praag.co.za

Tag: Windhoek

  • VN reël droogtekonferensie in Windhoek

    VN reël droogtekonferensie in Windhoek

    Meer as 600 deelnemers word by die eerste Afrika Droogtekonferensie verwag wat vanaf 15 tot 19 Augustus in Windhoek sal plaasvind.

    Die konferensie sal ’n tegniese sessie insluit waaraan kenners sal deelneem, gevolg deur ’n hoëvlaksessie waartydens ministers in Afrika en verteenwoordigers van VN-agentskappe teenwoordig sal wees.

    Die tema is “Die verbetering van veerkragtigheid teen droogte op die Afrika-vasteland”

    Die kerndoelwitte van die konferensie is om ’n strategiese raamwerk vir droogtebestuur op te stel wat die veerkragtigheid teen droogtes vir die hele Afrika-vasteland sal verbeter; om streeks- en internasionale aandag op die kwessie te fokus om veerkragtigheid te kan verbeter; behoeftes en tekortkominge sowel as goeie praktyke te identifiseer en vennootskappe en samewerking tussen lande te versterk.

    Die projekkoördineerder het tydens die bekendstelling gesê Afrika is kwesbaar vir die impak van droogtes, wat na verwagting as gevolg van klimaatveranderinge meer dikwels gaan voorkom.

    Suider-Afrika is juis kwesbaar vir droogte weens die totale gebrek aan staatshulp vir sukkelende boere, ‘n nuwe verwikkeling onder die ANC wat eerder op “rassisme” fokus. Na verwagting gaan voedselpryse met ten minste 25% styg en 5 miljoen ton mielies sal ingevoer moet word.

    “Die kwesbaarheid is beklemtoon deur die voortdurende El Niño-weerverskynsel. Oos-Afrika ervaar die ernstigste droogte in 60 jaar en die Verenigde Nasies (VN) het hongersnood in Somalië verklaar. Suider-Afrika word ook ernstig geraak en die droogte is in Maart vanjaar as ’n streekramp verklaar,” het Kauna ­Schrö­der gesê.

    “Die groot verwagte uitkoms van die konferensie is ’n strategiese raamwerk om Afrika se veerkragtigheid teen droogtes te verbeter. Dit geniet reeds die volle steun van die Afrika-unie (AU). Ons kan nie resultate hê as ons nie al die feite bymekaar het nie,” het Schröder gesê.

    Terselfdertyd soek die ministerie na borgskappe van en vennootskappe met die private sektor ten einde die droogte te verlig.

    Schröder het gesê langtermynvennootskappe is ook moontlik op gebiede soos die verbetering van vroeë waarskuwingstelsels vir droogtes in Namibië, die ontwikkeling van versekeringsmeganismes teen droogtes asook water- en energiebesparingstegnologie.

    Die Landbounavorsingsraad (LNR) van Suid-Afrika, het op die LNR se voorlegging oor sy strategiese plan tot 2020 aan die Parlement se portefeuljekomitee vir landbou, bosbou en visserye verslag gedoen oor 10 000 pakkies witmieliebaster sade wat in 2014/’15 gratis aan kleinboere in Limpopo, Mpumalanga, Noordwes, die Vrystaat en KwaZulu-Natal uitgedeel is om te toets.

    Die twee sade WE3127 en WE3128 is nie geneties gemodifiseer nie en word onder die handelsnaam DroughtTEGO verkoop. Die eerste droogteverdraagsame witmieliebastersaad wat deur die LNR se Wema-projek (Waterdoeltreffende mielies vir Afrika) ontwikkel is, is in 2014 bekend gestel.

    Nege kleinboere van die boerevereniging Mokaba in Mokopane, Limpopo, het te midde van die ergste droogte in 20 jaar hul opbrengs tot 1,14 t/ha van die vorige seisoen se 0,6 t/ha (toe hulle ander mieliekultivars geplant het) verhoog.

  • Diplomatieke voertuig in Windhoek gekaap

    Diplomatieke voertuig in Windhoek gekaap

    ‘n Diplomatieke voertuig is Saterdag in die oggendure in Windhoek gekaap.

    Die insittendes is daarna aangerand en van hul besittings beroof.

