Boko Haram – praag.co.za

Nigeriërs steel koshulp vir kinders

Wetgewers in die noordooste van Nigerië ondersoek nuwe aantygings dat amptenare noodsaaklike voedselhulp gesteel het wat bedoel was vir mense wat van Boko Haram-militante gevlug het.

Die aantygings in die Adamawa-staat fokus op amptenare en handelaars wat daarvan beskuldig word dat hulle kos gesteel het wat deur Nigerië se doeane-owerheid geskenk is, het Hassan Barguma, hoof van ‘n komitee vir vlugtelinge in die Adamawa-staat se wetgewende liggaam gesê.

“Om kos te steel van verhongerde kinders, is onaanvaarbaar,” het Barguma gesê.

Boko Haram se sewe jaar lange insurgensie het reeds die lewe van meer as 20 000 mense geëis en 2,6 miljoen in Nigerië en naburige Kameroen, Niger en Tsjad haweloos gelaat.

Wetgewers en amptenare ondersoek reeds berigte dat voedselhulp in die Borno-staat, die geboorteplek van Boko Haram, gesteel is. Die Verenigde Nasies waarsku dat tienduisende kinders weens wanvoeding in die gebied kan sterf. Berigte van die diefstal het protes onder vlugtelinge laat uitbreek wat oor die naweek ‘n hoofweg onderweg na Maiduguri, die grootste stad in die noordooste van die land, geblokkeer het.

Nigerië se doeane-owerheid het in Augustus 11 vragmotors met kos, onder meer rys, kookolie en spaghetti, vir vlugtelinge in Adamawa geskenk. Barguma sê baie van hierdie items het nooit die vlugtelinge bereik nie en is op plaaslike markte verkoop.

Oorgrens-aanvalle deur Boko Haram eis sewe

Sewe soldate van Niger is vermoor en agt ander gewond in twee afsonderlike aanvalle die afgelope week deur Boko Haram Islamiete, het ’n weermagwoordvoerder in Niamey gesê.

Die twee aanvalle het in die suidoostelike Diffa-streek ná aan die grens met Nigerië plaasgevind.

Vyf soldate is in ’n lokval Maandagoggend dood en ses is beseer. In ’n vroeëre aanval is twee soldate dood en nog twee gewond toe hul patrollievoertuig oor ’n selfvervaardigde ploftoestel gery het, lui ’n verklaring van die weermag.

Boko Haram se sewe jaar lange insurgensie het reeds die lewens van meer as 20 000 mense in Nigerië en grensgebiede in naburige Niger, Tsjad en Kameroen geëis en meer as 2,6 miljoen mense haweloos gelaat.

SA maatskappye wil uit Nigerië kom

Die hotel- en ontspanningskonglomeraat Sun International het aangekondig dat hy Nigerië sal verlaat.

Sun International het gesê sy hotel- en casino-kompleks Federal Palace (foto bo) gaan voort in ‘n moeilike ekonomiese omgewing met Nigerië wat ‘n aantal krisisse, insluitend die lae olieprys, Boko Haram en ‘n verswakking naira in die gesig staar.

Die land het ook nog nie herstel van die groot impak wat die Ebola-epidemie op sakebedrywighede gehad het nie.

Benewens al probleme van die land, is daar ‘n aantal kwessies wat spesifiek hul eie bedryf negatief raak, het Sun International gesê.

“Vyf van ons personeellede wat in hegtenis geneem is deur die Ekonomiese en Finansiële Misdade Kommissie vroeër in die jaar nog nie het hul paspoorte terugontvang nie ten spyte van geen formele klagte teen die individue, die maatskappy of Sun International nie.

Ander Suid-Afrikaanse maatskappye wat uit die land wil onttrek, sluit Woolworths, Truworths en Tiger Brands in, terwyl MTN gedreig het om sy bedrywighede in die Wes-Afrikaland te sluit indien ‘n buitensporige boete van miljarde rand nie verminder word nie.

Kerry na Afrika te midde van stygende Moslembedreiging

Met die vredesooreenkoms in Suid-Soedan wat aan die uitrafel is en djihadiste wat voortgaan met aanvalle in Somalië, het die Amerikaanse minister van buitelandse sake, John Kerry, in Nairobi aangekom om met Kenia se pres. Uhuru Kenyatta samesprekings te voer.

