Sirië – Bladsy 9 – praag.co.za

VN-verslag oor chemiese wapens verwag

Die sekretaris-generaal van die VN, Ban Ki-moen, gaan later vandag ‘n verslag deur wapeninspekteurs oor chemiese wapens in Sirië voorlê.

Hy het reeds aangedui dat die verslag aan die VN se Veiligheidsraad sal bevestig dat senugas in die aanval naby Damaskus op 21 Augustus gebruik is.

Honderde mense is in die aanval dood. Die VN-span is nie toegelaat om te sê wie vir die aanval verantwoordelik is nie.

Westerse regerings wys die vinger na die Siriese regering terwyl Rusland die blaam op die rebelle plaas. ‘n Russies-Amerikaanse skikking om Sirië se chemiese wapenvoorraad te vernietig sal ‘n besliste invloed op die Veiligheidsraad se beraadslagings hieroor hê.

Die skikking maak daarvoor voorsiening dat die wapens binne die volgende nege maande tot niet gemaak moet word. – RSG

VSA, Rusland bereik ooreenkoms oor Siriese wapenvoorraad

Die VSA en Rusland het ooreengekom dat Sirië inspekteurs toegang tot alle chemiese wapens moet gee voordat dit vernietig word.

‘n Raamwerk wat die vernietiging of verwydering van Sirië se chemiese wapens teen die middel van 2014 is deur albei lande aanvaar.

Die Russiese minister van buitelandse sake Sergei Lawrof en sy Amerikaanse eweknie, John Kerry het die plan ná hul derde dag van onderhandelinge in Genève, Switserland, aangekondig.

Sirië sal ook ‘n ondertekenaar van die Organisasie vir die Verbod op Chemiese Wapens (OPC) word, wat hul produksie en gebruik verbied.

John Kerry, die Amerikaanse minister van buitelandse sake, het Saterdag tydens ‘n mediakonferensie in Genève gesê Sirië moet binne ‘n week ‘n volledige inventaris van sy wapenvoorrade oorhandig.

Kerry het gesê dié versoek kan deur ‘n VN-resolusie afgedwing word en het gewaarsku dat sanksies teen Sirië ingestel sal word indien die land die versoek weier.

Die VSA het president Basjar al-Assad en sy regering daarvan beskuldig dat hulle verlede maand ‘n gifgasaanval geloods het, maar kon nie bewys lewer daarvan nie.

President Barack Obama het gewaarsku dat militêre optrede steeds nie uitgesluit is nie. Obama sê hy wil eers “daadwerklike optrede” van Assad se kant af sien. – AFP/RT

Obama probeer Kongres oorreed om Sirië te bombardeer

Amerika se president Barack Obama het die Amerikaanse Kongres gevra om die stemmery vir goedkeuring om militêre aanvalle op Sirië te loods, uit te stel.

Obama sal nie die nodige steun vir sy aanvalsplan in die Kongres kry nie. Sen. John McCain (R-Ariz.) en Sen. Lindsey Graham (R-S.C.) het naarstiglik probeer om die aanval te regverdig.

Die Guardian het vroeër onthul dat McCain omkoopgeld van superryk bankiers, die Rothschilds aanvaar het.

Die Amerikaanse president het gesê die uitstel “sal aan Rusland kans te gee om Damaskus te oorreed om sy chemiese wapens te oorhandig”. Damaskus het reeds ingestem.

Die voorsitter van die Senaatskomitee vir gewapende optrede – Carl Levin – sê Obama wil Sirië en Rusland daarop wys dat hy ernstig is oor die chemiese wapenkwessie.

Die Senaat het Dinsdagaand met debatvoering begin ter ondersteuning van Obama se aanvalsplan. Die Senatore wat die aanval steun kry meer as 80% van hul skenkings van militêre kontrakteurs.

Obama het intussen weereens argumente probeer vind om optrede teen die Siriese regering te regverdig.

Hy het in ‘n toespraak wat regstreeks op Amerikaanse televisie gelewer is, benadruk dat die Siriese regering ongetwyfeld vir die chemiese aanval op Siriese burgers verantwoordelik is. Die VSA beweer dat die bewyse “logiese afgelei” kan word.

Amerika beskik oor geen vaste bewyse dat Sirië vir die gifgasaanval verantwoordelik is nie. Rusland het intussen gesê dat bewyse gevind is dat die beeldmateriaal wat die Withuis gebruik, vervals is.

Twee Europese joernaliste van twee afsonderlike gesaghebbende koerante, ‘n Belg Pierre Piccinin en Italianer Domenico Quirico, bevestig dat die Amerikaans-gesteunde rebelle vir die gifgasaanval verantwoordelik is.

Die Amerikaanse president het in sy toespraak, onder andere, gesê dat “ander tiranne” ook moontlik gifgasse sal aanwend indien die VSA niks omtrent Sirië doen nie. Amerika het ‘n aantal jare gelede die grootste gifgasaanval ooit in die Midde-Ooste teen duisende Koerdiese burgerlikes gesteun.

