Etiket: oorlog

Vragmotor vol ontbindende lyke verhoog migrante-krisis

Die ondraaglike stank van ontbindende lyke van 71 onwettige immigrante in ’n verlate vragmotor in Oostenryk het gelei tot die inhegtenisname van vyf mense.

Die lyke was die van 59 mans, agt vroue en vier kinders wat in die vrag­ruim toegesluit was. Die vragmotor is Donderdag verlate langs die hoofweg tussen Boedapest en Wene gevind, naby die Hongaarse grens.

’n Siriese reisdokument is aan een van die lyke gevind.

Volgens aanduidings het die smokkelvrag al minstens 24 uur daar gestaan. Die mense het vermoedelik versmoor in die digsluitende houergedeelte wat met draad toegedraai was.

Drie Bulgare en een Afgaan is Saterdag in hegtenis geneem, maar hulle hou vol dat hulle onskuldig is. Een van die mense wat in hegtenis geneem is, is vermoedelik die eienaar van die vragmotor. Hy is van Bulgaars-Libanese oorsprong.

Die polisie in Hongarye het Maandag ‘n vyfde verdagte vasgetrek.

Die lyke was reeds in ‘n gevorderde stadium van ontbinding en die polisie vermoed dat die onwettige immigrante reeds twee dae dood was voordat hulle ontdek is.

Lykskouings word nou gedoen en die uitslag sal binnekort beskikbaar wees, het die Oostenrykse staatsaanklaer, Johann Fuchs, gesê.

Die polisie probeer nog vasstel van waar die res van die oorledenes gekom het.

Oostenryk se minister van binnelandse sake, Johanna Mikl-Leitner, het gesê die voorval sal hopelik dien as ’n wekroep tot gesamentlike optrede deur Europa.

“Die beste manier om die krisis te hanteer, is om wettige roetes na Europa te skep eerder as om grensbeheer te verskerp.”

Melissa Fleming, woordvoerder van die Verenigde Nasies se vlugtelinge-agentskap in Genève, het die voorval as “absoluut skokkend” bestempel.

Spanning tussen Koreas ontlont

Noord- en Suid-Korea het vandeesweek ooreengekom om die onlangse spanning op die Koreaanse skier­eiland te ontlont ná insidente by die grens.

Albei lande se weermagte was op ’n gereedheidsgrondslag geplaas nadat verlede Donderdag se oor-en-weer skietery.

Die krisis het Donderdag breekpunt bereik nadat Noord-Korea vier grofgeskutrondes op Suid-Korea afgevuur het. Die Suide het die grofgeskut met 29 rondes beantwoord.

Propaganda-uitsendings deur Suid-Korea is ná 11 jaar hervat nadat ‘n landmynontploffing in die gedemilitariseerde sone tussen die twee landes Suid-Koreaanse soldate beseer het.

Die uitsendings het enkele dae ná die ontploffings begin. Propaganda en harde popmusiek is oor luidsprekers in die rigting van die Noorde uitgesaai.

Volgens die Suid-Koreaanse nuusagentskap Yonhap kon die Noorde en Suide Maandag ‘n ooreenkoms bereik na onderhandelinge wat sedert Saterdag duur.

Volgens die ooreenkoms sal Noord-Korea om verskoning vra vir die landmynontploffings en Suid-Korea sal die propaganda-uitsendings staak.

Die twee Koreas verkeer tegnies steeds in ’n staat van oorlog sedert die Koreaanse Oorlog in 1953 met ’n wapenstilstand geëindig het.

Die twee lande het nooit ‘n vredesverdrag onderteken nie.

Noord-Korea dreig egter voortdurend met militêre optrede in reaksie op die jaarlikse weermagoefeninge tussen die VSA en Suid-Korea.

Aanslag teen Al-Sjabaab verskerp

‘n Gesamentlike aanslag van die Somaliese weermag en magte van die Afrika-Unie is op die Al-Sjabaab-vesting, Kismayo, toegespits.

Die terreurgroep verdien glo aansienlike bedrae uit heffings en belastings omdat hulle die hawe van Kismayo beheer.

Regeringsamptenare het die week gesê die gesamentlike magte is besig om verdere druk op die Al-Sjabaab- vesting toe te pas.