    Die voorval het glo tussen 03:00 en 04:00 in Frankie Fredericksrylaan in Olympia plaasgevind, het die Republikein berig.

    Volgens lede van ’n plaaslike buurtwag is die sedanmotor glo deur ’n wit Toyota Hiace-minibus met tussen drie tot vyf insittendes, van die pad gedwing.

    Die insittendes van die diplomatieke voertuig is na bewering uit die voertuig geruk waarna een van die passasiers glo erg aangerand is.

    Die rowers het hulself met die passa­siers se waardevolle besittings uit die voete gemaak.

    Buurtwaggroepe en die polisie is gewaarsku dat insittendes van die minibus “gewapen en op die aanval” is.

    Die voorval is deur die woordvoerder van die Namibiese polisie, insp. Slogan Matheus bevestig.

    Hy kon nie bevestig aan watter ambassade die slagoffers van die roof verbonde is nie.

  • ‘n Skoot klap, bloed spat op kampus in Windhoek

    ‘n Skoot klap, bloed spat op kampus in Windhoek

    ‘n Skietery op ‘n kampus in Windhoek het omstanders laat spaander.

    Die skoot wat die week op die kampus van die Namibiese Universiteit van Wetenskap en Tegnologie (NUST) geklap het, was egter glo net speel-speel.

    Studente het vroeër by die instelling se hekke saamgedrom en personeel uitgesluit in Januarie omdat hulle eis dat univeristeitsfooie verlaag moet word.

    Die Namibiese instellings van hoër onderwys staar tans bankrotskap in die gesig.

    ‘n Speelgoed­pistool van plastiek se “skoot” is nagemaak deur ‘n ballon wat gebars is, die “slagoffer” se bloed het gespat in die kammaskietery voor die biblioteek.

    Omstanders het laat spaander om aan die koeëls te ontkom. Op sosiale media is wyd gegis oor wat agter die koeël gesit het, maar NUST se dramaklub sê die kampus is hulle verhoog.

    Selfs paramedici wat die gewonde te hulp moes snel, was deel van die dramageselskap se plan.

    “Die toneelstuk het ook gewys hoe doeltreffend en betroubaar die sekuriteitspersoneel is.”

    Op NUST se Facebook-blad word paramedici-studente en die universiteit se drama­klub vir die skiettoneel bedank.

  • Ouers vrees vir pers studente se veiligheid

    Ouers vrees vir pers studente se veiligheid

    Dr. Joggie Briedenhann, pa van Christine (Poekie) sê hy is “uiters teleurgesteld met hoe die US die hele saak benader het” nadat sy dogter en ‘n vriendin lukraak van rassisme beskuldig is oor pers gesigverf.

    Christine se veiligheid op kampus ná die voorval, is ‘n groot bron van kommer weens dié openlike intimidasie. “Sy het treiterende SMS’e ontvang nadat iemand plakkate van haar gesig en selfoonnommer op kampus opgeplak het,” sê haar pa.

    “Ek het verlede week met my dogter se klasrooster en foto na die kampus-sekuriteitspersoneel gegaan en gevra of hulle haar veiligheid kan waarborg.”

    Die verlinkse rektor van die universiteit van Stellenbosch, Wim de Villiers het volgens Briedenhann nog nie een keer met hom of sy dogter probeer kontak maak nie, selfs nadat hulle skorsing opgehef is.

    “Hy het ons nie laat weet wat die spesifieke klag teen Poekie is nie en het ons ook nie laat weet dat haar skorsing uit die koshuis opgehef is nie.

    “Ek wonder hoe De Villiers wil hê daar teenoor sy kind in só ’n situasie opgetree moet word,” het Briedenhann aan die Republikein gesê.

    Ene Mathew Smorensburg, verbonde aan die universiteit, het na bewering die twee studente ontmoedig om ’n regverteenwoordiger aan te stel nadat hy valse beskuldigings teen hulle gemaak het om ‘n haatveldtog van stapel te stuur.

    Smorenburg het die twee “bedorwe, wit meisietjies” ook afgeraai om hul vriende of ouers te kontak.

    In stede daarvan, het hy die twee gedwing op ‘n imkriminerende boodskap namens hulself uit te stuur.

    Smorenburg op Facebook gesê dit gaan goed met hom.

