Die Nederlandse polisie sluit terrorisme uit by die voorval waarin agt mense beseer is toe ‘n motor buite ‘n Amsterdamse stasie in hulle vasgery het. Maar ooggetuies verskaf ‘n ander weergawe as die amptelike polisieverklaring van wat gebeur het en beskryf die voorval as “vreesaanjaend”.
Agt mense is beseer nadat ‘n swart Peugeot deur voetgangers buite die sentraalstasie in Amsterdam geploeg het. Ses mense is hospitaal toe geneem, waarvan twee in ‘n ernstige toestand verkeer. Twee ander slagoffers is op die toneel behandel.
Volgens die Nederlandse koerant, Het Parool, het die polisie met die bestuurder gepraat en gevra om sy lisensie te sien, wat hy wel getoon het. Die man het daarna weggetrek, verskeie mense raakgekry en in ‘n lae muurtjie naas die moltreiningang vasgery.
Die Amsterdamse polisie het die bestuurder in hegtenis geneem, maar meen daar is “geen aanduiding hoegenaam” dat die motorongeluk ‘n ekstremistiese aanval was nie. Die motor het by die moltreiningang tot stilstand gekom, ná die botsing.
“Die verdagte is ondervra, en dit wil voorkom asof dit nie doelbewus was nie. Maar ons doen verdere ondersoek,” het die Amsterdamse polisie op hul Twitter-rekening gesê.
Volgens die amptelike verklaring, is ‘n 45-jarige Amsterdamse man deur die polisie voorgekeer weens ‘n oortreding, waarna hy in ‘n muur vasgery het. Polisiebronne het aan die Britse koerant The Telegraph gesê dat die bestuurder “siek geword” het en “nie bedoel het” om die motor te laat bots nie. Die motor beskik volgens berigte oor ‘n gekraakte voorruit.
Die bestuurder het iewers op die tremspoor geparkeer, en is deur die polisiebeamptes versoek om sy voertuig te verskuif. Hy het toe weggery en “ongesteld begin voel weens lae bloedsuikervlakke”, waarna hy agt mense beseer het.
Ooggetuies vertel ‘n ander verhaal. Verskeie getuies het aan die Nederlandse nuuskanaal AT5 gesê dat die motor teen hoë spoed vanuit ‘n ander rigting aangekom het, waarmee die polisieverklaring bevraagteken word.
‘n Getuie, wat na trem 26 oorgestap het op die oomblik toe die voorval plaasgevind het, is verbaas oor die polisie se weergawe dat die man ongesteld geraak het.
“Ek het die motor op die tremspoor sien staan en gedink, wel, as daar ‘n aanval sou plaasvind, is dit nou. Die bestuurder is deur twee beamptes genader. Ek het na hulle gekyk en aangestap. Ek was omtrent ‘n honderd treë weg toe motor vinnig wegry. Dit het vir my gelyk asof die man doelbewus vir die polisie wegry, maar niemand gaan vir ons die waarheid vertel nie.
Die motor het die tremspoor na Damrak gevolg en uiteindelik met ‘n muur by die ingang van die moltrein gebots. “Hy het die draai (in die pad) gevolg.”
‘n Tweede getuie, wat besig was om die rigting van die Stationsplein te stap ten tye van die voorval, het ook ‘n ander weergawe van die gebeure. “Ek was aan die westekant en het so pas deur die fietstonnel na trem 5 geloop,” het die man aan AT5 gesê.
“Ek was besig om met ‘n vriend te gesels toe hy my naam skree. ‘Hardloop, hardloop,’ het hy gesê. Ek het na regs gekyk en ‘n swart Peugeot teen hoë spoed na my toe sien aankom.” Die twee mans het opsy gespring en gesien hoe die motor tot stilstand kom omdat daar trems in die pad was.
“Die twee beamptes het toe na die man toe gegaan en sy bestuurderslisensie gevra. Een van die beamptes het aan sy kollegas beduie dat hulle nader moet kom. Die ander beampte het toe die bestuurslisensie van die man teruggegee en gelyk asof hy was dat hy ‘verder moet ry’.”
