Ek is ʼn groot ondersteuner van Willem Petzer, maar ek dink hy toon ʼn paar blindekolle hier wat ons duur te staan kan kom. Ek dink eerstens nie hy verstaan die mediaoorlog nie. Ons gaan nooit, nooit, ooit aangeprys word deur die hoofstroommedia nie. Hulle gaan ons óf ignoreer, óf uitkryt as die belhamels. Vergeet nou maar daarvan om die media se guns te wen.
Kyk maar na die mediareaksie op Bronkhorstspruit: ʼn Temerige paar ou storietjies oor die protes en toe ʼn gloeiende propagandastuk oor Cosatu wat “standpunt inneem teen Plaasmoorde.”
Dan wat skaregedrag betref: Willem het die kundigheid van veterane tot sy beskikking en die eerste reël is: Bly kalm. En die tweede reël wat hiermee gelykstaan, is: Moenie ʼn duim terugdeins nie. Retireer net ʼn aks en dit sal chaos wees. In sy scenario storm die EFF en die Boere val terug. Dit sal ʼn kolossale taktiese flater wees. ʼn Skare kan baie vinniger storm as wat mense kan terugval. Dit sal chaos wees, mense sal val en aan die genade van die EFF oorgelaat wees. Mense sal ernstig beseer wees of selfs sterf.
As ons nie kans sien om ons man te staan nie, moet ons nie gaan nie en moet ons die terrein aan die EFF afstaan. Dan beheer en regeer hulle ons en moet ons plaasmoorde maar sluk.
Willem se plan berus op twee dinge wat ons nie kan beheer in so ʼn situasie nie: Eerstens dat die polisie sal wil en sal kan ingryp. Skares het die polisie hierdie jaar al dikwels op loop gesit. En as hulle nie die EFF gestuit kan kry nie, is die Boere se formasie verbrokkel en het hulle net een ding om hulleself mee te verdedig en dis hulle vuurwapens. Dís wanneer daar ʼn slagting gaan uitbreek.
Tweedens reken Willem dat as die Boere vreedsaam terugdeins en die EFF verwoed storm, die Boere die morele hoëgrond toegesê sal word deur die pers. Vergeet dit. Hulle sal die EFF miskien roskam, maar hulle sal die Boere ewe lustig striem en as die ware sondebokke uitwys. Vergeet van die pers en hulle sienings. Hulle is ʼn gespuis en sal nooit aan ons kant wees nie.
So wat móét ons doen: Ek stel voor dat ons letterlik ʼn streep op die grond trek en teenoor mekaar onderneem om nie daaroor te gaan nie. Daar is ʼn voorstel dat ons ʼn blik rooi verf in ʼn streep oor die grond uitgiet, simbolies van die bloed van Brendin Horner, Wilmientjie Potgieter, Annette Keneally en duisende ander martelaars.
As ons aan ons kant van die streep bly, bevredig dit al die vereistes van goeie beeldbou.
Maar sou die EFF deur daardie rooi beweeg, moet ons vasstaan. Hierdie reëling sal dit ook vir die polisie makliker maak om die situasie te bestuur.
Willem sê tereg dat Senekal vir ons ʼn ongekende momentum gebied het. Nou moet ons net erken, hartseer soos dit is, as dit nie was vir die inval by die landdroskantoor, die uitgedryfde Nyala en uitgebrande vangwa was nie, het niemand werklik kennis daarvan geneem nie.
As ons dink ons is net met ʼn openbarebetrekkinge-oefening besig, het ons in 26 jaar niks geleer nie.
Gedurende die onlangse parlementêre verkiesing het die Vryheidsfront Plus sy aantal stemme meer as verdubbel tot 414 844 om sy aantal setels in die nasionale vergadering tot op 10 te staan te bring. Dr. Dan Roodt het met ‘n veteraanverteenwoordiger van die party gesels.
Terwyl ‘n provinsiale raadslid van die EFF in Mpumalanga onlangs gedreig het om “die Witwolf se tande uit te slaan”, lag die VF Plus se verteenwoordiger in die wetgewer, Werner Weber, lekker daaroor. “Ek hoop hy sit langs my,” sê Weber. PRAAG het ‘n onderhoud met hom gevoer oor die party se vertoning in die onlangse verkiesing, asook sy toekomstige beleid.
Die VF + het beter gedoen as wat verwag is. Waaraan skryf u dit toe?
Werner Weber: Die koerante het dit gesê. Na my mening, het ons nie so goed gedoen as wat ek verwag het nie.
Was die DA ooroptimisties?
Werner Weber: Ja, die Die DA was ooroptimisties.
Daar was negatiewe reaksie van Collen Sedibe van die EFF op Twitter wat dreig om u tande uit te slaan. Verteenwoordig die VF+ en die EFF twee teenoorgestelde pole in die Suid-Afrikaanse parlement en politiek?
Werner Weber: Ek is nie oortuig dat hy uit sy hart uit praat nie. Om politieke redes maak hulle asof hulle die witmense haat. Ek ervaar nie sulke gevoelens van swartmense op straat nie.
Dink u die EFF is ook nie so anti-wit as wat hulle voorgee nie?
Werner Weber: Hulle verteenwoordig nie die gesindheid van swartmense nie. Daar is baie min plekke met soveel swartmense soos Piet Retief en ek ervaar hoegenaamd nie daardie gesindheid hier op ons dorp nie.
