Etiket: olie

Ekwatoriaal-Guinee uitgesonder vir tipiese Afrika-kwale

Ekwatoriaal-Guinee se visepresident, Teodoro Nguema Obiang Mangue, is nou voor stok gekry oor die plundering van die olie- en houtryke land se bates om ‘n luukse woning in een van Parys se mees eksklusiewe rylane asook ‘n versameling supermotors aan te skaf.

Hy is die oudste seun van pres. Teodoro Nguema Obiang Mangue.

Maar die werklike rede vir die aanklagte teen die Afrika-diktator is dat die land goeie betrekkinge met Exxon, die Amerikaanse oliereus het.

Exxon se voorsitter, Rex Tillerson, is ‘n Trump-ondersteuner en ‘n kandidaat vir een van die belangrikste poste in die VSA: Om buitelandse betrekkinge te bestuur.

Met die aanvang van die verhoor Maandag het regsverteenwoordigers van die 47-jarige visepresident aangevoer dat hulle te min tyd gegun is om getuies te roep en hul verdediging voor te berei.

Regters het saamgestem en die verhoor tot 19 Junie uitgestel.

Dit is die eerste saak wat spruit uit ondersoeke na sekere Afrika-leiers wat ‘n lewe van luuksheid in die buiteland lei, terwyl hul burgers in armoede krepeer.

Obiang ontken die klagtes.

Aanklaers en die teenkorrupsiegroep Transparency International, een van die klaers in die saak, sê die verdediging se versoek om uitstel is “vertragingstaktiek”. Hulle het gehoop om die saak teen die swart leier se seun in die media te hou om Rex Tillerson se aanstelling as Staatsekretaris van buitelandse sake in die VSA te kelder.

Ekwatoriaal-Guinee, Afrika se enigste Spaanssprekende nasie, is die vasteland se derde grootste olieprodusent maar meer as die helfte van die bevolking leef onder die broodlyn, minder as in Lesotho en Swaziland.

Die land word gereeld deur menseregtegroepe vir onderdrukkende wetgewing, ongeregverdigde teregstellings en marteling deur die veiligheidsmagte beskuldig.

Obama se amptenare sê die president se seun het “skaamteloos” sy land in 2014 besteel. Amerikaanse owerhede het beslag gelê op sy villa in Malibu, Kalifornië en sy versameling Michael Jackson-memorabilia.

In November het Switserse owerhede ‘n ondersoek na geldwassery teen Obiang gelas en beslag gelê op elf luukse motors. 

Maar in Angola, waar dit erger gaan, is niemand in die Obama-administrasie bekommerd oor die stand van sake nie.

Petrolprys kan daal voorspel AA

Die Automobiel-Assosiasie van Suid-Afrika het goeie nuus vir Suid-Afrikaanse motoriste. Die brandstofprys kan ‘n afname te wagte wees, is hul voorspelling.

Die AA meen die prys van brandstof kan aanstaande maand met 45 sent per liter kan daal nadat internasionale oliepryse begin daal het.

Diesel kan met 38 sent per liter daal, en paraffien met 40 sent per liter.

Die petrolprys het vroeër vandeesmaand met 45 sent per liter gestyg.

Die AA waarsku egter dat die rand skerp verswak het weens die Amerikaanse verkiesingsuitslae, en sê indien die geldeenheid nie weer versterk nie, kan die vooruitsig vir die petrolprys teen die einde van die maand verander.

Hierdie prysverlagings is dus afhanklik van die prestasie van die rand teenoor die dollar in die volgende twee weke, sowel as internasionale oliepryse.

Venezuela se referendum afgestel

Wetgewers in Venezuela is woedend oor ‘n besluit deur die verkiesingsowerhede om voorbereidings vir ‘n referendum te staak en sê daar is ‘n “aftakeling van grondwetlike orde” aan die orde van die dag.

Die aankondiging is tydens ‘n noodsitting oor die ekonomiese en politieke krisis in die olieryke Suid-Amerikaanse land gemaak. Die sitting is vir ‘n wyle in chaos gedompel toe ‘n groep van Maduro se ondersteuners verby veiligheidswagte gebars en die Nasionale Vergadering binnegestorm het. Die sitting is na 45 minute hervat.

