Karin Roodt – Bladsy 118

MDC ‘staan nie ‘n kans nie’

Die Zimbabwiese opposisieparty, die MDC is gereed om amptelik beswaar aan te teken teen die land se verkiesingsuitslae.

Hulle betwis die uitslag waarin president Robert Mugabe byna ‘n tweederde meerderheid van die stemme getrek het/

Mugabe se party, die ZANU-PF-party, het insgelyks ‘n tweederde-meerderheid behaal.

Beide Amerika en Brittanje het hul twyfel oor die geloofwaardigheid van die uitslae uitgespreek.

Zimbabwe se verslane presidensiële kandidaat Morgan Tsvangirai het Maandag belowe om teen die “skyn” verkiesing beswaar te maak, te midde van hernude berigte van geweld teen sy party se ondersteuners.

Tsvangirai se bondgenote het aangekondig dat hulle die konstitusionele hof sal nader.

“Ons prokureurs is baie besig. Ons sal beswaar aanteken voor Vrydag,” sê Douglas Mwonzora, woordvoerder van Tsvangirai se Beweging vir Demokratiese Verandering (MDC).

Mwonzora het gesê die beswaar kom weens volgehoue aanvalle teen MDC-ondersteuners.

Hy het gesê 42 gesinne is verplaas in die Mashonaland-streek nadat hulle aangeval is deur Zanu-PF-aanhangers.

Die families word nou gehuisves by die MDC se hoofkwartier in Harare.

Maar MDC-bromme erken dat die aansoek baie moeilik kan wees.

Die regerende Zanu-PF het dié stap verwelkom – die eerste sedert die bloedige 2008-verkiesing wat gelei het tot die vorming van ‘n ongemaklike magsdelingsooreenkoms tussen Mugabe en Tsvangirai.

“Wat hulle doen, is ‘n goeie ding, dit is ‘n wyse pad om te neem,” het Zanu-PF-woordvoerder Rugare Gumbo gesê, vol vertroue dat die uitdaging sal misluk.

Grondwetlike regskenner Lovemore Madhuku het gesê gegewe die 61-34 persent stemverdeling teen Tsvangirai, dat sy kanse “nie bestaan nie, heeltemal nie bestaan nie.”

President Jacob Zuma het Sondag sy gelukwensinge aan Mugabe op sy herverkiesing na ‘n “suksesvolle” verkiesing oorgedra, terwyl sy Namibiese eweknie Hifikepunye Pohamba het ook die uitslag verwelkom het.

“Die mense van Zimbabwe het weer eens bewys dat hulle vertroue in die Zanu-PF en die leierskap van die party het,” het hy in ‘n brief aan Mugabe verklaar.

Hulle het SAOG en die Afrika-Unie se mening beaam dat die afwesigheid van bloedvergieting in die verkiesings op ‘n vrye en regverdige proses dui.

Swart skoolbus raak pad byster

Agt-en-dertig swart skoolkinders is beseer toe die bus waarin hulle gery het, by Douglasdale noord van Johannesburg van die pad af geloop het.

Volgens ER-24 het die bus 100 kinders van Witkoppen Primary School van 10 jaar en jonger vervoer. Die bus het op die hoek van Witkoppen- en Waterfordweg in ‘n sloot beland.

Die kinders het daarin geslaag om uit die wrak te klim. Die bus was glo padwaardig, maar oorlaai aangesien dit heelwat minder kinders mag vervoer.

Die beseerdes is in die hospitaal opgeneem, en al die beseerdes is in ‘n bestendige toestand.

Die bestuurder wat nie sy naam wou bekend maak nie, sê die remme van die bus het onklaar geraak. Bekommerde ouers wou weet waarom die bus in gebruik was met swak remme.

‘n Ondersoek sal gelas word na die oorsaak van die ongeluk.

