Menings – Bladsy 17 – praag.co.za

ANC en DA is kop in een mus met rasstellende aksie

Me. Helen Zille se artikel in Beeld oor “rasstellende aksie”, soos dit deesdae in die volksmond bekendstaan, toon aan hoe die DA se môre- en aandpraatjies nie ooreenkom nie. Is die DA nie die party wat vir sogenaamde “breedgebaseerde swart ekonomiese bemagtiging” in die parlement gestem het nie?

Die regulasies van minister Mildred Oliphant verteenwoordig bloot die logiese uitvloeisel van die anti-wit arbeidsbeleid wat die DA ondersteun.

Zille se koloniale onderrok hang ook ver uit as sy onsmaaklike vergelykings tussen ANC-beleid en dié van dr. Verwoerd tref. Waar op aarde het Verwoerd ooit aan maatskappye voorgeskryf wie hulle in diens mag neem en wie nie? Werkreservering in die ou Suid-Afrika is terug te voer na die 1922-staking toe dit deur die veel geprese Suid-Afrikaanse Kommunisteparty met sy destydse slagspreuk van “Werkers verenig vir ‘n wit Suid-Afrika” geëis is. Dit was egter bloot van toepassing op 7% van beroepskategorieë, hoofsaaklik op die myne, en kan nie met die huidige, totalitêre sosiogeniëring van die twee radikaal linkse partye, die ANC en DA, vergelyk word nie.

‘n Voormalige DA-LP, die omroeper Niekie van den Berg, het onlangs op KykNET gesê: “Die DA is nou die party van benadeling.” Volgens hom is dit internet DA-beleid om “van ons middeljarige blanke mense ontslae te raak”.

Indien die DA van blankes en veral blanke mans in sy eie geledere ontslae wil raak, is dit mos net logies dat hy dieselfde beleid in die SA ekonomie sal ondersteun, nie waar nie? Dít het hy inderdaad met sy stem vir breedgebaseerde SEB bewys.

Terwyl me. Zille met haar snedige verwysings na Verwoerd haar ongeneeslike Boerehaat demonstreer, hou sy aan om die historiese ANC as ‘n “eens eerbare organisasie” te bestempel. Wanneer was die ANC ooit eerbaar? Toe dit met die Sowjetunie en Oos-Duitsland saamgespan het om onskuldige burgerlikes in ons land te vermoor? Dink maar aan die Kerkstraat- en Amanzimtoti-bomme. Of toe die ANC- en SAKP-leiers ná hul besoek aan Viëtnam in 1978 op die swart-op-swart terreurveldtog bekend as “people’s war” besluit het? Lees gerus dr. Anthea Jeffery se lywige boek hieroor.

Die DA en die ANC is kop in een mus as dit by die etniese reiniging van minderheidsgroepe uit die arbeidsmark kom.

‘n Nuwe visie is nodig om ‘n einde aan geweld en rassekwotas te maak. Slegs Front Nasionaal se beleid van kulturele outonomie en selfbeskikking kan Suid-Afrika van gewisse ondergang red.

Dr. Dan Roodt
Onderleier, Front Nasionaal

Genoeg geNkandla, asseblief!

Deur Riana Theron.

Die onophoudelike nuus oor Nkandla wat alle wittes op hol het, is werklik baie vreemd. Die swartes stel hoegenaamd nie belang in Nkandla nie.

Dis nou dieselfde wittes wat geen toegang tot enige staatsgeld of -dienste het nie op die grond van hul taal.

Want velkleur is dalk nie so belangrik nie. Daar sit baie wit Engelse in die ANC wat geen probleme ondervind nie. Dis net as jy Afrikaans praat wat dit skielik begin sukkel om enige staatsondersteuning te kry. Vra maar vir die studente, siekes, bejaardes en weeskinders wat swaar gebuk gaan onder diskriminasie.

Maar Afrikaners kerm saam oor Nkandla asof daar nie baie groter probleme is wat hulle direk raak nie.

Ek wonder nou: As daar nie ‘n Nkandla was nie, sou julle dan enigsins beter daaraan toe gewees het? Sou Afrikaners dan toegang gehad tot dié fondse waaraan hulle so swaar help betaal?

Duidelik nie, want hierdie anti-Afrikaner-gees was nog meer vaardig onder Mbeki. Zuma het darem nog ‘n mak Afrikaner by die trog aangestel in die vorm van die Mulderfamiliebedryf se hooftrogvreter, Pieter, maar dis net hulle familie wat voordeel trek.

Ek wonder hoe heet die Mulders se eie Nkandla en hoekom lees ons nie daarvan in Naarpers nie?

Pieter sorg saam met die ANC dat ander Afrikaners nie eers hul eie skole mag hê nie, laat staan nog universiteite, hospitale, kinderhuise en ouetehuise. Almal moet mos Orania toe trek waar die Mulders alles besit en aan jou sal verkoop.

Die DA het die Speaker van die Nasionale Vergadering, Max Sisulu in ‘n blik gedruk om die mosie van ‘n staat van beskuldiging teen president Jacob Zuma te oorweeg oor Nkandla en natuurlik blêr die Mulders saam.

Hulle pleit vir die totstandkoming van ‘n ad hockomitee en die instel van prosedures om Zuma in ‘n staat van beskuldiging te plaas nadat die Openbare Beskermer, Thuli Madonsela, se verslag oor die opgradering aan die president se privaatwoning Nkandla uitgereik is.

Die hele Nkandla-storie is blote verkiesingspookasem want dis kleingeld. Dis nie eers soveel soos een klein staatstender nie!

Miljarde verdwyn in die sakke van neo-koloniale spelers wat Suid-Afrika as die nuwe Eldorado ontdek het en daaroor sal nòg die DA, nòg die VF se trogvarke kla.

Sisulu sê Madonsela het haar verslag aan die President voorgelê. Hy sê Zuma moet die verslag met sy kommentaar by die Nasionale Vergadering indien.

Dis nie nuuswaardig nie. Wat wel nuuswaardig is, is dat Afrikaners ontsettend benadeel word deur hierdie stelsel wat hulle uitbuit vir hulle belastings en niks daarvoor teruggee nie. Maar danksy Nkandla hoor ons net mooi niks daarvan nie.

Nkandla gaan ook absoluut niks verander aan die verskriklike diskriminerende stelsel in Suid-Afrika nie. Dis nie asof die geld wat Zuma dalk sal moet teruggee ooit in Afrikaners se sakke sal beland nie.

