Etiket: Pentagon

Hou die Pentagon Trump gyselaar oor Afghanistan?

Die Amerikaanse president, Donald Trump, toon ‘n “slaafse onderdanigheid aan die militêre en sake-elite wat nou sy kabinet bestuur,” het The Economist in ‘n onderhoud met die afgedankte Withuis-strateeg Steve Bannon opgemerk. Dit beteken ook meer troepe in Afghanistan.

Maar “wat het die elite gedoen?” het Bannon in reaksie gevra. “Dit is dieselfde ouens wat ons mooi praatjies oor Irak gegee het.”

Die Washington Post is selfs meer bekommerd oor Trump omdat hy sy administrasie met konfliksaaiers gepak het. ‘n Militêre junta is nou in beheer van die Verenigde State, het die koerant gesuggereer.

“Binne-in die Withuis bestuur generaals Trump se uur-tot-uur-interaksies en fluister in sy oor – en dié gefluister, soos met die besluit om die Amerikaanse militêre operasies in Afghanistan uit te brei, word dikwels beleid.

“In die kern van Trump se binnesirkel is ‘n gesoute trio van generaals met ondervinding as slagveldbevelhebbers: die hoof van die Wit Huis, John F. Kelly, Verdedigingsekretaris Jim Mattis en die nasionale veiligheidsadviseur H. McMaster.”

Ongelukkig het Trump se plan om meer troepe na Afghanistan te stuur, geen kans op sukses nie, aangesien dit hoofsaaklik staatmaak op die gebruik van geweld, het die Russiese minister van buitelandse sake, Sergey Lavrov, droogweg opgemerk.

Kelly, Mattis en McMaster is nie die enigste militêre figure wat op hoë vlakke in die Trump-administrasie dien nie. CIA Direkteur Mike Pompeo, Prokureur-generaal Jeff Sessions, Energiesekretaris Rick Perry en Binnelanse Sake se topman Ryan Zinke het elk in takke van die weermag gedien.

Voormalige weermag-generaal Mark S. Inch sal glo eersdaag die Federale Buro vir Gevangenisse lei, terwyl die Nasionale Veiligheidsraad twee ander generaals in hul seniorpersoneel se geledere tel.

Die Pentagon het nou feitlik alle onafhanklike anti-oorlogstemme uit die Wit Huis verwyder, soos blyk uit Trump se aankondiging wat belowe dat Amerikaanse troepe “sal veg om te wen”, ten spyte daarvan dat hy vroeër gesê het hy is van plan om troepe uit Afghanistan te onttrek. Die beëindiging van die 16-jarige militêre betrokkenheid in die land met ‘n “haastige onttrekking” sou “terroriste” aanmoedig, het hy gesê.

Die Washington Post het daarop gewys dat: “Die nuwe stelsel, wat in twee memo’s uitgevaardig is deur outeurs Kelly en Porter, en in die afgelope dae aan kabinetslede en Withuis-personeel versprei is, is ontwerp om te verseker dat die president nie enige eksterne beleidsdokumente, interne beleidsnota’s, agentskapverslae, en selfs nuusberigte wat nie nagegaan is, mag sien nie.”

Die nuwe Amerikaanse strategie in Afghanistan, wat Maandag aangekondig is, was ‘n “flip-flop”, sê Bannon. Hy het die president aangemoedig om van Afghanistan te onttrek en voorgestel dat Trump se “nuwe” rigting eintlik net Barack Obama se ou ongewilde beleid is.

Bannon het aan The Economist gesê dat ‘n stryd tussen Westerse idees van vryheid van spraak, vryheid van godsdiens en selfbestuur, teenoor die “handelaars- en Confusiaanse stelsel” van ‘n opkomende China, onvermydelik is. Maar daar mag meer as ‘n botsing van idees op die spel wees.

Muhammad Maroof (Sarwan), vise-president van die Duniya Construction Company in Afghanistan, wat vir die Amerikaanse weermag gewerk het, het as tolk aan die Russiese joernalis, Andre Vitchek, gesê: “Die grootste mafia hier is direk gekoppel aan beide die VK en die VSA. Die Weste lieg dat hulle handel met dwelms in Afghanistan wil stop; Hulle sal nooit toelaat dat dit stop nie.

“My broer was ‘n skrywer en hy het beelde van die Amerikaanse leër wat waterpompe, gereedskap en ander basiese dinge gee vir die groei van papawers [wat verwerk word tot dwelms]. Die grootste ondersteuner van dwelmproduksie in Afghanistan, en die uitvoer, is die Britse regering. Hulle doen dit regstreeks met die plaaslike inwoners, en gee selfs vir hulle geld. Die VK is ook die belangrikste mark vir die uitvoer.

“Helmand, Kandahar, jy noem dit maar, van daar af, direk, vervoer vliegtuie dit en gaan reguit na Europa, selfs die VSA. Die Westerlinge is die mense wat fisies dwelms in die vliegtuig op ons lughawens laai. My familielid was ‘n tolk vir die Britte. Hy is deur hulle vermoor nadat hy op ‘n vergadering tussen die Britse amptenare en die plaaslike dwelmmafia getuienis en tolkdienste gebied het.”

