Diere vrek van honger op Mandela-plaas

Karkasse van beeste wat al weke gelede weens honger en verwaarlosing gevrek het, het inspekteurs van die Nasionale Dierebeskermingsvereniging (NDBV) op Nelson Mandela se plaas naby Qunu in die Oos-Kaap begroet.

Die plaas is reeds van alle natuurlike weiding gestroop en die diere moes aanvullende voer kry, het die NDBV se inspekteurs aan Media24 gesê.

Mandela was ironies genoeg ‘n ere-beskermheer van die NDBV, maar dit het blykbaar nie inslag gevind by die veewagters nie.

Volgens ’n amptenaar wat naamloos wou bly, is ’n groot trop beeste in ’n klein kampie aangehou, aangesien Madiba, volgens die veewagters op die plaas, geglo het die vee moet naby die huis wees as hy “wou huis toe kom”.

Die NDBV het met die eksekuteurs van Mandela se boedel gekontak om die onverkwiklike toestand van die mishandelde diere te probeer besleg.

’n Veearts, dr. Shaun Morris, het die vee en hul weiding geëvalueer, waarna hy ’n lys van aanbevelings opgestel het vir die eienaars.

Die aanbevelings sluit in ’n vermindering van die aantal diere en beter voeding.

Die NDBV sal die plaas volgende week weer besoek om te verseker dat die aanbevelings nagekom word.

Zuma verwelkom Palestynse leier in ‘bevryde sone’

Pres. Jacob Zuma het Woensdag pres. Mahmoed Abbas van Palestina op sy eerste staatsbesoek in Pretoria verwelkom.

Die president het Nelson Mandela aangehaal waar hy die Palestyne se vryheidstrewe met dié van Suid-Afrika verbind.

Zuma het Suid-Afrika se steun aan die Palestyne se onafhanklikheidstrewe toegesê: “Ons sal julle met elke tree bystaan, wat dit ookal verg.

“Julle het aangedui watter soort steun julle van ons vereis en ons sal ons belofte aan julle nakom.”

Zuma het na die verwoestende aanvalle deur Israel in Gasa verwys wat vyftig dae geduur het, meer as 2 000 Palestyne se dood veroorsaak het.

Talle burgerlikes en kinders was ook onder die slagoffers en noodsaaklike infrastruktuur en huisvesting is in die aanvalle vernietig.

Zuma het gesê dat die Palestyne voorheen slagoffers van sulke aggressie was.

Met die verenigde steun van die wêreldgemeenskap, wat duidelik by die Kaïro-skenkerskonferensie Oktober sigbaar was, het die Palestyne sterker uit die konflik getree, het Zuma gesê.

Zuma het gesê Suid-Afrika is dit eens met die wêreldgemeenskap in sy eis vir ’n tweestaat-oplossing.

Palestina en Israel moet vreedsame naasbestaan binne internasionaal erkende grense van Junie 1967 met Jerusalem as die hoofstad, nastreef het hy bygevoeg.

“Ons is vol vertroue dat die mense van Palestina hul oogmerke sal verwesenlik en dat die droom van ons inspirerende held, pres. Arafat van ’n vrye en onafhanklike Palestina, ’n werklikheid sal word,” het Zuma aan Abbas gesê.

Zuma het sy toespraak afgesluit deur Abbas te verwelkom in ‘n “bevryde sone”.

Steve Hofmeyr-teisteringsaak môre in Randburgse Landdroshof

Die teisteringsaak wat dr. Dan Roodt as belanghebbende namens Steve Hofmeyr behartig, begin môre (Donderdag 27 November) om 9:00 in hof 21 by die Randburgse Landdroshof.

Teenoor hom is die buikspreker Conrad Koch wat op Twitter as die pop Chester Missing allerlei beledigings teenoor Hofmeyr kwytgeraak het en ook ‘n veldtog teen die borge van die Afrikaans is Groot-konsertreeks gevoer het. Na raming het Hofmeyr en Afrikaans is Groot reeds R10m se skade gely. Onder andere het twee groot borge, Pick n Pay en Land Rover hulle aan die konsertreeks onttrek, wat ‘n finansiële verlies van R5 miljoen verteenwoordig. Daarbenewens beloop naamskending en die onttrekking van ander borge, asook kansellasies van Steve Hofmeyr se vertonings ‘n verdere R5 miljoen.

