wapens – praag.co.za

Gustav Venter: Laat ons net nie hopeloos wees nie

Daar is ŉ nuwe Grootman in Twitteranië, sy naam is Donald Trump, en ons mense wil iets van hom hê. “Meneer Trump,” soos ŉ verteenwoordigende twiet dit uitdruk, “wat gaan u oor die blanke uitwissing in Suid-Afrika doen?”

Ek wil my nou nie aanmatig om namens die verkose president van die VSA te praat nie, maar ek kan met groot sekerheid sê wat hy daaromtrent gaan doen: Nie veel nie. Sy eerste, allesoorheersende prioriteit is om Amerika te beveilig en reg te ruk. Dis ŉ groot land met baie wat reggeruk moet word en ons wens hom sterkte toe daarmee. Suid-Afrika is ŉ dowwe inskrywing baie laag op daardie prioriteitslys.

Selfs al sou hy aangegryp wees deur die pleidooie uit Suid-Afrika, wat staan hom te doen? Gaan hy die ANC-regering skerp betig? En dan wat? Gaan hulle lipbewend om verskoning vra? En dan wat? Gaan die rampokkers en monsters in hierdie land tot inkeer kom en ophou plase aanval? As jy dit glo, stuur asseblief vir Haas Das en Loeloeraai groete as jy hulle weer sien. Dit sal binnekort wees.

So, indien nie die hoofman van Trump Tower nie, wie moet omsien dat daar minder blankes vermoor word? Wel, die enigste mense wat iets daaromtrent kán doen: ek en jy. Hoe?

Kom ons begin by die mees elementêre, primitiefste, mees voor-die-hand-liggende stap: Selfbeskerming. Kry vir jou ŉ persoonlike vuurwapen, oefen om dit te gebruik en dra dit aan jou. Meneer, as jy nie ten minste ŉ 9-millimeter pistool of ŉ .357 Magnum-rewolwer pal in jou onmiddellike omgewing het nie, is jou vrou met ŉ dwaas getroud.

Ek dra ŉ knoorse pistool aan my. Soms kom mense dit agter en is snedig daaroor. Nou maar goed dan. Ek kan snedigheid verwerk; sal dit nie kan doen as my lamsakkigheid of fyngevoeligheid enige skade aan my vrou veroorsaak het nie.

As jy en ek en dan almal van ons bewapen is, kan ons stelselmatig werk aan ŉ vuurwapenkultuur. Ons moet begin om die wapenloses onder ons in die openbaar te betig. Wys hulle en verguis hulle. Glo my, as die rampokkers van hierdie land eers verstaan dat ŉ aanslag op ŉ blanke persoon ŉ kortpad na ŉ ontmoeting met ŉ koeël is, sal hulle nie meer so entoesiasties oor hulle afgryslike bedryf wees nie.

Dit help ook nie dat net die man van die huis ŉ yster het nie. ŉ Vuurwapen vir vroutjie is belangriker as ŉ skottelgoedwasser. Te duur? ŉ Skaflike pistool is goedkoper as die gemiddelde televisiestel — en minder skadelik. Kry vir jou vrou ŉ kortroer en leer haar om te skiet. Sy sal jou hoogag daarvoor. (Vrouens leer boonop vinniger om te skiet as mans.)

Jou verantwoordelikheid eindig nie daar nie. Daar is buurtwagte om by aan te sluit, plaaspatrollies om te ry, netwerke om op te rig, sosiale mediaveldtogte om te bedryf, verhore van aangekeerde aanvallers om by te betoog, selfoonnoodknoppies om te aktiveer, huisbeveiligingsplanne om uit te werk…

Jy het nie die reg om te tjank vir internasionale ingryping as jy nie hierdie dinge doen nie. Hoekom moet iemand anders vir jou verrig wat jy self kan vermag maar weier om te doen?

Ek verfoei die geneul van Afrikaners op internasionale forums. Ek gee jou my woord, hulle sal eerder bereid wees om te help as hulle sien ons is bereid om self ons probleme op te los.

Al die haat van Jacob, Julius, hulle geesgenote en al die naywer en aggressie van die plaasaanvallerskorps laat my nie vir ŉ sekonde twyfel aan die toekoms van ons volk nie. Wat my egter onrustig stem, is wanneer ons mense lamsakkig word.

Hulpeloosheid is nie ons krisis nie. Hopeloosheid is.

