Noord-Korea – praag.co.za

Amerikaanse bomwerpers oor Suid-Korea in magsvertoon

Twee groot Amerikaanse strategiese bomwerpers (foto) het Maandag oor Suid-Korea gevlieg as magsvertoon teen Noord-Korea wat onlangs die vyfde en grootste kerntoets ooit uitgevoer het.

Die supersoniese B-1B Lancers het die lugruim oor die VSA se Osan-lugbasis by Pyeongtaek, 64km suid van Seoel, omstreeks 10:00 (01:00 GMT) bereik.

Elke vliegtuig, van die VSA se Pacific Command by Andersen-lugmagbasis het opgestyg uit Guam, en is begelei deur Amerikaanse en Suid-Koreaanse vegvliegtuie.

“Vandag bied net een voorbeeld van die volle omvang van die militêre vermoëns en die aansienlike hulpbronne van hierdie sterk alliansie wat ‘n uitgebreide verdedigingstelsel bied en versterk”, het generaal Vincent Brooks, bevelvoerder van die Amerikaanse en Suid-Koreaanse gesamentlike magte gesê.

“Die kerntoets deur Noord-Korea is ‘n gevaarlike eskalasie en hou ‘n onaanvaarbare bedreiging in,” het hy bygevoeg en gesê die VSA het ‘n “onwrikbare verbintenis” om bondgenote te verdedig in die streek.

Die Amerikaners “sal die nodige stappe neem, insluitend die Hoëhoogtelugafweerstelsel oftewel Terminal High Altitude Air Defence (THAAD) na die Koreaanse skiereiland ontplooi”, het Brooks gesê.

Suid-Korea het in Julie planne om THAAD te ontlpooi aangekondig, ‘n gesofistikeerde Amerikaanse lugafweerstelsel om groeiende kern en missielbedreigings uit die Noorde teen te werk.

Maar China glo dit kan ook gebruik word om sy eie verdediging in gevaar te stel, en het ten sterkste beswaar gemaak.

Die plan het ook weerstand van inwoners van die suidelike provinsie van Seongju uitgelok, die beplande oprigtingsgebied.

Suid-Koreaanse opposisiepartye is teen THAAD gekant en sê dit kan eskaleer na ‘n wapenwedloop in die streek en bande met China benadeel.

Suid-Korea is die tuiste van sowat 28 500 Amerikaanse troepe en talle basisse.

Noord-Korea is intussen besig om te mobiliseer om die nagevolge van rampspoedige vloede, wat meer as 130 lewens geëis het, tienduisende huise verwoes en die infrastruktuur beskadig het, in die mees noordelike provinsie te bestuur.

Brigades soldate van oral in die land is opgeroep om slagoffers van die vloede wat op 29 Augustus begin het en deur die tifoon, Lionrock veroorsaak is, by te staan.

Volgens Noord-Koreaanse media is dit die ergste neerslae en sterk winde wat die land sedert 1945 getref het.

VSA, Japan veroordeel Noord-Korea se grootste kerntoets

Washington en Tokio dring daarop aan die “sterkste moontlike” maatreëls teen Noord-Korea ingestel word nadat dié land Vrydag sy grootste en kragtigste kerntoets ooit uitgevoer het, het ‘n top Amerikaanse gesant oor die naweek gesê.

Meteorologiese agentskappe het vroeg Vrydagoggend ’n seismiese skudding naby Noord-Korea se kerntoetsterrein waargeneem.

Volgens Amerikaanse, Europese en Chinese agentskappe het dit volgens die Amerikaanse geologiese opname 5,3 geregistreer.

Noord-Korea se optrede is uit verskeie oorde skerp veroordeel. Die VN-veiligheidsraad het sedert 2006 ’n aantal belangrike resolusies aanvaar wat sanksies teen Noord-Korea instel en verskerp omdat die land voortgaan om sy kernwapenprogram te ontwikkel.

