Die Onafhanklike Verkiesingskommissie sê hy is gereed vir vandag se hoogs-betwiste tussenverkiesing in wyk nege van die Tlokwe munisipaliteit in Potchefstroom in Noordwes.
Die pos is vakant nadat ‘n raadslid bedank het om te fokus op sy werk as ‘n onderwyser.
Die polisie in Noordwes sê daar is genoeg beamptes ontplooi om orde in die provinsie te handhaaf.
Die tussenverkiesing word gesien as ‘n toets vir die ANC en die DA wat in ‘n voortslepende stryd gewikkel is oor die beheer van die stadsraad.
‘n Polisiewoordvoerder het ‘n beroep op die gemeenskap gedoen om vreedsaam te stem.
Sewe tussenverkiesigs word ook Woensdag in die Wes-Kaap gehou.
Drie van die tussenverkiesings vind plaas in die Oudtshoorn munisipaliteit in die Klein Karoo, waar die DA net een wyk moet wen om beheer van die munisipaliteit by die ANC oor te neem.
Wyk vyf, wyk ses en wyk dertien is vroeër deur die ANC bestuur. Die poste in dié wyke is vakant nadat die raadslede uit die party geskors is.
Tussenverkiesings word ook in George, die groter Plettenbergbaai gebied, Hermanus en Velddrif gehou. – RSG
Brandbestyders werk onverpoosd om ‘n groot brand by die Jomo Kenyatta lughawe in Kenia onder beheer te bring.
Die brand wat ongeveer vyfuur vanoggend in die vertreksaal uitgebreek en na die aankomsaal versprei het, het tot die sluiting van dié lughawe gelei wat een van die besigste vervoersentrums in Oos-Afrika is.
Die aksynsvrye-deel van die lughawe is in puin gelê, berig CNN.
Vlugte sal na Mombasa, Entebbe-lughawe in Uganda en Kigali-lughawe in Rwanda herlei word.
‘n Amptenaar van die ministerie van Binnelandse Sake en Nasionale Koördinering sê alles moontlik word gedoen om ‘n krisis af te weer.
Die oorsaak van die brand is nog nie bekend nie. Die brand volg minder as 48 uur sedert ‘n foutiewe brandstofpomp tot groot vertragings by die lughawe gelei het.
Die ANC het regeringslui wat hul poste weens vrae oor korrupsie en lojaliteit jeens pres. Zuma verloor het, is herontplooi.
Die voormalige ministers in die kabinet, Dina Pule en Tokyo Sexwale asook die voormalige premier van Limpopo, Cassel Mathale, dien nou op verskeie parlementêre komitees.
Mathale is voorheen betrek by ‘n korrupsieskandaal waarin Julius Malema tenders bekom het. Sy sakevennoot is aangekla van korrupsie, geldwassery en omkopery.
Die aankondiging is Dinsdag in die parlement gemaak. Pule en Sexwale wat albei as ministers afgedank is, bly lede van die parlement.
Sexwale dien as lid van die konstitusionele hersieningskomitee terwyl Pule Loretta Jacobus in die vervoerkomitee vervang.
Mathale word lid van die wetenskap en tegnologiekomitee.
Die voormalige hoofsweep van die ANC, Mathole Motshekga wat deur Stone Sizane vervang is, dien op die komitee vir justisie en konstitusionele ontwikkeling.
‘n Swart man isDinsdag in hegtenis geneemomdat hy na bewering‘n drie-jaar-oue dogtertjieinIpeleng, nabySchweizerReneke,inNoordwes, verkrag het, het die polisiegesê.
Die37-jarigeman, wat die kind se buurman is,het haar na‘n nabygeleëplakkershut ontvoer waar hyhaar verkrag hetMaandag,het kaptein PelonomiMakaugesê.
“Die polisie isna die toneel ontbiednadatdie gemeenskapna beweringdie verdagteaangerand het.Die verdagte isna die hospitaal geneemmetbeserings enis onder polisiebewaking,“ het Makaugesê.
‘n Man is in hegtenis geneem in verband met die verkragting van ‘n baba van vier maande en ‘n 7-jarige seun in Ceres, het die polisie in die Wes-Kaap gesê.
Lt.kol. André Traut het gesê ‘n 32-jarige man is in aanhouding en is Maandagaand in Ceres ondervra.