Die twee het veiligheid in die streek en terrorisme bespreek voordat Kerry ministers van buitelandse sake van Kenia, Somalië, Suid-Soedan en Uganda vir samesprekings ontmoet het.

Die Amerikaanse vredesending na Oos-Afrika is bekommerd oor die verswakkende toestand in Suid-Soedan en ander lande in die streek.

Die ontmoeting was gefokus op die herstel van die mislukte vredesooreenkoms in Suid-Soedan en verkiesings in Somalië wat voor die deur is.

Suid-Soedan sal intussen ‘n Amerikaanse hulppakket van $138-miljoen ontvang, is voorwaardelik aangekondig.

In ’n verklaring wat voor die besoek deur die Keniaanse presidentskantoor uitgereik is, is verduidelik dat die ontmoeting met Kenyatta op streekveiligheid en stabiliteit sal fokus.

Verkiesings vind volgende maand in Somalië plaas en Burundi beleef sedert April 2015 ’n politieke krisis.

Terrorisme was ook op die agenda, vanweë die bedreiging wat Somalië se Al-Sjabaab-militante vir die streek inhou.

Kerry se vorige besoek aan Kenia in Mei 2015 het die weg gebaan vir ’n besoek van pres. Barack Obama, twee maande later.

Die hoë-profiel Amerikaanse diplomatieke sendings beklemtoon Kenia se belangrikheid as streekvennoot vir Amerika, veral wat sekuriteit betref, en is ook ’n aanduiding dat betrekkinge met Kenia aan die verstewig is.

Dié betrekkinge was vir ’n geruime tyd gespanne terwyl Kenyatta voor die internasionale geregshof vir vermeende misdade teen die mensdom tereggestaan het.

Kerry wil die jaaroue vredesooreenkoms in Suid-Soedan, wat tot dusver nie daarin kon slaag om ’n einde aan die konflik te maak nie, weer laat herleef.

Kerry sal ook na Nigerië reis voordat hy Afrika môre onderweg na Saoedi-Arabië verlaat.

Hy sal samesprekings met President Muhammadu Buhari in Abuja voer. Amerika het sedert Buhari verlede jaar aan bewind gekom het, groter veiligheidsondersteuning aan Nigerië gegee teen die Moslemterreurgroep Boko Haram (foto bo).

Intussen het Libië se regeringsmagte, met die steun van Amerikaanse lugaanvalle, verdere vordering met die herowering van Sirte gemaak, het woordvoerders gesê.

Die magte het die sekuriteitsgebou wat deur die Islamitiese Staat-groep (ISIS) as gevangenis gebruik is, die hof, die Al-Naga-distrik en Dubaistraat herower.

Die nuutste oorwinning is in gevegte Sondag “in die aangesig van desperate weerstand van die djihadiste” behaal, lui ’n verklaring.

ISIS se skerpskutterposisies is in twee Amerikaanse lugaanvalle geneutraliseer en regeringsmagte het, sonder enige verlies in eie geledere, twee motorfopvaltoestelle onskadelik gestel.

Splintergroep van Boko Haram se leier gevang

Die Nigeriese weermag het die leier van die Islamitiese militante groep, Ansaru, ’n splinterfaksie van Boko Haram, in hegtenis geneem en hom daarvan beskuldig dat hy Westerlinge ontvoer en vermoor, het Reuters berig.

In 2012 het die Amerikaanse departement van verdediging Ansaru se leier, Khalid al-Barnawi, geïdentifiseer as een van drie Nigeriese militante wat op die swartlys geplaas is vanweë hul verbintenis met Boko Haram en al-Kaïda se Noord-Afrika vleuel.

’n Verdedigingswoordvoerder, brig.genl. Rabe Abubakar, sê al-Barnawi is Saterdag in Lokoja, die hoofstad van die sentrale deelstaat, Kogi, in hegtenis geneem. “Ons het reusevordering gemaak,” het Abubakar gesê.

Hy het voorts gesê sommige Boko Haram-vegters het hulle aan Nigeriese troepe oorgegee.

Die Nigeriese president, Muhammadu Buhari, het dit ’n prioriteit van sy presidensie gemaak om Islamitiese militante in Afrika se digsbevolkte land en die vasteland se grootste ekonomie uit te dryf.

