‘n Kragtige aardbewing van 6,5 op die Richterskaal het ‘n yl bevolkte gebied in Botswana Maandagaand geskud. Geen sterftes is aangemeld nie.
Die skudding was sowat 230 kilometer noordwes van Gaborone en was op ‘n diepte van 29 kilometer. Die skudding om 20 voor agt gisteraand is tot in buurlande gevoel.
Verskeie berigte is ontvang dat die skudding duidelik in Gauteng gevoel kon word. In Johannesburg is twee geboue as voorkomingsmaatreël ontruim.
‘n Seismoloog van die raad van geo-wetenskap, Dr. Martin Brandt, sê die skudding om agt minute oor vyf, was inderdaad ‘n aardbewing. Brandt sê egter daar is nie rede tot kommer nie.
Hy sê die aardbewing van 4,6 se epi-sentrum was in die Klerksdorp-omgewing in Noordwes. Dit is so ver as Welkom in die Vrystaat en Pretoria en Johannesburg in Gauteng gevoel.
Noordwes se regering het bevestig dat ‘n aardbewing in die vroeë oggendure van Maandag 5.2 op die Richterskaal geregistreer het.
Die aardbewing was 5 km onder die aarde se oppervlak en sy episentrum was binne 8 km van die Noordwes dorpie Stilfontein.
LUR Galaletsang Gaolaolwe sê die provinsiale rampbestuur se span is gestuur om die situasie te evalueer.
ESKOM het bevestig dat daar slegs ‘n kragonderbreking was wat reeds reggestel is. Die Kamer van Mynwese en die Departement van Minerale Hulpbronne het ook bevestig dat daar geen beserings was nie.
Kragtige aardbewings in Suider-Afrika is ‘n seldsame verskynsel. Mosambiek het in 2006 deurgeloop onder ‘n skudding van 7,5 waarin vier mense omgekom het.
Steven Anderson, ‘n Amerikaanse pastoor wat gekant is teen homoseksuele, is hartseer oor die besluit van Suid-Afrika om hom en sy 17 helpers te verbied om na die land te reis.
Anderson het nou sy hoop op Botswana geplaas, maar GayRadio SA se bedryfsbestuurder Hendrik Baird het gesê Botswana moet Suid-Afrika se voorbeeld volg en Anderson ook toegang verbied.
Die radiostasie het name ingesamel teen die pastoor se besoek.
“Ek is verban uit Suid-Afrika en die Verenigde Koninkryk. Ek word nie eens toegelaat om ‘n aansluitingsvlug in Londen te kry nie,” het Anderson op Facebook en Twitter gesê.
Hy het uit Handelinge 18, vers 6 aangehaal:
Paulus al sy aandag bestee aan die prediking om die Jode daarvan te oortuig dat Jesus die Messias is.
6 Toe hierdie Jode hom egter aanhou teenstaan en beledig, het hy die stof van sy klere afgeskud en vir hulle gesê: “Julle bloed is op julle eie kop. Ek is onskuldig. Van nou af spits ek my toe op die nie-Jode.”
“Ek voel jammer vir mense wat in Suid-Afrika woon, maar dank God ons het nog ‘n wye oop deur in Botswana. Bly uitkyk vir verslae van menigtes wat gered word in Botswana, waar godsdiensvryheid nog bestaan,” het hy geskryf.
Die minister van Binnelandse Sake Malusi Gigaba, het sy aansoek vir vrystelling van ‘n visum teruggetrek.
Gigaba het Dinsdag aangekondig dat Anderson, van die Gelowige Wêreld Baptiste Kerk in Arizona, in terme van die Wet op Immigrasie, Artikel 29 (1) d toegang verbied is, na aanleiding van ‘n petisie wat GaySA Radio geloods het.
Die 17-sterk afvaardiging wat Anderson (foto) vergesel sal ook nie welkom wees nie.
In die aanloop tot die aankondiging van sy besluit, het Gigaba sonder ironie gesê Suid-Afrika is ‘n “pionier” van maatskaplike geregtigheid en menseregte.
Die land het die hoogste moord- en verkragtingsyfer ter wêreld en die bestaan van ‘n sistematiese uitwissingsveldtog teen wit boere is algemene kennis. Herhaaldelike petisies met honderde duisende name oor die verskriklike toestand, het geen indruk nog gemaak op die regering nie.