    “Die Universiteit Stellenbosch en my kollegas bied groot ondersteuning en ek vaar goed.”

    “Ons gaan beslis regstappe teen lede van Open Stellenbosch, die studenteraad en die rektor doen. Ons oorweeg ’n siviele skadevergoedingseis teen diegene wat hulle aan intimidasie skuldig gemaak het,” verduidelik hy.

    De Villiers het intussen ‘n verklaring uitgereik waarin hy sonder ironie “die trauma wat die twee studente, die huiskomitee, die inwonende hoof en inwoners ervaar het, betreur”.

    Volgens De Villiers het hierdie voorval “herbevestig hoe belangrik konstruktiewe gesprekvoering oor belangrike kwessies op kampus is” terwyl hy en sy linkse bende kennelik alle pogings tot gesprek vermy het.

  • Polisie in Windhoek rand witte aan

    Polisielede verbonde aan die Sentrale polisiekantoor in Windhoek staar klagte van aanranding en brutaliteit in die gesig, nadat hulle glo ’n wit inwoner van Windhoek tydens ondervraging ernstig aangerand het. Die klagte, CR432/01/2016, is by dieselfde polisiekantoor aanhangig gemaak.

    Na bewering is die 35-jarige mnr. Marco Bock Saterdagoggend deur polisiebeamptes by die sentrale polisiekantoor in die hoofstad vir meer as ’n uur aangerand.

    Volgens Bock is hy vroeër die oggend by die Vredehof-woonstelle in Windhoek vir ondervraging na die polisiekantoor geneem. Die ondervraging spruit glo uit die diefstal van ’n iPad uit een van die woonstelle.

    Drie jeugdiges was toe reeds vir ondervraging in een van die polisiebakkies na die polisiekantoor onderweg. Vingers is glo deur hulle na Bock gewys dat hy die skuldige was wat die iPad glo gesteel en onder die Tweelingbrug sou gaan wegsteek het. Die jeugdiges het na bewering die wegsteekplek aan die polisie gaan uitwys.

    Die drie jeugdiges en Bock is glo beveel om by die polisiekantoor uit te klim en na die agterkant van die gebou te stap. Na bewering is hulle toe beveel om liggaamlike oefeninge waaronder opstote te doen. Polisiebeamptes het toe glo vir Bock met ’n staalpyp oor sy boude en blaaie begin slaan in ’n poging om hom tot erkenning te dwing dat hy wél die iPad gesteel het.

    Na bewering is hy volgens die polisiebeamptes geslaan omdat hulle “die waarheid soek” en hy die jeugdiges sou gestuur het om die inbraak te pleeg. Die beweerde aanranding het sowat ’n uur geduur en het glo gestop toe die polisielede besluit het hy het wel die waarheid gepraat.

    ’n Mediese dokter het in ’n verklaring ingevolge die strafproseswet bevestig dat Bock kneusings aan sy boude en rug en bloed in sy urine gehad het.

    Die woordvoerder van die polisie, insp. Slogan Matheus, kon teen druktyd geen antwoorde verskaf nie.

    Bron: Die Republikein

  • Wittes verneder by SA Hoë-kommissariaat in Windhoek

    Ná verskeie briewe en SMS’e van die publiek oor beweerde swak en stadige diens by die Suid-Afrikaanse hoë kommissariaat in Windhoek, het ’n Namibiese pa uit desperaatheid sy frustrasie onder die aandag van die openbare beskermer in daardie land, me. Thuli Madonsela, gebring.

    Sy dogter [Die wit pa en dogter se name word weerhou om hulle nie aan enige intimidasie bloot te stel nie], het byna die hele derde kwartaal by haar skool in die Wes-Kaap misgeloop omdat sy vir ’n hernuwing van haar studiepermit moes wag.

    Die aansoek is in Julie ingedien. Volgens die pa is herhaalde oproepe na die hoë kommissariaat gemaak om terugvoering te kry, maar is geen van die oproepe beantwoord nie.

    Hy het vervolgens besluit om byna 1 000 kilometer na Windhoek te ry om self uit te vind waarom met die uitreik van die permit gesloer word.

    Hy het net ná middagete by die hoë kommissariaat opgedaag, waar hy moes hoor die kantore is toe vir die publiek.