Volgens die getuies, wat minder as tien meter van die motor af was, het die bestuurder ‘n geïrriteerde indruk gemaak. “Hy het die bestuurderslisensie min of meer uit die beampte se hand gegryp. Toe, met ‘n telefoon in sy hand, het hy die motor aangeskakel en op volle spoed in die skare ingery. Ons het letterlik gesien hoe mense deur die lug vlieg.”
Die motor het versnel terwyl dit vorentoe beweeg, het die getuie gesê.
“Daar was paniek, jy kon mense hoor skree. Ek het self oortuig geraak dat dit buite die kwessie was dat die man ongesteld kon geraak het. Ek het dit oral in die media gelees en dis baie frustrerend. Na my mening het hy bloot twee pogings aangewend! Die polisie moes raakgesien het dat iets nie pluis is nie. Dit was nie bloot ‘n ongeluk nie.”
Die stasie en die omringende area is afgekordon, het die Nederlandse spoorwegmaatskappy, die NS, gesê. Tremdienste wat by die stasie se hoofingang eindig, is herlei.
Die Nederlandse polisie wou nie die naam van die bestuurder bekendmaak nie, wat suggereer dat hulle nie die publiek op nog ‘n moontlike Islamitiese aanval wou attent maak nie.
Die voorval het plaasgevind, presies ‘n week ná die terreuraanval by London Bridge wat agt mense laat omkom het, met dosyne wat gewond is. Nederland was sedert op ‘n hoë vlak van waaksaamheid ná die reeks aanvalle in ander Europese stede oor die afgelope maande.
‘n Nederlandse burger is laat Vrydag in hegtenis geneem nadat hy betrap is terwyl hy besig was om ‘n video te neem van een van die land se grootste stadions, het die polisie gesê.
Die 29-jarige Amsterdammer is buite die Philips-stadion in die suide van Eindhoven in hegtenis geneem waar die Nederlandse popsanger Guus Meeuwis opgetree het. Hy kon geen verduideliking bied oor waarom hy besig was om ten tye van die konsert die infrakstruktuur te verfilm nie, het NDTV berig.
Die verdagte is geradikaliseer, glo die polisie, en het hom Saterdagaand ‘n tweede keer in hegtenis geneem. Meeuwis het met die beplande konsert voortgegaan.
Kettingbotsing op N1 eis twee
‘n Gedeelte van die N1 tussen Kroonstad en Koppies by Heuningspruit in die Vrystaat, wat gister bykans die hele dag gesluit was vir verkeer ná ‘n kettingbotsing waarin twee mans dood is, is gisteraand, omstreeks 20:00 weer oopgestel.
Dit kom nadat ‘n kleinerige vragmotor, Dinsdagaand omstreeks 23:00, vermoedelik weens sterk wind omgeslaan het. Die vragmotor het in die rigting van Bloemfontein gery. Polisiewoordvoerder, Ian Gaobepe, sê ‘n ander vragmotor, wat groot kunsmissakke vervoer het, het by die toneel gestop om verkeer te waarsku.
Hy sê twee mans in ‘n bakkie het agter dié vragmotor gestop, waarna ‘n derde vragmotor met swaar staalpype in die bakkie vasgejaag het. Die bakkie is ‘n ent gesleep en is onder die vragmotor met die kunsmis op, vasgepen. Gaobepe sê polisiebeamptes en nooddienswerkers het ure gespook om ‘n vrag van die vragmotor waaronder die bakkie beland het, af te laai.
Die insittendes in die bakkie se lyke kon eers gistermiddag uit die wrak verwyder word. Volgens Gaobepe het die opruimingswerk lank geneem omdat die vrag swaar staalpype eers met spesiale toerusting verwyder moes word. Motoriste moes gister van alternatiewe roetes gebruik maak.