Burgers van die VSA word gewoonlik vrygestel van ‘n aansoek om ‘n visum na Suid-Afrika te kom, maar in die geval van Anderson en sy gevolg, is hierdie voorreg herroep.
Anderson sê Botswana is meer ontvanklik vir sy standpunt dat gay mense sodomiete is. Hy het gesê hy het ‘n sendeling wat reeds werk doen daar, en glo hulle sal verwelkom word.
Anderson het ondersteuners in Botswana soos dit uit ‘n Facebook-inskrywing blyk: “Een ding kan jy weet van mense wat hulself voordoen as verdraagsaam, is dat hulle net verdraagsaam is teenoor sonde, nie verskillende idees nie. Moenie daaroor bekommer nie Pastoor Anderson.. hou aan met die verkondiging van die Woord.”
Negentien polisiebeamptes en twee beamptes van binnelandse sake sal na verwagting vandag weer in Zeerust in die hof verskyn.
Dit volg nadat hulle glo in November verlede jaar smokkelaars by die Kopfonteingrenspos tussen Suid-Afrika en Botswana gehelp het om onwettige sigarette die land in te bring.
Alle verdagtes is vroeër op R1 500 borgtog elk uitgelaat.
Hulle staar altesaam 54 aanklagte van bedrog en korrupsie in die gesig.
Sestien grensbeamptes en drie amptenare van binnelandse sake sal na verwagting binnekort in die Zeerust-landdroshof verskyn.
Hulle het na bewering smokkelaars by die Kopfontein-grenspos tussen Suid-Afrika en Botswana gehelp.
Die Valke het die amptenare aan diens Woensdag in hegtenis geneem. ‘n Woordvoerder van die Valke, Hangwani Mulaudzi het gesê die verdagtes staar 54 aanklagte van bedrog en korrupsie in die gesig.
Hy het gesê die beamptes het na bewering toegelaat dat smokkelaars vervalste sigarette in die land bring.
Die beamptes het glo motoriste by die grens deursoek en geld geëis as hulle onwettige goedere gevind het, in plaas daarvan om die wet toe te pas. Mulaudzi het gesê verdere arrestasies word verwag.
Mulaudzi het gesê nadat hulle ‘n wenk ontvang het, is die vermeende beamptes gemonitor.
Hy het gesê dit is nog nie duidelik hoeveel geld die beamptes na bewering deur hul korrupte praktyke verdien het nie.
Die departement van kommunikasie gaan buurlande help om satellietskottels aan te skaf sodat hulle SABC-propaganda kan volg.
Die regering het ‘n veldtog aangekondig wat veral swart Suid-Afrikaners in staat sal stel om met skottels en toestelle uitsaai-seine na digitaal om te skakel.
‘n Woordvoerder van die Departement van Kommunikasie, Solly Mokoetle het bevestig dat die regering vyf miljoen swart huishoudings gaan help met toestelle om die uitsaai-seine om te skakel.
Dié maatreëls word onderneem ter voorbereiding van die omskakeling van analoog na digitaal-uitsendings van Junie vanjaar af.
Wit kykers sal self vir die omskakeling moet betaal as hulle belangstel om die SABC se volg.
Mokoetle sê dit is belangrik om inwoners op die grense van Namibië, Botswana, Mosambiek, Swaziland en Lesotho eerste te help.
Politieke ontleders meen die mededinging in Vrydag se algemene verkiesing in Botswana sal die strafste wees in die land se 48 jaar van demokrasie, het RSG berig.
Drie partye neem aan die verkiesing deel. ‘n Kenner verbonde aan die Universiteit van Botswana, professor Zebani Maundeni meen die regerende BDP-party van president Ian Khama kan sy sterkste teenstand nog verwag.
Die moontlikheid bestaan dat hy nie ‘n volstrekte meerderheid in die parlement kan hê nie.
Maundeni sê daar kan vir die eerste keer ‘n koalisieregering wees.
Die Botswana Verkiesingskommissie sê meer as agthonderd-duisend kiesers het geregistreer om te kan stem.
