praag.co.za

Tag: BRICS

  • SA se rol in BRICS sink weens gebrek aan navorsing

    Indien ‘n mens die verklaring van die Streekverteenwoordiger vir Asië en die Stille Oseaan-gebiede van die FAO
    ná afloop van die 7de vergadering van die Ministers van landbou van die BRICS-lande op 16 Junie in Nanjing, China, verlede week saamlees met die jongste ekonomiese vooruitskatting van die OECD, dan dink ‘n mens onwillekeurig aan die Aspoestertjie-sprokie.

    Die FAO maak groot gewag van die rol wat die vyf BRICS-lande kan speel in die globale heropbou van die ekonomie vanweë die omvang van die vyf lande se bydraes tot die wêreld. Brasilië, Rusland, Indië, China en Suid-Afrika huisves gesamentlik meer as 40% van die wêreld se bevolking en is vir meer as 20% van globale GBP verantwoordelik. Meer as een derde van die wêreld se graan word deur dié vyf geproduseer en Rusland het in 2015 die wêreld se grootste koring-uitvoerder geword. Daar kan dus verwag word dat die BRICS-lande ‘n betekenisvolle en leidende rol kan speel om honger en armoede te verlig, soos vervat in die Millennium-doelwitte vir 2030.

    Die jongste vooruitskatting van die OECD dui op matige positiewe, beduidend ongelyke globale ekonomiese groei, maar dat die verwagte voordele nie genoeg mense outomaties kan bevoordeel nie.

    Wat verblydend is, is die betekenisvolle sterk groei wat in van die BRICS-lande verwag word – van meer as 7% in Indië en China se net meer as 6.5% (al sal die groeikoers na verwagting verder maar gering daal). Vir Brasilië verwag die OECD ‘n positiewe groeikoers van 1.6% vanjaar, terwyl Suid-Afrika die bus verpas met afwaarts aangepaste groeiverwagtinge. Die vraag na uitvoer uit die BRICS-lande kan kop optel met die Euro-ekonomie wat meer as 2% kan groei, terwyl Amerika ook kan uitsien na die voordele van positiewe ekonomiese groei. Wat egter van fundamentele belang is, is dat verwagte groei ander drywers gaan hê, met duidelike waarskuwings aan die regering om nie selfvoldaan agteroor te sit nie.

    Ekonomiese groei sal hoofsaaklik tegnologies gedrewe wees met kwalitatiewe verbetering in die gehalte van die kapitaal wat aangewend gaan word. Dit sal die nodige produktiwiteit ‘n hupstoot gee met gevolglike uitsetspronge, wat nou so nodig is. Waardekettings gaan verdiepende integrasie ervaar, met selfs ‘n verlies aan werkgeleenthede, maar verbeterde opbrengste op die nuwe kapitaal wat belê moet word. In ontwikkelende lande kwel die onvermoë om te kan bestee en hoe dié verwagte surplus witmielie-oes in Suid-Afrika dus weggeëet kan word.

    Die FAO maak gewag van die goeie status van landbounavorsing in die BRICS-lande, maar in April 2017 se ASTI verslag deur Nienke Beintema en Gert-Jan Stads: “A Comprehensive Overview of Investments and Human Resource Capacity in African Agricultural Research”, is die ontoereikende besteding op navorsing opvallend. Dit is ten spyte van die ondernemings van lande suid van die Sahara om jaarliks 10% van hul landboubegrotings op navorsing te spandeer – die Comprehensive Africa Agriculture Development Programme (CAADP) – ten einde 6% sektorale groei te bewerkstellig. Suid-Afrika is ‘n navorsing-arm land en bepaald nie in dieselfde liga as die ander BRICS-vennote nie. Indien Suid-Afrika gemeet sou word aan die maatstawwe vervat in die POLITICAL ECONOMY OF UNDERINVESTMENT IN AGRICULTURAL RESEARCH van Beintema en Stads, slaag ons die toets met onderskeiding. Navorsingbesteding in landbou deur die staat is betekenisvol minder as die toename in landbou se GBP – die landbounavorsing-intensiteitverhouding daal konstant. Dit is rondom 1%.

    Terug by die sprokie en die prins se soeke na die eienares van die skoen is die immer gelukkige einde, maar met minder mooi toepasbaarheid al hier. Indien die oorwig van staatsbesteding bly fokus op veranderde grondgebruik soos versnelde grondhervorming waar produktiewe eenhede vir herverdeling onttrek word, die blote in-bedryf-stel van onbenutte plase in staatsbesit, en vele ander inisiatiewe, sal verbeterde tegniese doeltreffendheid as die belangrikste dryfveer vir groei in landbouproduksie en markontwikkeling as die prins, bloot verbyry en aspoestertjie sal bly vloere skrop.