Verkeer in die noordelike rigting na Johannesburg is via Parys en Koppies herlei, terwyl verkeer in ‘n suidelike rigting na Bloemfontein op die R36 herlei is. Volgens Gaobepe is die bestuurder van die vragmotor met die swaar staalpype op na ‘n nabygeleë hospitaal geneem. Hy is intussen uit die hospitaal ontslaan. Gaobepe sê die name van die oorledenes is nog nie bekend nie.
Heidelbergpad lank gesluit na vragmotors bots
Die R549 tussen Deneysville in die Vrystaat en Heidelberg in Gauteng is vanoggend eers heropen ná ‘n botsing tussen twee vragmotors Dinsdagaand.
Polisiewoordvoerder, Livhuhani Hani, sê die bestuurder van die aankomende vragmotor en ‘n passasier is op die toneel dood.
‘n Wa wat deur ‘n vragmotor getrek is, het vermoedelik losgekom en daartoe gelei dat die bestuurder beheer oor die vragmotor verloor het.
Dié vragmotor het daarna met ‘n aankomende vragmotor gebots. ER24 se woordvoerder Russel Meiring sê met paramedici se aankoms op die toneel was die wragstukke van die twee vragmotors en ‘n sleepwa in die pad.
Hy sê was ‘n man vasgekeer in ‘n wrakstuk, terwyl nog ‘n man buite gelê het. Die twee was reeds dood.
Hani sê owerhede was tot vanoggend besig om die toneel op te ruim sedert die ongeluk omstreeks 20:20 plaasgevind het. ‘n Deel van die R549 sowat 2km van Deneysville was vir verkeer gesluit maar dit is weer vroeg vanoggend heropen.
Wits in rou na sewe verongeluk
Sewe swart studente van die Universiteit van die Witwatersrand is Sondagaand dood en ses ander is beseer toe die minibustaxi waarin hulle gery het gebots met ‘n sleepwa op die N1 suid naby Mokopane in Limpopo, het mediese nooddienste gesê.
Vlae by die Universiteit van die Witwatersrand hang halfstok ter nagedagtenis aan die sewe.
Die vise-kanselier van Wits, Adam Habib sê vlae sal vir die res van week halfstok hang. Die universiteit staan ook die families van die studente by.
Hulle was deel van groep wat aan ‘n ZCC-kerkbyeenkoms in Limpopo deelgeneem het.
Die minibus waarin hulle was het op die N1 naby die Nyl tolplaza teen n trekkersleepwa gebots en aan die brand geslaan.
Die bestuurder is ook dood terwyl die ses beseerdes na nabygeleë hospitale geneem is vir verdere behandeling.
Sommige van die studente is onherkenbaar verkool nadat die minibus aan die brand geslaan het.
In nog ‘n voorval is negentien swartes is beseer toe ‘n taxi op die Brickfieldweg-afrit op die N-3 na Durban teen ‘n motor gebots, omgeslaan en gerol het.
Een van die beseerdes is in ‘n ernstige toestand in die hospitaal opgeneem. Die woordvoerder van die nooddienste, Garrith Jamieson sê dit is nie duidelik wat die oorsaak van die ongeluk was nie, maar dat die polisie die saak ondersoek.
Die minister van Vervoer, Dipuo Peters en die Padverkeerbestuurskorporasie het vroeër ‘n beroep op motoriste gedoen om padreëls te gehoorsaam nadat meer as dertig mense die langnaweek in vyf ongelukke dood is.
Ondersoek kom na seiljagongeluk op Weskus
Die Suid-Afrikaanse Maritieme Veiligheidsowerheid sal die seiljagongeluk aan die Weskus ondersoek.
Drie mense was aan boord van die seiljag, wat glo van Langebaan na Kaapstad op pad was.
‘n Ierse burger wat in die Wes-Kaap woonagtig is, het oorleef en is nie beseer nie.
Hy kon daarin slaag om die owerhede van die ongeluk in kennis te stel.
Craig Lambinon, woordvoerder van die Nasionale Seereddingsinstituut (NSRI), het gesê die NSRI is Maandagoggend vroeg ontbied om bystand te verleen.