Aanvaller in Duitse fliekteater doodgeskiet

‘n Gemaskerde aanvaller is deur die Duitse polisie doodgeskiet nadat hy in ‘n rolprentteaterkompleks in die dorp Viernheim naby Frankfurt op mense losgebrand het.

Die gewapende man het ‘n springstofgordel en handgranaat langs hom gehad. Hy het “gebroke Duits” gepraat. Die owerhede het ‘n nuusstilte oor die besonderhede van die skieter aangekondig.

Talle mense is gewond terwyl ‘n elite reaksie-eenheid Spezialeinsatzkommando (SEK) na die toneel gehaas het. Die hospitaal in Darmstad het ‘n noodtoestand afgekondig.

Volgens die Duitse media het die aanvaller fliekgangers gyselaar gehou en die polisie moes geweld gebruik om in die gebou in te breek. Hy is glo na ‘n geveg met wetstoepassers doodgeskiet.

Ooggetuies sê tussen 50 en ‘n 100 beamptes het op die kompleks toegesak.

Die minister van binnelandse sake van die deelstaat Hessen, Peter Beuth, sê die Duitse polisie se spesiale reaksie-eenheid het die gebied rondom die teaterkompleks kort ná die begin van die voorval afgesper.

‘n Polisiewoordvoerder Bernd Hochstädter het gesê die polisie se operasie het ongeveer drie ure geduur.

Christiane Kobus, ‘n Duitse polisiewoordvoerder, het bevestig dat ‘n “bedreigingsituasie” ontvou het maar geen verdere besonderhede is gegee nie.

Plaaslike mediaverslae sê ‘n gewapende man ten minste een skoot afgevuur, maar volgens die Guardian is vier skote gehoor.

Aanvanklik was daar berigte in die media dat tot 50 mense beseer is tydens die aanval, moontlik weens traangas.

Volgens die nuusagentskap dpa, het die polisie gesê dit is die “individu is deurmekaar”.

Hochstädter het aan die koerant Die Welt gesê: “Ons het geen aanduidings wat die motief kon gewees het nie.”

Duitsland het een van die hoogste hoeveelheid wapens per kop in die wêreld, maar ook een van die laagste geweldsmisdaadkoerse in Europa: ‘n Sterftesyfer van 0,05 per 1000 mense, in vergelyking met 3,34 in die VSA.

Die terreurgroep ISIS het reeds herhaaldelik gewaarsku dat hulle aanvalle in Duitsland beplan.

ANC dien klag van hoogverraad in teen Malema

Die ANC het ‘n klag van hoogverraad teen die EFF-leier, Julius Malema, ingedien nadat hy aan Al Jazeera gesê het dat sy party “hierdie regering deur die loop van ‘n geweer sal verwyder”.

Die ANC se woordvoerder, Zizi Kodwa, het Maandagaand gesê Julius se dreigemente om ‘n wettige, demokraties verkose leier op ‘n onwettige manier te verwyder, kom neer op hoogverraad.

Die polisie is versoek om ‘n klag van hoogverraad teen Malema persoonlik te ondersoek.

Malema het aan Jonah Hull gesê die EFF se geduld gaan binnekort opraak “en ons sal hierdie regering deur die loop van ‘n geweer verwyder”.

Hull het hom gevra of hy dit letterlik bedoel waarop Malema sy plan om die regering met geweld omver te werp, herhaal het.

“Ja, ek bedoel dit letterlik. Ons is nie bang nie. Ons gaan nie ‘n regering duld wat ons nie respekteer nie,” het Malema gesê.

Die EFF se sekretaris-generaal, Godrich Gardee, het Maandagaand gesê die ANC het self wapens opgeneem teen die apartheidsregering toe sy mense vermoor is.

Die EFF se stryd om geweld te gebruik is nie anders nie, het Gardee gesê.

“Toe die Apartheidsregering besig was om ons mense voor 1994 dood te maak, hoe het die ANC gereageer? Hulle het wapens opgeneem. So hoekom moet ons nie wapens teen die ANC opneem as die party besig is om ons mense te vermoor soos wat hulle ons mense by Marikana vermoor het nie. Dit kan nie wees nie,” het Gardee verklaar.

Noord-Korea se bedrywighede in Namibië raak SAOG

Veiligheidsraad-resolusies is deur Namibië verbreek deur toe te laat dat Noord-Korea “wapenfabrieke of ander militêre geriewe” oprig.

Dit is strydig met die kernsperverdrag wat die land as VN-lid onderteken het en raak die hele SAOG-streek.

