hospitaal – praag.co.za

Die ANC loer onder ‘n klip uit oor Trompsburg se wit olifant

Die datum vir die amptelike opening van die multimiljoenrandse hospitaal in Trompsburg, wat al vir drie jaar stof vergaar, is steeds nie bekend nie.

Daar is vroeër verwag dat die datum bekend gemaak sou word ná ‘n vergadering van provinsiale politici en hooggeplaaste munisipale amptenare, wat vandag in Bloemfontein ten einde loop. ‘n Foutiewe rioolstelsel word as rede aangevoer vir die jare lange gesloer met die opening van die R380 miljoen Albert Nzula-hospitaal.

In antwoord op ‘n vraag in die Vrystaatse Wetgewer het die departement aangedui dat die opening vandeesmaand gaan plaasvind.

Die LUR vir Finansies, Elzabe Rockman, het egter vanoggend aan OFM-nuus gesê verskeie dinge moet nog in plek gestel word alvorens die hospitaal sy deure kan open.

“Ons is in gesprek met die nasionale gesondheidsdepartement oor die opening. Ons het nog nie ‘n datum nie. Die LUR gaan na verwagting binnekort ‘n aankondiging daaroor doen. Ons het ‘n drie jaar tussentydse plan in plek waarna ons moontlik na drie jaar volle beheer van die hospitaal sal oorneem.”

Maar terwyl die ANC-dikkerd Rockman ‘n “plan” het, is dit duidelik dat daar nie ‘n plan van ‘n aard is nie.

Die aanstelling van nuwe gekwalifiseerde dokters – wat beurshouers van die Vrystaatse provinsiale regering is, “moet prioriteit wees” sê sy nou, want kennelik benodig die wit olifant van ‘n hospitaal mediese personeel.

Rockman het gereageer op ‘n aanduiding van die provinsiale departement van gesondheid dat die reeds platsak departement nie ‘n paar van die dokters as gevolg van begrotingsbeperkings kan aanstel nie.

Hierdie departement is onder Rockman se beheer, vir meer as ‘n jaar al en sy finansiële ellende het tot ‘n tekort aan medisyne en mediese personeel gelei.

Daar is ook ‘n agterstand in die instandhouding van mediese toerusting.

Nie dat iemand verwag dat Rockman ooit aanspreeklik gehou gaan word vir haar swak bestuur nie.

20 beseer, winkelsentrum beskadig toe tornado Tembisa tref (met video)

Volgens die jongste syfers is 20 mense beseer toe ‘n tornado die swart lokasie Tembisa, noordoos van Johannesburg, getref het (sien foto’s en video hier onder). Die Oos-Randse metro, Ekurhuleni, het ‘n hele noodoperasie aangekondig en daar gaan aan minstens 400 dakloses hulp verskaf word.

Sommige beserings is veroorsaak toe die dak van ‘n winkelsentrum, die Phumulani Mall, ineengestort het. Reddingswerkers moes 11 mense uit die puin red.

Ook die plaaslike hospitaal, die enigste openbare hospitaal in die hele omgewing, is deur die werwelstorm beskadig. ‘n Deel van die dak het meegegee en bome is ontwortel, volgens ‘n woordvoerder van die hospitaal, Steve Mabona.

Die 20 beseerdes is vanaf die winkelsentrum na die hospitaal gebring, waar die werwelstorm ook die heining, motorafdakke en 20 voertuie beskadig het.

“Gelukkig is geen pasiënt of werknemer beseer as gevolg daarvan nie,” sê Mabona. “Die hospitaal kyk reeds na die mense wat beseer is toe die Phumlani Mall in Tembisa verwoes is, en omtrent 20 mense is na die hospitaal oorgeplaas.”

‘n Hewige haelstorm het ook tydens die tornado gewoed.

Vrystaatse dokter voor vir beweerde verkragting

‘n Vrystaatse dokter verskyn na verwagting vandag weer in die Phuthaditjhaba-landdroshof op ‘n aanklag van verkragting.