    Die volgende dag was hy reeds om 09:00 by die kommissariaat, maar is ná ’n uur deur ’n “verergde” klerk ingelig dat studiepermitte slegs die dag daarna hanteer word en dat hy dan moes terugkeer.

    Andersins kon hy vir ’n SMS wag om te hoor of die permit gereed was. Hy is voorts ingelig dat ’n proses gevolg moet word en dat dit agt weke sou duur voordat studiepermitte uitgereik word.

    “Ek was verneder deur die behandeling wat ek van die klerk ontvang het en die feit dat sy slegs 30 sekondes aan my bestee het – dit ná al die opofferinge wat ek gemaak het,” het hy in sy brief aan Madonsela gesê.

    Die pa het daarna tot sewe agente gekontak in ’n poging om die uitreiking van die studiepermit te verhaas. Dit was egter sonder sukses.

    “Aangesien skoolvakansies so kort is, is dit nie prakties dat dit agt weke vat vir ’n studiepermit om uitgereik te word nie,” het die ontstoke pa gesê. “Wat is die eintlike boodskap wat Suid-Afrika vir ons probeer stuur? Wil hulle nie hê buitelanders moet daar studeer of ’n bydrae lewer nie?”

    Hy het aan Madonsela geskryf dat die behandeling wat Namibiërs van die hoë kommissariaat ontvang, die reputasie van die Suid-Afrikaanse regering beskadig en ’n verleentheid veroorsaak.

    Republikein is van bakboord na stuurboord gestuur om antwoorde by die hoë kommissariaat te kry. Dit is uiteindelik na me. Emma Ramokhele, die hoof van die konsulaat, verwys. Vrae en oproepe aan Ramokhele was teen saktyd nog nie beantwoord nie.

    Bron: Republikein

  • Namibië oorweeg tolhekke

    Tolhekke sal die Namibiese padnetwerk in stand hou, het die Namibiese president, dr. Hage Geingob, verklaar, maar erken dat sy landgenote daarteen gekant is.

    “Ek kan nie verstaan waarom Namibiërs teen tolhekke gekant is nie,” het die president bygevoeg tydens ‘n ontmoeting met sakelui.

    Volgens hom is die Suid-Afrikaanse padinfrastruktuur, wat as een van die beste in Afrika geag word, juis aan tolhekke te danke, het die Republikein berig.

    Die Suid-Afrikaanse padinfrastruktuur is egter deur ‘n wit regering geskep, lank voor tolhekke.

    Volgens ’n bron in die ministerie van werke en vervoer is die voertuiggetalle in Namibië egter nie genoeg om tolhekdienste te regverdig nie.

    Die swart sakegemeenskap meen voorts dat die regering nie genoeg grond gratis vir kommersiële en nywer­heidsdoeleindes beskikbaar stel nie.

    Beide Geingob en die Windhoekse burgemeester, mnr. Muesee Kazapua, het egter Shaanika se stelling verwerp en gesê grond is vir dié doeleindes beskikbaar gemaak.

    “Die stelsel kan stadig wees, maar geen sektor is uitgelaat nie,” het Geingob gesê.

    Hy het gesê grond is baie duur en die blaam op die sakegemeenskap geplaas. “Die oorsaak van hoë grondpryse is die middelman en dié middel­man is niemand anders as die sakelui nie.”

    Die Namibiese sakegemeenskap het aan die president gesê die skaarsheid van water in die hoofstad is nie net ’n bedreiging vir plaaslike sakelui nie, maar ook vir buitelandse beleggers.

    Volgens Shaanika is hoë elektrisiteitstariewe ook een van die uit­dagings wat hulle ervaar.

    Die president gesê dit is ’n ope geheim dat Namibië deur klimaatverandering geraak word, maar die regering onderhandel tans om water van standhoudende riviere na die sentrale dele van die land te pomp.

  • Buitelandse student by kultuurfees gesteek

    ’n Buitelandse student by die Universiteit van Namibië (Unam) is Vrydag in ‘n parkeerarea op die hoofkampus in Windhoek met ’n skerp voorwerp gesteek.

    Die student is ’n Zambiese burger en die onder­onsie was oor ’n selfoon. Die student verkeer tans in ‘n stabiele toestand.

