praag.co.za

Tag: Kiëf

  • Poetin vra dat internasionale gemeenskap Krim erken

    Die leiers van Frankryk en Duitsland is werklik op soek na ‘n skikking wat sal help om ‘n einde aan die konflik in die ooste van die Oekraïne te bring, het die Russiese president Wladimir Poetin gesê in sy jongste onderhoud.

    Tydens ‘n onderhoud met Rossiya 1 TV-kanaal oor die deurbraak van die Minsk-ooreenkoms waarvan die VSA nie deel is nie, het Poetin gesê “Dit lyk vir my [die leiers van Frankryk en Duitsland], het ‘n opregte begeerte om ‘n kompromie te bereik en oplossings te vind wat sal lei tot die uiteindelike skikking [van die konflik] … ”

    Hy het verwys na die Minsk-protokol wat die desentralisering van mag in die Oekraïne voorstel.

    “Ek het die indruk dat ons vennote meer vertroue in ons het as wantroue, en in elk geval glo in ons opregtheid,” het Poetin gesê.

    Poetin het weer die belangrikheid van die implementering van die Minsk-ooreenkoms benadruk wat op 12 Februarie deur die Normandië Vier – Oekraïne, Rusland, Frankryk en Duitsland – gesluit is. “As die Minsk-ooreenkoms geïmplementeer word, is ek seker die situasie sal geleidelik normaliseer,” het hy gesê.

    Intussen probeer die VSA die konflik aanwakker waarin duisende burgerlikes reeds omgekom het, deur wapens aan die junta te kanaliseer. Dit is een van die hoofredes waarom die VSA nie na die vredesamesprekinge in Minsk genooi is nie.

    Oor die moontlikheid van Rusland wat betrokke raak in ‘n oorlog met die Oekraïne, het Poetin gesê “so ‘n apokaliptiese scenario is skaars moontlik, en ek hoop dit sal nooit gebeur nie.”

    Wat die Krim betref, het die president die internasionale gemeenskap versoek om die Russiessprekende streek se keuse om deel van Rusland te wees, te respekteer.

    “Met betrekking tot nasionaliteit, het die inwoners van die Krim hul keuse gemaak [toe hulle gestem het om by Rusland aan te sluit] en dit moet gerespekteer word. Rusland kan nie anders optree nie,” het hy gesê.

    Oor die juntapresident Poroshenko se stelling dat Kiëf van voornemens is om die Krim te herower, het Poetin het gesê dat sulke optrede “wraaksugtig” is. Hy het beklemtoon dat ‘n groot Europese land soos die Oekraïne moet fokus op “die bevordering van die ekonomie en sosiale sektor, en verhoudings met die suidoostelike deel van die land behoort te herstel.”

    Die Oekraïne sê intussen hy gaan nie sy wapens onttrek volgens die besluite van die jongste Minsk-vredesooreenkoms nie, omdat “pro-Russiese rebelle aanhou om die skietstaking te verontagsaam”.

    ‘n Woordvoerder van die ministerie van verdediging in Kief, Wladislaf Seleznijof sê hulle oorweeg dit nie om swaar wapentuig te verwyder nie. Seleznijof sê die skietstaking moet vir minstens 24 uur gehoorsaam word, voor ‘n onttrekking kan begin.

    Die Oekraïense minister van buitelandse sake, Pavel Klimkin het voorts met konsternasie gereageer op voorstelle van ‘n VN- of EU-vredesmag in die wegbreekrepublieke waar regeringsmagte reeds swaar verliese gelei het en honderde van sy soldate gedros het.

    Ten minste 8000 mans in die Ivano-Frankivsk-streek wat deur Kiëf opgeroep is vir weermagdiens, is soek, het die nuusportaal Vesti berig. Die meeste het glo na ander lande gevlug om nie weermagdiens te doen nie.

    ‘n Britse regeringswoordvoerder sê die vredesmagbesluit sal alleen deur die VN se Veiligheidsraad geneem word, maar daar is geen sprake daarvan op dié stadium nie.

    Klimkin het gesê hy bevraagteken die “rasionaliteit” van só ‘n besluit en gesê sy regering se versoek om ‘n buitelandse aanvalsmag op die been te bring behoort nie deur die Minsk-ooreenkoms ongedaan gemaak te word nie.

    Die Oekraïne het vroeër gesê hy sal Sondag sy wapens begin onttrek, ná ‘n nuwe ooreenkoms met selfverdedigingsmagte en die Russiese weermag gesluit is.

    Volgens selfverdedigingsmagte het regeringstroepe egter 29 keer op hulle stellings gevuur in ‘n poging om die skietstilstand tot niet te maak.

  • Amerika speel ‘n gevaarlike spel

    Sedert die einde van die Koue Oorlog het Amerika sigself die titel as oorwinnaar van daardie konflik opgeëis. Natuurlik is daar groot waarheid daarin, want destyds, net soos tans het Amerika die olieprys afwaarts gemanipuleer en daardeur Sowjetinkomste nadelig beïnvloed. Die eskalering van die wapenwedloop onder leiding van Ronald Reagan het boonop meegebring dat die Sowjetbegroting  weens militêre besteding uitgeput is. Die afname in inkomste en gelyktydige vehoging in millitêre uitgawes het die Sowjetekonomie op sy knieë gedwing.