Die nege-en-twintigjarige Mohale Setlaba het glo ‘n swanger pasiënt tydens ‘n ondersoek verkrag. Hy is vroeër borgtog van R1000 toegestaan.

Volgens polisiewoordvoerder, Mmako Mophiring, het ‘n 29-jarige swanger vrou van Bohlokong naby Bethlehem aan die polisie gesê sy is verkrag.

Sy het op 27 November 2015 na die plaaslike hospitaal in Qwaqwa gegaan vir ‘n ondersoek, waartydens die beweerde voorval plaasgevind het.

Sy het haar vriend en oom van die voorval vertel en hulle het die hospitaal gekontak.

‘n Saak is later by die Namahadi-polisiekantoor aanhangig gemaak.

MSF vra onafhanklike ondersoek na Amerikaanse bomaanval

Die hulpagentskap, Dokters Sonder Grense, MSF, het ‘n ondersoek deur ‘n onafhanklike instansie gevra oor die Amerikaanse bomaanval op sy hospitaal in die Afghaanse stad, Koendoez.

Die MSF sê hy vertrou nie die interne Amerikaanse militêre ondersoeke na die bomaanval waartydens 22 mense dood is nieen sê dit verteenwoordig ‘n oorlogsmisdaad.

Amerika het vroeër gesê die bomaanval was ‘n fout te midde van pogings om ‘n Taliban-oorname van die stad te verhoed.

Die hoof van MSF, Joanne Liu, sê die bomaanval was juis ‘n aanval op die konvensies wat ten doel het om die optrede van diegene wat by die oorlog betrokke is, te beheer.

Volgens Dokters Sonder Grense, moet so ‘n ondersoek bewyse van die VSA, NAVO en Afghanistan, asook getuienisse van die hospitaalpersoneel en pasiënte insluit.

Dié bevindings sal bepaal of MSF sal voortgaan met eise teen die betrokke partye. “As ons dit laat gaan, asof dit niks was nie, skryf ons basies ‘n blanko tjek aan enige land wat in oorlog gewikkel is,” het Liu op ‘n nuuskonferensie gesê.

“As ons nie die mediese ruimte beskerm vir ons om ons aktiwiteite te doen nie, dan is dit onmoontlik om te werk in ander kontekste soos Sirië, Suid-Soedan, soos Jemen,” het sy bygevoeg, terwyl sy aangedaan die gruwels van die hospitaalbombardement beskryf het.

“In Koendoez is ons pasiënte in hul beddens verbrand. MSF dokters, verpleegsters en ander personeel is dood terwyl hulle gewerk het. Ons kollegas moes op mekaar opereer. Een van ons dokters is dood op ‘n geïmproviseerde operasietafel – ‘n kantoorlessenaar – terwyl sy kollegas probeer het om sy lewe te red,” het dr Liu gesê.

Intussen het Edward Snowden getwiet dat die vrystelling van opnames van die Amerikaanse vegvliegtuie wat betrokke was in die aanval asook die beheerinstansie, gou-gou enige kwessies oor wie verantwoordelik was, sal opklaar.

President Obama het Woensdag om “diep” om verskoning gevra vir die aanval op die hospitaal, maar geen besonderhede gegee nie.

Amerikaanse lugaanval op hospitaal skerp veroordeel deur VN

Die Verenigde Nasies (VN) het ’n aanval op ’n hospitaal van die organisasie Médecins Sans Frontières (MSF), beter bekend as Dokters Sonder Grense, in Koendoez in Afganistan skerp veroordeel.

Die hoof van die VN se humanitêre sending, Zeid Ra’ad Al Hoessein, het gesê indien ’n ondersoek sou bevind dat die hospitaal met opset geteiken is, dit as ’n oorlogsmisdaad beskou sal word.

Die sekretaris-generaal van die VN, Ban Ki-moon, sê ‘n grondige en onpartydige ondersoek na die voorval moet spoedig volg.