Die Noord-Koreaanse staatsmaatskappy Mansudae Overseas Projects Group of Companies (MOP) het glo bande met Korea Mining Development Trade Corporation (KOMID) waarteen daar internasionale VN-sanksies van krag is.

‘n Ondersoekverslag is op 25 Februarie deur ‘n taakspan wat Noord-Korea se kernwapenprogram monitor, aan die Veiligheidsraad van die VN voorgelê.

Volgens die taakspan-aanbaveling “is Mansudae Overseas Projects verbind aan KOMID, Noord-Korea se primêre wapenhandelaar en hoofuitvoerder van goedere en toerusting wat verband hou met ballistiese missiele en konvensionele wapens”.

Luidens die verslag beweer die “Namibiese owerhede dat hulle nie bewus is van die bande tussen die twee entiteite nie”, maar voeg by dat Noord-Koreaanse arbeiders “so onlangs as Augustus 2015 konstruksiebedrywighede by ’n ander militêre basis in Suiderhof onderneem het”.

Namibië het nog nie op die aanklag gereageer nie. Die Republikein het die bewerings ondersoek.

Die reusegebou wat tans neffens die weermagbasis in dié Windhoekse woonbuurt gebou word, is volgens inligting die nuwe hoofkwartier van die Namibiese weermag.
Satellietbeelde van die militêre basisse by Luiperdsvallei en Oamites suid van Windhoek wat so onlangs as vroeg verlede maand deur Google Earth opgelaai is, wys reuse-aanlegte waarvan die bouwerk volgens inligting deur Noord-Korea gedoen is.
Republikein se ondersoekspan het in antwoord op ’n vraag oor dié aanlegte, die volgende antwoord van ’n ingeligte bron ontvang: “Die een fasilitieit is ’n ammunisieopslagplek met ’n reeks van aanwendings – vanaf pistole (handwapens), tot gewere, artillerie, vliegtuie en ander wapentuig. Die ander fasiliteit is ‘buite perke’. Daar is glo ’n wyer SADOG-konteks.”

Wit Namibiër eerste om van terreur aangekla te word

Johannes (Johan) Martinus Mostert van die plaas Swartmodder in die Otjiwarongo-distrik is die eerste mens in die geskiedenis van Namibië wat ingevolge die Wet op die Voorkoming en Bestryding van Terroriste- en Proliferasie-aktiwiteite (Wet No.4 van 2014) aangekla is.

Mostert het Donderdag in die landdroshof op Otjiwarongo verskyn en is ingevolge artikel 17 (1a en 1b) van dié wet aangekla.

“Hy is die eerste mense ooit in die geskiedenis wat op dié klag teregstaan,” het staatsaanklaer, Lewis Chigunwe gesê.

Artikel 17 verwys na ’n oortreding wat verband hou met wapens en ’n oortreder wat hieraan skuldig bevind word, kan lewenslange gevangenisstraf in die oë staar.

Kortom verwys artikel 17 (1) na enige persoon, in of buite Namibië, met die bedoeling om enige omgewingskade, ekonomiese of sosiale terreur teweeg te bring, of enige regering, liggaam of instelling te intimideer of te dwing om politieke, godsdienstige of ideologiese standpunte te aanvaar of te verwerp deur ’n wapen te gebruik, of dreig om te gebruik, met die opset om mense dood te maak, te beseer of te infekteer, insluitende ’n stelsel wat ontwerp, aangepas of van voorneme is om so ’n wapen te lewer.

Dit is teen die wet om so ’n wapen teen ’n Namibiese burger of ’n regmatige inwoner van Namibië te gebruik, ongeag of die persoon in of buite Namibië bly.

Mostert verskyn op hierdie klag asook vyf ander: Die besit van ammunisie sonder ’n permit, die besit van vuurwapens sonder ’n permit, die besit van handgranate sonder ’n permit, die oortreding van die Wet op Plofstof en die besit van plofstof vir private gebruik sonder ’n permit.

Volgens die polisie het Mostert semi-outomatiese aanvalsgewere, jaggewere, handgranate en sowat 10 000 patrone in sy besit gehad asook verskeie uniforms van PLAN, Unita, die MPLA, Koevoet, SWATF, die Namibiese polisie en weermag.

Die beskuldigde bly in aanhouding tot sy volgende verskyning op 29 Maart.

