Palestina – praag.co.za

Sydney Gregan: Gaan die Internasionale Strafhof die knie buig voor Amerika?

Die Internasionale Strafhof (ICC) in Den Haag het op 1 Julie 2002 begin funksioneer kragtens die Statuut van Rome, ‘n multilaterale verdrag. 123 state het hulle tot dusver aan die gesag van die hof onderwerp waarvan Suid-Afrika een is. Die VSA en Israel is nie partye by die Statuut nie. Daar is 42 state wat nie die verdrag onderteken het nie.

Die hof het jurisdiksie om internasionale misdwye soos volksmoord, misdrywe teen die mensdom, oorlogsmisdrywe en misdade van aggressie te ondersoek. Sou ‘n staat nie self sodanige ondersoek in sy eie land onderneem nie, het die hof die bevoegdheid om dit op eie houtjie te doen. Die hof het egter nie universele jurisdiksie nie en kan slegs misdrywe ondersoek in lidstate, of indien die Verenigde Nasies ‘n saak na die hof verwys.

Tot dusver is 45 individue deur die hof veroordeel waaronder die voormalige Soedanese president, Omar al-Basjir, die Keniaanse president Uhuru Kenyatta en die voormalige Libiese president Muammar Gaddafi.

Onlangs, op 30 Junie 2020, is ‘n klagte ingedien deur ‘n regsprofessor van Middlesex-universiteit, professor William Scabas, teen president Donald Trump, die Israelse eerste minister Benjamin Netanyahu en Trump se adviseur Jared Kushner, namens vier Palestyne wat in die Wesoewer (Palestina) woon en wat behels dat Trump en kie:

“are complicit in acts that may amount to war crimes relating to the transfer of populations into occupied territory and the annexation of the sovereign territory of the State of Palestine.”

Die hof moet nou besluit of die klagte ondersoek behoort te word. ‘n Voorlopige ondersoek sal eers gedoen word waarna ‘n besluit geneem sal word. Trump se antwoord op die stappe wat die ICC teen die VSA wil neem was om ‘n nasionale noodtoestand (“National Emergency”) af te kondig ten einde Amerikaanse (en Israelse) burgers te beskerm en te vrywaar van aanspreeklikheid voor die hof. Sy rede is dat:

“… any ICC attempt to investigate, arrest, detain or prosecute any personnel of the United States or its allies (Israel) without consent to the court’s jurisdiction ‘constitutes an unusual and extraordinary threat to the national security and foreign policy of the United States.’”

Trump se deklarasie magtig die bevriesing van bates van die hof se amptenare, reisverbiedinge en strek dus wyd. Reeds is kennis geneem van Israel se voorneme om die Wesoewer te annekseer ten spyte van die feit dat dit op ‘n duidelike oortreding van die internasionale reg sou neerkom.

Schabas se aanklag voer aan dat Trump se ondersteuning vir Israel se voorgenome annekasasie ‘n oorlogsmisdaad daarstel as sou dit tot gevolg hê om die bevolkingsamestelling van die Wesoewer te verander teen die wil van die Palestyne wat boonop nie eers in die saak geken word nie. Israel het intussen sy voorgenome anneksasie onbepaald uitgestel.

Artikel 49 van die 4e Geneefse Konvensie stel dat ‘n

“occupying power shall not deport or transfer parts of its own population into the territories it occupies.”

Die Statuut van Rome verklaar dat indien ‘n besettingsmag op direkte of indirekte wyse van sy bevolking na die besette gebied verplaas, dit op ‘n oorlogsmisdaad neerkom.

Sewe-en-sestig onafhanklike spesialiste wat deur die Verenigde Nasies se Menseregtekommissie aangestel is, het in ‘n verklaring gesê dat Israel se anneksering van die besette gebiede ‘n ernstige oortreding van die Handves van die VN en die Geneefse Konvensie daarstel en ook van die beginsel dat geen gebied deur middel van mag of oorlog verkry mag word nie.

Trump het op 11 Junie 2020 verklaar dat die hof geen jurisdiksie oor enige Amerikaanse burger beskik nie en dat hulle voorgenome optrede die soewereiniteit van die VSA aantas. Hy het ook daarop gewys dat die VSA nie ‘n party by die Statuut van Rome is nie en nog nooit tot die jurisdiksie van die hof toegestem het nie. Alhoewel Bill Clinton die Statuut onderteken het, het George W Bush in ‘n ongewone stap die VSA se handtekening “onttrek” in 2002. Wat wel so is, is dat burgers van die VSA aanspreeklik gehou kan word vir misdrywe in state wat wel ‘n party by die Statuut van Rome is. So kan die VSA byvoorbeeld vir dade in Afghanistan aanspreeklik gehou word, wat dan ook tans deur die hof ondersoek word.