    Tog, dit was nie net Amerika wat die USSR ekonomies verslaan het nie. Nee, sedert die Bresjnjef-jare het die Sowjetekonomie gebuk gegaan onder korrupsie en stagnasie. Teen die tagtigerjare het hierdie wanfunksie van die Sowjetekonomie tesame met die lompheid van ‘n sentraal beplande ekonomie reeds dit sodanig afgetakel dat slegs groteske hervorming (vandaar Gorbatsjof se perestroika) dit van totale ondergang sou kon red. Perestroika was egter te min, te laat.

    Nietemin, sedert die einde van kommunisme en veral sedert Amerika se eerste golforlog het daardie land ‘n toenemend aggressiewe internasionale rol begin speel. Amerika se siening van haarselfs as die wêreld se enigste oorblywende supermoondheid is versterk. Ook met die konflik in Joegoe-Slawië sien ons hoe Amerka haar die rol van internasionale polisieman toeëien. Boonop orkestreer die CIA ‘n hele rits “kleurrewolusies” in voormalige Oosbloklande. Meer as ooit word “regimeverandering” Amerika se mantra. Onder die vaandel van “demokrasie” word pro-Amerikaanse regerings geïnstalleer. Met die histerie wat volg op die 9/11-aanval in New York, word Amerika se intervensionisme tot nuwe hoogtes gedryf.

    Onder die korrupte alkoholis, Boris Jeltsin, was Rusland presies waar Amerika dit wou hê. Sonder die USSR was hierdie sentrale republiek (RSFR) van die voormalige Unie se bevolking die helfte van die oorspronklike Moederland s’n. Boonop was dit in ekonomiese vryval waar alles te koop was aan die hoogste bieder. Tesame met Russiese oligarge was dit soos Kersfees vir Westerse grootsake. Alles, van Sowjet- militêre tegnologie, wat sorgvuldig oor dekades opgebou en geheim gehou is, tot die enorme Russiese minerale rykdom kon nou op die internasionale markplein deur die Westerse elite en hul Russiese eweknieë opgeraap word.

    Boonop was Jeltsin, wat soos ‘n benewelde Kersvader die gegryp na die Kersgeskenke onder die boom toelaat, ‘n geliefde figuur in Westerse hoofstede. Onder Jeltsin was geen CIA-kleurrewolusie  in Moskou nodig nie, want Jeltsin het beter meegedoen aan die afbreek van sy land as wat enige Amerikaanse popperegering sou kon doen. Rusland was in chaos, op sy knieë en daar vir die wêreldkapitaliste om  na hartelus te plunder. Dis presies waar die Weste Rusland wou hê – verneder en misbruik. Terloops, dit laat my heelwat aan die Afrikaner se situasie sedert 1994 dink.

    Dan verskyn Wladimir Wladimirowitsj Poetin op die toneel. Alles verander. Die “verskynsel Poetin” verdien ‘n skrywe opsigself. Hoe Poetin die situsie omkeer, wat hom dryf en sy strategie verdien ‘n aparte artikel. Poetin herstel orde in Rusland en daarmee saam Russiese trots. Soos die USSR, herstel Poetin ook Rusland se status as ‘n land met ‘n onafhanklike internasionale beleid en status. Meteens is Rusland nie onder die Amerikaanse invloedsfeer nie, en hier begin die probleme. Wat die Westerse media betref, is Poetin ‘n oorlogsugtige diktator. Ons moet onthou dat die Westerse media deur dieselfde belangegroepe wat by Amerikaanse millitêre besteding baat en wat onder Jeltsin vrye toegang tot die Russiese skatte gehad het, beheer word. Op die hoogste vlakke is daar geen onderskeid te tref tussen die belange van die Westerse kapitalistiese elite, Washington, die VSA- millitêre bedryfsektor, en die Westerse media nie.

    Laat ons nou die tyd aandraai tot waar ons vandag is: Amerika het onder leiding van die CIA en Victoria Nuland (van die Amerikaanse dept. van buitelandse sake) ‘n poetsj in Kiëf uitgevoer en daarmee ‘n pro-NAVO/VSA/EU-regering in die Oekraïne aangestel. Dit is gedoen om van die pro-Russiese president Viktor Janoekowitsj ontslae te raak. Die Amerikaanse/Westerse plan, wat reeds in 2013 deur die Jalta- Europese Strategieberaad bedink is, is bedoel om die Oekraïne nader aan die EU te bring. “EU” is ook kodetaal vir NAVO. Die staatsgreep in Kiëf is bewerk deur ‘n CIA- en Amerikaanse-buitelandsesakegekonkel waardeur Neo-Nazi-bullebakke en Oekraïniese oligarge gesamentlik Kiëf in chaos gedompel het en die demokraties verkose pro-Russiese regering van die dag verjaag het.

    Elke optrede in hierdie teater, deur Rusland, was deurgaans slegs ter wille van selfbeskerming. Die mees drastiese in hierdie stappe, nl. die terugname van die Krim deur demokratiese referendum (nadat Kroestjof dit in die vyftigerjare op ondemokratiese wyse aan die Oekraïne oorhandig het (let wel die Oekraïne was deel van die USSR), was om te verseker dat die eeue oue Russiese vlootbasis van Sewastopol, nie in NAVO-hande beland nie. Wie kan Rusland hiervoor blameer? Ook beweerde Russiese militêre betrokkenheid in die Russiessprekende Oos-Oekraïne, is moreel regverdigbaar, gegewe dat Kiëf hierdie provinsies eerste aangeval het.

