Namibië – Bladsy 5 – praag.co.za

Nog ‘n renoster val in Etosja

Die eerste renosterkarkas wat vanjaar in die Etosja Nasionale Park gestroop is, is Vrydag gevind. Dit is die vierde karkas wat in vyf maande in dié spogpark gevind is, het die Republikein berig.

’n Karkas van ’n jong renoster met drie koeëlwonde is Vrydag deur toeriste by ’n watergat by Dolomite Camp aan die westekant van die park gevind.

Die hoof van die polisie se eenheid vir beskermde spesies (PRU), hoofinspekteur Barry de Klerk, het gister die voorval aan Republikein bevestig.

“Dit is bevestig dat ’n renosterbul geskiet is. Hy het sowat ses kilometer ver gehardloop nadat hy gekwes is en by die watergat geval en gevrek,” het De Klerk gesê. “Die horings is nie verwyder nie. Volgens parkbeamptes is die bul sowat vyf jaar oud.”

’n Windhoekse egpaar wat die naweek by Dolomite Camp was, sê hulle is belet om by die watergat in te gaan, want parkbeamptes was glo besig met ’n operasie.

“Later het hulle weer verby ons gery en dit het gelyk of daar iets agterop die lorrie gelê het. Daar was ’n klomp regeringsvoertuie,” het die man gesê.

Die eerste renosterkarkas wat in Etosja gevind is, was einde Oktober verlede jaar in die suidwestelike gedeelte van die park gekry. Die horings van die swartrenosterbul was verwyder.

Die renoster was met ’n naspoortoestel toegerus en toe die sein skielik verdwyn, het natuurbewaarders na die renoster gaan soek en die karkas in die omgewing van Otjovasandu gekry. Dit word vermoed dat die renoster twee of drie dae voor die karkas gevind is, gestroop is.

In November is nóg twee renosterkarkasse met hul horings verwyder in Etosja gevind.

Die twee karkasse is sowat drie tot vier kilometer van mekaar in die omgewing van Ombika gevind.

Volgens die ministerie van die omgewing en toerisme is die een moontlik in Februarie 2014 gestroop en die ander karkas was sowat twee tot drie maande oud.

Een van die verdagtes van renosterstropery in Etosha, dr. Gerson Kandjii, die voormalige spandokter van die Brave Warriors, is tans in aanhouding saam met vier ander beskuldigdes, nadat hy van die onlangse moord op mnr. Reinhard Schmidt, die Duitse eienaar van die Namibië Hoodia Jagplaas naby Kalkrand, aangekla is.

Minstens 34 renosterkarkasse is verlede jaar in Namibië gevind.

Athisaari wens Namibië geluk

Die Nobelpryswenner, voormalige president van Finland en die spesiale verteenwoordiger van die sekretaris-generaal van die Verenigde Nasies vir Namibië in 1989 en 1990, mnr. Martti Athisaari, het n spesiale boodskap van gelukwensing aan Namibië met die herdenking van die land se kwarteeu van onafhanklikwording gestuur.

Athisaari het sy gelukwensing aan die Republikein gestuur.

“Dit is vir my n groot plesier om Namibië geluk te wens met die silwerjubileum. Ek is trots om te sien wat Namibië gedurende die eerste 25 jaar van onafhanklikheid bereik het.

“Ek het oor die jare Namibië se ontwikkeling noukeurig gevolg. Volgens die Mo Ibrahim-stigting se indeks vir staatsbestuur in Afrika, was Namibië in 2014 sesde uit 52 Afrikalande.

“Prestasie van lande word in vier staatsbestuurkategorieë gemeet, naamlik veiligheid en die regstaat; deelname en menseregte; volhoubare ekonomiese geleenthede en menslike ontwikkeling. Namibië is duidelik op die regte pad om hierdie oogmerke te verwesenlik.

“Uitdagings is daar, maar die resultate tot dusver is bemoedigend.

“Ek wil die leierskap en die mense van Namibië op die skouer klop met hierdie prestasies wat staatsbestuur, vrede en stabiliteit insluit.

Die regerings van Duitsland en Brittanje finansier die land se grondhervormingsproses. Ongeveer 4 000 wit kommersiële boere besit byna die helfte van die grond in land.

Haatfees teen wittes na Swapo se Facebook-video

‘n Kort video op Facebook van n bebloede swarte wat na bewering Saterdagaand in Klein Windhoek aangerand is, het n vurige rassedebat ontketen en ‘n haatfees teen wittes in Namibië.

Ene Natangwe John Pereira het die 20 sekonde lange video Saterdagaand op die Facebook-blad van die Swapo Jeugliga geplaas. “Hierdie broer is nou net deur wit ouens in Klein Windhoek aangerand, het hy by sy plasing geskryf.

Vriende op die blad wou dadelik weet wat gebeur het, waarna ene Joel Ivers Mzanima se kommentaar was: “Vertel vir ons waarom het die wittes hom geslaan? . . . Want ons sal die Mbazuka, hammers ens, vat en beslag lê op die grond wat hulle besit en hulle uit Namibië jaag.

Ene Mouna Festus se reaksie was: “Sê vir ons wat gebeur het. Die ras wie dit gedoen het, is van geen belang nie.