Wapentransaksie-ondersoek uitgestel

Die voorsitter van die kommissie van ondersoek na die multi-miljard randse wapentransaksie, regter Willie Seriti het gesê hy gaan akkoord met die departement van verdediging oor die uitstel van die kommissie se werksaamhede tot 19 Augustus.

Die departement het sy kommer uitgespreek oor die deklassifikasie van dokumente by die kommissie.

Seriti sê die uitstel sal president Jacob Zuma ook die geleentheid gee om ‘n derde kommissaris aan te stel of die regulasies te verander sodat die kommissie met net twee kommissarisse kan voortgaan.

Regter Francis Legodi het verlede week bedank.

R28 miljoen vir jazzfees verdwyn

Die KwaZulu-Natalse regering het R28 miljoen vir ‘n jazz-fees in Durban betaal wat nooit plaasgevind het nie, het die Sunday Tribune berig.

Die ekonomiese ontwikkeling en toerisme departement is besig om deel van die geld te verhaal. In Junie verlede jaar is ‘n ooreenkoms aangegaan met ‘n konsortium om die internasionaal bekende North Sea Jazz Festival aan te bied.

Die fees het nie plaasvind soos geskeduleer is in November nie as gevolg van ‘n geskil tussen die feespromotors, die fees se Nederlandse bestuur Mojo, en die departement. Die Sunday Tribune berig dat die departement R28 miljoen opgedok het, waarvan R16.9 miljoen bestee is sonder dat die fees plaasgevind het.

Die geleentheid is gekanselleer en die departement het ‘n terugbetaling van sowat R11 miljoen betaal aan Charmaine Cornille, een van die promotors, om die regte vir die fees van Mojo te bekom. Mojo het sedertdien beweer hulle is nooit betaal vir die regte nie.

Die departement het ‘n ooreenkoms aangegaan met die MPM/Softskills konsortium. Cornille was een van MPM se eienaars. MPM is later vervang deur Profile Kommunikasie, ook in besit van Cornille. Cornille ontken bewerings dat haar rol in die projek gelei het daartoe dat die fees gekanselleer word.

“Ek is ‘n fluitjieblaser in hierdie geval en ek het na die provinsiale tesourie gegaan en hulle van bedrog en korrupsie op groot skaal in kennis gestel,” het sy gesê.

Gedenkdiens vir polisieslagoffers van Kaapse bendegeweld

‘n Gedenkdiens sal Maandag in Kaapstad gehou word vir die vier polisielede wat in die jongste voorvalle van bendegeweld in die Kaapse Skiereiland doodgeskiet is.

Nog ‘n polisielid is steeds in die hospitaal. Die polisie sê verskeie leidrade word opgevolg om die skuldiges vas te trek.

In die heel jongste voorval is ‘n 34-jarige polisielid verlede week deur twee onbekende mans by sy huis in Montclair in Mitchellsplein afgemaai.

Die nasionale polisiekommissaris Riya Phiyega sal na verwagting ‘n krans by die Khayelitsha polisiestasie lê, waarna ‘n diens later in Kuilsrivier gehou sal word.

Die minister van polisie, Nathi Mthethwa, het vroeër gesê die polisie oorweeg ‘n meesterplan om die dwelmprobleem op die Kaapse Vlakte te pak. Mthethwa sê Philippi is as ‘n loodsprojek aangewys.

Hy het ook gesê die Kaapstadse burgemeester, Patricia de Lille, steun hom in die benadering, wat behels dat maatskaplike ontwikkeling, gesondheid, onderwys en die polisie in ‘n vennootskap saamwerk.

Mthethwa sê hy is tevrede met die polisie se stryd teen dwelms in die Wes-Kaap, maar die hoë voorkoms van bendegeweld moet aandag kry.

Nie die minister of De Lille het verduidelik hoe die twee probleme geskei kan word nie, aangesien bendegeweld en dwelms nou verwant is.

De Lille se woordvoerder, Solly Malatsi, het bevestig dat die DA en ANC verlede maand in verband met die anti-dwelmveldtog oorleg geplaag het.