    Rusland het geen ander opsie as om te verseker dat die Oekraïne nie in NAVO-hande beland nie, want indien NAVO-magte in die Oekraïne gestasioneer word, bring dit daardie bedreiging tot op die Russiese grens. Maar erger, dit bring dan ook Amerikaanse missielverdedigingstelsels tot op die Russiese wesgrens. Hierdie stelsels het die vermoë om Rusland se kernarsenaal groot skade te berokken. Sonder sy kernarsenaal is die Russiese beer se tande getrek. Die rede waarom daar nooit ‘n “warm millitêre konflik” in die Koue Oorlog-jare tussen die VSA en die USSR uitgebreek het nie, was juis omdat elk van hierdie moondhede oor ‘n kernarsenaal beskik. Hierdie vermoë van beide die VSA en die USSR het voorkom dat hulle mekaar enigsins direk militêr aanvat, selfs konvensioneel, want enige gevegshandeling sal vinnig tot ‘n kernaanval eskaleer. In so ‘n geval sou dit hul gesamentlike en totale vernietiging verseker, sg. “mutually assured destruction” of “MAD”. Eintlik sou die totale mensdom in so ‘n situasie omkom.

    Hierdie wedersydse skaakmat van die Koue Oorlog het ‘n kernoorlog voorkom. Amerika wil dit nou verander. Sommiges mislei hulself met die idee dat Rusland hardhandig hanteer kan word omdat dit kwansuis net ‘n skadu van die voormalige USSR is, ‘n argument wat net op konvensionele vlak geld. Hulle dink waarskynlik in terme van ‘n toekonstige situasie waar Amerikaanse missielverdedigingstelsels reeds op die Russiese Rostofgrens ontplooi is. In so ‘n geval sou Rusland teoreties gesproke slegs op sy konvensionele magte kon staatmaak. Hierdie is egter ‘n gevaarlike dobbelspel, want hoewel Rusland tot op datum enorme selfbeheersing uitgeoefen het, sal die ontplooiing van Westerse missielstelsels in die Oekraïne al die waarskuwingsligte in die Kremlin laat afgaan. Rusland sal so ‘n skuif probeer voorkom nes daar vroegtydig opgetree is om Sewastopol onder hulle beheer te hou. Hierdie sou dus ‘n strategiese rooilyn vir die Russe verteenwoordig. Die Weste moet nie Rusland se konvensionele vermoë onderskat nie, en dan die moontlikheid van nog erger – sy kernmagte.

    Vir Rusland is die Navofisering van die Oekraïne op elke vlak net so ‘n groot bedreiging as wat die ontplooiing van Sowjetmissiele in Kuba vir President Kennedy se VSA ingehou het. Intussen is NAVO/VSA besig met ‘n millitêre opbou in Pole en die Baltiese state, op die Russiese grens. Boonop suggereer Washington d.m.v. nuwe wetgewing ‘n rigting van millitêre opleiding en hardeware aan die Oekraïne. Verder streef die Oekraïne daarna om ‘n NAVO-lid te word en die ope geheim is dat Brussel dit ook begeer.

    Terwyl die Weste die oorlogstromme slaan, die Russiese ekonomie deur sanksies en olieprysmanipulasie (weereens) deur die VSA en Saoedi’s gekniehalter word, en onderlangs bedink word hoe om die Oekraïne by NAVO in te lyf en daarmee NAVO tot op die grens van Rusland se Rostofstreek te bring, word die Russiese beer in ‘n hoek gedryf. Die oorlogsugtige Weste moet baie versigtig wees, want met 2500 strategiese kernplofkoppe en nog sowat 2000 taktiese kernplofkoppe is Rusland nie ‘n Afghanistan, Irak of Sirië nie. Die Weste mag weliswaar nog hulle oorlog met Rusland kry, maar dit sal nie langer as ‘n halfuur duur nie…

  • MH17-wrak na Nederland, Duitsland blus NAVO-hoop

    Wrakstukke is eindelik van die toneel in die ooste van die Oekraïne verwyder waar die Maleisiese Vlug MH17 neergeskiet is.

    Die stukke sal per vragmotor en per trein onder toesig van Nederlandse kenners vervoer word na Kharkof.

    Van die stukke was te groot om per trein vervoer te word, het die Nederlandse regering gesê.

    Die wrakstukke sal saam met die oorskot van slagoffers, wat nog nie geïdentifiseer is nie, na Nederland geneem word.

    Die vliegtuig is in Julie afgeskiet en al 298 passasiers, van wie die meeste Nederlanders was, is dood.

    Getuienis dui daarop dat die vliegtuig deur Kiëf afgeskiet is, maar die juntamisdadigers word beskerm deur die VSA wat ‘n kleurrewolusie geloods het om die land by NAVO in te lyf.

    Die Organisasie vir Veiligheid en Samewerking in Europa se woordvoerder van die Spesiale Sending na die Oekraïne, het die operasie om die wrakstukke te skuif, bevestig.

    Duitsland se minister van Buitelandse Sake, Frank-Walter Steinmeier, het intussen verklaar dat hy gekant is teen die Oekraïne se aansluiting by NAVO.

    In ‘n onderhoud met Der Spiegel, het hy gesê hy beskou nie lidmaatskap as ‘n opsie nie.

    Hy het ook bygevoeg dat hy nie glo dit is realisties vir die Oekraïne om by die Europese Unie aan te sluit in die afsienbare toekoms nie, want die ekonomiese en politieke modernisering van die Oekraïne is ‘n “projek vir ‘n paar geslagte”.

    Steinmeier het voorts versoek dat Kiëf ten eerste korrupsie en wanbestuur van die ekonomie aanpak as die mees dringende uitdagings, alvorens hulle aansluitingsplanne maak.