Met sommige vriende wat in die meer as 200 kommentare op die plasing die haatkrane vol oopgedraai het met plasing soos “’n goeie boer is ’n dooie boer”, het talle ander die debat tot redelikheid probeer dwing deur daarop te wys dat voorvalle soos hierdie deur die polisie ondersoek moet word en die oortreders ingevolge wetgewing vervolg moet word.

Adj.komm. Edwin Kanguatjivi, hoof van openbare skakeling by die polisie, was by navraag onbewus van die voorval.

Hy het later laat weet dit is duidelik die video is by die nuwe polisiekantoor in Klein Windhoek geneem. Die voorval is egter nie in die klagteregister opgeteken nie.

“Die bevelvoerder sal vasstel wat gebeur het en terugvoering gee, hy Kanguatjivi gesê.

Net so was dr. Elijah Ngurare, hoof van die Swapo Jeugliga, gister onbewus van die voorval óf die daaropvolgende haatspraak.

Hy het egter benadruk wittes het ook n plek in onafhanklike Namibië en “niemand het die reg om enigiemand tot geweld aan te spoor op grond van stamgebondenheid of ras nie.

“My siening was nog altyd dat daar harmonie tussen die jong mense van Namibië moet wees, ongeag of hulle wit of swart is. Ons moet nie die saad van rasseverdeling saai nie.

Ngurare sê as witmense die nedersetting waarvandaan hy kom wil besoek, moet hulle nie soos tweedeklas burgers voel nie.

“Ek is werklik, werklik jammer as mense hierdeur (die haatspraak) te na gekom is. Ons moet nie toelaat dat die krag van die duisternis die krag van die lig uitdoof nie, het hy gesê.

Bron: Die Republikein

Vyf miljoen swartes kry skottels vir digitale TV

Die departement van kommunikasie gaan buurlande help om satellietskottels aan te skaf sodat hulle SABC-propaganda kan volg.

Die regering het ‘n veldtog aangekondig wat veral swart Suid-Afrikaners in staat sal stel om met skottels en toestelle uitsaai-seine na digitaal om te skakel.

‘n Woordvoerder van die Departement van Kommunikasie, Solly Mokoetle het bevestig dat die regering vyf miljoen swart huishoudings gaan help met toestelle om die uitsaai-seine om te skakel.

Dié maatreëls word onderneem ter voorbereiding van die omskakeling van analoog na digitaal-uitsendings van Junie vanjaar af.

Wit kykers sal self vir die omskakeling moet betaal as hulle belangstel om die SABC se volg.

Mokoetle sê dit is belangrik om inwoners op die grense van Namibië, Botswana, Mosambiek, Swaziland en Lesotho eerste te help.

Namibiese plaasmoord: Verdagtes vas

Vyf swart mans wat van die moord op mnr. Reinhard Schmidt op die Namibië Hoodia Jagplaas verdink word, is Dinsdagaand in Windhoek in hegtenis geneem, het die Republikein berig.

Hoofinspekteur Samuel Gariseb van die Mariental-polisie het gister gesê die vermeende misdadigers sal vandag na Kalkrand vervoer word waar die ondersoek na die moord voortduur.

Gariseb kon egter nie gister die name van die verdagtes verstrek nie, maar het gesê drie van die swartes het vermoedelik by Schmidt se huis ingebreek, terwyl die ander twee in ’n motor vir hulle gewag het.

Van die items wat hulle uit Schmidt se huis gesteel het, is intussen gevind en die ander items is vermoedelik reeds verkoop.

Schmidt, ’n Duitse burger en eienaar van die jagplaas buite Kalkrand, is verlede Vrydagoggend dood in sy huis aangetref met sy hande agter sy rug vasgemaak en sy mond en neus met kleefband toegeplak. Die nadoodse ondersoek is nog nie voltooi nie, maar Schmidt het vermoedelik versmoor.

Die mans is vyf dae ná die moord in hegtenis geneem, nadat die polisie en bestuur van die jagplaas met ’n onverpoosde ondersoek die Vrydag begin het.

“Ons is baie dankbaar vir al die hulp en ondersteuning wat ons van die Kalkrand-polisie, plaasbure en die gemeenskap van Kalkrand en Schlip gekry het,” het Schmidt se dogter, dr. Anja Huppertz, Donderdag gesê.

“Die een positiewe ding uit hierdie tragedie is die besef dat daar werklik ’n gemeenskap van wit en swart bestaan wat saamstaan om die land te ontwikkel en sy wettigheid te verseker.”

Huppertz en haar ma, me. Gudrun Schmidt, het van Duitsland na Namibië gevlieg ná die nuus van die moord. Huppertz sê haar ouers het 40 jaar gelede Namibië besoek en omdat hulle lief vir die land geword het, wou hulle nog altyd ’n plaas hier koop. Schmidt was die eienaar van die Reinhard Schmidt Lennestadt RSL GmbH maatskappy in Duitsland wat die hoofverskaffer van plastiese en metaalinspuiters vir General Motors, Volkswagen, Ford en tot ’n minder mate BMW was. Die maatskappy het ook produksieaanlegte in Spanje, Portugal en Kanada gehad.

Schmidt word Maandag op die plaas begrawe.

Massa-aksie vir grond lei tot duisende aansoeke

Voorlopige getalle dui op nagenoeg 33 000 Namibiërs van verskillende ouderdomme en oor kleurgrense wat Vrydag as deel van die landwye massa-aksie eise vir erwe by plaaslike owerhede ingedien het.