    Uman se woordvoerder het ontken dat die voorval enigiets met die kultuurfees by die universiteit te make gehad het.

    Die woordvoerder het gesê die kultuurfees het by Unam se stadion plaasgevind en geen voorvalle van soortgelyke aard of beserings is aangemeld nie.

    Sekuriteitmaatreëls by die universiteit sal intussen opgeskerp word en daar sal veral na die ontspanningsareas gekyk word.

    “Unam se sekuriteit neem die voorval ernstig op en probeer presies bepaal wat gebeur het,” het die woordvoerder aan die Republikein gesê.

  • Bekende Windhoeker in plaasaanval doodgeskiet

    Die 76-jarige mnr. Gerald Leitner is Vrydag op sy plaas in die Hochfeld-omgewing sowat 76 km buite Okahandja deur vyf verdagtes aangeval en doodgeskiet.

    Die Republikein berig dat niemand nog in verband met sy dood in hegtenis geneem nie.

    Volgens die skakelbeampte van die Namibiese polisie, insp. Pendukeni Haikali, het rowers Woensdag verlede week probeer om by Leitner in te breek. Hy het op hulle losgebrand en die verdagtes het in ‘n voertuig op die vlug geslaan.

    Leitner het dit by die polisie aangemeld wat ‘n ondersoek na die voorval gedoen het. Volgens Haikali het Leitner egter geen klag gelê nie en is dié saak afgehandel.

    Vrydag omstreeks 19:00 het vyf mans na die plaas teruggekeer en vyf keer met ‘n .45-pistool op Leitner losgebrand.

    Een van die koeëls het hom deur die hart getref en hy is op die toneel dood. Die verdagtes het ‘n vuurwapen en kontant gesteel, voordat hulle in hul eie voertuig gevlug het.

    Leitner het ‘n ruk gelede sy juwelierswinkel in Windhoek verkoop en plaas toe getrek om voltyds te boer. Sy dogter, me. Sabine Gamma, was gister te geskok om enige kommentaar oor haar pa se dood te lewer.

    Intussen is ‘n grondkrisis in Namibië afgeweer nadat vergadering tussen ’n regeringsafvaardiging en nege lede van die Regstellende Herposisionering-beweging (AR) wat vroeër die trekpas uit Swapo gekry het.

    Die vergadering het op versoek van die president Hage Geingob plaasgevind.

    Volgens ’n gesamentlike verklaring wat ná afloop van die onderhandelinge uitgereik is, sal ’n reuse- nasionale projek onderneem word wat op die toekenning van stedelike en dorpsgrond gemik is. Dit is in pas met die “oorlog teen armoede” wat Geingob in sy inhuldigingsrede aangekondig het.

    Die regering sal voorts begin om 200 000 erwe landswyd te diens. Windhoek, Walvisbaai en O­shakati is vir ’n aanvanklike loodsprojek geïdentifiseer. Die tydperk tussen 29 Julie en 5 Augustus sal aan die skoonmaak van geïdentifiseerde stedelike en dorpsgrond gewy word. Hierdie geïdentifiseerde grond sal gediens word en later aan begunstigdes toegeken word.

    Ingevolge die projek om stedelike en dorpsgrond op ’n grootskaalse grondslag te diens, sal Namibiërs gevra word om op ’n vrywilliger grondslag deel te neem in die diens van geïdentifiseerde grond.

  • Babahond met piksteel doodgeslaan

    ’n Sewe maande oue Airedale-kruising is in ’n woonbuurt in Windhoek na bewering met ’n piksteel doodgeslaan. Die beplande lot van die babahond was glo om as ’n maaltyd opgedis te word, het die Republikein berig.

    Volgens me. Brigitte Meissner van die Dierebeskermingsvereniging (DBV) in Windhoek het die voorval Maandag omstreeks 12:00 op ’n bouperseel naby die Bougainvillea-winkelsentrum in Klein Windhoek plaasgevind.

    Volgens ooggetuies is die hond glo herhaaldelik deur ’n Chinese burger met ’n piksteel geslaan. Die plan was glo dat hy die dier daarna sou eet.