Hy sê ook dat al-Kaida bemoediging uit die wêreld se daadloosheid sal put. Dié opmerking het vir heelwat verbasing gesorg, aangesien die VSA al-Kaida in Sirië aktief oplei, bewapen en finansieel steun.

Obama se toespraak kom te midde van toenemende internasionale verdeeldheid oor en druk op die VSA om af te sien van die voorgestelde bombardement van Sirië. Frankryk het skielik hul ywerige steun teruggetrek.

‘n Vergadering deur die Verenigde Nasies Veiligheidsraad is ter elfder ure afgestel, nadat Rusland sy versoek om ‘n sessie onttrek het.

Sirië verwelkom plan om chemiese arsenaal onder internasionale beheer te plaas

Sirië het ‘n voorstel van Rusland verwelkom om sy chemiese wapenarsenaal onder internasionale beheer te plaas.

Dié stap kan beteken dat die VSA se voorgestelde militêre ingryping gestuit kan word.

Die Siriese minister van buitelandse sake, Walid al-Moealem, het gesê sy regering verwelkom die voorstel, maar hy het nog nie aangedui dat sy land die plan aanvaar nie.

Die Amerikaanse president, Barack Obama, het gesê dat dié plan “potensieel positief” kan wees en het beloof om ernstige oorweging daaraan te skenk.

Indien Sirië sy chemiese wapenarsenaal onder internasionale beheer plaas, kan dié stap beteken dat die voorgestelde militêre ingryping deur Amerika afgeweer word.

Moealem sê die stap kan beteken dat die lewens van Siriërs gespaar sal word. Frankryk het gevra dat die internasionale gemeenskap die Russe se voorstel omsigtig moet oorweeg.

Die voormalige Amerikaanse minister van buitelandse sake, Hillary Clinton, het na ‘n vergadering met president Barack Obama gesê die Russiese plan moet nie nog ‘n verskoning wees vir ‘n vertraging of enige dwarsboming nie.

Clinton het gedreig dat Rusland die internasionale gemeenskap se pogings moet steun of die gevolge moet dra.

Afrikaans kort ‘n nuwe mediamodel

deur Dan Roodt

[followbutton username=’danroodt’ count=’true’ lang=’en’ theme=’light’]

Hou van Dan Roodt se Facebookblad

Moontlik was daar ‘n tyd in die negentiende eeu toe mense koerante gelees het bloot om ingelig te word. As deel van jou koerant het jy sommer op die koop toe die jongste aflewering van ‘n vervolgverhaal deur Charles Dickens of Honoré de Balzac, twee van die gewildste skrywers in die negentiende eeu, ontvang.

Daardie tye is egter vir goed verby. Toenemend in die twintigste eeu, maar veral nou in die een-en-twintigste, het media byna ‘n vorm van “oorlog met ander middele” geword. Joernalistieke objektiwiteit en selfs integriteit het plek gemaak vir belange wat deur media gedien word. Individuele joernaliste en meningsvormers is “penvegters” wat elke dag teen ‘n opponent in die kryt tree. Trouens, laasgenaamde is die titel van ‘n biografie deur Jaap Steyn oor Piet Cillié, een van die bekende historiese joernaliste van Die Burger.

Twee onlangse onderhoude wat hier op die praagwebblad gevoer is, is verhelderend sover dit die hedendaagse rol van media betref. Die eerste is dié met Margarita Simonjan, die uitvoerende redaktrise van die Russiese TV-netwerk, Russia Today. Die tweede gesprek, met dr. Christo Landman, verskyn vandag.

In haar onderhoud vergelyk Simonjan die rol van haar internasionale nuusnetwerk met dié van die Russiese departement van verdediging en sê: “…as Rusland gaan oorlog maak… dan sal ons by die geveg betrokke raak, ja. Dit is op die land se regte, gewapende konflikte van toepassing. Onthou u die oorlog in Augustus 2008? Op daardie tydstip het die meeste Westerse mediahuise gereageer asof hulle Georgië se departement van verdediging was.”

Aansluitend hierby verduidelik dr. Christo Landman: “As jy onder die aandag kom, dan moet jy aanvaar dat daar strategieë in werking gestel sal word om jou te neutraliseer. Sodra jy ‘n faktor word, is jy ‘n teiken.” Met ander woorde, Individue en groepe wat vir Afrikaans of die Afrikanersaak standpunt inneem, sal geteiken word.

In die Engelse rubriek wat ek gister geskryf het, sê ek in die eerste sin: “South Africa’s multiracial and multicultural society is exploding into a never-ending Kulturkampf or American-style culture war.” Hierdie kultuuroorlog gaan oor idees, maar ook oor ons reg op voortbestaan, ons reg om ons privaateiendom te behou of om ons kinders na Afrikaanse skole te mag stuur. Dit is alles “regte” wat in die brandpunt van hierdie stryd staan. Aan die oorkant is daar twee radikale standpunte: een beskou ons as “nie deel van die Afrika-kontinent nie” en daarom behoort al ons bates gewoon genasionaliseer te word en ons uit die land verdryf te word. Die ander “laat ons toe” om aan te bly, maar op voorwaarde dat ons geheel en al in die meerderheidsamelewing integreer en op die duur geassimileer word.

