praag.co.za

Tag: lagos

  • Onluste in Nigerië — weermag dalk ontplooi

    Onluste in Nigerië — weermag dalk ontplooi

    Die goewerneur het Donderdag gesê die Nigeriese weermag het aangebied om in die staat Lagos te ontplooi indien nodig om belangrike sake- en regeringspersele te beskerm.

    Onrus het dwarsdeur die staat uitgebreek, wat onder ‘n 24 uur-aandklokreël verkeer. Die onluste is veroorsaak deur betogings en skietery op burgerlikes deur veiligheidsmagte Dinsdagaand.

    Goewerneur Babjide Sanwo-Olu het in ‘n onderhoud op die plaaslike stasie Arise TV gesê dat die hoof van die weermag Woensdag omstreeks 12:00 gebel het “om te sê dat as ek nodig het dat die weermag moet uitkom, sal ons hulle ontplooi.”

    Hy het gesê dat die belangrikste bekommernis die veiligheid van belangrike sake- en regeringsinstellings, soos Lagos se hawens, is.

    ‘Ons het eintlik net ‘n gesprek oor veiligheidsondersteuning,’ het hy gesê.

    Sanwo-Olu het nie gesê of hy die aanbod sou aanvaar nie, maar het leiers versoek om jongmense, insluitend betogers, van die strate af te hou.

    Brande het Woensdag dwarsdeur Lagos, die handelshoofstad van die land, gewoed terwyl rondlopende groepe jong mans, asook sommige betogers wat nog op straat was, en gewapende polisie in sommige buurte gebots het.

    Die weermag het ontken dat soldate op die plek van die skietery by die Lekki-tolhek in Lagos was, waar mense in weerwil van die aandklokreël bymekaargekom het. Vier getuies het aan Reuters gesê soldate het daar koeëls afgevuur en minstens twee mense is geskiet. Die menseregtegroep Amnesty International het gesê die Nigeriese weermag en polisie het Dinsdag minstens 12 vreedsame betogers op twee plekke in Lagos – Lekki en Alausa – doodgemaak.

    Sanwo-Olu het gesê dat hy nie soldate na die tolhek gestuur het nie. Die Nigeriese president Muhammadu Buhari, het Woensdag in ‘n verklaring ‘n beroep op kalmte gedoen het, maar nie direk na die voorval verwys nie.

    Buhari het gesê dat kringtelevisiekameras op die Lekki Bridge, wat volgens sosiale media voor die voorval verwyder is, daar was en ten tyde van die skietery gewerk het en deel sou uitmaak van die staat se ondersoek na die voorval.

    Hy het bygevoeg dat hy die beeldmateriaal “absoluut” openbaar sou maak.

  • Dak van kerk stort ineen in Nigerië

    Dak van kerk stort ineen in Nigerië

    Die dak van ‘n volgepakte kerk in die suide van Nigerië het Saterdag in duie gestort.

    Minstens 60 mense is dood, het ooggetuies en amptenare aan AP gesê.

    Die “Reigners Bible Church International” in Uyo, die hoofstad van die Akwa Ibom-staat, was nog onder konstruksie en werkers het gejaag om dit betyds klaar te maak vir Saterdag se seremonie om die kerk se stigter, Akan Weeks, as biskop in te huldig, het lede van die gemeente gesê.

    Honderde mense, onder wie die goewerneur­ van die staat, Udom Emmanuel,­ was in die kerk toe die metaal­dwarsbalke op die aanbidders neergestort en die sinkplaatdak ingeval het. Emmanuel en Weeks, wat predik dat God sy aanhangers­ ryk sal maak, het ongedeerd ontsnap.

    Die oorskot van 60 slagoffers is reeds uit die puin gehaal, maar die dodetal kan styg namate ‘n hyskraan meer rommel verwyder.

    ‘n Woordvoerder van die goewerneur, Ekerete Udoh, sê ‘n ondersoek is gelas om vas te stel of met die boustandaarde laat slaplê is. Geboue stort gereeld in Nigerië ineen as gevolg van endemiese korrupsie asook kontrakteurs wat onderstandaard-­boumateriaal gebruik en inspekteurs omkoop om swak werk of ‘n afwesigheid van boupermitte te ignoreer.

    In 2014 is 116 mense dood toe ‘n multiverdieping-­gastehuis van ‘n kerk in Lagos, Nigerië se kommersiële hoofstad, ineengestort het. Die meeste slagoffers was Suid-Afrikaanse volgelinge van die kerk se invloedryke stigter, T.B. Joshua.