‘n Taakspan wat bestaan uit verskeie polisie-eenhede is in die lewe geroep om die verkragtings te ondersoek.
“Ons sal alles in ons vermoë doen om te verseker dat die skuldige boet.”
Lt.genl. Arno Lamoer, Wes-Kaapse polisiekommissaris, het Maandag gesê die baba het in die bed by haar ouers geslaap toe ‘n man haar gegryp en vroeg Saterdagoggend verkrag het.
Die seun was in die huis en is dieselfde tyd verkrag.
Lamoer het gesê die man het vermoedelik in die huis, wat op ‘n plaas in die Ceres-distrik geleë is, geslaap.
“Die baba is tans in die Rooikruis-kinderhospitaal, waar sy herkonstruktiewe snykunde ondergaan het en vir ‘n lang tyd sal bly,” het Lamoer op ‘n gedenkdiens van vermoorde polisiebeamptes in Kuilsrivier gesê.
“Soos julle kan sien, is daar ‘n siek samelewing daarbuite. Sommige mans kan nie verantwoordelikheid aanvaar nie en ons moet verseker dat die persone in hegtenis geneem word.
Traut het gesê die kinders is nie broer en suster, soos voorheen berig is nie. – Sapa
ʼn Student is geskiet en gewond buite die Universiteit van Johannesburg (UJ) se Doornfontein-kampus.
“Die universiteit kan bevestig dat ʼn 30-jarige student geskiet is tydens ʼn rooftog buite die gronde van die Doornfontein-kampus,” het Herman Esterhuizen, woordvoerder van die universiteit, gesê.
“Die student is in ʼn stabiele toestand in die hospitaal.”
Esterhuizen het gesê die voorval het omstreeks 20:30 Dinsdagaand plaasgevind.
Die student het glo iets gaan koop om te eet en is deur twee mans gekonfronteer op pad terug na die kampus.
Die polisie kon nie onmiddellik vir kommentaar bereik word nie.
Esterhuizen sê die voorval het nie op dieselfde kampus plaasgevind as verlede week se kaping nie.
ʼn 23-jarige student is verlede week gekaap en ontvoer terwyl sy haar motor parkeer het op die universiteit se Kingsway-kampus.
Die student is in haar motor se kattebak geprop waarna die man na ʼn OTM gery het.
Hy het haar gedwing om haar bankkaart se pin vir hom te gee voor hy haar in Eldorado Park afgelaai het waar sy later gevind is.
Die Agtienjarige man wat in hegtenis geneem is in verband met die voorval, was glo in besit van die motor betrap. – Sapa
‘n Woordvoerder van die Suid-Afrikaanse Lugdiens, Tlali Tlali sê hulle stel ondersoek in na ‘n vals kapingskennisgewing wat gistermiddag paniek veroorsaak het op ‘n vlug wat in Port Elizabeth geland het.
Volgens Tlali is die vals kennisgewing geaktivieer vir die vlug SA 417 wat in Johannesburg opgestyg het.
Nooddienste en bykomende veiligheidspersoneel is na die lughawe in Port Elizabeth gestuur om die vlug in te wag.
Tlali sê die vliegtuig en al die passasiers is deursoek, en is veilig verklaar. Hy sê hulle wil graag uitvind waar die kapingskennisgewing vandaan gekom het.- RSG
Die ANC Jeugliga in die Wes-Kaap het hom gedistansieer van die jongste voorval waar menslike ontlasting gestort is.
Vier mans het Maandag menslike ontlasting op die trappe van die provinsiale wetgewer gegooi. Die jeugliga ontken berigte dat die mans lede van die jeugliga is.
Volgens die polisie is niemand nog in verband met die voorval in hegtenis geneem nie.
Daar was die afgelope paar maande ‘n aantal soortgelyke voorvalle in Kaapstad, insluitend by die Kaapstadse internasionale lughawe.
Die betogers sê daar is ‘n tekort aan sanitasie in hulle woonbuurte, en hulle beweer dat die draagbare spoeltoilette wat die munisipaliteit verskaf niks beter is as die emmerstelsel nie.