Conrad Koch voer aan dat dit sy “grondwetlike plig is om Steve Hofmeyr se rassisme en apartheidskontkenning aan die kaak te stel”. In die hofstukke beweer Koch verder dat Hofmeyr en Roodt ‘n “marginale groepie van 1% Afrikaners verteenwoordig” en dat ‘n hoofstroomorganisasie soos Afriforum hom van sowel Hofmeyr as Roodt se uitsprake gedistansieer het.

Steve Hofmeyr het vanmiddag na Kaapstad vertrek vir drie vertonings van Afrikaans is Groot en sal dus nie self die verrigtinge kan bywoon nie. Nietemin word ‘n groot aantal joernaliste by die hof verwag en sal deur die dag op Twitter daaroor verslag doen.

Koch word verteenwoordig deur een van Suid-Afrika se grootste regsfirmas, Webber Wentzel. Ook Ferial Haffajee, die redaktrise van die koerant City Press, wat aan die Naspers/Media24-groep behoort, het ‘n verklaring by die hof ingedien waarin sy Koch se reg op spraakvryheid en om Hofmeyr te beledig, onderskraag.

Merkel woedend oor NAVO-referendum

Duitse kanselier Angela Merkel se regering is woedend oor President Petro Poroshenko se plan om ‘n referendum te hou oor die Oekraïne se aansluiting by NAVO.

Duitsland beskou dit as ‘n doodloopstraat wat onnodige spanning aanblaas met Rusland.

Volgens Duitse amptenare is só ‘n plan om die Noord-Atlantiese Verdragsorganisasie oos uit te brei eenvoudig nie op die tafel vir Merkel nie.

Volgens een Duitse amptenaar is dit suiwer onnoselheid aangesien ‘n referendum nie die Oekraïne nader aan NAVO sal dwing nie, want besluite oor lidmaatskap word gemaak deur die Verdragslande en nie kiesers nie.

Enige poging om aan te sluit by NAVO kan net baie sleg eindig, het ‘n tweede amptenaar gesê. Beide het gevra om nie genoem te word nie, aangesien hulle nie gemagtig is om die Duitse regering se strategie te bespreek nie.

Die VSA kan nie langer beskostig om NAVO te befonds nie, en soek naarstiglik redes om die organisasie aan die EU se hart- en longmasjien te koppel.

Frau Merkel en Vladimir Poetin is dit roerend eens dat dit nie ‘n opsie is nie. Frustrasie oor haar onvermoë om sanksies teen Rusland opgehef te kry, gaan binnekort tot ‘n krisis in Duitsland lei, sê ontleders.

Duitsland kan nie bekostig om die miljarde wat die Oekraïne skuld aan onbetaalde gasrekeninge, te verlos nie en Rusland gaan waarskynlik nie altyd bly wag vir betaling nie.

“NAVO-lidmaatskap vir die Oekraïne is nie op die agenda op hierdie punt nie,” het Michael Grosse-Broemer, die parlementêre sweep vir Merkel se Christen-Demokratiese blok, gesê in ‘n onderhoud gister in Berlyn.

Duitse weerstand teen die Oekraïne se lidmaatskap in die 28 lande se militêre alliansie, word gedeel deur Frankryk, wat ‘n waarskuwing aan Poroshenko is om nie die konflik met pro-Kremlin onafhanklikheidsondersteuners verder te stook nie. Meer as 4300 lewens in byna agt maande is reeds verloor en dié stap sal die konflik verder vererger.

Oekraïense lidmaatskap in NAVO is absoluut onaanvaarbaar, het ‘n Russiese regeringsamptenaar gister aan Bloomberg gesê. Hy wou anoniem bly omdat hy nie gemagtig is om diplomatieke beleid te bespreek nie.

Enige referendum wat NAVO-lidmaatskap in die Oekraïne rugsteun sal lei tot verdere eskalasie wat Rusland nie sal duld nie, het die amptenaar gesê.