Sung Kim, die Amerikaanse departement van buitelandse sake se spesiale gesant vir Noord-Koreaanse beleid, het ook laat blyk dat die VSA moontlik sy eie sanksies gaan instel in reaksie op Noord-Korea se “uitdagende en onaanvaarbare” optrede.

“Ons sal ten nouste binne die VN-veiligheidsraad en daarbuite saamwerk om met die sterkste moontlike maatreëls teen Noord-Kore se jongste optrede vorendag te kom,” het hy aan joernaliste in Tokio gesê ná afloop van ‘n vergadering met sy Japannese ampsgenoot, Kenji Kanasugi.

“Bykomend tot sanksies deur die VN-veiligheidsraad, sal beide die VSA en Japan in samewerking met Suid-Korea ook kyk na eensydige sanksies,” het Kim gesê sonder om verdere besonderhede daaroor te verstrek.

Noord-Korea hou ondanks vyf verskillende stelle sanksies sedert 2006 deur die VN-veiligheidsraad vol dat hy met kerntoetse sal voortgaan.

Die internasionale gemeenskap het die naweek langs allerlei diplomatieke kanale probeer om China sover te kry om Pyongyang te oorreed om die VN-sanksies te gehoorsaam.

China het gesê hy “verwerp die toetse ten sterkste”, maar ontleders meen Beijing probeer die val van Noord-Korea voorkom ten einde te verhoed dat die magsbalans in die Koreaanse skiereiland na die VSA oorhel.

Volgens Kim sal Washington egter volhou met die gesprekvoering met China oor die jongste krisis. “Ons sal voortgaan om China te probeer oorreed om die bestaande sanksies te implementeer en met ons saam te werk ten einde te verseker dat Noord-Korea se gedrag en optrede verander,” het hy gesê.

Noord-Korea voer vyfde kerntoets uit

Noord-Korea het bevestig dat hy ‘n vyfde kerntoets uitgevoer het, ure nadat seismiese stelsels ‘n ontploffing naby sy kerntoetsterrein waargeneem het.

Dit is soortgelyk aan ‘n aardbewing van 5,3 op die Richterskaal.

Die staatstelevisie in Noord-Korea sê dié land het nou die kennis om kernplofkoppe op ballistiese vuurpyle te monteer.

Dit blyk ook dat daar geen lekkasie van kernmateriaal was tydens die toets nie en dat daar geen impak om die omgewing was nie.

Suid-Korea het intussen ‘n noodvergadering van sy nasionale veiligheidsraad belê.

Suid-Korea se intelligensiediens is bekommerd dat Noord-Korea vinniger vorder met die miniaturisering van kernkoppe vir missiele, het ‘n wetgewer by die vergadering gesê.

Kim Byung-Kee, ‘n lid van intelligensiekomitee in die Suid-Koreaanse parlement sê die Noorde se bedoeling is om ‘n sterk beeld van sy leier, Kim Jong Un (foto, heel regs) uit te straal ter die herdenking van die ontstaan van die Republiek in 1948 en om internasionale sanksies uit te daag.

Noord-Korea word deur die VN verbied om enige kern- of missieltegnologie te toets en bykomende sanksies is reeds ingestel ná sy vierde kerntoets in Januarie.

Die VN se waghondagentskap het hul “diep kommer” uitgespreek oor die toets.

Asiese markte het gedaal na die aankondiging van die toets. Na verwagting sal dit dieselfde uitwerking hê op Europese markte waar die FTSE 100, die DAX in Duitsland en die CAC 40 almal vanoggend laer geopen het.

Noord-Korea treiter Japan met missieltoetse

Noord-Korea het tydens die afsluiting van die G20-beraad in China, drie middelafstand-missiele afgevuur, wat ongeveer 1 000 kilometer getrek en naby Japan geland het.

Dit word beskou as ’n magsvertoon wat met die ekonomiese spitsberaad saamval.

Noord-Korea het die afgelope tyd ’n reeks missieltoetse uitgevoer, wat op die ou einde daarop gemik is om langafstand-kernmissiele te ontwikkel wat in staat is om Amerika te bereik.