Die VF Plus dreig met aksie teen die munisipale afbakeningsraad oor die wyse waarop die instansie sy kennisgewings tot openbare verhore en prosesse hanteer met die oog op die herafbakening van onder meer die Sedibeng distriksmunisipaliteit in die Vaaldriehoek en die van die Wesrandse distriksmunisipaliteit in Gauteng en ander sentra in die land.
Die VF Plus het reeds op 17 April 2013 by die afbakeningsraad appèl aangeteken nadat openbare verhore tussen 7 en 11 April 2013 gehou is binne die twee munisipale gebiede en verskeie ander sentra in Suid-Afrika. Die voorsitter van die munisipale afbakeningsraad mnr LJ Malhango, het die kennisgewing tot openbare verhore eers op 3 April 2013 onderteken – minder as 6 dae voordat die openbare verhore sou plaasvind en die publieke kennisgewings in nuusblaaie is so laat as op Sondag 7 April 2013 gepubliseer.
Die appèl is geskoei op die gees van die Suid Afrikaanse grondwet soos vervat in artikel 33 wat in geen onduidelike terme die reg op billike administratiewe aksie reël in paragraaf 1, 2 en 3 en die Wet op die bevordering van Billike Administrasie “PAJA” , wet 3 van 2000.
Nadat die regsafdeling van die afbakeningsraad ontvangs van die appèl erken het en onderneem het om daarop te reageer, het hulle tot dusver enige verdere navrae daaroor geïgnoreer.
Inwoners en belastingbetalers het geen billike kans gehad om ‘n opinie te vorm oor die omvang en nagevolge van die beoogde samevoegings nie. Die ANC het wel busse vol van hul eie ondersteuners na die geleenthede aangery.
Die herafbakenings kom neer op ‘n herverdeling van belastinginkomste, sonder om effektiewe bestuur van die plaaslike owerhede aan te spreek. Die afbakeningsraad het verder geen terugvoer gegee aan rolspelers wat tydens die openbare verhore insette gelewer het en vrae gevra het nie.
Die werkswyse van die munisipale afbakeningsraad kom verdag voor en laat dit lyk soos ‘n frontorganisasie van die ANC.
Oor sy beleid om die gebruik van Afrikatale in skole te stimuleer, het die minister van basiese onderwys, Angie Motshekga, gister gesê dat die departement ‘n loodsprojek ondersteun wat aanstaande jaar in 10 skole per distrik ingestel sal word.
“Afrikaans kwalifiseer, gelukkig of ongelukkig, daarvoor. Dis ‘n inheemse taal en daarom pas dit volmaak by die definisie. Selfs die Afrikaanse taal- en kultuurgroepe het gedink dat ons Afrikaans gaan uitlaat.
“Dit pas volmaak by die definisie. Ons het nie teen Afrikaans gediskrimineer nie. Dit sal as een van die tale beskou word waarin ons sê skole behoort as deel van die Afrikatale te onderrig,” het sy gesê.
Dié opmerkings is gemaak tydens ‘n inligtingsessie oor verwikkelinge in die opvoedingsektor, veral wat die kurrikulum betref.
Motshekga het gesê haar departement beskik oor ‘n strategie om die gebruik van Afrikatale in skole te verhoog, asook om onderrig in Engels as ‘n eerste addisionele taal te verskerp.
Twee studies en die matriekuitslae het die negatiewe invloed van swak Engelse taalvermoë op die prestasie van leerlinge beklemtoon, asook die behoefte om die gehalte van Engelse onderrig en leer te verbeter.
“Gevolglik is daar vanaf 2012 begin om alle kinders wat van plan is om deur medium van Engels te leer, reeds in dié taal van graad een af te onderrig.
“Die departement kyk daarna om die gehalte van Engelse onderrig te verbeter, in samewerking met die British Council,” het sy gesê.
Alle Suid-Afrikaanse leerlinge behoort ook van die nodige meubels in skole voorsien te word, het Motshekga voortgegaan.
By die raad van onderwysministers het ons gesê die provinsies behoort daarna te streef om ‘n stoel en ‘n tafel vir elke kind te hê,” het sy in Pretoria gesê.
Die provinsiale onderwysdepartemente is opdrag gegee om hul meubelbehoeftes aan die nasionale owerheid teen 16 Augustus voor te lê.
Sy het gesê die raad van onderwysministers het ‘n nuwe kurrikulum vir vroeëkinderontwikkeling aangeneem, wat aan die doelwitte van die nasionale ontwikkelingsplan voldoen.