Duisende burgerlikes het gevlug voor die verwagte aanslag. Keniaanse troepe, wat deel uitmaak van die 17 000 vegters van Afrika-Uniemag, veg sy aan sy met Somaliese milisiegroepe, wat teen Al-Sjabaab met sy noue bande met Al-Kaïda gekant is.

Die groep is nou ongeveer 40 kilometer van die suidelike Somaliese hawestad.

Beheer van Somalië, gebuk gegaan het onder meer as twee dekades van burgeroorlog, is van kardinale belang om sekere buitelandse beleggers tevrede te stel en die ekonomie ‘n hupstoot te gee.

Olie- en gasontginning kan teen 2020 afskop nadat Shell, Exxon en BP aangedui het dat hul eksplorasiewerk suksesvol afgehandel is, volgens President Hassan Sheikh Mohamed.

Die konflik het reeds troepe vanuit lande soos Ethiopië, Kenia, Uganda, en Burundi ingetrek.

Al-Sjabaab word vermoedelik deur Eritrië befonds wat Ethiopië se magsposisie in die streek wil inperk.

ISIS krap Novus orbis terranum om

Owerhede in sentraal-Asië se Sowjet “stans” – die vyf republieke van die voormalig Sowjetunie – doen drakoniese stappe om van militante Islam ontslae te raak, nadat Turkye se bedekte steun vir ISIS uitgebrei het.

Veiligheidsbeheer en ingryping kan die nodige stabiliteit verseker, aangesien onstabiliteit ‘n kenmerk geword het van sogenaamde demokratiese politieke prosesse wat onder Anglo-Amerikaanse invloed vastrapplek gekry het.

Oesbekistan het baarde en Islamitiese kleredrag verbied en restaurante gesluit wat weier om alkohol te verkoop.

Die streek se outokratiese regeerders voer die afgelope kwarteeu, sedert die Sowjetunie in duie gestort het, ’n stryd teen Islamitiese militante, maar die opkoms van die Islamitiese Staat (ISIS) het volgens veiligheidsdienste nou ’n groter en ernstiger gevaar meegebring.

Die jongste ontwikkelinge hou verband met ‘n Turkse gaspyplyn wat deur president Vladimir Poetin in die vooruitsig gestel is, asook die kernooreenkoms tussen Iran en Westerse moondhede.

Westerse energiebelange beskou Turkye se President Erdogan se aanvaarding van die gasroeteplan as ‘n direkte aanval op die globale strategie van die Verenigde State asook NAVO.

Hierdie pyplyn, as dit eendag ‘n werklikheid word, sal ‘n kontinentale kommunikasieroete oopmaak en dreig om Washington se heerskappy oor die res van die wêreld in te perk.

Dit sal toelaat dat Rusland die Oekraïense chaos systap en ‘n nederlaag van die Europese embargo beteken.

Op die 22ste Julie het President Barack Obama dus sy Turkse eweknie, Erdogan, geskakel en ‘n paar ernstige dreigemente gemaak.

Volgens inligting, het die Amerikaanse president verklaar dat hy ‘n ooreenkoms met die Britse premier David Cameron Turkye gesluit het om Turkye uit NAVO te skop – wat ‘n burgeroorlog en die verdeling van Turkye in twee state impliseer – tensy Turkye ophou met die gaspyplyn.

Die afgelope vyftien jaar, het George Friedman, die stigter van die private intelligensie maatskappy Stratfor, Westerse leiers oorreed dat BRICS geen belangrike rol sal speel in die 21ste eeu nie, maar ‘n Islamitiese Turkye wel. Friedman is ‘n oud-medewerker van Andrew Marshall, die Pentagonstrateeg tussen 1973 en 2015.

Vroeër, in 2001, het strateë van die Amerikaanse Departement van Verdediging ‘n hermodellering van die «Groter Midde-Ooste» voorgestel wat die verdeling van Turkye voorsien het met onder meer ‘n onafhanklike Koerdistan wat dié Koerde van Irak en Iran insluit.

Hierdie projek het veronderstel dat Turkye uit NAVO tree, maar het nie rekening gehou met ISIS nie.

Kolonel Ralph Peters het bovermelde plan in ‘n artikel in Parameters (2001), uitgestippel voordat hy in 2005 die kaart van die Novus orbis terranum in die streek gepubliseer het.

Turkye weier intussen dat die VSA lugaanvalle teen ISIS vanaf hul basis in Turkye loods.