Oorspronklik is die VF gestig om selfbeskikking vir die Afrikaner te verkry. Maak dit nog deel van die party se grondwet en doelstellings uit?
Werner Weber: Onomwonde, ja! ‘n Mens moet byvoeg dat selfbeskikking verskillende fasette het. Ek kan sonpanele op my dak sit en self elektrisiteit opwek; dit is ‘n vorm van selfbeskikking. Om my eie hospitaal te hê, is ‘n vorm van selfbeskikking. ‘n Eie tuisland is die toppunt van selfbeskikking, maar nie die enigste nie.
Is dit nog die party se strewe om ‘n tuisland vir Afrikaners te verkry?
Werner Weber: Indien moontlik.
Wat dink die VF van die groei onder Europese patriotiese of behoudende partye?
Werner Weber: Daardie partye het ‘n baie sterk gevoel van nasionalisme, en dit verskil weinig van die gesindheid in die VF Plus, want ons is ook patriotte. Ons het ook Afrikanernasionalisme wat vir ons baie belangrik is. Ons vra nie verskoning vir dít wat ons is nie, glad nie. Ons is trots op wat ons is en moedig almal aan wat Afrikaners is en selfs witmense om trots te wees op hulle identiteit.
Is daar enige toenadering tussen sulke partye en die VF Plus?
Werner Weber: Die Duitse AfD het ‘n afvaardiging gestuur na die parlementêre koukus van die VF Plus en hulle het ontmoet. Dit was omtrent so ‘n jaar of 18 maande gelede.
Het die VF enige besoeke aan Europa gebring?
Werner Weber: Daar was so ‘n besoek, maar ek was nie by die gesprek nie.
Hou die VF dop wat in die EU-verskiesings gebeur?
Werner Weber: Ek persoonlik hou dit dop.
Hoe lyk Suid-Afrika se toekoms onder die ANC?
Werner Weber: Ek is geneig om die positiewe raak te sien, maar daar is baie meer negatiewe vooruitsigte as positiewes.
Hoe voel u byvoorbeeld oor die huidige ekonomiese situasie?
Werner Weber: Ek is van mening dat die ANC se finansiële plan nie volhoubaar is nie en dat hulle hul finansieel gaan vasdraai. Hulle planne is net nie volhoubaar nie. Daar is geweldige uitgawes aan sosiale programme. Hul munisipale plan is ook nie uitvoerbaar nie. Een of ander tyd wag daar baie groot moeilikheid.
Werk die demokrasie goed in SA?
Werner Weber: Ek is van mening dat die demokratiese formaat nie ontwerp is vir ‘n land soos SA met verskillende gemeenskappe nie. Dit het sy ontstaan in Engeland gehad wat oor ‘n homogene bevolking beskik het. Dit is uiters onbillik vir minderheidsgroepe. Die ANC sal altyd in beheer wees, en swartes sal altyd in beheer wees.
Is ANC-regering goed vir die breë massa swartmense in SA?
Werner Weber: Op die kort termyn, uitstkend. Maar dis nie volhoubaar nie. Nie finansieel nie. Daar is te veel maatskaplike toelaes, asook oormatige salarisse vir staatsamptenare. Die geld sal opraak, een of ander tyd.
Wat sal dan gebeur?
Werner Weber: Wat dan sal gebeur? Wat met enige besigheid gebeur! Uitgawes sal besnoei moet word en hulle sal vir die massas moet sê julle kry minder geld.
Is die VF Plus steeds ‘n Afrikanerparty of is dit nou ‘n party vir al die minderhede in SA?
Werner Weber: Die party se hooffokus is steeds die Afrikaner want hy het uit die Afrikaner ontstaan. Maar daar word teen alle minderhede gediskrimineer en dus is dit ons missie om alle minderhede te beskerm.
Is die media deesdae vriendeliker teenoor die VF Plus?
Werner Weber: In die laaste drie weke voor die verkiesing het die media baie duidelik gewys hulle veg teen die VF Plus en vir die DA. Hulle wil een groot opposisieparty hê, hulle glo nie in kleiner partye wat ‘n koalisie kan vorm nie.
Hoe sou ‘n ideale SA lyk vir die VF Plus?
Werner Weber: Dis ‘n baie moeilike vraag. Eerstens moet alles op meriete geskied. Ons wil ‘n vreedsame samelewing hê. Ons sou wou hê dat daar weggedoen word met regstellende aksie en swart bemagtiging. Ook dat die ANC se grondplan geskrap word. En dat daar nie teen minderhede gediskrimineer moet word nie.
Ek glo dat as ons normale kapitalistiese stelsel in SA kon implementeer met gelyke geleenthede vir almal sou dit ook beter met ons gaan.
Ek wil byvoeg oor ‘n tuisland: ‘n tuisland is ons strewe, maar dit is nie die oplossing vir almal nie. Die meeste van die witmense en Afrikaners sal nog altyd in die land aanbly. Ons strewe moet ook wees om geregtigheid te verkry vir diegene wat nie in die tuisland sal beland nie. Die res van die mense in die land het ook regte en ons sal vir hulle regte moet opstaan.