    Meissner sê die DBV is deur ’n “histeriese inwoner” gebel wat hulle oor die voorval ingelig het. ’n Inspekteur is dadelik na die perseel gestuur, maar die verdagte was met sy aankoms skoonveld.

    “Net ’n paar bloedkolle is gevind, maar met verdere ondersoek is die dooie hondjie in een van die onvoltooide kamers op die bouperseel gevind. Die hond is met ’n pik doodgeslaan en het verskeie kapwonde gehad.”

    Volgens Meissner was verskeie mense glo getuies van die voorval en het iemand selfs ’n video-­opname daarvan gemaak.
    “Mense het dit gehoor en gesien en glo selfs probeer keer.” Nie een van die ooggetuies het egter tot dusver ’n verklaring by die polisie afgelê nie.

    “My hande is afgekap as ek nie verklarings hieroor het nie. Oog­getuies wil glad nie na vore kom nie.” Volgens Meissner kan sy nie die voorval aanmeld voordat sy nie volledige bewyse van die voorval het nie.

    “Die stadspolisie was wel saam met ons inspekteur uit na die toneel en is bewus van die voorval.”

    Volgens Meissner is dit nie in Namibië ’n oortreding om ’n hond te eet nie, maar sal die persoon van dieremishandeling aangekla word. Dit is voorts onwettig om ’n dier in ’n munisipale gebied te slag.

    Die DBV beplan om die voorval ook onder die aandag van die Chinese ambassade sowel as die kantoor van die Ombudsman te bring.

    “Hoe meer verklarings ons oor die voorval van getuies kan kry, hoe beter.”

  • Duitse popster wil Namibiese renosters red

    ‘n Derde witrenoster is op die wildsplaas Okamahoro wes van Okahandja in Namibië gestroop, het die Republikein berig.

    Volgens die polisie van die Otjozondjupastreek is die renoster met 10 geweerskote neergevel. In Mei is ook twee witrenosters op dié plaas gestroop. Niemand is nog in hegtenis geneem nie en die ondersoek duur voort.

    Intussen het die opbrengs van ’n potjie poker op Swakopmund die boerpot van die Red die Renosterfonds (SRT) geword.

    Die wedgeld beloop N$100 000 en is deur ’n merkwaardige seun van dié dorp tot die laaste sent vir die bewaring van die bedreigde swartrenosterspesie geskenk.

    Die jong man, Christoph Thesen, ’n Duitse popster met die verhoognaam T-Zon, se pa, mnr. Werner Thesen van Swakopmund, het die oorhandiging van die geld aan die voorsitter van die SRT, mnr. Simson !Uri?Khob, waargeneem.

    Saam met die oorhandiging was daar ’n onderneming van die jong kunstenaar met Duitsland aan sy voete dat soortgelyke ondersteuning ook in die toekoms van hom verwag kan word.

    Die potjie poker is vanjaar in Mei in Hamburg gespeel en Christoph was as “baie belangrike kunstenaar” genooi om daar op te tree. Dit was ’n spel in belang van liefdadigheid wat deur ’n internetmaat­skappy, pokerstar.de, aan­gebied is. Toe stap Christoph met die wedgeld weg.

    “Dis ’n mannetjie met ’n groot hart,” het sy pa tydens die oorhandiging gesê. “Hy is deurentyd bewus van sy welsynsverpligtinge. Hy het gehoor van die renosterstropery in sy geboorteland en het onmiddellik besluit om tot die bewaring van die swartrenosters by te dra.”

    Christoph is in 1993 op Swakopmund gebore en het ná drie jaar in Windhoek in 2011 aan die DHPS gematrikuleer. As 12-jarige seun het hy reeds sy eerste liedjies geskryf en vrygestel. In 2012 het hy by die Makro Media-akademie in Keulen ingeskryf en in 2015 was hy gekwalifiseer om spesiale geleenthede aan te bied.

    Sy loopbaan het as YouTube/rap/hip-hop kunstenaar ontwikkel. In 2014 het sy eerste album, Doppelleben.

    Vroeër vanjaar het hy meer as 20 verhoogoptredes in Duitsland en Oostenryk gelewer. Sy tweede album is op pad en teen September behoort sy tweede Europese toer te begin.