VSA stook oorlog in Europa

Die Amerikaanse minister van verdediging, Ash Carter, het vrese dat sy land ‘n oorlog aanmoedig verhoog met ‘n aankondiging oor die militêre opbou in NAVO-lande wat aan Rusland grens.

Carter sê die VSA sal militêre toerusting, insluitende oorlogstenks en artillerie in die drie Baltiese state sowel as Pole, Bulgarye, Roemenië en Duitsland stasioneer.

Rusland het intussen gesê enige pogings om sulke toerusting in sy buurstate te stasioneer, sal beskou word as ‘n daad van aggressie.

Carter sê Amerika en sy alliansievenoote staan saam en hoewel hulle nie enige konfrontasie met Rusland wil hê nie, sal hulle hulle vennote verdedig ter wille van ‘n beter toekoms vir almal.

Ontleders meen Amerikaanse eskalasie geskied weens kommer dat nuwe inligting oor die MH17-ramp Amerikaanse sanksies teen Rusland kan knou.

In Junie het die Russiese wapenvervaardiger Almaz-Antey onthul dat hul eie ondersoek toon dat die aard van die BUK-missiel wat na bewering afgevuur is op vlug MH17 nie meer in Rusland vervaardig is sedert 1999 nie, terwyl dit steeds in diens in die Oekraïense weermag ontplooi is.

Vlug MH17, vanaf Amsterdam na Kuala Lumpur, is afgeskiet oor die Oekraïne se oostelike streek van Donetsk op 17 Julie 2014, en het die lewens van 298 mense aan boord geëis. Ten minste 193 passasiers was Nederlanders.

Die VSA het dadelik die skuld op Rusland probeer pak, sonder enige getuienis.

WikiLeaks het intussen onthul dat die VSA op drie Frans presidente gespioeneer het, te wete Jacques Chirac, Nicolas Sarkozy en Francois Hollande.

Die Franse president Hollande sal ‘n noodvergadering met sy Veiligheidskomitee hou oor die verslag van WikiLeaks later Woensdag, volgens Agence France-Presse.

Estland se minister van verdediging Sven Mikser gesê die Baltiese leiers soek ‘n afskrikmiddel teen Rusland.

“In globale terme is Rusland nie konvensioneel opgewasse teen die VSA of NAVO nie,” het Mikser gesê en bygevoeg dat Estland gretig en gereed is om die toerusting te aanvaar.

Intussen het die Duitse intelligensiediens het sy kommer uitgespreek oor die planne van Kiëf om navorsing oor kernwapenontwikkeling te hervat.

Die geheimediens het ‘n dokument aan die Duitse kanselier oorhandig wat gerig is aan die Amerikaanse generaal Philip Breedlove, die geallieerde bevelvoerder van NAVO in Europa.

Die agentskap het gewaarsku dat Breedlove die de facto bedoeling het om die status van ‘n nie-kern staat te skend en het versoek dat Duitsland druk op die Oekraïnse regering plaas.

Duitse opposisiepolitikus Oskar Lafontaine het bloed geruik en Dinsdag op sy Facebook-bladsy onder die konfliksaaiers ingeklim.

Die Amerikaanse sekretaris van “verdediging”, dit wil sê, minister van oorlog is in Berlyn. Hy wil ‘n beroep op Europa doen om Russiese “aggressie” teen te werk. Maar in werklikheid, is dit Amerikaanse aggressie waarteen Europeërs moet opstaan.

Die Grootmeester van die Amerikaanse diplomasie, George Kennan beskryf die uitbreiding na die ooste van NAVO as die grootste Amerikaanse buitelandse beleidsfout sedert die Tweede Wêreldoorlog, want dit sal lei tot ‘n nuwe Koue Oorlog.
 
Die Amerikaanse diplomaat Victoria Nuland sê ons het $5 miljard spandeer om die Oekraïne te destabiliseer. Hulle stook die vlamme al hoe hoër, en Europa betaal daarvoor met verminderde handel en werksverliese.
 
Nuland sê “Fok die EU”. Ons het ‘n Europese buitelandse beleid nodig wat oorlogsugtige Amerikaanse imperialisme stop.
 
Fok Amerikaanse imperialisme!

Die Pentagon het pas ‘n handboek van instruksies vrygestel oor die “Wette van oorlog,” waarin “aanvaarbare” maniere van moord op die vyand behandel word.