Die wetgewers het ‘n beroep op inwoners van Venezuela gedoen om die grondwet “aktief te verdedig”.

“Die voortslepende staatsgreep wat in Venezuela aan die gang is, het daartoe gelei dat ons die geleentheid vir ‘n herroepingsreferendum ontneem is,” het die meerderheidsleier, Julio Borges, van die sentraal-regse opposisiekoalisie gesê.

Wetgewers wat die land se president Nicolas Maduro steun, het op hul beurt die opposisie daarvan beskuldig dat hulle ‘n staatsgreep beplan met die VSA wat daaragter sit.

Die hooggeregshof het die wetgewende meerderheid van minagting van die hof beskuldig nadat hulle, ondanks ‘n ondersoek na verkiesingsbedrog, onlangs drie wetgewers ingehuldig het.

Die opposisie sê die aantygings is vals en die hof is “Maduro se skoothondjie”.

Die hof het sedert die opposisie in Januarie van jaar beheer oorgeneem het, elke wetsontwerp afgeskiet wat in die Nasionale Vergadering aanvaar is.

Intussen het die Pous die land besoek om die krisis te bespreek. Sedert die olieprys gedaal het, sukkel die land ekonomies.

Kenia en Somalië takel mekaar in oliegrensdispuut

Kenia het Somalië Maandag betig omdat die land Kenia voor die Verenigde Nasies se hoogste hof gesleep het om ‘n maritieme grensdispuut te verdedig.

Die finale beslissing kan ‘n groot invloed op die potensieel uiters winsgewende olie- en gasreserwes van die Indiese Oseaan hê.

Mogadishu se saak teen Nairobi voor die VN-hof is ‘n poging om die seegrens te verskuif en indien dit slaag, sal dit minstens drie van Kenia se aflandige olieblokke beïnvloed.

Somalië sê op sy beurt onderhandelinge kon nie daarin slaag om ‘n oplossing in hierdie bitter dispuut te vind nie, wat ‘n betekenisvolle impak op ‘n nuwe inkomstebron vir een van die twee Oos-Afrika-lande kan hê.

Somalië se beskuldigings is in kwade trou en is “net so absurd as wat dit pynigend is,” het Kenia se prokureur-generaal, Githu Muigai, aan regters in Den Haag gesê. Die hof is in 1946 tot stand gebring om geskille tussen lande te besleg.

“Somalië wil die hof laat glo dat gedurende al daardie jare, Kenia saamgesweer het om voordeel uit ‘n buurland te trek deur sy see en olie te steel,” het hy gesê.

Die sleutelpunt van die dispuut is hoe om ‘n seegrens te trek, het AFP berig.

Somalië, wat noord van Kenia geleë is, wil hê die grens moet in ”n suidelike rigting ‘n verlenging van sy landsgrens wees.

Kenia wil egter hê dit moet ‘n reguit lyn oos, parallel aan die breedtegraad wees wat dit groter seegebied sal gee.

Kenia sê hy oefen sedert 1979, toe die land se eksklusiewe ekonomiese sone afgekondig is, onbetwiste jurisdiksie oor die gebied uit.

Die land voer aan dat voorheen met Mogadishu ooreengekom is om die dispuut deur middel van onderhandelinge en nie regstappe nie, op te los.

Hierbenewens was Nairobi “’n vriend” van Mogadishu en help in die stryd teen die djihadistiese Al-Sjabaab groep, met honderde Keniaanse soldate en burgerlikes wat reeds met hul lewens geboet het, het Muigai gesê.

Britse Reaper-aanval laat Siriese skietstilstand wankel

Sirië se skietstilstand het verkeer op die rand van ineenstorting, nadat ’n Amerikaans-geleide koalisie-aanval die lewe van dosyne Siriese regeringsoldate geëis het.

Aleppo is ook vir die eerste keer in byna ’n week weer gebombardeer.