    Bron: Dr Kobus Laubscher, OFM Nuus

  • Johann Theron: Die saak vir Zuma

    Johann Theron: Die saak vir Zuma

    Hernieude Zuma-histerie word wyd en syd deur die Suid-Afrikaanse hoofstroommedia verkondig. Die meestal onkundige lesers voel verontreg deur die groeiende lys van wandade wat hulle president straffeloos pleeg, maar word andersyds onthuts deur dieselfde president wat “veg” teen die oorweldigende aanklagte teen sy lydende persona.

    Dit is duidelik dat daar twee kante van die storie is en dat die “storie” al so lank aanhou dat Suid-Afrika eintlik in die donker verkeer as gevolg daarvan. Hierdie donkerte kan verduidelik word deurdat die “media” bereid is om swakker ekonomiese graderings te aanvaar (wat hulself benadeel), net om van Zuma ontslae te raak.

    Die saak moet egter in ‘n breër konteks beoordeel word. Met die demokratisering van Suid-Afrika het toentertydse president FW de Klerk aangedui dat ’n “geleentheidsvenster” ’n vreedsame Suid-Afrika moontlik maak teenoor die alternatief van “burgeroorlog”. Hierdie geleentheidsvenster het van die buiteland gekom in die vorm van Amerika se “Nuwe Wêreldorde”.

    Ná 25 jaar word weer na ’n teenvoeter vir ‘n dreigende burgeroorlog gesoek. Die neo-liberalistiese tegnieke wat aanvanklik gebruik is om (vreedsame) demokrasie te vestig, het intussen een kant van die (konflik) probleem geword. Hierdie toestand dra daartoe by dat Suid-Afrika weer deur donker wolke omgewe word — met geen einde in sig nie.

    Daar is egter weer ’n geleentheidsvenster in die vorm van die Donald Trump-effek. Sy voorstel is die teendeel van die NWO, wat die nuwe geleentheid verduidelik. Maar die nadeel van Trump se benadering is dat hy Amerika belangriker ag as die res van die wereld. Met ander woorde, hy gaan Suid Afrika nie te hulp snel met beloftes soos wat Bush gedoen het nie.

    Dit laat mens amper voel asof die dak nou ingeval het en dat “oorlog” nou ons voorland is.

    Die geleentheid is egter juis dat ons —net soos Trump — Suid-Afrika voorop moet stel. Maar daar is ’n paar probleme daarmee ook. Die eerste is die “burgeroorlog” wat opgelos moet word. Die geskiedenis wys dat ’n nuwe vredesverdrag tussen alle partye moontlik onderhandel kan word.

    Daar is onlangs bevind deur Brand SA dat Suid-Afrika blykbaar nie ’n spesfieke waarde of identiteit het nie. Met ander woorde, ons kan nie soos Australië iets bemark gegrond op die “Australian Way”, of soos Amerika op die “American Way” nie. Dit ondersteun die gedagte van ’n tweede vredesverdrag, omdat dit die pad (way) na die toekoms kan aandui.

    Ons toekomspad word ook baie sterk beïnvloed deur globaliste soos George Soros (veral op die Suid-Afrikaanse middelklas). Suid-Afrika word redelik aanvaar deur ontwikkelde lande as mededingend en die middelklas is dus redelik Westers. Die volgende grafiek vra wie nou eintlik voordeel trek uit globalisme.

    Duidelik is globalisme nie tot voordeel vir die gemiddelde Suid-Afrikaner nie.
    Duidelik is globalisme nie tot voordeel van die gemiddelde Suid-Afrikaner nie.

    Verder het die “International Spectator” onlangs die volgende oor Indië weergegee:

    “India – 7.6% GDP growth in 2016 – Middle class to grow 900% by 2040”

    Dit word nou meer duidelik dat Suid-Afrika se middelklas werklik swakker word as dié van mededingende lande. Verder kan afgelei word dat dit tot die middelklas se voordeel sou wees as fokus op BRICS sou verskerp, in plaas van op Europa en Amerika.

    Daar is egter ’n interessante kronkel in hierdie kat se stert. Onlangse opnames in lande om te bepaal of hulle van globalisme hou het die volgende grafiek opgelewer:

    jt2

    Die afleiding hier is dat die lande (waar globaliste woonagtig is) besig is om hulself van globalisme te distansieer. Dit is oor die algemeen ontwikkelde lande, terwyl ontwikkelende lande saamstem met globaliste.

    Suid-Afrika sit met die teenstrydigheid dat samewerking met ontwikkelende lande aangemoedig word (soos Indië), maar dat globalisme intern onwenslik is. Die antwoord hierop is dat aangesien globalisme gefaal het in sterk lande soos in Europa, dat dieselfde gaan gebeur in swakker lande (omdat globaliste dit juis uitbuit).

    Daarom sal Suid-Afrika eerder gesien word as ’n voorbok gedurende onderhandelinge met sulke lande, terwyl dit onderhandelinge met Amerika en Europa sal vergemaklik. Inderwaarheid ’n wen-wen-situasie.

