Afganistan – praag.co.za

Bendeverkragting van seuntjie in Swede deel van ‘Afghaanse kultuur’

Vyf tieners uit Afghanistan is gevonnis deur ‘n Sweedse hof tronk na die verkragting en aanranding en van ‘n Afghaanse seun, asook oor die verfilming van die voorval.

Die verkragting van jong seuns is ‘n algemene verskynsel in Afghanistan en baie polisiestasies het hul eie seunslawe. Die kulturele verskynsel het in Europa aangeland.

Vyf Afghaanse immigrante wat ‘n jonger landgenoot in ‘n beboste gebied gedwing het in die Sweedse stad van Uppsala op 24 Oktober, 2016, is nou gevonnis nadat hulle die seun meer as ‘n uur, met ‘n mes teen sy keel, beurtelings verkrag het.

Op 30 Oktober, is hulle gevonnis tot tussen elf en vyftien maande in jeugtronk maar sal egter nie uit Swede geskop word nie, aangesien die hof van mening is dat “die veiligheidsituasie in Afganistan ‘n ernstige impak op die verweerders sal hê”. Die tieners het na Swede gekom as “onbegeleide minderjariges”.

Een van die seuns het die verkragting met sy selfoon verfilm om “te hou as aandenking” en is skuldig bevind aan kinderpornografie.

Seuns “sonder baarde” of “dansseuns” is gewilde vermaak in Afghanistan. Die verskynsel staan bekend as Bacha bazi, wat vertaal word as “seuntjie-speel”, en sluit verkragting in.

Die nuusagentskap AFP het in Junie 2016 berig dat sulke seuns honderde polisiebeamptes gedurende die afgelope twee jaar al doodgemaak het.

“Die Taliban stuur seuns – pragtige seuns, mooi seuns – om besoekpunte binne te dring en polisiemanne dood te maak, te bedwelm of te vergiftig,” sê Ghulam Sakhi Rogh Lewanai, gewese polisiehoof van die sentrale provinsie Uruzgan.

“Hulle het uitgepluis dat dit die grootste swakheid van polisie is – Bacha bazi,” het hy aan AFP gesê.

Amerikaanse lugaanval op hospitaal skerp veroordeel deur VN

Die Verenigde Nasies (VN) het ’n aanval op ’n hospitaal van die organisasie Médecins Sans Frontières (MSF), beter bekend as Dokters Sonder Grense, in Koendoez in Afganistan skerp veroordeel.

Die hoof van die VN se humanitêre sending, Zeid Ra’ad Al Hoessein, het gesê indien ’n ondersoek sou bevind dat die hospitaal met opset geteiken is, dit as ’n oorlogsmisdaad beskou sal word.

Die sekretaris-generaal van die VN, Ban Ki-moon, sê ‘n grondige en onpartydige ondersoek na die voorval moet spoedig volg.

Die Amerikaanse president, Barack Obama, het ook ‘n ondersoek na die tragedie belowe. Jens Stoltenberg, NAVO se sekretaris-generaal het ook sy “diepe meegevoel” uitgespreek.

Negentien mense, onder wie 12 personeellede van MSF, is in die aanval dood.

Volgens MSF is die intensiewesorg- en ongevalle-eenheid in vlamme gelaat en het pasiënte doodgebrand.

Die Amerikaanse lugmag het erken dat hy in die omgewing van die hospitaal ’n lugaanval uitgevoer het.

“Die departement van verdediging sal ’n volledig ondersoek doen en ons sal op die uitslag van die ondersoek wag voordat ons enige verdere besluite neem rakende die omstandighede wat die aanval betref,” het Obama in ’n verklaring gesê.

Volgens Dokters Sonder Grense is die GPS-koördinate van sy fasiliteite in Koendoez by verskeie geleenthede aan Amerikaanse magte in Afghanistan deurgegee.

