Al Sjabaab – praag.co.za

AU help om al-Sjabaab uit Somaliese dorp te verdryf

Die Somaliese nasionale weermag (SNA), met die ondersteuning van troepe van die Afrika-uniesending in Somalië (Amisom) het Dinsdag die Mir-tugo-nedersetting in die sentrale deel van die Middel-Shabellestreek van Al-Sjabaab militante ingeneem.

Volgens ‘n weermagoffisier, Abdullahi Mohamed, is geen weerstand van die militante ondervind nie.

Die jongste militêre verwikkeling kom op die vooraand van verkiesings vir die Somaliese laerhuis van die parlement in die dorp, Jowhar, die hoofstad van die Middel-Shabelle-streek.

Die Islamitiese Al-Sjabaab is reeds uit belangrike dorpe in landelike gebiede in die suide en sentrale dele van Somalië verdryf, maar voer steeds gereelde aanvalle in die land uit.

Die Islamiete het ook onderneem om die verkiesings in Somalië te ontwrig. Dit het daartoe gelei dat die gesamentlike magte strenger veiligheidsvoorbereidings by stempunte ingestel het.

Somalië berei voor op ‘n presidentsverkiesing op 30 November. Parlementêre verkiesings word deurlopend in verskeie dele van die land gehou.

Al Sjabaab van AU-basis aan

‘n Selfmoordbomaanvaller van Al Sjabaab het met ‘n voertuig vol plofstof gister ‘n militêre basis van die Afrika-unie in sentraal Somalië binnegejaag.

Volgens veiligheidswoordvoerders is die ontploffing deur swaar geweervuur gevolg. Die voorval het by die Djiboetiese basis in die stad Beledweyne plaasgevind.

Al Sjabaab, met bande aan Al Kaïda, het via sy Radio Andalus mediaorganisasie, aanspreeklikheid vir die aanval aanvaar en sê “baie soldate is dood en beseer”.

Al Sjabaab veg om die internasionaal-erkende regering in Mogadisjoe omver te werp en val gereeld basisse van Amisom, die AU-sending in Somalië, aan.

In onlangse weke het Ethiopiese troepe wat in ‘n nabygeleë gebied ontplooi is, sonder enige verduideliking aan hul posisies onttrek. Ná die onttrekking het Al Sjabaab-vegters die dorpe opnuut beset.

Al-Sjabaab keer terug na dorpe waar AU-sending onttrek

Honderde Ethiopiese troepe het die week uit ’n dorp in die sentrale deel van Somalië onttrek. Dit is minstens die tweede gebied waaruit hulle in onlangse weke beweeg het.

’n Offisier het aangekondig dat die soldate uit El-Ali in die Hiran-streek onttrek het waar hulle diens gedoen het as deel van die Afrika-uniesending, nadat hul basis oornag onder ’n kwaai artillerie-aanslag deurgeloop het.

Nabygeleë al-Sjabaab militante het daarna die dorp weer ingeneem.

Die troepe-beweging kom enkele dae nadat Ethiopië se beleërde regering ’n noodtoestand afgekondig het in ’n poging om ’n einde aan ’n ongekende vlaag protesoptredes te maak.

Uit Somaliese regeringsgeledere word gekla dat die onttrekking van die Ethiopiese troepe ’n vakuum laat, wat militante die geleentheid bied om bevryde dorpe weer in te neem.

Kenia se verkiesingskommissie bedank

Die kommissarisse van Kenia se verkiesingskommissie het Woensdag bedank as deel van ’n ooreenkoms met opposisiepartye, wat vroeër vanjaar gewelddadige betogings in die land teen die kiesstelstelsel gelei het.

Die aankondiging dat al tien lede van die onafhanklike verkiesings- en afbakeningskommissie bedank het, is in ’n verklaring deur die Keniaanse regering aangekondig.

Ondertussen berig AFP dat ses mense in die noordooste van Kenia gisteroggend deur vermeende al-Sjabaab militante vermoor is.

Die aanval het in die dorp Mandera plaasgevind en ’n omheinde residensiële gebou geteiken waar hoofsaaklik nie-etniese Somali’s en nie-Moslems tuisgaan.

Al-Sjabaab slaan weer in Kenia toe

Al-Sjabaab het weer in Kenia toegeslaan. Drie vroue in boerkas het ‘n polisiekantoor in Mombasa in Kenia al kletsend binnegdring, waar hulle een polisieman met ‘n mes aangeval het voordat hulle die gebou met behulp van ‘n petrolbom aan die brand gesteek het.