    Die geleentheidsvenster vir Suid-Afrika is dus om van globaliste ontslae te raak en self die pad vorentoe te ontdek. Dit kan egter nie gedoen word deur die burgeroorlog aan te moedig nie, maar om dit te ontmoedig d.m.v. ’n vredesverdrag.

    Net soos gedurende die Trump-verkiesing, kan sosiale media doeltreffend gebruik word om Zuma te ondersteun.

  • Rousseff in staat van beskuldiging gestel met Rio Spele in volle swang

    Rousseff in staat van beskuldiging gestel met Rio Spele in volle swang

    Met die oë van die wêreld op die Olim­piese Spele in Rio de Janeiro, het senatore in die Brasiliaanse hoofstad Brasilia, dié week met 59 stemme teen 21 teen die geskorste leier, Dilma Rousseff (foto bo) gestem, in ’n 20-uur lange sessie waarvan hoofregter Ricardo Lewandowski die voorsitter was.

    ’n Skuldigbevinding sal beslis daartoe lei dat Rousseff van haar pos onthef word en ’n einde aan die 13-jaar lange bewind van haar regerende Werkersparty maak. Dit sal meebring dat die tussentydse president, Michel Temer, die res van haar termyn tot 2018 sal volstaan.

    Rousseff se teenstanders het net ’n eenvoudige meerderheid in die 81-setel senaat nodig gehad om haar te laat verhoor vir manipulering van regeringsrekeninge en besteding sonder goedkeuring van die kongres, wat hulle aanvoer haar gehelp het om in 2014 herkies te word.

    ’n Uitspraak word teen die einde van die maand verwag en sal ’n tweederdemeerderheid in die senaat verg om Rousseff skuldig te bevind. Dit is vyf stemme minder as wat haar opponente kon bemeester.

    Woensdag se stemmery toon egter dat die beweging om van Rousseff ontslae te raak, steun in die senaat gewen het, wat in Mei met 55 stemme teen 22 gestem het om met beskuldigingsprosedures te begin, wat in Desember 2015 in die laerhuis geïnisieer is.

    Dit sal Temer se hand versterk terwyl hy streef om sy eie legitimiteit te vestig en Brasilië se ontevrede onderklas te bestuur. Ten minste die helfte van die land is fel gekant teen die Spele.

    Die heersende onsekerheid het sy pogings in die wiele gery om die fiskale krisis, wat hy van Rousseff geërf het, aan bande te lê. Waarnemers waarsku dat die ekonomie oënskynlik op pad is na die ergste resessie sedert die 1930’s.

    Temer, Rousseff se konserwatiewe voormalige visepresident, wat die mag in Mei oorgeneem het, het senatore aangemoedig om die verhoor so vinnig moontlik af te handel sodat hy planne in werking kan stel om openbare besteding aan bande te lê, ’n oortoegeeflike pensioenskema kan hervorm en vertroue in die regering se finansies kan herstel.

    Beleggers verwag dat indien Rousseff met die meer sakevriendelike Temer vervang word, dit Brasilië se wisselkoers sal verstewig en aandelepryse op die Sao Paulo-aandelebeurs sal opjaag.

    Rousseff het ontken dat sy enige iets verkeerd gedoen het en skryf haar beskuldiging toe aan pro-Amerikaanse sameswering wat ’n tegniese boekhouding-slenter gebruik het om haar onwettig uit die kussings te lig.

  • Brasilië se nuwe president is nog ongewilder as Rousseff

    Brasilië se nuwe president is nog ongewilder as Rousseff

    Brasilië se nuwe, waarnemende president, Michel Temer, wat pres. Dilma Rousseff vervang, is ‘n lakei van Amerikaanse banke sê sy kritici.

    Brasiliane hoop hul regering kan die land se probleme begin oplos na maande se gekibbel om Dilma Rousseff­ in ‘n staat van be­skuldiging te laat plaas.

    Rousseff (68) is Donderdag vir 180 dae geskors deur die senaat en in ‘n staat van beskuldiging gestel. Sy het glo begrotings­aangeleenthede verswyg om tot president herkies te word.

    Die ergste resessie in jare, die Zika-virusplaag en reëlings vir die Olimpiese Spele wat in Augustus begin, bly nogtans ‘n kopseer vir regeringslui, ten spyte van die stap om van haar ontslae te raak.

    Brasilië is in sy tweede jaar van ‘n resessie en sal na verwagting eers teen 2018 groei toon.

    Hoewel Temer (75) die steun van sakelui het, meen ontleders dat hy met ‘n bedekte coup d’etat aan bewind gekom het, sonder die steun van kiesers.

    Temer is nog minder gewild in Brasilië as Rousseff. Haar gewildheid het tot onder 10% gedaal, maar Temer sal slegs 1% of 2% van die stemme in ’n presidentsverkiesing kan inpalm, is in ’n onlangse peiling bevind.