“Ons sien wie almal alleen eet; ons wil ook eet. As hulle nie vir ons grond gee nie, sal ons sand in hul maaltye sit,” het Job Amupanda gewaarsku.

Amapundu en Dimbulukeni Nauyoma het hulself as “grondaktiviste” van die Regstellende Herposisioneringsveldtog (AR) beskryf.

Volgens Amupanda sluit hierdie getal nie die meer as 14 000 aansoeke in wat op 21 November verlede jaar by die Windhoek munisipaliteit ingedien is nie.

Die getalle wat die AR-aktiviste gister gerapporteer het, is soos volg: Windhoek (ongeveer 2 500 aansoeke), Walvisbaai (meer as 9 500), Okahandja (bykans 4 000), Swakopmund (meer as 3 500), Ondangwa (bykans 2 500 aansoeke), Ongwediva (2 500), Oshakati (2 500), Keetmanshoop (meer as 800), Otjiwarongo (bykans 2 000), Tsumeb (bykans 2 500) en Rundu (meer as 300).

Met baie getalle wat nog uitstaande is, sê die grond-aktiviste was die massa-aksie ’n reusesukses.

“Dit is duidelik uit hierdie getalle dat die grondkwessie ’n landwye probleem is,” het Amupanda gesê.

Volgens die AR-groep het die massa-aksie op ’n vreedsame wyse plaasgevind ondanks “sekere politici” se pogings om te verhinder dat dit gebeur.

Amupanda het gesê ’n politikus op Rundu het so ver gegaan om ’n “mol”, wat slegs bekend is as Kupembona, te betaal om waninligting oor die massa-aksie te versprei.

“Die jeug moet hierdie mol uitsnuffel en identifiseer en van hom ’n verduideliking eis,” het hy geëis.

Die AR-groep het weer eens benadruk dat hy munisipaliteite tot 31 Julie geleentheid gee om grond aan die jeug te verskaf. So nie, sal hulle eenvoudig grond beset, het Amupanda opnuut gedreig.

Op Grootfontein het die gerugte van ’n grootskaalse opmars na die munisipale kantore en massa-optrede teen 11:00 Vrydag die rondte gedoen, maar volgens die woordvoerder van die munisipaliteit, mnr. Luke Salomo, het niks gebeur nie.

Teen 16:00 Vrydag toe die munisipale kantoor gesluit het, is net 75 aansoeke ontvang.

Grootfontein het twee weke gelede 130 gedienste erwe beskikbaar gestel en ’n verdere 137 gedienste erwe is verlede jaar vir die massa-behuisingsprojek beskikbaar gestel. Benewens hierdie erwe is geen gedienste erwe op Grootfontein beskikbaar nie.

Op Otjiwarongo is altesaam 1 846 aansoeke Vrydag ontvang. Die skakelbeampte van die munisipaliteit, me. Adelheid Shilongo, sê die dorpsraad sal nou briewe waarin ontvangs van die aansoeke erken word, aan al die aansoekers stuur.

“Ons sal maar moet wag ek hoor wat die ministerie van streek- en plaaslike regering, behuising en landelike ontwikkeling ons aanbeveel om te doen,” het sy gesê.

Op Ongwediwa het aansoekers reeds vanaf 09:00 voor die dorpsraad se kantoor saamgedrom. Mnr. Peter Tuhafeni, organiseerder van die massa-aksie op dié dorp, het aan Nampa gesê 2 230 jeugdiges het eise ingedien. Mnr. Malakia Petrus, ’n lid van die dorpsraad se bestuurskomitee, sê hierdie aansoekers se name sal by die bestaande waglys vir grond gevoeg word en hulle sal nie voorkeurbehandeling kry nie.

Die massa-aksie vir Rundu is op die nippertjie gekanselleer ná ’n mediakonferensie deur die Swapo-leierskap in Kavango-Oos waarin lede van die party versoek het om hulle nié deur die AR-aktiviste te laai mislei nie. Nampa berig jeugdiges sonder grond het nietemin individuele eise by die dorpsraad ingedien.

Uit Keetmanshoop word berig die munisipaliteit het nagenoeg 150 aansoeke vir grond ontvang. Lede van die polisie het ’n oog oor die verrigtinge gehou, maar alles het vreedsaam verloop. Die aansoeke is deur die Swapo Jeuliga se penningmeester vir die Khomasstreek, mnr. Lukas Shekwaanyena, ingevorder.

Bejaarde op jagplaas vermoor

Die Republikein berig dat die moordenaars van die 76-jarige boer in Namibië nog op vrye voet verkeer.

Reinhard Schmidt van die Namibië Hoodia Jagplaas is Donderdagnag in sy huis op dié plaas deur aanvallers vermoor. Hy het vermoedelik weens versmoring gesterf.

Geen besonderhede oor die aanvallers is bekend nie.

Dit blyk dat buitelandse jagters die volgende dag op die plaas sou aankom.

Die polisie op Mariental het aan Republikein gesê Schmidt het vroeër Donderdagaand nog aandete saam met ander inwoners op die plaas geniet. Hy het daarna na sy huis gegaan en teen 21:00 sy vrou, me. Gudrun Schmidt, gebel wat in Duitsland is. Toe plaaswerkers die volgende oggend by Schmidt se huis na hom roep, was daar geen reaksie nie.

