as die ander BRICS-vennote nie. Indien Suid-Afrika gemeet sou word aan die maatstawwe vervat in die POLITICAL ECONOMY OF UNDERINVESTMENT IN AGRICULTURAL RESEARCH van Beintema en Stads, slaag ons die toets met onderskeiding. Navorsingbesteding in landbou deur die staat is betekenisvol minder as die toename in landbou se GBP – die landbounavorsing-intensiteitverhouding daal konstant. Dit is rondom 1%.

Terug by die sprokie en die prins se soeke na die eienares van die skoen is die immer gelukkige einde, maar met minder mooi toepasbaarheid al hier. Indien die oorwig van staatsbesteding bly fokus op veranderde grondgebruik soos versnelde grondhervorming waar produktiewe eenhede vir herverdeling onttrek word, die blote in-bedryf-stel van onbenutte plase in staatsbesit, en vele ander inisiatiewe, sal verbeterde tegniese doeltreffendheid as die belangrikste dryfveer vir groei in landbouproduksie en markontwikkeling as die prins, bloot verbyry en aspoestertjie sal bly vloere skrop.

Bron: Dr Kobus Laubscher, OFM Nuus

Mynbou-vooruitsigte lyk bedroewend sê ontleder

‘n Mynboukonsultant, Peter Major, sê die bedryf sukkel weens metaalpryse wat die afgelope 12 maande skerp gedaal het

Die Chinese aanvraag wat kwyn, het gesorg vir laer volumes van alle kommoditeite.

Major het aan RSG gesê 15 jaar gelede het mynbou 50% van Suid-Afrika se verdienste verteenwoordig, terwyl nié landbou óf toerisme tans kan instaan vir die verlies nie.

Sowel landbou as toerisme is aan die afneem en kan dus nie die inkomste genereer waarvoor mynbou gesorg het nie.

Mynbou-ontleders glo ook nie dat die sektor binnekort gaan herstel nie.

Dit volg nadat syfers deur Statistieke Suid-Afrika bekendgemaak is wat toon dat mynproduksie in Oktober vanjaar met sowat 5% gedaal het in vergelyking met ‘n jaar gelede.

Een van die wêreld se grootste mynmaatskappye – Anglo American – het ook drastiese herstruktureringsplanne aangekondig en gaan sy werkmag met 85.000 besnoei vanweë die skerp dalings in kommoditeitspryse.

Major het nie uitgebrei oor grondaansprake van die EFF nie.

Stryd rondom BRICS verhewig

Die BRICS-groepering se posisie teenoor korporatiewe mag, het gelei tot die jongste skermutseling tussen die VSA en BRICS.

By die vierde BRICS-byeenkoms in Durban het lede gesê gesonde kompetisie is ‘n voorvereiste vir ekonomiese groei.

Dit is bo-aan die agenda in Durban om onmededingende gedrag in die onderskeie lande te oorkom.

Die groep sê hulle is vasbeslote om weg te doen met monopolieë en die verbetering van die groei in opkomende ekonomieë.

Duur verbruikersgoedere, gebrek aan innovasie en stadige ekonomiese groei is rampspoedig vir opkomende ekonomieë, net soos monopolieë en nywerheidskartels sê lidlande.

Brasilië ondersoek tans sement- en koffiekartels.

Rusland se ekonomie is geruk deur samespanning toe Samsung, LG en Phillips pryse op monitors gemanipuleer het.

Indië sukkel met monopolieë op natriumkarbonaat wat gebruik word om glas te maak asook in sy sementbedryf.

En China het reeds motorvervaardigers soos Audi en Chrysler beboet vir onmededingende gedrag.

‘n Raadgewende maatskappy oor ontluikende markte, Frontier Advisory Deloitte sê egter dit is noemenswaardig dat die beleggingsbestuursmaatskappy, Goldman Sachs sy BRICS-fonds gesluit het.

Deloitte se besturende direkteur, Martyn Davies het aan ‘n beleggingsberaad in Johannesburg gesê beleggers het verkeerdelik geglo dat die wêreldekonomie na ontluikende markte verskuif, met die BRICS-lede Suid-Afrika, Brasilië, Rusland, Indië en China as die vernaamste rolspelers.

Hy sê Rusland en Brasilië se ekonomië is aan die afneem, terwyl Suid-Afrika se ekonomie vasgeval het. Slegs China is nog sterk, ten spyte van laer groeisyfers.

