uraan – praag.co.za

Hulpbron-nasionalisme raak warm in Niger

Hulpbron-nasionalisme is tans ‘n baie warm onderwerp in Niger.

Hama Amadou, ’n groot opposisierolspeler, wat toestemming het om in Februarie ’n kandidaat in Niger se presidentsverkiesing te wees, se poging om Maandag uit die gevangenis vrygelaat te word, het misluk. Hy het sy versoek tot die appèlhof gerig.

President Mahamadou Issoufou, ’n sleutelbondgenoot van die Weste in die stryd teen Islamitiese militansie in die brose Saharastreek, sal na verwagting daarin slaag om vir ’n tweede termyn verkies te word.

Kritici beskuldig hom egter daarvan dat hy toenemend outoritêr word, veral na die onthulling van ’n mislukte staatsgreep in Desember.

Amadou, wat eens op ’n tyd ’n bondgenoot van die president was, is in November, nadat hy uit ballingskap teruggekeer het, in hegtenis geneem nadat hy na bewering by ’n baba-handel sindikaat betrokke was.

Hy het die aanklagte in die openbaar ontken en sê sy aanhouding is polities gemotiveer.

Amadou is een van 15 kandidate wat Saterdag deur Niger se grondwetlike hof gekeur is om as kandidaat vir die presidentsverkiesing te staan. “Met die weiering om hom voorwaardelik vry te laat, het die bewind sy eerste uitklophou gegee,” het Souley Oumara, sy regsverteenwoordiger gesê.

Die appèlhof het geen redes vir sy besluit verskaf nie, en Amadou kan nou in die hooggeregshof appèl aanteken.

Niger se geheime diens het Amadou, asook lede van sy party en ander opposisieleiers ondervra.

Sedert die oliekrisis in 1973 maak Frankryk op kernkrag staat en hierdie uithoek van Afrika is noodsaaklik om sy nasionale belange te beskerm.

Ten minste driekwart van Frankryk se elektrisiteit kom van kernkrag, en maak die land meer afhanklik van uraan as enige land op aarde.

Niger is die wêreld se vierde grootste produsent van die erts na Kazakhstan, Kanada en Australië.

In 2009, het Reuters berig dat China daartoe verbind was om te $300 miljoen in ‘n uraanprojek te belê, maar geen uraan is uit die myn gehaal sedert vroeg 2015 nie en die myn is effektief gesluit.

Bykomend tot goedkoop uraanpryse, het verlangsaming in die Chinese ekonomie gelei tot ‘n 84% daling in Chinese belegging in Afrika in die eerste helfte van 2015, volgens die Financial Times.

China het tans min aptyt vir kapitale uitleg wat natuurlike hulpbronprojekte betref.

Tog is die Chinese uraanmyn een van die mees ondeursigtige sakepogings in Niger.

DA wil Russiese kernooreenkoms teenstaan

Die Demokratiese Alliansie is van plan om die kernooreenkoms teen te staan. Die party het Sondag op ‘n nuuskonfrensie na die federale vergadering in Durban, onderneem om op hernubare energie te fokus.

Die leier van die DA, Mmusi Maimane sê Suid-Afrika moet begin om in alternatiewe energie te belê.

Onafhanklike kragvoorsiening sal egter die noodsaaklikheid van die Russiese triljoenrand-kernkragooreenkoms knou.

Kenners meen die Russiese kernooreenkoms is bloot gemik op ANC-kaderverryking op ’n skaal wat die wapenskandaal en Nkandla na kinderspeletjies sal laat lyk.

Die departement van Energie weier steeds om te reageer oor vroeëre berigte dat president Jacob Zuma die beheer oorgeneem het van ‘n kernooreenkoms van een-triljoen rand met Rusland.

Die ooreenkoms is regstreeks met Rusland se president Vladimir Putin beding en die minister van Energie, Tina Joemat-Pettersson, het glo opdrag gekry van die president om dit te onderteken.