    Rousseff het hom beskuldig van ‘n “staatsgreep” om van haar ontslae te raak en hy moet nou die open­bare vertroue herstel in ’n politieke stelsel wat Brasiliane as korrup beskou.

    Die Temer-administrasie­ hoop op die herstel van die sukkelende ekonomie omdat die sakewêreld hom as markvriendeliker beskou.

  • BRICS-geveg kom na SA met sakemense wat EFF steun

    BRICS-geveg kom na SA met sakemense wat EFF steun

    Die BRICS-geveg wat ook in Brasilië woed nadat hul president Dilma Rousseff haar amp kwyt is, gaan Suid-Afrika nie gespaar bly nie.

    Bemoedig deur die regime-verandering daar, is daar tans groot druk deur die sakegemeenskap op Pravin Gordhan, die voormalige minister van finansies om Zuma aan te vat.

    Die Valke en nasionale vervolgingsgesag (NVG) maak egter op hulle beurt volgens berigte gereed om Gordhan en ander voormalige kollegas van die Suid-Afrikaanse Inkomstediens (SAID) vir spioenasie in hegtenis te neem.

    Dié afdreiging van Gordhan sal die staat se blootstelling aan BRICS-invloed, of manipulasie deur die Guptas, in die kollig plaas. Indië is ook deel van BRICS en die Guptas het glo daardeur hul greep op Suid-Afrika verkry.

    Met Indië wat tans toenadering soek by die VSA, is die anti-Zuma-faksie hoopvol dat hulle regeringsveranderingsplanne sal slaag.

    Maar nie net Gordhan nie, ook Trevor Manuel en ander senior SAID-amptenare staan onder soortgelyke verdenking van spioenasie teen Zuma.

    Die rand het intussen verder gedaal met die nuus dat Zuma nie gaan bes gee nie, maar met mening gaan toeslaan op die Angelsaksiese faksie wat hom uit die kussings wil lig.

    Berning Ntlemeza (Valke), Shaun Abrahams (nasionale direkteur van openbare vervolging) en David Mahlobo (staatsveiligheid) is Zuma se handlangers.

    Dit is ook duidelik dat sakemense nie op Gordhan of adj.pres. Cyril Ramaphosa sal kan vertrou om van president Zuma ontslae te raak nie, maar gaan probeer om deur negatiewe marksentiment ‘n klimaat te skep wat dit sal moontlik maak.

    Dit sal wit Suid-Afrikaners dalk ontstel, maar sal geen indruk maak op die gewone swart ANC-kieser nie. Inteendeel skep die Angelsaksers eerder ‘n klimaat vir die EFF.

  • SA in top tien van ‘misrabele lande’

    SA in top tien van ‘misrabele lande’

    Elke jaar publiseer die Cato Instituut ‘n lys van die wêreld se mees “miserabele lande” deur die gebruik van ‘n eenvoudige ekonomiese formule om die tellings te bereken.

    Beskryf as ‘n ellende-indeks, word die formule bereken deur die werkloosheidsyfer, inflasie, en uitleenkoers, bymekaar te tel en dan die verandering in die reële BBP per capita daarvan af te trek.

    Volgens die dinkskrum, is lande met ellendetellings van meer as 20 “ryp vir transformasie”.

    Die verslag beklemtoon die “vrot appels” Iran, Rusland, Brasilië en Suid-Afrika in sy lys van die mees miserabele plekke in die wêreld.

    Dit is toevallig ook BRICS-lande wat as onbewoonbaar voorgehou word, alhoewel lande soos Palestina en die Oekraïne ingesluit word omdat hulle inderdaad in ‘n toestand van vryval verkeer as gevolg van die weste se neo-liberale ingryping.

    “Transformasie” in Suid-Afrika mag dus beteken dat die EFF aan bewind kom om hul “ekonomiese rewolusie” te volvoer wat funeste gevolge sal hê soos in die Oekraïene gebeur het.

    Baie Westerse kliëntstate is opsigtelik weggelaat. Griekeland, vreemd genoeg, is nie in die top tien nie, gegewe sy 26% werkloosheidsyfer en 7 jaar van ekonomiese depressie.

    Die ellende-indeksformule is gebaseer op die aanname dat hoë rentekoerse ‘n direkte maatstaf van lewenstandaarde is en dat die verhouding tussen die twee binne ‘n omgekeerde verband bestaan.

    Rusland se rentekoers van 11% stoot dus die Russiese ellende-indeks hoër, wat ‘n swak lewenstandaard beteken.

    Negatiewe rentekoerse in Europa beteken egter nie beter lewenstandaarde in die EU nie.

    Dit lyk dus of daardie formule geskep is om die Amerikaanse Federale Reserwebank te pas.

    Transnet het intussen aangedui dat hulle die Nuwe Ontwikkelingsbank van BRICS genader het vir die befondsing van vyf infrastruktuurprojekte as deel van die Noord-Suid vervoer-deurgang.