Bron: Republikein

Al-Kaïda gebruik Trump vir werwing

Al-Kaïda se Oos-Afrika-filiaal het ‘n werwingsvideo uitgereik wat swart Amerikaners en Moslems teiken en ‘n videogreep van die presidentskandidaat Donald Trump insluit waar hy sê Moslems moet verbied word om Amerika binne te gaan.

Die 51-minute lange video deur die Somaliese al-Sjabaab militante groep stel Amerika voor as ‘n land met geïnstitusionaliseerde rassise teen swartmense wat ook Moslems vervolg.

In die video word vertel van verskeie Amerikaners van Minnesota wat by al-Sjabaab aangesluit het en nou in Somalië veg, het AP berig.

Al-Sjabaab veg teen die internasionaal erkende Somali-regering. Die groep is in 2011 met die hulp van troepe van die Afrika-unie uit Mogadishu verdryf.

Die militante het desondanks verskeie guerrilla-aanvalle in Somalië en lande wat soldate vir die AU-mag bygedra het, soos Kenia, Djibouti en Uganda, uitgevoer.

Trump se advertensieveldtog sal Maandag afskop. Die Republikeinse presidensiële kandidaat se langverwagte eerste advertensie is deel van ‘n reeks wat uitgesaai sal word in die laaste maand voor die Iowa-koukusse.

Trump het belowe om ten minste $2 miljoen per week op die advertensies te bestee.

Die video verwys na die VSA se “suidelike grens” met Meksiko, maar beelde wat gebruik word vir die swart toestroming is van die klein Spaanse enklawe op die vasteland van Marokko.

Migrante probeer die grens van Melilla oorsteek, een van die twee enklawes aan die Marokkaanse kus wat deel is van Spanje.

Sodoende kan hulle die Europese Unie bereik, selfs al is hulle nog steeds op die Afrika-kontinent.

Trump het die Demokratiese kandidaat Hillary Clinton uitgedaag om sonder gewapende lyfwagte te reis om te bewys dat gewere onveilig is.

“Hillary het gesê dat gewere jou nie veilig hou nie. As sy werklik dit glo, moet sy eis dat haar swaar gewapende lyfwagte vinnig ontwapen word!” het Trump Sondag in ‘n twiet gesê.

As ‘n voormalige eerste dame en nou as ‘n presidensiële kandidaat, beskik Clinton oor die beskerming van gewapende veiligheidsagente.

Sy het ook ‘n lang rekord van wapenbeheer, en het in Oktober gesê sy sal as verkose president geweerverkope ten seerste bekamp, met beperkings op mense wat as ideologies gevaarlik beskou word.

President Barack Obama sal hierdie week na verwagting uitvoerende maatreëls uitreik om meer beperkings op wapenverkope te plaas.

Trump het gesê as verkose president sal hy onmiddellik enige sodanige uitvoerende aksie veto.

Wapenverkope in die VSA het intussen die hoogte ingeskiet.

Switserse weermaghoof waarsku teen chaos

Samelewings in Wes-Europa is op die rand van chaotiese geweld wat veroorsaak word deur die ekonomiese ontwrigting, massa-immigrasie en terrorisme.

Dit is nie die siening van ‘n randeier nie, maar van die hoof van die Switserse weermag.

Lt.genl André Blattmann het ‘n waarskuwing aan die Switsers gerig dat hulle vasteland gevaarlik naby aan ineenstorting is en diegene wat nie reeds wapens besit nie, aangeraai om hulself te bewapen.

Blattmann is die hoof van die gewapende magte en is sedert 1 Maart 2009 al in sy pos. Sy woorde dra gewig in ‘n land waar ‘n hele paar burgerreferendums teen boerkas en moskees gestem het.

Kommer in Switserland neem toe oor immigrasie en Islamisering.

In die laaste twee Wêreldoorloë, het die Switserse kombinasie van berge en ‘n gewapende burgery vir vrede en neutraliteit gesorg, maar in die komende konflik, het Switserland reeds sy eie vyfde kolom.

Volgens Blattman “styg die bedreiging van terreur, hibriede oorloë woed oral in die wêreld; die ekonomiese vooruitsigte is donker en die gevolglike migrasie vloei van ontheemdes en vlugtelinge het onvoorsiene afmetings aangeneem”.

“Sosiale onrus kan nie uitgesluit word nie,” sê hy. Blattman meen ook dat die woordeskat in die openbare diskoers “gevaarlik aggressief” geraak het.

‘n Soortgelyke waarskuwing is dié van Admiraal Chris Parry in 2006, toe hy gesê het dat die kombinasie van immigrasie en Islam sal lei tot ‘n “beskawingskrisis op ‘n gelyke voet met die val van die Romeinse Ryk”.