Volgens die DA sal kompetisie vir Eskom die ANC se kaderverrykingskemas, wat afhanklik is van die yslike bouprojekte by Medupi- en Kusile-kragsentrales, in die wiele ry.

Mededinging van alternatiewe kragvoorsieners sal die ANC se frontmaatskappy, Chancellor House, se beleggings namens Eskom ook ondermyn.

Chancellor House kon reeds honderde miljoene van belastingbetalers se geld vir die ANC afskep deur sy aandeelhouding in Hitachi, kontrakhouer vir die vervaardiging van stoomketels vir die mega-kragopwekkers.

President Zuma het op 12 Februarie in sy staatsrede ’n 9-punt-plan aangekondig tot 2019, wanneer sy tweede termyn eindig, wat as handleiding vir sy administrasie sal dien wat onder meer sy verbintenis tot die Russiese kernkontrak insluit.

Eskom se monopolie sal behou word weens die Wysigingswetsontwerp op die Ontwikkeling van Minerale en Petroleumbronne wat ter tafel gelê is.

Dié wetsontwerp sal gas-eksplorasiepogings smoor en sodoende die noodsaak vir sluiting van die Russiese kernooreenkoms versterk.

Volgens die DA is die uitstaande kenmerk van 9-punt-plan die groot aantal beslissende take wat aan “maatskappye in staatsbesit” toegeken sal word.

Onder die dekmantel van ’n “ontwikkelingstaat” en “energiebehoeftes” word geleenthede vir kaderverryking dus vermenigvuldig.

Die leier van die EFF, Julius Malema het die ANC intussen skerp aangeval.

Hy het duisende EFF-ondersteuners gister toegespreek tydens die party se tweede bestaansjaarvieringe by ‘n saamtrek in Rustenburg.

Adjunkpresident Cyril Ramaphosa het ook onder skoot gekom. Malema het voorts beweer dat die Eskom-krisis, wat tot gereelde beurtkrag lei, opsetlik veroorsaak word.

Malema het beurtkrag as een van die ANC-regering se mislukkings beskryf.

Geld vloei van Russe na Hillary vir uraan

Amerikaners kan hulself die skouspel van ‘n verkiesing in 2016 en miljarde dollar spaar. Al wat die VSA moet oorweeg is ‘n jong Clinton wat met ‘n junior Bush afhaak, sê ontleders.

Dit is die realiteit van die VSA se gebroke politiek stelsel in 2015, waar invloed bloot gekoop word deur belangegroepe om beleid te rig en selfs die opposisie tot ‘n elite-klas behoort wat hul voorregte klaarblyklik oorerf.

Dit is uiters ironies dat ‘n land wat “demokrasie” uitvoer, dws, deelname aan die politieke proses, nou die mees geslote politieke stelsel in die Westerse wêreld verteenwoordig.

Met dié dat slegs twee families Washington beheer, raak die magsintriges al hoe meer makaber.

Terwyl president Wladimir Poetin deurentyd deur die Anglo-Amerikaanse meningsvormers sleggesê word omdat hy groot dele van Eurasië se energiehulpbronne in ‘n ystergreep klem, het hy ook opgemerk dat die VSA se volgende president, Hillary Clinton, te koop is.

Prawda se trompetgeskal in ‘n artikel van Januarie 2013, dat Poetin vir Rusland se kernenergiekorporasie Rostom die wêreld oorwin, het aangedui hoe die Russiese atoomenergie-agentskap dmv ‘n oorname van ‘n Kanadese maatskappy nou uraan-ontginning vanaf Sentraal-Asië tot die Amerikaanse Weste beheer.

Danksy die oorname van Urianium One is Rosatom tans een van die wêreld se grootste uraanprodusente en het dit Poetin nader aan sy doelwit gebring om die beheer van baie van die aardbol se uraanvoorsieningsketting oor te neem.

En dit het die Russiese president klaarblyklik mbv van Hillary Clinton reggekry.