Op 20 Desember 2019 het die hof se aanklaer Bensouda bevind dat daar redelike gronde is dat Israelse magte oorlogsmisdade in die besette gebiede (Palestina) gepleeg het. Die vraag is egter of die hof jurisdiksie het om oor misdade in Gasa en die Wesoewer te bereg. Regslui is van mening dat Palestina minstens beperkte internasionale status (“limited international personality”) het. Israel self het al erkenning aan die Palestynse Bevrydingsorganisasie gegee deur ooreenkomste met hulle te sluit waaronder die Oslo-verdrag, wat hulle status bevestig. Palestina word deur 138 van die 193 VN-lidstate erken.

Mike Pompeo, die VSA se staatsekretaris, het intussen die “renegade-court”, soos hy die hof noem, begin dreig. Die VSA het ook ‘n American Service-Members Protection Act, wat hulle magtig om enigeen wat deur die hof aangehou word eenvoudig te gaan haal (“extradite”), ‘n nogeens verbasende ontkenning van die internasionale reg, waaronder die soewereiniteit van state.

Israel, wat ook nie ‘n party by die Statuut van Rome is nie, voer aan dat Palestina nie ‘n staat is nie en dat die hof dus nie jurisdiksie het nie. In 2012 het die VN aan Palestina nie-lidwaarnemerstatus gegee en Palestina het die Statuut van Rome onderteken. Die Internasionale Assosiasie van Demokratiese Regslui (IADL) het ‘n amicus-brief aan die ICC gerig en hulle versoek om hulle jurisdiksie oor Palestina te bevestig:

“The ICC’s normative power and legal authority will be strengthened by confirming its jurisdiction over the State of Palestine, including the West Bank, East Jerusalem and Gaza, and opening an investigation into the Palestinian situation. Thereby the equal rights of all peoples to justice for international crimes will receive much-needed affirmation.”

Sewe-en-sestig lidstate van die ICC het in ‘n gesamentlike verklaring hulle steun aangedui vir die hof as ‘n onafhanklike en onpartydige instelling en dat die hof hom nie deur dreigemente van stryk moet laat bring nie. Tien van die 15 lede van die VN se Veiligheidsraad het eweneens in ‘n verklaring hulle:

“unwavering support for the Court as an independent and impartial judicial institution”

aangedui en dat die hof:

“preserve its integrity undeterred by any threats against the Court, its officials and those cooperating with it.”

Twee van hierdie vyf state is Frankryk en Brittanje.

Tyd sal leer hoe ver die hof sal kom met state soos Israel en die VSA wat, wanneer dit by die vervolging van Afrika-diktators kom, nie ‘n steen onaangeroer laat om daardie diktators voor die hof te laat bring nie, maar indien hulle self in die beskuldigdebank staan, die hof as ‘n boendoehof beskou wat nie die reg het om hulle te vervolg nie.

Ook hier by ons vind ons die bykans komiese situasie dat die ANC eintlik graag wil onttrek van die Statuut van Rome (waarskynlik omdat hulle besef dat hulle optrede teenoor die bevolking en veral teenoor Blankes op ‘n vorm van volksmoord neerkom), en inderdaad sulke pogings aangewend het, maar terselfdertyd alles in hulle vermoë doen om die hof sover te kry om op te tree teen “apartheidsmisdadigers”!

Die internasionale reg word deur magte soos die VSA as ‘n speelbal gebruik om hulle eie agenda te bevorder en sou die ICC se voorgenome stappe teen die VSA misluk, sal dit bevestiging wees van hierdie feit. Die vraag is dus of die internasionale gemeenskap die vermoë het om die VSA tot orde te bring, of nie.

ANC Water-minister staan by Palestina

Die Minister van Water en Sanitasie, Nomvula Mokonyane, het as lid van die ANC se uitvoerende komitee ‘n beroep op Suid-Afrikaners gedoen om hulle te skaar agter, wat sy noem, “die totale bevryding van Palestina”.

Mokonyane het tydens ‘n lesing ter herdenking van Israelse Apartheidsweek in Stellenbosch gepraat.

Sy sê Suid-Afrikaners het eens ook Apartheid ervaar, maar het die stelsel deur eenheid, solidariteit en met die steun van organisasies soos die Parlestynse Bevrydingsorganisasie verslaan.