IMF, landbou waarsku teen kragverhogings

Eskom sal moontlik nie hierdie jaar verdere tariefstygings aan al sy kliënte kan deurgee nie, na waarskuwings van die IMF en landbou.

Tydens die verhoor van die Nasionale Energieguleerder oor Eskom se voorgestelde tariefverhogings, het die kragreus gevra vir ‘n bykomende tariefverhoging van meer as nege persent vanjaar.

Eskom vra vir die verdere tariefverhoging van meer as nege persent van die energiereguleerder, NERSA, behalwe die 12 persent wat reeds toegestaan is.

Agri SA het vroeër gewaarsku dat ‘n bykomende Eskom tarief-verhoging van meer as 25 persent daartoe sal lei dat boere nie genoeg kos kan produseer om die mense van Suid-Afrika te voed nie.

Die landbou-organisasie het gesê Suid-Afrika beleef sy ergste droogte in 20 jaar.

‘n Senior ekonoom van Agri SA, Thabi Nkosi het gesê die landbousektor het al vanjaar ’n geraamde skade van meer as nege miljard rand gely weens die droogte, wat tot groot skuld onder boere gelei het.

Die Internasionale Monetêre Fonds het ook gewaarsku dat Suid-Afrika se voortdurende kragkrisis die grootste struikelblok is vir groei.

Die IMF sê in ‘n verslag oor Suid-Afrika met die kragkrisis wat al hoe meer verdiep, word slegs ‘n matige herstel tot ‘n twee persent groei vir 2015-2016 verwag.

Staatshulp aan die sukkelende Eskom en wegholstaatsdienslone sal openbare finansies knou, volgens die IMF.

Eskom se waarnemende uitvoerende hoof, Brian Molefe, was Dinsdag in die warm stoel toe hy die onbenydenswaardige taak gehad het om te pleit vir nog regeringshulp.

Molefe en sy span het besonder onvoorbereid vir die verhore opgedaag, en energiereguleerder het Eskom se voorleggings uitmekaar geskeur.

Eskom argumenteer dat hulle sonder ‘n bykomende R16 miljard vir diesel en korttermynkragaankope, beurtkrag van Fase Twee as ‘n daaglikse werklikheid sal moet aanvaar.

Volgens ‘n brief van die Nasionale Tesourie aan munisipaliteite sal enige tariefverhoging wat na 15 Mei vanjaar aangekondig is, na die volgende finansiële jaar oorgedra moet word.

NERSA het die brief tydens die verhoor aan Eskom oorhandig. Molefe en sy span was klaarblyklik nie daarvan bewus nie.

Volgens ‘n woordvoerder van NERSA, Thembani Bukula, was hulle wel bewus van die regering se opdrag.

Groot polisieteenwoordigheid na skietery by Medupi

Die polisie moes in groot getalle by die Marapong-lokasie in Ellisras (Lephalale) in Limpopo ontplooi word na ‘n skietvoorval.

Lede van die polisie se taktiese-reaksie-eenheid en ander polisiebeamptes patrolleer tans die gebied.

Twee konstruksiewerkers van Eskom se Medupi-kragstasie is gewond in die skietery.

Van die werkers by die kragaanlegkonstruksie het Donderdag weggebly uit vrees vir hul veiligheid, nadat ‘n onbekende skieter losgebrand het op ‘n groep werkers wat gewag het vir vervoer na die bouperseel.

Twee weke gelede is daar op twee busse geskiet, en een van die bestuurders is in die skietery gewond.

Honderde busse het egter Vrydag werkers weer aangery sonder enige ontwrigting.

‘n Span ondersoekbeamptes is intussen ingeroep om die skietvoorvalle te ondersoek.

Suid-Afrika se ekonomiese groeivooruitsigte is afwaarts aangepas weens vertragings in die vordering van die konstruksie van nuwe kragaanlegte.

Na verwagting sal die ekonomie met twee persent groei. Sonder die kragonderbrekings sou die koers tussen 2,5 en 3 persent gewees het.

Die graderingsmaatskappy, Fitch, het vroeër die maand sy kredietgradering van trippel-B bevestig en gesê ‘n onbestendige kragtoevoer het daartoe gelei dat hy sy ekonomiese groeivooruitsigte vir vanjaar en aanstaande jaar afgeskaal het.

Die Minister van Finansies, Nhlanhla Nene, sê die regering is op koers om teen 2017 sy tekort tot 2,5 persent van die Bruto Binnelandse Produk te verlaag vanaf 3,9 persent in die huidige geldjaar.