Die Afrika-Unie het sy kommer uitgespreek nadat Botswana nie reismaatreëls teen burgers van lande wat deur die ebolavirus getref is, wou ophef nie.
Die Unie sê die weiering om reisbeperkings op alle burgers van die betrokke lande te lig, het die ekonomiese las op die lande, Liberië, Guinee en Sierra Leone verhoog.
Botswana het die AU se versoeke om alle reisbeperkings op te hef, summier geïgnoreer.
‘n Woordvoerder van die AU Kommissie, Sissy Potgieter, sê in die betrokke drie lande waar sakelui se reise beperk word, sal die ekonomie ‘n knou kry.
Potgieter sê die lande wat nie wil gehoor gee nie, sal oortuig moet word om saam te werk.
Die ministerie van Gesondheid in Botswana sal voortgaan om alle ebolabesmette lande te monitor voordat besluite rakende reisbeperkings oorweeg sal word.
‘n Woordvoerder van die ministerie, Shinaaz Halabi, het bevestig dat die huidige reisbeperkings steeds geld.
Groot moondhede soos China en Brasilië, en voormalige koloniale magte soos Frankryk en die Verenigde Koninkryk, is byna heeltemal afwesig in die bekamping van die siekte.
Die grootste enkele mediese sending na Afrika teen ebola, in die voorste linie, is Kuba.
Terwyl daar hulpgeld beskikbaar is uit die VSA, is daar ‘n nypende tekort aan personeel wat dié klein eilandjie klaarblyklik sal voorsien.
In die sewentigerjare toe Afrika se nuwe onafhanklike lande geflankeer het met sosialisme, het onderwysers, dokters en soldate uit Kuba na 17 Afrika-lande gstroom, maar van Spaans het net salsa-musiek in Wes-Afrika oorgebly.
Intussen het die Johannesburgse Nooddienste verklaar dat sy personeel op hulle poste is.
‘n Woordvoerder van die Johannesburgse Nooddienste, Robert Mulaudzi, sê al die stasies binne die stad Johannesburg is operasioneel en alle paramedici is ook op volle sterkte.
Die staking in Gauteng se nooddienstesektor raak dus nie Johannesburg nie.
Die staking raak glo slegs sekere dele van die Tshwane Metroraad waar baie pasiënte by klinieke nie mediese dienste kry nie.
Van die gebiede wat geraak word sluit in Soshanguve, Hammanskraal, Temba en die Pretoriase middestad in.
Die uitbreek van bek-en-klouseer vier jaar gelede het Suid-Afrika R4 miljard per jaar in verlore uitvoere gekos en was grootliks te danke aan die ineenstorting van die staat se vermoë om entstowwe te vervaardig.
Suid -Afrika het vir meer as 80 jaar ‘n internasionale reputasie gehad vir die ontwikkeling bek-en-klouseer entstowwe.
Die direkteur-generaal van departement van Landbou, Edith Vries het gesê die Onderstepoortmaatskappy het die vervaardiging van die entstof gestaak omdat daar geen belegging in toerusting en sy vermoëns was nie.
Ervare personeel het Onderstepoort ook verlaat om beter betalende werke te kry.
Die regering sê daar is nou ‘n besef dat navorsing- en ontwikkelingsbesteding verhoog moet word.
Die minister van Landbou, Bosbou en Visserye, Tina Joemat-Pettersson het tydens ‘n nuuskonferensie Woensdag die opheffing van die verbod op rooivleis-uitvoere deur die Wêreld Dieregesondheidsorganisasie (WAHO) geloof.
Sy het gesê die departement het meer as R8 miljoen bestee in die aankoop van nuwe toerusting vir plaagdodertoetsing.
Die regering vee egter van die probleme by Onderstepoort Biologiese Produkte en die Dierenavorsingsraad onder die mat.
In 2010 is R400 miljoen toegeken vir die bou van ‘n nuwe fabriek om net bek-en-klouseer entstof te produseer. Die aanleg is egter nog nie operasioneel nie.
Sowat 1% van die land se rooivleisproduksie, hoofsaaklik wildsvleis, word uitgevoer. Ander uitvoere sluit diervelle en wol in.