Hy sê Mthethwa het ook ingestem om met die provinsiale regering oor die saak saam te werk.

President Jacob Zuma sê buitengewone ingrypings is nou nodig om bendebedrywighede te bekamp. Hy het op Botshabelo, oos van Bloemfontein gepraat as deel van die ANC se veldtog vir volgende jaar se algemene verkiesing.

Die president sê bendelede wat gemeenskappe terroriseer is simbolies van ‘n ongesonde gemeenskap. Hy het slagoffers van bendegeweld in die gebied besoek en belowe om met die polisie te praat sodat stappe gedoen kan word.

British Airways vlieg met stokou onderdele

Verskeie vliegtuie van Comair het die naweek vanuit Durban en Kaapstad na Johannesburg gevlieg om onderdele te vervang.

Dit volg op berigte dat elf van die lugredery se vliegtuie wat deur British Airways besit word, met onderdele vlieg wat al ‘n jaar gelede vervang moes word.

Die Burgerlike Lugvaartowerheid het Vrydag beveel dat Comair se vliegtuie nie die laaiblad mag verlaat voordat die onderdele vervang is nie.

Comair sê veiligheid is belangrik op al die lugredery se vliegtuie.

Passasiers is na vlugte van Kulula oorgeplaas. – RSG

Slagting op KZN-paaie duur voort

Vyf mense het doodgebrand en nog vier is ernstig beseer tot twee voertuie reg van voor teen mekaar gebots het op die N-2 suid naby Umgababa op die KwaZulu-Natalse suidkus.

Die woordvoerder van die provinsiale departement van vervoer, Kwanele Ncalane sê een van die bestuurders het vermoedelik ‘n U-draai op die snelweg probeer maak.

Hy sê die LUR, Willies Mchunu het ‘n taakspan aangestel om die ongeluk te ondersoek.

Verlede maand is meer as 150 mense op die provinsie se paaie dood.

‘Vat Tlokwe by die base en mêrrims’

Die stryd tussen die DA en die ANC sal waarskynlik verder verhewig met ‘n tussenverkiesing in die Tlokwe-munisipaliteit in Potchefstroom in Noordwes, ná die onlangse hofstryd oor die burgemeesterskap.

Beide partye het se verbete ambisie om die burgemeesterspos te vat het tot dusver vir ‘n onverkwiklike spektakel gesorg.

Nog tussenverkiesings word later gehou om die 14 ANC lede te vervang wat uit die party geskop is, ná hulle gehelp het om die DA burgemeester Annette Combrink in te stem en die ANC burgemeester Maphetle Maphetle uit die kussings te lig.

Senior ANC leiers, waaronder Jesse Duarte en Cyril Ramaphosa, het die gebied vroeër besoek om steun vir die party te werf en het gister ‘n deur-tot-deur veldtog in wyk nege gevoer waar die stemming baie gelykop kan verloop.

Die hoofsekretaris van die NUM, Frans Baleni het vir die ANC stemme gewerf.

Die DA se provinsiale leier in Noordwes, Chris Hattingh sê dié keer sal dit nie so maklik wees vir die ANC nie – ongeag hoeveel senior leiers die munisipaliteit in die aanloop tot die tussenverkiesings besoek.

Intussen het Sanco die minister van welsyn Bathabile Dlamini daarvan beskuldig dat sy gehelp het om met behulp van staatsgeld kospakkies in Noordwes uit te deel om stemme vir die ANC te werf.

Die voorsitter van die SAKP en minister van hoër onderwys, Blade Nzimande het ‘n beroep op swart kiesers gedoen om Tlokwe van die wit “base en mêrrims” af te vat.

UJ-ontvoerder gevang

‘n Man is in Ennerdale suid van Johannesburg in hegtenis geneem in verband met die ontvoering van ‘n student aan die Universiteit van Johannesburg (UJ), het die polisie Vrydag gesê.

Die 18-jarige swart verdagte was na bewering in besit van die ontvoerde student se gesteelde motor, aldus konstabel Elizabeth Mnguni.