In hierdie oorlog is geen metode taboe nie: ‘n persoon kan geëtiketteer word, vir ‘n idioot uitgeskel word, sy privaatlewe kan oopgevlek word en soos ons in die onlangse Amerikaanse geval van Paula Deen gesien het, as jy dertig jaar vantevore die K-woord (die N-woord in die VSA) gebruik het, kan jou reputasie vandag daardeur geruïneer word.

Dit is ook ‘n reële oorlog want dit gaan om klimaatskepping, propaganda, om haat en vyandigheid teen die geteikende groep op te wek. Geweld geskied agterna byna outomaties. Ek verstout my om te sê dat plaasmoorde in dié land nie sou plaasgevind het indien die Afrikanervyandige media nie oor baie jare soveel nyd en gif teen boere gesaai het nie. Die internasionale propagandastryd wat tans om Sirië gevoer word, is ‘n ander insiggewende voorbeeld. Of Amerika, Frankryk en Brittanje daardie land gaan aanval, gaan uitsluitlik bepaal word deur die soort klimaat wat hulle in die media kan skep. Daar geskied manipulasie van feite, oor en weer beskuldigings van chemiese wapengebruik, oorlogsmisdade en dergelike meer.

Daar is feitlik geen “redaksionele onafhanklikheid” nie, want elke orgaan, elke koerant, TV-kanaal of radiostasie het reeds kant gekies, sowel plaaslik as internasionaal en dis maklik om sy partydigheid uit sy beriggewing en kommentaar af te lei.

Om maar een bekende voorbeeld te noem: Die Naspersgroep volg openlik die Britse en Amerikaanse regerings se standpunte in sy internasionale beriggewing en daarom steun Naspers blindelings ‘n aanval op Sirië. In hul plaaslike nuusdekking word alles weer so geplooi om die DA en die groot sakeondernemings, waaronder die mynhuise, te pas. Afrikanerskap is vir Naspers ‘n onding en word telkens met “rassisme” en ander ongure begrippe verbind.

‘n TV-kanaal soos Russia Today word deur die Russiese regering befonds. Hier sit Afrikaners met ‘n probleem, want geen regering ter wêreld gaan vir ons media betaal nie. Plaaslike adverteerders mag ‘n bydrae lewer, maar te eniger tyd kan adverteerders deur veiligheidsdienste of vyandelike media geteiken word en kan sodanige fondse summier afgesny word. Suid-Afrikaanse korporatiewe advereerders is ook geheel en al verbind tot die multikulturele samelewing, regstellende aksie, swart ekonomiese bemagtiging en alles wat daarmee saamgaan, dus gaan hulle ook maar langtand wees om in media te adverteer wat krities teenoor dié beleidsrigtings staan. Boonop verkies Suid-Afrikaanse reklame-agentskappe steeds om op papier of in uitsaaimedia soos radio of TV te adverteer, pleks van op die internet. Volgens beskikbare statistiek, word slegs 2% van alle reklame in ons land aan digitale media bestee.

Hoewel digitale media soos webblaaie, ens., dus aan die agterspeen suig sover dit advertensie-inkomste betref, is gedrukte koerante besig om te kwyn en word hulle deur aanlynmedia vervang. Dit skep ‘n geweldige finansiële krisis vir die mediahuise, want niemand maak werklik geld uit die internet nie, behalwe enkele reuse- internasionale groepe soos Google of Facebook wat oor honderde miljoene gebruikers beskik.

In Afrikaans is die toestand des te meer akuut, vanweë die klein mark wat deur Afrikaanse media bedien word. Hoewel Afrikaanse media redelik sterk staan teen Engelse media in Suid-Afrika, kan ons glad nie met die groter tale, veral natuurlik Engels, internasionaal meeding nie. ‘n Webwerf soos die Britse mailonline beskik byvoorbeeld oor 70 miljoen gebruikers wat aan hom ‘n aardige advertensie-inkomste besorg.

Om verskeie redes is Afrikaanse media nie volhoubaar nie. Naspers het ‘n sogenaamde “betaalmuur” vir sy dagblaaie se aanlynweergawes ingestel. Behalwe vir die Wall Street Journal en ‘n paar ander internasionale voorbeelde, wil lesers eenvoudig nie vir aanlyninhoud betaal nie. Die internet is veronderstel om gratis te wees.

Dit is egter waar dat aanlynmedia tans nog op die gedrukte media parasiteer. Vanweë die groter advertensie-inkomste van gedrukte media, kan hulle bekostig om meer joernaliste in diens te hê, ondersoekende joernalistiek te doen en bepaalde groot stories oop te vlek. Aanlynmedia maak meesal gebruik van die groot nuusdienste wat die stories van gedrukte koerante herverpak en teen ‘n breukdeel van die oorspronklike koste te koop aanbied. Andersins het sulke nuusdienste hul eie joernaliste in diens wat berigte skryf wat weer aan die gedrukte koerante en aanlynmedia verkoop word.