Die Amerikaanse president, Barack Obama, het ook ‘n ondersoek na die tragedie belowe. Jens Stoltenberg, NAVO se sekretaris-generaal het ook sy “diepe meegevoel” uitgespreek.

Negentien mense, onder wie 12 personeellede van MSF, is in die aanval dood.

Volgens MSF is die intensiewesorg- en ongevalle-eenheid in vlamme gelaat en het pasiënte doodgebrand.

Die Amerikaanse lugmag het erken dat hy in die omgewing van die hospitaal ’n lugaanval uitgevoer het.

“Die departement van verdediging sal ’n volledig ondersoek doen en ons sal op die uitslag van die ondersoek wag voordat ons enige verdere besluite neem rakende die omstandighede wat die aanval betref,” het Obama in ’n verklaring gesê.

Volgens Dokters Sonder Grense is die GPS-koördinate van sy fasiliteite in Koendoez by verskeie geleenthede aan Amerikaanse magte in Afghanistan deurgegee.

Afgaanse regeringsmagte, met die steun van onder meer Amerikaanse lugaanvalle, het die afgelope paar dae na wat berig word dele van Koendoez in hewige gevegte herower nadat die Taliban die stad vroeër vandeesweek ingeneem het.

Die Taliban se suksesvolle aanslag was ’n vernederende nederlaag vir die VSA. Dit was die eerste keer sedert 2001 dat ’n provinsiale hoofstad in die Taliban se hande beland het.

Oproeriges versper hospitaal in Limpopo

Oproerige inwoners van Makhuvha naby Thohoyandou in Limpopo het Woensdagaand amok gemaak by ‘n hospitaal.

Die beswaardes het die ingang na die Matatshe Donald Frazer hospitaal met klippe en brandende bande versper.

Hulle eis dat verdagtes wat in hegtenis geneem is in verband met twee moorde in Mei vanjaar vrygelaat word.

Die verdagtes was na bewering deel van ‘n groep inwoners wat twee vermeende misdadigers vermoor het.

Die polisie is in die gebied ontplooi en monitor tans die situasie.

Vermiste man in hospitaal oorlede

David John Bardsley is Dinsdag in die Tambo Memorial Hospitaal oorlede.

Sy broer, Melvin (45), het Woensdag aan die Herald gesê dat hy inligting ontvang het, wat daarop gedui het dat sy broer moontlik in die hospitaal kon wees.

Hy het gaan navraag doen en uitgevind dat David Dinsdag (11 Augustus) oorlede is.

“Sover ek weet was my broer by die Verre Oos-Rand Hospitaal geregistreer as ‘n pasiënt.”

“Ons het, na sy verdwyning, dáár en by die Pholosong Hospitaal navraag gedoen, maar nooit gedink om by ander hospitale aan te klop nie,” het Melvin gesê.

“Ek sou hom regtig wou groet, maar ek was te laat.”

Volgens Melvin is sy broer reeds op 18 Julie in die hospitaal opgeneem.

Hy is op 19 Julie as vermis by die Brakpan Polisiestasie aangemeld.

Daarna het ‘n grootskaalse soektog na die man gevolg.

Die soektog is verskerp toe daar ‘n bebloede duvet, wat aan Bradsley behoort het, in ‘n veld oorkant die huis waar hy gebly het, gevind is.

Die veld is vir sowat twee dae gefynkam, maar het niks opgelewer nie.

Melvin het gesê dat hy nog sy broer se liggaam amptelik moet uitken.

“Volgens die rekords, wat ek gesien het, is hy aan lewerversaking oorlede,” het Melvin gesê.

Intussen is hy besig om reëlings te tref sodat sy broer met waardigheid ter ruste gelê kan word.

Bron: Brakpan Herald

Meer as 100 swart kinders by skool siek

Die Vrystaatse onderwysdepartement het bevestig dat drie onderwysers en 120 leerlinge van die Hoërskool St. Bernard’s in Botchabela in Bloemfontein Donderdagoggend by die skool siek geword het.