Die handleiding verklaar dat joernaliste gemerk kan word “onbevoorregte kwaadsoekers” [unprivileged belligerents], ‘n onbekende term wat “vyandelike soldaat” vervang het.

Irak-mislukking met nuwe Amerikaanse oorlogsgier beantwoord

Tot 450 Amerikaanse militêre raadgewers gaan na Irak gestuur word om die land te help om sy soldate op te lei.

Tot dusver het die VSA se buitelandse beleid tot niks in die streek gelei nie. Ontleders het met verbasing gereageer op die aankondiging en gesê dit lyk asof Amerikaanse mislukkings met ‘n nuwe oorlogsgier uitgebrei sal word.

Die Withuis sê in ‘n verklaring president Barack Obama het die besluit geneem ná ‘n versoek deur die Irakse eerste minister, Haider Al-Abadi.

Die groep sal gesetel wees by ‘n militêre basis in die Anbar-provinsie waarvan die hoofstad, Ramadi, in Mei deur militantes van die Islamitiese Staat beset is.

Dit sal die getal Amerikaanse opleidingskampe in Irak op vyf te staan bring en sowat 9000 Irakse soldate is reeds by die vier bestaandes opgelei.

Die meeste van dié toerusting en opleiding het egter intussen die opkoms van ISIS in die streek ondersteun, toe oudsoldate in Irak in groot getalle by die groep aangesluit het.

‘n Londense taxi-bestuurder is selfs daaraan skuldig bevind dat hy bomme vervaardig het wat Amerikaanse soldate in Irak geteiken het. Anis Abib Sardar is die eerste persoon wat in ‘n Britse hof skuldig bevind is aan ‘n misdaad in die Irakse konflik.

Die hof het gehoor dat minstens een van sy bomme in 2007 die lewe van ‘n Amerikaanse soldaat wes van Bagdad geëis het. Die Amerikaanse Federale Speurdiens het Sadar se vingerafdrukke op twee van die bomme gekry.

Kort nadat President Barack Obama van Amerika die ontplooiing van ‘n bykomende 450 Amerikaanse militêre opleidingspersoneel na die Anbar-provinsie in Irak goedgekeur het, is hy deur die Australiese premier Tony Abbott ondersteun in ‘n oproep om djihadiste te beveg.

Die Islamitiese Staat het die afgelope tyd groot oorwinnings in die gebied behaal. Abbott sê die ISIS is ambisieus en het sy oog op verskeie dele van die wêreld.

Minstens agtien mense is dié week dood in ‘n reeks bomaanvalle in die Irakse hoofstad Bagdad.

Agt van die slagoffers is dood toe ‘n bom naby ‘n restaurant ontplof het. Die militante Islamitiese Staat word glo van die jongste terreuraanvalle verdink.

FW de Klerk was reg!

FW de Klerk verdedig toenemend sy magsoordrag aan die ANC. Soos krisis in Suid-Afrika eskaleer, so groei die verduidelikings van FW de Klerk se aksies van die verlede.

25 Jaar gelede was De Klerk se aksies korrek. Die Berlynse muur het geval, en kort daarna het die Weste se vyand in duie gestort. Die globale magsbalans het vinnig verander. Die VSA was skielik die wêreld se almagtige alleenheerser sonder enige noemenswaardige teenstander.

Die groot gebeure rondom die 1990’s was uniek. Sulke politieke aardbewings gebeur slegs een keer in ‘n paar duisend jaar, en is histories van beperkte duur.

Die Amerikaanse tipe universele Kerk sonder eksklusiewe kultuur, met individue uit alle volke en tale wat die uitsonderlike supermagtige en welvarende VSA vrees, moet die Amerikaanse Ryk gehoorsaam vir universele voorspoed en vrede. Dit was die goeie nuus en evangelie. Dit is ‘n “redelike” godsdiens, en Gereformeerdes is redelike mense. FW de Klerk was rasioneel.

Afrikanerstaatsverset teen die heersende Judeo-Christelike Amerikaanse Kerk-Ryk, sou tot verdere ekonomiese sanksies sowel as rewolusionere omverwerping van die Afrikanerstaat lei, omdat die NP gestroop van Afrika-streeksmag deur die implementering van VN Resolusie 436, nie meer enige globale magsbalans kan benut, met oliargistiese Rusland, omsingelde en ekonomies geintegreerde China, Taiwan, besette Japan en besette Europa-Duitsland, asook die ANC en meneer Mandela, almal onderdane van die seëvierende Amerikaanse Ryk. Dit was die 1990’s.