Die Amerikaanse oorlog in Afghanistan is die langste en een van die duurste militêre operasies in die Verenigde State se geskiedenis, volgens die New York Times. Trump het geweier om aan te kondig hoeveel troepe hy van plan is om na die land te stuur. Dit volg op ‘n tendens om die amptelike getal Amerikaanse troepe in Irak en Sirië geheim te hou.

Amerikaanse verdedigingsamptenare erken egter dat die VSA reeds duisende meer troepe in Afghanistan het as die laaste amptelike Pentagon-syfer.

Amptenare het beraam dat dit iewers nader aan 11 000 of 12 000 troepe moet wees. Terwyl die VSA dikwels amptelik hul ontplooiing in lande waar hulle wedersyds ingestem het om troepgetalle te beperk, onderspeel, is daar nie so ‘n afspraak met Afghanistan nie. Dit maak dit onduidelik waarom hulle misleidende syfers aanbied, het Jason Ditz van AntiWar.com opgemerk.

Trump blameer sy 180 grade ommekeer op sy “instink”, maar sy verklaring het maar onoortuigend geklink. “My oorspronklike instink was om uit te trek – en histories hou ek daarvan om my instink te volg. Maar dis baie anders as jy agter die lessenaar in die Ovaalkantoor sit. Met ander woorde, as jy president van die Verenigde State is.”

Maar Trump se geheue is besonder kort. Voormalige president Obama het selfs Osama bin-Laden se kop op ‘n skinkbord aan Amerikaanse kiesers opgehou, wat die einde moes beteken het van Washington se nuttelose maar ongelooflike vernietigende inval.

Daar was immers geen Afghane by 9/11 betrokke nie. Bin Laden het net in ‘n “nederige grot” in Tora Bora in Afghanistan geskuil, het ‘n Britse joernalis berig. Trump het in 2011, 2012 en 2013 ‘n aantal twiets oor die oorlog in Afghanistan uitgestuur. Hy het gevra dat die VSA sy betrokkenheid moet beëindig in die land.

Al- Sjabaab weer glo aanval af

Volgens die Islamitiese groep Al-Sjabaab, het hulle ‘n aanval op een van hul basisse in die suide van Somalië afgeweer.

Buitelandse kommando’s het glo met twee helikopters ingevlieg en die aanval geloods. Een Al-Sjabaab-militant is in die aanval dood.

Sjeik Abdiasis Abu Musab, Al-Sjabaab se woordvoerder vir militêre operasies, het nie die nasionaliteit van die troepe geïdentifiseer wat in die aanval ongeveer 50 km suid van Mogadisjoe, betrokke was nie.

Verskeie lande onder die vaandel van Amisom staan die Somaliese regering by in hul stryd teen die Al-Sjabaab-insurgensie.

Die sending bestaan uit troepe van verskeie Afrikalande wat sy aan sy met die Somaliese weermag veg.

Amerikaanse amptenare het in 2014 bekend gemaak dat Amerikaanse militêre adviseurs sedert 2007 in die geheim in Somalië betrokke is en dieper betrokke sal raak om die Islamitiese bedreiging af te weer.

Washington het oor die naweek aangekondig dat lugaanvalle Saterdag op ’n ander Al-Sjabaab-basis uitgevoer is en dat meer as 150 Islamitiese vegters in daardie aanval dood is.

Hulle het glo van onbemande tuie gebruik gemaak om twee sleutelfigure uit te wis. Al-Sjabaab wou nie die Pentagon se verklaring bevestig dat hulle die twee, Ugaas en Mire gedood het nie.

Die VSA het hommeltuie in Jemen sowel as in Somalië ontplooi.

Ondertussen berig Reuters dat ’n motorbomontploffing in die Somaliese hoofstad, die week die lewens van drie mense geëis het.

Die drie slagoffers was almal polisiemanne.

Obama systap Kongres oor wapenbeheer

In die jongste pogings deur die Amerikaanse president, Barack Obama, om beter beheer oor ­vuurwapens te verseker, het hy die Amerikaanse kongres gesystap en uitvoerende bevele uitgereik wat ’n bitter stryd in die 2016-verkiesings­jaar van stapel gestuur het.

Met die aanvang van sy laaste jaar in die Wit Huis, het Obama sy rug gekeer op die Kongres se opposisie teen ­eensydige regulerende maat­reëls om vuurwapenverkope te reguleer en ’n einde aan onwettige verkope te maak, het AFP berig.

Die Amerikaanse prokureur-­generaal, Loretta Lynch, sê die maatreëls maak voorsiening vir strenger reëls oor wie as verkopers van vuurwapens mag registreer. Skuiwergate oor vuurwapenskoue word toegemaak wat kopers die geleentheid bied om sonder navorsing oor hul agtergrond vuurwapens aan te skaf. Stappe word ook gedoen om tussengangers vas te vat wat namens iemand anders vuurwapens koop.

Die Pentagon met sy massiewe koopkrag sal ook aangeraai word om slegs wapens aan te skaf by vervaardigers wat “vuurwapenveiligheid-­tegnologie” soos vingerafdruk­skandeerders gebruik.