’n Reeks aanvalle Sondag op gebiede in Aleppo wat in rebelle-hande is, het ou gevegsfronte heropen en is die ernstigste bedreiging vir die skietstilstand tot nog toe.

’n Staking van gevegte in en om Aleppo, sodat broodnodige humanitêre bystand gelewer kon word, was een van die sleutelbepalings van die ooreenkoms.

’n Week ná die aanvang van die skietstilstand, het desperate inwoners van gebiede onder beleg nog geen bystand ontvang nie, omdat vegtende partye nie die veiligheid van humanitêre agentskappe kan waarborg nie.

Die mede-borge van die skietstilstandooreenkoms, Rusland en Amerika, het mekaar beskuldig en betrekkinge is verder versuur.

Sirië het Amerika daarvan beskuldig­ dat dit die skietstilstand saboteer.

“Die rede vir hierdie Amerikaanse aggressie is om die skietstilstand te laat misluk,” het Basjar Jaafari, Sirië se ambassadeur by die Verenigde Nasies, gesê.

Brittanje se militêre betrokkenheid by die lugaanval is deur hul Verdedigingsministerie bevestig. Verslae dui op ‘n Reapertuig wat gebruik kon gewees het.

Australiese sowel as Deense magte is deel van die VSA-geleide koalisie. By die hoofkwartier van die Deense militêre magte het ‘n woordvoerder ook hul betrokkenheid by die dodelike aanval erken.

“Twee Deense F-16s het deelgeneem saam met vliegtuie van ander lande in hierdie aanvalle. Die aanval is onmiddellik gestop toe ‘n verslag van die Russiese kant aangedui het dat ‘n Siriese militêre posisie getref is,” lui die Deeense verklaring.

“Dit is natuurlik jammer as die koalisie verkeerdelik enigiets anders as ISIS-magte getref het,” het die verklaring voortgegaan.

Die Siriese konvooi het noodvoorraad in ‘n plattelandse gebied in Urm al-Kubra afgelewer. Die VN sê minstens 18 van die 31 vragmotors, sowel as ‘n pakhuis is getref.

‘n Aantal noodlenigingswerkers is volgens berigte dood of gewond het die VN se spesiale raadgewer oor humanitêre sake, Jan Egeland bevestig.

Gaboen se president lag beskuldigings van skynverkiesing af

Gaboen se pasverkose pres. Ali Bongo steur homself nie aan die betwiste verkiesingsuitslae nie, selfs nadat sy minister van justisie bedank het en die voormalige koloniale heerser, Frankryk, voorgestel het dat die stemme oorgetel word.

Die Franse eerste minister, Manuel Valls, het gesê dit is noodsaaklik om ’n duidelike verkiesingsproses te hê omdat “twyfel” bestaan.

Frankryk het sy stem by dié van die Europese Unie en Amerika gevoeg, wat reeds gevra het dat die volledige uitslae vir elke stempunt gepubliseer moet word.

Dit kom ure nadat die minister van justisie, Seraphin Moundounga, wat ook die adjunkpremier is, láát Maandag bedank het en geëis het dat die stemme oorgetel word.

Gaboen se herverkose president (foto, saam met sy vrou Sylvia) het internasionale oproepe verlede week afgelag, en gesê dit is ‘n kwessie vir die land se konstitusionele hof om te besluit.

Die Europese Unie het die geldigheid van die verkiesing bevraagteken. Frankryk is besonder gretig om ‘n nuwe president in die olieproduserende land aan te wys.

Op ‘n vraag gedurende ‘n onderhoud Woensdag of hy ‘n sal toelaat dat stemme weer getel word, het Bongo aan Frankryk se RTL-radio gesê: “Wat mense moet my vra om te doen, is om die wet toe te pas. Ek kan die wet nie oortree nie.”

SA maatskappye wil uit Nigerië kom

Die hotel- en ontspanningskonglomeraat Sun International het aangekondig dat hy Nigerië sal verlaat.

Sun International het gesê sy hotel- en casino-kompleks Federal Palace (foto bo) gaan voort in ‘n moeilike ekonomiese omgewing met Nigerië wat ‘n aantal krisisse, insluitend die lae olieprys, Boko Haram en ‘n verswakking naira in die gesig staar.