Die werkers het toe die bestuurder per radio laat weet dat daar fout by Schmidt se huis is. Die bestuurder het omstreeks 07:15 vir Schmidt dood in sy kamer gevind.

Die polisie vermoed Schmidt het versmoor het aangesien sy hande agter sy rug met ’n tou vasgemaak was en sy mond en neus met kleefband toegeplak was. Daar was geen teken van ’n worsteling nie.

“Ons vermoed ook dat mnr. Schmidt nie sy huis se deur gesluit het nie, want daar was geen teken van ’n inbraak nie. Die moordenaars moes bloot ingestap het,” het Gariseb verder gesê.

“Op die oomblik lyk dit asof diefstal die motief was. ’n Groot platskerm-televisie, ’n rewolwer, ’n geweer en ’n koelhouer wat vol drank was, word uit Schmidt se huis vermis.”

Die polisie en die plaasbestuur is sedert vroeg Vrydag met ’n intensiewe soektog na die moordenaars besig. Hulle het die spore van vermoedelik drie verdagtes gesny en ’n private vliegtuig is gebruik om die omgewing uit die lug te bespied.

Gariseb het gesê die spore het van die plaas af aanvanklik in die rigting van Schlip gelei en later in die rigting van Omamas weggeswenk.

Teen gisteroggend het die soekspan die spore op die B1-hoofpad tussen Kalkrand en Rehoboth verloor waar dit doodgeloop het.

“Dit lyk asof die verdagtes daar in ’n motor geklim het,” sê Gariseb.

Die polisie ondersoek ook die diefstal van ’n selfoon wat onlangs uit ’n ander huis op die plaas gesteel is. Hoewel die polisie nog nie ’n verband tussen die twee voorvalle kon vasstel nie, dui die ondersoek die selfoon is op Duineveld gebruik.

Die soektog na die verdagtes duur voort.

Namibiese NG sinode sê nee vir Belhar

Die sinode van die NG Kerk in Namibië het Saterdag ’n buitengewone vergadering gereël om die wysiging van artikel 1 van die Kerkorde te bespreek én om daaroor te stem.

Dié wysiging is egter nie deur die sinode aanvaar nie, het die Republikein berig.

Die voorgestelde wysiging van artikel 1 is daarop gemik om die belydenisgrondslag van die NG Kerk te verbreed. Dié wysiging sal dus gemeentes die ruimte gun om die Belydenis van Belhar as ’n opsionele vierde belydenisskrif in hul eie gemeentes te aanvaar of nie.

Die Belydenis van Belhar is ’n belydenisskrif met eenheid, versoening en geregtigheid as kerntemas, om die destydse Nederduits-Gereformeerde Sendingkerk in Suid-Afrika se protes teen apartheid te verwoord.

Die voorgestelde wysiging van artikel 1 beteken nié dat alle gemeentes Belhar onvoorwaardelik moet aanvaar nie. Die besluit wat die lede van die Namibiese sinode dus Saterdag in die gesig gestaar het, is of hulle die ruimte vir ander gemeentes gun om die Belydenis van Belhar te aanvaar.

Die voorgestelde wysiging van artikel 1 lees as volg:“Die Belydenis van Belhar is deel van die belydenisgrondslag van die Kerk, op so ’n wyse dat daar ruimte is vir lidmate, ampsdraers en vergaderinge wat dit as in ooreenstemming met die Woord van God bely, sowel as vir lidmate, ampsdraers en vergaderinge wat dit nie as ’n belydenisskrif onderskryf nie.”

Volgens ’n verklaring van die moderamen (bestuur van die sinode) van die NG Kerk in Namibië het die sinode reeds in 2006 tot die ooreenkoms gekom dat die inhoud van Belhar “in ooreenstemming is met die Skrif” en dat dit ook ooreenstem met die “roepingverklaring van die NG Kerk in Namibië”.

Die uitslag van die stemproses was egter vir sommige lede ’n bitter pil om te sluk. Alhoewel 58% van die lede van die sinode ten gunste van die wysiging gestem het, het die Algemene Sinode, ’n tweederdemeerderheid nodig om voort te gaan met die stemproses.

Die Algemene Sinode word gevorm deur 10 sinodes, waarvan Namibië een is; die ander nege sinodes is in Suid-Afrika. Om artikel 1 te wysig, moet elke sinode met ’n tweederdemeerderheid ten gunste daarvan stem. Dus, as daar slegs een sinode is wat nie ’n tweederdemeerderheid “ja-stem” verkry nie, kan die wysiging nie gedoen word nie. Twee-derdes van alle gemeentes moet ook ten gunste van die wysinging stem vir die wysiging om goedgekeur te word. Op sinodale vlak stem elke afgevaardigde as individu, onafhanklik van sy of haar gemeente se besluit.

Volgens dr. Kobus Gerber, die hoofsekretaris van die NG Kerk, sal die stemproses in ander nege sinodes wél voortgaan, aangesien dit belangrik is dat die “kerk hom in die geheel kan uitdruk”.

Prof. Nelus Niemandt, moderator van die NG Kerk, het ook die buitengewone vergadering bygewoon.

Volgens hom het dit al voorheen by ander stemprossese gebeur dat daar nie ’n tweederdemeerderheid behaal is nie, maar daar later weer gestem word.