Obama het die nuwe ­maatreëls in die Wit Huis bespreek. Die maatreëls word skerp deur Republikeine, wat die Kongres beheer, wapen­vervaardigers en vuurwapenentoesiaste gekritiseer, wat aanvoer dit is ’n skending van hul grondwetlike regte.

Nagenoeg 30 000 mense sterf jaarliks in wapengeweld in Amerika, die meeste in selfmoorde.

Gedurende Obama se sewe jaar as president het hy dikwels oomblikke van woede en frustrasie getoon met die Kongres se weiering om strenger beheermaatreëls vir vuurwapens in te stel.

Dit was veral die massa­skietery van skoolkinders in Connecticut, kerkgangers in Suid-Carolina en fliekgangers in Colorado wat die president ontstel het.

Die maatreëls gaan nie so ver as om agtergrondnavorsing van alle mense wat vuurwapens wil aankoop, of die registrasie van die meer as 300 miljoen vuurwapens wat vermoedelik reeds in Amerika is omloop is, voor te skryf nie, want dit sou die Kongres se goedkeuring vereis.

Op die vooraand van sy ­aankondiging het Obama toegegee dat die jongste stappe nie ’n oplossing vir elke geweldsmisdaad in Amerika sal bied nie. Dit sal ook nie ­massaskietery voorkom of sorg dat vuurwapens uit die hande van kriminele bly nie.

“Dit het egter die potensiaal om lewens in hierdie land en families hartseer en pyn te spaar,” het hy gesê.
Deur die beperkte maatreëls en deur alleen teen die wense van die Kongres op te tree, het Obama ’n politieke en wetlike storm ontketen.

Verskeie Republikeinse presidentskandidate en die speaker van die Huis van Verteenwoordigers, Paul Ryan, het Obama beskuldig van minagting van Amerikaners, wat waarde heg aan die grondwetlike reg om hulle te bewapen.

“Ons is almal hartseer oor die ­onlangse misdade in ons land, maar geen veranderinge wat die president oorweeg, sou dit kon voorkom nie,” het Ryan gesê. “Ons het ­herhaaldelik gesien dat die oorsaak van die ­voorvalle swak geestesgesondheid is.”

Republikeine het hulle vir ’n geruime tyd as die beskermhere van vuurwapeneienaars geposisioneer, wat ’n ­betekenisvolle stemblok in baie gebiede van die land uitmaak en deurslaggewend in vanjaar se verkiesingswedloop kan wees.

Obama se planne kan groot druk op van sy Demokratiese bondgenote plaas, wat strawwe verkiesings in die herfs in die gesig staar.

VSA stook oorlog in Europa

Die Amerikaanse minister van verdediging, Ash Carter, het vrese dat sy land ‘n oorlog aanmoedig verhoog met ‘n aankondiging oor die militêre opbou in NAVO-lande wat aan Rusland grens.

Carter sê die VSA sal militêre toerusting, insluitende oorlogstenks en artillerie in die drie Baltiese state sowel as Pole, Bulgarye, Roemenië en Duitsland stasioneer.

Rusland het intussen gesê enige pogings om sulke toerusting in sy buurstate te stasioneer, sal beskou word as ‘n daad van aggressie.

Carter sê Amerika en sy alliansievenoote staan saam en hoewel hulle nie enige konfrontasie met Rusland wil hê nie, sal hulle hulle vennote verdedig ter wille van ‘n beter toekoms vir almal.

Ontleders meen Amerikaanse eskalasie geskied weens kommer dat nuwe inligting oor die MH17-ramp Amerikaanse sanksies teen Rusland kan knou.

In Junie het die Russiese wapenvervaardiger Almaz-Antey onthul dat hul eie ondersoek toon dat die aard van die BUK-missiel wat na bewering afgevuur is op vlug MH17 nie meer in Rusland vervaardig is sedert 1999 nie, terwyl dit steeds in diens in die Oekraïense weermag ontplooi is.

Vlug MH17, vanaf Amsterdam na Kuala Lumpur, is afgeskiet oor die Oekraïne se oostelike streek van Donetsk op 17 Julie 2014, en het die lewens van 298 mense aan boord geëis. Ten minste 193 passasiers was Nederlanders.

Die VSA het dadelik die skuld op Rusland probeer pak, sonder enige getuienis.

WikiLeaks het intussen onthul dat die VSA op drie Frans presidente gespioeneer het, te wete Jacques Chirac, Nicolas Sarkozy en Francois Hollande.

Die Franse president Hollande sal ‘n noodvergadering met sy Veiligheidskomitee hou oor die verslag van WikiLeaks later Woensdag, volgens Agence France-Presse.

Estland se minister van verdediging Sven Mikser gesê die Baltiese leiers soek ‘n afskrikmiddel teen Rusland.

“In globale terme is Rusland nie konvensioneel opgewasse teen die VSA of NAVO nie,” het Mikser gesê en bygevoeg dat Estland gretig en gereed is om die toerusting te aanvaar.

Intussen het die Duitse intelligensiediens het sy kommer uitgespreek oor die planne van Kiëf om navorsing oor kernwapenontwikkeling te hervat.

Die geheimediens het ‘n dokument aan die Duitse kanselier oorhandig wat gerig is aan die Amerikaanse generaal Philip Breedlove, die geallieerde bevelvoerder van NAVO in Europa.