Maar wat gebeur wanneer gedrukte koerante heeltemal tot niet gaan en al daardie joernaliste wat danksy papier steeds ‘n salaris verdien, eensklaps sonder werk gaan sit? Ek vermoed dat ons in Afrikaans slegs vyf jaar van so ‘n situasie verwyder is, gouer indien die huidige vervreemding tussen die Nasperskoerante en Afrikaanse lesers wyer uitkring. Danksy sy oorsese belange, onder meer in Hong Kong, kan Naspers al sy Afrikaanse media sluit sonder dat dit sy winsgewendheid noemenswaardig sal beïnvloed.

Wat ons by praag probeer regkry, is om die gratis model wat reeds op die internet gevestig is, só aan te wend dat dit op die duur volhoubaar kan raak. Niks is egter ooit heeltemal gratis nie en in die reël moet vyf persent van gebruikers bereid wees om vir ‘n diens te betaal vir so ‘n diens om te kan voortbestaan.

Die netwerk wat praag gevestig het, met sowel ‘n Afrikaanse as ‘n Engelse webwerf, asook ‘n sterk teenwoordigheid op sosiale media soos Facebook en Twitter, beskik oor die potensiaal om daardie “departement van mediaverdediging” te word wat Afrikaners so broodnodig het. Veral vanaf ons Engelse webblad loods ons kritiese kommentaar en berigte wat hard slaan en konsternasie onder ons vyande veroorsaak, omdat Afrikaners nou vir die eerste keer in ‘n lang tyd hulle teen propaganda-aanvalle verdedig.

Beide webwerwe verteenwoordig ‘n formidabele navorsingsbron waar die aantal moorde, verkragtings en ander geweld in ons land daagliks weerspieël word. Dit maak dit vir navorsers, aktiviste en kommentators moontlik om sulke inligting altyd byderhand te hê.

Die internet beskik beslis oor die potensiaal om ons te bevry, want ons kan ook ekonomiese netwerke, handel, beleggings, betalings en wat nog van hier af bedryf. Daar moet egter ‘n nodale punt wees waar al hierdie dinge ontmoet.

Dat hierdie webblad moet aanhou bestaan en moet groei, is van wesentlike belang. Word deel van die vyf persent deur op die onderstaande banier te klik!

G20 diep verdeel oor Sirië

Die staatshoofde van die wêreld se vernaamste ekonomieë, die G20, kon nie daarin slaag om hulle diepe verdeeldheid oor die konflik in Sirië te oorkom by samesprekings by die G20-beraad wat tans in St Petersburg in Rusland plaasvind nie.

Die VN en Arabiese Liga se gesant vir Sirië, Lakhdar Brahimi, het hom ook by die leiers aangesluit en die hoofsekretaris van die VN, Ban Ki-Moon het druk probeer toepas vir ‘n internasionale vredeskonferensie oor Sirië.

Wêreldleiers het hulle eie standpunte probeer stel in toesprake van 10 minute elk, maar geen deurbraak kon bereik word nie.

Die Italiaanse Eerste Minister, Enrico Letta, het na afloop daarvan gesê die diepe verdeeldheid oor Sirië is nou slegs bevestig.

Amerika se gesant by die VN het vanuit New York, Rusland daarvan beskuldig dat hy die VN-Veiligheidsraad gyselaar hou, terwyl die Britse Eerste Minister, David Cameron, aangedui het dat Londen nuwe bewyse het van die gebruik van chemiese wapens. – RSG

Kerry mislei Senaatskomitee oor rebelle

By die Senaatskomitee oor buitelandse betrekkinge waar Kerry die saak vir president Barack Obama se plan om Sirië aan te val gestel het, het Kerry beweer dat die gewapende opposisie “toenemend deur sy gematigheid en uitgebreide lidmaatskap gekenmerk word, hulle gehoorsaamheid aan demokratiese prosesse, inklusiwiteit en ‘n grondwet wat minderhede beskerm”.

“En die opposisie word sterker by die dag,” het Kerry bygevoeg.

Intelligensiebronne en kundiges oor die Siriese konflik sê dié assessering is nie korrek nie.

Hulle sê Islamitiese groepe soos die Al-Kaida se Nusra Front is beter georganiseer, gewapen en opgelei.

Kerry se opmerkings verteenwoordig ‘n verandering in gesindheid deur die Obama-administrasie, wat vir meer as twee jaar versigtig was om nie aan rebelle Amerikaanse wapens te verskaf nie.

So onlangs as die einde van Julie, op ‘n sekuriteitskonferensie in Aspen, Colorado, het die adjunk-direkteur van die Pentagon se verdedigingsintelligensie-agentskap, David Shedd gesê hy is “baie bekommerd dat die mees radikale elemente sal oorneem”.

Die Amerikaanse en geallieerde intelligensiebronne het egter gesê die soort radikale aanslae waarna Shedd verwys het, het nie verander nie.

In ‘n tweede verhoor Woensdag, is Kerry uitgedaag deur ‘n Republikeinse verteenwoordiger Michael McCaul, Texas .

“Wie is die rebelle? Wie is hulle? Ek vra dit die hele tyd in my inligtingsessies,” het McCaul gevra. “En elke keer word ek ingelig dit is net erger en erger, want die meerderheid van die rebelle – en ek sê hier meerderheid – is radikale Islamiete wat instroom van oor die hele wêreld.”