    NAVO hou vegvliegtuie op bystand in Oos-Europa as deel van sy Baltiese missie, maar het intussen die aantal verhoog met die oog op uitbreiding na die ooste.

    Daar was voorheen vier NAVO-vegvliegtuie om die Europese lugruim te bewaak, maar nou is daar 18.

    Die Russiese presidensiële woordvoerder Dmitri Peskof het intussen aan die BBC gesê NAVO se geleidelike uitbreiding maak Rusland “senuweeagtig”.

    Rusland eis ‘n “100 persent waarborg dat niemand die Oekraïne aansluiting by NAVO sal oorweeg nie,” het Peskov gesê.

    Jeff Rathke, ‘n woordvoerder vir die Amerikaanse State Department, het egter verklaar dat Washington die Oekraïne se ambisie om by NAVO aan te sluit, ondersteun.

    Hy het gesê die “finale besluit” berus by Kiëf se Amerikaans-gesteunde junta.

    Rathke het ook gesê dodelike militêre hulp aan die Oekraïne is nog nie “van die tafel af” nie.

  • Kiëf verbreek skietstilstand

    Die lughawe naby Donetsk in die ooste van die Oekraïne wat deur die selfverdedigingsmagte beset is, is Maandagaand deur vuurpyle bestook, het die Oekraïnse weermag bekend gemaak.

    Die lughawe is in Mei reeds ernstig beskadig in swaar gevegte. Maandagaand is dit vier keer deur mortiere en vuurpyle getref. Niemand is in die aanvalle beseer nie.

    Dis een van talle verbrekings van die wankelrige skietstilstand wat Vrydag tussen die Kiëf-regering en selfverdedigingsmagte ná vyf maande se konflik onderteken is.

    Die skietstilstand is in Minsk onderteken voor die NAVO-beraad in Wallis ten einde geloop het, nadat die Russiese president Wladimir Poetin ‘n vredesplan aangekondig het.

    Dié vredesplan het die oorlogskoors wat NAVO teen Rusland in die Oekraïne stook gedemp, maar ontleders meen Kiëf sal ongelukkig aanhou om die skietstilstand te breek om die vredesplan te probeer kelder.

    Indien die konflik aanhou, is die kanse dat NAVO sal toetree groter, sê hulle.

  • NAVO saboteer vredesproses in Oekraïne

    NAVO misbruik die Oekraïense krisis as ‘n verskoning om sy militêre teenwoordigheid nader aan Rusland se grense uit te brei en planne vir ‘n nuwe vinnige reaksiemag sal die vredesproses in die ooste van die Oekraïne saboteer, het die Russiese Federasie gesê.

    Rusland se voormalige NAVO-gesant, Alexander Grushko, het NAVO intussen ook daarvan beskuldig dat die VSA “probeer om die finansiële las van die handhawing van NAVO op sy bondgenote af te laai”. Sonder ‘n groot inspuiting van fondse en ‘n nuwe doelwit is NAVO gedoem aangesien die alliansie se bemoeienis met die Midde-Ooste ‘n fiasko gebaar het in lande soos Libië.

    ​​Ten minste 4000 troepe sal in die reaksiemag dien wat deur NAVO goedkeur is.

    “Die [uitbreiding]planne deur NAVO word al vir ‘n lang tyd voorberei, en die onlangse gebeure het as ‘n verskoning gedien om dit te laat realiseer,” het die Russiese ministerie van buitelandse sake in ‘n verklaring op hul webwerf gesê, na aanleiding van ‘n besluit by die NAVO-beraad in Wallis.

    “Saam met die retoriek by die beraad, en die beplande militêre oefeninge voor die einde van die jaar, sal hierdie spanning verhoog, die ontluikende vredesproses destabiliseer, en ‘n verdere uitbreiding van die konflik in die Oekraïne tot gevolg hê,” het die ministerie se verklaring gelui.

    “Die bogenoemde is ook bewys van NAVO se onvoorwaardelike steun vir die ekstremiste en neo-fasciste in Kiëf, insluitend die Regse Sektor se politieke beweging,” het hy beklemtoon.

    Tydens die twee-dag-beraad, het die 28 NAVO-lidlande op die skepping van ‘n vinnige reaksie-eenheid van ten minste 4000 besluit. Dié mag sal in minder as 48 uur in Oos-Europa ontplooi kan word.

    Die primêre rede vir die inisiatief is glo “Rusland se aggressie teen die Oekraïne”. Die Oekraïene was voorheen deel van Rusland en word beskou as die oorsprong van die Slawiese kultuur.

    Grushko het die uitgediende “Koue Oorlog-denke” veroordeel en gesê die geskiedkundige 1997-ooreenkoms waarin Moskou en Brussel amptelik verklaar het dat hulle nie meer “teenstanders” is nie, word hierdeur ondermyn.

    In ‘n TV-onderhoud, het Grushko gesê dat NAVO ‘n verhoogde teenwoordigheid van NAVO-skepe in die Oossee en Swart See gelas het wat die vlak van vertroue om potensiële brandpunte op te los, vernietig het.

    Grushko het ook die beplande NAVO-Oekraïne-oefening ‘n “provokasie” genoem want “buitelandse troepe sal in ‘n land opdaag wat teen sy eie mense veg”.

    Die oorlog wat Kiëf teen Russiessprekende minderhede in die land verklaar het, het Rusland vroeër genoop om humanitêre hulpkonvooie na die oorlogsgeteisterde ooste te stuur.