Parry is deur vyandige joernaliste as die destydse hoof van die Britse gewapende magte, verguis.

Wapeneienaars moet lisensies vroegtydig hernu

Wapeneienaars word daaraan herinner dat hulle hul vuurwapenlisensies vroegtydig moet hernu.

Die vergunning om laat aansoekers te akkomodeer, is pas deur die polisie se hoofkantoor ingekort en daar gaan glo streng teen opgetree word teen diegene wat nie betyds hul aansoeke indien nie.

Dit is volgens die polisie se Ethel Linström, en volg na sekere wysigings aan die Vuurwapenbeheerwet.

Die meeste vuurwapenlisensies is tien jaar geldig. Lisensies, permitte of sertifikate vir vuurwapens wat sedert 2004 uitgereik is, sal in aanmerking kom vir hernuwing, aangesien handwapens vir selfverdediging net vir vyf jaar geldig is.

Ingevolge artikel 24 van die Wet moet wapeneienaars voortaan ten minste 90 dae voor hul lisensie verval, dit laat hernu.

Indien hulle nie binne dié tyd aansoek gedoen het nie, het wapeneienaars volgens Linström verskillende opsies.

Die wapens kan ingehandig word by die polisie, of by wapenhandelaars op nuwe kode gelys word terwyl die aansoek gedoen word, het Linström gesê.

Nog ‘n moontlikheid is dat ‘n uwe aansoek deur ‘n nuwe eienaar gedoen word nadat die wapen aan ‘n nuwe eienaar geskenk word.

Wapeneienaars wat hul lisensies tot dusver laat hernu het, is oor die hoof gesien en kon die afgelope vyf jaar hul lisensies hernu ondanks die verbod op laat hernuwings.

Polisie ontplooi by Mangaung-skole

‘n Sterk polisieteenwoordigheid heers by swart skole in Mangaung waar sogenaamde bendes klasse ontwrig het, het RSG berig.

Die twee bendes is glo die Ma-Roma en die BTK (Born to Kill).

Talle leerders van die Petunia Sekondêre Skool is vanoggend deur hul ouers skool toe vergesel.

Die situasie by Sehunelo hoërskool is tans kalm.

Die meeste leerders wat vandag eksamen skryf, sê hulle is bang om skool by te woon. Die polisie het vyf messe, ‘n gholfstok, ‘n pik en pik-handvatsel van leerders by albei skole gekonfiskeer.

‘n Woordvoerder van die onderwysdepartement, Howard Ndaba, sê skole en hul veiligheidskomitees werk tans saam met die polisie aan ‘n veiligheidsplan.

Ná verlede week se geweld weens beweerde bendebedrywighede wat tot die dood van ‘n sjebien-eienaar en die ernstige aanranding van ‘n lid van die gemeenskap gelei het, heers vrae oor moontlike etniese konflik.

Heidedal-skole was in rep en roer toe die bende, wat hulself die Ma-Roma noem, ouers op hol gehad het. Ouers het daarna by skole aangedoen om hul kinders huis toe te neem.

Lede van die gemeenskap het ‘n jongman erg aangerand nadat hy verkeerdelik vir ‘n bendelid aangesien is.

Die tien mans wat die naweek in hegtenis geneem is vir die moord op die eienaar van die sjebien sou Maandag weer in die hof verskyn vir ‘n borgtogaansoek.

Polisiewoordvoerder, Billy Jones, het vroeër gesê die groep het vermoedelik die oorledene se seun gesoek en toe hulle nie die seun kon kry nie het hulle sy pa geteiken.

Jones sê die man se naam gaan nie bekend gemaak word nie op versoek van sy familie.

Twee ander mans het ook vanoggend in dieselfde hof verskyn vir aanranding met die doel om ernstig te beseer.

Hulle het glo die jong man vir ‘n bendelid aangesien en hom ernstig aangerand tydens oproerigheid verlede Woensdag, toe bendelede amok in Heidedal gemaak het.

Bendes het skole in die Heidedal en Batho-gebiede geteiken.

Intussen het die polisie ook drie mense in hegtenis geneem wat glo deel is van die berugte Maroma-bende. Die drie verdagtes is tussen 21 en 25 jaar oud.

Hulle was onderweg na die St. Bernard Hoërskool in Bloemfontein om na hulle vriende te gaan soek.