    Die bedryfshoof, Siyabonga Gama het by die Wêreld Ekonomiese Forum in Rwanda, aan die SAUK gesê die projekte word op R28 miljard rand geraam.

    Die Noord-Suid-deurgang het vervoer- en energie-infrastruktuur van Durban na Dar es Salaam in Tanzanië verbeter.

    Gama sê hulle sal binnekort met die bank vergader.

  • Hoe stalinisties is Poetin werklik?

    Hoe stalinisties is Poetin werklik?

    Die eindelose propaganda wat ons van netwerk24 moet verkrop ken blykbaar geen perke nie.

    Ek verwys nou na die artikel “‘Demokrasie’ by Russe net Poetin se idees” van Leopold Scholtz.

    In hierdie artikel word weer benadruk dat Poetin besig is om ‘n stalinistiese diktatuur van Rusland te maak, verwysend na ‘n behoefte aan internetsensuur en dat Poetin geen geleentheid verby laat gaan om mag in sy hande te konsentreer nie.

    Dit klink baie soos die kinderagtige Nederlandse beriggewings wat ek dikwels hier in die nuus gewaar: Poetin is outisties; Poetin vertoon afwykende loopgedrag; Poetin is die rykste man op aarde, ad nauseum.

    Die media probeer ook wanhopig om die dood van die dissidente spioen Aleksander Litvinjenko en die afskiet van vlug MH-17 op Poetin se brood te smeer, maar skiet telkens tekort om daardie kloutjie by die oortjie te kry.

    Die Britse Ken Owen het uit “sensitiwiteitsoorwegings” geweier op die verslag oor Litvinjenko openbaar te maak en die Nederlandse eerste minister Marc Rutte het ook geweier om die voorlopige verslag oor MH-17 aan die publiek bekend te stel.

    Na alle waarskynlikheid is Litvinjenko dood as gevolg van sy eie nalatigheid nadat hy met giftige kernmateriaal gesmokkel het, en die Buk-missiel wat MH-17 uit die lug geskiet het, kan slegs met ‘n radar bedien word wat in die Oekraiense hoofstad Kiëf gevestig is.

    Op daardie stadium was Arsenji Jatsjenjoek aan die mag gewees in Kiëf, danksy ‘n Amerikaans georkestreerde staatsgreep.

    ‘n Ander gerug is dat die plofkop in die missiel in ‘n fabriek in Amsterdam vervaardig was. Die latere aanwysings dat MH-17 deur ‘n gevegsvliegtuig uit die lug geskiet is bo Oekraiense grondgebied vertroebel die Russiese invloed nog verder.

    Poetin is inderdaad besig om sy mag te versterk, maar nie omdat hy ‘n tweede Stalin wil wees nie, maar omdat hy geen keuse het nie.

    As gevolg van die oorskot olie wat Amerika en Saoedi-Arabië op die wêreld gestort het, het die olieprys gekelder en het dit die Russiese ekonomie hard getref. Poetin het as gevolg daarvan te kampe met ‘n ernstige begrotingstekort, en om daardie tekort in te perk sal hy gedwing word om staatsbedrywe te oorhandig aan privaatkontrakteurs (lees: Washington).

    Poetin vrees met ander woorde ‘n herhaling van wat ons in die negentiger jare in Rusland gesien het toe die Mafia daardie land leeggeroof en tot die randjie van anargie gedryf het. Dit verklaar Poetin se ongekende gewildheid by sy mense, enersyds omdat hulle weet waarmee hy te make het en andersyds omdat die Russe weet watter ongefundeerde bog die Westerse perse oor hom rondbasuin.

    Daardie storie dat Poetin ‘n inval teen die Krim gereël het, is van dieselfe verslete stoffasie. Oekraïene en Rusland het al sedert jare ooreengekom dat Rusland tot 25 000 soldate op die Krim mag stasioneer. Ten tye van hierdie “inval” was daar slegs 9 000 Russiese stewels op die Krim gewees, 16 000 te min vir ‘n inval.

    Dit belemmer Washington egter nie. Vir Amerika se skaduregering heilig die doel die middele. Só het hulle ‘n wettig en demokraties verkose president ontsetel en vir Jatsjenjoek – ‘n Amerikaanse marionet – aan bewind gehelp.

    Victoria Nuland se berugte “Fok die EU” telefoongesprek is ‘n bewys dat Amerika vir Jats as buikspreker as opvolger van die demokraties-verkose Viktor Janoekowitsj aangehou het. Tegelykertyd het die Jesuïete in Brussel die blou tapyt uitgerol na Oekraïene in ‘n poging om Oekraïene los te breek van Rusland.

    Die vraag is egter hoekom? Wat besiel die Weste die laaste paar jaar om so teen Rusland te agiteer?