    “NAVO moet geen rol in die Oekraïense konflik speel nie,” het die amptenaar gesê aan die Rossiya-24-netwerk.

    Verenigde State van Amerika se president het Vrydag gesê dat die VSA en die Europese Unie voortgaan met sanksies teen Rusland ten spyte van die ondertekening van ‘n skietstilstand-ooreenkoms.

    Barack Obama het in Newport, Wallis aan die einde van ‘n NAVO-beraad gesê hy is skepties oor ‘n vredesverdrag wat deur verteenwoordigers van Kiëf, Lugansk en Donetsk slegs ure vroeër in Minsk onderteken is, en het gesê die VSA van voorneme is om voort te gaan met nuwe sanksies.

    Die aankondiging van bykomende sanksies teen Rusland deur die Europese Unie is ‘n direkte ondersteuning van Kiëf se “Oorlogsparty” het Rusland se ministerie van buitelandse sake Saterdag gesê.

    “Die Europese Unie het getoon dat die owerhede steeds in ‘n politieke fantasie leef, en hulle verskaf byna direkte ondersteuning aan die Oorlogsparty in Kiëf, wat nie tevrede is met die uitkoms van die Minsk-vergadering nie,” het die ministerie gesê.

  • Oekraïense junta verder teruggedryf

    Soldate van die Oekraïense junta het teruggeval van die Lugansk-lughawe en ‘n nabygeleë dorp in die ooste van die land nadat hulle onder swaar vuur gekom het, het die sekuriteitswoordvoerder in Kiëf Maandag gesê.

    “Oekraïnse soldate het ‘n bevel ontvang en georganiseerd teruggeval van die Lugansk-lughawe en die dorp Georgijiefka,” het Andrij Lysenko gesê.

    Berigte dui daarop dat Kiëf se magte in chaos verkeer nadat hulle lugaanvalle op Russiesprekende burgers in die ooste nie vrugte afgewerp het nie.

    Kiëf probeer hul nederlae herhaaldelik toeskryf aan ‘n “Russiese inval”, maar die verklarings is grootliks fantasievlugte van die owerhede want daar is geen teken van die Russiese Federasie se teenwoordigheid in die land nie.

    “Te oordeel aan die presiesheid van die aanvalle is dit waarskynlik die Russiese gewapende magte wat op die soldate gevuur het,” het Kiëf in die jongste van dié soort verklarings gesê.

    Die lughawe en Georgijiefka is ‘n paar kilometer suid van die selfverdedigings magte se vesting in Lugansk geleë.

    Intussen het Moskou hul skok te kenne gegee dat die Oekraïne se minister van verdediging, Valery Geletej beweer dat Rusland ‘n “kernaanval” op sy buurman beplan.

    Rusland het gewaarsku dat sulke onverantwoordelike retoriek die burgerlike konflik in die Oekraïne net verdiep.

    “Dit is moeilik om te glo dat sulke uitlatings kan kom van ‘n minister van verdediging van ‘n beskaafde staat. Andersins, is dit net nie duidelik hoe tien duisende Oekraïense gesinne só ‘n amptenaar met die lewens van hul kinders, broers en mans, gemobiliseer in die Oekraïense weermag om ‘n oorlog te voer teen hul eie mense, kan vertrou nie.”

    Betogers in Kiëf het Maandag geëis dat die Oekraïense president en minister van verdediging moet bedank.

    Vroeër Maandag, het die Russiese minister van buitelandse sake Sergei Lawrof beklemtoon dat daar “geen militêre ingryping deur Rusland in die konflik in die Oekraïne” sal wees nie.

  • Paniek heers in Kiëf weens nederlae teen selfverdedigingsmagte

    Die Russiese President, Wladimir Poetin het ingestem tot samesprekings om Oos-Oekraïne se selfstandigheid te bespreek. Dit moet volgens Poetin gedoen word om die regmatige belange van mense in die gebied te beskerm.

    Samesprekings word vandag in Mintsk in Belo-Rusland tussen die Europese Unie, die Oekraïne en Rusland gevoer om die krisis in die Oekraïne te bespreek.

    Die EU en die Oekraïne het reeds gewaarsku dat die geweld in die gebied die punt bereik het vanwaar daar geen omkeerkans is nie.

    Kiëf verloor sleg op die oomblik. Al die verslae van Oos-Oekraïene se bronne is dit eens dat die sjokeladekoning se magte omring is of gevlug het. Kiëf se bronne het dit self ook bevestig.

    In die hoofstad is die krake sigbaar en Nazi’s beskuldig die militêre opperbevel dat hulle die werklike ongevallesyfers wegsteek en soldate in die Donbass versaak het.

    Nazi-betogers eis die skepping van ‘n “generaalbataljon” bestaande uit slegs generaals wat gestuur sal word om persoonlik te gaan veg in stede daarvan om hul manskappe na hul dood te stuur.

    Hele bataljonne dros en spesmagte moet uitgestuur word om hulle te keer. Blykbaar is die juntapolisie te bang om die oligarg se soldate vir drostery te arresteer as gevolg van hul groot getalle.

    President Poroshenko moes sy reis na Turkye kanselleer en inderhaas sy Veiligheidsraad byeenroep. ‘n Ander anti-Russiese oligarg, Ihor Kolomoiski, wat die suidwestelike Oekraïne beheer, het dieselfde ding met sy eie Veiligheidsraad gedoen. (Ja, want hy het sy eie weermag en sy eie veiligheidsraad!). Julia Timosjenko wil selfs krygswet laat afkondig.