    Twee strukturele ingenieurs, Joshua en trustees van die kerk is van strafregtelike nalatigheid en onopsetlike manslag aangekla nadat bevind is dat strukturele probleme, wat deur die ontwerp en foute met die bouproses meegebring is, daartoe gelei het dat die gebou ineengestort het.

    Lagos se staatsaanklaers se pogings om hulle voor die hof te bring, het telkens misluk vanweë vele regsuitdagings wat die verhoor steeds vertraag.

  • Nog ‘n gebou stort ineen in Nigerië

    Nog ‘n gebou stort ineen in Nigerië

    Nooddienswerkers in Lagos in Nigerië soek steeds na moontlike oorlewendes onder die puin van ‘n vyf-verdiepinggebou wat ingetuimel het.

    Die dodetal staan tans op minstens 18, maar vrese bestaan dat dit verder sal styg, het RSG berig.

    Nooddienswerkers sê hulle werk onverpoosd omdat stemme onder die puin steeds opklink. Elf mense is vroeër gered.

    Die gebou het vermoedelik weens sanderige grond ineengestort. Die erf was eers ‘n rivier wat onlangs met sand opgevul is.

    In September 2014 is 116 mense, waaronder 81 Suid-Afrikaners dood toe ‘n gastehuis by die kerk van die prediker, TB Joshua ineengestort het.

  • Nigeriese opposisie-korrupsie oopgevlek

    Die waarnemende hoof van Nigerië se hoofopposisieparty, is van korrupsie aangekla het AFP berig.

    Hy was die man aan die hoof van oudpresident Goodluck Jonathan se mislukte veldtog om as president herverkies te word.

    Haliru Mohammed Bello en sy seun, Abba Mohammed Bello, het Dinsdag in ’n federale hof in Abuja verskyn waar hulle op vier klagte van kriminele vertrouensbreuk en geld­wassery ­teregstaan.

    Die twee word aangekla vir hul beweerde rol in die herleiding van geld wat bedoel was om wapens vir soldate te koop wat teen Boko Haram veg.

    Die saak hou verband met ’n wyer ondersoek na omstrede wapentransaksies onder Jonathan en sy destydse nasionale veiligheidsadviseur, Sambo Dasuki. Verskeie groot politieke rolspelers is reeds in die ondersoek geïmpliseer.

    Bello, die minister van verdediging onder Jonathan vanaf 2011 tot 2012 en tans die waarnemende voorsitter van die Peoples Democratic Party (PDP), en sy seun het na bewering 300 miljoen naira (US$1,5 miljoen) van Dasuki se kantoor ontvang.

    Albei die mans het on­skuldig gepleit en die saak is tot Donderdag uitgestel wanneer hulle aansoek om borgtog kan doen.

    Dasuki, wat op soortgelyke klagte teregstaan, ontken aantygings dat hy nagenoeg US$2 miljard in vals transaksies vir vegvliegtuie, helikopters, wapens en ammunisie toegeken het, wat nooit gematerialiseer het nie.

    Die 60-jarige voormalige weermagkolonel sê alle kontrakte en betalings is deur Jonathan as staatshoof en opperbevelvoerder van die weermag goedgekeur.

    Jonathan is in Maart opgevolg deur pres. Muhammadu Buhari, wat sedertdien met ’n omvattende veldtog teen korrupsie begin het.

    Die ondersoek na Dasuki het ook meegebring dat die voormalige minister van finansies onder Jonathan en die voormalige goewerneur van die noordwestelike staat, Sokoto ondervra is.

    Die stigter van Nigerië se eerste private radio en televisiestasies, Raymond Dokpesi, is vir bedrog en geldwassery aangekla omdat hy na bewering 2,1 miljard naira van Dasuki ontvang het.-

  • Oorskot van sommige kerkslagoffers land in SA

    Gedenkdienste vir die Lagoskerkslagoffers sal oral in die land gehou word.  Die oorskot sal eers na verskillende provinsiale lykshuise geneem word voordat die slagoffers privaat begrawe word.

    President Jacob Zuma het vanuit Brisbane in Australië waar hy die G20-beraad bywoon, gesê die ramp het Suid-Afrika verenig.

    ‘n Diens sal ook Mpumalanga gehou word nadat die liggame amptelik deur die premier van Mpumalanga, David Mabuza in ontvangs geneem is.

    Drie-en-twintig inwoners van die provinsie het in die ramp in Lagos omgekom. Vyf van dié liggame is egter nog onder die 11 liggame wat geïdentifiseer moet word.

    Al 18 liggame is gister na die Themba Hospitaal naby Witrivier geneem vanwaar dit vandag na die gedenkdiens in Mbombela vervoer sal word.