Die Russe beheer op die oomblik ‘n vyfde van die Verenigde State se totale uraanproduksiekapasiteit. Omdat uraan beskou word as ‘n strategiese bate, met implikasies vir nasionale veiligheid, was die transaksie veronderstel om deur ‘n komitee bestaande uit verteenwoordigers van ‘n aantal van regeringsagentskappe goedgekeur te word.

Die agentskappe se aanbevelings is uiteindelik afgeteken deur die State Department, onder leiding van Hillary Clinton.

Die Russe het geleidelik beheer van Uranium One in drie afsonderlike transaksies tussen 2009-2013 oorgeneem, het Kanadese rekords aangetoon, met ‘n stewige vloei van kontant na die Clinton-stigting.

Daardie bydraes is nie openbaar gemaak deur die Clintons nie, ten spyte van ‘n ooreenkoms tussen die Withuis en Hillary om alle skenkers te verklaar.

En kort ná die Russe se aangekondig van hul voorneme om ‘n meerderheidsbelang in Uranium One te bekom, het Clinton $500 000 ontvang vir ‘n toespraak in Moskou.

Die geld het van ‘n Russiese beleggingsbank wat met die Kremlin verbind word, gekom en die bank het Uranium One se aandele aanbeveel.

Rosatom en die Amerikaanse regering het allerlei beloftes gemaak na kommer oor die prysgawe van beheer oor die maatskappy se bates aan die Russe aan die lig gekom het. Daardie beloftes het herhaaldelik gebreek, toon rekords in die besit van die New York Times.

Dié aangeleentheid werp nuwe lig op Suid-Afrika se besluit om in kernkrag te belê.

Brand breek by Rössing-uraanmyn uit

‘n Brand het kort na die middaguur by die verwerkingsaanleg van die Rössing Uraanmyn by Arandis uitgebreek. Volgens voorlopige aanduidings het die brand in die bergingsaanleg vir uraanoksied ontstaan, maar het nie na die res van die aanleg versprei nie.

Selfs die brandweer van Swakopmund is ingeroep om bystand te verleen aan die eie brandweerdiens van die myn.

Op die oomblik is die brand onder beheer en bestrydingspanne laat nou net voldoende tyd toe om die dromme met uraanoksied te laat afkoel voordat die brandtoneel besoek kan word.

Alle personeel in die myngebied is ontruim en alle personeel in die verwerkingsaanleg word op die oomblik onderwerp aan bestralingstoeste. Die myn sê dit is net ‘n voorsorgmaatreël.

Rössing is in die spervuur oor gerugte dat Noord-Korea in die myn belangstel, nadat die maatskappy aangekondig het dat ‘n kontrak vir die lewering van uraan aan Frankryk teen die einde van 2012 gesluit het en dat die grootste oopgroef-uraanmyn in die wêreld nou ‘n besluit moet neem oor sy voortbestaan.

Suid-Korea het voorheen aangedui dat sy regering graag uraan van Namibië wil invoer en daarop gewys dat die uraan benodig word om as brandstof te dien om energie by kernkragsentrale in Suid-Korea op te wek.

Die eerste kernkragsentrale in Suid-Korea is in 1997 opgerig en sedertien het dit tot 16 kragsentrales gegroei wat sowat 40 persent van die land se elektrisiteitsverbruik voorsien. Die beplanning is dat ‘n verdere agt kernkragsentrales tot 2014 in die land opgerig gaan word.

Suid-Korea se aanvraag vir die voorsiening van elektrisiteit het sedert 1990 met nege persent jaarliks toegeneem. Die land voer tans sy uraan in van Kanada, Australië en ander onbekende bestemmings.

Hy het voorts aangedui dat Suid-Korea belangstel om vis in Namibiese gebiedswaters te kom vang.