Die direkteur van dieregesondheid by die departement, dr Mpho Maja , het gesê die uitbraak van bek-en-klouseer is nie weens rondloperdiere en ‘n gebrek aan grensdrade gekoppel nie.
Die siekte is endemies in buffels, en dikwels word dit na vee oorgedra. Die verspreiding van die siekte is in die wiele gery deur die onvermoë van die staatsbeheerde Onderstepoort Biologiese Produkte om die vereiste entstof te produseer.
Die produksie van entstof het in 2005 opgehou en Suid-Afrika moes 500.000 dosisse invoer vanuit Botswana.
Wat veronderstel was om die hoogtepunt van ’n militêre oefening tussen agt lande in Suider-Afrika te wees, het Sondagoggend in ’n tragedie op die kus suid van Pelikaanpunt in Namibië geëindig.
Minstens twee soldate van die spesiale magte van Suid-Afrika en Malawi het gesterf, verskeie word vermis en talle is beseer in ’n fratsongeluk in ‘n stormagtige see aan die Namibiese kus.
Sedert vroeg Sondagoggend is die jongste verwikkelinge in die strategiese militêre oefening van die weermagte van die Suider-Afrikaanse Ontwikkelingsgemeenskap (SADC) in die grootste geheimhouding gedompel nadat twee vlootvaartuie van die Suid-Afrikaanse spesiale magte net suid van Paaltjies vergaan het.
Sowat 600 soldate van die weermagte van Namibië, Suid-Afrika, Angola, Malawi, Zambië, Botswana, Zimbabwe en Lesotho is tans op Walvisbaai saamgetrek vir die eerste militêre oefening van sy soort in die substreek.
Die maneuvers en opleiding het van 9 tot 29 September plaasgevind en vanoggend sou die laaste fase van die projek ten einde loop. Dit het ’n taktiese aanval in woestynoorlogvoering behels waarby alle weermagelemente betrokke sou wees vanaf die vloot, die leër en die lugmag tot die geneeskundige dienste.
Presies wat gisteroggend gebeur het, bly steeds ’n geheim van die manne en vroue in uniform, maar dit was beslis die laagtepunt van ’n beplande elite-aanval op ’n denkbeeldige “vyand” suid van Walvisbaai.
Republikein was self op die toneel sowat agt kilometer suid van Paaltjies en die feite is dat die twee Barracuda landingsvaartuie van die Suid-Afrikaanse vloot op onverklaarbare wyse omgeslaan het nog voordat die branders en die kuslyn bereik kon word. Hierdie vaartuie wat spesiaal ontwerp is op die basis van ’n rubberboot om spesiale magte vanaf duikbote en groter vlootvaartuie vir aanvalle op land te ontplooi, word as “onsinkbaar” beskou.
Volgens eerstehandse inligting was die weermagspesialiste veronderstel om ’n eerstelig-aanval op die teikenbasis uit te voer en is verskeie Barracudas as landingsvaartuie ingespan.
Twee van die bote met hul bemanning en die aanvalsmag het egter op see verdwyn. Eers nadat die twee groepe nie by die teiken opgedaag het nie, is onraad vermoed en ’n reusagtige soek- en reddingsveldtog op land en see van stapel gestuur.
Eers ná 11:00 is die wrakke van die twee vaartuie opgespoor omdat vermoed is dat die ongeluk tussen Paaltjies en Pelikaanpunt plaasgevind het.
Die twee vaartuie was egter tien kilometer van die teiken af.
In een weergawe word vertel dat die militêre kontingent van een van Namibië se buurlande per ongeluk een van die bote met vlootgrofgeskut raakgeskiet het en dat die ander boot hulle te hulp gesnel het.
Die ander weergawe is dat die bote op see verdwaal het en nie rekening gehou het met die deinings en golwe van tot drie meter nie. Nadat die eerste boot omgeslaan het, het die ander ’n reddingspoging probeer uitvoer, maar het self in die moeilikheid beland.
NamPort en die waarnemende kaptein van Walvisbaai se hawe kon gister geen lig op die werklike omstandighede en voorval werp nie en die direktoraat van maritieme sake op Walvisbaai het alle navrae na die vloot verwys.