Die drie is deursoek en gevaarlike wapens is in hul besit gevind. Hulle sal binnekort in die hof verskyn.

Onderwysunie vra gewapende teenwoordigheid by skole

Die Nasionale Onderwysersunie (NATU) sê metaalverklikkers en gewapende sekuriteitswagte, sal probleme van geweld by skole oplos.

In die nasleep van onlangse die skietery by Qantayi High School in Empangeni, KwaZulu-Natal, sê NATU, die tragedie sou só verhoed kon word.

‘n Graad 12-leerling is geskiet en ‘n nog ‘n swart leerling vermoor. Die skieter het daarna die geweer op homself gerig.

In ‘n ander voorval het ‘n vyftienjarige swart tiener van Pietermaritzburg skuldig gepleit in die streekhof in Durban vir die moord op ‘n mede-leerling, en die poging tot moord van ‘n ander.

Die seun, wat sy pa se geweer skool toe geneem het, het gesê hy het genoeg van boelie gehad.

Sowat 80 persent van onderwysers by Qantayi, waar die twee leerlinge verlede maand vermoor is, het versoek dat hulle na ander skole oorgeplaas word.

Die twee leerders is op die skoolterrein voor onderwysers en kinders deur deur ‘n matriekseun doodgeskiet voordat hy selfmoord gepleeg het.

Die skool se beheerliggam sê die onderwysers vrees vir hulle lewens. ‘n Voormalige skoolhoof van die skool is ook vermoor.

NATU se adjunkpresident Allen Thompson het gesê die KwaZulu-Natalse Onderwysdepartement moet gewapende wagte in diens neem om leerlinge te deursoek en gewere, messe en ander gevaarlike wapens afneem.

NATU het ook ‘n beroep gedoen vir polisiepatrollies by skole in die oggende en middae.

Thompson het aangevoer dat met ‘n verhoogde sigbaarheid van polisielede, leerlinge en buitestaanders afgeskrik sal word van kriminele dade.

Die nasionale Departement van Basiese Onderwys het uitgevaar teen die gereelde teenwoordigheid van polisie om die hoë voorkoms van geweld in Suid-Afrikaanse skole te bekamp.

Die Nasionale Professionele Onderwysersorganisasie van SA (Naptosa) en die SA Demokratiese Onderwysersunie (Sadou) het ook gewaarsku teen “militarisering” van skole.

‘Afrika kan nie meer kolonialisme blameer nie’

Die voormalige hoof van die Internasionale Atoomenergie-agentskap, Mohamed ElBaradei, sê Afrika kan nie meer die kolonialiste blameer vir sy probleme nie.

Hy het bygevoeg dat die Afrika-Unie ook ’n klaaglike rekord van oplossings vir Afrika-probleme wys.

Netwerk24 berig dat ElBaradei in Pretoria tydens ’n mediagesprek wat deur die Thabo Mbeki-stigting gereël is, gesê het niemand anders nie as die vasteland se leiers moet die skuld kry vir die konflikte wat herhaaldelik opvlam.

Volgens hom het die kontinent die afgelope jaar 65 persent meer aan wapentuig bestee as die vorige jaar en dit dui daarop dat lande hulle eerder gereed maak vir oorlog as vir vrede.

Hy het gesê dis goed om Afrikadag te wil vier, maar daar is nie veel om te vier op die vasteland of in die wêreld nie.

Hy het voorgestel dat sanksies teen Burundi ingestel word om die president te dwing om gehoor te gee aan Westerse eise dat hy nie vir ‘n derde termyn dien nie.

Hy het gesê armoede is ‘n “wapen van massavernietiging”.

Boer en vrou met graaf geslaan in plaasaanval

‘n Bekende boer van Nelspruit (Mbombela), mnr. Gerhard Kunneke, word in die intensiewe sorgeenheid van Mediclinic Nelspruit behandel nadat hy gisteraand oorval is op sy plaas in die Kingstonvale-omgewing op die pad na KaNyamazane.

Daar was beurtkrag in die area en die krag het net weer aangekom toe hy na buite is om die kragopwekker af te skakel. Dit was net na 20:00. Hy is toe van agter met ‘n graaf oor die kop geslaan. Volgens mnr. Nico Grobler, operasionele bestuurder van Hi-Tech Sekuriteit Nelspruit, het hy hom teëgesit en is erg aangerand.