Kerry het McCaul se stelling probeer afmaak as verkeerd en gesê dat “gematigde” groepe oorneem.

Top Amerikaanse intelligensie en militêre amptenare het onlangs ook ‘n somber openbare evaluering van die relatiewe sterkte van matige en godsdienstige ekstremistiese Siriese rebelle gedoen.

As anekdotiese bewys is ‘n video op YouTube uit Sirië ‘n paar dae gelede gesmokkel deur ‘n voormalige rebel wat die rebelle se laggende bevelvoerder gedokumenteer het in afgryslike toneel.

Dit is met walging begroet en bied ‘n donker insig in hoe baie rebelle ‘n wrede en genadelose houding teenoor gevangenes openbaar.

Hierdie video, geskiet in April, sluit aan by ‘n groeiende aantal bewyse van ‘n toenemend kriminele omgewing bevolk deur bendes van plunderaars, opportuniste, ontvoerders en moordenaars.

Libië staar oor die afgrond

‘n Bietjie minder as twee jaar gelede het Philip Hammond, die Verdedigingsekretaris, Britse sakemanne uitgenooi om te deel in die heropbou van Libië en die verwagte aanvraag in natuurlike hulpbronne te ontgin .

Libië het egter intussen feitlik heeltemal die produksie van olie laat vaar omdat die regering beheer verloor het oor groot dele van die land .

Muiters het die olieterminale op die Middellandse See oorgeneem en verkoop ru-olie op die swart mark in weerwil van die regering se dreigemente dat hulle enige tenkers wat dit dra, sal bombardeer.

Die wêreld se aandag is gefokus op die staatsgreep in Egipte en die gifgasaanval in Sirië oor die afgelope twee maande. Libië wat tans gedompel is in sy ergste politieke en ekonomiese krisis sedert die nederlaag van Gaddafi twee jaar gelede, is heeltemal vergete.

Regeringsgesag is besig om te disintegreer in alle dele van die land.

Stellings deur Amerikaanse, Britse en Franse politici dat NAVO se militêre optrede in Libië in 2011 ‘n uitstekende voorbeeld van ‘n suksesvolle buitelandse militêre ingryping is wat in Sirië herhaal behoort te word, klink teen hierdie agtergrond waansinnig.

Libië se gesogte hoëgehalte ru-olie het van 1,4 miljoen vate per dag vroeër vanjaar tot net 160,000 vate per dag teruggesak.

Libiërs is toenemend aan die genade van krygshere wat optree buite die wet oorgelaat.

Die internasionale gemeenskap ïgnoreer die toenemende geweld. Die buitelandse media, wat eens die hotelle van Benghazi en Tripoli volgepak het, het heeltemal belangstelling verloor in die naderende ineenstorting van die sentrale regering.

Buitelanders het gevlug uit Benghazi sedert die Amerikaanse ambassadeur, Chris Stevens, vermoor is in die Amerikaanse konsulaat verlede September toe hy wapens na Sirië probeer smokkel het.

Anargie heers oral in die hoofstad. Die regering het ‘n beroep op die Veiligheidsmagte gedoen, bestaande uit voormalige anti-Gaddafi-groepe om orde te herstel.

Diplomate het reeds onder skoot gekom in Tripoli met die EU-ambassadeur se konvooi wat in ‘n lokval gelei is buite die Corinthiahotel op die waterfront . ‘n Bomaanval het die Franse ambassade vernietig.

Een van die talle mislukkings van die post-Gaddafi regering is sy onvermoë om die sterwende ekonomie te laat herleef. Libië is geheel en al afhanklik van sy olie- en gasinkomste en sonder hierdie sal die owerheid nie in staat wees om sy staatsamptenare te betaal nie.

‘n Lid van die parlementêre komitee oor energie, het aan Bloomberg gesê dat “die regering op sy reserwes staatmaak. As die situasie nie verbeter nie, sal hulle nie in staat wees om salarisse te betaal teen die einde van die jaar nie.”

Britse regering magtig gifgas-chemikalieë na Sirië

Die Britse regering is beskuldig van “buitengewone laksheid” met wapenbeheer nadat dit rugbaar geraak het dat amptenare die uitvoer van twee chemikalieëwat gebruik kan word om saringifgas te maak na Sirië gemagtig het.

Sekretaris Vince Cabel, sal vandag gevra word om te verduidelik hoekom ‘n Britse maatskappy dubbele uitvoerlisensies vir die gebruik stowwe toegestaan het, terwyl Sirië se burgeroorlog gewoed het en kommer oor chemiese wapens aan die toeneem was.

Die bekendmaking van die lisensies vir kaliumfluoried en natriumfluoried, wat albei as bronchemikalieë in die vervaardiging van gifgas gebruik word, kom nadat die Amerikaanse minister van buitelandse John Kerry gesê het die Verenigde State van Amerika het bewyse dat saringas gebruik is in verlede maand se aanval in Damaskus .

Kerry het aangekondig dat spore van die gas in hare en bloedmonsters gevind is van die slagoffers van die aanval in die Siriese hoofstad.