Zuma sal in ‘n staat van beskuldiging geplaas word, sodat die Britte en Amerikaners verder kan aanhou steel met hulle eie nuwe swart marionet aan die stuur wat die Chinese en die res sal uitsluit. Dis waaroor dit gaan.

En natuurlik ‘n trogvark of twee soos Pieter daarby om Afrikaners gelukkig te hou.

‘Roei 8 miljoen Russe met kernwapens uit’

Nadat die oproep tussen die Amerikaanse assistent-sekretaris van buitelandse aangeleenthede, Victoria Nuland en die Amerikaanse gesant na die Oekraïne, Geoffrey Pyatt, uitgelek het waarin Nuland sê “F*k die EU”, is ‘n nuwe opspraakwekkende telefoongesprek na die media gelek.

Dié gesprek bevestig weer opnuut dat dit die VSA was wat die toutjies getrek het om die verkose regering in ‘n gewelddadige staatsgreep omver te werp en van die Oekraïne se president Janoekowietsj ontslae te raak.

Die nuutste telefoongesprek, hierdie keer tussen die parlementariër Nestor Shufrych en voormalige premier en ideologiese leier van die Oekraïne se “Oranjerevolusie” Julia Tiemoesjenkoe, is nie alleen onthullend nie, maar ontstellend.

Die mees waarskynlike toekomstige president van die Wes-Oekraïne, Tiemoesjenkoe, maak allerlei nuwe dreigemente teenoor etniese Russe, waaronder ook om 8 miljoen met kernwapens uit te wis.

Nadat die parlementariër haar tydens die gesprek bekommerd vra: “Wat moet ons nou doen met die 8 miljoen Russe wat in die Oekraïne oorgebly het? Hulle is uitgeworpenes…”, antwoord sy kil en saaklik, blykbaar onbewus dat dit ‘n retoriese vraag was.

“Hulle moet doodgemaak word met kernwapens,” sê Tiemoesjenkoe doodluiters. Die rolstoelgekluisterde Tiemoesjenkoe wat gemaklik rondloop as sy nie voor ‘n skare verskyn nie, braak dan verder gal oor ‘n verskroeide aarde-beleid wat sy “namens die hele wêreld met haar kontakte” teen Rusland wil voer en die eks-president met ‘n “masjiengeweer in sy kop skiet”.

Dit is die duidelik namens wie sy die Russe wil uitwis nie, aangesien die Neo-Cons se oorlogsugtige beleid baie ongewild is by gewone Amerikaners wat die Obama-administrasie van “red-baiting” [alarmisme oor die Rooi Gevaar] en opportunistiese McCarthyisme verdink.

Dit is dus duidelik dat die Russe in Oos-Oekraïne nie ‘n kat se kans staan teen die Amerikaanse invallers en hul plaaslike handpoppe nie.

Dié gesprek gee president Poetin die voordeel dat hy wel die onafhanklikheid van die Krim ter beskerming van etniese Russe oorweeg het, presies soos hy gesê het.

Die Oekraïne se sogenaamde “regering”, ‘n stel marionette wat Washington aangewys het, voel niks vir etniese minderhede in die ooste nie en dit is duidelik dat hulle dink dié mense verdien nie om beskerm te word nie, maar verkieslik uitgewis moet word.

Tiemoesjenkoe het tronkstraf uitgedien vir korrupsie nadat sy ‘n gasvoorsieningsooreenkoms onregmatig geteken het wat die land se gasvoorsiener Naftogaz $170 miljoen dollar gekos het.

Aan die stuur van die “Oranjerewolusie” wat Tiemoesjenkoe gelei het, het die land verder agteruitgegaan en dieper in korrupsie verval. Sy het as premier tussen 2007-2010 gedien.

Goldman Sachs, wat namens die Neo-Cons in die VSA die druk op Rusland probeer verhoog, het “voorspel” dat die kapitale uitvloei vanjaar 130 miljard dollar kan haal. Die aksepbank het intussen hulle kliënte met ywer bearbei om hul beleggings uit Rusland te onttrek.

Volgend Goldman Sachs sal Rusland in ‘n resessie verval as hulle hul beleggers oorreed om hulle geld aan die land onttrek, met groei wat waarskynlik gaan verlangsaam namate die kapitale uitvloei die $100 miljard bereik.

Rusland se grootste bank, Sberbank, sê kapitaal het uit die land gevloei en aandele en die roebel het gedaal nadat die Krimgebied oorweldigend gestem het om van die Oekraïene af te stig.

Sberbank sê die situasie het ‘n negatiewe uitwerking op die wêreldwye ekonomie.

Ontleders sê die stappe wat Rusland gedoen het om te keer dat die roebel nog verder daal deur rentekoerse te verhoog, kan die land in ‘n resessie dompel.

Politiek is nie rugby nie

Die nuus dat dat die oud-NP’s Nick Koornhof en Juli Kilian van hul huidige party, Cope, na die ANC oorloop, demonstreer die gebrek aan beginsels en standvastige denke waaraan soveel onlangse beroepspolitici hul skuldig maak.

Ook die bontpratery van die Mulder-familie se Vryheidsfront Plus wat die afgelope vyf jaar gesukkel het om Pieter Mulder se deelname aan die ANC-regering aan regse kiesers te verduidelik, behoort tot dié siening van “politiek as rugby”, soos die drie Cope-lede dit pikant uitdruk.

Politiek is egter nie rugby nie. Kiesers stem vir ‘n bepaalde party met ‘n stel beginsels en verwag dat leiers hulle daarby moet hou. Hulle verdra ook nie dat beroepspolitici hul eie belang bó dié van kiesers en selfs die landsbelang mag stel nie. Wat vir Brian Habana aanvaarbaar mag wees, om van span te verander, maak van die politikus ‘n soldenier of huurling wat sy dienste aan die hoogste bieder verkoop.

Ons is geneig om korrupsie bloot aan geld en omkopery te verbind. Lank voor ‘n mens egter omkoopgeld aanvaar, raak jy in jou denke korrup en begin jy dienstigheid bo beginsels stel.

Ons nuwe party, Front Nasionaal, beywer hom vir Afrikanervryheid, waaronder die onmiddellike oordrag van eie kultuurbates soos skole, universiteite en monumente aan Afrikaners, tesame met beheer oor eie belastings as ‘n eerste stap na die herstel van ons soewereiniteit.