Sy sê dit is onaanvaarbaar dat mense se water afgesny word, nie omdat daar nie water is nie, maar slegs om hulle leed aan te doen, en daarom moet Suid-Afrikaners sulke optrede verwerp.

Ramallah onthul Mandela-beeld

Dit was ‘n geskiedkundige dag vir die stad van Ramallah in Palestina nádat ‘n ses-meter standbeeld van die voormalige president, Nelson Mandela, onthul is.

Die onthulling kom nadat Ramallah se burgemeester, Mousa Hadid, by ‘n gesamentlike nuuskonferensie Johannesburg se burgemeester, Parks Tau, ontmoet het.

Tau het gesê die Madibastandbeeld is ‘n “simbool van hoop en inspirasie vir die mense van Palestina om hul vryheid te verwesenlik”.

“Suid-Afrika het met die ondersteuning van die internasionale gemeenskap apartheid verslaan, en is dit natuurlik dat ons ons ubuntubeginsels as Afrikane uitbrei en in solidariteit met daardie volke verkeer wat tans verskeie vorme van politieke en humanitêre oproer ervaar.” het Tau.

Die standbeeld, ‘n skenking van Johannesburg aan Ramallah, verteenwoordig ‘n simbool van solidariteit met die mense van Palestina.

Die ses-meter hoë brons standbeeld op die Nelson Mandela-plein in die omgewing van Al-Tireh, is die werk van Suid-Afrikaanse kunstenaars Tania Lee, Christina Salvoldi en Lungisa Kala.

Dit is ‘n maand gelede na Palestina gestuur.

Hadid het gesê die onthulling sal gevier word as ‘n nasionale dag, want die standbeeld van Nelson Mandela “verenig die mense van Palestina en Suid-Afrika”.

“Ons wil nie dat verhoudings hier eindig nie. Ramallah en die mense van Palestina het baie om te leer van Johannesburg en die hele Suid-Afrika.”

Die onthulling kom nadat ‘n sending onder leiding van die Suid-Afrikaanse Vereniging vir Plaaslike Regering (Savpr) Ramallah in November 2014 besoek het.

Die besoek het uitgeloop op die ondertekening van ‘n Memorandum van Verstandhouding (MOU) tussen Johannesburg en Ramallah omdat Savpr graag internasionale stad-tot-stad verhoudings en samewerking wil bevorder.

VF+, IVP, ACDP kla oor SA Palestyne ontvang

Die Vryheidsfront Plus, die IVP en die ACDP het die ANC gekritiseer omdat hy die Palestynse Hamas-leierskap verlede week in Suid-Afrika ontvang het.

Die partye sê dit is strydig met die regering se amptelike posisie oor die voortslepende konflik tussen Israel en die Palestyne.

Die partye het aan die media in die Parlement gesê dat die regering nie kant moet kies nie omdat dit ‘n vreedsame oplossing kan ontspoor.

Die partye was in September deel van ‘n feitesending aan Israel en die Palestyne.

Die Vryheidsfront Plus het vroeër in ‘n verklaring gesê Hamas is ‘n “internasionale terreurorganisasie”, alhoewel dit nie as sodanig gelys is nie.

Slegs die gewapende vleuel van die beweging word as ‘n terreurorganisasie deur sommige lande beskou, maar in die geheel word Hamas as meer gematig as byvoorbeeld Fata gesien.

Die VSA het Hamas as ‘n terreurorganisasie gelys, terwyl die EU en onverbonde lande sowel as Rusland en China die politieke vleuel van Hamas aanvaar as ‘n regmatige verteenwoordiger van die Palestyne.

Die ANC se woordvoerder, Zizi Kodwa, het in reaksie gesê die vergadering met Hamas is deel van die ANC se pogings om verskeie Palestynse faksies te verenig.

Kodwa sê klagtes oor die uitnodiging aan Hamas toon dat die betrokke politieke partye nie internasionale eensgesindheid begryp nie.

Khaled Masjaal, die leier van Hamas, het tydens sy besoek aan Suid-Afrika gesê die Palestyne worstel met Israel se “rassisme en apartheid”.

Hy het Israel as ‘n “apartheidregime” beskryf, ‘n frase wat ook gebruik word deur die Amerikaanse minister van buitelandse sake John Kerry.

Intussen het Israel die aanbring van kameras in Jerusalem se ou stad en die Al-Aqsa moskee-kompleks, een van Islam se heiligste plekke, verwelkom.