Die Obama-administrasie oorweeg nou militêre ingryping en het ‘n volskaalse politieke aanval Sondag geloods om ‘n skeptiese Kongres te oorreed om ‘n militêre aanval teen Sirië goed te keur.

Die Britse owerhede sê alhoewel die lisensies toegestaan is aan ‘n naamlose Britse chemiese maatskappy in Januarie 2012, is die stowwe in reaksie op strenger EU-sanksies teruggehou.

Cable erken dat sy amptenare die uitvoer van ‘n ongespesifiseerde hoeveelheid van die chemikalieë gemagtig het in die wete dat hulle op ‘n internasionale skedule van chemiese wapens gelys is.

Rebelle erken dat hulle vir Siriese gifgas-aanval verantwoordelik is

Siriese rebelle in die Damaskus-voorstad van Ghouta het aan Associated Press se joernalis Dale Gavlak erken dat hulle verantwoordelik was vir die afgelope week se gifgasaanvalle wat Westerse magte op Bashar al-Assad se magte geblameer het.

Die onthulling kom nadat ‘n ongeluk deur rebelle weens die verkeerde hantering van chemiese wapens aan hulle verskaf deur Saoedi-Arabië, tot die sterftes van meer as 300 burgerlikes – waaronder ook kinders – gelei het.

“Talle onderhoude met dokters, Ghouta-inwoners, rebelle en hul gesinne wys dat… baie glo dat sekere rebelle chemiese wapens via die Saoedi-intelligensiehoof, prins Bandar bin Sultan bekom het, en dit verantwoordelik was vir die (dodelike) gasaanval,” skryf Gavlak .

Rebelle het aan Gavlak gesê dat hulle nie behoorlik opgelei is oor hoe om die chemiese wapens te hanteer nie en selfs verduidelik het wat dit presies was. Dit wil voorkom asof die wapens aanvanklik veronderstel was om na die Al-Kaidagroep Jabhat al-Nusra te gaan.

“Ons was baie nuuskierig oor hierdie wapens. En ongelukkig, ‘n paar van die rebelle het die wapens sonder sorg hanteer en die ontploffings veroorsaak,” het ‘n rebel by name “J” aan Gavlak gesê.

Sy weergawe is bevestig deur ‘n ander vroulike rebel by name “K”, wat aan Gavlak gesê het, “Hulle het nie vir ons gesê wat hierdie wapens is of hoe om dit te gebruik nie. Ons het nie geweet dit is chemiese wapens nie. Ons het nooit gedink dit is chemiese wapens nie.”

Ander bronne het ook aan Gavlak erken dat hulle twee weke gelede gevra is wat die wapens is en dit beskryf as ‘n ” buisagtige struktuur “, terwyl ander soos ‘n “groot gas bottel” gelyk het. Die bron het die Saoedi’s as die chemiese wapenverskaffers uitgewys.

“Meer as ‘n dosyn rebelle waarme ek onderhoude gevoer het, het aangedui dat hul salarisse kom van die Saoedi-regering,” skryf Gavlak .

Dale Gavlak se geloofwaardigheid is indrukwekkend. Sy is ‘n korrespondent vir die Associated Press wat reeds vir twee dekades in die Midde-Ooste werk en het ook gewerk vir National Public Radio (NPR).

Die webwerf waarop die storie het oorspronklik verskyn het, Mint Press, (wat tans af is as ‘n gevolg van die groot verkeer na die artikel) is ‘n wettige media-organisasie in Minnesota.

Die Obama-administrasie is ingestel daarop om intelligensiebevindinge aan te bied in ‘n sekere lig in ‘n poging om te bewys dat Assad se magte agter verlede week se aanval sit, ten spyte van Amerikaanse veiligheidsamptenare se erkenning dat daar nie vaste bewyse is nie.

Intelligensie het reeds aan die lig gebring dat die Siriese ministerie van verdediging se “paniekbevange” oproepe oor chemiese wapens daarop dui dat dit nie deur Assad se magte beveel is nie.

Britse parlement stem teen Siriese aanval

Die Britse stem teen ‘n militêre aanval in Sirië is ‘n taai klap vir premier David Cameron se binnelandse politieke lotgevalle.

Sedert hy die amp in 2010 opgeneem het, is hy by verskeie geleenthede ondermyn nie net deur opposisiepartye nie, maar ook deur elemente in beide sy eie Konserwatiewe Party en die liberales, die junior lid van die Verenigde Koninkryk se regerende koalisie .

Dit was die kombinasie wat Cameron laat Donderdag gepootjie het. Die regering het verloor, met 285 teen 272, om in beginsel militêre ingryping in Sirië goed te keur. Lede van al die groot partye – insluitende sy eie Tories – was gekant teen die maatreël.

Cameron het gesê dit is duidelik dat die Britse Parlement nie wil sien dat die Verenigde Koninkryk betrokke raak in militêre aksie nie en “die regering sal dienooreenkomstig optree”.