President FW de Klerk, die pragmatiese NP, en professionele NI se opsomming van die 1990’s was korrek. Slegs irrasionele waarnemers en waansinniges sou kon beweer dat die almagtige Amerikaanse Ryk binne ‘n eeu nie meer absolute wereldheerser sou wees nie.

Dog 25 jaar later het die Amerikaanse Vrede-Ryk op aarde verdamp, met onophoudelike afstandbeheerde oorlog en gepaardgaande chaos op meerwordende plekke. Pleks van die Christus en vrede, het die Duiwel en chaos na verskeie plekke op aarde neergedaal.

China weier om die VSA se alleenmag te aanvaar. Die “bose” Rusland ook nie meer nie. Skielik is die wêreld weer multipolêr, met sterk kompeterende magte. Selfs die regerende SAKP-ANC is diep verdeeld weens die onverwagte magsbalans in die multipolêre wereld.

‘n Eeu van totale kompetisie op alle gebiede lê voor, op aarde, oor grondstowwe en kennis, asook in die ruimte.

Van gelowige nasionalistiese Afrikaners se Nuwe Eenwêreldorde, met een heerser, een geldmag, een geldstelsel en een staat het daar dadels gekom. Vergeleke met die 20ste eeu, bring die 21ste eeu nog groter moondheidmededinging en nog meer verskillende soorte konflik tussen state.

Hoe kon so baie Afrikaners, die Gereformeerde Kerk, FW De Klerk en vele ander kenners en spesialiste se rasionele insig in die wereld van die Amerikaanse Ryk, binne 25 jaar so onverwags verkeerd bewys word?

Watter fout het die magtige Amerikaanse Ryk oor die afgelope 20 jaar gemaak? Hoe op aarde is dit moontlik dat die VSA so ‘n fatale flater begaan het, dat sy absolute alleenheerskappy daarmee heen is, en dat hel pleks van hemel menige mense se voorland is?

Wat is die implikasie van en verklaring vir die Amerikaanse Ryk se irrassionele fout?

Madelein Louw

Oorlogsmisdadiger Blair kry skop onder die sitvlak

Die voormalige Britse eerste-minister Tony Blair, wat deesdae vir sy gruwelike menseregskendings en oorlogsmisdade onthou word, het bedank as die spesiale vredesgesant vir die Midde-Ooste.

Sy bedanking kom te midde van Anglo-Amerikaanse pogings om kernsamesprekings met Iran te voltrek tot hulle voordeel.

Behalwe dat Blair se posbeskrywing aangedui het dat hy vrede in die Israelse konflik met die Palestyne sal probeer bewerkstellig vir die agt jaar wat hy as vredesgesant gedien het, was sy ander taak om vyande teen Iran saam te snoer.

Hy het kennelik klaaglik misluk as gesant van die “Kwartet” (waaronder die VSA, Rusland, die EU en VN verstaan word) om vrede te skep.

In sy termyn het Israel ‘n bloedige aanval op Palestynse burgerlikes geloods.

Blair het sy bedanking skriftelik aan die VN se sekretaris-generaal gestuur. Selfs ondersteuners van hom sê Blair het “min impak” op die situasie in die Midde-Ooste gehad.

Blair het nooit om verskoning gevra vir die politieke ramp in Irak nie, waar ISIS vandag oorheers.

Hy het eenvoudig vier jaar later in Jerusalem opgedaag met ‘n span wat honderde miljoene in akkommodasie en lugtariewe verkwis het, en daarin geslaag om absoluut niks in byna ‘n dekade te vermag nie, behalwe chaos.

Dit het hy reggekry deur glo meer as 100 keer na die gebied te reis!

Prins vra dat diensplig terugkom

Brittanje se prins Harry het versoek dat diensplig weer in dié land ingestel word, het Reuters berig.

Hy sê sy militêre loopbaan het hom en die soldate onder sy bevel gehelp om op die regte pad te bly.

Die 30-jarige Harry, vyfde in die ry vir die Britse kroon, het aan die Britse Sunday Times gesê sy loopbaan van tien jaar in die Britse weermag het “wonderlike dinge” vir hom gedoen.