Die raad van onderwysministers het ook skole se gereedheid bespreek. Ons beskou normaalweg skole se gereedheid (vir die volgende jaar) in die vierde kwartaal, maar dié keer het ons dit in die derde kwartaal gedoen,” het sy gesê.
“As departement het ons ons daartoe verbind om die aard van ondersteuning wat provinsiale onderwysdepartemente nodig het, nou te volg.” – Sapa en praag
‘n Polisievrou wat daarvan beskuldig word dat sy twee buisies maskara in ‘n winkel gesteel het, is op borgtog van R500 deur die Potchefstroomse Landdroshof vrygelaat, het die Noordwes-polisie gister gesê.
Luit.kol. Kenaleone Aggy Motloung, van die misdaadintelligensie-eenheid, het Maandag in die hof verskyn, het Brigadier Thulani Ngubane gesê.
Volgens Ngubane is sy Vrydag by die Clicks in die Mooirivier Mall in hegtenis geneem.
Die polisiekommissaris van Noordwes, luit.genl. Zukiswa Mbombo het gesê Motloung staar ook ‘n interne tugverhoor in die gesig.
Ngubane het gesê Motloung sal weer op 22 Augustus in die hof verskyn.
Vroeër het sersant Kelebogile Moiloa gesê dat die polisievrou van diens af was op die tydstip toe sy in hegtenis geneem is. – Sapa
Bees Roux sal binnekort as slot vir die Goue Leeus uitdraf, terwyl die familie van die swart metropolisieman van Pretoria, Johannes Nshimane Mogale, hom “onvoorwaardelik vergewe het”.
In 2010 het die rugbyspeler die 38-jarige sersant op straat in Hatfield doodgeslaan en die jaar daarop in 2011 ‘n opgeskorte vonnis van 5 jaar tronkstraf ontvang. Van die voorwaardes van sy pleitooreenkoms was dat hy R750 000 se vergoeding aan Mogale se gesin betaal.
Die breier van die Leeus, Johann Ackermann, het Maandag bevestig dat Roux (31) heel moontlik as slot gekies vir dié span gekies sal word tydens die komende Curriebekerseisoen. Volgens Manie Booysen, die uitvoerende hoof van die Goue-Leeus-rugbyunie (GLRU), is daar “tegnies gesproke hoegenaamd geen beletsel om Bees te kies nie. Dit sal jammer wees as mense sy betrokkenheid nou verkeerdelik wil beoordeel. Die ou het mos berou gehad.”
Die unie het Roux self genader omdat hy tans probleme ondervind om sy slotposisies te vul. Roux sal tydens die Curriebekerreeks per wedstryd betaal word en het reeds gister saam met die res van die span in Johannesburg geoefen.
“Ons kies hom ter wille van rugby en om geen ander rede nie. Hy is ‘n slot wat beskibaar is noudat hy van oorsee af teruggekeer het,” meen die afrigter, Johann Ackermann. Ons is in ‘n penarie aangesien daar geen ander spelers met ons ‘n kontrak geteken het nie, dus wil ons hom graag in die span intrek en kyk hoe dit gaan.”
Die briewe waarin die Mogale-gesin hul vergiffenis aan Bees Roux uitspreek, het dit vir die unie makliker gemaak om na Roux as speler te kyk.
“Ons het twee briewe wat uit 2011 en 2013 dateer, waarin die ouers en die gesin persoonlik hul seën daaroor uitspreek dat hy rugby speel en waarin hulle hom selfs vir Suid-Afrika wil sien speel,” het Ackermann gesê.
“Dit het ons ‘n taamlik positiewe uitkyk gegee aangesien hulle (die familie) gewillig is om hom te vergewe en hom ‘n tweede kans in die lewe te bied.”
‘n Maand nadat hy op die aanklag skuldig gepleit het, het die Bloubulle-rugbyunie Roux weens kontrakbreuk afgedank en hy het later ‘n kontrak met die Franse klub, die Bordeaux-arende, opgeneem.
In 2012 het hy by die Italiaanse span Treviso aangesluit, vir wie hy tot aan die einde van vanjaar se Europese seisoen gespeel het, terwyl hy ook in die Suid-Afrikaanse Barbare-span in hul wedstryd teen Saracens in Mei uitgedraf het.
