Etiket: kettingbotsing

Kettingbotsing op N1 eis twee

‘n Gedeelte van die N1 tussen Kroonstad en Koppies by Heuningspruit in die Vrystaat, wat gister bykans die hele dag gesluit was vir verkeer ná ‘n kettingbotsing waarin twee mans dood is, is gisteraand, omstreeks 20:00 weer oopgestel.

Dit kom nadat ‘n kleinerige vragmotor, Dinsdagaand omstreeks 23:00, vermoedelik weens sterk wind omgeslaan het. Die vragmotor het in die rigting van Bloemfontein gery. Polisiewoordvoerder, Ian Gaobepe, sê ‘n ander vragmotor, wat groot kunsmissakke vervoer het, het by die toneel gestop om verkeer te waarsku.

Hy sê twee mans in ‘n bakkie het agter dié vragmotor gestop, waarna ‘n derde vragmotor met swaar staalpype in die bakkie vasgejaag het. Die bakkie is ‘n ent gesleep en is onder die vragmotor met die kunsmis op, vasgepen. Gaobepe sê polisiebeamptes en nooddienswerkers het ure gespook om ‘n vrag van die vragmotor waaronder die bakkie beland het, af te laai.

Die insittendes in die bakkie se lyke kon eers gistermiddag uit die wrak verwyder word. Volgens Gaobepe het die opruimingswerk lank geneem omdat die vrag swaar staalpype eers met spesiale toerusting verwyder moes word. Motoriste moes gister van alternatiewe roetes gebruik maak.

Verkeer in die noordelike rigting na Johannesburg is via Parys en Koppies herlei, terwyl verkeer in ‘n suidelike rigting na Bloemfontein op die R36 herlei is. Volgens Gaobepe is die bestuurder van die vragmotor met die swaar staalpype op na ‘n nabygeleë hospitaal geneem. Hy is intussen uit die hospitaal ontslaan. Gaobepe sê die name van die oorledenes is nog nie bekend nie.

Derde ongeluk vir vragmotorbestuurder wat chaos saai

Dit is die derde keer dat die swart vragmotorbestuurder wat verlede week verwoesting by Alberton gesaai het, vir strafbare manslag aangekla word.

Isaac Maruding het verlede week tussen 48 motors op die N12 by Alberton ingejaag en vier mense se dood veroorsaak.

Maruding (44) het Woensdag in die Palm Ridge-landdroshof aan die Oos-Rand om borgtog aansoek gedoen. Hy ontken skuld op vier aanklagte van strafbare manslag en roekelose of nalatige bestuur.

Maruding is in 1996 van strafbare manslag aangekla nadat hy ook in ’n ongeluk betrokke was, maar dit is later teruggetrek, het Media24 berig.

In 1997 is hy na nóg ’n ongeluk weer van strafbare manslag aangekla. Hy is skuldig bevind en het ’n vonnis van 18 maande uitgedien.

Hy is toe ook op aanklagte van roekelose of nalatige bestuur skuldig bevind, maar het ’n opgeskorte vonnis van vyf jaar tronkstraf gekry. Sy rybewys is ook vir 12 maande opgeskort.

Sewe mense is nog in ’n kritieke toestand en nog 19 is beseer. Die polisie het Maruding eers ’n dag ná die ongeluk in Potchefstroom aangekeer.

Maruding het van die ongelukstoneel gevlug en daarna gelieg deur te beweer verkeersbeampte het hom toestemming gegee om die toneel te verlaat.

Hy het Potchefstroom toe gevlug en nie sy werkgewer of die polisie oor die ongeluk ingelig nie.

Die eienaar van die Benusi-vervoermaatskappy, het gesê hulle was nie bewus van Maruding se vorige oortredings toe hy aangestel is nie.

Die verhoor is tot 27 Oktober uitgestel.

Kettingbotsing by Villiers na veldbrand

Digte rook weens veldbrande het Woensdag naby Villiers tot ‘n kettingbotsing gelei toe vragmotors, ’n minibus-taxi en motors gebots het en van die voertuie vlamgevat het.

Tussen Warden en Villiers het ‘n veldbrand sowat 10 km buite Villiers digte rookwolke oor die N3-hoofweg tot gevolg gehad.

Motoriste wat die kettingbotsing vrygespring het, het naderende motors gewaarsku – voordat die nooddienste opgedaag het – om nie die rookwolk binne te ry nie.

“Sommige motoriste het hulle eenvoudig nie aan ons gesteur nie en ten spyte van die ongeluk en swak sig net bly deurry. Ek het hulle nie weer sien uitkom nie,” het ‘n vrywilliger aan Netwerk24 gesê.

Die digte rook het veroorsaak dat hulp aan motoriste wat in die botsing betrokke was, bemoeilik is. Om sake te vererger het die vragmotors in die botsing se petroltenks vlamgevat en ontplof.

Die N3 is later vir verkeer gesluit en motoriste moes alternatiewe roetes volg.

Dit is steeds nie bekend hoeveel motors in die ongeluk betrokke was of hoeveel beseer is nie.