Woordvoerder Howard Ndaba sê 10 leerlinge van die Laerskool St Mary’s het ook van naarheid en maagongesteldheid gekla nadat leerlinge van dié twee skole gister die begrafnis van Vader Daes bygewoon het.

Ndaba sê die situasie is egter onder beheer en die departement van gesondheid vorm deel van ‘n ondersoek na die voorval.

Hy sê die goeie nuus is dat 41 van die 61 leerlinge wat in plaaslike klinieke en hospitale behandel is, reeds ontslaan is.

Vader Daes was die stigter van dié twee skole.

Honderde pasiënte ly onder staking

Honderde pasiënte met spesiale behoeftes is aan hulle eie genade oorgelaat nadat verpleegsters by ‘n hospitaal op Tzaneen in Limpopo begin staak het, het RSG berig.

Die provinsie se Departement van Maatskaplike Ontwikkeling, sê hy sal met die diensverskaffer in verbinding tree wat die Shiluvanahospitaal bestuur.

Werkers en verpleegsters staak onwettig oor wat hulle sê swak werksomstandighede is.

Die hospitaal huisves sowat 200 pasiënte. ‘n Woordvoerder van die Departement, Adel van der Linde, sê dit is baie belangrik om te verseker dat dienste steeds gelewer word, en hulle sal daaroor met die werkgewer in gesprek tree.

Drie swart moordenaars se vonnisoplegging uitgestel

Die drie swart moordenaars van Chris Jooste en sy vrou, Katrien, se vonnisoplegging is Woensdag in die hooggeregshof in Pretoria uitgestel tot 11 Maart.

‘n Vierde swart beskuldigde, word steeds deur die polisie gesoek nadat hy verlede jaar uit die Ga-Rankuwa-landdroshof ontsnap het.

Victor Mbuyseni Simango, Solomon Solly Selekane en Collen Peter Molapo is in Desember daaraan skuldig bevind dat hulle die egpaar in November 2011 doodgeskiet het terwyl hulle voorraad by ‘n spaza-winkel in Soshanguve wou aflewer.

Chris is in die maag geskiet terwyl hy op pad terug na sy bakkie was. Katrien is in die bors geskiet toe sy haar swart moordenaars met pepersproei wou afweer. Sy het ‘n laaste oproep na haar dogter Belinda gemaak nadat hulle geskiet is. Die egpaar het op pad na die hospitaal aan hul beserings beswyk.

Simango, Selekane en Molapo is ook skuldig bevind aan die onwettige besit van vuurwapens en ammunisie. Simango is verder daaraan skuldig bevind dat hy 16 dae voor die moord ook R500 by die egpaar gesteel het.

Die staatsaanklaer Mari Marriot het gesê die swart beskuldigdes se optrede toon dat ‘n lewe geen waarde vir hulle het nie.

‘n Aangrypende brief wat deur Belinda, geskryf is, is in die hof voorgelees.

“My hele lewe en dié van my gesin het in ‘n oogwink verander. Een oomblik het ek ‘n ma en pa gehad en die volgende was hulle weg. Dood. Geskiet. Ons lewe is op ‘n reusemanier geraak. Ons het ‘n reuseverlies gely. Twee mense wat nog baie lewe gehad het om te leef is wreed uit ons lewens weggevat.”

Volgens Belinda het haar ouers se dood haar seuntjie hard getref aangesien hy by met hulle gewoon het. Sy persoonlikheid het verander en hy ontvang steeds berading. Belinda se werk het vereis dat sy baie moet reis. Sy moes egter trek wat haar beroep negatief geraak het. Belinda se oupa kon ook nie die skok hanteer nie. Hy was ‘n besige boer, maar het kort na die moorde as invalide gesterf.

Lyk in staatshospitaal gelos om te ontbind

Vier personeellede van die Chris Hani Baragwanath-hospitaal is geskors nadat hulle die liggaam van ‘n 18-jarige meisie gelos het om te ontbind, het die departement van gesondheid Donderdag gesê.