MTN kry die skuld vir Boko Haram-sterftes

President Jacob Zuma sê die regering sal nie probeer om die geskil tussen die selfoonmaatskappy MTN en die Nigeriese regering in die guns van die Suid-Afrikaners te besleg nie.

Zuma sê dit is ‘n kwessie tussen MTN en Nigerië en hulle sal wag tot die twee partye die kwessie afgehandel het.

Die Nigeriese president, Muhammadu Buhari, het vroeër MTN die skuld gegee vir die dood en ontvoering van Nigeriërs deur die Boko Haram-militante groep.

Die Nigeriese kommunikasie-kommissie het MTN met bykans R80-miljard rand beboet omdat hy nie die reëls vir simkaart-registrasie nagekom het nie.

Buhari het gesê duisende ongeregistreerde simkaarte het in die hande van terreurgroepe beland.

“Tussen 2009 en vandag, is ten minste 10,000 Nigeriërs vermoor deur Boko Haram. Dit was die rede waarom NCC gevra het dat MTN, Glo en die res van hulle hul selfone moet laat registreer. Ongelukkig was MTN baie, baie stadig en het bygedra tot die ongevalle”.

Selfs al het die maatskappy onlangs ‘n betaling van $250 miljoen gemaak om ‘n skikking te fasiliteer, het Nigerië se president volgehou om die maatskappy verantwoordelik te hou.

MTN bied diens aan meer as 200 miljoen mense in Afrika en die Midde-Ooste. Nigerië is na bewering die selfoon-reus se grootste mark.

SA se spesmagte wil ISIS en Boko Haram aanvat

Boko Haram se verklaarde samewerking met die Islamitiese Staat (ISIS) in Irak en Sirië, het vrese aangewakker dat die dodelike insurgensie in die noordooste van Nigerië ’n internasionale dimensie sou aanneem.

Dit was boonop ‘n amptelike verklaring deur die wêreld se dodelikste terroriste-organisasies, berug vir hul blindelinge slagting van tienduisende mense.

Kommer het voorheen geheers oor die potensiële invloei van buitelanders wat gewerf word na lande rondom die Tsjadmeer wat die plaaslike konflik kan laat toeneem, het AFP berig.

Die SANW het nietemin verklaar dat hulle spesiale magte na die streek sal stuur teen Boko Haram.

Boko Haram is egter oënskynlik na ‘n jaar se samewerking aansienlik swakker en in wanorde gedompel ná die militêre teenoffensief.

Hul se leier, Abubakar Shekau, het voorts slegs twee oudio-boodskappe opgeneem sedert hy op 7 Maart trou gesweer het aan ISIS.

Nigerië se weermag het sedertdien sy aanslag teen Boko Haram versterk en duisende mense onder Boko Haram se beheer, bevry. Verlede week het dosyne rebelle glo vanweë hongersnood in die militante se geledere oorgegee.

Ontleders beskou die sogenaamde alliansie eerder as ‘n propaganda-skuif. Boko Haram het ten tyde van die aankondiging gesukkel teen hul streekmagte en ISIS moes territoriale terugslae trotseer.

“Niks het in die Boko Haram-kamp verander sedert die aankondiging nie,” het ’n Nigeriese veiligheidsontleder, Abdullahi Bawa Wase, gesê.

“Geen ISIS-vegters het opgedaag nie en die organisasie kon ook nie daarin slaag om ISIS-wapens en kontant te bekom nie, iets wat baie mense gevrees het die geval sou wees.

“In teendeel, Boko Haram is swakker as voor die aankondiging. Dit blyk uit die drastiese afname in dodelike aanvalle. Selfs die vlaag selfmoordbomaanvalle het afgeneem,” het hy gesê.

Die aankondiging en die daaropvolgende nuwe handelsmerk van Boko Haram as die Islamitiese Staat se Wes-Afrika-provinsie, (ISWAP) het glo verdeeldheid in die Boko Haram-hiërargie veroorsaak.

Sommige veiligheidsraadgewers voorspel dat Boko Haram vanjaar eerder as ’n kriminele streekbedreiging, soortgelyk aan die Lord’s Resistance Army in die Sentraal-Afrikaanse Republiek, sal word.