Die land het ook nog nie herstel van die groot impak wat die Ebola-epidemie op sakebedrywighede gehad het nie.

Benewens al probleme van die land, is daar ‘n aantal kwessies wat spesifiek hul eie bedryf negatief raak, het Sun International gesê.

“Vyf van ons personeellede wat in hegtenis geneem is deur die Ekonomiese en Finansiële Misdade Kommissie vroeër in die jaar nog nie het hul paspoorte terugontvang nie ten spyte van geen formele klagte teen die individue, die maatskappy of Sun International nie.

Ander Suid-Afrikaanse maatskappye wat uit die land wil onttrek, sluit Woolworths, Truworths en Tiger Brands in, terwyl MTN gedreig het om sy bedrywighede in die Wes-Afrikaland te sluit indien ‘n buitensporige boete van miljarde rand nie verminder word nie.

Suid-Soedan se rebelleleier in SA?

Suid-Soedan se voormalige rebelleleier en visepresident, Riek Machar, het die land verlaat ná die gewelddadige botsings verlede maand en is nou in ’n “veilige” land in die streek.

In ’n verklaring deur Mabior Garang de Mabior, ’n woordvoerder vir Machar se SPLM-IO party, word nie gespesifiseer in watter land Machar hom bevind nie.

Maar gerugte wil dit hê dat hy in Suid-Afrika is en nie na Ethiopië sal reis nie.

‘n Burgeroorlog het in Desember 2013 in Suid-Soedan uitgebreek toe pres. Salva Kiir sy adjunk, Machar, daarvan beskuldig het dat hy ’n staatsgreep beplan.

Die gevegte het die land langs etniese lyne verdeel en tot op die rand van totale ineenstorting gedryf.

’n Vredesooreenkoms tussen die regering en rebelle byna ’n jaar gelede, kon nie daarin slaag om ’n einde aan die konflik te maak nie.

Die Verenigde Nasies het Woensdag ’n ondersoek gelas na ’n aanval op ’n hotel in Suid-Soedan waar soldate vrouens verkrag en noodlenigingwerkers aangerand het, terwyl VN-vredebewaarders oënskynlik niks gedoen het om dit te stuit nie.

Die Verenigde Nasies (VN) het bevestig dat Machar in die Demokratiese Republiek van die Kongo (DRK) aangekom het, maar wou nie sy ligging onthul nie.

Dit kom ook te midde van berigte dat die leier van die opposisie ná ‘n mislukte sluipmoordaanval deur magte lojaal aan president Salva Kiir saam met sy vrou en ‘n konvooi van sowat 60 gewapende mans moes vlug.

Nigeriese joernalis vas vir staatsgreepplanne

Koerantuitgewers in Nigerië eis dat die land se geheime diens ’n joernalis vrylaat wat daarvan beskuldig word dat hy ’n olie-militant is, het AP berig.

Nigerië is dié land in die wêreld vir oliediefstal.

Agente van die departement van staatsveiligheid sê hulle het die ­uitgewer van die Weekly ­Source-koerant, Jones Abiri, op 21 Julie op klagte van terrorisme, poging tot ontvoering en die feit dat hy glo agter gerugte van ’n militêre staatsgreep gesit het, in hegtenis geneem.

Die Bayelsa-staat se vereniging van koerantuitgewers het Abiri as ’n “­geloofwaardige joernalis” bestempel en ’n beroep op die owerheid gedoen om hom onmiddellik vry te laat.

Die geheime diens beskuldig Abiri daarvan dat hy aan die hoof staan van die Gesamentlike Rewolusionêre Raad, ’n militante groep in Nigerië se olieryke suide. Die organisasie val gereeld oliepypleidings aan.

Dit het meegebring dat olieproduksie in die gebied van 2,2 miljoen vate per dag tot net 1,2 miljoen vate af­geneem het.

Die Weekly Source is ’n koerant wat in Yenagoa, in die Bayelsa-staat, ­gepubliseer word.