    Die vliegtuig met 74 liggame het Sondag in die land aangekom en ‘n gedenkdiens is daarna op die Waterkloof Lugmagbasis in Pretoria vir die slagoffers en hul families gehou.

    Die oorskot is glo by die lughawe behandel teen die oordrag van ebola ten spyte daarvan dat Nigerië as “ebola-vry” deur die Wêreldgesondheidsorganisasie (WGO) verklaar is.

    Dié pandemie in Wes-Afrika het in Nigerië aangeland deur die toedoen van ‘n Liberiese diplomaat in Julie.

    ‘n Werknemer van die departement van gesondheid is intussen glo dood aan malaria.

    Pieter Fourie was deel van die mediese ondersteuningspan in Nigerië, het die minister in die Presidensie Jeff Radebe, vroeër verklaar.

    Radebe het gesê Pieter Fourie, wat ‘n lid van die mediese span gestuur na Lagos vir die repatriasie van die kerkgebou ineenstorting slagoffers, gesterf het op Vrydag.

    Adjunkpresident Cyril Ramaphosa het die seremonie by Waterkloof-lugmagbasis gelei.

    Paramedici moes van die gesinslede bystaan toe hulle histeries begin weeklaag het terwyl Cassius Lubisi, direkteur-generaal in die presidensie, die name van die oorledenes voorgelees het.

    Die aankondiging is laat Saterdagaand gemaak dat slegs 74 van die 85 liggame van die slagoffers na Suid-Afrika teruggebring sal word, glo weens DNS-toetse wat nog steeds deur die owerhede in Nigerië gedoen moet word.

    Die gesinne wag nou al ongeveer twee maande vir die 81 Suid-Afrikaners, waaronder drie Zimbabwiërs en een man van Kongo wat met Suid-Afrikaanse paspoorte gereis het.

    Altesaam 116 mense is op 12 September dood toe ʼn gastehuis in Lagos ineengestort het.

    Altesaam 26 beseerde Suid-Afrikaners het ʼn maand gelede teruggekom, waarvan 20 reeds uit die hospitaal ontslaan en met hul gesinne herenig is.

  • Oorskot van kerkrampslagoffers uit Nigerië verwag

    Die oorskot van 85 persone van Suid-Afrika wat in Nigerië gesterf het toe ‘n gebou by TB Joshua se Synagogue Church of All Nations ineengestort het, sal na verwagting hierdie naweek huis toe gebring word.

    Die minister in die Presidensie, Jeff Readebe sê lede van die weermag, polisie en die department van gesondheid is in Nigierië om bystand te verleen.

    Radebe is in Nigerië om die proses te probeer bespoedig, twee maande nadat die ramp plaasgevind het weens ontevredenheid wat opgelaai het onder oorlewendes en naasbestaandes oor die gesloer.

    Hy sê die liggame van die 81 Suid-Afrikaners kan reeds teen Vrydag of Saterdag in Suid-Afrika wees.

    Radebe sê president Goodluck Jonathan van Nigerië het hom daartoe verbind om te verseker dat al die liggame so gou as moontlik teruggebring word.

    “As alles goed verloop, sal dit hierdie naweek gebeur,” het Jeff Radebe, minister in die presidensie, Dinsdagaand tydens ʼn perskonferensie in Lagos gesê.

    Die gastehuis het op 12 September ineengestort. Altesaam 116 mense is oorlede, waarvan 81 Suid-Afrikaners, asook drie Zimbabwiërs en een persoon van die DRK wat Suid-Afrikaanse paspoorte gebruik het.

  • Nigerië sloer met kerkrampslagoffers se oorskot

    Die Sinagogekerk van Alle Nasies het belowe dat die repatriasie van die liggame van Suid-Afrikaners wat verlede maand dood is toe ‘n gastehuis in Lagos ineengestort het, binnekort sal wees.

    ‘n Woordvoerder van die kerk, Bally Chuene, sê hulle was in verbinding met die Suid-Afrikaanse en Nigeriese regerings en Nigerië is in kennis gestel van die dringendheid van die kwessie.

    Chuene het gesê die oorskot van die slagoffers sal eersdaags na Suid-Afrika teruggestuur word, maar hy het geen datum gegee nie.

    Hy het gesê die regerings sal die datums aankondig. Die liggame van die slagoffers word nie in ‘n verkoelde lykshuis gehou nie.

    Meer as 80 Suid-Afrikaners is in die tragedie dood, maar eindelose vertragings met die identifisering van die liggame verhoed dat die repatriasie afgehandel word.