“Bring diensplig terug. Ek ys as ek dink waar ek sonder die weermag sou wees.

“En nog belangriker, ek het gesien wat dit vir die jong manne beteken.”

Harry se weermagloopbaan eindig in Junie, nadat hy vroeër vanjaar gesê het hy is by ’n kruispad in sy lewe en dat hy meer koninklike take moet hanteer waarvoor hy nie tyd sal hê as hy ook nog in die weermag is nie.

Hy het ook gesê dat hy nie nou enige spesiale vriendin in sy lewe het nie en dat hy tevrede is met sy alleenloper­status.

Le Pen sien regdeur Amerikaanse oorlogsplanne

Die leier van Frankryk se opkomende Front National (FN), Marine Le Pen, het Brussel daarvan beskuldig dat hulle “Amerikaanse lakeie” is wat die EU-beleid in die Oekraïne betref.

Sy het Washington voorts beskuldig dat hulle probeer om ‘n “oorlog in Europa” te ontketen en met NAVO uit te brei tot teenaan Rusland se grense.

“Europese hoofstede het nie die wysheid om te weier om afhanklik te wees van Amerikaanse posisies oor die Oekraïne nie,” het Le Pen Sondag aan Franse joernaliste gesê.

“Wat die Oekraïne aanbetref, het ons onself gedra soos Amerikaanse lakeie,” het sy gesê, voordat sy gewaarsku het dat “die doel van die Amerikaners is om ‘n oorlog in Europa te begin deur NAVO na die Russiese grens uit te brei.”

Sy het die Europese leiers beskuldig dat hulle hulself blind hou vir die Oekraïense regering wat burgerlikes bombardeer en bygevoeg dat beide die Krim sowel as die Oos-Oekraïne onafhanklik behoort te word.

In Junie, het sy insgelyks aan RT se Sophie Shevardnadze gesê dat daar “geen onafhanklike state in Europa is nie,” en baie van hul buitelandse beleidsfoute in die afgelope tyd is gemaak “onder Washington se invloed”.

Haar woorde eggo verklarings deur die voormalige Franse premier Francois Fillon, wat dié naweek aan die openbare uitsaaier France 5 herhaal het dat die Verenigde State van Amerika ‘n poging aanwend “om ‘n oorlog in Europa te ontketen, wat sal eindig in ramp”. Hy het bygevoeg dat sodra ‘n oorlog uitgebreek het, die VSA boonop sal probeer om homself te distansieer daarvan.

“Die Amerikaners het een fout na die ander gemaak en vandag is hulle eenvoudig gediskrediteer,” het Fillon gesê.

“Om Rusland te verneder is eenvoudig onaanvaarbaar.”

Saterdag, het die voormalige Franse president Nicolas Sarkozy gesê dat Europa deel is van “‘n gemeenskaplike beskawing met Rusland,” en dat dit daarom nodig is om konflik op die vasteland te vermy.

“Die belange van die Amerikaners en die Russe is nie die belange van Europa en Rusland nie,” het hy gesê, en bygevoeg dat die herlewing van ‘n Koue Oorlog tussen Europa en Rusland ongewens is.

Intussen het gerugte die rondte gedoen dat ‘n kernontploffing Donetsk in Oos-Oekraïene geruk het waar hewige gevegte steeds voortduur tussen selfverdedigingsgroepe en die junta in Kiëf wat deur die VSA bewapen word.

Krisis in die Oekraïne nader breekpunt

Minstens 7 mense is Maandag doodgeskiet en sowat 19 beseer in grofgeskut-aanvalle toe regeringsmagte en selfverdedigingsgroepe in Donetsk in die ooste van die Oekraïne op mekaar losgebrand het, het owerhede in dié land Woensdag gesê.

Die krisis in die Oekraïne nader breekpunt soos ontleders voorheen gewaarsku het dit sou, nadat die VSA ‘n kleurrewolusie vanaf Maidanplein georganiseer het om die land by NAVO in te lyf.

Die Oekrïene het in ‘n smeltkroes van konflik ontaard en word tans in flarde geskeur deur die bekende Atlantiese vyande van vrede.

Amerikaanse nuusbronne waaronder die Wall Street Journal, die Atlantic, Reuters en die LA Times is byna histeries in hul eenderse aandrang om ‘n volskaalse oorlog te bespoedig: “Bewapen Kiëf”.