Pas nadat hulle ‘n plek in die 2014-Super-Rugby-toernooi deur ‘n punteverskil met die Suidelike Konings in hul promosie-relegasiewedstryde behaal het, bevind die Leeus hul in ‘n krisis wat die slotposisie betref.
Kaptein JC Janse van Rensburg, wat die hoofanker in die voorry vir die Leeus was, het die span verlaat om vir Bayonne in Frankryk te gaan speel, terwyl Julian Redelinghuys oor die naweek ‘n langtermynbesering opgedoen het.
“Ons kyk daarna om nog ‘n slot van iewers af te leen aangesien ons tans net drie fikse slotte in Ruan Dreyer, Jacques van Rooyen and CJ van der Linde het,” het Ackermann gesê.
James Adams, Roux se agent, het gister gesê geen kontrak is gefinaliseer nie en hy onderhandel ook met ’n ander unie wat in Roux se dienste belangstel.
Adams het toegegee plaaslike unies is versigtig om ’n kontrak met Roux te sluit.
Die Suid-Afrikaanse Rugbyunie (Saru) meen die GLRU oortree geen regulasies met Roux se toevoeging tot hul oefengroep nie.
“Daar is niks wetliks of grondwetliks wat spanne daarvan weerhou om spelers met ’n misdaadgeskiedenis te kies as hulle wil nie,” was Saru se kommentaar.
Roux was nie giste vir kommentaar beskikbaar nie. – praag en Sapa
“Krotbuurte in rykmanswoongebiede. Met die gepaardgaande negatiewe impak op ontwikkeling en Suid-Afrika se ekonomie. Dit is die onafwendbare gevolge van die nuwe Wet op Ruimtelike Beplanning en Grondgebruikbestuur wat gister deur pres. Jacob Zuma bekragtig is,” sê adv. Anton Alberts, die Vryheidsfront Plus se parlementêre woordvoerder oor ekonomie.
Adv. Alberts sê die vereistes van die wet is ‘totaal belaglik en onrealisties’ en het die totale integrasie van alle gemeenskappe in die land ten doel.
Dit kan eiendomsontwikkeling en die eiendomsmark eiendomsontwikkeling in Suid-Afrika ernstig benadeel aangesien dit onder meer die las op ontwikkelaars plaas om op eie koste goedkoop projekte in eksklusiewe areas te ontwikkel wat daartoe sal lei dat markpryse totaal onstabiel kan raak.
Die wet bepaal onder meer dat:
· Wanneer ‘n persoon grond vir behuisingsbehoeftes ontwikkel, moet daar ook voorsiening gemaak word die ontwikkeling van behuising vir mense vanoor die totale sosiaal-ekonomiese spektrum van Suid-Afrika. Dit kan gedoen word deur grond vir so ’n doel te soneer en opsy te sit, of om by te dra tot ‘n fonds wat vir grondloses aangewend sal word; en
· ‘n Persoon wie se grond minder werd gaan wees weens ‘n beoogde ontwikkeling, sal nie besluite in terme van die wet kan aanveg nie.
“Ontwikkelaars word hierdeur gedwing om in ‘n gesogte en eksklusiewe woongebied ook laekoste-projekte aan te pak. In ‘n gegoede woongebied sal daar dus ook goedkoop ontwikkelings kom wat mettertyd tot iets soos krotbuurte kan verval.
“Dit sal op die ontwikkelaar se eie koste gedoen moet word, wat sal beteken dat mense hul geld eerder in ander ondernemings sal belê, of oorsee sal neem, wat ‘n baie groot impak op die land se ekonomie kan hê.
“Nog ‘n logiese uitvloeisel is dat dit die totale eiendomsmark in Suid-Afrika ‘n ernstige knou kan kry aangesien pryse in ‘n sekere omgewing skerp kan daal indien ‘n laekoste-ontwikkeling daar sou ontstaan,” sê adv. Alberts.
Hy sê die wet is deel van die ANC se kwalik bedekte sosialistiese program van herverspreiding.
“Hierdie is deel van die groter transformasie-projek van die ANC en dit is die rede waarom die VF Plus oorlog verklaar het teen transformasie en sy veldtog in hierdie opsig in die afsienbare toekoms gaan verskerp,” sê adv. Alberts.