Israel se eerste minister, Benjamin Netanyahu, sê ’n ooreenkoms om 24-uur veiligheidskameras rondom die kompleks te installeer, is in Israel se belang.

Dié besluit kom nadat die Israelse weermag ‘n Palestynse meisie doodgeskiet het na ‘n beweerde mesaanval.

Spanning laai steeds op met botsings by die moskee-kompleks, bekend as Tempelberg, na ’n vlaag mesaanvalle en dodelike protesbyeenkomste.

Israelse premier skok met uitlatings oor Holocaust

Israel se eerste minister, Benjamin Netanyahu, het Dinsdagaand in ’n toespraak voor die Sioniste se kongres verwys na ’n reeks Moslem-aanvalle in die 1920’s teen Jode in Palestina, wat hy sê deur die destydse moefti van Jerusalem, Haj Amin al-Husseini, aangestig is.

Husseini het in 1941 na Berlyn gevlieg om die Nazi-diktator, Adolf Hitler, te besoek. Volgens Netanyahu was hierdie ontmoeting instrumenteel in Hitler se besluit om ’n uitwissingsveldtog teen die Jode van stapel te stuur.

“Hitler wou nie die Jode uitwis nie, maar hulle bloot uit die land verban,” het Netanyahu gesê. “Haj Amin al-Husseini het na Hitler gegaan en vir hom gesê: ‘As jy hulle verban, sal hulle almal hierheen kom’.”

“’So wat moet ek met hulle doen?’” het Hitler gevra, sê Netanyahu, waarop die moefti geantwoord het: “Verbrand hulle.”

Netanyahu, wie se pa ’n vooraanstaande geskiedkundige was, is vinnig deur opposisie-politici en deskundiges gehekel wat sê hy verdraai die geskiedkundige rekord.

Palestynse beamptes sê Netanyahu skeld oënskynlik vir Hitler kwyt van die moord van ses miljoen Jode, ten einde die Moslems die skuld te gee.

Twitter was oorlaai met kritiek.

“Dit is ’n hartseer dag in die geskiedenis wanneer ’n leier van die Israelse regering sy bure só haat dat hy bereid is om die mees berugte oorlogsmisdadiger in die geskiedenis, Adolf Hitler, kwyt te skeld van die moord van ses miljoen Jode,” het Saeb Erekat, die sekretaris-generaal van die Palestynse Bevrydingsorganisasie, gesê.

“Mnr. Netanyahu moet ophou om hierdie menslike tragedie te gebruik om politieke punte aan te teken,” het hy bygevoeg.

Netanyahu se minister van verdediging en getroue bondgenoot, Moshe Yaalon, asook die Duitse kanselier Angela Merkel het by monde van haar woordvoerder gesê die eerste minister is verkeerd.

“Dit was beslis nie Husseini wat die ‘finale oplossing’ uitgedink het nie, maar Hitler self wat die bose plan bedink het,” het hy aan die radiodiens van Israel se weermag gesê.

Steffen Seibert het namens die kanselier gesê die Duitsers is geheel en al verantwoordelik vir die brandoffer.

Dit is nie duidelik op watter bronne Netanyahu staatgemaak het vir sy opmerkings nie. ’n Boek wat in 1947 gepubliseer is, “Die Mufti van Jerusalem”, en ’n koerantberig uit die tyd sê ’n voormalige adjunk van Hitler het by die Nuremberg-verhoor vir oorlogsmisdadigers getuig dat Husseini en die Nazi-leier saamgesweer het om van Jode in Europa ontslae te raak.

Husseini is vir oorlogsmisdade gesoek, maar het nooit tydens die Nuremberg-verhore verskyn nie en is later in Kaïro dood.

Verskeie geskiedkundiges sê Netanyahu verwring die tyd en het tot ’n valse slotsom gekom.

Die ontmoeting tussen Husseini en Hitler het op 28 November 1941 in Berlyn plaasgevind. Meer as twee jaar vroeër, in Januarie 1939, het Hitler die Reichstag toegespreek.

In 1845, het die Britse lt.kol George Gawler ‘n verslag opgestel waarin die potensiaal vir Joodse kolonisasie van Palestina uitgestippel word.

Die struikelblokke wat hy voorsien het, het ‘n gebrek aan hulpbronne en die haalbaarheid daarvan om Jode te oortuig om te immigreer na Palestina, ingesluit.

Duitse oorlogskuld het Israel van die nodige hulpbronne voorsien.