Benewens opportunisme, ly beroepspolitici in ons land ook aan ‘n graad van domheid wat nêrens elders ter wêreld te vinde is nie. Hulle begrip van politiek, landsbestuur en internasionale politiek is dikwels so beperk dat hulle nie in staat is om tussen, sê maar, kommunisme en konserwatisme te onderskei nie!

As ons nie helderheid na die politieke arena terugbring nie, gaan die huidige krisisse net verdiep en is ‘n Zimbabwe ons voorland.

Dr. Dan Roodt, onderleier en woordvoerder, Front Nasionaal

Dié brief verskyn ook in ‘n verkorte weergawe vandag in Beeld.

Duitse president Gauck ‘n voorstander van eensydige ingryping

Daar was vroeër vanjaar rekordgetalle betogers vergader teen die jaarlikse sekuriteitskonferensie in München, Duitsland, en dit was nie per toeval nie.

Duitse deelnemers aan die konferensie het vir ‘n meer gespierde (lees: aggressiewe) buitelandse beleid gevra, en daar het stemme opgeklink ten gunste van die uitbreiding van die rol van die Bundeswehr in NAVO wat in die naam “vredessendings in die buiteland” diens doen.

Byna 5000 Duitse militêre personeel neem tans deel in nege internasionale konflikteaters, insluitend meer as 3135 in Afghanistan en 784 in Kosovo.

Die dag voor die konferensie afgeskop het, het Angela Merkel in ‘n gesprek met die Verenigde Nasies se Sekretaris-generaal, Ban Ki-moon, die noodsaaklikheid beklemtoon om Duitsland se bydrae in krisisbestuur te verhoog.

Terwyl die kanselier die hele reeks aktiwiteite geskets het, het Duitsland se federale president Joachim Gauck net die militêre aspekte benadruk.

Die voormalige Protestantse predikant het ‘n langasempreek afgesteek vir uitgebreide militêre betrokkenheid, en te velde getrek teen… pasifiste.

Volgens Gauck gebruik pasifiste die historiese skuld van die Duitsers om teen deelname in buitelandse konfliksituasies te protesteer. Hy bedoel natuurlik diegene wat artikel 26 van die Duitse Grondwet te letterlik opneem. Luidens artikel 26 mag die land geen militêre bedreiging inhou nie.

Duitsers is vandag demokrate met ‘n skoon gewete en ‘n vlekkelose geskiedenis as mens na Gauck luister. Maar die voormalige kommuniste het nie dieselfde voorreg nie. Hulle moet die verlede onthou, selfs al is hulle vandag demokraties.

Joachim Gauck was een van die eerstes wat inderhaas die Praag-verklaring oor Europese Gewete en Kommunisme (2008) en die Verklaring oor Misdade van die Kommunisme (2010 ) onderteken het.

Daarvolgens moet kommunisme voor ‘n spesiale internasionale tribunaal soos die Nuremberg-verhoor van 1945 gedaag word, asof die Oos-Duitsers nie lustig saamgewerk het daarmee nie. Hy verdoem ten minste ‘n groot deel van sy eie landgenote.

Selfs die geskiedkundiges wat kommunisme en fascisme vergelyk, kritiseer Gauck se geheueverlies oor sy eie tragiese biografie: Sy pa was self in ‘n Britse tronk.

Die president van Duitsland dink sy eenogige verwysing na die geskiedenis is ‘n verskoning wat toelaat dat die Duitsers vandag gemaklik agter die rug van heldhaftige bondgenote kan wegkruip.

Hy meen dit is niks anders as morele verdorwenheid dat die Verenigde State van Amerika alleen “vrede” moet handhaaf nie. Gauck glo dat Duitsland en sy bondgenote meer verantwoordelikheid moet neem.

Kenners weet egter goed waar die huidige idee van Duitsland se verantwoordelikheid vandaan kom. In September 2013 het die Duitse Instituut vir Internasionale en Sekuriteitsaangeleenthede van die Stiftung Wissenschaft und Politik (SWP) en die Duitse Marshall Fonds van die Verenigde State ‘n verslag getiteld New Power, New Responsibility, elements of a German Foreign and Security Policy for a Changing World, die lig laat sien.

Die belangrikste gevolgtrekking van die studie is dat Duitsland se invloed in Europa behoort te groei saam met sy verantwoordelikheid teenoor die Verenigde State van Amerika. President Joachim Gauck is duidelik besig om die eenduidige rigting daarvan aan te dui.

Hy is van mening dat die beginsels van staatsoewereiniteit en nie-inmenging nie van toepassing is op regimes wat geweld gebruik nie. Dit is net nog ‘n poging om die beginsel van nie-inmenging te vervang soos in die Verenigde Nasies se Handves vervat.

Duitsers is veral geïnteresseerd in die wetlike aspek want hulle is bekend daarvoor dat hulle groot respek het vir alles wat op skrif gestel word. Horst Köhler, die voorloper van Gauck, het al in sy tyd al probeer toesien dat die beginsel van nie-inmenging hersien word.

Voor die studente van die Universiteit van Tübingen in 2004, het hy die Konstitutiewe Wet van die Afrika-Unie as … ‘n voorbeeld van ‘n dokument gebruik wat beskerming bied aan demokratiese waardes. Trouens, die Wet beoog die reg van ingryping in ‘n lidstaat in die geval van oorlogsmisdade, volksmoord, misdade teen die mensdom ( artikel 2 , item h)

Die Duitsers glo dus dat hulle ook moet ingryp in Afrika, behalwe natuurlik as dit oor plaasmoorde gaan waar wittes doodgemaak word. As dit by die plundery in die DRK kom, is hulle al te gewillig om teenwoordig te wees, want daar hoef hulle nie wittes te ondersteun nie.

Ander Europeërs het ook intussen besmet geraak deur die militaristiese ingrypingsvirus. Oostenryk en die Tsjeggiese Republiek het blykbaar besluit om die resultate van 1938 se München-konferensie te hersien en te erken dat Hitler eintlik deur demokratiese idees aangevuur is ter beskerming van die Duitse bevolking teen etniese diskriminasie.

Beginsellose verkiesing?

Herman Toerien vra in sy nuuskommentaar of Suid-Afrikaners dalk vanjaar sonder enige beginsels kieslokaal toe sal gaan nalv die opportunistiese oorlopery van Cope en DA LP’s na die ANC.

In sy hoofartikel looi Volksblad nie net die optrede van die vier oorlopers nie, maar ook die lamlendige verskonings of verduidelikings wat die viertal aangebied het. “Dit druip van beginselloosheid”, skryf ‘n verontwaardige Toerien.