    Twee afsonderlike prosesse vir die uitkenning van slagoffers word deur Suid-Afrikaanse en Nigeriese amptenare bestuur.

    Suid-Afrikaanse amptenare is egter nie bereid om hulle tot ‘n datum vir die terugbring van die liggame te verbind nie.

    Die Suid-Afrikaanse Hoëkommissaris in Nigerië, Lulu Mnguni, het belowe dat dit binnekort sal wees.

    Die Lugmag sal die oorskot glo in Lagos gaan haal en terugbring na Suid-Afrika.

    Families van die slagoffers het ‘n beroep op die Suid-Afrikaanse en Nigeriese owerhede gedoen om die repatriasie van die liggame te bespoedig, aangesien hulle reeds begin het om vir die begrafnisse voor te berei.

    Die vertraging het die begrafniskostes laat styg wat tot ontvredenheid onder familielede gelei het.

    Nigerië, sowel as die Suid-Afrikaanse regering het gesê hulle hoop dat dit in die nabye toekoms sal plaasvind.

  • Aantal slagoffers van kerk-ramp in Nigerië onbekend

    Die Minister van Internasionale Betrekkinge en Samewerking, Maite Nkoana-Mashabane sê `n rampbestuurspan het gisteraand na Nigerië vertrek om te bepaal hoeveel Suid-Afrikaners dood is toe ‘n kerkgebou in Lagos ineengestort het.

    Nigeriese amptenare sê 70 liggame is in die puin van die gebou gevind. President Jacob Zuma het vroeër in `n verklaring gesê dat 67 van sy landgenote in die ongeluk dood is.

    `n Woordvoerder van Nigerië se nooddiens-agentskap, Ibrahim Farinloye, sê Zuma is nie in Nigerië nie en dit is te vroeg om te bespiegel waar die slagoffers vandaan gekom het, het RSG berig.

    Die gebou het inmekaar gestort terwyl werk aan die gang was om nog verdiepings by die gastehuis by die prediker, T.B. Joshua se kerk te voeg.

  • Dodetal in Nigeriese kerkramp vermoedelik hoër

    President Jacob Zuma het vroeër die sterftes bevestig van die 67 Suid-Afrikaners wat dood is in die ineenstorting van ‘n kerkgebou in Lagos, Nigerië, en sy meegevoel betuig met die gesinne.

    Minstens vier Suid-Afrikaanse toergroepe het pastoor TB Joshua se Kerk besoek. Die President het steun beloof aan diegene wat geraak word en sê hulp sal verleen word met die uitkenning en herwinning van liggame.

    Daar word egter vermoed dat die dodetal veel hoër is as die amptelike syfer omdat geen joernaliste naby die ramptoneel toegelaat word nie.

    Die kerk gebruik glo sy eie reddingswerkers en die gebied is vir die publiek afgesper.

    TB Joshua se bewerings van ‘n vreemde vliegtuig wat kort voor die ineenstorting van die gebou vier keer laag oor die gebou gevlieg is glo volgens veiligheidskenners ‘n foefie om die blaam vir die tragedie op Islamitiese Boko Haram te plaas.

    Die land gaan reeds dekades lank gebuk onder godsdiensgeweld wat vir politieke doelwitte aangewend word.

    Die “Profeet” beskik oor aansienlike politieke invloed in Afrika met presidente en premiers wat sy raad en aanbevelings as navolgingswaardig beskou.

    Geboue wat ineenstort is ‘n alledaagse verskynsel in Nigerië. Die oorspronklike gastehuis, wat uit vier verdiepings bestaan het, het onlangs nog twee verdiepings bygekry, maar vermoedelik was die onderste struktuur nie sterk genoeg daarvoor nie.

    Bouregulasies wat sogenaamd “nagekom word” in Nigerië se korrupsienes behels ‘n sertifikaat waarop staan “Hierdie gebou is veilig”. Dit word glo in die meeste gevalle bloot gekoop.

    Die “heldersiende profeet” kan blykbaar ongelukkig nog nie betonsterkte verbeter nie. Joshua het onlangs beweer dat hy selfs slagoffers wat met die Ebola-virus besmet is, met soutwater kan genees.

    “Moeilike tye kan my toets, kan hulle my nie vernietig nie,” het Joshua Dinsdag getwiet en op Facebook het hy 2 Kronieke 12:5-8 aangehaal: “God het die vyand toegelaat om Israel te oorwin sodat hulle kon besef hoe om God te dien verskil van hoe om die duiwel te dien. As dit nie vir ons moeilike tye was nie, sou ons nie die aangesig van God gesoek het nie. Ek bedoel, as dit nie vir ons moeilike tye was nie, sou die mens uit sy bose natuur nie die aangesig van God gesoek het nie. Dit beteken God gebruik soms moeilike tye om ons na Homself te trek sodat ons ons regte posisie en besitting in Hom kan inneem.”