Eskom het ‘n uur gelede weer begin om Fase Een beurtkrag toe te pas.

Kragonderbrekings sal tot vanaand tienuur toe toegepas word. Die kragverskaffer sê dit is weens ‘n hoër vraag en gebrekkige opwekkingskapasiteit.

BRICS kan G7 binnekort inhaal

Die BBP van die BRICS-lande kan dié van die G7 binne twee of drie jaar oortref, het die Doema se hoof van Buitelandse Betrekkinge, Aleksei Pusjkof gesê.

“In 2014, het die totale bruto binnelandse produk van BRICS-lande 30 persent bereik [van die BBP van die wêreld]. Dit is minder as dié van die G7, maar die verskil is sewe of agt persent. Die gekombineerde BBP van die BRICS-lande, volgens die Internasionale Monetêre Fonds is $32,5 triljoen [met koopkragpariteit bereken]. Die G7 s’n is $34,7 triljoen. Gegewe dat die BRICS-lede meestal veel hoër groeikoerse as die G7 toon, kan ons aanvaar dat in die volgende twee of drie jaar die totale BBP van die BRICS-lande meer as die G7 sal wees,” het Pusjkof aan verslaggewers by die eerste BRICS Parlementêre Forum in Moskou gesê.

Hy het verder gesê dat BRICS die Forum verkieslik jaarlikse moet hou, en as dit gebeur, sal dit help om die wêreld meer regverdig en multipolêr te maak, gebaseer nie op die superioriteit van een land oor die ander nie, maar op die balans van belange.

Die ekonomiese sentrum van die wêreld is aan die verander, en die ontwikkelde Weste sal sy invloed en gesag in die internasionale arena met spelers soos BRICS moet deel, het Pusjkof gesê.

Westerse lande het ten minste €40 miljard verloor weens Amerikaans-geleide sanksies teen Rusland.

Duitsland word veral belemmer om produktiewe samewerking uit te brei.

Die EU verloor ten minste €21 milard weens die sanksies volgens die Spaanse minister van buitelandse sake. Volgens skattings van Japanese ekonome kan die syfer tot soveel as €30 miljard wees.

Die sanksies is ingestel nadat die MH17-vlug bo die Oekraïene afgeskiet is en die VSA Rusland vir die tragedie blameer het.

Rusland het ontken dat hulle verantwoordelik is vir die ramp en dadelik inligting vrygestel wat hulle van blaam onthef. Die VSA weier steeds om inligting oor die gebeurtenis bekend te maak, maar hou steeds vol met sanksies.

SA se duur stadige internet striem glo groei

Suid-Afrika se duur en stadige internet is besig om ekonomiese groei te strem, het RSG berig.

Volgens ‘n opname deur die Instituut vir Rasseverhoudinge is die maandeliks koste van breëband-internet in Suid-Afrika meer as tien keer soveel as in Brittanje.

Die Britte geniet egter ‘n internet-spoed wat sowat vyf keer vinniger is.

Die uitvoerende hoof van die instituut, Frans Cronje sê goedkoper en vinniger breëband sal tot ‘n aantal ekonomiese voordele lei en die bruto binnelandse produk ‘n broodnodige hupstoot gee.

Die Internasionale Telekommunikasie-vakbond het Suid-Afrika 137ste geplaas uit 166 lande in terme van die persentasie van die bevolking wat internettoegang het.

Reserwebank se swart uitnemendheid gevier

Die Suid-Afrikaanse Reserwebank voorsien nie die risiko van ‘n verdere afgradering vir Afrika se mees ontwikkelde ekonomie nie het die nuwe Reserwebankgoewerneur Lesetja Kganyago gesê.

Kganyago het die stelling vroeër gemaak na aanleiding van die vrystelling van die bank se Desember monetêre beleidsoorsig.

Moody’s het Suid-Afrika se kredietgradering in November afwaarts aangepas, met verwysing na swak vooruitsigte vir medium-termyn groei en stygende staatskuld.

Die adjunk-minister van finansies, Mcebisi Jonas, sê sy departement is vol vertroue dat die Reserwebank in staat is om die land veilig deur die huidige ekonomiese krisis te lei.

Hy het Donderdag aan afgevaardigdes by ‘n gala-dinee van die African Business and Professional Alliance gesê die land se fiskale vooruitsig is beperk en dat die ekonomie nie noemenswaardig sal groei nie.

Die alliansie het swart uitnemendheid en die aanstelling van die nuwe president van die Reserwebank, Lesetja Kganyago, gevier.