En beginsels is tog veronderstel om die hoofrede te wees oor waar kiesers hul kruisies gaan trek. Kan ‘n party se beleid sonder beginsels hoegenaamd ‘n beleid genoem word?

Dit sou ‘n heel ander kwessie gewees het as die vier, toe hulle agtergekom het hulle het beginselprobleme met die beleid van hul party, uit daardie partye bedank het (en hul setels prysgegee het) en by ‘n party in ooreenstemming met hul beginsels gaan aansluit het tot hulle die kandidaatlyste op die gebruiklike manier kon haal.

Die kiesers gaan ‘n breë keuse hê wanneer hulle in die algemene verkiesing hul kruisies gaan trek. Sommige kiesers sal noodwendig op die nasionale en provinsiale lyste vir twee verskillende partye moet stem omdat sommige partye nie in al die provinsies kandidate stel nie.Van die bekendste grotes (in die Suid-Afrikaanse konteks) se name sal weer op die stembrief voorkom. Hulle sluit die ANC, die DA, Cope, IVP, die UDM, Vryheidsfront Plus, die PAC, Minority Front en nog ‘n paar kleineres in.

Van die nuwe toetreders het verskeie reeds die oog gevang, hoewel nie almal vir die regte redes nie. Onder die bekendste nuwelinge is Julius Malema se EFF waarskynlik die party wat die beste gaan vaar, Agang SA, en die NFP wat hoofsaaklik uit die IVP ontstaan het, en duidelik baie steun afgerokkel het.

Nog ‘n nuwe toetreder, wat volgens sy Facebook-blad vir die verkiesing geregistreer het, is die Front Nasionaal. Die bekendste leiersfiguur hiervan is dr. Dan Roodt. Dit sal interessant wees om te sien of hierdie party – wat uit verskillende belangegroepe saamgestel is, beduidende steun sal kan trek van mense wat voorheen geweier het om aan verkiesings deel te neem.

Die bekende Peter Marias het self hard probeer om bruin, Koi- en San-groepe as ‘n beduidende politieke mag vir die verkiesing saam te snoer, maar dit het geblyk dat ‘n veewagter dit makliker sou vind om ‘n trop wilde tarentale in ‘n hoenderhok ingekeer te kry. Daardie verwikkelinge kan egter die bruin steun vir die DA – weens die DA se skynbare louheid oor die Solidariteit-DKD-saak – in ‘n mindere of meerdere mate knou. Daar is ‘n groot onrustigheid oor die groeiende Manyiïsme in nuwe wetgewing wat niks goeds vir die bruin gemeenskappe inhou nie.

Tussenverkiesingsuitslae het daarop gedui dat die UCDP – die party van wyle Lucas Mangope, waarskynlik sy deposito in die water gaan gooi.Vir die groter partye gaan die verkiesing ‘n groot toets wees. Peilings dui daarop dat die ANC se steun aansienlik gekrimp het, maar dit is nog te vroeg om veel hieruit wys te word omdat die ANC bekend is vir ‘n sterk eindpoging.

Die DA het sy eie kwota drama beleef. Dit kom op die oog af voor asof die party nou die kantelpunt bereik het waar dit in sy poging om veral swart lede te werf, minstens ‘n ongemak onder sy gevestigde lede loslaat. Berigte oor die bestaan van ‘n swart koukus wat sekere beleidsaanpassings opeis wat van die party ‘n ANC Lite maak, word ontken.

Cope is deur diep water, en dit is onseker of die party nou die probleme genoegsaam sou oorkom het om weer as ‘n betreklike sterk party na die parlement en ‘n aantal provinsiale wetgewers terug te keer.Die UDM kan dalk weens etniese wortels in die Oos-Kaap effens baat uit die Marikna-tragedie, maar dit lyk of die EFF die aanvanklike tekens van steun taamlik deeglik opgeruim het. Die impak van die aansluit van Cope se Shilowa-faksie kan dalk ‘n paar stemme beteken.

Die IVP se leier, Mangasothu Buthelezi, het waarskynlik sy rakleeftyd heeltemal te ver probeer rek, en een van die neweprodukte hiervan, die NFP, lyk of dit die IVP – wat in elk geval in KwaZulu-Natal na die ANC gebloei het, ‘n harde hou kan toedien.

Die ACDP sal dit waarskynlik baie moeilik vind om die vlakke wat dit ‘n dekade gelede geniet het voor dit erg teruggesak het te herhaal. Die grootste probleem is moontlik die verstommende lang lys van sterk persoonlikhede wat die leier, eerw. Kenneth Meshoe, sedert die party se ontstaan uit die party gewerk het. Iewers sou die party die prys hiervoor betaal.

Die Vryheidsfront Plus sal goed doen as hard probeer die enigste maatstaf was. Die party is veral in die sosiale media deurlopend onder skoot weens dr. Pieter Mulder se besluit om as adjunk-minister te dien, en gaan nou ook ‘n aanslag van die Front Nasionaal die hoof moet bied.

Dit is jammer dat oorloper-politici nou die beeld van politici gaan besoedel het.

Potch-heksejag: Wat wil jy wees?

Deur Gerhard Venter

Ek het op skool geleer dat as jy anti iets is, moet jy pro iets anders wees.

Is Elma Smit en Adriaan Basson dan ondersteuners van pedofiele en allerlei ander afskuwelike perversies?

Kom ek verduidelik. As jy pro-Amerikaans is, sou jy uiteraard pro-kapitalisties en pro-demokraties wees want hulle gee voor om die voorvegters vir vryheid en geregtigheid te wees.

Jy sou jouself ook met die beleidsrigtings en sosiale standaarde van die gemiddelde Amerikaner vereenselwig, en fel anti-kommunisties wees wat ideale, politiek en ekonomie betref.

Die Potch-debakel laat ‘n mens dink wat anti-Nazi, anti-Hitler en pro-Nazi en pro-Hitler werklik beteken, en hier begin die hele ou kaartehuis ineentuimel. Want sien die eerste ding wat Hitler en sy party gedoen het nadat hul aan bewind gekom het was om Berlyn, of Babilon soos hy dit gestel het, te vernietig.

In die 1920’s was Berlyn bekend as die sekshoofstad van Europa. Berlyn was toe deur misdaadsindikate beheer gedurende Duitsland se ergste depressie, en mense het daagliks selfmoord gepleeg agv hul benarde finansiële omstandighede.