Rössing Uraan oorweeg verskeie opsies om die leeftyd van die myn te verleng. Ten eerste word dieper delwery in die bestaande groef oorweeg, ten tweede sal die uitbreiding van die oop groef in ‘n noordwestelike rigting oorweeg word om volle kapsiteit van 4 500 ton te produseer en ten derde kan die groef aanvullend tot die tweede moontlikheid ook suidwaarts uitgebrei word.

Sou opsie 3 die besluit wees, kan die myn tot 2020 voortbestaan totdat ‘n geskatte N$284 miljoen aangewend gaan word om dit te sluit.

Noord-Koreane ontken bande met wapenbedryf in Namibië

Die Namibiese tak van die Noord-Koreaanse staatsmaatskappy Mansudae Overseas Project Group of Companies (M.O.P.) sê hy het géén bande met die omstrede Korea Mining Development Trade Corporation (KOMID) teen wie streng internasionale sanksies ingestel is nie.

KOMID is Noord-Korea se grootste wapenhandelaar en is by die verspreiding van ballistiese missiele en ander wapentuig aan lande soos Iran en Sirië betrokke. Die maatskappy verskans sy bedrywighede dikwels deur Noord-Koreaanse frontorganisasies te gebruik in die lande waar hy sake doen.

Volgens ’n goedgeplaaste intelligensiebron bestaan ’n verbintenis tussen M.O.P. in Namibië en KOMID.

Mnr. Ryong Choe, woordvoerder van M.O.P Architectural & Technical Services (Namibia), het vandeesweek gesê die maatskappy waarvoor hy werk “doen nét kuns- en konstruksiewerk en het niks met wapens te make nie”.

Volgens hom ken hy nie die twee Noord-Koreaanse amptenare, Kil Jong Hun en Kim Kwang Yon, wat in Namibië woon en KOMID se belange in Suider-Afrika behartig nie.

Hulle is twee van die tien Noord-Koreane teen wie die Amerikaanse tesourie in Januarie sanksies ingestel het.

Dit is gedoen omdat hulle resolusie 1718 van die Veiligheidsraad van die Verenigde Nasies (VN) oortree het. Dié resolusie is op 14 Oktober 2006 aanvaar nadat Noord-Korea op 9 Oktober 2006 ’n kerntoets uitgevoer het, strydig met die kernsperverdrag waarvan dié land ’n ondertekenaar is.

Ingevolge hierdie resolusie moet lidlande van die VN alle oorsese bates van individue en maatskappe betrokke by Noord-Korea se wapensprogramme bevries. ’n Internasionale reisverbod is ook op werknemers van hierdie programme en hul families geplaas.

Die twee mans se teenwoordigheid in die land het die Namibiese regering in ’n groot diplomatieke verleentheid gedompel. Dit het verlede week bekend geword die VN gaan op grond van dié gebeure ’n amptelike ondersoek gelas na Namibië se skending van resolusie 1718 van die Veiligheidsraad. Namibië is net soos Noord-Korea ’n ondertekenaar van die kernsperverdrag.

Volgens Choe verwerp M.O.P. in Namibië enige beweringe dat hy as frontorganisasie vir KOMID optree.

“Ons is reeds vir dekades wyd bekend in Namibië as een van die groot konstruksiemaatskappy en het ’n goeie naam onder ons kliënte en diensverskaffers. Ons het niks met KOMID te make nie en is nie ’n filaalmaatskappy van KOMID nie.

“Ons moedermaatskappy Mansudae Art Institute ”

Hy sê gerugte hieroor bring mee dat groot diensverskaffers wat reeds jare lank bou- en ander konstruksiemateriaal aan M.O.P. lewer, vra skielik vrae en wil weet wat aangaan.

Choe sê M.O.P. het noue bande met die Namibiese regering wat een van dié maatskappy se grootste en mees gewaardeerde kliënte is.

“Ons het staatshuis, die Heldeakker, die Oorlogsmuseum op Okahandja en die Gedenkmuseum vir Onafhankliheid gebou en was ook by talle ander kleiner konstruksieprojekte betrokke.”