Jonas sê maatreëls is ingestel om regeringskuld te verminder en om die gaping tussen die regering se inkomste en uitgawes te verklein.

SA plaas ebola op G20-beraad se agenda

Suid-Afrika het die bespreking oor die ebolakrisis in Wes-Afrika by die G20-leiersberaad in Brisbane, Australië versoek, het die minister van finansies, Nhlanhla Nene gesê.

“Ons is inderdaad bekommerd. Ons versoek het eintlik daartoe gelei dat sake wat verband hou met ebola op die G20-vlak bespreek is sowel as in alle ander multilaterale vergaderings waaraan ons deelgeneem het,” het Nene aan verslaggewers in Pretoria gesê.

“Ons verstaan dat dit nie net ‘n ekonomiese kwessie is nie, maar ‘n humanitêre saak. Hierdie [lande wat geraak word] is ons handelsvennote. Ons moet multilaterale instellings en verbintenisse hê. ”

Nene het die gesprekke as bemoedigend beskryf. Hy het gesê die Verenigde State van Amerika sowel as Spanje het ook met die siekte te kampe weens verbintenisse tussen alle dele van die wêreld.

“Ons het gesien dat filantrope, selfs van ons eie land, nie net praat daaroor nie, maar die finansiële hulpbronne gee om te verseker dat diegene in Wes-Afrikalande bygestaan word om ebola te bekamp.”

Nene het gesê die leiers van Brasilië, Rusland, Indië, China en Suid-Afrika (BRICS) het op die kantlyn van die G20-beraad beraadslaag.

President Jacob Zuma het die Suid-Afrikaanse afvaardiging na die beraad gelei wat tussen 15 en 16 November plaasgevind het.

Zuma is vergesel deur Nene en die minister van Internasionale Betrekkinge, minister Maite Nkoana-Mashabane.

Nene het gesê die trae globale ekonomiese groei was ‘n groot bron van kommer vir almal by die G20-beraad.

Hy het gesê gesprekke in Brisbane het gesentreer op strategieë deur alle lande wat sal bydra tot die toevoeging van ‘n verdere twee persentasiepunte tot groeivooruitskattings oor die volgende vyf jaar.

Nene het gesê daar was “robuuste gesprek” met betrekking tot oproepe vir die hervorming van bestaande internasionale finansiële instellings, veral die Internasionale Monetêre Fonds (IMF).

“Daar is ooreengekom dat internasionale finansiële instellings sal moet hervorm word om die feit dat ontluikende markte en ontwikkelende ekonomieë nou verantwoordelik is vir die grootste deel van die globale groei, te weerspieël,” sê Nene.

Lede van die G20 is Argentinië, Australië, Brasilië, Kanada, China, Frankryk, Duitsland, Indië, Indonesië, Italië, Japan, Suid-Korea, Mexiko, Rusland, Saoedi-Arabië, Suid-Afrika, Turkye, die Verenigde Koninkryk, die Verenigde State van Amerika en die Europese Unie.

Die internasionale forum is ook bekend as die Groep van Twintig.

Die minister van Verdediging, Nosiviwe Mpahisa-Nqakula, het intussen geweier besonderhede oor president Jacob Zuma se reis na ‘n BRICS-beraad in Brasilië te gee.

Sy het kommer oor inligting wat betref die bewegings van die staatshoof aangedui as rede waarom sy nie die vraag kan beantwoord nie.

Die minister het bygvoeg dat sy toestemming van die Parlement se Staande Komitee oor Verdediging sal vra om die inligting bekend te maak.

Moody’s verlaag SA se kredietgradering

Die kredietgraderingsagentskap Moody’s het aangekondig dat hulle Suid-Afrika se kredietgradering gaan verlaag.

Volgens die Tesourie is die kredietkoers is van BAA1/P-2 tot BAA2/ P-2 aangepas.

‘n Woordvoerder van die Tesourie, Phumza Macanda sê die kredietvooruitsig het van negatief na stabiel verander.

Sy sê die regering neem kennis van Moody’s se besluit weens die verlangsaming van ekonomiese groei.

Macanda sê inisiatiewe wat groei sal bevorder, is nou onontbeerlik.

Poetin lewer ‘n grondverskuiwende toespraak

Wladimir Poetin het Vrydag die enkele mees belangrike toespraak oor buitelandse beleid gelewer sedert hy president van Rusland in 2000 geword het.

Mikhail Gorbatsjof, die voormalige Russiese president, het gesê hy het gedink dit was die beste, en mees betekenisvolle toespraak wat hy ooit gemaak het.