Duitse vroue, selfs seuns en meisies, het weens hul ekonomiese verknorsing hulself tot prostitusie gewend om te oorleef. Dis dan ook hier waar die eerste homseksuele film genaamd Anders as die ander deur ‘n ene Magnus Hirschfeld vervaardig is.

Hy was die dryfveer agter seksuele vryheidsbeginsels wat sadomasochisme, pedofilie en bestialiteit ingesluit het.

Hy het ook ‘n skool vir die bogenoemde afwykings geopen en was bekend as die Einstein van seks. Hy was ‘n voorstaander van aborsies wat hy met ywer aangemoedig het.

Pedofiele en perverte het na Berlyn van oraloor uit die buiteland gestroom want hulle kon daar vir ‘n nietige som geld koning kraai en alllerlei perversies uitleef.

Hitler se gewildheid het juis toegeneem weens sy beloftes om van hierdie plaag, wat hy as Babilon beskou het, ontslae te raak.

Daarom bly die optrede van dié Naspers-gespuis ‘n raaisel. Wil hulle dan graag die terugkeer van ‘n Hitler aanmoedig?

Rassisme? Hitler se weermag was die mees veelrassige weermag van sy tyd. Daar was Indiërs, Asiërs, Japannese, en swart soldate in die Duitse weermag. Daar is steeds hordes foto’s van hierdie vrywillige troepe beskikbaar.

Die tergendste vraag is dan hoekom hul almal bereid was om vir Hitler – die “aartsrassis” – te sterf? Daar was selfs Jode in Hitler se weermag waaronder generaals en veldmaarskalke.

Een van die stigterslede van die SS was ‘n Jood. Hitler se beleid was eenvoudig elke volk regeer oor homself en volke moet nie vermeng nie. Is dit nie ‘n basiese beginsel van die Bybel nie?

Seksisme? Vroulike gevegsvlieëniers is deur die Nazi’s opgelei, soos onder meer Hanna Reitsch. Hierdie ystervrou het menige manne in die skande gesteek met haar vliegkuns en sy is beskou as een van die bestes in die wêreld.

Verskeie van Reitsch se internasionale sweefrekords staan steeds. In die 1960’s het sy ‘n sweefskool in Ghana geopen, waar sy vir Kwame Nkrumah gewerk het.

Aan die jong mense van Potchefstroom wil ek dus net sê: Julle het niks verkeerd gedoen nie, en ek salueer julle!

Vir al die gepuis wat hulle oordeel, nou ja, kies dan maar self: Om pro-Hitler te wees impliseer seker anti-pedofilie, anti-prostitisie, anti-aborsie, anti-bestualiteit, anti-pervers, anti-rassisties en les bes, anti-seksisties.

Withuis probeer Oekraïne-krisis de-eskaleer nadat China Rusland steun

Die Withuis het ‘n amptelike foto vrygestel van Barack Obama waar hy telefonies met Wladimir Poetin gesels oor die krisis in die Oekraïne. Die gesprek het 90 minute geduur.

Die Amerikaanse president het verkies om met sy naweek-uitrusting van denim heel loslit te poseer.

Ontleders meen die foto van die ontspanne das- en paklose leier is gemik daarop om die wêreldkrisis te de-eskaleer, nadat China Rusland teen die VSA oor die kwessie ondersteun het.

Amerika se wêreldleierstatus berus daarop dat hulle lande isoleer. China en Rusland wat saamstaan is ‘n nagmerrie vir die VSA se buitelandse beleid van verdeel en heers.

Die Oekraïne, een van die voorste uitvoerders van koring en mielies op die planeet, staar ontwrigting in die gesig weens die ingryping van sekere Westerse lande met oliebelange wat tot ‘n staatsgreep in die land gelei het.

Dié ingryping kan die opkomende globale voedselkrisis verder vererger.

‘n Gaspyplynkaart illustreer grafies waarom Westerse oliebelange die Russiese energiereus Gazprom as ‘n werklike probleem beskou. ‘n Groot mededingende gasveld loop onder Sentraal-Europa se pyplynnetwerk en boorputte kan onmiddellik gasverkope aan Duitsland en aan ander bestaande Gazpromkliënte beteken. ‘n Prysoorlog sal Gazprom se beheer oor die Europese mark en daarmee Russiese invloed knou.

Die mate waartoe die VSA se multinasionale olie- en gasmaatskappye direk Russiese ondernemings in die verskaffing aan die EU teiken, is merkwaardig. Chevron, Exxon en ander is baie prominent in die opkomende buitelandse skaliespel.

Dat skalie-ontginning onnoembare skade aan waterarm, ongerepte plekke sal aanrig, beteken vir hierdie gulsige multinasionale maatskappye minder as niks.

Die mededinging wat die Oekraïne met skaliegasontwikkeling vir Rusland kan skep, is ‘n faktor wat Anglo-Amerikaanse belange dwing om Oos-Europa te destabiliseer.

Poetin se streeksambisies word gerugsteun deur ‘n sterk energiediplomasie. Sy binnelandse politieke posisie berus op stabiele pryse om die staat se begroting te finansier.

Daarbenewens beskik hy oor ‘n revolusionêre konserwatiewe ideologie met ‘n yslike internasionale aantrekkingskrag in verskeie godsdienstige, politieke en ekonomiese sfere. Barack Obama beskik tans oor sy slagoffervelkleur en sy ondersteuning vir gayregte.

Poetin het sy internasionale status verder verhoog deur sy onlangse diplomatieke oplossing vir Sirië. Russiese sagte mag berus ironies genoeg vandag op al die fondamente waarop goeie Westerse waardes geskoei is.

Rusland het nie troepe ingestuur in die Oekraïne nie. Poetin maak gebruik van kontraktniki (goedbetaalde professionele vrywilligers) om ‘n greep op die situasie te behou.

Dieselfde hoogsopgeleide kontraktniki is die mense wat die Moslemopstand in die Kaukasus met groot sukses onderdruk het.

Poetin sal nie sommer openlik ingryp in die Oekraïne nie, maar onder druk van die nasionalistiese Russe se eie interne politiek sal die Krim se mense ook nie aan hul eie lot oorgelaat word nie.

Skewe-Beeld se agenda

deur Hannes Engelbrecht

Beeld, daardie Johannesburgse pamfletjie wat vinniger lesers verloor as ‘n kat na ‘n vlooibad, se agenda ruk nou hande uit.