Vrese dat konflik in Suid-Soedan kan hervat

‘n Swaar bewapende Ugandese militêre konvooi het Donderdag die grens na Suid-Soedan oorgesteek om die land se burgers wat in Jaba vasgekeer is, na veiligheid te neem, het AFP berig.

Dit kom midde vrees dat die intensiewe gevegte van verlede naweek enige oomblik weer kan uitbreek, ondanks die skietstilstand-ooreenkoms wat steeds van krag is.

Die Verenigde Nasies het gewaarsku oor die gespanne toestand in die land en die moontlikheid van nuwe geweldpleging.

Die Ugandese konvooi van ongeveer 50 vragmotors, wat vergesel word van gepantserde voertuie wat met masjiengewere bewapen is, het die grens by Nimule oorgesteek om ‘n veilige korridor vir vlugtende burgerlikes op die 200 kilometer lange pad tussen Juba en Nimule te open.

“Ons beplan om na Juba te gaan en ongeveer 3 000 Ugandese wat daar gestrand is en die land wil verlaat, na veiligheid te neem,” het Uganda se weermaghoof, brigadier Leopold Kyanda, gesê.

Kyanda sê die sending sal tussen twee en drie dae duur.

Die Ugandese weermag het aan die kant van pres. Salva Kiir geveg nadat die burgeroorlog in Desember 2013 uitgebreek het tussen magte lojaal aan hom en magte wat deur die visepresident Riek Machar gelei is.

Van buite Juba is berigte van geweldpleging in die dorpe Leer in die Eenheidstaat en Wau in die westelike Bahr el Ghazal-staat ontvang. Die weermag en rebellemagte het ook in die omgewing van Malakal in die Bo-Nyl-streek gemobiliseer.

Handelsvlugte is gister uit Juba hervat. Vliegtuie wat aangekom het was leeg en het stampvol vertrek met mense wat desperaat was om die stad te verlaat. Spesiale huurvlugte neem buitelanders sedert Woensdag uit die land.

Amerikaanse soldate na Suid-Soedan

Sowat 40 Amerikaanse spesialemaglede is inderhaas na die VSA se ambassade in Juba, Suid-Soedan, terwyl die land op die rand van nog ‘n burgeroorlog verkeer.

Die troepe sal sekuriteit by die ambassade versterk en help om nie-noodpersoneel te ontruim, sê Samantha Reho, ‘n woordvoerder van VS-Afrika-bevel.

“Verskeie voertuie uitsluitlik vir gebruik in die beskerming van die ambassade sal gestuur word,” het Reho gesê.

Sy wou nie enige ander inligting verskaf oor die betrokke eenheid nie met verwysing na operasionele veiligheid.

Die stilte het intussen Dinsdag die hoofstad neergedaal nadat ’n skietstilstand-verklaring minstens tydelik ’n einde aan vier dae se deurlopende skietgevegte in die stad gemaak het.

Dit is te vroeg om te sê of die skietstilstand gehandhaaf sou word waarvoor pres. Salva Kiir én sy opponent, visepres. Riek Machar, gevra het.

Die kalmte het burgerlikes ten minste die geleentheid gegee om hul huise te verlaat.

Geen gewapende helikopters was in die lug nie en geen tenks in die strate nie. Die geluide van artillerie-vuur was stil en soldate het in hul barakke gebly, het AFP berig.

Die kalmte is deur Juba se inwoners verwelkom wat hulself die afgelope dae binnenshuis skuilgehou het.

Meer as 300 soldate is Vrydag dood toe gevegte die aand in alle erns uitgebreek het. Saterdag, met die herdenking van onafhanklikwording, het die gevegte bedaar, maar Sondag weer opgevlam.

Ondanks die verposing in vyandelikhede, bly die situasie in Juba gespanne.

Suid-Soedan: Oliekonflik woed

Minstens 150 soldate van Suid-Soedan is dood in hernude gevegte tussen die weermag en die voormalige rebelle wat lojaal aan visepresident Riek Machar is.