Indiese president besoek Palestina te midde van geweld

‘n Palestynse moeder en haar driejarige dogter is Sondag dood in ’n Israelse lugaanval in Gasa. Dié Israelse lugaanval kom na ‘n reeks beweerde mesaanvalle deur Palestyne.

Volgens die Israelse polisie het hulle gekeer dat ’n motorbom Jerusalem bereik deur ’n lugaanval in Gasa uit te voer.

Palestyne betwis dit egter en meen ’n brand wat weens ’n elektriese fout in die motor ontstaan het, is verkeerdelik vir ’n ontploffing aangesien.

Talle Israeli’s en Palestyne is die afgelope tyd in die bloedvergieting dood. Moslemwoede kook oor weens toegang vir Jode tot die Al-Aqsa-moskeekompleks in Jerusalem.

Geweld het versprei van die Heilige Stad en die Israeli-besette Wesoewer na die binneland en die Hamas-beheerde Gasa.

Die Israelse premier, Benjamin Netanyahu, se vermaning aan Israeli’s dat daar geen kitsoplossing vir die situasie is nie, het die vermoede versterk dat Israel nie gou oplossings vir die konflik sal vind nie.

Dit het vrese oor ’n derde Palestynse opstand, ‘n Intifada, laat opvlam.

Volgens Palestynse mediese beamptes is 37 Palestynse betogers Sondag gewond deur Israelse troepe in die Wesoewer.

In reaksie op die vuurpylaanvalle oor die grens het ’n Israelse vegvliegtuig ’n Hamas-fasiliteit in Gasa geteiken.

Volgens Palestynse mediese beamptes is ’n swanger ma en haar driejarige dogter wat naby gewoon het in dié aanval dood.

Moslems is gekant teen die Joodse teenwoordigheid by die Aqsa-moskeeplein, Islam se derde heiligste terrein.

President Pranab Mukherjee het intussen die eerste Indiese staatshoof geword wat Palestina Maandag amptelik besoek het.

Indië het sy steun vir ‘n Palestynse staat bevestig tydens ‘n ontmoeting met die president van die Palestynse Nasionale Owerheid, Mahmoed Abbas.

Abbas het gesê Palestina se volle aandag is gerig op die beheer van die spanning. Die Palestyne eis ’n staat in die Wesoewer en Gasa saam met Oos-Jerusalem.

Israel het ál drie die dele in 1967 in die Midde-Oosterse oorlog verower. Volgens Jode is dit ook die ligging van Bybelse tempels.

Abbas blameer Joodse fundementaliste se optrede by Al-Aqsa moskee in Jerusalem vir die huidige krisis.

Die Tempelberg, waarbinne die moskee geleë is, word bedreig deur die Islamitiese staat, sowel as ander militantegroepe soos Al-Qaeda en die al-Nusra Front het die Palestynse Owerheid gesê.

“Palestina glo nie in hierdie organisasies nie, en wil hulle nie op sy grondgebied hê nie.”

Mukherjee het gesê Indië glo in “‘n onafhanklike staat van Palestina met Israel as sy buurman en Oos-Jerusalem as hoofstad”.

Indië ondersteun die Palestynse standpunt dat ‘n oplossing gevind moet word op die basis van die grense voor 1967, en dat die huidige situasie nie volhoubaar is nie.

Israel lê Palestynese huise in puin

Israel het Dinsdag die huise van twee Palestyne wat na bewering agter verlede jaar se aanvalle was, in puin gelê.

Dit volg nadat eerste minister Benjamin Netanyahu beloof het om ’n ystervuis teen toenemende onrus in te span.

Die verwoesting van die huise kom terwyl Netanyahu onder druk van regse faksies in sy koalisie is, met skermutselinge wat ná die moord van vier Israeli’s voortduur.

Die toename in geweld het tot internasionale oproepe tot kalmte gelei, met kommer dat die onluste buite beheer kan raak.

Die huise wat vernietig is, het aan Ghassan Abu Jamal en Mohammed Jaabis behoort, het ’n militêre verklaring gelui.

Opdrag vir die vernietiging van die huise is gegee nadat die mans Israeli’s verlede jaar aangeval het.

Gewapen met vleismesse en ’n pistool, het Abu Jamal en sy neef Uday Abu Jamal vier rabbi’s en ’n polisieman vermoor voordat hulle in November 2014 doodgeskiet is.

Jaabis het in Augustus 2014 met ’n stootskraper teen ’n bus vasgery. Een Israeli is dood en etlike is beseer. Hy is op die toneel deur die polisie doodgeskiet. Die vernietiging van die wonings is in Israel se hoogste hof uitgedaag, maar het enkele maande gelede goedkeuring gekry.