Sedert die liggewig Adriaan Basson oorgeneem het as redakteur is byna elke Afrikanerinstelling ‘n teiken. Uit die binnekringe word reeds gefluister dat die lang messe uit is vir sy arrogansie.

Die jongste poging van Beeld om die enigste Afrikaanse kampus (Pukke) in die land swart te smeer, val netjies in by hul gekraai van plesier toe ‘n swart kanselier aangewys is.

Ontgroening en studentepret is deel van die studentelewe. As dit gepaardgaan met ‘n paar hikslae is dit omdat jongmense somtyds ook foute maak. Die ironie is dat die Puk beheer is en was deur liberale. Sommige dosente figureer baie sterk in die DA. Onder Theuns Eloff se vise-kanselierskap het die Dakargangers soos Max du Preez ook by die Puk kom nesskrop. Dit tel nie vir Beeld nie. Die Puk is Afrikaans en daarom is die skietseisoen oop op hulle.

Dis onverstaanbaar dat ‘n “Afrikaanse” koerant so ‘n doodswens kan he; om sy eie oorlewing as Afrikaanse blad op te offer ten gunste van ‘n klein agenda van ‘n paar roekelose leke-joernaliste.

Front Nasionaal is nie een van Beeld se gunstelinge nie. Geen enkele persberig of brief word geplaas nie. Ons het daar nie ‘n saak mee nie. Ons soek nie die krummels wat van Adriaan Basson se tafel afval nie.

Ons het egter ‘n waarskuwing aan Beeld: moenie te veel karring aan lesers nie. Spreuke praat van ‘n gekyf wat soos ‘n druppende kraan is. Beeld se druppende kraan les lankal nie meer die dors van die Afrikaner nie.

Hannes Engelbrecht is leier van Front Nasionaal.

Beeld voer haatveldtog teen die Puk

Naarpers se liefling-Nazi's — Naarpers se liefling-Nazi’s

Dit blyk dat regte, egte Nazi’s, van die soort wat tans die verkose regering in die Oekraïene destabiliseer met geweld, Naarpers se goedkeuring wegdra.

Maar ‘n paar lawwe en vervelige studente by die Puk het volgens die smeerkoerant ‘n doodsonde begaan om ‘n “Nazi-saluut” te wys tydens… ontgroening.

Ja, u het reg gelees! Ontgroening. Die heel lafste manier waarop studente hulself as studente bevestig, is vir die comrades by Naarpers erger as ‘n misdaad teen die mensdom.

“Internasionaal word studente, sportsterre en bekendes wat dit wys verguis, afgedank en selfs tronk toe gestuur,” aldus Beeld.

“Enigiemand met die kleinste begrip van die geskiedenis sal weet dat dit onaanvaarbaar is om die Nazi-saluut in die openbaar te wys,” skel Beeld sy lesers. Maar dis doodreg met Naarpers as volbloed Nazi’s soewereiniteit en demokrasie mbv gewelddadige buitelandse agente ignoreer. Om nie van hoogverraad en terreur te praat nie. Alles piekfyn!

Dit kan net uit pure kwaadwilligheid wees dat ‘n koerant sulke berigte oor ontgroening by die Puk met doodserns aanbied, asof die giftige gas van Auschwitz hul neusvleuels onbehoorlik terg.

Praag het reeds oor die rol van die Nazi’s en die Open Society-miljardêr George Soros se befondsing vir die omverwerping van ‘n demokraties verkose regering in die Oekraïene berig.

Volgens Naarpers se opper-Afrikaanse, bied Brittanje en Nederland “morele en praktiese steun aan die Oekraïense opposisie”. Geen sprook gesprak oor die terreurbefondsing wat nou reeds tot die dood van byna ‘n honderd mense gelei het of die rookkolomme van brandende buitebande wat oor die hoofstad Kiëf hang nie.

Leopold Scholtz maak ook seker dat hy geen verwysing na die Oekraïeniese SS (Spilna Sprava) in sy pro-Nazi-berig insluit nie.

Naarpers het die gewone “Nazi’s” uitgesnuffel, en sommer hier naby in Potchefstroom, nie Bloemfontein nie. Dit pas so reg in Scholtz en die nuwe dorpsidioot Adriaan Basson se kraal want dis weer wit Afrikaners wat ter sprake is. Het Leopold ons nie reeds male sonder tal, met oorgawe vertel hoe onderling uitruilbaar die twee begrippe is nie?

Beeld voer tans ‘n reusesmeerveldtog teen die Puk. Die agenda is ‘n herhaling van wat die spul dommes daar gereeld onderneem, en dis al lank in die tand: Smeer die Afrikaner swart, breek sy instellings af en verdoem hom tot ‘n minderheid wat aan ‘n meerderheidstirannie uitgelewer is.

Die laaste paar dae bel omgekrapte vooraanstaande ondersteuners van die Noordwes-Universiteit (NWU) se Potchefstroom-kampus redaksielede van Beeld om te kla oor die openlike haatveldtog wat die koerant en hul slinkse nuwe redakteur Basson dryf, maar soos gewoonlik is dit kommunikasie per gebreekte telefoon.

Basson en sy snuiters is horende doof. Hulle hou hulself glo te besig met “joernalistiek” sê hy.

Die comrades daar in die swart moddertoring – lank nie meer van ivoor nie – het “nuussin” en “dien die openbare belang”, verklaar hy hoogheilig. Basson het gerieflikheidshalwe vergeet om by te voeg dat hy die swart openbare belang bedoel wat wit Afrikaners per definisie uitsluit.

Die afgelope twee weke het die skorsing van twee koshuise se huiskomiteelede oor ontgroening op Potchefstroom nou gevorder na die hoofnuus oor studente se Nazi-salute. Dis nie eers eties verdag nie. Dis kru en kras en uiters bedenklik wat die monopolistiese moddergooiers aanvang.

Dis die gereelde bombardement teen opgevoede, ordentlike mense, weer op dieselfde trant as wat daardie handgebaretolk met Mandela se begrafnis met die dowes gesels het.

Die verkragters, kindermolesteerders, mensehandelaars, dwelmsmouse, swendelaars en misdadigers moet ‘n groot sug van verligting slaak dat Naarpers hul doelwit so getrou nastreef en op die vernietiging van Afrikaners fokus.

Dit laat darem oorgenoeg ruimte vir die skuim om na bo te dryf.