    Poroshenko sowel as Jatsenjoek, sy premier, het beide daarop aangedring dat NAVO ingryp en die Oekraïne as ‘n spesiale bondgenoot aanvaar. Met ander woorde, al die tekens van totale en uiterste paniek heers in die land.

    Wladimir Poetin het intussen aan sy buurland se leiers gesê hulle moet ophou om oor tegniese beuselagtighede te redekawel en oor die grondoorsake van die konflik begin onderhandel met selfverdedigingsmagte. Hy het beklemtoon dat Rusland nie die teenparty is nie, maar hul eie burgers wat hulle aanval en vermoor. Terloops, die Kremlin verwys nou openlik na Novorussiya.

    Verder het die Russe amptelik aangekondig dat hulle ‘n tweede hulpkonvooi sal stuur.

    Poetin het selfverdedigingsmagte aangemoedig om humanitêre korridors oop te maak sodat Kiëf se soldate veilig kan terugkeer huis toe, maar die aanbod is deur die sjokeladekoning se opperbevel van die hand gewys wat klaarblyklik die ergste probeer uitstel en eerder soldate na hul dood sal stuur as om sy ooglopende nederlaag in die gesig te kyk.

    Die onverkose Eurokrate in Brussel klou intussen vas aan hul weelderige ampstoele met dreigemente van bykomende sanksies teen Rusland. Dat die VSA hulle gebruik vir die Empaaier se doelwitte, is pynlik opsigtelik, want nie een van die EU se uitsprake maak enige ekonomiese sin nie.

    Die Europese Unie is volgens berigte besig met die voorbereiding van nuwe sankies.

    Die beste wat hierdie ongelukkige burokrate egter aanstons sal kan doen is om te onderhandel met Rusland oor die terme waaronder die Oekraïne die ooreenkoms met die EU sal bekragtig, in hul eie belang.

    Daar is ‘n paar punte om in gedagte te hou as dit by onderhandeling kom:

    a) Geografies: Die Oekraïne is ‘n kunsmatige land wat voorheen deel was van Rusland
    b) Politiek: Die interne regime in Kiëf is Nazi
    c) Geo-strategies: Die eksterne regime in Kiëf is ‘n russofobiese Amerikaanse marionet
    d) Ekonomies: Die Oekraïne is ekonomies vernietig deur die EU en VSA

    Al hierdie faktore wys duidelik na dieselfde gevolgtrekking: Die Oekraïne word uitmekaar geskeur deur ‘n aantal gierige oligarge onder die NeoCons se aanmoediging met ‘n bende hondsdol Nazi’s aan bewind wat diensplig ingestel het om duisende na hul dood te stuur.

    Maar kort van ‘n soort van wonderwerk, sal die gemors wat die VSA net soos in Libië en Irak weer eens agterlaat, ontsettende lyding en opoffering vir gewone mense beteken.

  • Sjokeladekoning van Kiëf pleit vir vrede

    Oekraïne se sjokeladekoning, die oligarg pres. Petro Poroshenko, het ná laatnag onderhandelinge met Rusland se president, Vladimir Poetin, onderneem om hard te werk ten einde ’n dringende skietstilstandooreenkoms te reël.

    Die selfverdedigingsgroepe in Oos-Oekraïene het die weermag van die junta in Kiëf swaar verliese laat ly, wat die president genoop het om te onderhandel.

    Dié verrassende wending kom nadat Westerse mediabronne probeer voorgee het dat die selfverdedigingsgroepe beslissend verslaan en teruggedryf is deur Kiëf.

    Poroshenko, wat die bynaam “Pol Pot Shenko” gekry het nadat hy oorlog verklaar het op Russies-sprekende burgers van sy eie land, hoop om ’n einde te maak aan die separatiste konflik in die ooste van die voormalige Sowjet-republiek.

    Die eerste gesprek tussen die twee leiers sedert Junie is deur Poetin as positief bestempel, maar hy het bygevoeg dat dit nie Rusland se plek was om betrokke te raak by die besonderhede van die ooreenkoms tussen die regering in Kiëf en die twee konflikgeteisterde gebiede in die ooste van die land nie.

  • Amnestie Internasionaal vra ondersoek na Kiëf-wetgewer

    Amnestie Internasionaal (AI) het ‘n ondersoek gevra na die misbruik van mag deur pro-Kiëf vigilantes soos die Oekraïense ultra-radikale LP Oleg Lyashko. Die organisasie het getuienis van gevalle van ontvoering en fisiese geweld teen slagoffers.

    Lyashko se sogenaamde “ondervragings” is op sy amptelike YouTube bladsy te siene. Die menseregtewaghond het ‘n verslag uitgereik wat eis dat die wetgewer aanspreeklik vir sy dade gehou moet word.

    Amnesty International het sy kommer met die Oekraïense owerhede gedeel oor die ontvoerings en mishandeling van individue in die hele streek, luidens ‘n verklaring.

    Lyashenko is ‘n voormalige presidensiële kandidaat wat berug is vir sy anti-Russiese uitsprake.

    “Oleg Lyashko is veronderstel om ‘n wetgewer te wees, maar hy het die wet in sy eie hande geneem,” het die verklaring gesê. “Eer aan die Oekraïne, dood aan die teenstanders is sy strydkreet.”

    Die wetgewer word altyd vergesel deur gewapende jong mans in militêre klere as hy reis en rekords van sy ontvoerings en mishandeling opneem vir Facebook om daarmee te spog.