Sulke toetse is redelik algemeen, veral met die internasionale aandag op Noordoos-Asië waar die G20-spitsberaad plaasvind.

China is Noord-Korea se enigste belangrike bondgenoot, maar betrekkinge tussen die buurlande is gespanne midde ’n reeks Noord-Koreaanse kern- en missieltoetse, wat deur baie as uitlokking beskou word.

Suid-Korea se gesamentlike stafhoofde sê die drie ballistiese missiele, waarskynlik almal Rodongs, is uit die dorp Hwangju in Noord-Korea afgevuur, voordat dit in die see geval het.

Hulle het die lanserings as “gewapende protes” bestempel wat daarop gemik is om Noord-Korea se militêre vermoë tydens die byeenkoms van die G-20 te demonstreer, dae voor die Noord-Koreaanse regering se 68ste herdenking.

Die drie missiele wat gister afgevuur is, het geval binne Japan se eksklusiewe ekonomiese sone, die 200 seemyl aflandige gebied waar ‘n land soewereine regte vir ontginning en benutting van hulpbronne het, het die ministerie van verdediging in Tokio gesê.

Die Japanse kabinetsekretaris, Yoshihide Suga, het die lanserings as “’n ernstige bedreiging” vir Japan se veiligheid bestempel en gesê Tokio het via Japan se ambassade in Beijing by Noord-Korea beswaar gemaak.

Noord-Korea meen Trump is ‘n wyse keuse

Noord-Korea het sy steun toegesê aan Donald Trump, wat waarskynlik die Republikeinse Party se presidentskandidaat in vanjaar se presidentsverkiesing in Amerika gaan wees.

Trump sal volgens die Noord-Koreane Amerikaners bevry aangesien hulle daagliks in vrees vir ’n kernbomaanval deur Noord-Korea leef, het Reuters berig.

Op DPRK Today, een van die regering se mondstukke, word Trump as ’n “wyse politikus” en die regte keuse vir Amerikaners op 8 November beskryf.

Hillary Clinton, wat waarskynlik die Demokratiese Party se kandidaat en Trump se teenstander sal wees, is hardkoppig genoem weens haar voorstel om wye sanksies in te stel om die vraagstuk oor kernwapens op die Koreaanse skiereiland op te los.

Trump het vantevore gesê hy is bereid om met Kim Jong-oen, Noord-Koreaanse leier, te onderhandel om ’n einde aan Noord-Korea se kernprogram te maak en dat China ook betrokke moet raak om ’n blywende oplossing te vind.

Die Verenigde Nasies het sanksies teen Noord-Korea weens sy kernwapentoetse ingestel.

Suid-Korea en Amerika het te kenne gegee gesprekke oor die kwessie is nutteloos as Noord-Korea nie stappe doen om sy kerntoetse te beëindig nie.

DPRK Today het ook gesê Trump se voorstel om die VSA se soldate aan Suid-Korea te onttrek, die regte manier is om die twee Koreas te verenig.

“Onderhandeling is die beste opsie. Dit blyk Trump is nie die rowwe, onkundige kandidaat wat hulle sê hy is nie, maar ’n wyse politikus,” het Han Yong Muk, ’n Koreaanse akademikus in China, geskryf.

Trump sal met Kim praat

Donald Trump is bereid om met Noord-Korea se leier, Kim Jong-oen, te praat in ’n poging om ’n einde te bring aan Noord-Korea se kernkragambisie, het die Republikeinse Party se aangewese presidentskandidaat, Woensdag gesê.

Trump (69) het nie besonderhede verskaf van sy beleid teenoor Noord-Korea sou hy tot Amerikaanse president verkies word nie.

Ontleders meen dié standpunt kan lei tot ’n beduidende skuif in die Amerikaanse gesindheid teenoor die geïsoleerde Noord-Korea, sou Trump verkies word.

Op ’n vraag of hy sal probeer om Kim tot ander insigte te bring, het Trump geantwoord: “Absoluut.”