Vryheidsfront nou totáál Nasionale Party

deur Hannes Engelbrecht

Ondersteuners van die VF+ wat gereeld selfbeskikking voorhou as die party se beleid wanneer vrae deur Front Nasionaal gevra word, het waarskynlik vanoggend in hulle koffie gestik toe hul leier se artikel in Rapport gelees is.

Dr Pieter Mulder draai geen doekies om nie – sy party het “herposisioneer”. In die proses val Mulder terug op die ou Nasionale Party-slagspreuk van “eenheid in diversiteit”, of soos die De Klerk-NP dit gedefinieer het : “Eenheid in verskeidenheid”. Mulder strewe na ‘n “nuwe staatkundige bestel waarin erkenning gegee word aan die diversiteit van Suid Afrika”. Hy reken “ons minderheidskonferensie het ‘n gesamentlike doel vir minderheidsgroepe daargestel”. Al wat kortkom van die ou Nasionale Party-retoriek is dat Mulder nog net die slagspreuk van “Eie Sake” ook moes ophaal.

Van selfbeskikking maak Mulder geen melding nie; inteendeel, hy omhels die eenheidstaat met gemak:

“So ‘n nuwe Suid Afrika moet gebou word rondom die konsep van ware eenheid in verskeidenheid; rondom ‘n ware ‘better life for all’; rondom ‘n ware gelyke kans vir almal”.

Dit is presies die standpunt wat FW de Klerk verkondig het gedurende Kodesa.

Hierdie standpunte van Mulder en die VF+ maak dit nou duidelik waarom die “koalisie” en “samewerking” met eenheidstaat-partye soos Cope en die PAC vir die party ‘n voortvloeisel is. Nes die NP destyds met die IVP en DP.

Dis ook duidelik waarom Mulder geen probleem het met ‘n adjunk-minsterskap in die ANC-regering nie – dit was ook De Klerk se standpunt in die Regering van Nasionale Eenheid onder Mandela.

Die Vryheidsfront het nou die bodem geskraap. Hulle politieke argumente het opgeraak. As ‘n party teruggryp na ou uitgediende Nasionale Party-argumente wat ‘n klaaglike mislukking was, is jy polities bankrot.

Baie mense vra waarom Front Nasionaal gestig is – dit is die rede. Die sogenaamde “tuiste vir Afrikaners” van die Vryheidsfront is net ‘n ou Nasionale Party-pypdroom. Nes die NP is die VF+ nou ook waarskynlik op pad na ‘n roemlose politieke dood.

Hannes Engelbrecht is leier van Front Nasionaal

Demokratiese Alliansie is ‘n dansskool

deur Hannes Engelbrecht

Ten spyte daarvan dat sy eie politieke kommentators soos Herman Gilliomee en Theo Venter (NWU-Pukke) die DA waarsku om nie die wit stem as vanselfsprekend te aanvaar nie, gaan Zille en haar span ongesteurd voort om die DA te “hervorm”.

Die DA se parlementêre leier, Lindiwe Mazibuko, het pas weer hierdie week ‘n dwarsklap uitgedeel aan een van die wit bestuurslede, Athol Trollip. Dit het gevolg nadat die DA se kandidatelys gewys het hoe wittes (soos Niekie van der Berg) uitgeskuif word ter wille van die “transformasie” van die party.

Die DA se jeugvleuel is natuurlik klaar in geheel “verswart”, terwyl die Gauteng-kandidaat ook swart is. Dit sluit aan by Patricia de Lille (van die OD, wat ingesluk is deur die DA en verantwoordelik was vir die “groei” wat die DA kwansuis gewys het) wat met ‘n hand vol lojales Kaapstad bestuur.

Die DA se kleure as ‘n multikulturele party wat ‘n eenheidstaat voorstaan, kom al meer na vore. Hulle ommeswaai oor regstellende aksie, verandering van straatname, alewige ge-toyi-toyi en Dianne Kohler-Barnard se weiering om Afrikaans te praat, is tekenend van die rigting wat die party nou inslaan.

Anders as wat sommige media wil voorgee, is die DA ook nie die skoonste van partye nie. Die gedoente met Agang ruik na buitelandse inmenging met geldskenkings, die DA-raad van Midvaal verkeer in allerhande korrupsie-aantygings, en Manie van Dyk is amptelik Suid-Afrika se reistoelaag-koning. Op Potchefstroom was dit ‘n lagwekkende sirkus soos die DA probeer het om ‘n stadsraad te beheer met net ‘n derde van die stemme (wat in effek beteken het dat hulle in die kort rukkie aan die stuur geen demokratiese besluite kon uitvoer nie).

As ‘n multikulturele party het die DA ‘n swak vertoningsrekord wat betref die aanspreek van wittes en kleurlinge se probleme. Op die beste is hul mediaverklarings oor viskwotas en plaasmoorde net ‘n oorsigtelike gegorrel wat tog net nie hul swart kollegas aanstoot moet gee nie. Met laasjaar se plaas-onluste in die Wes Kaap was die DA met stomheid geslaan. Hulle beleid oor grondhervorming is so naby aan die ANC s’n dat daar eintlik eenstemmigheid is.

Omdat Zille en Mazibuko (Zille se voorkeurkandidaat vir volgende partyleier) ‘n onheilige houvas op die party het, kom hulle weg met dinge waarmee geen ander party sal wegkom nie. Op die kandidatelys is jong, onervare mense wat as sekretaris en as woordvoerder vir Zille opgetree het – ‘n duidelike bewys van regstellende aksie wat ook binne die party self aanwesig is.

Die DA, wetende dat politieke argumente en beleid hulle kan kortwiek, wend hulle al meer tot populistiese politiek. T-hemde, kospakkies, Zille in Moslemdrag, Zille in sangoma-seremonie, Zille aan’t toi-toi: dis ‘n nimmereindigende gespeel vir die gehoor sonder om enige politieke argument op die tafel te sit.

Die Demokratiese Alliansie spog graag met die Wes-Kaap. Maar as jy praat met ingeligte Wes-Kapenaars kom ‘n ander prentjie na vore – dit is nie die “regeringsvermoë” van die DA wat die Wes-Kaap en Kaapstad laat uitblink nie; dit is die unieke werkerskorps binne die stad en provinsie wat die verskil maak.

Gaan dit help om enige van die dinge wat hierbo genoem word aan die DA te vra? Nee, dit gaan nie. Die DA hou nie van politieke argumente nie, want dit kan dalk kiesers wakkermaak. Die DA sal eerder antwoord deur iewers in ‘n “township” te gaan dans en T-hemde uit te deel. Dít is die Demokratiese Alliansie.