Die strafmaatreëls volg nadat geweldpleging die afgelope dae na die ooste van Jerusalem en die Wesoewer versprei het ná die moord van vier Israeli’s, insluitende ’n egpaar wat hul kinders skool toe geneem het.

Israeliese veiligheidsmagte het Maandag aangekondig dat hulle vyf Palestynse mans in hegtenis geneem het wat lede is van die militante groep, Hamas, en erken het dat hulle die egpaar geskiet het.

Israeliese troepe het Maandag ’n Palestynse tiener doodgeskiet, die tweede sterfgeval van ’n Palestyn in 24 uur met dosyne mense wat in die jongste geweldpleging beseer en gewond is.

Palestyn geskiet na mesaanval

’n Palestynse man is Maandag deur die Israeliese polisie doodgeskiet nadat hy een van hul makkers by ’n militêre deursoekingspunt in die besette Wes-Oewergebied met ’n mes aangeval het, het Reuters berig.

Die voorval volg twee dae nadat nóg ’n Palestynse man doodgeskiet en ’n ander gewond is nadat hulle volgens Israeliese owerhede mesaanvalle op troepe in die Wes-Oewer uitgevoer het. In albei gevalle is die Israeliese personeel net lig beseer.

Sedert Amerikaans-geleide vredesamesprekings in April 2014 ’n dooie punt bereik het, is die situasie in Wes-Oewergebied en die oostelike deel van Jerusalem gespanne, met onderstrominge van geweld wat telkens tot uitbarsting kom.

Teoloë byeen om Kairos-dokument te herdenk

Verskeie plaaslike teoloë en teoloë uit onder meer Noorweë, Zambië en Latyns-Amerika het in Soweto byeengekom om die verskyning van die Kairos-dokument dertig jaar gelede te herdenk.

Dié byeenkoms kom te midde van ‘n wêreldwye Christelike beweging teen Israel se hantering van die Palestynese kwessie en ‘n soortgelyke dokument ter ondersteuning van Palestina.

Verlede jaar, het die Presbyterian Church USA gevra dat Caterpillar en ander Amerikaanse maatskappye wat betrokke is in die Israeliese besetting, geboikot moet word.

Die Verenigde Metodiste Kerk en verskeie Quaker liggame het soortgelyke aksies geneem teen wat hulle grootskaalse menseregteskendings deur Israel noem.

Die Verenigde Kerk van Christus in die VSA, die UCC, ondersteun disinvestering, terwyl die Episkopale Kerk dit verwerp.

Sogenaamde progressiewe Amerikaanse Jode het tewens gevra of die UCC se jongste besluit ‘n “keerpunt” vir disinvestering teen Israel verteenwoordig.

Volgens die New York Times is dit nog net die “Mennoniete en Episkopaliërs wat sê nee”.

Die linkse Israeliese koerant Haaretz gesê beide kerke se besluit is ‘n belangrike deurbraak vir BDS teen Israel.

Die oorspronklike dokument is in 1985 deur ‘n groep hoofsaaklik swart teoloë vrygestel in reaksie op wat hulle bestempel het die kerk se louwarm houding teen apartheid nadat ‘n noodtoestand op 21 Julie 1985 afgekondig is.

Aktiviste wil nou hê kerke moet sterker optree teen die lot van armes.

Die voormalige direkteur-generaal in die kantoor van president Thabo Mbeki, eerwaarde Frank Chikane, was een van die opstellers van die Kairos-dokument.

Eerwaarde Allan Boesak is een van die onderstekenaars van die Kairos-dokument teen Israel wat in Desember 2009 onderteken is en wat ‘n oproep vir ‘n “Nuwe Jerusalem” verteenwoordig.

Mandela-groep toegang tot Gasa geweier

Die Russiese president Wladimir Poetin het Woensdag met lede van ‘n groep wat hulself die “Ouderlinge” noem, ontmoet nadat hulle toegang tot Gasa geweier is.

Voormalige staatshoofde en leiers van die belangrikste internasionale organisasies was in Moskou om die Oekraïne te bespreek asook wêreldvrede.

Die groep is deur Israel toegang tot Gasa geweier nadat hulle by die Palestyne wou gaan besoek aflê. Poetin het hulle op sy Nowo-Ogarjowo landgoed buite Moskou ontvang vir hul driedaagse besoek aan Rusland se hoofstad.