Die agentskap het gewaarsku dat Breedlove die de facto bedoeling het om die status van ‘n nie-kern staat te skend en het versoek dat Duitsland druk op die Oekraïnse regering plaas.

Duitse opposisiepolitikus Oskar Lafontaine het bloed geruik en Dinsdag op sy Facebook-bladsy onder die konfliksaaiers ingeklim.

Die Amerikaanse sekretaris van “verdediging”, dit wil sê, minister van oorlog is in Berlyn. Hy wil ‘n beroep op Europa doen om Russiese “aggressie” teen te werk. Maar in werklikheid, is dit Amerikaanse aggressie waarteen Europeërs moet opstaan.

Die Grootmeester van die Amerikaanse diplomasie, George Kennan beskryf die uitbreiding na die ooste van NAVO as die grootste Amerikaanse buitelandse beleidsfout sedert die Tweede Wêreldoorlog, want dit sal lei tot ‘n nuwe Koue Oorlog.
 
Die Amerikaanse diplomaat Victoria Nuland sê ons het $5 miljard spandeer om die Oekraïne te destabiliseer. Hulle stook die vlamme al hoe hoër, en Europa betaal daarvoor met verminderde handel en werksverliese.
 
Nuland sê “Fok die EU”. Ons het ‘n Europese buitelandse beleid nodig wat oorlogsugtige Amerikaanse imperialisme stop.
 
Fok Amerikaanse imperialisme!

Die Pentagon het pas ‘n handboek van instruksies vrygestel oor die “Wette van oorlog,” waarin “aanvaarbare” maniere van moord op die vyand behandel word.

Die handleiding verklaar dat joernaliste gemerk kan word “onbevoorregte kwaadsoekers” [unprivileged belligerents], ‘n onbekende term wat “vyandelike soldaat” vervang het.

VSA se buitelandse fiasko word net groter

Suid-Afrika se Staatsveiligheidsagentskap sê in sy monitering van aktiwiteite in Irak en Sirië, is hulle nie bewus van burgers wat aan die stryd deelneem nie.

Koerante het die afgelope naweek berig dat 140 Suid-Afrikaners van Gauteng en die Wes-Kaap in Irak en Sirië veg vir die Islamitiese staat van Irak en Sirië (ISIS/IS).

Intussen is die Amerikaanse sekretaris van Verdediging Chuck Hagel, die enigste Republikein in Obama se nasionale veiligheidspan, afgedank.

Volgens Hagel was hy “nooit regtig in daardie baie hegte binnekring in die Withuis wat al die besluite neem oor die debakel waarin die VSA se buitelandse beleid regdeur die wêreld vandag verkeer nie”.

Amerika se buitelandse beleid is onteenseglik ‘n gemors. Maar wie het dan die “besluite” geneem om die “ongelooflike debakel” te skep as dit nie Hagel was nie? Hoekom is hy dan ooit in die eerste plek aangestel as dit nie sý verantwoordelikheid was nie?

Saddam is onttroon en sy Soennie-regime vernietig met groot vermaak en Amerikaanse vertoon, in ‘n flagrante skending van internasionale reg. En vandag is die Islamitiese staat, ‘n barbaarse vertakking van Al-Kaïda, in beheer van Mosoel, Anbar en ‘n derde van Soennie-Irak.

Terrorisme is ‘n daaglikse gebeurtenis, nadat die Amerikaners hul “War on Terror” geloods het. Praat van ‘n totale fiasko!

President Barack Obama het boonop vroeër haastig verklaar dat IS nie ‘n Moslem-organisasie is nie.

Irakse soldate, ondersteun deur die Sjiïtiese milisie en die ­Koerdiese peshmerga, het gister twee dorpe noordoos van Bagdad aangeval om ’n hoofpad tussen die hoofstad en die grens met Iran te probeer beveilig.

Peshmerga en ­weermagoffissiere sê hulle kon vorder tot by Jalawla, 115 km van Bagdad, en ­naburige dorp, Saadiya, wat hulle van die Islamitiese Staat (IS) probeer terugkry, sedert hulle daarvan beheer geneem het.

Tien mense wat soldate, peshmerga-lede en milisie insluit, is in gister se gevegte dood en 32 is gewond, het ’n bron by die Khanaqin-hospitaal aan Reuters gesê. Daar was geen ­onmiddellike syfers vir ­sterfgevalle van IS-­vegters nie.

Irak se Sjiïtiese regering, ­ondersteun deur ­Amerikaanse lugaanvalle, probeer om die IS te stuit sedert dit in in Junie in die hoofsaaklik ­Soenniese ­Moslem-provinsies van ­noordelike Irak bedrywig is.

Verlede week het die weermag ’n maandlange beleg van die land se grootste raffinaderye noord van Bagdad gestuit, maar IS-vegters gaan voort om gebied in die westelike provinsie van Anbar, aangrensend aan Sirië, Jordanië en Saoedi-Arabië oor te neem.

Milisie van die IS het die afgelope twee dae geveg om volle beheer oor die Anbar-provinsie se hoofstad, Ramadi, te neem.