Duitsland is ook bekommerd dat die nuwe regering nie ver genoeg gaan in die aanpak van korrupsie nie, het die tweede amptenaar gesê.

NAVO-inmenging sal lei tot verdere agteruitgang van Russiese-Oekraïense verhoudings, het Rainer Lindner, die hoof van Duitsland se Ost-Ausschuss wat sakegeleenthede met Rusland bevorder, gesê in Hamburg. Dit is “iets wat ons nie wil sien nie”.

Merkel het gister erken dat sanksies ‘n impak op die Duitse en die Europese ekonomieë het en dat sy haarself toenemend in ‘n hoek verf daarmee.

Rasse-oorlog oorspoel Ferguson

‘n Rasse-oorlog wat dreig om oor te spoel na die res van die land, het in die Amerikaanse dorp Ferguson in die deelstaat Missouri uitgebreek.

Betogings is ook in stede regoor die land gehou en verkeer in Oakland, Chicago en New York is ontwrig.

Lede van die veiligheidsmagte is in Ferguson ontplooi en moes reeds van traangas gebruikmaak om oproeriges te verwilder.

‘n Uitgebreide jurie het beslis dat ‘n wit polisieman nie vervolg sal word nadat hy ‘n ongewapende swart tienermisdadiger, Michael Brown, doodgeskiet het nie.

Ná nog ‘n nag van oproer en plundery is daar geen teken daarvan dat gemoedere wil bedaar nie.

Verskeie winkels is reeds geplunder en motors aan die brand gesteek.

Direkte TV-uitsendings toon hoe die polisie met allerlei voorwerpe bestook word in voortslepende straatgevegte.

Gesiene swart gemeenskapsleiers waaronder Al Sharpton, het die geleentheid benut om rasse-onmin ook verder aan te blaas.

President Barack Obama het gepleit om kalmte en sê die dorp is deel van ‘n groter uitdaging waar wetstoepassers en swart gemeenskappe bots.

Merkbare toename in kredietkaartbedrog

Die Suid-Afrikaanse Bankrisiko-Inligtingssentrum, of SABRIC, is onthuts oor die onlangse merkbare toename in kredietkaartbedrog.

SABRIC sê die bankbedryf se verliese weens kredietkaartbedrog het van 366 miljoen rand in 2013 tot 455 miljoen rand vanjaar toegeneem.

Volgens die maatskappy moet die misbruik van aanlyn-toepassings deur misdadigers wat uiteindelik ‘n bankkaart bekom, die grootste skuld kry vir die toename.

Die meeste draagbare skandeerders word glo in Gauteng en KwaZulu-Natal opgespoor.

Die hoof van die kommersiële misdaadeenheid by SABRIC, Susan Potgieter, sê sulke toestelle kan maklik deur boosdoeners aangekoop word.

Die banke het in samewerking met die Valke reeds op 74 sulke handskandeerders beslag gelê.

Geen name by matriekuitslae 2014

Matriekuitslae wat in koerante gepubliseer word, gaan slegs die identiteitsnommer en eksamennommer van leerlinge bevat, het die departement van basiese onderwys Dinsdag gesê.

Dié stap sal groepe waartoe uitblinkers en mislukkings behoort verdoesel.

Die besluit is geneem na taakspan se aanbeveling dat die huidige konvensie om individuele leerlinge se name te publiseer, hersien moet word, het Elijah Mhlanga, woordvoerder van die departement, in ‘n verklaring gesê.

Die besluit is Maandag tydens die Raad van Onderwysministers se vergadering geneem dat die uitslae sonder name gepubliseer sal word.

Angie Motshekga, minister van basiese onderwys, het die vergadering in Pretoria gelei.

Ordelys vir Nasionale Vergadering bespreek

Die Nasionale Vergadering se Programkomitee vergader vandag om die program vir môre se sitting te finaliseer wat deur die Speaker, Baleka Mbete, byeengeroep is om onopgeloste kwessies af te handel.

Die komitee is die Parlementêre struktuur wat die finale besluit neem oor wat tydens ‘n sitting op die ordelys behoort te wees, het RSG berig.