Hy sal China ook vra om hom te help in sy pogings. “Ek sal druk op China plaas, want ons het groot ekonomiese mag oor China,” het Trump in ’n halfuur lange onderhoud in sy kantoor op die 26ste verdieping van Trump Tower in Manhattan gesê. “China kan die probleem met een vergadering of een telefoongesprek oplos.”

Die regering van Noord-Korea het nie kommentaar gelewer op Trump se standpunt nie, het Reuters berig.

Noord-Korea se missieltoets misluk

Noord-Korea het verlede week ‘n tweede poging in twee weke aangewend om ‘n kragtige middelafstand ballistiese missiel te toets.

Suid-Korea se ministerie van verdediging sê die toets het egter misluk.

Die Musudan-missiel is sover bekend van Wonsan aan die ooskus van die land afgevuur, maar het sekondes na lansering neergestort.

Die mislukte toets het plaasgevind terwyl die land voorberei vir die kongres van die regerende party, waar die leier, Kim Jong-Un, geloof sal word vir die “nuwe hoogtes” wat die land se kernwapenprogram bereik het.

Toenemende kommer heers dat Pjongjang besig is met voorbereidings van ‘n vyfde kerntoets.

Bestaande resolusies van die Verenigde Nasies verbied Noord-Korea om enige ballistiese missielverwante tegnologie te gebruik.

Suide stem nuwe sanksies teen Noord-Korea

Suid-Korea het die week ’n reeks nuwe, eensydige sanksies teen Noord-Korea aangekondig. Dit sluit onder meer ’n beroep op burgers in om Noord-Koreaanse restaurante in die buiteland te boikot.

Die nuwe maatreëls volg nadat die Noorde onlangs ’n kerntoets uitgevoer en ’n langafstand-vuurpyl getoets het, het AFP berig.

’n Lang lys name van Noord-Koreaanse individue en entiteite is ook op ’n swartlys geplaas en ’n verbod is geplaas op enige skepe wat voorheen in Noord-Koreaanse hawens anker gegooi het, om in Suid-Koreaanse gebiedswaters te vaar.

Dit volg op streng sanksies wat verlede week deur die Verenigde Nasies (VN) se Veiligheidsraad teen Noord-Korea ingestel is.

Seoel het verlede maand die buitengewone stap gedoen en die operasies van die gesamentlik beheerde Kaesong-nywerheidskompleks opgeskort.

Die sanksies en die sluiting van die kompleks is daarop gemik om die krane toe te draai van enige buitelandse valuta wat na die bewind in Pjongjang vloei.

“Aangesien Noord-Koreaanse instansies, soos buitelandse restaurante, een van die maniere is waarop Noord-Korea buitelandse valuta verdien, vra ons die publiek om nie van hierdie instansies gebruik te maak nie,” het Lee Suk-Joon, hoof van die kantoor belas met regeringsbeleid-koördinering gesê.

Die Suid-Koreaanse regering beraam dat Pjongjang nagenoeg US$10 miljoen jaarliks uit 130 restaurante in 12 lande verdien.

“Verminderde benutting van Noord-Koreaanse restaurante sal bydra om die kontantvloei tot ’n groot mate te laat opdroog,” het die regering in ’n afsonderlike verklaring gesê.

Lee sê die regering vermoed dat die meeste buitelandse valuta, deur verskillende kanale, uiteindelik vir wapens van massavernietiging gebruik word.

Seoel het ook 40 indivue en 30 groepe wat betrokke is by Noord-Korea se kern- en missielprogramme, insluitende twee individue en ses groepe van ’n derde land, op die swartlys geplaas en hulle enige saketransaksies met Suid-Koreaanse ondernemings belet.

Die skuif om buitelandse vaartuie wat in die Noorde anker gegooi het, te verbied om Suid-Koreaanse gebiedswaters binne te kom, maak klaarblyklik ook ’n einde aan ’n ambisieuse trilaterale infrastruktuurprojek wat ten doel gehad het om Russiese steenkool, deur die Russiese grensdorp, Khasan en die Noorde se hawestad, Rajin na Suid-Korea uit te voer.