Die seiljag het tussen Melkbosstrand en Yzerfontein omgeslaan.
Lambinon het gesê die lyke van twee Wes-Kaapse inwoners, onderskeidelik ‘n Skot en ‘n Ier, is op die toneel gevind.
Die polisie het intussen ‘n dossier vir ‘n geregtelike doodsondersoek geopen om die oorsaak van die dood van die twee seiljagvaarders te bepaal.
“Met die NSRI se aankoms is die seiljag Tara aan stukke op die rotse aan die kus gevind,” het Lambinon gesê.
Dit is nog onbekend wat die ongeluk veroorsaak het aangesien dit nie duidelik is of die seiljag omgeslaan het voordat dit die rotse getref het nie.
Gautrein-tegnici werk deurnag na ongeluk in Pretoria
Tegnici het deurnag gewerk om Gautreinverkeer te herstel, nadat ‘n wegholvragmotor Saterdag in Pretoria deur ‘n keermuur gebars het.
‘n Trein kon net betyds voor die aankomende vragmotor rem en sodoende ‘n groter tragedie verhoed. ‘n Stuk betonheining is ook meegesleur in die ongeluk.
Een van die twee Gautrein-spoorlyne is beskadig is toe die sementmenger beheer verloor het.
Die treindiens tussen die Pretoria- en die Hatfield-stasie het die hele naweek stilgestaan en passasiers is per bus tussen stasies vervoer.
Die Gautrein se ander roetes word nie geraak nie.
Die Gautrein-bestuursmaatskappy sê op sy Twitter-blad dat alhoewel die kragtoevoer na een van die twee spoorlyne tussen die Hatfield- en Pretoriastasies herstel is, pendelaars steeds van busse moet gebruik maak.
Dit sal hul reistyd met ‘n paar minute verleng.
Jong Mandela daag nie op vir sy verkragtingsaak nie
Verwarring het Woensdag by die Johannesburgse landdroshof geheers, waar ‘n kleinseun van die voormalige president Nelson Mandela, beskuldig word van verkragting van ‘n minderjarige.
‘n Amptenaar het gesê Mandela is nie meer geskeduleer om te verskyn nie, en sy saak het verskuif na ‘n later datum.
Melvin Neale, wat deel is van die jong Mandela se regspan, het bevestig dat die saak nie in die hof aangehoor sal word soos voorheen nie.
“Ek kan nie die redes gee nie. Dit sal aan die lig kom in die hof op 6 November,” het hy gesê, en geweier om enige verdere inligting bekend te maak.
Die 24-jarige swart pa van drie, wat ‘n treffende ooreenkoms met sy oorlede oupa toon, is verlede maand op R7 000 borgtog uitgelaat nadat hy ‘n week in die tronk deurgebring het.
Tydens sy aansoek om borgtog, het hy versoek dat hy “nie beskou word as ‘n Mandela nie, maar as ‘n normale burger van die land”.
Die staat beweer dat die jong man die tienermeisie van 15 op 7 Augustus verkrag het.
Die slagoffer se woedende pa het vroeër gesê hy hoop die naam “Mandela” beteken nie dat die dader lig daarvan sal afkom nie.
Die pa beweer dat Winnie Madikizela-Mandela, die vermeende dader se stiefouma, haar lyfwagte gestuur het om die gesin te gaan intimideer nadat hulle die klag teen die jong Mandela gelê het.
Die lyfwagte het voorgee om polisiebeamptes te wees. ‘n Familielid van die slagoffer het bevestig dat die Mandelas probeer om druk op die slagoffer se ma te plaas om die saak terug te trek.
In Desember verlede jaar, was Mbuso betrokke in ‘n motorongeluk met een van aartsbiskop Desmond Tutu se kleinkinders in die vroeë oggendure na ‘n partytjie. Mbuso se Polo is afgeskryf maar die ongeluk is nie by die polisie aangemeld nie.