Dis baie moeiliker om ‘n tuisland te bekom terwyl die ANC regeer. FW de Klerk moes dit vir ons verkry het. Dis baie moeilik nou want die ANC wil dit nie vir ons gee nie. Ons het eintlik die geleentheid in 1994 verpas.
Ten minste sedert die Penny Sparrow-voorval, weet ons dat die woord “aap” in ons land uiters gevaarlik geword het. Veral op Engels as: “monkey”. Vir die Afrikaanssprekende klink “monkey” na ‘n verkleiningsvorm; dit het iets kinderliks en vriendeliks. Helaas, het ons nou die ander gesig van die aap gesien, in die vorm van massa- en mediahisterie.
EFF-betoging by H&M-winkel
Nog meer onlangs het ‘n horde rooi wagte van die EFF etlike winkels van die Sweedse modehuis Hennes en Maurits bestorm en daarbinne amok gemaak. Dis nou die fameuse “H & M”. Ek besit self ‘n paar linnehemde en -broeke van H & M; ek moet sê, dit verskaf my tans ‘n vreemde gevoel om hulle aan te trek, asof ek een of ander gebod oortree. Die aapgebod?
Om ‘n swartman ‘n aap of bobbejaan te noem, is kennelik ‘n “misdryf” soos dit in die taal van die strafhof heet. Om egter by ‘n kettingwinkel in te bars en jou op die oog af soos ‘n aap te gedra, is geen misdryf of oortreding nie; dit heet “protes” of “betoging”. Ons is al gewoond daaraan dat gewelddadige betogings, wat dikwels met saakbeskadiging gepaard gaan, in ons land onder die ANC-bewind aanvaarbaar geraak het. Dit gee nuwe betekenis aan die uitdrukking: “om te maak of breek soos jy wil”.
Solank jy net nie die aapwoord gebruik nie, anders is jy in gróót moeilikheid. Dit lei egter tot ‘n — myns insiens — tweede paradoks, en dit is: In die beklemtoning van ons gemeenskaplike primaatvoorouers by die Sterkfonteingrotte en elders, het ons reeds as’t ware die aap en veral die aapmens tot iets mensliks, of dan hominieds, verhef.
Toe ek jonk was, was daar ‘n kinderboek deur Sita waarin daar sprake van ‘n aapmens was. Die titel is: Mientjie en die aapmens. Ek kan nie die besonderhede meer onthou nie, behalwe dat Mientjie op vakansie Oos-Transvaal toe gegaan het, waar sy die aapmens sou teëkom.
Dan is daar nog die plaas naby Brandfort wat aan wyle advokaat C.R. Swart, die huidige republiek se eerste seremoniële president, behoort het. Op Nederlands, het dit “De Aap” geheet. Moontlik sou ‘n hedendaagse Naarpershoernalis wat na die spreekwoordelike “rassis onder elke bed” soek, iets sinisters daarin kon lees. “Apartheidspresident het op die plaas ‘De Aap’ gewoon”, sou ‘n gepaste opskrif kon wees. Binne die huidige, taalpreutse konteks kan dit iewers dalk as “skokkend” voorgestel word.
De Aap, plaas van wyle C.R. Swart. Foto: Dana Snyman se Facebook.
Eintlik is dit heel ironies. Want, Suid-Afrika is seker een van die mees dekadente samelewings op aarde, waar elke oortreding, selfs moord of verkragting, verdra word. Die bevolking in sy geheel word deur die media en die owerheid aangemoedig om so losbandig as moontlik te wees en hul oor te gee aan lolyt, brassery en ‘n soort revolusionêre roes waarin die drifte botvier. As ‘n blyk van vreugde, brand jy sommer jou buurman se huis af. Dis soos ‘n karikatuur van die Wilde Weste in Hollywoodfilms: ‘n gesuip in die kroeg, skote in die lug of sommer ‘n skietgeveg op straat, terwyl die vrederegter (sheriff) insgelyks dronk in sy kantoor sy roes afslaap. Anders as in die films, beskik Suid-Afrika kwalik oor eerlike, opregte burgers wat teen die onreg en wanpraktyke in opstand kom.
Dus, niks kan ons meer skok nie. Ons is gewoond aan die ergste: Diefstal. Moord en doodslag. Plaasmoorde. Dis alledaags. Vele misdrywe word nie eens meer by die polisie aangemeld nie, behalwe as dit vir versekeringsdoeleindes benodig word. Daarom is die hele gedoe rondom die woord “aap” of “apie” amper verfrissend. Want dit skep ‘n soort waanbeeld dat die inwoners van dié verrotte land nog iewers oor ‘n morele beginsel beskik! Niks traak hulle meer nie, die misdaad en korrupsie, selfs diegene wat op straat urineer (dit sien ek elke dag in Johannesburg), dog iewers trek hulle die streep: by die woord “aap”. Dít vind hul skokkend, grensoorskrydend, taboe. Hoe sonderling!
Helaas. Ek vermoed dat die EFF se kordate rooi wagte in hul ewe rooi oorpakke kwalik deur die A-woord geskok word. Dis alles bloot politieke teater. Kunsmatige verontwaardiging. Netnou gaan hulle in hul luukse, Duitse viertrekwaens klim en na Amerikaanse kletsrymmusiek luister waarin daar blatant en herhaaldelik na “kaffers” (niggers) en “hoermeide” (hoes) verwys word. Hulle glimlag daaroor.