Die sogenaamde Rajin-Khasan-projek was ’n integrale deel van die Suid-Koreaanse president, Park Geun-Hye, se visie om die spoornetwerke van die Noorde en Suide te integreer om dit uiteindelik met Europa te verbind.

Noord-Korea se bedrywighede in Namibië raak SAOG

Veiligheidsraad-resolusies is deur Namibië verbreek deur toe te laat dat Noord-Korea “wapenfabrieke of ander militêre geriewe” oprig.

Dit is strydig met die kernsperverdrag wat die land as VN-lid onderteken het en raak die hele SAOG-streek.

Die Noord-Koreaanse staatsmaatskappy Mansudae Overseas Projects Group of Companies (MOP) het glo bande met Korea Mining Development Trade Corporation (KOMID) waarteen daar internasionale VN-sanksies van krag is.

‘n Ondersoekverslag is op 25 Februarie deur ‘n taakspan wat Noord-Korea se kernwapenprogram monitor, aan die Veiligheidsraad van die VN voorgelê.

Volgens die taakspan-aanbaveling “is Mansudae Overseas Projects verbind aan KOMID, Noord-Korea se primêre wapenhandelaar en hoofuitvoerder van goedere en toerusting wat verband hou met ballistiese missiele en konvensionele wapens”.

Luidens die verslag beweer die “Namibiese owerhede dat hulle nie bewus is van die bande tussen die twee entiteite nie”, maar voeg by dat Noord-Koreaanse arbeiders “so onlangs as Augustus 2015 konstruksiebedrywighede by ’n ander militêre basis in Suiderhof onderneem het”.

Namibië het nog nie op die aanklag gereageer nie. Die Republikein het die bewerings ondersoek.

Die reusegebou wat tans neffens die weermagbasis in dié Windhoekse woonbuurt gebou word, is volgens inligting die nuwe hoofkwartier van die Namibiese weermag.
Satellietbeelde van die militêre basisse by Luiperdsvallei en Oamites suid van Windhoek wat so onlangs as vroeg verlede maand deur Google Earth opgelaai is, wys reuse-aanlegte waarvan die bouwerk volgens inligting deur Noord-Korea gedoen is.
Republikein se ondersoekspan het in antwoord op ’n vraag oor dié aanlegte, die volgende antwoord van ’n ingeligte bron ontvang: “Die een fasilitieit is ’n ammunisieopslagplek met ’n reeks van aanwendings – vanaf pistole (handwapens), tot gewere, artillerie, vliegtuie en ander wapentuig. Die ander fasiliteit is ‘buite perke’. Daar is glo ’n wyer SADOG-konteks.”

Noord-Korea spog oor waterstofbom-toets

Noord-Korea sê die land het ’n kragtige waterstofbom met welslae getoets, het AP berig.

Hierdie uitdagende en verrassende stap, indien bevestig, sal ’n reusestap in Pjongjang se soeke na verbetering in sy steeds beperkte kern-arsenaal wees.

Die aankondiging is oor die staatsmedia gedoen en is gevolg deur feesvieringe in die strate van Pjongjang. In Seoel en elders in die wêreld is kommer op hoë vlakke uitgespreek.

Suid-Korea se pres. Park Geun-hye het opdrag gegee dat sy weermag die land se verdediging saam met Amerikaanse magte versterk.

Washington bly skepties oor Noord-Korea se aansprake oor waterstofbomme, wat veel kragtiger en baie moeiliker as kernbomme is om te vervaardig.

Spanning tussen Koreas ontlont

Noord- en Suid-Korea het vandeesweek ooreengekom om die onlangse spanning op die Koreaanse skiereiland te ontlont ná insidente by die grens.

Albei lande se weermagte was op ’n gereedheidsgrondslag geplaas nadat verlede Donderdag se oor-en-weer skietery.