Die drie is op die toneel doodgeskiet.

Die polisie het ook ‘n selfmoordgordel gevind wat nie ontplof het nie, het ‘n polisiewoordvoerder gesê.

Die stad Mombasa aan Kenia se kus het ‘n groot Moslembevolking en het die afgelope jare gereeld onder aanvalle deur Islamitiese militante deurgeloop.

Die vroue het onder die voorwendsel dat hulle ’n gesteelde telefoon wou aanmeld, Saterdagoggend by die polisiekantoor ingestap. ’n Petrolbom en ’n mes was in hul boerkas, ook bekend as boei-boei, versteek.

Twee polisiebeamptes is in die hospitaal opgeneem en word vir hul beserings behandel.

‘n Vrou by wie die drie vroue die nag vantevore tuis gegaan het, word aangehou. Drie ander mense is by die huis van een van die aanvallers aangekeer.

Die polisie het nie gesê aan watter militante groep die vroue verbind word nie, maar ’n ooggetuie op die toneel het gesê die vroue het gesê hulle is lojaal aan Al-Sjabaab.

Hulle het ook Arabiese slagspreuke soos “Alla uAkbar” tydens die aanval geskree.

Die Somaliese groep Al-Sjabaab, wat bande met Al-Kaïda het, het aanspreeklikheid vir die aanval in Mombasa aanvaar en sê die aanval is ter vergelding vir die troepe wat Kenia na Somalië gestuur het.

Dertien gedood in motorbomaanval

In die aanloop tot die presidentsverkiesing in Somalië dié maand, is die militante Islamitiese groep, al-Sjabaab, besig om sy aanvalle te verskerp, het Reuters berig.

Militante het Sondag twee motorbomme buite ‘n polisiebasis in Somalië se hoofstad, Mogadishu laat ontplof voordat gewapendes die gebou binnegestorm en minstens dertien mense om die lewe gebring het.

Die Islamitiese groep al-Sjabaab het aanspreeklikheid vir die aanval aanvaar.

Dit was die tweede groot aanslag deur die groep in ‘n week in die stad, wat ‘n guerrilla-ooglog teen die Westers-gesteunde regering voer.

Swaar geweervuur is vir byna ‘n halfuur ná die eerste ontploffing binne die gebou gehoor, het ooggetuies berig.

Die oorskot van vier burgerlikes het in die straat gelê naby die kompleks wat gedeeltelik deur die ontploffings in puin gelê is. ‘n Nabygeleë kiosk het aan die brand geslaan.

“Minstens tien mense, insluitende vier militante, vyf burgerlikes en ‘n soldaat het in die aanval gesterf,” het ‘n polisiewoordvoerder gesê.

Nog 15 is beseer van wie sommige in ‘n ernstige toestand verkeer.

In al-Sjabaab se eerste aanval verlede week Dinsdag by die ingang na die Afrika-unie se Amison-basis, het twee motorbomme ontplof wat die lewens van 13 mense geëis het.

Veiligheidswaarnemers het gewaarsku dat die groep sy aanvalle in die aanloop tot die presidentsverkiesing kan verskerp.

Oud-LP in selfmoordbom-aanslag

‘n Voormalige Somaliese parlementslid wat in 2010 by al-Sjabaab aangesluit het, was een van twee selfmoordbomaanvallers wat die lewe van 13 mense naby ‘n basis van die Verenigde Nasies (VN) en die Afrika-unie (AU) geëis het.

Die motorbomme in voertuie wat deur die selfmoordaanvallers bestuur is, het Dinsdagoggend naby Mogadisjoe se lughawe ontplof.

Een van die voertuie het skaars 200 meter van die basis ontplof en meestal die lewe van veiligheidspersoneel geëis.

Salah Badbado (53) het vanaf 2004 tot 2010 in Somalië se parlement gedien.

Hy het in 2010 tydens ‘n mediakonferensie aangekondig dat hy die politiek verlaat om hom by die Somaliese filiaal van al-Kaïda aan te sluit.

Veertien kom om in al-Sjabaab-aanval op Somaliese hoofstad

Minstens 14 mense is dood toe die ekstremistiese, Islamitiese groep al-Sjabaab ’n hotel in Somalië se hoofstad, Mogadisjoe, beset het.