Die moderator van die Namibiese sinode, ds. Pine Pienaar, het nadat die uitslag van die stemproses bekend gemaak is, dit sterk benadruk dat daar verdere gesprekke op ’n strukturele én persoonlike vlak moet plaasvind vir die sinode om saam ’n werkbare voorstel te vind.

Volgens Pienaar is die kwessie van Belhar nie nou “van die tafel af” net omdat die sinode “nee” gestem het nie.

Lüderitz ontstoke oor naamsverandering

“Hulle kan die dorp se naam verander soos hulle wil; ons sal ‘Buchters’ bly,” was die algemene gevoel oor die moontlike naamsverandering wat Lüderitz mag tref.

Wit en swart inwoners wat met Republikein gesels het, is uiters ongelukkig oor die nuwe poging vir ’n naamsverandering en sê hulle was nie deur die dorpsraad oor die kwessie geraadpleeg nie.

Die Rally for Democracy and Progress (RDP) se voormalige raadslid op die dorpsraad en lid van die Lüderitz Erfenisraad, mnr. Reginald Hercules, het gister gesê inwoners het reeds in 2013 met pres. Hifikepunye Pohamba se aankondigings oor verskeie naamsveranderinge, dit duidelik gemaak dat hulle nie die dorp se naam verander wil hê nie.

“’n Petisie met honderde handtekeninge van beswaar was aan die burgemeester, me. Susan Ndjaleka, oorhandig. Sy is bewus van die gevoelens van die gemeenskap,” het Hercules gesê.

“As die nuwe naam op ons afgedwing gaan word, is ons volgende stap om dit in die hof te beveg,” het nóg ’n lid van die Erfenisraad wat verkies om anoniem te bly, bygevoeg.

Inwoners is ook ongelukkig omdat die kennisgewing van vergaderings met verskeie sektore op die dorp oor die kwessie slegs twee dae voor die tyd uitgereik is. Baie sê ook hulle is onseker oor die oorsprong van die hernude poging om die naam te verander.

“Mense is bitterlik ontstoke,” het ’n bekende sakepersoonlikheid op die dorp gesê.

Die voorsitter van die voormalige Lüderitzbucht-stigting, sê hy is “totaal en al negatief” oor die nuwe verwikkeling.

“Ek dink dit is baie hartseer dat die kwessie só hanteer word. Ons weet nie wie agter hierdie veldtog is nie. Ons weet nie waar dit vandaan kom nie. Hoekom is dit nou so belangrik? Wie het hierdie gesprek begin? Ek dink buitestanders het dit begin. Ek glo nie ’n ‘Buchter’ sou dit begin nie. Dit lyk asof die nuwe naam op ons afgedwing gaan word. Dit getuig van diktatorskap,” het hy gesê.

Ndjaleka wou gister geen kommentaar lewer nie, omdat sy die hele dag in vergaderings was. Haar kantoor het teen druktyd ook nog nie op vrae geantwoord nie. Daar is dus geen duidelikheid oor die oorsprong van die nuwe poging nie.

Gerugte loop egter die dorp vol dat Ndjaleka “en haar raadslede” die naamsveranderingsproses begin het.

Hoofman David Fredericks van die Soromaas tradisionele owerheid op Bethanie het oorspronklik in 2010 !Nami#nûs as ’n naam vir Lüderitz voorgestel. Die kiesafdeling is egter in 2013 so vernoem en die dorp se naam het onveranderd gebly.

Fredericks het gister gesê sy “aanvanklike standpunt” was egter dat die dorp se naam as sodanig moes verander het.

Hy het gesê hy het sedertdien met die dorpsraad vergaderings oor die kwessie, ook dié van gister, gehad.
Van die inwoners met wie Republikein gepraat het, het gesê Fredericks het by die eerste vergadering met skoolhoofde prontuit gesê die naam sal verander word. Ander het weer gesê hy het gepraat oor die oorsprong van die name Lüderitz en !Nami#nûs. Fredericks wou gister egter nie sê wat sy bydrae op die vergaderinge was nie.

“As daar dan geskiedkundige oorwegings vir die naamsverandering is, hoekom kan die dorp nie weer Angra Pequena genoem word nie?” het een inwoner gevra.

Angra Pequena is die naam wat die Portugese seevaarder Bartolomias Dias wat in 1487 op die suidelike kus geland het, die gebied genoem het.

“Ek dink nie die oorwegings vir die nuwe naamsverandering is op feite gebaseer nie,” het stigting gesê.

Grondkwessie in Swakopmund raak warm

Ontevredenheid onder inwoners van informele nedersettings op Swakopmund in Namibië het Maandag kookpunt bereik toe sowat 20 plakkershuise plek moes maak vir die regering se massabehuisingskema, het die Republikein berig.

Inwoners van die DRC informele nedersetting het selfs gedreig om weens gedwonge uitsettings die reg in eie hande te neem.

Die probleme in Swakopmund hou klaarblyklik nie verband met die afgelope naweek se onwettige besetting van munisipale grond in ’n ander deel van die Mondesa-woonbuurt nie.

’n Klein groepie grond- en huislose inwoners het begin om ’n onontwikkelde blok woonpersele te beset, maar ná die inhegtenisneming van hul leiers is die onwettige strukture afgebreek en die perseel is ontruim.