Die uitslag is ‘n belangrike oomblik in die Britse politiek. Dit is hoogs ongewoon vir ‘n eerste minister om bes te gee oor sy buitelandse beleid en stel die vraag oor die Verenigde Koninkryk se rol op die internasionale toneel vorentoe .

Dit is ook ‘n terugslag vir Anglo-Amerikaanse verhoudinge wat vrae oor die sogenaamde “spesiale verhouding” tussen die twee lande laat ontstaan. In onlangse dekades het die Verenigde Koninkryk selde indien ooit verskil van die VSA oor so ‘n belangrike strategiese kwessie.

Terwyl die regering nie parlementêre goedkeuring vereis om militêre aksie te neem nie, sal dit nou polities moeilik wees om dit te doen. ‘n Woordvoerder van die premier het bevestig dat die Verenigde Koninkryk nou nie sal deelneem aan die Siriese aksie nie.

Die uitkoms van die Verenigde Koninkryk se houding kan dit moeiliker maak vir president Barack Obama en ander oorlogsvoos Westerse bondgenote om hul eie publiek van die behoefte aan ingryping in Sirië te oortuig.

Die Britse verdedigingsekretaris, Philip Hammond, het gesê Amerika “sal teleurgesteld wees dat Brittanje nie betrokke sal wees nie.”

Die terugslag laat ook vrae oor Cameron se gesag.

Amerikaanse amptenare het gesê dat Obama bereid is om op te tree in die komende dae sonder Brittanje. Hulle het bygevoeg dat in teenstelling met die VSA se betrokkenheid in militêre operasies in Libië in 2011, die opsies wat oorweeg word in Sirië op ‘n kleiner skaal sal wees en nie ‘n koalisie vereis om doeltreffend te wees nie.

Brittanje se ommekeer laat Frankryk as die laaste Europese land nog steeds lugaanvalle op die Assad-regime oorweeg. Franse amptenare het gesê dat die land militêre planne vir moontlike optrede in Sirië voorberei het, maar Donderdag herhaal dat geen finale besluit nog geneem is nie .

Die Franse regering kan sonder Parlementêre goedkeuring besluit om aan te val.

Petrolprysskok vir Oktober verwag

Die verswakkende rand en die stygende olieprys het gelei tot baie bespiegelings dat die Suid-Afrikaanse motoris ‘n massiewe brandstofprysstyging in die gesig staar. Die ekonoom Mike Schüssler sê die toename in September sal ‘n paar sent wees, maar het gewaarsku dat ‘n massiewe toename vir Oktober te wagte is.

“Dit is baie donker op die oomblik vir Oktober, maar synde alles politieke dinge, is dit baie moeilik om te voorspel wat gaan gebeur met die olieprys, maar ek dink in alle waarskynlikheid gaan ons ‘n baie groot toename in die prys sien van brandstof vanaf Oktober, waarskynlik 40 tot 50 sent.“

Oor die voortgesette stakings in die land, sê Schüssler hulle nie help om die geldeenheid bestendig te hou nie.

“Ek dink dit is meer as net ‘n staking. Daar is beslis ‘n bekommernis oor alle ontluikende markte op die oomblik. So die meeste ontluikende markte is tans onder druk. Sekerlik sal die stakings nie help om die Suid-Afrikaanse geldeenheid te bestendig nie.“

Die rand het voortgegaan om te sleg presteer. Die geldeenheid het ‘n nuwe vier–jaar laagtepunt bereik vroeër in die sessie met R10,51 teenoor die Amerikaanse dollar Woensdag.

”n Rukkie gelede was die rand op R10,31 teenoor die dollar. Die rand se wisselvalligheid het voortgegaan omdat beleggers senuagtig is oor die krisis in Sirië en daarom ontluikende markte se geldeenhede verkoop het.

SA vra dat VN tyd gegun word met Sirië

Die Suid-Afrikaanse regering sê die Verenigde Nasies se wapeninspekteurs moet meer tyd gegun word om hulle ondersoek na bewerings dat chemiese wapens in Sirië gebruik is, te voltooi.

Die regering sê hy is bekommerd oor wat hy noem die gevaarlike retoriek deur Westerse regerings soos Amerika en Brittanje oor die moontlikheid van militêre ingryping in Sirië.

Volgens die regering sal meer geweld nie bydra tot ‘n volhoubare oplossing vir die oorlog-geteisterde land nie. Die regering het ‘n beroep op die VN Veiligheidsraad gedoen om saam te werk om ‘n onderhandelde skikking vir die krisis te bereik.

Intussen het Desmond Tutu in ‘n verklaring gesê Egipte en Sirië het eerder humanitêre hulp as militêre hulp nodig. “Diegene wat selfsugtig ekonomiese, ideologiese en godsdiensmag uitoefen kan nie volhou om die wense van die meerderheid van gewone en goedbedoelende lede van die gemeenskap te saboteer nie.”

Die sekretaris-generaal van die VN, Ban Ki Moon, sê intussen die inspekteurs behoort teen môre hulle werk af te handel. Hy sê hulle sal Saterdag uit die land vertrek.