As voorbeeld – en daar is beslis veel erger – haal ek aan uit die liedjie deur die gewilde kletskrymer Drake, genaamd “Jorja interlude”:
Tryna stay light on my toes
Just ran a light in a Rolls
Told me I’m lookin’ exhausted
You hit it right on the nose
I’m tired of all of these niggas
I’m tired of all of these hoes
Worried ’bout takin’ my lane
They ain’t even got on the road
Dis alles net ‘n groot klugspel. Die gekrenktes maak asof hulle kamma deur die aapwoord onstel word, maar eintlik is almal reeds so blasé dat niks hulle ooit kwel nie. Ons beleef lankal reeds ‘n amorele toestand van anomie. Vir diegene wat nie weet nie, die term “anomie” is deur die Franse sosioloog Émile Durkheim gewild gemaak. Dit word gedefinieer as ‘n “toestand waarin die maatskappy min morele leiding aan indvidue verskaf”. Klink dit nie presies net soos die toestand waarin ons land verkeer nie?
Behalwe dat jy baie versigtig met jou verwysings na die diereryk en veral die orde van die primate moet omgaan, heers daar groot verwarring in Suid-Afrika oor wat reg en verkeerd, beskaaf of onbeskaafd, hoflik of onhoflik sou wees.
Eugène Marais, wat tans oor die algemeen as ‘n polities korrekte liberalis voorgestel word, het ‘n boek geskryf met die titel Die siel van die aap. Nie net is daar verskeie paragrawe in die boek wat hom vandag voor die erg rasbewuste SA Menseregtekommissie sou laat beland nie, maar hy het insgelyks ingesien dat die gedrag van die mens en van die bobbejaan heelwat ooreenstem.
Die mens staan dus redelik naby die sogenaamde hoër primate, soos wat Marais ingesien het:
“Nietemin is een beginsel seker (en elke oplettende Afrikaner weet dat dit so is, en sal dit geredelik erken): dat die kloof wat die bobbejaan in hierdie opsig (en in alle sielkundige opsigte) van die laer soogdiere skei, baie wyer en dieper is as dié wat die mens van die bobbejaan skei – met ander woorde, die ‘slimheid’ van die bobbejaan, wanneer met dié van die hoogste soogdier vergelyk, is oneindig groter as die ‘slimheid’ van die mens met dié van die bobbejaan vergelyk.”
Om die mens binne sy orde van primate te klassifiseer, veroorsaak politieke skande en selfs woede by radikale of Afromarxistiese groepe soos die EFF. Nietemin het die ANC-bewind, asook die links-liberale groepering in die Suid-Afrikaanse politiek, miljoene der miljoene rande daaraan bestee om die gedagte te vestig dat ons land “die wieg van die mens” verteenwoordig. Die huidige homo sapiens sou van die aapmense van Afrika afstam, iets waarop ons veronderstel is om trots te wees.
Vermoedelik is die evolusieteorie vir die huidige bewind en sy links-liberale meelopers aantreklik omdat dit sou behels dat alle menslike rasse van dieselfde aapmens afstam. Stephen Jay Gould, die ontslape Amerikaanse antropoloog, het iewers gesê: “Menslike gelykheid is ‘n toevallige feit van die (evolusie)geskiedenis.” Met ander woorde, dit sou kon gewees het dat die rasse beduidend van mekaar kon verskil het, maar “toevallig” is ons almal gelyk. Dié stelling het Gould, ‘n Joodse Amerikaner blykbaar die eerste keer tydens ‘n besoek aan Pretoria neergepen. Gould is egter ook daarvan beskuldig dat hy bepaalde feite gemanipuleer of verander het om sy siening te staaf.
Gegewe die histerie oor Penny Sparrow en die Britse H & M-kappiehemp, wil dit nou voorkom asof ons “gemeenskaplike herkoms vanaf die aapmens van Sterkfontein” nie meer so sterk beklemtoon word nie. Die hoofstroommedia en die radikale linkse groepe (eintlik is die hoofstroommedia self ‘n radikale linkse groep, wesentlik marxisties in hul uitkyk) is nie meer so erg trots op ons primaatskap en dat ons na verwant aan die ape en bobbejane is nie.
In ‘n samelewing waar die mees vuige taalgebruik, onbeskoftheid, gebrek aan beskaafde maniere — waag dit maar net op die paaie in Gauteng om die dierlike aard van die bestuurders te ervaar — is daar maar een soort “belediging” wat onaanvaarbaar is en dit is om iemand met ‘n aap of ‘n bobbejaan te vergelyk!
Dit is gewoon kranksinnig. Maar ons land het kranksinnig geword, dít weet ons lankal. Dat die kranksinnige regering en media toegelaat het dat 143 geestessiek pasiënte tydens die Life Esidimeni-voorval soos in ‘n Britse konsentrasiekamp weens honger, uitputting en verwaarlosing gesterf het, is maar een simptoom van die wesentlike waainsin onderliggend aan hierdie verdrukkende en onregverdige bestel.
Die ANC, EFF, Sadou en ander organisasies hou vandag aan om Hoërskool Overvaal en sy kinders te terroriseer deur die sing van dreigliedere en die skreeu van rassistiese slagspreuke. Dit volg op gister se betoging voor die skool waartydens volksmoordpropaganda soos “Kill a Boer” en “Shoot the Boer” voor die skool gesing is.