Die Minister van Verdediging, Mansur Dan Ali, het verklaar dat Suid-Afrika sy spesiale magte sal stuur om die land te help in die stryd teen Boko Haram.

Dan-Ali het het tydens ‘n vergadering met sy Suid-Afrikaanse eweknie, Nobise Mapisa-Nqakula, in Abuja op Maandag, gesê besprekings oor die ontplooiing van die spesmagte het reeds ‘n gevorderde stadium bereik.

Hy het gesê die reëling sal binnekort afgehandel word.

Die minister het gesê die ontwikkeling is ‘n opvolgstap na ‘n Memorandum van Verstandhouding in 2013 tussen die twee lande onderteken is.

“Dit is ‘n baie goeie ding dat Suid-Afrika wat ons noue bondgenoot is, kom help in die ontwikkeling van ons industriële kompleks, wat die verdedigingsindustrie van Nigerië is.

Mapisa-Nqakula het gesê die samewerking tussen die twee lande sal lei tot sterker bande.

Intussen het die hoof van die Suid-Afrikaanse Nasionale Weermag, genl Zakaria Shoke, gesê dat hulle bereid is om saam te werk met die Nigeriese weermag.

In Januarie vandeesjaar het Britse soldate in Nigerië aangekom om die Nigeriese weermag teen die Moslem-insurgente op te lei.

President Jacob Zuma sal vandag en môre in Nigerië wees vir ‘n staatsbesoek.

Zuma en die Nigeriese president, Muhammadu Buhari sal poog om politieke en ekonomiese betrekkinge tussen die lande te verbeter.

Hy sal na verwagting Nigerië se Nasionale Vergadering, sowel as die Suid-Afrika-Nigerië sakeforum toespreek.

Zuma en sy Nigeriese ampsgenoot, Muhamadu Buhari, sal onder meer die Nigeriese boete van bykans R61 miljard aan MTN bespreek.

Nigerië stel generaal aan wat glo massamoord pleeg

Amnestie Internasionaal sê Nigerië het weer ’n generaal-majoor aangestel wat by massamoord betrek is.

Volgens die organisasie onderskryf dit die regering se “monumentale mislukking” om die gebrek aan straf vir oorlogsmisdade uit te wis.

Die organisasie wat in Londen gebaseer is, het verlede jaar gevra dat nege senior bevelvoerders, ingesluit generaal-majoor Ahmadu Mohammed, ondersoek word vir die moontlike kriminele verantwoordelikheid vir oorlogsmisdade wat die sterftes van meer as 8 000 aangehoudenes sedert 2011 behels.

Mohammed was die bevelvoerder toe soldate sowat 640 ongewapende aangehoudenes doodgeskiet het, nadat Boko Haram-ekstremiste Giwa-barakke in die noordoostelike stad Maiduguri aangeval het.

Hy was ook glo betrokke by die mislukte ontsetting van skoolmeisies wat deur Boko Haram ontvoer is.

Ten minste 50 mense is na berig word intussen vermoor in die noord-ooste van Nigerië in aanval deur vermeende Boko Haram militante.

Foto’s van die dorp van Dalori toon uitgebrande geboue en verkoolde vee.

Inwoners het gesê minstens 50 mense is dood, hoewel ‘n Reuters-verslaggewer 65 liggame by ‘n hospitaallykshuis getel het.

Volgens Amerikaanse nuusbronne waaronder AP, het Boko Haram kinders lewend verbrand.

Ooggetuies het gesê die aanvallers het op motorfietse en vragmotors aangekom en was geklee in militêre uniforms, het die Nigeriese media berig.

Boko Haram is ook glo verantwoordelik vir die dodelike bomaanvalle in die naburige Tsjad Sondag.

Minstens drie mense is dood en dosyne gewond toe twee selfmoordbommers twee plekke naby Lake Chad geteiken het, het amptenare gesê.

Boko Haram se Islamitiese opstand het reeds duisende lewens geëis en meer as twee miljoen mense oor die afgelope ses jaar laat vlug.

Onlangse aanvalle fokus op burgerlikes in Nigerië se noord-ooste en oor die grens in die noorde van Kameroen.

Kameroen is deel van ‘n plaaslike koalisie saam met Nigerië, Niger, Tsjad en Benin wat teen die groep se teenwoordigheid veg.