Die 23-jarige wit UJ-student is Donderdagoggend omstreeks 09:00 deur ‘n gewapende man ontvoer terwyl sy besig was om haar motor by die kampus te parkeer.

Hy het ‘n vuurwapen op haar gerig en aan haar gesê om oor te skuif na die passasiersitplek.

Die man het die kampusterrein verlaat en na ‘n afgeleë parkeerterrein gery, waar hy haar hande vasgebind en haar in die kattebak van die motor ingeboender het.

Hy het toe na ‘n outomatiese tellermasjien gery.

“Sy sê sy het die PIN-kode aan hom gegee, want hy het gedreig om haar aan te rand indien sy dit nie doen nie,” het Mnguni gesê.

Die man het haar toe in Eldorado Park afgelaai, waar sy later gevind is.

Prof. Derek van der Merwe, UJ se visekanselier vir strategiese dienste, het gesê die universiteit het met die student gepraat.

“Ons het met haar gesels om soveel moontlik inligting te probeer kry en haar te ondersteun. Duidelik was hierdie ‘n traumatiese voorval en die universiteit sal berading aanbied vir haar én haar familie,” het hy gesê.

Van der Merwe het gesê die universiteit gee tans hul volle samewerking aan die polisie. – Sapa

VSA verskerp pogings om Egipte-krisis op te los

Internasionale diplomatieke pogings word verskerp om die politieke krisis in Egipte op te los.

Die Amerikaanse adjunkminister van Buitelandse Sake, William Burns het weer sy besoek aan Egipte verleng sodat hy verdere samesprekings met albei kante in die konflik kan hou.

Die Moslem Broederskap hou vol dat die afgesette president Mohamed Morsi weer aangestel word.

Nog twee Amerikaanse senators is na Egipte oppad. Een van die senators, die Republikein, Lindsey Graham sê die weermag moet vinniger die beheer aan die burgers oorgee en ‘n demokratiese verkiesing moet gehou word. – RSG

Zanu-PF-oorwinning: Wit en swart reaksies

Polisielede, toegerus met outomatiese gewere, het in Zimbabwe bykomende padblokkades in Harare opgerig en beman te midde van onsekerheid oor die opposisie MDC se aanklag dat die pasafgelope verkiesing ‘n klug is en dat Zanu-PF die verkiesing gesteel het.

Dié stap volg ook na ‘n oproep van geestelike leiers dat mense vir vrede moet bid na die oorweldigende oorwinning van president Robert Mugabe en Zanu PF in die land se nasionale verkiesing.

Verskeie kerke waaronder die Rooms Katolieke kerk het hulle lidmate gevra om selfbeheersing en geduld aan die dag te lê.

Die MDC-leier, Morgan Tsvangirai, het die uitslag van die verkiesing wat aan Zanu PF ‘n tweederde meerderheid in die parlement gegee het, verwerp en gesê hy sal dit betwis.

Mugabe het 62% van die stemme in die presidensiële verkiesing op hom verenig.

Die 61-jarige Tsvangirai, leier van die Beweging vir Demokratiese Verandering (MDC) het nou die derde keer onsuksesvol probeer om Mugabe te ontsetel.

Westerse magte, wat verbied is om volle waarnemerspanne in Zimbabwe te ontplooi, het hul ernstige bedenkinge oor die stemmery uitgespreek ná kommer oor ongerymdhede.

Sondag, het Duitsland gesê die verkiesing “gooi ‘n groot skaduwee oor die politieke en ekonomiese toekoms van Zimbabwe“, terwyl Australië om nuwe verkiesings gevra het.

“Gegewe ons twyfel oor die resultate, doen Australië ‘n beroep vir ‘n herverkiesing wat gebaseer is op ‘n geverifieerde en aanvaarbare kieserslys,” het die minister van buitelandse sake Bob Carr in ‘n verklaring gesê.