  • Wit egpaar by Namibiese oord aangeval

    “Dis die mees vreesaanjaende geluid om te hoor hoe ’n deur afgebreek word en jy is binne vasgekeer.”

    Ida Ryan (66) en haar man, Larry (67), het albei ernstige be­serings opgedoen toe hulle Woensdag in die middernagtelike ure deur drie swart mans in hul kamer oorval is.

    Die egpaar van Bethal, Mpumulanga, het saam met nog vriende uit Suid-Afrika by ’n lodge buite Windhoek oornag, voordat hulle die volgende dag vir ’n kort wegbreek na die Etosha Nasionale Park sou vertrek, het die Republikein berig.

    Ida het met ’n diep snywond en erge kneuswonde aan die struweling ontkom, terwyl Larry, wat herhaaldelik met ’n knopkierie op sy kop geslaan is, bloeding op die brein opgedoen het. Hy is gister suksesvol vir die bloeding geopereer en moet ten minste twee dae in die hoësorgeenheid deurbring.

    Ida het tydens ’n onderhoud vertel sy en haar man het Woensdagoggend omstreeks een-uur van ’n hou teen die kamer se deur wakkergeskrik. Dit was egter doodstil daarna, tot sowat ’n uur later, toe die egpaar deur die “vreesaanjaende geluid van ’n deur wat oopgebreek word” en met ’n pistool se loop wat in die deur verskyn, begroet is.

    Ida en Larry het opgespring en die deur teen die oormag aan die anderkant probeer toedruk en toehou.

    “Ek het op my knieë gestaan en van onder teen die deur gedruk, terwyl Larry die deur met sy skouer probeer toedruk het.”

    Die egpaar is egter oorval deur drie swartes, met een wat Larry met ’n knopkierie oor die kop geslaan het. Nog een het vir Ida in haar arm met ’n “mes met ’n baie lang lem” gesteek. Een van die aanvallers het sakke gegryp wat op ’n stoel by die venster gelê het en waarin Ida se beursie met identiteitsdokument en kaarte, juwele, skoene en reis­dokumente was.

    “Die swartes het nie ’n woord gesê nie. Ek kon in die lig van die buitelig sien die een met die knopkierie was lank en skraal en het ’n hoed op gehad; ’n ander een was fris en groot.”

    Die drie swartes het uit die kamer gestorm en in die bosse in verdwyn.

    “Toe ek buite toe storm, het drie swartes met groen uniforms buite gestaan. Larry het egter geskree ek moet inkom en die deur toemaak.” Volgens Ida het die lodge nie sekuriteitspersoneel nie en weet hulle nie wie dié swartes was nie.

    So hard het sy tydens die aanval geskree dat Ida se stem tydens die onderhoud ’n dag later steeds hees was.

    “Die eienaars se kind het van my geskree wakker geword en hulle wakker gemaak.” Dié het met flitse en honde hul na die Ryan’s gehaas.

    “Eers toe ons die lig aansit en tot verhaal kom, het ons al die bloed gesien soos wat die wond aan my arm gebloei het.”
    Die polisie is ontbied, terwyl die lodge-eienaar Ida se wond verbind het om die ergste bloeding te stop.

    Die egpaar is in die Mediclinic-hospitaal in die hoofstad opgeneem, waar Ida nege steke vir die wond in haar arm gekry het. Larry het ’n breinskandering ondergaan en is stil gehou tot sy operasie Maandag om die bloeding op sy brein te verlig.

    Hy het Vrydag uit sy hospitaalbed gesê die egpaar sal weer Namibië besoek, waar hulle in die sewentigerjare gebly het.

    “Ons het ses jaar in Namibië gebly, Sodom en Gomorra toe getrek, net om terug te kom en hier ’n pak slae te kry!”
    Die polisie het teen druktyd nog geen verdagtes in hegtenis geneem nie.

  • Haatfees teen wittes na Swapo se Facebook-video

    ‘n Kort video op Facebook van n bebloede swarte wat na bewering Saterdagaand in Klein Windhoek aangerand is, het n vurige rassedebat ontketen en ‘n haatfees teen wittes in Namibië.

    Ene Natangwe John Pereira het die 20 sekonde lange video Saterdagaand op die Facebook-blad van die Swapo Jeugliga geplaas. “Hierdie broer is nou net deur wit ouens in Klein Windhoek aangerand, het hy by sy plasing geskryf.