Die reaksie van Westerse politieke ontleders en hul media-elite was daarenteen jammerlik ontoereikend. Die grondverskuiwende toespraak  in Sochi, by die Valdaiklub, het verbasend min aandag ontlok.

Westerse ontleders wat die moeite gedoen het, het dit voorgehou as ‘n uitdagende reaksie op die Amerikaanse beleid van sanksies wat Rusland weens die Oekraïense krisis opgelê is, terwyl die Russiese president byna skaars daarna verwys het.

Hulle het Poetin se uiters samehangende intellektuele raamwerk totaal geïgnoreer.

Dit was ‘n heel ander persoon aan die woord as die aggressiewe, ekspansionistiese en nasionalistiese demagoog wat die Weste graag wil skilder.

Enigiemand wat op soek was na ‘n Poetin om die groot kruistog teen die VSA te lei, moet waarlik ná hierdie toespraak teleurgesteld voel.

Rusland vra nederig samewerking – en nie konflik nie – van die VSA en Poetin se visie van die internasionale stelsel kan slegs na dese as ‘n eng konserwatiewe een beskryf word.

Dit loop soos ‘n goue draad deur die toespraak. Sy hunkering is ‘n tipiese konserwatiewe hunkering na stabiliteit asook wantroue teenoor verandering.

Dit is ‘n wens vir ‘n voorspelbare, organiese, reëls-gegronde stelsel waarin die soewereine regte van volke eerbiedig word. Verandering, wanneer dit gebeur, moet bestuur en nooit aangemoedig word nie .

‘n Groot gedeelte van sy toespraak het gehandel oor die verlies aan balans in die internasionale stelsel wat deur die ineenstorting van die Sowjetunie veroorsaak is.

In plaas daarvan om die wanbalans te herstel, is die VSA besig om die chaos wat daaruit voortvloei aan te moedig, het hy gesê. Die Russiese president het die vrees uitgespreek dat daar aanstons nie meer hefbome sal wees om sulke uitgebreide chaos te tem nie.

Poetin het die lysie herhaal: Kosovo, Irak, Afghanistan, Libië, Sirië en nou Oekraïne. Hy het sy gehoor daarop gewys dat nie een van hierdie plekke tans vooruitgang gemaak het of beter daaraan toe is nie.

Hiermee het Poetin die VSA vergelyk  met ‘n pasryk verkwister wat sy meevaller wegdobbel.

Die Russiese leier het ‘n diep verbintenis tot die internasionale reg bevestig, vertolk op die mees konserwatiewe manier waar regsdokumente, hofbeslissings en verdragstekste moet geld.

Met verwysing na die VN en die Internasionale Geregshof se Raadgewende Mening oor Kosovo, het hy die Krim se posisie helder uiteengesit.

Poetin se opleiding as ‘n regsgeleerde kry nooit media-aandag nie, terwyl sy diens in die KGB al is wat lesers ooit vertel word.

Dit is ‘n visie van Rusland wat geanker is in die internasionale stelsel,  en wat poog om die VSA saam met bondgenote soos China en ander BRICS-lande, waar moontlik in toom te hou, van dwaasheid te weerhou binne die raamwerk van internasionale reg, en om die heersende wêreldorde en stabiliteit te waarborg.

Dit is ‘n tipies Europese visie in die tradisie van die negentiende eeu se groot staatsmanne.

Dit is ‘n visie wat uiteraard baie gewild is in Rusland, ‘n land met ‘n lang en bloedige geskiedenis.

Vir ‘n ekonomie wat groei, het Rusland ‘n bestendige en ordelike internasionale omgewing nodig, het die president benadruk.

Poetin het dit duidelik gemaak deur herhaaldelik te fokus op die belangrikheid van ekonomiese ontwikkeling vir Rusland as oorheersende prioriteit vir sy regering, en daarmee sy afkeur vir vergeldingaksies herbevestig.

Wie kan daarvan verskil?

Rand sukkel met tekort op lopende rekening

Suid-Afrika se tekort op sy lopende rekening maak beleggers bekommerd oor die invloei van buitelandse kapitaal.

China, Suid-Afrika se grootste handelsvennoot, se ekonomiese verlangsaming sal Suid-Afrika negatief beïnvloed, sê ekonomiese ontleders.

Die rand het sy laagste vlak in sewe maande teen die Amerikaanse dollar bereik as gevolg van die swak ekonomiese groei in een van die wêreld se grootste ekonomieë.