Die vloothoofkwartier op Walvisbaai het op sy beurt alle navrae na die weermaghoofkwartier in Windhoek verwys.
Dit was uiteindelik die polisie in Windhoek wat die voorval bevestig het met ’n kort aankondiging dat twee soldate by Walvisbaai gesterf het.
Geen amptelike verklaring is egter dusver uitgereik oor die presiese aard van die voorval, die vermistes of die beseerdes nie.
Teen 15:00 gister is een van die vaartuie wel uit die water gehaal, maar die tweede boot het nog omgedop agter die branders gelê.
Om 16:00 het ’n helikopter van een van die weermagte die toneel besoek en byna onmiddellik na die Rooikop militêre basis teruggekeer. – Die Republikein
Die Kabinet het ‘n verklaring uitgereik waarin hulle “die mense van Zimbabwe en politieke partye gelukwens met die suksesvolle, gladde parlementêre en plaaslike verkiesings”.
Pres. Jacob Zuma se rol as die Suider-Afrikaanse Ontwikkelingsgemeenskap (SAOG) se fasiliteerder geprys en gesê die rol wat dialoog gespeel het om alle politieke partye te oorreed tot vreedsame verkiesings, was deurslaggewend.
Daar heers eenstemmigheid in die SAOG oor die geloofwaardigheid van die Zimbabwiese verkiesingsuitslag, met die uitsondering van Botswana wat meen die verkiesing was nie vry en regverdig nie.
Botswana is die enigste land in die Gemeenskap wat nie van Suid-Afrika afhanklik is nie, weens die diamantreus De Beers se belange in die land.
Die SAOG vergader Saterdag en Sondag onder meer om die verslag van sy waarnemerspan by die Zimbabwiese verkiesing te oorweeg en ’n besluit oor die aanvaarbaarheid van die verkiesing te neem.
By die inligtingsessie na afloop van die kabinetsvergadering het Phumla Williams, waarnemende kabinetswoordvoerder, en Tina Joemat-Pettersson, minister van landbou, bosbou en visserye, gesê Suid-Afrika het nog nie ’n finale gevolgtrekking oor die verkiesingsuitslag gemaak nie.
Botswana sê hy gaan leiers van die Suider-Afrikaanse Ontwikkelingsgemeenskap probeer oorreed om die verkiesingsuitslae in Zimbabwe te laat oudit.
Dié land se minister van Buitelandse Sake, Phandu Skelemani het in Gaberone gesê Botswana bevraagteken die regverdigheid van die verkiesing.
Skelemani sê Botswana is bekommerd dat die verkiesing nie aan die SAOG se riglyne voldoen het nie en dat verskeie insidente en ongerymdhede voorgekom het wat die regverdigheid, deursigtigheid en geloofwaardheid van die proses in gedrang bring.
Westerse lande het vroeër ook die uitslag bevraagteken nadat die opposisieparty, die MDC, gesê het verkiesingsbedrog is gepleeg.
Botswana se president Ian Khama is een van die weinige Afrika-leiers wat president Robert Mugabe openlik kritiseer. In 2008 het Botswana geweier om Mugabe se herverkiesing te erken.
‘n Ondersoek is van stapel gestuur nadat ‘n ploftoestel in ‘n motor, agter pres. Ian Khama van Botswana se kantoor gevind is.
“Die ministerie van verdediging wil die publiek inlig dat die ondersoek steeds aan die gang is. ‘n Ploftoestel was in ‘n motor gevind wat agter die kantoor van die president geparkeer was,” het die departement in ‘n verklaring gesê.
“Vrae oor wie die toestel daar geplaas het, vorm op dié stadium deel uit van die ondersoek.”
Die pakkie het tot ‘n bomdreigement gelei, en Khama se kantoor sowel as geboue in die Gaborone-omgewing was op 3 Maart ontruim.
Khama was ten tyde van die voorval op ‘n staatsbesoek aan Australië.
“Die toestel was in ‘n geseëlde harde plastiekhouer gevind. Die merke, vorm en kleur van die pakkie het laat blyk dat dit ‘n houer is wat gebruik word vir die verbryseling van granate.”
Die toestel is deur veiligheidsagente vernietig, as ‘n maatreël om verdere risiko’s te vermy.