Die skool se werksaamhede sou vanoggend hervat. Die onderwysvakbond Sadou, wat gister Engelstalige kinders uit naburige skole vir hul betoging opgevorder het, asook die ANC, EFF, BLF, COSAS en SASCO het klaarblyklik nou besluit om die skool permanent te probeer ontwrig en terroriseer vandag dus nogmaals die skool.
PRAAG het gepoog om die skool vanoggend te kontak, maar kon geen woordvoerder in die hande kry nie.
Julius Malema het oor die naweek weereens sy onlangse oproepe tot grondgryp deur swartes herhaal toe hy by Sun City gesê het: “Daar is niks spesiaals aangaande blankes dat hulle meer grond as swartes moet besit nie. Hulle moet grond gelykop met ons besit.”
Die geleentheid was die jaarvergadering van die Prokureursorde van die Noordelike Provinsies se jaarvergadering wat Malema as gasspreker uitgenooi het. Blykbaar is ‘n opname van Malema se toespraak op die EFF se Twitterrekening beskikbaar gestel.
“Ons wil nie grond onteien uit wraak nie, maar as deel van ‘n demokratiese proses,” het die EFF-leier gesê.
Malema het ook met revolusie gedreig. Indien blankes nie van hul grond afstand doen nie, sal ‘n revolusie “onvermyndelik wees”, volgens hom. “U en ek sal dan slagoffers wees,” het hy gesê.
Hy het verder uitgevaar teen die rassesamestelling van die land se regslui. Verder het hy die swart revolusionêre wat ook prokureurs was, soos Robert Sobukwe, Nelson Mandela en Oliver Tambo, geloof.
Die huidige toestande in die land en in die wêreld daarbuite maak my baie opgewonde. Die tyd is nou amper ryp om Suid-Afrika terug te vat sonder om ‘n skoot te skiet, presies soos wat die ANC-SAKP dit in 1994 gedoen het! Goed-goed, hulle het heelwat geweld in aanloop tot die 1994-verkiesing gepleeg, waaronder die 200 gevalle van terreur, maar uiteindelik was daar geen militêre konfrontasie met die NP-bewind nie, bloot die verkrummeling van laasgenoemde tydens hul sogenaamde “oorgawe sonder neerlaag” soos Hermann Giliomee dit genoem het.
In judo en ander vorme van gevegskuns is daar ‘n tegniek om jou opponent se momentum te gebruik om hom te laat val of seer te maak. Dis presies wat ons tans behoort te doen.
Ongelukkig is die massa Afrikaners so gebreinspoel deur die media dat hulle geen idee meer het wie die opponent of die vyand is nie, maar dit maak ook nie so erg saak nie; solank ‘n minderheid van ons wel ingelig is en strategies kan dink.
Wie is ons vyande? Ten eerste natuurlik die ANC-SAKP en EFF, noem hulle maar die Afro-Marxiste. Maar daar is ook die Engelse liberale wat in die DA en ander organisasies saamgegroepeer is en tans in ‘n verbete stryd met die ANC verkeer. Omdat hulle, anders as die ANC, nie werklik oor getalle beskik nie, wil hulle die ekonomie en veral ons geldeenheid, die rand, gebruik om die ANC onder druk te plaas. Dit is waaroor die gedoe oor Pravin Gordhan, Malusi Gigaba en die ministerie van finansies gaan.
Ons sien dus dat hier twee sterk neigings is: die ANC/EFF wat toenemend antiblanke geweld gaan gebruik, waaronder die onteiening van grond, en die Engelse liberale groepering wat ekonomiese afpersing wil toepas om die mag oor te neem. Die twee vul mekaar natuurlik aan om een afwaartse spiraal vir die land te vorm, want hoe meer geweld die ANC/EFF en hul ondersteuners pleeg soos by Coligny, Eldoradopark en elders, hoe meer gaan die rand daal en die ekonomie daaronder ly.
Ons moenie die “Nuwe Suid-Afrika” wat val, probeer red nie. Laat hom val, en gee hom ‘n stamp of skop in die rug dat hy vinniger en harder val. Maniere hoe ons daartoe kan bydra, is die volgende:
Hou enige spaargeld of kontant in buitelandse geldeenhede aan (sommige plaaslike banke bied reeds valutarekenings aan wat mens naas jou randrekening kan bedryf).
Versprei al die negatiewe nuus oor Suid-Afrika wyd en syd in die buiteland (nes die ANC-SAKP in die tagtigerjare gedoen het).
Werk saam met regse groepe in die VSA en Europa om die negatiewe nuus te versprei en sodoende beleggersvertroue in die land verder te ondermyn.
Begin ‘n internasionale “Boikot Suid-Afrika”-veldtog (nes die anti-apartheidsbeweging destyds gedoen het). Sekere internasionale maatskappye kan gevra word om die land te verlaat, anders gaan al die regse Europeërs, asook Trump-ondersteuners in Amerika, hulle in die buiteland begin boikot.
Die gevolg hiervan sal wees dat die ekonomie inkrimp, werkloosheid styg en die spontane geweld wat reeds deur die swart massa gepleeg word, toeneem. Enige apatiese liberale Afrikaner wat nog nie “wakker” is nie, sal wel uit sy slaapwandeling ontwaak sodra hulle sy huis of motor begin brand soos op Coligny en ander plekke reeds gebeur.