Mbuso het voorheen ‘n verhouding met Anais Grimaud, ‘n Franse kleurling van Reunion en die voormalige vrou van sy oudste broer, Mandla gehad.
Mandla het Anais se seun aan Nelson Mandela voorgehou as sy eie, maar na vaderskapstoetse is bevind dat die kind ‘n ander pa het. Sy het toe teruggekeer na die Franse Indiese Oseaan-eiland met haar baba.
Hyskraan val op Mekkamoskee
‘n Hyskraan wat op die Groot Moskee geval het in Saoedi-Arabië, het die dood van minstens 107 mense veroorsaak.
Die Masjid al-Haram is die godsdientige sentrum van Islam.
Gelowige Moslems wat daartoe in staat is, is veronderstel om ten minste een keer in hul lewe die pelgrimstog na Mekka aan te pak.
Die Groot Moskee in Mekka berei tans voor vir die jaarlikse Moslem-Hajj-pelgrimstog. Honderdduisende mense van oral ter wêreld sal aanstons opdaag.
Die land se ministerie van verdediging het die aantal sterftes bevestig. Die burgerlike beskermingsowerheid het Vrydagaand getwiet dat meer as 180 mense in die voorval beseer is.
Die Saoediese owerhede het verlede jaar met uitbreiding van die terrein begin om die groeiende aantal pelgrims te kan akkommodeer.
Die hyskraan wat Vrydag ineengestort het, is gebruik vir die bouwerk wat op die terrein gedoen word.
Luidens berigte het sterk winde die ongeluk veroorsaak, maar talle glo dat dit weens die Moslemimmigrantekrisis in Europa gebeur het.
Geen Suid-Afrikaners is glo in die ongeluk beseer nie.
Derde konstruksie-ongeluk op Sandton-perseel
Twee konstruksiewerkers is by die Nelson Mandela-plein in Sandton beseer nadat ‘n plafon op hulle geval het.
Dit is die derde soortgelyke ongeluk die afgelope maand op persele wat deur JHI Properties bestuur word.
Die uitvoerende bestuurder van JHI Properties, Nomzamo Radebe, sê die werkers is beseer toe die plafon van `n winkel op hulle geval het.
Volgens Radebe is voorsorgmaatreëls getref om die veiligheid van kliënte in die winkelsentrum te beskerm.
Op 10 Junie het `n vrou haar heup beseer toe sy op tydelike matte geval het.
In `n ander voorval in Junie is die 25-jarige vrou ernstig beseer toe deel van `n plafon op haar geval het.
Paniek toe bus se remme onklaar raak
Negentien mense is Donderdag beseer nadat hulle paniekbevange uit ‘n bewegende bus gespring het aan die Wes-Rand.
Die bus se remstelsel het glo onklaar geraak.
Die beseerdes se beserings wissel van gering tot matig en elf van hulle is in die hospitaal opgeneem.
Die mense is beseer toe ‘n bus se remme na bewering in Christiaan de Wet-weg onklaar geraak het en paniek onder die passasiers veroorsaak het.
Passasiers van die bus het na bewering uitgespring deur die vensters toe hulle besef iets is verkeerd.
Toe ER24 se paramedici op die toneel kom, het hulle 11 pasiënte na die Garden City-hospitaal geneem vir verdere behandeling, terwyl die oorblywende pasiënte deur ander dienste vervoer is.
Name bekend van brandbestryders in jongste heli-ongeluk
Die twee brandbestryders wat Woensdagmiddag in ‘n helikopter-ongeluk in Bainskloof naby Wellington in die Wes-Kaap omgekom het, se name is bekend gemaak.
Darrell Rea (39), die vlieënier en Jastun Visagie (23), sy medepassasier, is in die ongeluk oorlede is. Albei was lede van Working on Fire.
Dit is die derde lid van Working on Fire wat in ‘n soortgelyke ongeluk dood is. Hendrik “Bees” Marais is in Maart vanjaar dood nadat hy ‘n noodlanding met sy helikopter by Kaappunt moes doen.