Maandag het ’n amptelike struktuur van die hervestigingsprogram, die Democratic Resettlement Community Concern Group Association (DRCCGA), in groot getalle in verset getree teen hul verskuiwing en die afbreek van hul huise.

Dit is nadat konstruksiewerkers van die Power Oyeno Construction groep van maatskappye begin het om die fondasies van die nuwe huise ooreenkomstig die massabehuisingskema te grawe.

Power Oyeno is verantwoordelik vir die bou van altesaam 2 034 huise teen ’n totale koste van N$583 miljoen op Swakopmund.

Die projekbestuurder, mnr. Gerry Munyama, was gister duidelik onkant betrap deur die protesoptrede. Hy het aan verslaggewers verduidelik dat die perseel geoogmerk is vir die behuisingskema en dat slegs die Nasionale Behuisingsonderneming en die plaaslike munisipaliteit antwoorde oor die mense se ontevredenheid kan verstrek.

Volgens die voorsitter van die DRCCGA, mnr. David Nghiimbwasha, moet sy mense egter nou plek maak vir dié huise sonder enige waarborge dat hulle vir dié huise in aanmerking kan kom.

Hy het verskeie briewe aan Republikein beskikbaar gestel waarin sy vereniging onder meer ’n regsmening oor die gedwonge uitsettings ingewin het.

Die munisipaliteit van Swakopmund het egter reeds op 29 April 2013 ’n formele kennisgewing aan inwoners van die buurt gestuur waarin hulle gewaarsku word met uitsetting indien verdere onwettige strukture opgerig word.

“Geen verdere onwettige bouwerk sal geduld word en oortreders sal deur wetstoepassers van die grond verwyder word,” lui die omsendbrief deur die hoofbestuurder van gemeenskapsontwikkeling.

In antwoord daarop het die vereniging skriftelik by die minister van streek- en plaaslike owerhede, behuising en landelike ontwikkeling, genl.maj. (afgetree) Charles Namoloh, aansoek gedoen dat hulle as inwoners van die buurt die totale woonbuurt by die munisipaliteit wil uitkoop.

’n Afskrif van die aansoek is op 15 September verlede jaar ook by die munisipaliteit ingehandig.

“Hierdie grond behoort aan DRC Village 110. Ons was die eerste mense hier en nou word ons nie eens geken in die saak nie. Ons sal nie toelaat dat hulle voortgaan nie, daar moet eers ’n oplossing gevind word,” het Nghiimbwasha gesê.

Volgens hom het hy self die polisie in kennis gestel van die gespanne toestand in die buurt omdat vrese bestaan het dat geweld kan uitbreek.

Sowat twee ure later het die burgemeester van Swakopmund, mnr. Juuso Kambueshe, opgedaag en met die volle komitee van die vereniging vergader.

Later het die uitvoerende hoof, mnr. Eckart Demasius, met sy eie afvaardiging ook opgedaag.

Wat bespreek is en besluite wat geneem is, is nie bekend nie.

Brand breek by Rössing-uraanmyn uit

‘n Brand het kort na die middaguur by die verwerkingsaanleg van die Rössing Uraanmyn by Arandis uitgebreek. Volgens voorlopige aanduidings het die brand in die bergingsaanleg vir uraanoksied ontstaan, maar het nie na die res van die aanleg versprei nie.

Selfs die brandweer van Swakopmund is ingeroep om bystand te verleen aan die eie brandweerdiens van die myn.

Op die oomblik is die brand onder beheer en bestrydingspanne laat nou net voldoende tyd toe om die dromme met uraanoksied te laat afkoel voordat die brandtoneel besoek kan word.

Alle personeel in die myngebied is ontruim en alle personeel in die verwerkingsaanleg word op die oomblik onderwerp aan bestralingstoeste. Die myn sê dit is net ‘n voorsorgmaatreël.

Rössing is in die spervuur oor gerugte dat Noord-Korea in die myn belangstel, nadat die maatskappy aangekondig het dat ‘n kontrak vir die lewering van uraan aan Frankryk teen die einde van 2012 gesluit het en dat die grootste oopgroef-uraanmyn in die wêreld nou ‘n besluit moet neem oor sy voortbestaan.

Suid-Korea het voorheen aangedui dat sy regering graag uraan van Namibië wil invoer en daarop gewys dat die uraan benodig word om as brandstof te dien om energie by kernkragsentrale in Suid-Korea op te wek.

Die eerste kernkragsentrale in Suid-Korea is in 1997 opgerig en sedertien het dit tot 16 kragsentrales gegroei wat sowat 40 persent van die land se elektrisiteitsverbruik voorsien. Die beplanning is dat ‘n verdere agt kernkragsentrales tot 2014 in die land opgerig gaan word.

Suid-Korea se aanvraag vir die voorsiening van elektrisiteit het sedert 1990 met nege persent jaarliks toegeneem. Die land voer tans sy uraan in van Kanada, Australië en ander onbekende bestemmings.

Hy het voorts aangedui dat Suid-Korea belangstel om vis in Namibiese gebiedswaters te kom vang.

Rössing Uraan oorweeg verskeie opsies om die leeftyd van die myn te verleng. Ten eerste word dieper delwery in die bestaande groef oorweeg, ten tweede sal die uitbreiding van die oop groef in ‘n noordwestelike rigting oorweeg word om volle kapsiteit van 4 500 ton te produseer en ten derde kan die groef aanvullend tot die tweede moontlikheid ook suidwaarts uitgebrei word.