Die groep is gestig in 2007 deur die voormalige Suid-Afrikaanse president Nelson Mandela om hul invloed oral te laat geld.

Bestaande uit 12 lede, en tans onder leiding van die voormalige sekretaris-generaal van die VN, Kofi Annan, wil die oudstes help om die wêreld se ernstige en ingewikkelde probleme op te los.

Desmond Tutu is ook deel van die groep.

“Kollegas, vriende, Laat my u hartlik in Moskou verwelkom…Ongelukkig het die wêreld nie eenvoudiger geraak sedert julle aktief aan die politieke lewe deelgeneem het nie. Ek probeer nie sê dat dit julle nalatenskap is nie, maar bloot dat ons wêreld regtig kompleks en uiteenlopend is en met baie konfliksituasies worstel,” het die Russiese president gesê in sy verwelkomingsrede.

Afgesien van vergaderings met president Poetin, het die oudstes gesprekke met die minister van buitelandse sake Sergei Lawrof, voormalige Sowjetpresident Mikhail Gorbatsjof en die voormalige premier Jefgeni Primakof gevoer.

Die oudstes wat deel was van die besoek aan Moskou was: Martti Ahtisaari, voormalige Finse president; Kofi Annan, voormalige sekretaris-generaal van die VN; Lakhdar Brahimi, voormalige Algerynse minister van buitelandse sake, Gro Harlem Brundtland, voormalige premier van Noorweë; Jimmy Carter, voormalige Amerikaanse president, en Ernesto Zedillo, voormalige Mexikaanse president.

Annan, Ahtisaari, Brahimi en Zedillo is almal trustees wat op die raad van George Soros se Open Society Foundation dien.

Raaisel verdiep oor dood van Amerikaanse hulpwerker Mueller

Pres. Barack Obama van die VSA het Dinsdag die sterfte bevestig van Kayla Mueller, ’n Amerikaanse hulpwerker wat deur militante van die Islamitiese Staat (IS) as gyselaar aangehou is.

Obama het gesê Amerika sal die “terroriste opspoor en geregtigheid laat geskied”.

Mueller se familie het in ’n verklaring gesê hul “harte is gebreek”. Hulle het ’n afskrif van ’n brief uitgereik wat sy in 2014 geskryf het toe sy in aanhouding was.

Obama en die familie se kommentaar kom vier dae nadat die IS gesê het Mueller (26) van Arizona het omgekom toe vegvliegtuie van Jordanië ’n gebou gebombardeer het waarin sy gevange gehou is.

Jordanië én die Pentagon het egter die ISIS se weergawe van Mueller se dood bevraagteken. ’n Woordvoerder van die Pentagon het gesê daar bestaan geen twyfel nie dat IS daarvoor verantwoordelik was.

’n Woordvoerder van die VSA se nasionale veiligheidsraad, me. Bernadette Meehan, het gesê Mueller se kapers het die familie die naweek gekontak met ’n boodskap waarin “meer inligting” vervat was. Meehan het gesê hulle kon met dié inligting tot die slotsom kom dat Mueller doodgemaak is.

Harde ondersteuners van Israel het hul tevredenheid uitgespreek oor die dood van humanitêre hulpwerker Mueller weens haar solidariteit met Palestina. Sy het Palestynse laerskoolkinders na die skool vergesel vir hul veiligheid as deel van haar taak.

Die Islamitiese staat sê dat Mueller in ‘n Jordaniese lugaanval dood is wat in Sirië gekoördineer is met die Verenigde State van Amerika.

Zuma verwelkom Palestynse leier in ‘bevryde sone’

Pres. Jacob Zuma het Woensdag pres. Mahmoed Abbas van Palestina op sy eerste staatsbesoek in Pretoria verwelkom.

Die president het Nelson Mandela aangehaal waar hy die Palestyne se vryheidstrewe met dié van Suid-Afrika verbind.

Zuma het Suid-Afrika se steun aan die Palestyne se onafhanklikheidstrewe toegesê: “Ons sal julle met elke tree bystaan, wat dit ookal verg.

“Julle het aangedui watter soort steun julle van ons vereis en ons sal ons belofte aan julle nakom.”

Zuma het na die verwoestende aanvalle deur Israel in Gasa verwys wat vyftig dae geduur het, meer as 2 000 Palestyne se dood veroorsaak het.

Talle burgerlikes en kinders was ook onder die slagoffers en noodsaaklike infrastruktuur en huisvesting is in die aanvalle vernietig.

Zuma het gesê dat die Palestyne voorheen slagoffers van sulke aggressie was.