Die departement het die afgelope paar weke vinnig opgetree teen beamptes wat na bewering die gedragskode oortree het. ‘n Dokter is glo onlangs ook met onmiddellike effek afgedank vir professionele nalatigheid.

Die vier is geskors hangende die volledige ondersoek en tugverhore.

“Dit volg na die voorlopige ondersoek oor die vervoer van die liggaam van die saal na die lykshuis en die manier waarop dit gehou is,” het Prince Hamnca, woordvoerder van die departement, in ŉ verklaring gesê.

Die Sowetan het Donderdag berig Bacebile Mbete (18) is Vrydag by die hospitaal oorlede. Haar oupa, Raymond Zikalala (82) het gesê haar liggaam is eers Maandag, drie dae later, na die lykshuis gestuur. Teen daardie stadium het die liggaam reeds só erg ontbind dat sy nie meer herkenbaar was nie.

Die liggaam is na die hospitaal teruggestuur toe die ondernemer gesê het dit is te ver ontbind om by die lykshuis aan te hou.

Lyke in Windhoekse hospitaalsaal gelaat

Die lyke van twee pasiënte wat tydens hul opname in Saal 4 Wes in die Windhoek Sentrale Hospitaal op dieselfde dag gesterf het, is glo vir ure daarna steeds in hul onderskeie kamers tussen ander pasiënte gelaat, voordat die liggame verwyder is.

Volgens ’n voormalige pasiënt is gordyne glo bloot rondom die oorledenes se beddens getrek om dit af te skort, het die Republikein berig.

Die swart personeel se verweer was dat daar eenvoudig geen ander of nog plek is waar die lyke tydelik gestoor kan word, totdat ’n dokter die doodsertifikate kan uitreik en dit verwyder kan word nie.

Die voormalige pasiënt moes self die eerste twee aande van haar opname in die saal saam met agt ander vroue in die gang slaap, omdat kamers tot oorlopens toe vol was. Ook hier het matrasse met pasiënte gelê.

Toe sy uiteindelik na ’n kamer oorgeplaas het, het sy dit gedeel met ’n pasiënt wat in ’n koma was.

“Ons was drie in die kamer, ek op die bed, nog een wat op die vloer gelê het en die pasiënt wat in ’n koma was”.
Later sou een van die personeel aan haar sê dat die pasiënt in die koma die middag beswyk het. Haar lyk was egter nie verwyder nie.

“Ons het gaan kyk en daar lê sy tussen die ander pasiënte, die gordyne is net om die bed toegetrek. Toe ek vra hoekom, toe sê ’n verpleegster ‘jy kan mos sien die hospitaal is vol, daar is geen ander plek om haar te sit nie’”.

Op dieselfde dag het ’n ander pasiënt gesterf wat ook in ’n koma in Saal 4 Wes was. Ook dié pasiënt het glo tot omstreeks 22:00 tussen ander pasiënte gelê totdat ’n dokter die doodsertifikate kon onderteken en die lyke verwyder kon word.

Volgens die voormalige pasiënt is die stank ook ondraaglik.

“Terwyl die koma-pasiënt nog by my in die kamer was, het sy al geruik. Elke keer as jy in die kamer instap, dan ruik jy dit. Ek kon nie eet nie, ons het maar met die vensters oop geslaap”.

Sy het gebid dat sy nooit weer hoef terug te gaan nie. Want hier, sê sy “gaan jy op jou twee voete in en kom jy op jou rug uit”.

“Ek het vir die Here gevra ek wil nooit weer soontoe gaan nie. Ek sterf eerder by die huis as om weer in daardie hospitaal te beland. Ek kry die volgende pasiënt wat daar moet lê, baie jammer.”

Volgens haar moes sy voor haar voorafgereëlde opname in Saal vier Wes eers vir toetse en X-strale na die Katutura-staatshospitaal gaan, voordat sy uiteindelik laat die aand in die Windhoek Sentrale Hospitaal opgeneem is. Sy sou ook eers drie dae wag om ’n dokter te sien, haar lêer was weg en is sy nooit amptelik opgeneem nie. Pasiënte moes mekaar maar help en ondersteun.