Sy vrou, Lynette, was in die huis, maar kon hoor daar was ‘n geskarrel buite. Sy het ondersoek ingestel en het gesien haar man word aangeval. Sy het die deure gesluit en Hi-Tech ontbied. Een van die aanvallers het die badkamervenster gebreek en só toegang tot die huis verkry.

Lynette is ook oorval en buite na haar man geneem waar sy met draad vasgebind is. “Sy is met die graaf deur die gesig geslaan en gedwing om die kluis se sleutels aan hulle (die swart verdagtes) te oorhandig,” het Grobler vertel.

Die swartes het drie vuurwapens uit die kluis gehaal en te voet gevlug met dit, asook twee televisies, ‘n skootrekenaar en die egpaar se selfone. Hi-Tech se beamptes het op die toneel aangekom en gesien die egpaar is erg beseer. Hi-Tech se ambulans is gevolglik ontbied en die Kunneke’s is na die hospitaal geneem.

Lynette is reeds vanoggend ontslaan. “Mnr. Kunneke is by sy positiewe, maar het bloeding op die brein. Hy en sy vrou het gesê dat daar drie verdagtes was wat almal balaklavas gedra het,” het Grobler bygevoeg.

Bossie’s Community Justice en die polisie was ook op die toneel. Mnr. Jacques Meiring, operasionele bestuurder van Bossie’s, het gesê dat hulle ‘n beloning van R50 000 aanbied vir inligting wat sal lei tot die inhegtenisname en suksesvolle vervolging van die verdagtes.

Bron: Die Laevelder

Poetin vra dat internasionale gemeenskap Krim erken

Die leiers van Frankryk en Duitsland is werklik op soek na ‘n skikking wat sal help om ‘n einde aan die konflik in die ooste van die Oekraïne te bring, het die Russiese president Wladimir Poetin gesê in sy jongste onderhoud.

Tydens ‘n onderhoud met Rossiya 1 TV-kanaal oor die deurbraak van die Minsk-ooreenkoms waarvan die VSA nie deel is nie, het Poetin gesê “Dit lyk vir my [die leiers van Frankryk en Duitsland], het ‘n opregte begeerte om ‘n kompromie te bereik en oplossings te vind wat sal lei tot die uiteindelike skikking [van die konflik] … ”

Hy het verwys na die Minsk-protokol wat die desentralisering van mag in die Oekraïne voorstel.

“Ek het die indruk dat ons vennote meer vertroue in ons het as wantroue, en in elk geval glo in ons opregtheid,” het Poetin gesê.

Poetin het weer die belangrikheid van die implementering van die Minsk-ooreenkoms benadruk wat op 12 Februarie deur die Normandië Vier – Oekraïne, Rusland, Frankryk en Duitsland – gesluit is. “As die Minsk-ooreenkoms geïmplementeer word, is ek seker die situasie sal geleidelik normaliseer,” het hy gesê.

Intussen probeer die VSA die konflik aanwakker waarin duisende burgerlikes reeds omgekom het, deur wapens aan die junta te kanaliseer. Dit is een van die hoofredes waarom die VSA nie na die vredesamesprekinge in Minsk genooi is nie.

Oor die moontlikheid van Rusland wat betrokke raak in ‘n oorlog met die Oekraïne, het Poetin gesê “so ‘n apokaliptiese scenario is skaars moontlik, en ek hoop dit sal nooit gebeur nie.”

Wat die Krim betref, het die president die internasionale gemeenskap versoek om die Russiessprekende streek se keuse om deel van Rusland te wees, te respekteer.

“Met betrekking tot nasionaliteit, het die inwoners van die Krim hul keuse gemaak [toe hulle gestem het om by Rusland aan te sluit] en dit moet gerespekteer word. Rusland kan nie anders optree nie,” het hy gesê.

Oor die juntapresident Poroshenko se stelling dat Kiëf van voornemens is om die Krim te herower, het Poetin het gesê dat sulke optrede “wraaksugtig” is. Hy het beklemtoon dat ‘n groot Europese land soos die Oekraïne moet fokus op “die bevordering van die ekonomie en sosiale sektor, en verhoudings met die suidoostelike deel van die land behoort te herstel.”

Die Oekraïne sê intussen hy gaan nie sy wapens onttrek volgens die besluite van die jongste Minsk-vredesooreenkoms nie, omdat “pro-Russiese rebelle aanhou om die skietstaking te verontagsaam”.

‘n Woordvoerder van die ministerie van verdediging in Kief, Wladislaf Seleznijof sê hulle oorweeg dit nie om swaar wapentuig te verwyder nie. Seleznijof sê die skietstaking moet vir minstens 24 uur gehoorsaam word, voor ‘n onttrekking kan begin.