    Die voor-die-hand-liggende antwoord is omdat Rusland die gasland van die BRICS lande wil word. Rusland wil die sentrale bank wees vir hierdie lande, so asof Washington dit gaan toelaat.

    Amerika is stilletjies besig om die BRICS lande te verswak met allerlei vuil kunsies en toertjies. ‘n Ander voorbeeld is die Brasiliaanse president Dilma Rousseff wat weens “korrupsie” ontsetel moet word. Daar is geen daadwerklike bewys van korrupsie nie, altans nie naastenby so erg as die res van haar kabinet nie, en net soos die Argentynse Christina de Kirchner die trekpas moes vat omdat sy nie na Washington se pype wou dans nie, gaan Rousseff nou dieselfde kant op.

    In Suid-Afrika sien ons hoe die korrupsie van die ANC nou uiteindelik, na jare se gewag, ‘n bietjie rugbaarheid in die internasionale media begin verkry, weereens om BRICS se geloofwaardigheid skade te berokken. Die destydse wapenskandaal was nog veel swaarder op die belastingbetaler se beurs as Nkandla gewees, maar die internasionale perse het daardie verhaal geensins ernstig opgeneem nie.

    Met ‘n hanswors soos Malema gaan Suid-Afrika net verder sy internasionale geloofwaardigheid verloor en dit gaan die komende tyd skaamteloos uitgebuit word.

    In China en Indië se geval moet ons eers wag en sien wat met Rusland, Brasilië en Suid-Afrika gaan gebeur. Daardie twee lande het al ‘n geskiedenis van gespanne verhoudings gehad en Washington sal moontlik hierdie ou koeie uit die sloot opgrawe. Andersyds is Amerika besig om Indië se aartsvyand Pakistan te bewapen, en erken Washington die Taliban nie as ‘n terroriste-organisasie nie.

    Ek sou sê voordat netwerk24 met sy omgekoopte kommentators Rusland wil beswadder, kan hulle liewer kyk na wie hulle salarisse betaal.

  • Laaste 100 adjunkte moet Rousseff se lot bepaal

    Laaste 100 adjunkte moet Rousseff se lot bepaal

    Die Brasiliaanse president, Dilma Rousseff, se lot berus op die lojaliteit van die laaste 100 adjunkte in die kongres, wat nog moes stem of sy in ’n staat van beskuldiging geplaas sal word.

    In ’n komplekse proses was ondersteuners en opponente van Brasilië se eerste vroulike president in ’n wedloop gewikkel om die getalle agter hulle te verenig om geskiedenis te maak wanneer die laerhuis van die kongres volgende week stem.

    ’n Komitee van die kongres het láát Maandag vir ’n nie-bindende maatreël gestem om haar in ’n staat van beskuldiging te plaas.

    Wanneer aanstaande week gestem word, is ’n tweederde meerderheid nodig om Rousseff se saak na die senaat vir die staat van beskuldiging-verhoor te stuur.

    Rousseff word daarvan be­skuldig dat sy die staat se boeke gekook het om die swak toestand van die regering se begroting te verdoesel tydens haar 2014-herverkiesing wat sy ­gewen het.

  • Brasilië hou opmars om president te beskerm

    Ondersteuners van die beleërde pres. Dilma Rousseff het Woensdag van oor die hele Brasilië opgemars om te protesteer teen wat hulle as ’n “staatsgreep” beskou wat daarop gemik is om haar tot ’n val te bring.

    Die linkse leier kan moontlik in ’n staat van beskuldiging gestel word, het AFP berig.

    “Daar sal geen staatsgreep wees nie!” het duisende betogers in Sao Paulo geskree, waarvan die meeste in die rooi hemde van Rousseff se Werkers­party (PT) geklee was.

    Pro-regeringsbyeenkomste, wat hoofsaaklik deur Brasilië se magtige vakbonde gereël is, is ook in ander stede insluitende Rio de Janeiro en die hoofstad, Brasilia, gehou.

    Enige sprake van ’n staatsgreep bring Brasilië se militêre diktator­skap van 1964 tot 1985 in herinnering. Rousseff, ’n voormalige linkse guerrilla­-stryder, was destyds vir twee jaar in aanhouding en is gemartel.

    Woensdag se betogings was die eerste sedert die laerhuis van die Brasiliaanse parlement se speaker, Eduardo Cunha, op 2 Desember ’n versoek van die opposisie aanvaar het om Rousseff in ’n staat van beskul­diging te stel.

    Die president word van “begrotings-maneuvers” beskuldig, wat volgens haar deur vorige regerings aanvaar is. Haar opponente meen egter dit is onwettig.

    Brasilië is deel van BRICS.

  • Stryd rondom BRICS verhewig

    Die BRICS-groepering se posisie teenoor korporatiewe mag, het gelei tot die jongste skermutseling tussen die VSA en BRICS.

    By die vierde BRICS-byeenkoms in Durban het lede gesê gesonde kompetisie is ‘n voorvereiste vir ekonomiese groei.