    Die video’s wys mishandeling wat in stryd is met “die reg op ‘n billike verhoor, vryheid en veiligheid van die persoon, en die reg om nie aan marteling of ander soort mishandeling onderwerp te word nie,” sê AI.

  • Russe tel hele Donderdag aktiewe missiel-radar op

    Die Maleisiese vliegtuig is glo afgeskiet oor die Oekraïne met ‘n Oekraïense Buk-missielstelsel wat operasioneel in die gebied was, het die Russiese ministerie van verdediging gesê, nadat Kiëf beweer het daar was nie sulke stelsels ontplooi nie.

    Die missielstelsel is binne die gebied ontplooi waar dit die vliegtuig kon afgeskiet het, het die departement in ‘n verklaring gesê. Uitstraling van die stelsel se radar is deur die Russiese weermag opgetel.

    “Russiese toerusting het die hele duur van 17 Julie die aktiwiteit van ‘n Kupolradar opgetel, ontplooi as deel van ‘n Buk-M1-stelsel naby Styla [‘n dorpie sowat 30 km suid van Donetsk],” het die ministerie in ‘n verklaring gesê.

    Die ministerie het gesê die radar kan gebruik word om opspoorinligting aan ‘n ander stelsel te stuur in die gebied, wat missiele binne reikafstand van die vlugroete kon geplaas het.

    Vroeër het Kiëf beweer dat hulle nie ‘n missiel op die verbygaande burgerlike vliegtuig kon afvuur nie, want hulle het geen Buk-missielstelsel wat ontplooi is in die streek nie.

    Terselfdertyd het die Oekraïners bevestig dat die separatiste oor geen Buk-stelsels beskik nie, volgens ‘n amptelike verklaring van die land se prokureur-generaal.

    Na afloop van die Russiese ministerie se vrystelling van inligting, het Bogdan Senyk, ‘n woordvoerder vir die Oekraïense ministerie van verdediging skielik Kiëf se posisie verander, en gesê “anti-vliegtuig missiele is nie gedurende die anti-terreur operasie ontplooi nie… hulle is alles in plek.

    “Die tragedie van ‘n Maleisiese vliegtuig wat in die ooste van die Oekraïne neergestort het, moet deeglik en objektief ondersoek word, het die Russiese president Poetin gesê in ‘n verklaring.

    Hy het gesê die tragedie beklemtoon die dringende behoefte vir ‘n vreedsame oplossing van die gewapende konflik in die Oekraïne.

    Poetin se verklaring het gekom nadat hy aan die Nederlandse premier Mark Rutte meegevoel oor die dood van sy mede-burgers in die ramp uitgespreek het.

    Die meerderheid van die passasiers van die noodlottig vlug was uit Nederland.

    Dit is steeds nie duidelik hoekom die vlug deur Oekraïense grondpersoneel oor die oorlogsgeteisterde gebied gestuur is nie.

  • Straatboef Brennan besoek Kiëf in geheim

    Straatboef Brennan besoek Kiëf in geheim

     

    john-brennanDie direkteur van die Amerikaanse CIA, John O. Brennan het onlangs in die geheim na die Oekraïne gereis.

    Brennan se geheime besoek aan die Oekraïense hoofstad was om die opstand wat Oos-Oekraïne teister, te bespreek met die staatsgreepleiers, sy bondgenote.

    Dit is gerapporteer deur verskeie Europese nuusagentskappe dat Brennan op 12 April in Kiëf aangeland het met ‘n diplomatieke paspoort onder ‘n vals identiteit. Die CIA self wou nie sy besoek bevestig of ontken nie.

    Brennan het, na wat berig word, planne bespreek om pro-Russiese Oekraïners in die ooste met uiterste geweld uit te dryf.

    Brennan en ander Amerikaanse regeringsamptenare is ook verantwoordelik vir die etiket “terroris” vir diegene wat na onafhanklikheid streef in die ooste van die land.

    Dit is deel van ‘n groot Amerikaanse en Westerse propaganda-oorlog teen die oostelike Oekraïene en die Russiese regering.

    Die intelligensie vir Brennan se geheime besoek aan Kiëf het glo hoofsaaklik gekom van staatsgreep-lojaliste sowel as die Oekraïense Kommunistiese Party wat nog steeds dien as lede van die Oekraïense parlement.

    Dit is ook betekenisvol dat Brennan getroud is met Kathy Pokluda, van Tsjeggiese afkoms.

    Brennan se bande met die Tsjeggiese Republiek se huidige leiers wat giftig anti-Russies is, kan ook verduidelik waarom hy so gretig is om spanning met Moskou aan te blaas.

    Die voormalige Tseggiese president, Vaclac Klaus, egter, het sy ontsteltenis oor die VSA en Europa se inmenging teen Rusland se grens rugbaar gemaak.

    Die Verenigde State en Brittanje noem die leiers van die gewelddadige opstand in Februarie “vryheidsvegters” en “pro-demokrasie kragte”.

    Die Weste se “vryheidsvegters” het oudergewoonte ‘n aantal burgerlikes doodgeskiet sowel as polisiebeamptes in die hoop dat dit vyandighede sal skep wat op ‘n burgeroorlog sal uitloop. Dit sou die VSA se verskoning wees om “in te gryp”.

    Die CIA, met behulp van George Soros se frontorganisasies en media reik aanmekaar die sogenaamde “talking points” oftewel besprekingspunte uit wat hul bedrywighede as bevorderlik vir die mense van die land uitbeeld. Niks kan verder van die waarheid wees nie.