Die aanval het met ’n kragtige ontploffing by die ingangshek begin, het AP berig.

“Ons het uiteindelik die beleg beëindig. Die laaste militante is op die boonste verdieping van die hotel doodgeskiet,” het kapt. Mohamed Hussein van die polisie gesê nadat veiligheidsmagte die gewapendes doodgeskiet het wat as sluipskutters stelling op die dak van die Naso-Hablod-hotel ingeneem het. Volgens die polisie was minstens vier mans in die aanval betrokke en twee is doodgeskiet.

Minstens 14 burgerlikes is in die aanval dood.

Die veiligheidsmagte het die meeste gyselaars bevry, maar teen druktyd was dit nie bekend of enige van hulle in die aanval dood is nie. Volgens mediese personeel is nege mense in die voorval gewond.

Die polisie sê die aanval het begin toe ’n selfmoordbomaanvaller homself in ’n voertuig, volgelaai met plofstof, by die ingang van die hotel opgeblaas en die hek aan flarde geskiet het. Gewapende mans het hul pad na die hotel oopgeveg en ooggetuies sê hulle het wild op hotelgaste begin skiet. Die hotel se vloer was met bloed bevlek en die mure het gate in gehad waar dit deur koeëls getref is.

Al-Sjabaab, met sy bande met Al-Kaïda, voer ’n dodelike insurgensie in Somalië en maak dikwels van selfmoordaanvallers met motorbomme gebruik.

Die aanval in die hoofstad beklemtoon die uitdagings wat die Somaliese regering en die magte van die Afrika-unie in die gesig staar om die land te beveilig. ’n Aanval in Februarie op nog ’n hotel in Mogadisjoe het die lewe van minstens nege mense geëis en in April het ’n motorbom buite ’n restaurant in die hoofstad tot die dood van minstens vyf mense gelei.

Dodetal styg na Al-Sjabaab-aanval in Mogadisjoe

Die dodetal in die aanval op ‘n hotel in die Somaliese hoofstad, Mogadisjoe het tot 16 gestyg en sal na verwagting verder styg. Ongeveer 55 mense is gewond.

Al-Sjabaab het verantwoordelikheid vir die aanval op die Ambassadorhotel aanvaar waar ‘n motorbom eers afgegaan het voordat militante die gebou bestorm het.

Die hotel word veral deur Westerlinge besoek. Die BBC het berig dat die hotel hoofsaaklik gebruik word deur vooraanstaande Somaliërs, wat onder meer lede van die Parlement insluit.

Twee wetmakers is in die aanval gedood, volgens die Somaliese media.

Ambulansdienste sê is talle mense gewond en die hoofhospitaal in die stad, is oorvol.

Sporadiese geweervuur weerklink nog in die omtrek van die hotel.

Volgens `n polisiebeampte is veiligheidsmagte in beheer van die eerste vier verdiepings, maar die vyfde verdieping is nog onveilig.

Paaie in die gebied is gesluit.

Daar is eers beweer dat die gewapende aanvallers die boonste vloer probeer oorgeneem het, maar dat hulle deur die veiligheidsmagte teruggedryf is.

In Washington, het Amerikaanse amptenare gesê Amerikaanse troepe verskaf raad, bystand en ondersteuning teen die militante. Hulle het met die AP nuusagentskap op voorwaarde van anonimiteit gepraat.

Voor die aanval op die hotel, is ‘n bevelvoerder wat glo verantwoordelik was vir die dodelike aanval op Kenia se Garissa Universiteit in 2015, doodgeskiet is in die suide van Somalië.

Plaaslike veiligheidsmagte in die Somalië kusdorp Kismayo het bekend gemaak dat Mohamed Mohamud Ali, die vermeende argitek van die bloedbad in Garissa, oornag gedood is.

Die aanval in April 2015 op Garissa Universiteitskollege, 365km noord van die Keniaanse hoofstad Nairobi, het die lewens van 148 mense geëis, 142 van hulle studente.

Die Afrika Unie se vredesmag het Al-Sjabaab in 2011 uit die stad probeer verdryf, maar gereelde aanvalle vind nog gereeld plaas.

Al-Sjabaab dood vyf Somaliese weermagsoldate

Al Sjabaab insurgente het die week ‘n militêre basis van die Somaliese weermag aangeval en vyf soldate om die lewe gebring in twee ure se hewige gevegte naby die noordwestelike dorp, Baidoa, het ’n militêre woordvoerder gesê.