Hannes Engelbrecht is leier van Front Nasionaal.

‘n Politieke genie sonder gelyke

'n Tradisionele presedent? — ‘n Tradisionele presedent?

Deur Madelein Jacobs

Die afgelope paar maande het veral Naarperskoerante se Afrikaanse skrywers en redakteurs, elke dag die einde van staatspresident Jacob Zuma aangekondig.

Maar met die tradisionele Zoeloe van Nkandla se onlangse staatsrede in Naarpers se Kaapstad, het Jacob Zuma se aansien en mag net verder vermeerder.

Vir die Zoeloebevolking van Kwazulu-Natal, lyk Jacob Zuma met sy netjiese gevolg na ‘n gesagvolle superleier wat alle vyandige aanvalle deur Naarpers oorleef, om net daarna in top presidensiele prag en praal vir Naarpers in hulle eie plek te gaan preek, waar einste Naarpers in die Kaapstad se pragtige parlement met openbare eerbied en eerbetoon na hom moet luister.

Beskou die kontras tussen Nkandla en Kaapstad tydens die staatsrede. Naarpersredakteurs, Naarpersskrywers en Naarpersleser is vandag verseker diep dronkgeslaan. Hoe is dit moontlik dat die korrupte en ongeskoolde tradisionele Zoeloe wat Naarpers nou al vir maande en jare intensief en selektief bespot, verkleineer en demoniseer, net groter en sterker in die wêreld figureer?

Naarpers se kontras-strategie was wetenskaplik: Verhef die heilige Tata Madiba van die Oos-Kaap bo alle aardse mense, en vergelyk hom met die domste en skelmste Zoeloe in die land, Jacob-stortkop met standerd vier van korrupte Nkandla in Kwazulu.

Maar Zoeloe-Zuma verkry in die politieke Naarpersproses net meer aansien en mag.

Daar moet iets wees wat kosmopolitaanse Kapenaars, liberale blankes, intellektuele Afrikaanses en sommige konserwatiewe Afrikaners nie van ingewikkelde Suid-Afrikaanse stampolitiek en tradisionele Zoeloes verstaan nie, om so openlik die pot mis te kan sit.

DA kan nie enkele bron verskaf vir ‘sukses’-bewerings nie

Die DA twiet lustig en onophoudelik oor die party se “suksesse” in die Wes-Kaapse regering.

Net so leuenagtig soos die party se plakkate wat lui “Registreer en wen!” asof die verkiesing ‘n lotto is en die party ‘n kans staan om te wen, is die DA se bewerings oor werkskepping.

Verklarings oor 60.000 “arbeidsgeleenthede” wat in die tweede helfte van 2012/13 deur die party moontlik gemaak is en 31.000 “werksgeleenthede” die afgelope jaar word op Twitter gemaak. (Wat op aarde is die verskil tussen ‘n arbeidsgeleentheid en ‘n werksgeleentheid?); dat 99,1% van alle huishoudings in die Wes-Kaap toegang tot lopende water het; dat 93,4% het toegang tot elektrisiteit het; dat 96,9% toegang tot toiletgeriewe het; dat die Stad van Kaapstad – die provinsiale hoofstad – meer vir arm inwoners as enige ander stad in die land doen om die gaping tussen ryk en arm uit te wis en dat R11 miljard van die R18 miljard bestee aan dienslewering in Kaapstad aan die armes gaan.

Dit lyk alles heel indrukwekkend. By navraag, jammerlik genoeg, kon die party egter nie ‘n enkele bron verskaf vir enige van hul bewerings nie.

Partyleier Helen Zille se woordvoerder, Zak Mbhele het twee maande na die eerste oproep eers reageer op ‘n navraag van ‘n NRO, en daarna konsekwent versuim om enige van sy selfopgelegde sperdatums na te kom ter verskaffing van die bronmateriaal.

In een e-pos, het Mbhele probeer om die vertragings as volg weg te verduidelik: “Die rede vir die ongelukkige vertraging is dat dit tegnies nie ‘DA inligting’ is nie. Dit is aangevra… Ek probeer om die bronne te kry om inligting saam te stel van die Stad Kaapstad en betrokke provinsiale regeringsdepartemente.”

Beide die Stad Kaapstad en die provinsiale regeringsdepartemente word tans deur die DA beheer.

Mbhele moes desnoods uiteindelik toevlug tot sy eie terugwerkende navorsing neem.

Met verwysing na die 60.000 “arbeidsgeleenthede” wat geskep is deur die Wes-Kaapse provinsiale regering in die 2012/13 finansiële jaar, skryf hy as volg: “Niemand so ver kan my iets in beton gee nie … In my eie aanlynsoekpogings het ek afgekom op die Uitgebreide Openbare Werke-program se verslae vir die eerste helfte van 2012/13 … maar nie die tweede helfte waarna die twiet verwys nie.”

Daarna het hy ‘n skermskoot van die DA se omstrede Twitter-verklarings ter sprake van die Internet geneem as bewys dat dié syfer vir “arbeidsgeleenthede” min of meer korrek is.

Mbhele het daarna ‘n stortvloed Internetskakels wat hy in die loop van sy navorsing ontdek het, aan die NRO gestuur, waarskynlik in die hoop dat ‘n massa inligting, alhoewel nie ter sake nie, die knoop sal deurhaak.

Sensusdokumente wat hy ook aangestuur het, toon weliswaar dat die Wes-Kaap se basiese dienste die beste in Suid-Afrika is, maar dit is natuurlik geërf van voor 1994, toe daar min swart aankomelinge vanuit die Oos-Kaap was.

Hierdie beweringe weerspieël nie die reeds hoë vlak van dienslewering wat die DA oorgeërf het van die Apartheidsregering nie. Die DA dekontekstualiseer die inligting met opset vir eie gewin.

Benewens die kwaadwillige verdraaiings van Afrikanersuksesse, is die DA se algehele gebrek aan betroubare data kommerwekkend.

Dat iemand uit die enjinkamer van die DA-provinsiale regering, met die gesag van die Premier se kantoor agter hom, nie in staat is om die bron van inligting en oorspronklike data te gee nie, spreek boekdele.

Die wisselwerking tussen die navorsing- en kommunikasie-afdelings in die DA parlementêre kantoor bestaan klaarblyklik nie.

Mbhele self gee toe dat dit by die DA soos met die spreekwoordelike gebreekte telefoon gaan.