Neo-Cons gereed om Sirië aan te val

Amerika en Brittanje het Dinsdag intensiewe voorbereidings getref om weer ‘n soewereine staat aan te val, nadat hulle voorheen redes versin het om Irak sowel as Libië te teiken. Die rede sal oënskynlik wees om pres. Basjar al-Assad van Sirië te straf vir sy gebruik van gifgas teen burgerlikes verlede week.

Die VSA en Brittanje soek reeds geruime tyd ‘n voorwendsel om Sirië aan te val. Hulle het ‘n aantal jare gelede egter aan Saddam Hussein chemiese wapens voorsien wat hy teen duisende Koerde aangewend het, sonder enige teenkanting.

Rusland het begin om alle Russe uit Sirië te verwyder te midde van toenemende aanduidings dat Westerse moondhede gereed maak om ‘n lugaanval uit te voer. Die Amerikaanse minister van verdediging, Chuck Hagel sê hulle wag slegs op President Barack Obama se bevel.

Intussen is daar in Israel ‘n toestroming na verspreidingsentrums vir gasmaskers. Dié land verwag ‘n vergeldingsaanval uit Sirië of een van sy bondgenote. Die Israelse Eerste Minister het op sy beurt gewaarsku dat Israel hewig sal reageer indien daar enige aanval op hom is.

Chuck Hagel, Amerikaanse minister van verdediging, is gereed as die bevel gegee word. Die Britse weermag is reeds in die Middellandse See ontplooi.

The Guardian het berig dat die vlieëniers van passasiersvliegtuie uit die lug verhoogde aktiviteite by die lugmagbasis Akrotiri in Ciprus, slegs 160 km van die Siriese kus, opgemerk het. Talle C-160-vragvliegtuie is opgemerk, terwyl ’n aantal bomwerpers op die teerblad gereed gestaan het.

David Cameron, Britse premier, sal ’n spesiale parlementsitting lei om toestemming vir deelname aan die operasie te verkry. In die VSA sal pres. Obama, in weerwil van die Grondwet en internasionale reg, die aanval waarskynlik sonder die Kongres se toestemming moet lei.

Obama se besluit kan meer ongewild wees as tydens die laaste dae van Amerika se oorlog in Viëtnam. Byna tweederdes van Amerikaners het aangedui dat hulle nie só ‘n inval steun nie, selfs al is Sirië vir die dood van sy eie inwoners verantwoordelik.

Intussen het die VN-span ondersoekers in Damaskus gister hul tweede besoek aan die buitewyke van die stad waar die gasaanvalle plaasgevind het ’n dag uitgestel. Hulle sal alleen bepaal of daar chemiese wapens gebruik is en nie wie daarvoor verantwoordelik is nie.

Hoofstroommediabronne het egter seker gemaak dat hulle sulke inligting van die publiek weerhou. Hulle het ook die aantal sterftes oordryf. MSF (Dokters Sonder Grense) het aangedui dat net meer as 300 mense dood is, terwyl HSM die getal op 1 000 gestel het.

Die Washington Post het die jongste ingryping op sy voorblad aangekondig. Obama oorweeg glo ‘n kort bombardement van twee dae. Dit sal missiele insluit wat van skepe in die Middellandse See gelanseer word, asook bombardemente uit die lug.

Obama se besluit sal glo afhang van drie faktore: ’n Intelligensieverslag wat aandui dat Sirië bo alle redelike twyfel vir die chemiese aanvalle verantwoordelik was, konsultasie met Amerika se bondgenote en die Kongres se mening.

Walid Moeallem, Siriese minister van buitelandse sake, het ten sterkste ontken dat sy land vir die chemiese aanvalle verantwoordelik was.

Rusland en China het aangedui dat die Veiligheidsraad eers toestemming moet gee. Hulle sal waarskynlik hul vetoreg uitoefen indien die Raad in die guns van die Anglo-Amerikaanse Neo-Cons besluit.

Volgens bronne wat ‘n vergadering met die Siriese Nasionale Koalisie in Istanbul bygewoon het, was gesante van 11 “Vriende van Sirië” teenwoordig, insluitende Robert Ford, die voormalige Amerikaanse ambassadeur in Sirië wat nou Washington se skakel met die opposisie is, het die bronne gesê.

Die vergadering het in ‘n hotel in die middestad van Istanbul plaasgevind.

Die Vriende van Sirië-kerngroep bestaan uit die Verenigde State van Amerika, Brittanje, Frankryk, Italië, Duitsland, Turkye, Saoedi-Arabië, Egipte, Jordanië, die Verenigde Arabiese Emirate en Katar.

“Die Amerikaners wil ‘n militêre aksie vasmaak aan die chemiese wapen-kwessie, maar die boodskap is duidelik: Hulle verwag dat die dreigement sterk genoeg sal wees om Assad na Genève te dwing sodat hy ‘n tussentydse regering aanvaar met volle gesag,” het ‘n Siriese opposisiefiguur gesê .

Assad se minister van buitelandse sake, Moeallem, het in Junie gesê die owerhede is gereed om ‘n regering van nasionale eenheid te vorm, maar nie hulle mag oorhandig aan die ander kant nie, in ‘n aanduiding dat Assad nie van plan is om beheer van die land af te staan nie.