Die krisis het Donderdag breekpunt bereik nadat Noord-Korea vier grofgeskutrondes op Suid-Korea afgevuur het. Die Suide het die grofgeskut met 29 rondes beantwoord.

Propaganda-uitsendings deur Suid-Korea is ná 11 jaar hervat nadat ‘n landmynontploffing in die gedemilitariseerde sone tussen die twee landes Suid-Koreaanse soldate beseer het.

Die uitsendings het enkele dae ná die ontploffings begin. Propaganda en harde popmusiek is oor luidsprekers in die rigting van die Noorde uitgesaai.

Volgens die Suid-Koreaanse nuusagentskap Yonhap kon die Noorde en Suide Maandag ‘n ooreenkoms bereik na onderhandelinge wat sedert Saterdag duur.

Volgens die ooreenkoms sal Noord-Korea om verskoning vra vir die landmynontploffings en Suid-Korea sal die propaganda-uitsendings staak.

Die twee Koreas verkeer tegnies steeds in ’n staat van oorlog sedert die Koreaanse Oorlog in 1953 met ’n wapenstilstand geëindig het.

Die twee lande het nooit ‘n vredesverdrag onderteken nie.

Noord-Korea dreig egter voortdurend met militêre optrede in reaksie op die jaarlikse weermagoefeninge tussen die VSA en Suid-Korea.

Amerikaanse ambassadeur in Suid-Korea aangeval

Die Amerikaanse ambassadeur in Suid-Korea, Mark Lippert, is op sy gesig en arm Donderdag in Seoul deur ‘n mesaanvaller gesteek wat gekant is teen voortgesette Amerikaans-Koreaanse militêre samewerking.

Die Verenigde State van Amerika het die “daad van geweld” veroordeel en het gesê dat president Barack Obama met sy verteenwoordiger gepraat het. Die bebloede ambassadeur is na die hospitaal gehaas.

Getuies beskryf hoe ‘n man met ‘n mes in sy regterhand versteek oor ‘n tafel na Lippert geduik het by ‘n ontbytfunksie by die Sejong Kulturele Instituut.

Lippert, 42, is na die hospitaal gehaas. Die Amerikaanse ambassade het gesê hy verkeer in ‘n “stabiele” toestand.

Polisie het die aanvaller as Kim Ki-Jong, 55, geïdentifiseer en het gesê hy was in “nasionalistiese” drag geklee, naamlik in tradisionele Koreaanse klere en het slagspreuke geskree teen gesamentlike militêre oefeninge tussen die VSA en Suid-Korea.

Kim het Dinsdag gesê die militêre samewerking tussen Suid-Korea en die VSA verhoed die hervatting van ‘n dialoog tussen Noord- en Suid-Korea.

Sekuriteitspersoneel en polisiebeamptes het Kim oorrompel en in hegtenis geneem.

‘n Woordvoerder van die Koreaanse Raad vir Versoening en Samewerking, wat as gasheer vir die ontbytfunksie opgetree het, het om verskoning gevra vir die gebrek aan sekuriteit by die geleentheid.

Die jaarlikse militêre oefening het vroeër hierdie week afgeskop en hernude spanning met Noord-Korea veroorsaak.

Byna 30 000 Amerikaanse troepe is permanent in Suid-Korea gestasioneer en die Verenigde State van Amerika sal die operasionele bevel in die geval van ‘n gewapende konflik met die Noorde behartig.

Noord-Korea maak gereed vir missieltoetse

Noord-Korea maak glo gereed vir medium afstand missieltoetse om sy afkeur uit te spreek oor die gesamentlike militêre oefeninge van Amerika en Suid-Korea wat vandeesweek begin het.

Mobiele lanseerders vir Rodong-missiele is by ‘n Noord-Koreaanse missielbasis noord van Pyongyang ontplooi, het Suid-Korea se Yonhap-nuusagentskap volgens militêre bronne gesê.