“Die helikopter het in Bainskloof naby Wellington neergestort toe dit naby die brand in sterk winde moes land om die helikopter reg te kry vir vuur-bombardering,” het ‘n woordvoerder vroeër gesê.
Die mees onlangse vliegongeluk word ook deur die polisie en die Burgerlugvaartowerheid ondersoek.
Johan Heine, Working on Fire se uitvoerende hoof, het sy medelye teenoor die naasbestaandes uitgespreek.
Chabane-ongeluk was beplan sê FB-gebruiker
Die familie van die ontslape minister van die Staatsdiens, Collins Chabane, het ‘n klagte teen ‘n Facebookgebruiker, Thembani Chabane, ingedien, het RSG berig.
Chabane beweer dat die ongeluk waarin die minister en sy twee lyfwagte dood is, beplan was.
Chabane en sy twee wagte is dood toe hulle voertuig in die vroeë oggendure naby Polokwane op die N1 teen ‘n vragmotor gebots het.
Chabane wat aanvoer dat hy familie van die voomalige minister is, voer op sy Facebookbladsy aan dat ‘n lid van die ANC se Uitvoerende Komitee in Limpopo die vragmotorbestuurder omgekoop het om die ongeluk te veroorsaak.
‘n Familiewoordvoerder, Percy Chabane, sê hulle het verklarings by die polisie afgelê.
Minibus byna deur huismuur
Die bestuurder van ’n Quantum minibus-taxi het Dinsdagmiddag deur ‘n heining gejaag en teen ’n huismuur in Les Marais tot stilstand gekom.
Polisiewoordvoerder Sersant Anne Poortman sê die bestuurder is na ‘n nabygeleë hospitaal vir mediese behandeling geneem.
Gert Venter, ’n ooggetuie, vermoed die bestuurder het ’n voertuig probeer verbysteek en te laat besef daar is ’n aankomende voertuig reg van voor op pad. “Hy het die aankomende voertuig net betyds gesien en hasepad na regs gekies om ’n ongeluk te vermy. Die naaste uitweg was die heining van die huis op die hoek,” het hy gesê.
Poortman sê daar was geen ander beserings nie.
Bron: Pretoria Moot Rekord
Swart dag vir Bult-aftree-oord
Dit was ‘n swart dag vir die Bult-aftreeoord in die Vrystaat nadat vyf bejaardes op slag dood is toe die bussie waarin hulle gery het, omgeslaan het.
Twee van die beseerde inwoners van die Bult-aftreeoord op Bultfontein, wat Donderdag in ‘n ongeluk beseer is, is steeds in ‘n kritieke toestand in die Mediclinic Bloemfontein.
Dit kom nadat Daphne Van Rensburg, Wynand Breytenbach, Cielie Seyffert en Elna Kotzé ernstig beseer is toe die minibus waarin hul gereis het omgeslaan het buite die dorp.
Hospitaalwoordvoerder, Amanda Appelgryn, sê die vier beseerdes het veelvuldige beserings opgedoen en word in die hospitaal se intensiewe sorgeenheid behandel.
Die aftree-oord se bestuurder Gert Bezuidenhout het min woorde gehad om die tragedie wat die ouetehuis getref, te beskryf.
Hy het aan Bloemfontein Courant gesê daar is nie woorde om die groot verlies te beskryf nie. Hy het gesê almal by die aftreeoord is soos ‘n hegte gesin.
Lettie Muller, Daan Minnie, Dinie Aschar en Charlotte Lategan is op die toneel dood en Marie Ehlers later in die hospitaal.
Die bestuurder van die bussie, Hendrik Neethling, is in die Life-Rosepark Hospitaal, ook in die stad, behandel. Hy is egter reeds ontslaan.
Bezuidenhout sê die bussie was op pad terug van ‘n uitstappie naby Bloemfontein, toe ‘n bakkie glo probeer het om die bussie verby te steek. Die bakkie het egter weens ‘n aankomende vragmotor terug na sy baan beweeg en die bussie getref.
Die bussie het omgeslaan en in die veld beland.