Nigeriese opposisie-korrupsie oopgevlek

Die waarnemende hoof van Nigerië se hoofopposisieparty, is van korrupsie aangekla het AFP berig.

Hy was die man aan die hoof van oudpresident Goodluck Jonathan se mislukte veldtog om as president herverkies te word.

Haliru Mohammed Bello en sy seun, Abba Mohammed Bello, het Dinsdag in ’n federale hof in Abuja verskyn waar hulle op vier klagte van kriminele vertrouensbreuk en geldwassery teregstaan.

Die twee word aangekla vir hul beweerde rol in die herleiding van geld wat bedoel was om wapens vir soldate te koop wat teen Boko Haram veg.

Die saak hou verband met ’n wyer ondersoek na omstrede wapentransaksies onder Jonathan en sy destydse nasionale veiligheidsadviseur, Sambo Dasuki. Verskeie groot politieke rolspelers is reeds in die ondersoek geïmpliseer.

Bello, die minister van verdediging onder Jonathan vanaf 2011 tot 2012 en tans die waarnemende voorsitter van die Peoples Democratic Party (PDP), en sy seun het na bewering 300 miljoen naira (US$1,5 miljoen) van Dasuki se kantoor ontvang.

Albei die mans het onskuldig gepleit en die saak is tot Donderdag uitgestel wanneer hulle aansoek om borgtog kan doen.

Dasuki, wat op soortgelyke klagte teregstaan, ontken aantygings dat hy nagenoeg US$2 miljard in vals transaksies vir vegvliegtuie, helikopters, wapens en ammunisie toegeken het, wat nooit gematerialiseer het nie.

Die 60-jarige voormalige weermagkolonel sê alle kontrakte en betalings is deur Jonathan as staatshoof en opperbevelvoerder van die weermag goedgekeur.

Jonathan is in Maart opgevolg deur pres. Muhammadu Buhari, wat sedertdien met ’n omvattende veldtog teen korrupsie begin het.

Die ondersoek na Dasuki het ook meegebring dat die voormalige minister van finansies onder Jonathan en die voormalige goewerneur van die noordwestelike staat, Sokoto ondervra is.

Die stigter van Nigerië se eerste private radio en televisiestasies, Raymond Dokpesi, is vir bedrog en geldwassery aangekla omdat hy na bewering 2,1 miljard naira van Dasuki ontvang het.-

VSA reik reiswaarskuwing uit na terreur

Die Amerikaanse departement van buitelandse sake het hul burgers aangeraai nie om nie reise te staak nie, maar sê Amerikaners moet waaksaam wees, veral met hoëdigtheidsaamtrekke.

Dié waarskuwing is uitgereik weens die “verhoogde terroriste-dreigemente” van militante groepe in verskeie dele van die wêreld.

Dit volg ná die dodelike terreuraanvalle in Libanon, Frankryk en Mali oor ‘n tydperk van minder as twee weke.

Volgens die departement kan moontlike aanvallers private of regeringsbelange teiken.

‘n Verklaring op die departement se webblad lui: “Inligting suggereer dat die Islamitiese Staat (ISIS), Al-Kaïda, Boko Haram en ander terreurgroepe steeds terreuraanvalle in verskeie streke beplan.

“Owerhede glo die waarskynlikheid van terreuraanvalle sal voortduur namate lede van ISIS van Sirië en Irak terugkeer. Daar is boonop steeds ‘n bedreiging van ongeaffilieerde mense wat aanvalle beplan wat deur groot terreurorganisasies geïnspireer is, maar op ‘n individuele grondslag uitgevoer word.”

‘Bedrog keer dat Boko Haram verslaan word’

Wapens is nie aan Nigeriese soldate voorsien om teen Boko Haram te veg nie en duisende mense het gesterf weens wydverspreide bedrog in die proses van militêre aankope, sê president Muhammadu Buhari.

Buhari het gelas dat almal betrokke by die korrupsie aan die pen moet ry. Dit volg nadat die staatshoof ’n verslag van ’n komitee ontvang het wat dié bedrog moes ondersoek, het AFP berig.

“Die bevindinge wat dusver gemaak is, is uiters kommerwekkend inaggenome dat ons troepe ten tyde van die gebeure teen insurgente in die noordooste geveg het en desperaat militêre platforms, toerusting en ammunisie benodig het,” het Buhari gesê.