Hewige gevegte het Maandag in Suid-Soedan se hoofstad, Juba, gewoed ondanks internasionale beroepe tot kalmte nadat dodelike skermutselinge duisende mense op die vlug laat slaan het.

Die jong land se wankelrige vredes­ooreenkoms is opnuut in die gedrang.

Die Verenigde Nasies (VN) het diepe kommer uitgespreek oor die geweldpleging wat tot die dood van honderde mense gelei het en nou dreig om die land opnuut in ’n burgeroorlog te dompel.

Tenks en gewapende helikopters is ontplooi en artillerievuur is in verskeie dele van die hoofstad gehoor.

Inwoners het hulle in hul huise toegesluit en die Amerikaanse ambassade het gewaarsku oor die “hewige gevegte tussen magte van die regering en die opposisie”.

Die VN se veiligheidsraad het Sondag geëis dat pres. Salva Kiir en sy visepresident, Riek Machar, “hul uiterste bes moet doen om hul onderskeie magte te beheer, die gevegte te beëindig en die verspreiding van geweldpleging te voorkom”.

’n Beroep is op hulle gedoen om hulle “opreg tot die volle en onmiddellike implementering van die vredesooreenkoms te verbind, wat ’n permanente skietstilstandsooreenkoms en die herontplooiing van militêre magte uit Juba insluit”.

Soldate lojaal aan Kiir en voormalige rebelle wat Machar steun, het mekaar Sondag met tenks, bewapende helikopters, mortiere en vuurpylaangedrewe granate aangeval.

Die botsings, die eerste tussen die weermag en voormalige rebelle sedert Machar in April na Juba teruggekeer het om as visepresident ingehuldig te word, het Vrydag begin toe 150 soldate in ’n kortstondige, maar bloedige geveg dood is. Die plaaslike media berig dat die dodetal so hoog soos 270 kan wees. Dit is nie duidelik hoeveel mense Sondag, die dag ná die vyfde herdenking van onafhanklikwording, dood is nie.

Juba se lughawe is gesluit en Amerika het opdrag gegee dat alle nie-noodsaaklike Amerikaanse personeel die land moet verlaat.

Suid-Soedan, wat onafhanklikheid in 2011 verkry het, is jongste land ter wêreld. Nogtans het ‘n burgeroorlog in 2013 tussen faksies uitgebreek.

Die skuld vir die verbrokkeling in betrekkinge tussen die twee partye kan byna geheel en al op olie gepak word.

Alhoewel Suid-Soedan 75 persent van Soedan se olie-reserwes ingepalm het na onafhanklikheid en die derde grootste olie-reserwes in sub-Sahara-Afrika bevat, is die meeste pyplyne steeds onder beheer van die noorde.

Volgens Washington, is Amerika is die grootste enkele hulpskenker aan Suid-Soedan.

Die ander land met ‘n groot belangstelling in Suid-Soedan is China, wat ook vredesmagte gestuur as die grootste rolspeler in Soedan se olie-industrie.

Angola kan nie meer buitelandse rekeninge betaal nie

Die Spaanse lugredery Iberia asook Air Namibia is van die rederye wat ernstig deur die valutakrisis in Angola geraak word.

Angola se sentrale bank beskik nie meer oor genoeg buitelandse reserwes om rekeninge te betaal nie.

Iberia sal vlugte tussen Luanda en Madrid van 1 Junie 2016 opskort en die maatskappy sal die inligting versprei aan kliënte en toeroperateurs.

Die Spaanse verklaring lui dat die besluit spruit uit die huidige ekonomiese situasie in Angola, na aanleiding van die daling in oliepryse en die gebrek aan buitelandse valuta.

Die maatskappy het gesê die klein aantal passasiers is ook nie versoenbaar met die vaste koste van die roete nie.

“Ons kliënte sal ‘n terugbetaling ontvang of aan ander maatskappye gestuur word, volgens hul behoeftes,” het die maatskappyverteenwoordiger gesê.

Die waarnemende besturende direkteur van Air Namibia, Mandi Samson, het gesê Angola skuld die nasionale redery miljoene Namibiese dollar omdat Air Namibia weier om die betaling in kwanza te ontvang.