    Brennan se pro-Saoedi bande is ook welbekend. Hy het trouens voorheen die bynaam “Sjeik Brennan” verwerf. Hy het klaarblyklik geen kwellinge oor die ondemokratiese welstand van Saoedi-Arabië nie en ontferm homself slegs oor lande by Rusland se grens.

    In reaksie op Brennan se teenwoordigheid in die Oekraïense hoofstad, het die Russiese minister van buitelandse sake Sergei Lawrof ‘n verduideliking van Washington geëis, maar nog geen antwoord ontvang nie.

    Die CIA het ‘n lang geskiedenis van inmenging om hul gunstelinge aan die mag te kry, en vanaf sulke pionne se politieke opgang tot hul val gebeur niks toevallig nie.

    Voorbeelde soos die diktator Mobutu Sese Seko, die Dominikaanse Republiek se Rafael Trujillo, Panamese diktator Manuel Noriega en Nicaragua se Anastasio Somoza is ‘n paar bekendes wat deurgeloop het onder hul hande.

    Kiëf kan begin bekommer want die CIA raak gou moeg vir hul vriende. Die bogenoemdes is almal vinnig uit die samelewing verwyder toe hul nut opgeraak het.

    Die Oekraïense Kommunistiese partylid, Vladimir Golub, het aan RIA Novosti vertel dat die geheimediens van sy land pas volledig ‘n eenheid van die CIA geword het.

    Brennan, wat bekend is as ‘n “platvloerse straatboef” by sy kollegas, is nie die mees welkome figuur in die Oekraïne as die owerhede daar werklik uitsien na ‘n vreedsame uitkoms nie.

    Die VSA het pas aangekondig dat hulle troepe na Oos-Europa gaan stuur, oënskynlik vir “oefeninge”, maar dit is duidelik dat die soldate eintlik bestem is vir die Oekraïne.

  • Duisende ruk op in ooste van Oekraïne teen besetters

    Duisende ruk op in ooste van Oekraïne teen besetters

    donetskDuisende mense met Russiese vlae het Sondag die strate ingevaar in die die ooste van die Oekraïne teen die vreemde besetting van die land.

    Dit die vermoede versterk dat die selfaangestelde owerhede – wat in wese eintlik twee oligarge is wat hulself in Kiëf in beheer geplaas het – nie in ‘n houvas op die land het na hul onlangse staatsgreep nie.

    Die putsch-regering is uiters ongewild by die inwoners omdat hulle nie verkies is nie.

    Betogers in die stede van Donetsk, Lugansk, en Kharkov het Sondag staatskantore beset.

    In Donetsk het inwoners ook daarop aangedring dat ‘n onafhanklikheidsreferendum gehou word. Die meerderheid van die inwoners is Russiese sprekers.

    Meer as 2000 mense het in die middel van Donetsk ‘n petisie geteken ter ondersteuning van die Berkut-beamptes. Hulle glo die beamptes word valslik beskuldig van die gebruik van vuurwapens teen die betogers tydens die Maidanpleinoproer.

    Ooggetuies en mediese personeel by die lykshuis en hospitale het intussen bevestig dat lede van Berkut sowel as die betogers deur sluipskutters met dieselfde wapens gedood of gewond is.

    Die deelnemers het ‘n beroep op die “onwettige junta in Kiëf” gedoen om politieke onderdrukking en vervolging van andersdenkendes te beëindig, het die ITAR-Tass-nuusagentskap berig.

    Hulle eis dat hul reg om selfbeskikking gerespekteer word, en oefen druk uit sodat ‘n Krim-styl referendum oor onafhanklikheid van Oekraïne gehou word.

    Die betogers het Russiese nasionale vlae rondgeswaai, “Rusland! Rusland!”gedreunsing en baniere opgehou wat aandring daarop dat die nuwe streeksgoewerneur van Donetsk bedank.

    Die streeksgoewerneur, Sergey Taruta, wat onlangs aangestel is deur Kiëf, moet uit, sê hulle.

  • Weste blind vir Nazi’s in Oekraïene

    Weste blind vir Nazi’s in Oekraïene

    nazikievDie Weste hou hulself blind vir neo-Nazi’s wat in Kiëf betoog om by die EU aan te sluit.

    Die Oekraïense betogers bots met die polisie in die hoofstad na duisende mense aan ‘n anti-regeringsbetoging oor die naweek deelgeneem het, omdat hulle nie deel wil wees van die Russiese federasie nie.

    Die mees aggressiewe groep betogers, wat bekend staan ​​as ultra-nasionaliste, het die polisie met brandbomme en klippe bestook.

    Die president van die Oekraïne, Wiktor Yanukowitsj, het ‘n verklaring uitgereik waarin hy die geweld tussen die polisie en teen-regeringsbetogers veroordeel.

    Hy sê dit hou ‘n bedreiging vir die hele land in.

    Hy het ‘n oproep om vreedsame gesprek gedoen, nadat ‘n vooraanstaande opposisie-figuur, die wêreldberoemde bokser, Witali Klitsjkow alle Oekraïners aangespoor het om by die betoging aan te sluit.

    Klitsjkow sê hulle moet veg vir die toekoms van hul land.

    Die toneel naby die parlement is steeds gespanne, met skermutselinge tussen die onlustepolisie en betogers.

    Skokgranate en rubberkoeëls is vroeër afgevuur, om tussen 200 en 400 vasberade betogers te verwilder.