Hy ontken dat M.O.P. enigsins betrokke was by die bou van die wapenfabriek by Luiperdsvallei en sê dit was ’n “ander Noord-Koreaanse maatskappy”, maar hy ken nie die naam daarvan nie.

Volgens die waghondliggaam North Korean Economy Watch, is Namibië die land in Afrika wat die meeste geld, naamlik sowat US$67 miljoen, aan monumente en ander bouwerk deur M.O.P. bestee het.

“Noord-Korea het reeds meer as US$160 miljoen in die laaste tien jaar verdien uit die oprigting van reusemonumente en beeldhouwerke in lande in Afrika. Die grootste deel hiervan was afkomstig uit Namibië”, sê dié liggaam op sy webtuiste.

Bron: Die Republikein

VN ondersoek Namibiese bande met Noord-Korea

Namibië se skending van Resolusie 1718 van die Veiligheidsraad sal aanstons amptelik deur die VN ondersoek word, het die Republikien berig.

Agt deskundiges is in 2009 ingevolge resolusie 1874 aangestel met die mandaat om alle sanksies wat die VN teen Noord-Korea ingestel het, te monitor en inligting van lande wat in gebreke bly om aan die vereistes van die sanksies te voldoen, in te samel en te ontleed.

Die ondersoek kom ná ‘n berig wat op 8 Januarie in die Republikein verskyn het oor Namibië se bande met die Noord-Koreaanse maatskappy Korea Mining Development Trade Corporation (KOMID), wat onder die alias Mansudae Overseas Project Group of Companies (M.O.P.) in die land sake doen.

Republikein het betroubaar berig dat ’n amptelike brief waarin die ministerie van buitelandse sake gevra sal word om te verduidelik en oop kaarte met die VN ondersoekspan te speel, eersdaags gestuur sal word.

Vanweë die internasionale sanksies teen KOMID registreer die onderneming telkens ’n nuwe alias waaronder sake gedoen word. In Namibië het die maatskappy onder die naam van sy alias, Mansudae Overseas Project Group of Companies, onder meer die heldeakker, die nuwe Staatshuis (2008) en die Gedenkmuseum vir Onafhanklikwording (2011) gebou.

Wat nog meer kommerwekkend is, is dat die einste maatskappy nou besig is om ’n fabriek vir die vervaardiging van ammunisie by Luiperdsvallei op te rig.

Ingevolge die resolusie moet lidlande van die VN alle oorsese bates van individue en maatskappye betrokke by Noord-Korea se wapenprogramme vries. ’n Internasionale reisverbod is ook op werknemers van hierdie programme en hul families ingestel.

KOMID is een van die maatskappy wat in die bylaag tot resolusie 1718 by die naam genoem word.

“Dit word van alle lidlande van die VN verwag om die maatreëls wat hulle instel om te voldoen aan die bepalinge van die resolusie, binne 30 dae aan die Veiligheidsraad te rapporteer,” lui die resolusie.

Uit regeringskringe is nie vóór of nadat die berig geplaas is, ’n enkele woord gerep nie. Verskeie navrae na die skakelafdeling van die ministerie van buitelandse sake vir die regering om sy kant van die saak te stel en enige moontlike verduideliking te verstrek, het geen vrugte afgewerp nie.

Organisasie wat kragkrisis help skep, vaar uit teen kernkrag

Die organisasie, Earthlife Africa, ‘n versameling ekstremiste wat omgewingskwessies vir politiek aanwend, het die regering se planne om nuwe kernkragaanlegte te bou skerp veroordeel.

Dié organisasie is direk verantwoordelik vir die huidige kragkrisis in Suid-Afrika nadat hulle gesorg het dat die korrelbedkernreaktor vir Eskom gesink word in 2003.

Alhoewel byna niks oor ELA se eie struktuur en befondsing bekend is nie, sê hulle planne vir die nuwe kernaanlegte is nie deursigtig nie.