    Vriende op die blad wou dadelik weet wat gebeur het, waarna ene Joel Ivers Mzanima se kommentaar was: “Vertel vir ons waarom het die wittes hom geslaan? . . . Want ons sal die Mbazuka, hammers ens, vat en beslag lê op die grond wat hulle besit en hulle uit Namibië jaag.

    Ene Mouna Festus se reaksie was: “Sê vir ons wat gebeur het. Die ras wie dit gedoen het, is van geen belang nie.

    Met sommige vriende wat in die meer as 200 kommentare op die plasing die haatkrane vol oopgedraai het met plasing soos “’n goeie boer is ’n dooie boer”, het talle ander die debat tot redelikheid probeer dwing deur daarop te wys dat voorvalle soos hierdie deur die polisie ondersoek moet word en die oortreders ingevolge wetgewing vervolg moet word.

    Adj.komm. Edwin Kanguatjivi, hoof van openbare skakeling by die polisie, was by navraag onbewus van die voorval.

    Hy het later laat weet dit is duidelik die video is by die nuwe polisiekantoor in Klein Windhoek geneem. Die voorval is egter nie in die klagteregister opgeteken nie.

    “Die bevelvoerder sal vasstel wat gebeur het en terugvoering gee, hy Kanguatjivi gesê.

    Net so was dr. Elijah Ngurare, hoof van die Swapo Jeugliga, gister onbewus van die voorval óf die daaropvolgende haatspraak.

    Hy het egter benadruk wittes het ook n plek in onafhanklike Namibië en “niemand het die reg om enigiemand tot geweld aan te spoor op grond van stamgebondenheid of ras nie.

    “My siening was nog altyd dat daar harmonie tussen die jong mense van Namibië moet wees, ongeag of hulle wit of swart is. Ons moet nie die saad van rasseverdeling saai nie.

    Ngurare sê as witmense die nedersetting waarvandaan hy kom wil besoek, moet hulle nie soos tweedeklas burgers voel nie.

    “Ek is werklik, werklik jammer as mense hierdeur (die haatspraak) te na gekom is. Ons moet nie toelaat dat die krag van die duisternis die krag van die lig uitdoof nie, het hy gesê.

    Bron: Die Republikein

  • Koplose babalyk dryf in rivier

    Inwoners van die Mix-­lokasie noord van Windhoek het Dinsdag ná 18:00 op die lyk van ’n ­pasgebore ­babadogtertjie afgekom, het die Republikein berig.

    Volgens ’n jarelange inwoner van die nedersetting het twee vroue na die bosse naby die ou Mix-gebou gestap, toe hulle iets in die nabygeleë rivier gesien lê het.

    “Die een het eers gedink dis ’n pop, maar die ander een het dit met ’n stok uit die water gekrap en gesien dis die lyk van ’n pasgebore baba.

    Volgens haar het die vroue foto’s van die oorskot geneem, maar vir niemand in die nedersetting daarvan vertel nie.

    Woensdagoggend het hulle egter die foto’s van die gru-vonds met inwoners gedeel wat die polisie ontbied het.

    “Ons het almal gaan kyk waar sy gelê het, maar toe ons daar kom, was die lyk weg en het daar net bloed gelê.

    Die inwoners het die rivier en omgewing begin fynkam en sou later die oggend ’n hond sien wat verder af in die rivier aan iets snuffel.

    “Toe ons nader kom, toe sien ons dis die babatjie, maar sy het nie meer ’n kop gehad nie. Die mense en die polisie wat gesoek het, kon dit nie kry nie.

    “Dit was gruwelik om na te kyk. Ons het maar ’n plant gesit waar die kop was, dit het so lelik gelyk.
    Elkeen hier ken mekaar, het sy gesê.

    “Die polisie het gesê ons moet in mekaar se huise kyk of daar iemand was wat swanger was. Maar hier ken almal mekaar, ons is ’n klein gemeenskap en jy sal dit nie kan wegsteek nie. Behalwe, sê sy, as dit dalk ’n “inkommer” was.

    Die polisie het teen druktyd nog nie op navrae ge­reageer het nie.