Intussen sal ons noodgedwonge ons teen die geweld en wanorde moet beskerm. ‘n Vorm van diensplig sal weer ingestel moet word sodat ons ons woonbuurte en dorpe kan patrolleer en aanvalle die hoof kan bied.
Al stuit dit ons teen die bors, moet ons egter niks doen om die breër chaos en agteruitgang in die land te keer nie. Laat hom val, nog vinniger as wat Zimbabwe in die vroeë 2000’s in duie gestort het. Op ‘n gegewe oomblik en afhangend van omstandighede, kan ons dan toetree en dele van die land, of dalk die hele Suid-Afrika — afhangend van wat ons pas — stabiliseer en ‘n soort tussentydse Afrikanerregering saamstel. Dis egter belangrik om te besef dat ons nie met enige van die ander groepe, wat ons historiese vyande is en nog nooit iets goeds vir ons in die oog gehad het nie, moet saamwerk nie. Ons moet ook weier om deel te wees van enige onderhandelings of pogings vanuit die buiteland om die situasie te beredder.
“Demokrasie” of Afro-Marxisme of wat jy ook al die sirkus wil noem wat hom tans afspeel, het misluk. Die mislukking is permanent, nes in Zimbabwe. Ons moet dit afskryf as ‘n slegte eksperiment en nooit weer daarheen terugkeer nie. ‘n Groot deel van die huidige parasitiese heersersklas moet uit die land verban word, soos dit was. Laat hulle Zimbabwe toe gaan, of Kuba, of Venezuela of watter plek hulle ook al verkies.
Die stedelike Engelse sal in groot getalle emigreer soos wat die ekonomiese pyn begin toeneem. Dis die ironie: die 1994-revolusie wat deur die Engelse media en elite gelei is, gaan hulle self vernietig. Waarskynlik ook die Indiërs wat in ‘n hoë mate deel van Engelse Suid-Afrika is. ‘n Mens noem dit ‘n “Phyrriese oorwinning”; dit is wat 1994 vir hulle was.
Al wat gaan oorbly, is so twee miljoen Afrikanerpioniers en onderling vegtende swart stamme wat honger ly. Suid-Afrika gaan sodoende terugkeer tot dít wat dit in die negentiende eeu was, hoewel die internet nog hier en daar sal werk.
Van daar af sal ons weer van nuuts af aan kan begin bou. Enige poging om egter die huidige inploffing te probeer keer, is nie net tot mislukking gedoem nie, maar druis wesentlik téén ons eie belang in.
Ons belang is om die land of daardie dele waaraan ons waarde heg, terug te neem. Dis al wat tel. Intussen moet ons al ons energie daarop fokus om ons te beskerm en te versterk, waaronder veral ons taal, kultuur en identiteit. Terwyl die res in die strate onluste pleeg of mekaar doodmaak, moet ons musiek speel, boeke skryf en oplet dat die hekke dig gesluit is en elkeen stiptelik sy wagstaanbeurt nakom.
Die leier van die EFF, Julius Malema het die ANC veroordeel omdat die party die EFF se aanbod van ses persent van sy nasionale stemme verwerp het om verandering aan die grondwet te weeg te bring.
Die wysigings sou die onteiening van grond moontlik maak, het RSG berig.
Malema het die laaste sê gehad in die debat oor die EFF se mosie oor grondonteiening. Malema het die ANC van skynheiligheid beskuldig.
Die DA LP, Thomas Walters, sê mislukkings met grondhervorming kan nie voor die deur van die Grondwet gelê word nie. Die DA het teen die mosie gestem.
Walters sê klousule 25 van die grondwet is nie die rede waarom grondhervorming misluk nie.
Intussen sê die DA die wysigingswetsontwerp op die Finansiële Intelligensiesentrum is een van die belangrikste wetgewende wapens in die stryd teen korrupsie in die land.
Die DA se woordvoerder oor Finansies, David Manier, het in die Nasionale Vergadering se debat oor die FICA-wetsontwerp gepraat.
Die wetsontwerp is maande gelede deur die President na die Parlement teruggestuur nadat hy die grondwetlikheid daarvan bevraagteken het.
Dit is gister met die steun van al die partye aanvaar. Die EFF se hoofsweep, Floyd Shivambu, het intussen ‘n beroep op die President gedoen om die FICA-wetsontwerp so gou as moontlik te onderteken.
Volgens Shivambu is dit nodig sodat die land ‘n behoorlike werktuig kan hê om finansiële misdade, geldwassery en ander internasionale oortredings vas te vat.
Die chaotiese tonele Donderdagaand in die Parlement in Kaapstad, is verteenwoordigend van die karakter van die land.
Die absolute Zoeloemeerderheid in die ANC het veroorsaak dat die opposisiepartye meen hulle het geen ander manier om mag te bekom as om die werkinge van die instelling te ontwrig met aapstreke nie.
Die DA en VF+ het aan die sirkus deelgeneem, maar beweer hulle steun ‘n parlementêre demokrasie.
Die begin van die President se Staatsrede is vir meer as ‘n uur onderbreek toe die EFF daarop aangedring het dat Zuma nie die Huis toespreek nie, omdat hy sy ampseed verbreek het.