Earthlife Africa sê voorts dat groter infrastruktuur nie die oplossing vir die energiekrisis in die land is nie.

Die organisasie se woordvoerder oor energie-beleid, Dominique Doyle sê die inhoud van die ooreenkoms tussen Suid-Afrika, Amerika, Suid-Korea, Rusland, Frankryk en China bly steeds ‘n raaisel.

Doyle sê dit is wensdenkery dat die land se energiekrisis opgelos gaan word deur kernkrag.

Die presidensie het vroeër gesê die voorbereidende fase vir die nuwe kernkragaanlegte kan begin.

Die regering beplan om 9600 megawatt deur middel van kernkrag tot die kragnetwerk te voeg.

ELA het voorheen ook ‘n veldtog teen Sasol gevoer as ‘n besoedelende “apartheidsmonster”.

Niger se junta skop nes

Niger se nuwe militêre leiers het tenks en bakkies wat met masjiengewere belaai is, buite die ontvoerde president Mamadou Tandja se paleis parkeer.

Volgens AFP het militêre voertuie met outomatiese masjiengewere ook buite die kantore van die eerste minister en die buitelandse ministerie gestaan.

Die junta het nog nie bekend gemaak waar hulle die 71-jarige president aanhou nie.

Volgens Tandja se regering word hy by ‘n militêre basis op die buitewyke van die hoofstad Niamey aangehou.

Daar was geen teken van nuwe geweld ná Donderdag se gevegte buite die paleis waar drie soldate doodgemaak is en Tandja ontvoer is nie.

Gewapende rebelle is reeds die afgelope twee jaar in skermutselinge met die regering betrokke om ‘n deel van die uraanrykdom te bekom. Niger sal teen 2012 die wêreld se grootste uraanmyn bedryf.

Frankryk se Areva-maatskappy is die grootste aandeelhouer in die myn en die EU-land is afhanklik van die uraan vir hulle kernenergieprogram.

Danksy Areva is Frankryk die vierde grootste uraanprodusent ter wêreld en die leier in kernenergie. Bykans 80% van Franse krag word deur kernenergie opgewek.

Niger is in 2007 geskud deur anti-Areva betogings toe duisende inwoners teen die Franse maatskappy wat al 40 jaar in die land teenwoordig is, in opstand gekom het. Areva is uitgesonder vir kritiek aangesien die maatskappy slegs 0,5% van hulle jaarlikse wins aan Niger afstaan.

Niger is steeds een van die armste lande ter wêreld. Volgens ‘n ooreenkoms tussen Frankryk en Niger wat in 2007 gesluit is, mag Niger ook ooreenkomste met China en Indië aangaan wat hulle voorheen nie beskore was nie.

Volgens ingeligte bronne het China militêre steun aan Niger verleen in ruil vir uraanregte.

турецкий хамам

Uraan kan Potch se drinkwater vergiftig

Prof. Kobus van der Walt, van die skool vir geografie en omgewingsbestuur aan die Universiteit van Noordwes (NWU), het dië week by ’n seminaar van die Suid-Afrikaanse Kankervereniging (Kansa) gesê uraan is besig om vanaf die goudmyne langs die Wonderfonteinspruit in die Mooirivier in te sypel.

Volgens ‘n berig in Beeld los die suur mynwater die swaar metale op, ook die uraan wat in die modder van die Wonderfonteinspruit en die Tweelopiespruit aanwesig is. Dit spoel dan stroom-af.

Die hoofnavorser van Kansa, Dr. Carl Albrecht, sê Potchefstroom se drinkwater is in gevaar omdat 800kg uraan jaarliks in die Boskopdam, die enigste waterbron van die inwoners, vloei.

Navorsers van Kansa het reeds uraan in die stof van die stofsuiers in Carletonville aangetref.

Danksy goudmynbedrywighede lê daar 600 000 ton uraan op die mynhope van die Wes-Rand. Die mynhope stel glo radongas vry.

Bron: Beeld

римская баня