Die Oekraïense minister van buitelandse sake, Pavel Klimkin het voorts met konsternasie gereageer op voorstelle van ‘n VN- of EU-vredesmag in die wegbreekrepublieke waar regeringsmagte reeds swaar verliese gelei het en honderde van sy soldate gedros het.

Ten minste 8000 mans in die Ivano-Frankivsk-streek wat deur Kiëf opgeroep is vir weermagdiens, is soek, het die nuusportaal Vesti berig. Die meeste het glo na ander lande gevlug om nie weermagdiens te doen nie.

‘n Britse regeringswoordvoerder sê die vredesmagbesluit sal alleen deur die VN se Veiligheidsraad geneem word, maar daar is geen sprake daarvan op dié stadium nie.

Klimkin het gesê hy bevraagteken die “rasionaliteit” van só ‘n besluit en gesê sy regering se versoek om ‘n buitelandse aanvalsmag op die been te bring behoort nie deur die Minsk-ooreenkoms ongedaan gemaak te word nie.

Die Oekraïne het vroeër gesê hy sal Sondag sy wapens begin onttrek, ná ‘n nuwe ooreenkoms met selfverdedigingsmagte en die Russiese weermag gesluit is.

Volgens selfverdedigingsmagte het regeringstroepe egter 29 keer op hulle stellings gevuur in ‘n poging om die skietstilstand tot niet te maak.

Ambulans weier hulp in jongste Namibiese plaasaanval

‘n Bejaarde egpaar is Woensdagoggend op hul plaas naby Hochfeld in Namibië deur vier gewapende swart rowers aangeval, vasgebind, aangerand en beroof, het die Republikein berig.

Die naaste ambulansdiens het egter hulp aan die wit egpaar geweier.

Mnr. Gernot en me. Renate Zander, albei in hul sewentigs, van die plaas Monteith sowat 50 km suid van Hochfeld, was volgens hul buurvrou, me. Heike Kash, gisteroggend tussen middernag en eenuur aangeval.

“Hulle was nog besig om TV te kyk, toe hulle ’n klop aan die deur hoor en aanvaar het dat dit hul plaaswerkers is. Vier gewapende mans het hul egter verras,” het Kash gesê.

“Mnr. Zander is wreed aangerand en met ’n swaar ystervoorwerp op sy kop geslaan wat erg gebloei het. Hy is ook op sy rug geslaan wat baie seer is. Me. Zander is gewurg. Hulle was albei vasgebind,” vertel Kash.

Me. Zander het gister in die vroeë oggendure met hul bakkie hulp by hul bure gaan soek nadat hul landlyntelefoon se drade uitgetrek en hul selfone gesteel is.

“Sy beskryf die gewapende mans as een lange en drie kortes. Sy is ook nie seker wat alles gesteel is nie, maar ’n vuurwapen en hul selfone is weg,” sê Kash.

“Die mans het aangedring op geld, maar daar was nie baie geld nie, net in hul beursies. Die Zanders is gedwing om hul kluis oop te sluit en die slaapkamer is omgedolwe.”

Die polisie van Hochfeld en Okahandja was op die toneel. Ses verdagtes, van wie vier in die huis was, is nog op vrye voet. Die kommunikasiehoof van die polisie, adj.kom. Edwin Kanguatjivi, het die voorval bevestig.

Volgens die polisie wou geen private of staatsambulans uitkom na die plaas nie. Mnr. Zander se dogter het met hom na ’n hospitaal in Windhoek gejaag waar hy steke vir sy wonde gekry het en X-strale geneem is.

’n Boer in die omgewing, mnr. Marius Basson, het aan Republikein gesê dit is die tweede keer in vier maande wat mense op plase in hul omgewing aangeval is. “Die Hammans (die bekende Afrikanerbeesboer, mnr. Eddie Hamman se ma en suster), ongeveer 30 km van ons af, is so vier maande gelede aangeval en die Zanders is 20 km van ons af.”

Skaars minder as ’n maand gelede is nog ’n bejaarde egpaar in die Ooste aangeval. Mnr. Acker en me. Dorea von Moltke is op 18 Janaurie op hul plaas, Okatjombua, sowat 90 km noordoos van Gobabis op die pad na Summerdown, deur twee mans oorval, vasgebind en beroof. Mnr. Von Moltke, ’n bekende oudonderwyser, was erg aangerand.