Jalawla en Saadiya is in die Diyala-provinsie geleë wat hoofsaaklik onder beheer van Bagdad se regeringsmagte en Koerdiese peshmerga is.

‘n Senior peshmerga-amptenaar sê die IS se ­teenwoordigheid in Jalawla bedreig die­ ­Koerdies-beheerde dorpe van Kalar en Khanaqin in die noorde, asook nabye damme en olievelde.

Om weer beheer van die dorpe te kry, sal dit ook moontlik maak dat die pad tussen Bagdad en ­Khanaqin, naby die grens van Iran, heropen kan word, het ’n ­sekretaris-generaal van ­peshmerga, Jabbar Yawar, gesê.

Terwyl die Soennitiese IS-mag nog nie tot in Bagdad gevorder het nie, is hulle in beheer van dorpe rondom die Sjiïtiese ­hoofstad en het hulle verantwoordelikheid aanvaar vir ’n reeks bomme in die Sjiïtiese distrikte van die stad.

Intussen het ’n motorbom in die Sjiïtiese stad Yousufiya, 30 km suidoos van Bagdad, die lewens van vyf mense gister geëis, het die polisie bevestig

Gister is ook bekend gemaak dat twee vroue en ’n man in ­Maleisië in hegtenis geneem is, omdat hulle vermoedelik vir IS ­ondersteun. ’n Vier en dertigjarige vrou en ’n 28-jarige man is Vrydag by ’n treinstasie in Kuala Lumpur in hegtenis geneem, volgens dieNew Straits Times. Nog ’n man (33) is by ’n busterminus in ­hegtenis geneem.

Die polisiehoof, inspekteur-­generaal Khalid Abu Bakar, het gesê die verdagtes het glo verskeie ­Facebook-rekeninge waarmee hulle Maleisiërs lok om by die IS aan te sluit of geld in te samel.

Rusland sal ‘n beroep op die Veiligheidsraad van die Verenigde Nasies doen om ‘n formele verbod op die aankoop van olie uit gebiede wat beheer word deur terroriste, te plaas.

Dit sluit olie in wat deur die Islamitiese Staat (IS) se militante gebuit word, het die Russiese minister van buitelandse sake Sergei Lawrof Vrydag gesê.

VSA stuur troepe na Oekraïne, Irak, Somalië

President Barack Obama van Amerika gaan troepe na die westelike grens van die Oekraïne stuur vir ‘n gesamentlike militêre oefening hierdie maand met meer as 1000 troepe van die Verenigde State en sy bondgenote.

Die besluit om voort te gaan met die Rapid Trident-oefening vanaf 16 tot 26 September word beskou as ‘n teken van die toewyding van NAVO om die Oekraïne te ondersteun sonder openlike militêre ingryping in die konflik.

Die jaarlikse oefening sal plaasvind naby die Oekraïne se grens met Pole, en was aanvanklik geskeduleer vir Julie, maar is afgestel omdat vroeë beplanning deur die krisis in die oostelike deel van die land ontwrig is.

Die VSA het reeds $5 miljard bewillig vir ‘n regeringsverandering in die land. Daar word ná die NAVO-beraad in Wallis hierdie week ‘n nuwe vinnige reaksiemag van ‘n paar duisend troepe verwag.

Bykomend tot die lugmagoefeninge, sal die Verenigde State van Amerika tenks en 600 troepe na Pole en die Baltiese state Estland, Letland en Litaue stuur vir gesamentlike maneuvers in Oktober om valskermsoldate te steun.

Rapid Trident sal die eerste beduidende ontplooiing van Amerikaanse en ander personeel behels na die Oekraïne sedert die krisis uitgebreek het.

Onder ‘n breë program getiteld “Operation Atlantic Resolve” beoog die VSA om sy verbintenis tot die Europese wapenwedloop tesame met NAVO te bevestig.

Obama het ook aangekondig dat nog 350 troepe na Bagdad gestuur sal word om “hoofsaaklik Amerikaanse diplomate en sy ambassade in die Irakse hoofstad te beskerm”.

Dit sal die aantal Amerikaanse weermagpersoneel in Irak, wat hoofsaaklik vir sekerheid ontplooi is, op sowat ‘n duisend te staan bring.

Die Withuis en Pentagon het dit bekend gemaak nadat nog ‘n gru-video deur die Islamitiese Staat op die internet uitgereik is waar ‘n gemaskerde ekstremis met ‘n Britse aksent nog ‘n klaarblyklike onthoofding op ‘n Amerikaner uitvoer.

Ten spyte daarvan dat hulle nie egtheid van die twee videos kan bevestig nie, sal die VSA nog soldate stuur.

Die joernalis, Steven Sotloff wat verlede jaar in Sirië ontvoer is, was deel van die video wat die onthoofding van sy landgenoot, James Foley gewys het.

In die video dreig ‘n gemaskerde persoon ‘n derde gyselaar en waarsku regerings om hulle alliansies teen die Islamitiese Staat te staak.

Senator McCain het voorheen die leierskap van ISIS ontmoet en na hulle verwys as “gematigdes” wat veg teen die “diktatuur” in Sirië.

Berigte dat die VSA en Brittanje ISIS befonds is vollop op die internet.