Die selfverdedigingsmagte het hul stellings probeer beskerm na grofgeskut huise in vier gebiede van die stad getref het, het stadsowerhede in ’n verklaring bekend gemaak.

Onlangse samesprekinge om die geweld tot ‘n einde te bring, het Vrydag ’n dooiepunt bereik met regeringsfaksies onder Washington se invloed, wat die ontsporing van die vredesproses wil bewerkstellig.

Die vredesamesprekinge, deur Rusland voorgestel, was veronderstel om die geweld wat die lewe van meer as 5 300 mense geëis het, te beëindig. Die skrikwekkende dodetal is nalv die VN se jongste beramings.

Die vyandigheid tussen die pro-­Russiese selfverdedigingsgroepe en die Oekraïense regeringstroepe het in Januarie, ná ‘n maand van relatiewe kalmte, opnuut opgevlam, nadat die VSA en NAVO hernude steun vir die junta in Kiëf aangebied het.

Tans is hul grootste offensief Debaltseve, ’n spoorwegaansluiting wat vantevore ’n tuiste aan 25 000 mense gebied het en geleë is tussen die stede Luhansk en Donetsk, wat beide deur selfverdedigingsgroepe beheer word.

Sowat 2 000 van die inwoners het in die afgelope paar dae gevlug.

Selfverdedigingsgroepe het verlede week die dorp V­uhlehirsk, van ­kardinale belang in die opmars na Debaltseve, beskerm teen aanvalle deur regeringstroepe. ­Hulle dring egter aan dat hulle nie beplan om Debaltseve aan te val nie, vanweë potensiële groot burgerlike sterftes.

Die selfverdedigingsleier van Donetsk, Alexander Zakharchenko, het gesê hulle help om Vuhlehirsk vanweë die swaar gevegte in die gebied te ontruim.

Intussen het broodpryse in die land die hoogte ingeskiet agv die konflik.

VSA soek steeds redes vir oorlog in Europa

Amerika het onder die dekmantel van NAVO sy aggressiewe beleid van uitbreiding in Oos-Europa bevestig met hernude aanvalle teen Rusland.

Kenners waarsku reeds geruime tyd dat die VSA afstuur op ‘n kernoorlog met Rusland weens ‘n Neo-konserwatiewe kliek in die Withuis se eiegeregtige houding teenoor die hulpbronne van soewereine state.

Terwyl die Oekraïense weermag hergroepeer mbv Amerikaanse raadgewers en wapentuig om Russiese dele van die land etnies te suiwer, het Amerika Rusland daarvan beskuldig dat hy die skietstaking in die Oekraïne ondermyn.

Rusland het dit ten sterkste ontken.

Dié beskuldigings volg nadat Rusland nuwe radarbesonderhede vrygestel het wat daarop dui dat militêre vliegtuie in die lug naby vlug MH17 was toe dit neergestort het in die ooste van die Oekraïne op 17 Julie.

Dit is ‘n verleentheid vir die VSA en hul bondgenote wat Rusland as die sondebok probeer voorhou.

‘n Radarstasie in Rostov, naby die Oekraïense grens, het kort voor en sowat 20 minute ná die MH17-ongeluk getuienis van die vegvliegtuie se teenwoordigheid bevestig.

Volgens Sergey Melnitsjenko, hoof uitvoerende beampte van Aviation Safety Consultancy, was daar een of twee vegvliegtuie in die lug naby aan die Maleisiese vliegtuig.

Die bewysstukke laat ernstige twyfel oor die weergawe van die tragedie wat deur Westerse lande voorgehou word, wat beweer die vliegtuig is afgeskiet deur pro-Russiese magte met ‘n gesofistikeerde oppervlak-tot-lug missiel.

Die rebelle besit geen lugmag van hul eie nie, en Rusland en die Oekraïne is die mees logiese partye wat vegvliegtuie sou stuur na die gebied, het kenners gesê.

Indien dit Russiese vegvliegtuie was wat oor die grens gevlieg het, sou hulle dadelik op beide die Oekraïene sowel as NAVO se radarstelsels opgeduik het.

NAVO en die Oekraïne het nog nie gereageer op die inligting nie.