Volgens AFP het Noord-Korea het in Maart 2014 soortgelyke lanseerders gebruik om twee Rondong-missiele af te vuur wat sowat 1 000 km tot 1 500 km ver trek.

Suid-Korea se ministerie van verdediging het nie die Yonhap-berigte bevestig nie, maar gesê dit monitor die situasie.

“Ons troepe hou Noord-Korea vir bykomende missiellansering dop,” het die ministerie se woordvoerder Kim Min-Seok aan verslaggewers gesê.

“Ons het ons observasie in samewerking met Amerika verskerp en ‘n krisisbestuurstelsel ingestel,” het hy gesê.

Noord-Korea het Maandag twee kortafstand Scud-missiele in die see by die suidkus afgevuur toe Suid-Korea ‘n reeks gesamentlike militêre oefeninge begin het.

Die jaarlikse oefeninge veroorsaak altyd militêre spanning tussen dié twee lande. Resolusies van die Verenigde Nasies het alle ballistiese missieltoetse deur Noord-Korea verban.

Die grootste van die twee militêre gesamentlike oefeninge van Suid-Korea en Amerika, Foal Eagle, het Maandag begin.

Die militêre oefeninge sal agt weke lank duur en sluit die opleiding van sowat 200 000 Koreaanse en 3 700 Amerikaanse troepe in die lug, see en op die grond in.

Brand breek by Rössing-uraanmyn uit

‘n Brand het kort na die middaguur by die verwerkingsaanleg van die Rössing Uraanmyn by Arandis uitgebreek. Volgens voorlopige aanduidings het die brand in die bergingsaanleg vir uraanoksied ontstaan, maar het nie na die res van die aanleg versprei nie.

Selfs die brandweer van Swakopmund is ingeroep om bystand te verleen aan die eie brandweerdiens van die myn.

Op die oomblik is die brand onder beheer en bestrydingspanne laat nou net voldoende tyd toe om die dromme met uraanoksied te laat afkoel voordat die brandtoneel besoek kan word.

Alle personeel in die myngebied is ontruim en alle personeel in die verwerkingsaanleg word op die oomblik onderwerp aan bestralingstoeste. Die myn sê dit is net ‘n voorsorgmaatreël.

Rössing is in die spervuur oor gerugte dat Noord-Korea in die myn belangstel, nadat die maatskappy aangekondig het dat ‘n kontrak vir die lewering van uraan aan Frankryk teen die einde van 2012 gesluit het en dat die grootste oopgroef-uraanmyn in die wêreld nou ‘n besluit moet neem oor sy voortbestaan.

Suid-Korea het voorheen aangedui dat sy regering graag uraan van Namibië wil invoer en daarop gewys dat die uraan benodig word om as brandstof te dien om energie by kernkragsentrale in Suid-Korea op te wek.

Die eerste kernkragsentrale in Suid-Korea is in 1997 opgerig en sedertien het dit tot 16 kragsentrales gegroei wat sowat 40 persent van die land se elektrisiteitsverbruik voorsien. Die beplanning is dat ‘n verdere agt kernkragsentrales tot 2014 in die land opgerig gaan word.

Suid-Korea se aanvraag vir die voorsiening van elektrisiteit het sedert 1990 met nege persent jaarliks toegeneem. Die land voer tans sy uraan in van Kanada, Australië en ander onbekende bestemmings.

Hy het voorts aangedui dat Suid-Korea belangstel om vis in Namibiese gebiedswaters te kom vang.

Rössing Uraan oorweeg verskeie opsies om die leeftyd van die myn te verleng. Ten eerste word dieper delwery in die bestaande groef oorweeg, ten tweede sal die uitbreiding van die oop groef in ‘n noordwestelike rigting oorweeg word om volle kapsiteit van 4 500 ton te produseer en ten derde kan die groef aanvullend tot die tweede moontlikheid ook suidwaarts uitgebrei word.

Sou opsie 3 die besluit wees, kan die myn tot 2020 voortbestaan totdat ‘n geskatte N$284 miljoen aangewend gaan word om dit te sluit.