In Afrika is Ugandese soldate wat deel vorm van die Afrika-unie se sending in Somalië, besig om voor te berei om na Kurtunwaarey in die Laer Shabelle-streek van Somalië te beweeg.

Dit is deel van Operasie Indiese Oseaan, wat daarop gemik is om die oorblywende dorpe in die gebied wat steeds deur die Moslemterroristegroep, Al Sjabaab beset word, te bevry.

Die VSA het ‘n lugaanval deur ‘n onbemande tuig gedoen oor ‘n gebied waar die leiers van Somalië se Al-Kaida-militante vergader het, het intelligensie bronne Dinsdag gesê, maar dit is onduidelik of enige bevelvoerders gedood is.

Die aanval het volgens Somaliese regeringsamptenare die al Sjabaab-leier Ahmed Abdi Godane en ander leiers geteiken wat glo byeen was by die plek, maar daar was geen bevestiging dat hulle getref is nie.

ANC gaan by Amerikaanse Kongres kla oor terreurlys

amanzimtoti-bomb
Een van die onskuldige wit slagoffers wat moes boet in die Amanzamtoti-terreuraanval

Suid-Afrika se ambassadeur in Amerika, Ehrahim Rasool, sê hy werk daaraan om die Amerikaanse Kongres te oorreed om die kwessie van Suid-Afrikaners – wat steeds op die Amerikaanse terreurlys is – omvattend te bespreek.

Tot 1989 is die ANC deur die Pentagon en die CIA gelys as ‘n terroristeorganisasie.  In 2002 is ‘n Amerikaanse visum aan Tokyo Sexwale geweier as gevolg daarvan, ‘n “fout” wat toe glo reggestel is.

In werklikheid is hy destyds ‘n visum geweier na die Verenigde State van Amerika omdat hy, saam met baie bekende Suid-Afrikaanse anti-apartheidsterroriste soos Nelson Mandela en voormalige Suid-Afrikaanse minister Sidney Mufamadi, steeds op dié land se lys van globale terreur verskyn het.

Na die inisiëring van regstappe teen die US Department of State en die persoonlike ingryping deur Condoleezza Rice, het Sexwale en die ander in 2002 tien jaar kwytskelding van die Amerikaanse Departement van Binnelandse Veiligheid ontvang.

Die VSA het het aangedui dat om Sexwale permanent van die lys te verwyder sal beteken dat die wet verander sal moet word, wat ‘n tydsame proses mag wees.

Die kwytskelding is opgehef in 2008 en al die ANC-lede wat ook Nelson Mandela insluit, is verwyder van die lys van terroriste in die VSA.

Die voormalige Minister van Behuising, Tokyo Sexwale, is egter verlede week weer op New York se JFK-lughawe in hegtenis geneem is nadat beamptes sy naam op die lys gekry het.

Sexwale was lid van Umkhonto we Sizwe wat verskeie terreuraanslae teen onskuldige burgerlikes en kinders geloods het.

Rasool sê sy ambassade het geen toegang tot die lys wat in die besit is van die Departement van Binnelandse Veiligheid nie en kan dus slegs bespiegel wie op die lys is.

Die ANC het intussen gesê Sexwale se aanhouding noodsaak ‘n onvoorwaardelike verskoning van die Amerikaanse regering.

Die oorlog is nog lank nie verby nie

Dan Roodtdeur Dan Roodt

[followbutton username=’danroodt’ count=’true’ lang=’en’ theme=’light’]

Hou van Dan Roodt se Facebookblad

So pas het ek twee YouTube-video’s gekyk. Die eerste is ‘n musiekvideo van Bok van Blerk wat omtrent ewe patrioties as die De la Rey-video is, Die Kaplyn.

Die titel van die tweede video, veel langer, het by my taamlik verwagting geskep: Betrayed. Ek het gehoop dat dit oplaas vir mense perspektief sou gee oor die grensoorlog en veral dan die verraad wat FW de Klerk en Roelf Meyer teen die soldate gepleeg het. In die laaste paar minute is daar wel sprake van ‘n soort misnoeë met die oorgawe aan… nie net die ANC nie, maar ook SWAPO. Dog werklike ontleding, begrip, bestekopname? Nee, daarvan was daar min sprake. Maar kyk dit gerus, al is dit net om te besef aan watter gevaar ons troepe destyds blootgestel was, ter wille van hartelose politici wat net planloos voortgeploeter het.

Weliswaar het Rusland intussen verander en bedreig ons nie meer soos in die dae van die Angolese oorlog nie, maar al ons ander vyande is nog steeds op hul pos, met sommige sterker en aggressiewer as ooit. ‘n Afgetrede kolonel in die weermag is lief om te sê: “Die oorlog is nog steeds aan die gang. Die kaplyn het net van die grens tussen Angola en Namibië na rondom jou bed verskuif .”