    Dit is bo-aan die agenda in Durban om onmededingende gedrag in die onderskeie lande te oorkom.

    Die groep sê hulle is vasbeslote om weg te doen met monopolieë en die verbetering van die groei in opkomende ekonomieë.

    Duur verbruikersgoedere, gebrek aan innovasie en stadige ekonomiese groei is rampspoedig vir opkomende ekonomieë, net soos monopolieë en nywerheidskartels sê lidlande.

    Brasilië ondersoek tans sement- en koffiekartels.

    Rusland se ekonomie is geruk deur samespanning toe Samsung, LG en Phillips pryse op monitors gemanipuleer het.

    Indië sukkel met monopolieë op natriumkarbonaat wat gebruik word om glas te maak asook in sy sementbedryf.

    En China het reeds motorvervaardigers soos Audi en Chrysler beboet vir onmededingende gedrag.

    ‘n Raadgewende maatskappy oor ontluikende markte, Frontier Advisory Deloitte sê egter dit is noemenswaardig dat die beleggingsbestuursmaatskappy, Goldman Sachs sy BRICS-fonds gesluit het.

    Deloitte se besturende direkteur, Martyn Davies het aan ‘n beleggingsberaad in Johannesburg gesê beleggers het verkeerdelik geglo dat die wêreldekonomie na ontluikende markte verskuif, met die BRICS-lede Suid-Afrika, Brasilië, Rusland, Indië en China as die vernaamste rolspelers.

    Hy sê Rusland en Brasilië se ekonomië is aan die afneem, terwyl Suid-Afrika se ekonomie vasgeval het. Slegs China is nog sterk, ten spyte van laer groeisyfers.

  • BRICS-ontwikkelingsbank open sy deure

    BRICS-ontwikkelingsbank open sy deure

    Die BRICS Nuwe Ontwikkelingsbank (BNO) het sy deure in Shanghai geopen, en sal poog om die aanvanklike kapitaal vir infrastruktuur en volhoubare ontwikkeling beskikbaar te stel.

    Chinese minister van finansies, Lou Jiwei, Sjanghai burgemeester Yang Xiong en BNO-hoof Kundapur Vaman Kamath het die seremonie bygewoon.

    By die inhuldigingseremonie was Jiwei vinnig om daarop te wys dat BNO sal dien as ‘n alternatief vir die bestaande internasionale finansiële stelsel en sal sy pogings op innovasie en beheer fokus.

    Dieselfde boodskap is bevestig deur Vaman Kamath.

    “Ons doel is nie om die bestaande stelsel uit te daag nie, maar om dit te verbeter en die stelsel aan te vul op ons eie manier,” het die voorsitter Kundapur Vaman Kamath gesê.

    Brasilië, Rusland, Indië, China en Suid-Afrika, het ooreengekom om die BNO te stig.

    Dit is deur die BRICS-lidlande bekragtig tydens die sesde beraad in Fortaleza, Brasilië in Julie 2014.

    Die hoofdoel van die nuwe finansiering van infrastruktuur is die bevordering van volhoubare ontwikkeling in BRICS-lande.

    BRICS verteenwoordig 42 persent van die wêreld se bevolking en ongeveer 20 persent van die wêreld se ekonomie gebaseer op die BBP.

    Totale handel tussen die lande is byna 17 persent van globale handel.

  • SA se bydrae aan BRICS nie ‘n kopseer sê ekonoom

    Suid-Afrika se beloofde bydrae van $10 miljard aan die beplande Nuwe Ontwikkelingsbank oftewel die BRICS-bank, hoef nie onmiddellik die land uit te vloei nie.

    Die geld sal slegs gegee word wanneer dit benodig word, volgens die ekonoom Dawie Roodt.

    Roodt het bygevoeg dat China waarskynlik die grootste gedeelte van die nuwe bank sal finansier.

    Roodt sê Suid-Afrika hoef hom dus nie te veel te bekommer oor die kapitale uitleg nie.

    Rusland en Suid-Afrika het Woensdag ooreengekom om ‘n memorandum van verstandhouding te teken oor onder meer energie.

    President Jacob Zuma lei die Suid-Afrikaanse afvaardiging wat bestaan uit ministers en sakelui.

    Afgevaardigdes sal onder meer ‘n ooreenkoms oor ekonomiese integrasie van die BRICS-lande bespreek, asook moontlike vrye handelsgebiede.

    Die sewende sessie van die BRICS-beraad is in Rusland in die stad Ufa, net buite Moskou, gehou.

    Dit is voorafgegaan deur die bekendstelling van die BRICS ontwikkelingsbank wat gesien word as alternatief vir die IMF, die Wêreldbank en ander westerse instellings.

    Die handelsomset tussen die BRICS-lande het verlede jaar meer as $291 miljard beloop.