Die voorval het in die vroeë oggendure plaasgevind. Twaalf soldate is in die aanval gewond. Ses Al Sjabaab-vegters is in die aanval dood.

Abdiasis Abu Musab, Al Sjabaab se woordvoerder vir militêre operasies, het gesê die groep het ’n vragmotor met troepe onderweg na die basis in ’n lokval gelei en elf soldate doodgeskiet en beslag op sewe vuurwapens gelê.

Dit was nie moontlik om die dodetal onafhanklik te bevestig nie. In die verlede het Al Sjabaab die dodetal in hul aanvalle ver oordryf.

Die Islamitiese groep, wat hoop om Somalië se Westers-gesteunde regering om ver te werp, voer gereeld aanvalle op militêre teikens asook burgerlike instansies soos hotelle en restaurante, meestal in die hoofstad, Mogadisjoe uit.

Al Sjabaab, het bande met al-Kaïda en was in Januarie verantwoordelik vir ’n aanval op ’n basis vir Keniaanse soldate van die Afrika-unie se vredesending in Somalië.

Die militante voer aan dat hulle 100 Keniaanse soldate doodgeskiet het. Keniaanse owerhede het nog nie die amptelike dodetal bekend gemaak nie.

Intussen het Daesh (ISIS) ‘n video uitgesaai van ‘n oefenkamp in Puntland, vernoem na Sheikh Abu Nouman, die naam van ‘n voormalige offisier van die Sjabaab wat vermoor is deur hulle nadat hy oorgeloop het na Daesh.

Sonder aanspraak op volwaardige staatskap, het Puntland – ‘n provinsie van Somalië – afgestig met ‘n onafhanklike regering.

Dit was voorheen ‘n seerowernes wat Chinese en Russiese skepe in die Straat van Bab el-Mandeb aangeval het, tot hulle die idee laat vaar het want China en Rusland het hul vragskepe van militêre begeleiding voorsien.

Die seerowers het nou uitgewyk na die Islamitiese Emiraat van Mukalla, in Jemen.

Al-Sjabaab verantwoordelik vir Somaliese selfmoordbom

’n Islamitiese militante selfmoordbomaanvaller het die week in die outonome Somaliese streek, Puntland, sy arms om ’n plaaslike ampenaar gesit asof hy hom wou omhels en toe albei die lug ingeblaas.

Die militante Islamitiese groep, al Sjabaab, teiken gereeld staatsamptenare in pogings om die Westers-gesteunde regering van Somalië omver te werp. Die groep het aanspreeklikheid vir die voorval aanvaar.

“Ons het Saeed Ali, die tesourier van Galkayo, en verskeie polisiebeamptes wat hom opgepas het, doodgemaak,” het Sjeik Abdiasis Aboe Moesab, al Sjabaab se woordvoerder vir militêre operasies, aan Reuters gesê.

Majoor Noer Ahmed, ’n polisiebeampte, het aan Reuters gesê Saeed Ali en sy wagte is geteiken toe hulle in ’n voertuig wou klim.

Ooggetuies sê twee omstanders is ook in die ontploffing dood, maar dit kon nie onmiddellik bevestig word nie.

Die VSA het verlede jaar ‘n 20 jaar oue wapenverbod teen Somalië verbreek deur die opleiding aan die land se intelligensie-gemeenskap te verskaf.

Die opleiding asook die implementering van spesiale magte is sonder kennisgewing aan die Verenigde Nasies gedoen, volgens ‘n nuwe verslag.

Die ongemagtigde intelligensie-opleiding is vervat in ‘n verslag van die Verenigde Nasies wat nuwe besonderhede oor die Amerikaanse oorlog teen Al-Kaida aan die lig bering.

Die verslag, wat uitgereik is deur die VN se Somalia Eritrea Monitoring Group (SEMG) bevat besonderhede oor drie geheime Amerikaanse programme om Somaliese veiligheidsdienste in hul stryd teen Al-Sjabaab, die Somalië filiaal van Al-Kaida, by te staan.

Al- Sjabaab weer glo aanval af

Volgens die Islamitiese groep Al-Sjabaab, het hulle ‘n aanval op een van hul basisse in die suide van Somalië afgeweer.