Die Amerikaanse minister van buitelandse John Kerry het Saterdag die verkiesing as “diep gebrekkig” beskryf en gesê Washington “glo nie dat die resultate … vandag ‘n geloofwaardige uitdrukking van die wil van die mense van Zimbabwe verteenwoordig nie“.

Die Britse minister van buitelandse sake William Hague het sy “ernstige kommer” oor die stemmery in die voormalige kolonie uitgespreek.

Die verkiesing is egter meestal met blydskap op die Afrika-kontinent begroet. President Jacob Zuma het sy gelukwensinge aan Mugabe Sondag oorgedra.

In Harare se oudste lokasie Mbare het honderde Mugabe-ondersteuners Sondag ‘n wit kis gedrapeer in ‘n MDC-vlag gedra, met die opskrif “RIP Morgan“.

“Mense is opgewonde,” het een van die optoggangers, Tatenda Savanhu, 26, ‘n ekonoom, gesê.

“Dit is regtig ‘n oomblik van vreugde dat die GNU [koalisie-regering] nou verby is dat ons‘n era van Zanu-PF binnegaan“.

Klag teen Mogoeng kom

Die Regterlike Dienskommissie (RDK) sal na verwagting vandeesweek ‘n amptelike klag ontvang waarin hoofregter Mogoeng Mogoeng se kop geëis word.

Dit is die jongste verwikkeling in die geskil rondom verandering aan die regbank en hoe die Regterlike Dienskommissie aanbevelings maak vir die aanstelling van regters.

Vrae is gevra oor die aanbevelings wat vroue regters betref asook ‘n ongunstige benadering teenoor wit mans.

Mogoeng het in sy toespraak getiteld “Die plig om te transformeer” by ‘n algemene jaarvergadering verlede maand van die Advocates for Transformation dit duidelik gemaak dat wit mans nie welkom is nie.

Die klag teen Mogoeng volg ná korrespondensie tussen homself en die direkteur van die Instituut vir Verantwoordbaarheid in Suider-Afrika, Paul Hoffman.

Hoffman het in ‘n brief aan Mogoeng gesê dit is ongrondwetlik om die loopbaan van enige persoon op grond van ras of geslag te benadeel.

Vroeër vanjaar het die RDK ‘n besprekingsdokument, geskryf deur advokaat Izak Smuts, verwerp waarin Smuts beweer die persepsie dat wit mans nie gunstig vir oorweeg word vir aanstellings nie, is besig om toe te neem.

Hy het bedank uit die kommissie ná hewige debatte.

Brandstigting ondersoek na 4 sterf

‘n Saak van brandstigting word deur die polisie ondersoek nadat ‘n brand in die Johannesburgse middestad die lewens van drie volwassenes en ‘n baba geëis het.

Die brand het in die Cape York-gebou uitgebreek, toe ‘n petrolbom in ‘n woonstel geslinger is, nadat ‘n stryery tussen ‘n man en vrou ontstaan het.

Niemand is nog in verband met die voorval in hegtenis geneem nie.

Die liggame van twee volwassenes en ‘n baba is in die puin van ‘n woonstelgebou gevind. Hulle is deur die rook oorval.

‘n Vierde persoon het by die gebou uitgespring om die vlammehel te ontsnap. Hy is op pad na die hospitaal toe dood.

Pretoriase reeksmoordenaar steeds op vrye voet

‘n Vermeende reeksmoordenaar en -verkragter is in Pretoria op vrye voet.

Die verdagte word reeds positief met vier moorde verbind. Altesaam 14 moorde in Sunnyside, Villeria en Mamelodi word ondersoek aangesien dieselfde metodes gebruik is.

Die polisiekommissaris, Riah Phiyega, het gister ‘n spesiale span speurders aangestel om die moordenaar te soek.

Die span sluit lede van verskillende eenhede in soos gesinsgeweld, kinderbeskerming, seksuele oortredings, misdaadintelligensie, DNS-ontleders en ‘n profielsamesteller. – RSG