Die swak groei in China plaas druk op die geldeenhede van ontwikkelende lande. Die rand het Maandag teruggesak tot R11.18 teenoor die dollar.

Die rand sukkel reeds geruime tyd as gevolg van Suid-Afrika se swak ekonomiese grondbeginsels waar miljarde verkwis word om ‘n bevolkingsontploffing te skep van onderpresteerders.

Die Minister van Energie, Tina Joemat-Petterson, het intussen gesê kernkrag sal ‘n belangrike faktor vir die land se ekonomiese groei wees.

Sy het op die aankondiging van die Russiese atoom-energie-agentskap Rosatom gereageer wat agt kernreaktors aan Suid-Afrika gaan voorsien.

Die direkteur-generaal van Rosatom, Sergei Kirienko, sê die strategiese ooreenkoms van meer as R500 miljard tussen Suid-Afrika en Rusland sal duisende plaaslike werksgeleenthede skep.

Die ooreenkoms wat in die Oostenrykse hoofstad, Wene onderteken is, maak ook voorsiening vir Rusland om te help met die opbou van infrastruktuur in Suid-Afrika.

Kirienko sê dit sal ‘n inspuiting van bykans `n R100 miljard vir die plaaslike ekonomie beteken.

President lewer moeë Staatsrede

In ‘n Staatsrede wat verskeur is deur opposisielede, het president Jacob Zuma min op detail gefokus en byna hoegenaamd nie op die Nasionale Ontwikkelingsplan nie, die regering se groei bloudruk.

Zuma het benadruk dat die skep van werkgeleenthede vinniger ekonomiese groei vereis, maar effektief begin met die 2016 plaaslike regering verkiesingsveldtog.

Hy het direkte ingryping deur die staat in sukkelende munisipaliteite in die vooruitsig gestel.

Hy het spesifiek verwys na die faktuurkrisis in Johannesburg, wat die ANC baie steun kos het.

Verskeie ingrypings sal plaasvind om die ekonomie te help, het hy gesê. ” Ons het ‘n sterk teiken van 5% groei teen 2019. ”

Die toespraak volg na ‘n afgradering Vrydag deur Standard & Poor’s asook Fitch.

Ekonomiese somberheid het verdiep sedert die ekonomie in die eerste kwartaal gekrimp het.

Zuma het gesê die regering is vasbeslote om in samewerking met die private sektor struikelblokke in beleggings te verwyder.

“Ons sou graag wou sien dat die private sektor soveel vertroue in die ekonomie het as die openbare sektor,” het hy gesê.

Hy het erken dat ekonomiese groei ver agter die Regering se teikens is en dat Suid-Afrikaners daaronder ly. Hy sê verandering sal nie sonder verreikende ingrypings gebeur nie.

Volgens Zuma oorweeg die regering die instelling van `n nasionale minimum-loon om ongelykhede in inkomste te verminder.

Uitgebreide en geweldadige stakings, asook `n tekort aan elektrisiteit gedeeltelik verantwoordelik is vir die stadige groei in die ekonomie, het hy bygevoeg.

Met die ekonomie wat verlede maand negatiewe groei getoon het, het Zuma gesê dit is kritiek dat alle belanghebbendes moet vergader om die omvang en duurte van stakings te bespreek.

Zuma het effens broos gelyk toe te midde van ernstige kommer sy eie sowel as oor die land se ekonomiese welstand.

Zuma het nie op die rooi tapyt gestap nie, maar is met ’n wit Mercedes-bussie reg voor die ingang afgelaai.

Die president se gesondheid wek kommer nadat hy tien dae by die huis deurgebring het om te “rus”.

‘n Sigbaar uitgeputte Zuma het die rede met ‘n hees stem gelewer.

Daar behoort dringend aandag gegee te word aan die “onhoudbare arbeidsverhoudinge-omgewing”, het hy gesê.

Hy het ook die regering se plan om die arbeidskrisis in die mynboubedryf op te los uiteengesit.

Zuma het landbou uitgesonder as ’n sleutelbedryf vir werkskepping en gesê die regering beoog om teen 2030 ’n miljoen nuwe werksgeleenthede in dié bedryf te skep.

Om werkloosheid aan te spreek het hy aangekondig dat elke staatsdepartement en openbare entiteit verplig gaan word om internskappe vir jong swartes beskikbaar te stel.

Zuma het gesê die energiesektor sal “radikaal transformeer” en skalie-ontginning asook kernkrag sal deel uitmaak van die regering se planne.