Buitelandse kommando’s het glo met twee helikopters ingevlieg en die aanval geloods. Een Al-Sjabaab-militant is in die aanval dood.

Sjeik Abdiasis Abu Musab, Al-Sjabaab se woordvoerder vir militêre operasies, het nie die nasionaliteit van die troepe geïdentifiseer wat in die aanval ongeveer 50 km suid van Mogadisjoe, betrokke was nie.

Verskeie lande onder die vaandel van Amisom staan die Somaliese regering by in hul stryd teen die Al-Sjabaab-insurgensie.

Die sending bestaan uit troepe van verskeie Afrikalande wat sy aan sy met die Somaliese weermag veg.

Amerikaanse amptenare het in 2014 bekend gemaak dat Amerikaanse militêre adviseurs sedert 2007 in die geheim in Somalië betrokke is en dieper betrokke sal raak om die Islamitiese bedreiging af te weer.

Washington het oor die naweek aangekondig dat lugaanvalle Saterdag op ’n ander Al-Sjabaab-basis uitgevoer is en dat meer as 150 Islamitiese vegters in daardie aanval dood is.

Hulle het glo van onbemande tuie gebruik gemaak om twee sleutelfigure uit te wis. Al-Sjabaab wou nie die Pentagon se verklaring bevestig dat hulle die twee, Ugaas en Mire gedood het nie.

Die VSA het hommeltuie in Jemen sowel as in Somalië ontplooi.

Ondertussen berig Reuters dat ’n motorbomontploffing in die Somaliese hoofstad, die week die lewens van drie mense geëis het.

Die drie slagoffers was almal polisiemanne.

Terreur-oefening lei tot dood van student

Mediese beamptes moes bystand verleen aan beseerde studente by die Nairobi-wes hospitaal in Kenia.

‘n Veiligheidsoefening om die Strathmore Universiteit se gereedheid in geval van ‘n terroriste aanval te toets, het skeefgeloop en ‘n stormloop het gevolg nadat geweerskote gehoor is.

Een persoon is dood en 20 is in die voorval beseer.

Vreesbevange studente het by uit vensters uitgepeul na die geweerskote gehoor is.

Die skote het tot paniek onder die 5000 studente gelei.

Daar was ook berigte dat algehele chaos geheers het. Spanning loop hoog in Nairobi, wat reeds talle kere getref is deur ISIS-terreur in die vorm van die al-Sjabaab-groep.

Die plaaslike radiostasie Nation FM het eers nadat die chaos uitgebars het, getwiet dat die skote deel is van ‘n terreur-oefening.

“Dit was net ‘n oefening,” het Jafet Koome, die polisiebevelvoerder in die hoofstad aan Reuters gesê.

Die Pous, wat ses dae gelede besoek gebring het aan die land, het gesê hy is meer bekommerd oor muskiete as oor Moslemterreur.

Tydens die Pous se besoek is 10 000 polisielede in Kenia ontplooi.

Twee bomme ruk hotel in Mogadisjoe

Twee bomme het buite ‘n hotel in die Somaliese hoofstad Mogadisjoe ontplof.

Die hotel is veral gewild onder lede van die Somaliese parlement, en een van die land se top militêre leiers is onder die slagoffers.

Volgens die Britse Uitsaaikorporasie het die kragtige motorbomme groot dele van die hotel verwoes wat een van die bes bewaakte geboue in die hoofstad is.

Hewige gevegte het ná die bomaanval tussen die veiligheidsmagte en lede van die al-Sjabaab-groep uitgebreek toe gewapende mans die hotel binnegestorm het.

Al-Sjabaab het verantwoordelikheid vir die aanval op die Sahafi Hotel aanvaar. Regeringslui gaan gewoonlik daar tuis.

Die ekstremiste se gereelde aanvalle in die Somaliese hoofstad is daarop gemik om die Westers-gesteunde regering omver te werp.

Die owerheid in Mogadisjoe, sê gewapende aanvallers het twee motorbomme gebruik om hulle weg na die Sahafi-hotelkompleks oop te skiet voordat hulle die gebou bestorm het.

Die dodetal na die aanval staan reeds op 15. Al Sjabaab, sê die militêre leier was een van die teikens omdat hy in 2011 die aanval gelei het waarin hulle uit die hoofstad verdryf is.

Soldate van die Afrika-Unie en regeringsmagte sê hulle het na ‘n hewige skietgeveg weer die beheer van die hotel teruggeneem.