Pretoria-ouers red vyfjarige se lewe

‘n Ma van Pretoria is dankbaar dat ‘n man en twee vroue Saterdag haar vyfjarige kind se lewe by ‘n kinderpartytjie in Lynnwood gered het.

Die vrou, wat net as Karen geïdentifiseer wil word, het Sondag aan Rekord gesê haar kind sou waarskynlik dood gewees het, as dit nie vir die flink optrede was nie.

Karen se seuntjie het Saterdagoggend saam met maats geswem toe hy skielik onder die water verdwyn het.

“Hy weet hoe om te swem en ons vermoed ‘n golfie het hom dalk onkant gevang. Hy het baie water gesluk,” het Karen gesê.

Sy sê een van die pa’s by die partytjie het ‘n swart kol onder die water gesien. Toe hy besef dit was nie ‘n swembadsuier nie, het hy dadelik ingeduik en die kind uitgehaal.

“Twee van die ma’s het vir sowat drie minute lank mond-tot-mond asemhaling toegedien totdat hulle sy hartkloppie weer kon kry. Hy was potblou in sy gesiggie,” het Karen gesê.

Netcare 911 paramedici was vinning op die toneel en het die kind gestabiliseer en na ‘n hospitaal gehaas.

“Ek is so dankbaar vir almal se flink optrede – my kind kon voor ons oë verdrink het,” het Karen gesê.

Die seuntjie was Sondag nog in die hospitaal sodat sy longe gemonitor kon word, maar sal na verwagting Maandag ontslaan word.

Bron: Rekord Oos

Wonderwerk na boot seun se gesig oopkloof

‘n Seun van Centurion het oorleef nadat ‘n boot bo-oor hom gery en verskeie wonde veroorsaak het.

‘n Rubberboot se stuurvin het die gesig van ‘n jong Centurion-seun Saterdag oopgekloof toe hy in ‘n fratsongeluk onder die boot beland het. Hy het ernstige beserings aan sy gesig en lyf opgedoen, het die Centurion Rekord berig.

“Dit is ‘n wonderwerk dat my kind leef,” het Keanu van der Linde (14) se ma, Sonja, Maandag gesê. “Dit kon soveel erger gewees het.”

Keanu, ‘n leerling aan die Cornwall Hill College, het saam met sy broer Wally (18) en hulle twee neefs in ‘n plaasdam naby Standerton, Mpumalanga, van ‘n rubberboot af gehengel toe die ongeluk gebeur het.

Hulle het tydens die skoolvakansie by hul pa op die plaas gekuier.

“Keanu was in die water besig om die visnette uit te trek, toe die boot skielik na die een kant swaai en bo-oor hom vaar,” het Sonja aan Rekord gesê.

“Wally het dadelik in die water gespring, vir Keanu in die boot getel en ys in ‘n handdoek om sy kop gebind. Hy het met sy broer na die naaste hospitaal gejaag om mediese hulp te kry.”

Die rubberboot se stuurvin het die regterkant van Keanu se gesig oopgekloof en ‘n diep wond van sowat 25cm gelaat. Sy bo- en onderkaak en regterwangbeen is ook gebreek.

Die vin het hom agter sy oor getref en sy aorta met ‘n sentimeter gemis.

Keanu het nog ‘n wond tussen sy oë opgedoen en die motorbootskroef het hom ook verskeie kere op die arm gekap en wonde gelaat.

Sonja sê dit is ‘n wonderwerk dat haar seun nie onherstelbare skade of kopbeserings opgedoen het nie.

“Dit is danksy die Here se genade dat hy die fratsongeluk oorleef het,” het sy gesê.

Keanu sterk sedertdien in die hoësorgeenheid van die Little Company of Mary-hospitaal in Groenkloof aan.

Sonja het almal vir hulle bystand en gebede bedank en sê sy is baie dankbaar teenoor haar seun, Wally, wat kalm en beredeneerd opgetree het terwyl hy sy broer se lewe gered het.