Samson het egter twee weke gelede AirNam se bande met Angola, wat vanaf 1991 bestaan, geprys.

Die Angolese regering het betalings na buitelandse rekenings bevries en kan nie die inkomste wat Air Namibia op die Luanda-roete verdien, oorbetaal nie.

Benewens die redery se penarie, skuld die Banco Nacional de Angola (BAN), die sentrale bank, die Bank of Namibia (BoN) ook meer as N$5 miljard ná die aanvanklike omskakelingsooreenkoms tussen die twee lande se geldeenhede.

In Junie verlede jaar het die ooreenkoms tot ‘n massa-uitvloei van kapitaal uit Angola gelei.

Ingevolge die oorspronklike ooreenkoms sou die BoN elke 30 dae kwanza na die BNA terugstuur waarvoor die Angolese sentrale bank die plaaslike een in Amerikaanse dollar moes vergoed.

Die BNA kon dit egter nie bybring nie en ‘n hersiene betalingskedule van een keer per kwartaal is goedgekeur.

Benewens Angola, sukkel lugrederye ook om hul geld uit olielande soos Nigerië, Soedan en Venezuela te kry, het Iata bekend gemaak. Egipte, wat nie ‘n olieland is nie, het soortgelyke probleme maar weens onlangse vliegrampe.

Angola is sewe maande agterstallig met die uitbetaling en skuld rederye ‘n gesamentlike US$237 miljoen.

Nigerië is wat lande in Afrika betref die grootste sondaar en skuld lugrederye $591 miljoen wat ook reeds sewe maande agterstallig is.

Die regering in Venezuela is 16 maande agter met die oorbetaling van ‘n reuse $3,8 miljard wat rederye op roetes na en van hierdie land verdien het, blyk dit uit inligting wat deur Iata vrygestel is.

“Die rederybedryf is ‘n kompeterende bedryf met baie klein winsmarges. Daarom is die doeltreffende betaling van inkomste wat verdien is, kritiek belangrik. Dit is nie redelik om te verwag rederye moet in lande belê en roetes daarheen bedien indien hulle nie die geld wat hulle daardeur verdien, kan insamel nie,” het Iata se direkteur-generaal en hoof uitvoerende beampte, mnr. Tony Tyler, gesê.

Tyler het gepraat by die Internasionale Lugvervoervereniging (Iata) se jaarvergadering in Dublin, Ierland.

Hy het namens dié regering ‘n dringende beroep op regerings en hulle sentrale banke gedoen om die internasionale ooreenkomste wat hulle verplig om vinnige oorbetalings te doen, te eerbiedig.

Chevron-aanleg in Nigerië aangeval

’n Nigeriese burgerregteleier en inwoner van die Niger-delta, het bevestig dat militante ’n olieaanleg van die Chevron-maatskappy in die gebied aangeval het.

Die militante, bekend as die NDA, het laat Woensdag aangekondig dat hulle die hoofelektrisiteitstoevoerlyn na die Escravos-aanleg opgeblaas het.

Die NDA sê hulle veg vir ’n groter deel van olie-wins, ’n einde aan besoedeling en onafhanklikwording van die suidelike streek, en het oliemaatskappye tot die einde van die maand gegun om aan die gebied te onttrek.

Abuja het in reaksie weermagversterkings na die gebied gestuur.

Die Britse minister van buitelandse sake, Philip Hammond, het vroeër gesê Nigerië se president, Muhammadu Buhari, moet oplossings vir die sleuteloorsake van die konflik vind.

Ruolie-verkope uit die delta, maak 70 persent van die nasionale inkomste van Afrika se grootste ekonomie uit, maar inwoners, van wie baie met die militante simpatiseer, kla reeds vir ’n geruime tyd oor die armoede wat inwoners teister.

Buhari het ’n amnestie-ooreenkoms verleng wat in 2009 met militante gesluit is, maar finansiering vir die amnestieprogram gesny en kontrakte met voormalige militante opgeskort om die pypleidings te beskerm wat in die verlede aangeval is.