Die EFF is deur lede van die Parlement se Veiligheidsdiens verwyder en die DA en VF+ het daarna ook uitgestap. Zuma sê die EFF is ‘n party sonder beleid en ‘n groep woedende individue.
‘n Faksie binne die ANC het ook die chaos geniet omdat hulle glo hulle gaan op dié wyse beter soustreinsitplekke bekom.
Die DA wil dringend met die Speaker van die Nasionale Vergadering vergader oor wat die party noem “president Jacob Zuma se militarisering van die parlement”.
Die party het voorheen saam met die EFF deel daarin gehad om die parlementsitting te ontwrig.
Zuma het die ontplooiing van 441 weermaglede goedgekeur om wet en orde by die parlementsopening te handhaaf.
Die DA se hoofsweep, John Steenhuisen sê die president se doelbewuste woordkeuse van wet en orde dui op die gebruik van militêre mag en nié net op die weermag se sermeoniële rol nie.
Die leier van die UDM, Bantu Holomisa, sê die president se besluit om soldate te ontplooi is ‘n bewys dat hy angstig is.
Die SABC sal die staatsrede regstreeks oor sy nuuskanaal en radiostasies uitsaai. Die dekking begin op drieuur die middag om kykers en luisteraars op hoogte te hou van al die gebeure.
Die DA het ontken dat hy ‘n ooreenkoms bereik het met die EFF in die Sasolburg munisipaliteit bereik, maar Julius Malema, EFF-leier hou vol hulle hét ‘n ooreenkoms met die DA.
Dit is die jongste verwikkeling in die land se soustrein-sepie waar nuttelose politici baklei vir loopbane terwyl die land met rasse [sic] skrede agteruitgaan.
Die oordrag van stemme sal beteken dat die EFF die sogenaamde Metsimaholo munisipaliteit van Sasolburg in die noord-Vrystaat kan oorneem.
Malema het tydens sy veldtog in aanloop tot môre se tussenverkiesing in wyk 12 aan die media gesê dat die DA sy stemme aan die EFF sal oordra ná die tussenverkiesing.
Die tussenverkiesing word gehou weens die bedanking van ‘n raadslid. Die DA het tydens verlede jaar se verkiesing 12 setels verower, die MCA, 2, en die Vryheidsfront Plus 1, waarna ‘n koalisie gevorm is.
Die EFF wat 8 setels gekry het, het toe hul stemme aan die DA oorgedra.
In die Nelson Mandelabaai Metro gehou waar die ANC ‘n mosie van wantroue teen die burgemeester, Athol Trollip en die Speaker, Jonathan Lawack wil instel, word ‘n spesiale raadsvergadering vir vandag beplan.
Die DA beheer die Metro. Verlede week se vergadering is ontwrig toe die UDM en ander kleiner partye uitgestap het.
Die DA en die UDM baklei oor die aanstelling van ‘n munisipale bestuurder en ‘n direkteur in die munisipaliteit.
Trollip het vroeër gesê hy is nie bekommerd oor die mosie van wantroue wat die ANC teen hom en Lawack beplan nie.
Trollip se woordvoerder, Sibongile Dimbaza, sê daar is ‘n bepaalde proses wat gevolg moet word en geen van die stappe in dié proses is ingestel nie.
In Kaapstad wil gerugte maar nie gaan lê dat Patricia de Lille uitgewerk is deur Helen Zille se handlangers in die DA nie.
De Lille het bedank as DA Wes-Kaapse leier, vanaf Woensdag. Sy sal aanbly as burgemeester van Kaapstad.
Die ANC in die Wes-Kaap glo De Lille se bedanking as provinsiale DA-leier toon die houvas wat ‘n sekere kliek om premier Zille het binne die party.
Die waarnemende ANC-voorsitter in die Wes-Kaap Khaya Magaxa sê danksy die sukses van De Lille om ‘n tweederde meerderheid in Kaapstad in 2016 te behaal, het Zille en haar volgelinge De Lille uitgestoot net soos die voormalige DA parlementêre leier, Lindiwe Mazibuko, omdat hulle ‘n gevaar geword het met te veel mag en invloed.
Magaxa het gesê De Lille was ‘n goeie burgemeester, maar daar was ‘n groep, gesentreer op Zille, wat nie die werklike beheer van die DA uit hul hande sal laat glip nie, veral nie met sy Wes-Kaapse basis nie.
Swart studentegroepe op die Soshanguve-kampus van die Tshwane Universiteit van Tegnologie sê hulle is gekant daarteen om hul eksamens wat vandag begin af te lê, omdat hulle weens die onrus nie daarvoor kon voorberei nie.
Maar die die groepe self was verantwoordelik vir die onrus en onluste.
‘n Geskorste studenteleier, Thabo Boima, sê lede van Sasco, Pasma en die EFF sal keer dat studente met busse na die eksamenlokaal vervoer word, nadat die Studenteraad gevra het dat die eksamen voortgaan.
Die Studenteraad in Pretoria het ‘n beroep op studente gedoen om vandag te gaan eksamen skryf.
Die klasse is ontwrig deur oproer oor klasgeld, wat nou blykbaar ‘n verskoning is dat die oproeriges nie kan skryf nie.
Veiligheid is intussen verskerp ter voorbereiding van verdere openbare geweld.