    Chinese aandeelpryse, wat ‘n tweede agtereenvolgende dag skerp gedaal het, is ‘n direkte gevolg van hoë aandeelpryse reg oor die wêreld heen, het Roodt ook gesê.

    Die Shanghai Composite Index wat met 8.2% gedaal het voor verhandeling begin het, het egter ‘n uur later met drie persentasie punte herstel.

    Sedert 12 Junie toe aandeelmarkte gepiek het, het die Shanghai Composite Index met nagenoeg 30% gedaal.

  • Poetin, IMF bespreek Griekse krisis

    Poetin, IMF bespreek Griekse krisis

    Die Russiese President, Vladimir Poetin het die Internasionale Monetêre Fonds se bestuurshoof, Christine Lagarde genader om die Griekse referendum te bespreek.

    Hulle probeer ‘n werklike oplossing kry vir die land se skuldkrisis.

    Lagarde het gesê dat verskeie lande in Latyns-Amerika en Afrika haar vir haar ongenaakbare houding teenoor die Griekse krisis blameer.

    Met die huidige bankstelsel se probleme, het die tyd aangebreek om nuwe finansiële instellings wêreldwyd te ontwikkel, het president Zuma intussen aan die Russiese nuusdiens RT gesê.

    BRICS en sy nuwe ontwikkelingsbank is een van die alternatiewe, het hy gesê.

    Zuma het bygevoeg dat sulke instellings aan lande wat betrokke is, meer insae in die besluitnemingsproses behoort te gee en dat Westerse lande te veel inmeng.

    ‘n Woordvoerder vir die Kremlin, Dmitry Peskov sê samesprekings sal voortgaan en die belange van alle partye rakende die Griekse probleem sal in ag geneem word.

    Hy het bygevoeg dat die gesprek tussen Putin en Lagarde nie verband gehou het met enige moontlik hulp van Rusland aan Griekeland nie.

    Lagarde het vroeër in ‘n verklaring gesê die IMF is gereed om Griekeland te help indien die land daarom vra.

    Die omstrede vorige minister van Finansies, Yanis Varoufakis het Maandag bedank.

    Lagarde het in ‘n verklaring gesê die organisasie is gereed om Griekeland te help indien die land daarom vra.

    Intussen is Griekeland se hoofonderhandelaar met die internasionale krediteure, Euclid Tsakalotos, as nuwe minister van Finansies ingehuldig.

    Die 55-jarige Tsakalotos wat in Londen skoolgegaan en gestudeer het, het na sy inhuldiging gesê hy is angstig oor die taak wat hom opgelê is.

    Hy was tot onlangs ‘n professor by die Universiteit van Ekonomie in Athene.

  • BRICS kan G7 binnekort inhaal

    Die BBP van die BRICS-lande kan dié van die G7 binne twee of drie jaar oortref, het die Doema se hoof van Buitelandse Betrekkinge, Aleksei Pusjkof gesê.

    “In 2014, het die totale bruto binnelandse produk van BRICS-lande 30 persent bereik [van die BBP van die wêreld]. Dit is minder as dié van die G7, maar die verskil is sewe of agt persent. Die gekombineerde BBP van die BRICS-lande, volgens die Internasionale Monetêre Fonds is $32,5 triljoen [met koopkragpariteit bereken]. Die G7 s’n is $34,7 triljoen. Gegewe dat die BRICS-lede meestal veel hoër groeikoerse as die G7 toon, kan ons aanvaar dat in die volgende twee of drie jaar die totale BBP van die BRICS-lande meer as die G7 sal wees,” het Pusjkof aan verslaggewers by die eerste BRICS Parlementêre Forum in Moskou gesê.

    Hy het verder gesê dat BRICS die Forum verkieslik jaarlikse moet hou, en as dit gebeur, sal dit help om die wêreld meer regverdig en multipolêr te maak, gebaseer nie op die superioriteit van een land oor die ander nie, maar op die balans van belange.

    Die ekonomiese sentrum van die wêreld is aan die verander, en die ontwikkelde Weste sal sy invloed en gesag in die internasionale arena met spelers soos BRICS moet deel, het Pusjkof gesê.

    Westerse lande het ten minste €40 miljard verloor weens Amerikaans-geleide sanksies teen Rusland.

    Duitsland word veral belemmer om produktiewe samewerking uit te brei.

    Die EU verloor ten minste €21 milard weens die sanksies volgens die Spaanse minister van buitelandse sake. Volgens skattings van Japanese ekonome kan die syfer tot soveel as €30 miljard wees.

    Die sanksies is ingestel nadat die MH17-vlug bo die Oekraïene afgeskiet is en die VSA Rusland vir die tragedie blameer het.

    Rusland het ontken dat hulle verantwoordelik is vir die ramp en dadelik inligting vrygestel wat hulle van blaam onthef. Die VSA weier steeds om inligting oor die gebeurtenis bekend te maak, maar hou steeds vol met sanksies.