Met die verenigde steun van die wêreldgemeenskap, wat duidelik by die Kaïro-skenkerskonferensie Oktober sigbaar was, het die Palestyne sterker uit die konflik getree, het Zuma gesê.

Zuma het gesê Suid-Afrika is dit eens met die wêreldgemeenskap in sy eis vir ’n tweestaat-oplossing.

Palestina en Israel moet vreedsame naasbestaan binne internasionaal erkende grense van Junie 1967 met Jerusalem as die hoofstad, nastreef het hy bygevoeg.

“Ons is vol vertroue dat die mense van Palestina hul oogmerke sal verwesenlik en dat die droom van ons inspirerende held, pres. Arafat van ’n vrye en onafhanklike Palestina, ’n werklikheid sal word,” het Zuma aan Abbas gesê.

Zuma het sy toespraak afgesluit deur Abbas te verwelkom in ‘n “bevryde sone”.

Zuma en SA Jode stem saam oor ‘twee-staatoplossing’ vir Israel

President Jacob Zuma en die SA Joodse raad van afgevaardigdes het ooreengekom om ‘sonder ophou’ te werk om die twee-staatoplossing vir die konflik tussen Israel en die Palestyne te ondersteun.

Die raad se voorsitster, Mary Kluk, het gister gesê dat die raad met Zuma vergader het en hom ingelig het oor die vyandige omgewing en intimidasie waarmee die Joodse gemeenskap in Suid-Afrika te kampe het.

“Zuma het alle vorme van anti-Semitisme en onverdraagsaamheid verwerp… (hy) en die raad het hul steun vir die twee-staatoplossing uitgespreek waarmee Israel en Palestina naas mekaar in vrede kan bestaan en het Suid-Afrika se bereidwillligheid herhaal om alle kante te ondersteun om ‘n oplossing te vind,” sê sy.

Volgens Kluk het Zuma die Joodse raad verseker dat sy regering nie anti-Semitiese vooroordeel en intimidasie sal aanvaar nie.

Op haar beurt sê sy dat die raad die regering se nasionale ontwikkelingsplan ten volle goedkeur en dat die Joodse gemeenskap met die toepassing daarvan sal saamwerk.

Die vergadering is in Pretoria gehou. Zuma is vergesel van die minister van internasionale betrekkinge en samewerking, Maite Nkoana-Mashabane, die minister in die presidensie, Jeff Radebe, die minister van vroue in die presidensie, Susan Shabangu, asook die direkteur-generaal in die presidensie, dr Casius Lubisi.

Cosatu, die ANC se alliansievennoot, en ander drukgroepe het reeds hul onomwonde steun aan die Palestyne toegesê en betoog gereeld teen die Palestynse besetting.

Israel word ook ‘n “rassistiese apartheidsbewind” genoem wat duisende mense vermoor het wat teen sy “koloniale” besetting van Palestina gekant is.

Die Amerikaanse taalkundige en skrywer Noam Chomsky, het ook gesê dat die beleid van Israel teenoor die Palestyne “veel erger as Suid-Afrikaanse apartheid is”.

Skenkers dok op om Gasa te herbou

Internasionale skenkers van lande en organisasies het meer as $5 miljard beloof om die oorloggeteisterde Gasagebied te herbou, maar het Sondag gesê dit is die laaste keer dat hulle sal betaal en Israel en die Palestyne aangeraai om ‘n finale vredesooreenkoms te sluit wat tot twee aparte state sal lei.

Die Noorweegse minister van buitelandse sake Borge Brende het die aangekondiging laat Sondag gemaak.

Verteenwoordigers van meer as 54 lande woon ‘n internasionale konferensie in die Egiptiese hoofstad Kaïro by.

Die som oortref somber voorspellings dat skenkersmoegheid ingetree het.

Lugaanvalle en grondoperasies wat in Julie geloods is en tot die einde van Augustus geduur het, het grootskaalse skade aangerig.

Senator John Kerry het self miljoene Amerikaanse dollar beloof om die puinhope te herstel. Die VSA het. soos voorheen, wapens aan Israel geskenk gedurende die mees onlangse veldtog teen die Palestyne in Gasa.

Planne is bespreek by die konferensie om die geweld tussen Israel en die Palestyne stop te sit.

Die Suid-Afrikaanse minister van Internasionale Betrekkinge, Maite Nkoana Mashabane woon dit ook by. Sy het gesê Gasa moet onder die toesig van die Palestynse owerheid, met hulp van buite, herbou word.