‘n Woordvoerder van die universiteit, Willa de Ruyter, sê reëlings word getref vir studente van die Soshanguve-kampus om hul eksamen by die Tshwane Skougrond te skryf.
Geen politieke party het die EFF se sabotasie by TUT nog veroordeel vir wat dit is nie. In stede daarvan word die openbare diskoers al hoe meer Marxisties soos wat elke party linkser as die EFF probeer lyk.
Die leier van die EFF, Julius Malema verskyn vandag in die Bloemfonteinse Landdros vir die oortreding van die Wet op die Reëling van Byeenkomste, het RSG berig.
Die Nasionale Vervolgingsgesag sê hy staan tereg op aanklagte van aanhitsing nadat hy herhaaldelik sou gesê het dat mense onbewoonde grond moet beset.
Malema het verlede week in die landdroshof op Newcastle in KwaZulu-Natal op soortgelyke aanklagte verskyn. Hy het glo die uitlatings gemaak tydens die EFF se verkiesingskongres wat 2014 in die Vrystaat gehou is.
Talle ondersteuners het gisteraand ‘n nagwaak by ‘n gemeenskapsaal gehou. Malema sal na verwagting die hof vra om die saak uit te stel totdat sy aansoek om die Wet op die Reëling van Byeenkomste ongrondwetlik te laat verklaar, afgehandel is.
Sy regsverteenwoordiger, Tumi Mokoena het bevestig dat die aansoek verlede week ingedien is.
Die redakteur van Landbouweekblad, Albertus van Wyk, het die week Afrikaners wat ongelukkig is met die petrolbom wat die EFF na Paul Kruger se standbeeld gegooi het, as “white trash” op Twitter beskryf.
Steve Hofmeyr, wat die bebaarde, oorgewig kaalkop aangevat het daaroor, is ook sleggesê. Van Wyk, klaarblyklik witgeskrik deur die vloedgolf van negatiewe reaksies, het daarna dadelik sy rekening privaat gemaak.
Hy staan dus by sy uitgangspunt dat Afrikaners “wit gemors” is maar wil blykbaar nie kritiek hoor van diegene wat sy tydskrif lees nie.
Nie verbasend nie, het selfhaat ook dié Naspespublikasie ingehaal wat deur “white trash” boere ondersteun word.
Maar Van Wyk meen waarskynlik dat sy base sal aanhou om sy salaris te betaal aangesien hulle die globalistiese projek steun en presies dieselfde mening as Van Wyk huldig.
Van Wyk, self nie ‘n toonbeeld van afgerondheid en opvoeding nie, maak ‘n ongekunstelde indruk op die meeste mense. Dit blyk veral nou duidelik uit sy Naspes-onkunde om sy lesers te probeer verkleineer sodat die EFF in ‘n beter lig gestel word.
Lesers op Facebook het voorgestel dat Die Landbouweekblad voortaan hul tydskrif aan die EFF bemark. Die EFF se historiese bewussyn maak staat op die orale tradisie wat ‘n besonderse uitdaging aan Van Wyk kan stel.
Intussen het ‘n strukturele spesialis die Paul Kruger-standbeeld in Pretoria ondersoek om die skade daaraan te bepaal nadat swart betogers Woensdag ‘n petrolbom daarna geslinger het.
Dié petrolbomaanval is deur die EFF gedoen wat ‘n optog in die middestad gehou het om te eis dat pres. Jacob Zuma uit sy amp verwyder moet word.
Cecilia Kruger, besturende direkteur van die Erfenisstigting en Voortrekkermonument, het Donderdag in ‘n verklaring dat ‘n bewaringskundige die beeld ondersoek het.
Geen skade is glo aan die bronsbeelde of die granietvoetstuk aangerig nie, maar die heining om die beeldegroep is beskadig.
Die leier van die EFF, Julius Malema, sal vandag in die landdroshof in Newcastle verskyn op aanklag van aanhitsing om ‘n misdaad te pleeg.
Malema sal op aanklagte vir die oortreding van die Wet op die Reëling van Byeenkomste verskyn.
Die Nasionale Vervolgingsgesag sê hy staan tereg op aanklagte van aanhitsing nadat hy herhaaldelik sou gesê het dat mense onbewoonde grond moet beset.
Sy eerste uitlating daaroor was twee jaar gelede tydens ‘n EFF-saamtrek in Bloemfontein. Die tweede voorval was vroeër vanjaar by ‘n politieke saamtrek op Newcastle.
Die aanklagte hou onder meer verband met ‘n oproep deur Malema tydens die party se nasionale kongres, in 2014 op die Universiteit van die Vrystaat se Bloemfonteinkampus gemaak het.
Malema het toe die EFF aangehits om onbesette grond te konfiskeer.
In 2016 het hy dit weer herhaal in Newcastle, waar hy EFF-ondersteuners vertel het wittes het geen reg op grond nie.
Malema sal op 14 November in die Bloemfonteinse landdroshof verskyn op dieselfde aanklagte.
Volgens Malema word hy aangekla weens wetgewing wat deur die apartheidsregering daargestel is en hy beskou dit daarom nie as ‘n oortreding nie.
Die EFF se woordvoerder, Mbuyiseni Ndlozi sê die besluit om Malema aan te kla is “politiekery”.