Die bykomende sitting volg nadat verrigtinge verlede Donderdag sewe ure lank vertraag is.

Die partye is baie verdeeld oor of President Jacob Zuma na die sitting behoort te kom of nie.

Volgens die hoofswepevergadering dring die DA, die EFF en die VF Plus daarop aan dat hy wel vrae moet kom beantwoord.

Die ANC sê egter dat die opposisie bloot die verrigtinge weer wil ontwrig.

Volgens die ANC weet die opposisie dat die President nooit genooi word om vrae te beantwoord wanneer ander sake bespreek word nie.

Een van die sake wat na verwagting bespreek sal word, is die verslag van die Komitee oor Bevoegdhede en Voorregte wat tugmaatreëls teen 20 LP’s van die EFF aanbeveel het, nadat hulle skuldig bevind is op verskeie aanklagte van minagting van die Parlement.

Le Pen rig ope brief aan Franse bankgoewerneur oor goud

Die leier van Frankryk se Front Nasionaal het ‘n ope brief aan die goewerneur van die Franse Reserwebank, Banque de France gestuur waarin sy eis dat ‘n oudit gedoen word om vas te stel wat die stand van die land se goudreserwes is.

Marine Le Pen het aangedui dat die kwessie van nasionale belang is en so gou moontlik onderneem behoort te word.

Dié eis kom te midde van Amerikaanse kommer oor die uitslag van die Switserse goudreferendum wat eersdaag plaasvind om die edelmetaal aan 20% van die onderliggende waarde van die Switserse Frank te verbind.

Nederland het pas hul eie goudreserwes gerepatrieer.

Intussen het die uiters ongewilde Franse president gesê hy sal die aflewering van twee oorlogskepe aan Rusland opskort tot verdere kennisgewing.

President Francois Hollande het in sy reaksie gesê daar moet eers ‘n “politieke oplossing” vir die krisis in die Oekraïne gevind word. Die VSA probeer om die land by NAVO in te lyf nadat hulle ‘n burgeroorlog ontketen het om Rusland te destabiliseer.

Die Franse skeepsbouers het egter aangedui dat hulle sal voortgaan met die bou van die omstrede skepe ten spyte van die jongste uitlatings.

Die Vladivostok is die afgelope paar dae besig met seetoetse met ‘n Russiese bemanning wat opgelei word om die vaartuig te beheer.

Dit sou later vandeesmaand aan Rusland oorhandig word.

Daar is ook druk van Europese vassalstate onder Amerikaanse beheer, veral Pole en die Balkanlande, om nie die skepe aan Rusland te lewer nie.

Die VSA poog om dmv NAVO verder oos uit te brei en dreig kleiner en swakker state op die vasteland af om nie bande met Rusland te onderhou nie.

Waarnemende SAL-hoof sê grade-fout is reggestel

Die Suid-Afrikaanse Lugdiens se waarnemende uitvoerende hoof, Nico Bezuidenhout, het sy stilswye verbreek ná bewerings dat hy soos sekere swart aanstellings oor sy akademiese kwalifikasies gelieg het.

Die SAL het vroeër die week toegegee dat sy jaarverslae vir 2011 en 2012 nie korrek was om aan te dui dat Bezuidenhout ‘n B Comm-graad in Vervoerekonomie en Bedryfsielkunde het en ook oor ‘n MBA beskik nie.

Dit is in 2013 reggestel. Bezuidenhout het nie sy tersiêre studies voltooi nie.

Bezuidenhout het gesê ook Mango-personeel en Mango se direksie waar hy in 2006 aangestel is, het nog altyd geweet dat hy het nie ‘n graad nie. Hy het niemand daaroor om die bos gelei nie.

Vroeër op Dinsdag, het die SAL se direksie in ‘n verklaring gesê dat hulle by hulle waarnemende hoof uitvoerende beampte (HUB) staan.

Bezuidenhout het aan die media gesê sy huidige personeel sowel as kollegas het nog altyd geweet dat hy nie ‘n graad het nie.

Bezuidenhout het op sy beurt gesê sy ervaring en bewese diensrekord is goeie plaasvervangers vir akademiese kwalifikasies.