Sou opsie 3 die besluit wees, kan die myn tot 2020 voortbestaan totdat ‘n geskatte N$284 miljoen aangewend gaan word om dit te sluit.

Ambulans weier hulp in jongste Namibiese plaasaanval

‘n Bejaarde egpaar is Woensdagoggend op hul plaas naby Hochfeld in Namibië deur vier gewapende swart rowers aangeval, vasgebind, aangerand en beroof, het die Republikein berig.

Die naaste ambulansdiens het egter hulp aan die wit egpaar geweier.

Mnr. Gernot en me. Renate Zander, albei in hul sewentigs, van die plaas Monteith sowat 50 km suid van Hochfeld, was volgens hul buurvrou, me. Heike Kash, gisteroggend tussen middernag en eenuur aangeval.

“Hulle was nog besig om TV te kyk, toe hulle ’n klop aan die deur hoor en aanvaar het dat dit hul plaaswerkers is. Vier gewapende mans het hul egter verras,” het Kash gesê.

“Mnr. Zander is wreed aangerand en met ’n swaar ystervoorwerp op sy kop geslaan wat erg gebloei het. Hy is ook op sy rug geslaan wat baie seer is. Me. Zander is gewurg. Hulle was albei vasgebind,” vertel Kash.

Me. Zander het gister in die vroeë oggendure met hul bakkie hulp by hul bure gaan soek nadat hul landlyntelefoon se drade uitgetrek en hul selfone gesteel is.

“Sy beskryf die gewapende mans as een lange en drie kortes. Sy is ook nie seker wat alles gesteel is nie, maar ’n vuurwapen en hul selfone is weg,” sê Kash.

“Die mans het aangedring op geld, maar daar was nie baie geld nie, net in hul beursies. Die Zanders is gedwing om hul kluis oop te sluit en die slaapkamer is omgedolwe.”

Die polisie van Hochfeld en Okahandja was op die toneel. Ses verdagtes, van wie vier in die huis was, is nog op vrye voet. Die kommunikasiehoof van die polisie, adj.kom. Edwin Kanguatjivi, het die voorval bevestig.

Volgens die polisie wou geen private of staatsambulans uitkom na die plaas nie. Mnr. Zander se dogter het met hom na ’n hospitaal in Windhoek gejaag waar hy steke vir sy wonde gekry het en X-strale geneem is.

’n Boer in die omgewing, mnr. Marius Basson, het aan Republikein gesê dit is die tweede keer in vier maande wat mense op plase in hul omgewing aangeval is. “Die Hammans (die bekende Afrikanerbeesboer, mnr. Eddie Hamman se ma en suster), ongeveer 30 km van ons af, is so vier maande gelede aangeval en die Zanders is 20 km van ons af.”

Skaars minder as ’n maand gelede is nog ’n bejaarde egpaar in die Ooste aangeval. Mnr. Acker en me. Dorea von Moltke is op 18 Janaurie op hul plaas, Okatjombua, sowat 90 km noordoos van Gobabis op die pad na Summerdown, deur twee mans oorval, vasgebind en beroof. Mnr. Von Moltke, ’n bekende oudonderwyser, was erg aangerand.

Lyke in Windhoekse hospitaalsaal gelaat

Die lyke van twee pasiënte wat tydens hul opname in Saal 4 Wes in die Windhoek Sentrale Hospitaal op dieselfde dag gesterf het, is glo vir ure daarna steeds in hul onderskeie kamers tussen ander pasiënte gelaat, voordat die liggame verwyder is.

Volgens ’n voormalige pasiënt is gordyne glo bloot rondom die oorledenes se beddens getrek om dit af te skort, het die Republikein berig.

Die swart personeel se verweer was dat daar eenvoudig geen ander of nog plek is waar die lyke tydelik gestoor kan word, totdat ’n dokter die doodsertifikate kan uitreik en dit verwyder kan word nie.

Die voormalige pasiënt moes self die eerste twee aande van haar opname in die saal saam met agt ander vroue in die gang slaap, omdat kamers tot oorlopens toe vol was. Ook hier het matrasse met pasiënte gelê.

Toe sy uiteindelik na ’n kamer oorgeplaas het, het sy dit gedeel met ’n pasiënt wat in ’n koma was.

“Ons was drie in die kamer, ek op die bed, nog een wat op die vloer gelê het en die pasiënt wat in ’n koma was”.
Later sou een van die personeel aan haar sê dat die pasiënt in die koma die middag beswyk het. Haar lyk was egter nie verwyder nie.

“Ons het gaan kyk en daar lê sy tussen die ander pasiënte, die gordyne is net om die bed toegetrek. Toe ek vra hoekom, toe sê ’n verpleegster ‘jy kan mos sien die hospitaal is vol, daar is geen ander plek om haar te sit nie’”.

Op dieselfde dag het ’n ander pasiënt gesterf wat ook in ’n koma in Saal 4 Wes was. Ook dié pasiënt het glo tot omstreeks 22:00 tussen ander pasiënte gelê totdat ’n dokter die doodsertifikate kon onderteken en die lyke verwyder kon word.

Volgens die voormalige pasiënt is die stank ook ondraaglik.