Dis humor, maar wrang. Hoeveel van ons mense word nie deesdae op hul plase, in hul huise en selfs in hul slaapkamers aangeval en doodgemaak nie? Daarom steek daar ‘n groot stuk waarheid in sy stelling. Soos ek al voorheen gesê het, heers daar tans ‘n konflik in Suid-Afrika wat die Pentagon se definisie van lae-intensiteitsoorlog volmaak pas:

… a political-military confrontation between contending states or groups below conventional war and above the routine, peaceful competition among states. It frequently involves protracted struggles of competing principles and ideologies. Low-intensity conflict ranges from subversion to the use of the armed forces. It is waged by a combination of means, employing political, economic, informational, and military instruments. Low-intensity conflicts are often localized, generally in the Third World, but contain regional and global security implications.

Kom ons kyk kortliks hoe hierdie definisie van lae-intensiteitskonflik by die huidige Suid-Afrika pas. Dit druis teen my literêre beginsels in, maar kom ons nommer aspekte van die huidige konflik.

  1. Toegegee, ons word nie letterlik deur ‘n ander staat vanuit die lug met bomme bestook nie, maar vir seker is daar “groepe” in hierdie land wat kwalik hul vyandigheid jeens ons bedek. Luidens bogaande definisie, is hul vyandigheid benede konvensionele oorlog maar bokant roetine-mededinging.
  2. Dit ly geen twyfel dat daar by ons ‘n uitgerekte stryd tussen mededingende beginsels en ideologieë heers nie. Die soort aangepaste kommunisme wat die ANC en SAKP tans aanhang, staan in stryd met die Afrikaner se ekonomiese konserwatisme en Christelikheid.
  3. Ondermyning en die gebruik van gewapende magte. Is plaasmoordenaars wat dikwels in groepe van vier of vyf ons mense aanval, “gewapende magte” of nie? Wie lei hulle op? Wie verskaf aan hulle wapens, waaronder ook outomatiese wapens? Dit is alles tergende vrae wat niemand nog na behore beantwoord het nie. Ondermyning is ‘n wye begrip, maar as ons sien hoe ons deur staats- en privaatagente gedurig gemanipuleer word, hoe daar van buite af konstant onmin en verdeeldheid tussen Afrikaners – selfs op sosiale media – gesaai word, dan is dit tog helder dat ons deur vyandelike groepe ondermyn word?
  4. Kombinasie van gevegsmiddele, waaronder politieke, ekonomiese, inligtings- en militêre instrumente. ‘n Mens sou dink, noudat die ANC en die SA Kommunisteparty totale beheer oor die staat, die SAUK en groot dele van die ekonomie uitoefen, sou hulle “tevrede” wees. Inteendeel, die propaganda- en inligtingsoorlog teen Afrikaners was nog nooit so intens soos tans nie. Daar word ook van politiek en wetgewing gebruikgemaak om ons meedoënloos af te takel. Lyk my die einddoelwit is om die laaste Afrikaner in ‘n plakkerskamp te kry, landuit te verdryf of, les bes, dood te maak.

Na bewering het die Duitse regering en die Nazi-party in ‘n kasteel buite Berlyn byeengekom om die “eindoplossing” teen die Jode te bespreek en in werking te stel. Daar is ‘n dokument wat as die Wannsee-protokol bekendstaan en wat die notule van dié vergadering bevat. Ek weet nie waar en wanneer die Afrikaner se vyande, sowel in ons land as daarbuite, bymekaargekom het om hul eie Wannsee-vergadering te hou nie. Dalk was dit in ‘n luuksehotel in die buiteland of miskien was dit ‘n geheime kabinetsvergadering waar Pieter Mulder toevallig nie teenwoordig was nie. Maar dat ons vyande planmatig te werk gaan, is helder.

Vandaar dus hierdie lae-intensiteitskonflik wat dag na dag, maand na maand, jaar na jaar, teen ons woed. Elke moontlike vastrapplekkie – ek praat nie eens van magsbasis nie, want dit het ons lank nie meer nie – waaroor die Afrikaner beskik, moet stelselmatig onder hom weggekalwe word. Sy grond, sy universiteite, sy maatskappye, sy skole, sy kerke, selfs sy effens groter kultuurverenigings soos die ATKV. Maar ook: die wese van sy identiteit en sin vir wie hy is.

Verby is die dae van “versoening”, wat in elk geval ‘n slenter was om ons, naïef, vredeliewend en goedgelowig soos ons is, gerus te stel. Terwyl die weermag, polisie en inligtingsdienste stelselmatig “getransformeer” word. En noudat feitlik alle magsinstrumente in die hande van die vyand is, word daar tande gewys…

Die Verenigde Nasies praat van identiteitsoorlog om konflikte soos dié tussen die Israeli’s en die Palestyne of tussen die Toetsi’s en Hoetoes van Rwanda te omskryf. Wat anders is hier by ons aan die gang as ‘n identiteitsoorlog?

Soms wil dit vir my voorkom asof ons al 200 jaar lank in dié oorlog betrokke is, of selfs 400 jaar as ons die vroeë oorloë tussen Engeland en Nederland hierby inreken. Immers is die oudste gebou in ons land, die Kasteel, deur Jan van Riebeeck en daaropvolgende goewerneurs opgerig om ons teen Engelse skepe te beskerm! Die oorloë teen die Xhosas in die laat aqtiende  en negentiende eeue het ‘n honderd jaar geduur, van 1779 tot 1879. Gedurende daardie oorlog het die Fingo-stam aan die kant van die blankes teen die amaXhosa geveg. Hulle het uiteindelik die Ciskei as tuisland ontvang. Die laaste leier van die Ciskei, Oupa Gqozo, het sy matriek in Afrikaans afgelê.