Geld is volgens Buhari, ’n afgetrede generaal, gekanaliseer na maatskappye wat nie hul kontrakte kon uitvoer nie. Hy het in Mei aan bewind gekom met die belofte om Islamitiese rebelle te vernietig wat sedert 2009 reeds vir sowat 17 000 sterftes verantwoordelik was.

Nigerië het een van die grootste verdedigingsbegrotings in Afrika.

Die komitee ondersoek bedrog en korrupsie vanaf 2007 tot op hede. Volgens Buhari is talle onwettige en onderduimse transaksies reeds blootgelê.

Van US$5,3 miljard wat aan nasionale veiligheid en die weermag toegestaan was, is baie min glo gebruik vir aankope. Uit ’n totaal van 513 kontrakte het 53 misluk.

Na bewering het die land se voormalige veiligheidsadviseur, mnr. Sambo Dusaki (’n voormalige kolonel), US$2 miljard betaal vir vier Alpha vegvliegtuie, 12 helikopters en bomme en ammunisie wat nooit gelewer is nie.

Hy het glo ook US$132 miljoen en sowat tien miljoen euro laat oorplaas na bankrekeninge in Wes-Afrika, Brittanje en die VSA sonder stawende dokumente.

Dusaki is reeds van geldwassery aangekla, maar ontken alle aantygings teen hom.

Die Nigeriese weermag het intussen ‘n plakkaat uitgereik waarop honderd vermeende jihadiste van Boko Haram uitgebeeld word.

Die groep se leier, Abubakar Shekau vorm die middelpunt van die plakkaat. Dit is die eerste keer dat die weermag soveel foto’s van Boko Haram-lede publiseer.

Die weermag het klaarblyklik die gesigte van propogandamateriaal verkry.

Vyf mense waaronder twee vroulike selfmoordbomaanvallers is dood na twee ontploffings in Kano in die noorde van Nigerië.

Inwoners sê die een bom het binne ‘n besige mark afgegaan en die ander een net buite. Die jongste aanval volg ‘n dag na ‘n ontploffing by ‘n groentemark in die noordoostelike stad van Yola. Boko Haram is glo vir dié aanval verantwoordelik.

Meer as 30 mense is dood in die ontploffing in Yola. Verskeie mense is ook beseer in die ontploffing by ‘n besige mark.

Dit is die derde noodlottige bomaanval in die stad die afgelope jaar. Die jongste ontploffing volg nadat die Nigeriese president, Muhammadu Buhari, die stad die naweek besoek en verklaar het dat die stryd teen die terreurgroep, Boko Haram bykans gewen is.

Boko Haram slaan toe in Tsjad en Kameroen

Dubbele selfmoordbomaanvalle Sondag het die lewe van minstens nege mense in die verre noorde in Kameroen geëis, ’n dag nadat driedubbele ontploffings in Tsjad die dood van 41 mense veroorsaak het.

Boko Haram word vir die naweek se geweldpleging verantwoordelik gehou, het AFP berig.

Albei lande is deel van die streekskoalisie wat teen die militante veg, wat in die afgelope maande hul bloedige aanvalle uit hul tradisionele vesting in die noorde van Nigerië verder buite die land se grense geneem het.

Twee vroue selfmoordbomaanvallers het die aanvalle in die Kameroense nedersetting Kangaleri uitgevoer, het veiligheidswoordvoerders gesê.

Nege mense is dood toe die eerste vrou ’n bom in ’n klein melk- en oliebolrestaurant laat ontplof het. Die tweede bomaanvaller was die enigste slagoffer toe sy haar bom laat ontplof het.

Van die 29 beseerdes is verskeie “baie ernstig” beseer, het ’n plaaslike amptenaar gesê.

Die dodetal in Saterdag se drie bomontploffings in die stad Baga Sola in Tsjad het intussen tot 41 gestyg.

Nog 48 mense is in die aanvalle beseer, het die Tsjadiese regering in ’n verklaring gesê.

Een van die ontploffings het ’n vismark in Baga Sola geteiken en die ander twee ontploffings het in ’n vlugtelingkamp aan die buitewyke van die stad plaasgevind.