“Terwyl die koma-pasiënt nog by my in die kamer was, het sy al geruik. Elke keer as jy in die kamer instap, dan ruik jy dit. Ek kon nie eet nie, ons het maar met die vensters oop geslaap”.

Sy het gebid dat sy nooit weer hoef terug te gaan nie. Want hier, sê sy “gaan jy op jou twee voete in en kom jy op jou rug uit”.

“Ek het vir die Here gevra ek wil nooit weer soontoe gaan nie. Ek sterf eerder by die huis as om weer in daardie hospitaal te beland. Ek kry die volgende pasiënt wat daar moet lê, baie jammer.”

Volgens haar moes sy voor haar voorafgereëlde opname in Saal vier Wes eers vir toetse en X-strale na die Katutura-staatshospitaal gaan, voordat sy uiteindelik laat die aand in die Windhoek Sentrale Hospitaal opgeneem is. Sy sou ook eers drie dae wag om ’n dokter te sien, haar lêer was weg en is sy nooit amptelik opgeneem nie. Pasiënte moes mekaar maar help en ondersteun.

Noord-Koreane ontken bande met wapenbedryf in Namibië

Die Namibiese tak van die Noord-Koreaanse staatsmaatskappy Mansudae Overseas Project Group of Companies (M.O.P.) sê hy het géén bande met die omstrede Korea Mining Development Trade Corporation (KOMID) teen wie streng internasionale sanksies ingestel is nie.

KOMID is Noord-Korea se grootste wapenhandelaar en is by die verspreiding van ballistiese missiele en ander wapentuig aan lande soos Iran en Sirië betrokke. Die maatskappy verskans sy bedrywighede dikwels deur Noord-Koreaanse frontorganisasies te gebruik in die lande waar hy sake doen.

Volgens ’n goedgeplaaste intelligensiebron bestaan ’n verbintenis tussen M.O.P. in Namibië en KOMID.

Mnr. Ryong Choe, woordvoerder van M.O.P Architectural & Technical Services (Namibia), het vandeesweek gesê die maatskappy waarvoor hy werk “doen nét kuns- en konstruksiewerk en het niks met wapens te make nie”.

Volgens hom ken hy nie die twee Noord-Koreaanse amptenare, Kil Jong Hun en Kim Kwang Yon, wat in Namibië woon en KOMID se belange in Suider-Afrika behartig nie.

Hulle is twee van die tien Noord-Koreane teen wie die Amerikaanse tesourie in Januarie sanksies ingestel het.

Dit is gedoen omdat hulle resolusie 1718 van die Veiligheidsraad van die Verenigde Nasies (VN) oortree het. Dié resolusie is op 14 Oktober 2006 aanvaar nadat Noord-Korea op 9 Oktober 2006 ’n kerntoets uitgevoer het, strydig met die kernsperverdrag waarvan dié land ’n ondertekenaar is.

Ingevolge hierdie resolusie moet lidlande van die VN alle oorsese bates van individue en maatskappe betrokke by Noord-Korea se wapensprogramme bevries. ’n Internasionale reisverbod is ook op werknemers van hierdie programme en hul families geplaas.

Die twee mans se teenwoordigheid in die land het die Namibiese regering in ’n groot diplomatieke verleentheid gedompel. Dit het verlede week bekend geword die VN gaan op grond van dié gebeure ’n amptelike ondersoek gelas na Namibië se skending van resolusie 1718 van die Veiligheidsraad. Namibië is net soos Noord-Korea ’n ondertekenaar van die kernsperverdrag.

Volgens Choe verwerp M.O.P. in Namibië enige beweringe dat hy as frontorganisasie vir KOMID optree.

“Ons is reeds vir dekades wyd bekend in Namibië as een van die groot konstruksiemaatskappy en het ’n goeie naam onder ons kliënte en diensverskaffers. Ons het niks met KOMID te make nie en is nie ’n filaalmaatskappy van KOMID nie.

“Ons moedermaatskappy Mansudae Art Institute ”

Hy sê gerugte hieroor bring mee dat groot diensverskaffers wat reeds jare lank bou- en ander konstruksiemateriaal aan M.O.P. lewer, vra skielik vrae en wil weet wat aangaan.

Choe sê M.O.P. het noue bande met die Namibiese regering wat een van dié maatskappy se grootste en mees gewaardeerde kliënte is.

“Ons het staatshuis, die Heldeakker, die Oorlogsmuseum op Okahandja en die Gedenkmuseum vir Onafhankliheid gebou en was ook by talle ander kleiner konstruksieprojekte betrokke.”

Hy ontken dat M.O.P. enigsins betrokke was by die bou van die wapenfabriek by Luiperdsvallei en sê dit was ’n “ander Noord-Koreaanse maatskappy”, maar hy ken nie die naam daarvan nie.

Volgens die waghondliggaam North Korean Economy Watch, is Namibië die land in Afrika wat die meeste geld, naamlik sowat US$67 miljoen, aan monumente en ander bouwerk deur M.O.P. bestee het.

“Noord-Korea het reeds meer as US$160 miljoen in die laaste tien jaar verdien uit die oprigting van reusemonumente en beeldhouwerke in lande in Afrika. Die grootste deel hiervan was afkomstig uit Namibië”, sê dié liggaam op sy webtuiste.

Bron: Die Republikein