Afgaanse regeringsmagte, met die steun van onder meer Amerikaanse lugaanvalle, het die afgelope paar dae na wat berig word dele van Koendoez in hewige gevegte herower nadat die Taliban die stad vroeër vandeesweek ingeneem het.

Die Taliban se suksesvolle aanslag was ’n vernederende nederlaag vir die VSA. Dit was die eerste keer sedert 2001 dat ’n provinsiale hoofstad in die Taliban se hande beland het.

Taliban ontken berigte dat VSA gebiede herower

Die polisiehoof van die Koendoez-provinsie in Afganistan, Mohammad Qasim Jangalbagh, het in die sentrale deel van die stad Koendoez die inwoners gevra om met hul normale lewe voort te gaan.

’n Inwoner van Koendoez het egter aan die nuusagentskap, Associated Press, gesê hewige gevegte woed nog in die Khoeja Mashhad-gebied van die stad, ongeveer 200 meter noord van die hoofplein in die stad.

Afgaanse regeringsmagte het onder aanvoering van Amerikaanse troepe teen vroeg Donderdag glo groot dele van die strategiese stad Koendoez in die noorde van Afganistan herower nadat die Taliban die stad drie dae tevore ingeneem het.

Die Taliban se suksesvolle aanslag was ’n vernederende nederlaag vir die regeringsmagte en hul Amerikaanse bondgenote.

Dit was die eerste keer sedert 2001 dat ’n provinsiale hoofstad in die Taliban se hande beland het.

Nadere besonderhede oor die regeringsmagte se “massiewe” teenoffensief oornag is nog nie bekend nie, ook nie watter dele van die stad na bewering weer onder regeringsbeheer is nie.

Afgaanse magte gerugsteun deur Amerikaanse lugaanvalle, het die afgelope twee dae gespook om die stad te herower. Amerika en sy koalisievennote het ook raadgewers na Koendoez gestuur om Afgaanse magte by te staan.

’n Taliban-woordvoerder het Donderdag gesê Amerikaanse magte is by die gevegte betrokke, maar hy het ontken dat die stad weer in regeringsmagte se hande is.

Volgens hom bied die insypelaars weerstand in die middel van die stad en is hulle ook in beheer van omliggende dele.

Afganistan ryk aan minerale

Afganistan is ryk aan minerale – ongeveer $1 000 miljard ryk, volgens Amerikaanse geologiese spanne wat die land se minerale potensiaal vasgestel het. Dit sluit groot reserwes koper, yster, litium, niobium en goud in. Trouens, Afganistan hou die potensiaal in om een van die rykste mineraalproduserende lande ter wêreld te word, berig die New York Times.

Maar, waarsku kenners, Afganistan het ook die gene om ‘n tipiese voorbeeld van ‘n land van ‘n hulpbronnevloek te wees – ‘n land waar die minerale ontgin word, maar die mense van die land steeds krepeer.

Hiervoor is daar net te veel redes. Korrupsie is so diep gewortel en endemies dat dit bykans ondenkbaar is dat transaksies beklink sal kan word waar die bevolking, eerder as die maghebbers, dit in klinkende munt sal beleef.

Minerale rykdomme sal byna verseker tot grondtwiste tussen strydende etniese stamhoofde lei – en in Afganistan is ‘n drosterkameel genoeg rede vir ‘n stamoorlog, laat staan nog mineralerykdomme. Boonop, grondtwiste oor wat onder die grond aangaan, gaan ook bogronds neerslag vind waar papawerlande, wat in opiumrykdomme gemeet word, in die spervuur kan beland.

Net om sake nog komplekser te maak, is heelwat van die verborge skatte in gebiede waar die Taliban sterk staan. Dit is uiters onwaarskynlik dat die Taliban handjies gevou sal toekyk hoe die bevolking onder hul neuse welvarend word, en hul oorlugslus verdamp.

Hierdie soort mineralerykdomme hou die potensiaal vir tienduisende werksgeleenthede in.