Etiket: VN-resolusie

Wrakstukke moontlik van verdwene MH370

‘n Ondersoekspan van Maleisië is na die ooskus van Afrika gestuur om vas te stel of wrakstukke wat naby die eiland Reunion gevind is moontlik dié van die vermiste Vlug MH370 is.

Maleisië het Woensdag gesê die span van ondersoekbeamptes sal help bepaal of die wrakstukke wel van die vliegtuig is wat verlede jaar oor die Indiese Oseaan verdwyn het.

Amptenare sê dit is waarskynlik die wrakstukke wat gevind is, maar verdere ondersoek is nodig.

Geen spoor kon nog gekry word van die Boeing 777 wat in Maart verlede jaar met 239 passasiers aan boord op ‘n vlug tussen Kuala Lumpur en Beijing verdwyn het nie. Die meeste passasiers was Chinese burgers.

Seestrome kon wrakstukke ver van die plek waar die vliegtuig neergestort het meegesleur het. Die ontdekking kan die grootste deurbraak wees in die tot dusver vrugtelose soektog na die vliegtuig.

Die Maleisiese minister van vervoer Liow Tiong Lai het met verslaggewers gepraat tydens ‘n besoek aan die Verenigde Nasies in New York.

‘n Stuk romp wat twee meter lank is, het Woensdag glo uitgespoel naby Saint-Andre, aan die oostekant van die eiland.

Die ontdekking kom ‘n dag nadat Rusland ‘n VN-resolusie vir ‘n internasionale tribunaal geveto het om die Maleisiese vliegtuig MH17 wat oor Oos-Oekraïne in 2014 afgeskiet is, te ondersoek.

Witali Tsjoerkin, Russiese ambassadeur by die VN, het die resolusie geblok. Rusland is een van die vyf permanente lede van die Veiligheidsraad met vetoreg.

Elf van die 15 lede van die raad het ten gunste van die resolusie gestem, wat opgestel is deur Australië, België, Maleisië, Nederland en die Oekraïne.

China, Venezuela en Angola het buite stemming gebly.

Rusland sê die gebeure rondom MH17 word verpolitiseer en die tribunaal sal nie reg laat geskied aan die slagoffers of die waarheid nie.

Die vliegramp het gelei daartoe dat sanksies teen Rusland ingestel is omdat die VSA voortydig besluit het Rusland moet verantwoordelik gehou word.

Noord-Koreane ontken bande met wapenbedryf in Namibië

Die Namibiese tak van die Noord-Koreaanse staatsmaatskappy Mansudae Overseas Project Group of Companies (M.O.P.) sê hy het géén bande met die omstrede Korea Mining Development Trade Corporation (KOMID) teen wie streng internasionale sanksies ingestel is nie.

KOMID is Noord-Korea se grootste wapenhandelaar en is by die verspreiding van ballistiese missiele en ander wapentuig aan lande soos Iran en Sirië betrokke. Die maatskappy verskans sy bedrywighede dikwels deur Noord-Koreaanse frontorganisasies te gebruik in die lande waar hy sake doen.

Volgens ’n goedgeplaaste intelligensiebron bestaan ’n verbintenis tussen M.O.P. in Namibië en KOMID.

Mnr. Ryong Choe, woordvoerder van M.O.P Architectural & Technical Services (Namibia), het vandeesweek gesê die maatskappy waarvoor hy werk “doen nét kuns- en konstruksiewerk en het niks met wapens te make nie”.

Volgens hom ken hy nie die twee Noord-Koreaanse amptenare, Kil Jong Hun en Kim Kwang Yon, wat in Namibië woon en KOMID se belange in Suider-Afrika behartig nie.

Hulle is twee van die tien Noord-Koreane teen wie die Amerikaanse tesourie in Januarie sanksies ingestel het.

Dit is gedoen omdat hulle resolusie 1718 van die Veiligheidsraad van die Verenigde Nasies (VN) oortree het. Dié resolusie is op 14 Oktober 2006 aanvaar nadat Noord-Korea op 9 Oktober 2006 ’n kerntoets uitgevoer het, strydig met die kernsperverdrag waarvan dié land ’n ondertekenaar is.

Ingevolge hierdie resolusie moet lidlande van die VN alle oorsese bates van individue en maatskappe betrokke by Noord-Korea se wapensprogramme bevries. ’n Internasionale reisverbod is ook op werknemers van hierdie programme en hul families geplaas.

Die twee mans se teenwoordigheid in die land het die Namibiese regering in ’n groot diplomatieke verleentheid gedompel. Dit het verlede week bekend geword die VN gaan op grond van dié gebeure ’n amptelike ondersoek gelas na Namibië se skending van resolusie 1718 van die Veiligheidsraad. Namibië is net soos Noord-Korea ’n ondertekenaar van die kernsperverdrag.

Volgens Choe verwerp M.O.P. in Namibië enige beweringe dat hy as frontorganisasie vir KOMID optree.

“Ons is reeds vir dekades wyd bekend in Namibië as een van die groot konstruksiemaatskappy en het ’n goeie naam onder ons kliënte en diensverskaffers. Ons het niks met KOMID te make nie en is nie ’n filaalmaatskappy van KOMID nie.

“Ons moedermaatskappy Mansudae Art Institute ”

Hy sê gerugte hieroor bring mee dat groot diensverskaffers wat reeds jare lank bou- en ander konstruksiemateriaal aan M.O.P. lewer, vra skielik vrae en wil weet wat aangaan.

Choe sê M.O.P. het noue bande met die Namibiese regering wat een van dié maatskappy se grootste en mees gewaardeerde kliënte is.

“Ons het staatshuis, die Heldeakker, die Oorlogsmuseum op Okahandja en die Gedenkmuseum vir Onafhankliheid gebou en was ook by talle ander kleiner konstruksieprojekte betrokke.”

Hy ontken dat M.O.P. enigsins betrokke was by die bou van die wapenfabriek by Luiperdsvallei en sê dit was ’n “ander Noord-Koreaanse maatskappy”, maar hy ken nie die naam daarvan nie.

Volgens die waghondliggaam North Korean Economy Watch, is Namibië die land in Afrika wat die meeste geld, naamlik sowat US$67 miljoen, aan monumente en ander bouwerk deur M.O.P. bestee het.

“Noord-Korea het reeds meer as US$160 miljoen in die laaste tien jaar verdien uit die oprigting van reusemonumente en beeldhouwerke in lande in Afrika. Die grootste deel hiervan was afkomstig uit Namibië”, sê dié liggaam op sy webtuiste.

Bron: Die Republikein