Wat was die eerste ding wat Ronnie Kasrils gedoen het toe hy weer terug in die land is? Hy het na die Ciskei toe opgeruk om van Oupa Gdozo ontslae te raak en sodoende ‘n moontlike swart bondgenoot van die destydse Afrikanerregering te neutraliseer.

Met leiers soos FW de Klerk en Roelf Meyer was dit natuurlik nie nodig om enigiemand te neutraliseer nie. Hulle het sommer vanself besluit dat volslae oorgawe beter as enige verdere bakleiery gaan wees en sodoende ‘n streep deur 400 jaar se geskiedenis getrek. Oor die afgelope tien jaar en meer het elke denkende Afrikaner wat daar nog oor is hom of haar al teen die groteske verraad van 1994 uitgespreek.

Ons vyande sien dit egter glad nie as verraad nie. Hulle sien dit as hul logiese oorwinning oor ons. Trouens, ek hoor elke dag mense op Twitter en elders wat sê dat ons “dankbaar moet wees dat ons nie almal doodgemaak is nie”. Ons moet bly wees ons lewe nog, want die magtige ANC-SAKP-COSATU-alliansie het ons militêr, sielkundig en ideologies verslaan.

Die meeste Afrikaners beskou dit egter as verraad, dat daar onder voorwendsel van “onderhandeling” eintlik oorgawe plaasgevind het. Ons vyande het soveel minagting vir ons vermoëns dat hulle die oorgawe as onvermydelik en vooraf bestem sien. Waarskynlik is die waarheid iewers tussenin: nóg verraad, nóg neerlaag kan die komplekse wyse waarop ons onderwerp is, verklaar.

Want, synde ‘n lae-intensiteitskonflik (LIK), het die oorlog soveel fasette. In weerwil van sy enorme middele, waaronder die ambassades, inligtingsdienste, die SAUK, simpatieke mediagroepe, ens., het die ou regering die propaganda-oorlog loshande verloor. ‘n Mens hoef nie ‘n briljante veggeneraal te wees om dit te weet nie: as jou troepe geestelik, ideologies of met propaganda oorwin word, is hulle verslaan.

Die Chinese wysgeer Soen Tsoe het gesê:

Want om ‘n honderd oowinnings in ‘n honderd veldslae te behaal, is nie die toppunt van vaardigheid nie.  Om die vyand te onderwerp sonder om te veg, is die toppunt van vaardigheid.

Is dit nie wat Joe Slovo, Ronny Kasrils en hul paar swart luitenante soos Mandela of Cyril Ramaphosa reggekry het nie? Om ons te onderwerp sonder om te veg?

Dis nie so sleg om te verloor nie. Duitsland het twee wêreldoorloë verloor en verteenwoordig vandag die grootste ekonomie in Europa. Wat dié land op die slagveld verloor het, het hy deur harde werk in vredestyd weer ingepalm.

Die Afrikaner sal moet besef dat sy stryd nog lank nie verby is nie. De Klerk en die vorige NP-regering het met menselewens gespeel. Hulle het ons Afrikanerseuns gestuur om op die slagveld te sterf sodat hulle “bietjie tyd kon koop voor hulle oorgee”. Waarom dan hoegenaamd weerstand bied? vra ek.

Oor die afgelope twintig jaar het jaarliks veel meer Afrikaners in hierdie oorlog – ons gewelddadige “vrede” – gesterf as wat alstesaam in byna dertig jaar van grensoorlog omgekom het. Om nie te praat van al die ander verliese wat ons aanhou om op soveel gebiede te ly nie.

Iewers sal ons die streep moet trek. Al is dit in die kombuis. Sodat ons en ons geliefdes nie meer in ons beddens hoef te sterf nie.

Die oomblik wat ons besluit het dat ons wel in die land wil oorbly, dat ons wel wil oorleef, is daar ‘n duisend en een dinge wat ons kan begin doen om te hergroepeer en weerstand te bied.

Pallo Jordan van die ANC het ‘n dekade of wat gelede smalend gesê dat die ANC maar kan maak wat hy wil, want “by die vyand is die wil om weerstand te bied eenvoudig nie teenwoordig nie”.

Dit mag waar wees, dat ons ons wil om weerstand te bied, verloor het. Dit maak my trouens mismoedig as ek altyd net argumente hoor oor hoe ons “alles moet aanvaar, want danksy De Klerk se oorgawe is daar niks aan te doen nie”.

Dog plek-plek is daar nog rebelle onder die Afrikaners. Ons is nog in staat om te rebelleer.

En soos ons grootste Afrikanerdigter, N.P. van Wyk Louw, gesê het:

Opstand in ‘n volk is net so noodsaaklik soos getrouheid. Dit is nie eens gevaarlik as rebellie misluk nie. Wat wel gevaarlik is, is dat ‘n hele geslag verby sal gaan sonder protes.

[followbutton username=’danroodt’ count=’true’ lang=’en’ theme=’light’]

Hou van Dan Roodt se Facebookblad