Die deskundige het bygevoeg dat die teenwoordigheid van militêre vliegtuie noord van die Boeing hulle in ‘n posisie aan die linkerkant van die passasiersvliegtuig sou geplaas het. Sommige foto’s van die ongeluk het skade aan die kajuit se linkerkant getoon, in ooreenstemming met ‘n scenario van só ‘n aanval.

Die Minsk-ooreenkoms wat in September onderteken is, is reeds stelselmatig deur Kiëf ondermyn.

Die Noord-Atlantiese Verdragsorganisasie het vroeër gewaarsku dat ‘n Russiese militêre teenwoordigheid die ooreenkoms in die gedrang sal bring, maar nie kommentaar gelewer oor hul eie militêre opbou in Oos-Europa nie.

Rusland ontken dat hy troepe in die ooste van die Oekraïne ontplooi om separatiste te steun.

Die VN se Veiligheidsraad het intussen ‘n noodvergadering in New York gehou, maar weens Rusland se vetoreg het die vergadering nie veel opgelewer nie.

Pro-Russiese magte sê Poolse soldate is opgemerk noord van Donetsk. Kiëf het ook wapentuig en troepe die afgelope paar dae in die ooste van die land gekonsentreer.

Die Amerikaanse ambassadeur in die VN, Samantha Power het weer die kans benut om ‘n tirade teen Rusland van stapel te stuur.

Haar beskuldigings dat die land ‘n nuwe koue oorlog wil begin, het egter op dowe ore geval, aangesien dit reeds duidelik is dat die VSA ‘n regimeverandering in die mou voer.

Gaan die Republikeine verder oorlog maak?

President Barack Obama se administrasie sal in sy laaste twee jaar ‘n opdraende stryd moet voer, nadat die opposisie – die Republikeine – beheer oor die Senaat in die middeltermynverkiesing gewen het.

Elke Senaatskomitee sal nou onder voorsitterskap van ‘n Republikein staan, alles van buitelandse beleid tot Hooggeregshofaanstellings.

Die Republikeine beheer die Huis van Verteenwoordigers sowel as die Senaat.

Die party het ses bykomende setels in die senaat benodig om ‘n meerderheid te behaal, en het daarin geslaag om sewe setels te verower.

Die toekoms wat die VSA se buitelandse beleid betref, is egter duister, aangesien gewone Amerikaners toenemend gekant is teen oorlog, maar weens drakoniese binnelandse wetgewing nie in opstand kom teen hulle heersers se konflikgedrewe uitbreidingsug nie.

Onder aanvoering van NAVO is Bulgarye, Estland, Letland, Litoue, Romenië, Slovakye, and Slovenië reeds onder die VSA se hak en is die Nuwe Koue Oorlog in die Oekraïne aangekondig.

Republikeine het sedert 1970 binnelandse veiligheid beklemtoon.

Vir byna al die afgelope 40 jaar, het stembusse getoon dat die Amerikaners die Republikeine met veiligheid, buitelandse sake en die weermag vertrou, maar met George Bush het dié ingesteldheid dalk verander.

Sedert 1972, was dit vir die Republikeinse Party maklik om kiesers te vertel dat hulle militêre uitgawes beheer.

Dit was verreweg hul topbestedingsprioriteit, terwyl Demokrate oënskynlik altyd veg teen armoede.

Gewapen met meerderheid in beide huise, kan ‘n Republikeinse Kongres President Obama egter in die verleentheid stel met veranderinge aan sy gesondheidsorgplan.

Die GOP kan ‘n 1996-Wet gebruik om feitlik enige regulasie te stop, ten minste totdat Obama sy veto uitoefen, wat die politieke gang in Washington kan vertraag.

Die president se immigrasieplanne is natuurlik ook van die baan met felle Republikeinse teenkanting en ‘n onmiddellike befondsingsmeganisme vir die Keystone-oliepyplyn kan so gou as Januarie gebeur.

Vir die militêr-industriële kompleks in Washington is dit die Pentagon wat hul winsgrense waarborg. Oorlogskoors uit daardie oorde sal dus nie gou taan nie. Dit het ook nie onder die Demokrate en ‘n swart president gewapen met ‘n Nobelvredesprys nie.

Washington se werklike teiken is Rusland wat oorloop van natuurlike energiehulpbronne. Dit sal interessant wees om te sien hoe die Republikeine dit gaan benader.