Dit was die eerste sodanige aanval op Baga Sola. Die indruk dat dit ’n redelike veilige stad is, het tienduisende Nigeriese vlugtelinge en inwoners van Tsjad wat haweloos gelaat is deur Boko Haram-geweld, na die stad laat stroom om ’n veilige hawe te vind.

Humanitêre- en veiligheidsbronne sê verskeie mense het hulself in die middel van ’n skare mense opgeblaas.

Tsjad se verre noordelike gebied het reeds sedert Julie 15 selfmoordbomaanvalle beleef wat aan Boko Haram toegeskryf word. Meer as 100 mense is in die aanvalle dood.

Minstens 17 000 mense is reeds dood en meer as 2,7 miljoen is haweloos gelaat sedert Boko Haram in 2009 met sy insurgensie begin het.

Die groep, wat ’n alliansie aangekondig het met die Islamitiese Staat wat in Irak en Sirië veg, het die afgelope tyd grondgebied verloor nadat met ’n multinasionale aanslag begin is, maar veg nou met guerrilla-styl aanvalle en bomaanvalle terug.

Die Nigeriese weermag het Sondag Boko Haram-vegters aangemoedig om oor te gee.

Die weermag sê meer as 200 lede van die militante groep het hulle op 25 September in die noordoostelike dorp Banki oorgegee. Die dorp is as afspringplek vir aanvalle teen Kameroen gebruik.

Nigeriese weermag ontken nuwe Boko Haram-aanval

Die Nigeriese weermag het ontken dat jihadiste ‘n hernude aanval op ‘n stad in die land geloods het. Hulle sê die ontploffings was weermagoefeninge.

Veelvuldige ontploffings is Sondag aan die buitewyke van Maiduguri gehoor, het plaaslike inwoners gesê.

Dié stad is in die noordooste van Nigerië geleë en word herhaaldelik deur Boko Haram Islamiete aangeval.

Inwoners het gesê harde ontploffings is in die gebiede van Kayamla en Dalori gehoor. Dit volg knap nadat Maiduguri deur insurgente aangeval is en 10 mense se lewe geëis en nóg meer beseer is.

Die konflik het meer as 1260 lewens in Nigerië alleen geëis sedert president Muhammadu Buhari op 29 Mei ingehuldig is, volgens ‘n AFP-telling.

Ten minste 17.000 mense is dood en meer as 2,5 miljoen is dakloos gelaat sedert die Boko Haram-opstand begin het in 2009.

Nigerië gaan gebuk onder vlaag van bomaanvalle

Nigerië se nasionale noodbestuursagentskap het Maandag bekendgemaak dat minstens 44 mense dood en 47 beseer is toe twee bomme by onderskeidelik ‘n inkopiesentrum en gewilde moskee in die stad, Jos ontplof het.

Niemand het onmiddellik aanspreeklikheid vir die voorvalle aanvaar nie, maar die godsdiens-verdeelde stad, Jos, is voorheen ook deur Islamitiese militante geteiken, het AFP berig.

Die Plateau-staat, waarvan Jos die hoofstad is, lê op die skeidslyn van Nigerië se hoofsaaklik Christelike suide en Moslem noorde, en het die afgelope dekade golwe van sektariese geweld ervaar wat duisende menselewens geëis het.

Boko Haram het sy aanvalle in die noorde van Nigerië sedert die inhuldiging van pres. Muhammadu Buhari op 29 Mei verskerp met verskeie aanvalle, ontploffings en selfmoordbomaanvalle wat uitgevoer is.

Met die jongste sterftes staan die dodetal nou reeds op meer as 500 mense.

Sondag het ‘n selfmoordbomaanvaller haar binne ‘n kerk in die stad, Potiskum, in die Yobe-staat in die noordooste van Nigerië opgeblaas en vyf kerkgangers is in die aanval dood.

Verlede week het Islamitiese vegters ‘n aantal nedersettings in die omgewing van die Tsjad-meer aangeval en meer as 150 vermoor wat in moskees met gebede besig was.

‘n Jong vrou het haarself Woensdagnag naby ‘n moskee in Kano in Nigerië opgeblaas.

Die polisie sê haar teiken was vermoedelik die Umar al-Khattab-moskee. Niemand anders is dood of beseer nie.

Die militante groep Boko Haram het die afgelope ruk ‘n vlaag aanvalle in die gebied uitgevoer met minstens 250 mense wat omgekom het.