    Reddingswerkers kla dat “Die Sinagoge”, soos die kerk bekendstaan, hulle werk bemoeilik deur geen samewerking te gee nie.

    Ten minste vyf Suid-Afrikaanse kerk toergroepe was by Die Sinagoge ten tye van die ineenstorting, volgens Suid-Afrikaanse amptenare.

  • ‘Profeet’ se gastehuis stort ineen

    Amptenare van die Suid-Afrikaanse ambassade in Lagos in Nigerië fynkam hospitale in die hoofstad op soek na Suid-Afrikaners.

    Hulle kan moontlik slagoffers wees van ‘n gastehuis wat by ‘n kerk, die Synagogue Church of All Nations, SCOAN ineengestort het. Die dodetal staan op 41.

    Die gastehuis was glo besig om aanbouings te doen om nog verdiepings by die gebou te voeg. Meer as 130 beseerdes is reeds lewend uit die puin gered.

    Die gebou huisves meestal buitelanders wat vanoor reg die wêreld kom om die omstrede pastoor en politieke prediker, T.B. Joshua te sien. Dit is onduidelik wat tot die ongeluk gelei het.

    Die “Profeet” soos Joshua homself noem, sê ‘n klein vliegtuig het vier keer bo die gebou gedraai wat dalk ‘n aanduiding mag wees dat iemand hom wou dood hê, want vyf minute later het die struktuur meegegee sê hy.

    Hy het omstanders aangemoedig om te getuig.

    Die Departement van Internasionale Betrekkinge het bevestig dat die Suid-Afrikaanse Hoëkommissariaat in Nigerië in samewerking met die owerheid in Abuja probeer vasstel of daar enige Suid-Afrikaners beseer is in die ineenstorting.

    EFF-leier, Julius Malema het Joshua, Nigerië se voorste charismatiese geneser en vyfde rykste pastoor in die land, ook vroeër besoek.

    Winnie Madikizela-Mandela het in ‘n onderhoud in 2011 op Josua se televisiekanaal, Emmanuel TV, ná haar besoek aan SCOAN sy kerk geprys.

    Ander besoekers sluit Zimbabwe se voormalige eerste minister Morgan Tsvangirai, Malawi se president Joyce Banda, koning Goodwill Zwelithini, en rugbyspeler Jaco van der Westhuizen in.

    Nigeriese owerhede het bewerings verwerp dat die noodlottige ineenstorting van ‘n gastehuis in Lagos verbind kan word met verdagte vliegtuie.

    Joshua, het intussen beeldmateriaal van die oomblikke voor die ineenstorting op sy TV-netwerk vertoon. Die polisie en reddingswerkers in die land sê die vliegtuie op die beeldmateriaal is duidelik daar omdat die gastehuis naby die lughawe geleë is.

  • Kaapse vrou vir ebola getoets

    ‘n Kaapse vrou word tans in Lagos vir ebola getoets nadat sy glo simptome van die siekte getoon het, het die Nigeriese gesondheidsowerhede Donderdag gesê.

    Die vrou, wie se naam nie bekend gemaak is nie, is van Marokko via Lagos op pad huis toe en het in Guinee en Sierra Leone gewerk. Sy het op ’n gesondheidsvraelys wat sy op die Lagos-lughawe ingevul het, aangedui sy ly tans aan diarree en braking wat albei simptome van ebola is.

    Sy is na die Ebola-sentrum in Lagos geneem vir toetse om te bepaal of sy wel die virus het. Dit sal ’n paar dae neem om die uitslag te bepaal.

    “Sy was sedert April in Guinee en Sierra Leone . . . en sy het simptome,” het dr. Morenike Alex-Okoh, direkteur van gesondheid by die lughawe, gesê.

    Sowat 2 300 mense is reeds aan die siekte dood. Die meeste gevalle kom voor in Liberië, Sierra Leone en Guinee, maar siek reisigers het die virus laat versprei na Nigerië en Senegal.

    “Nigerië kan nie bekostig om nog ’n ‘ingevoerde’ Ebola-geval te hê nie,” het dr. Aileen Marty, ’n professor van die Florida International University College of Medicine, gesê.

    Sy help die Nigeriese owerhede om mense wat die land binnekom vir die virus te ondersoek. Sy het gesê die Suid-Afrikaanse vrou se simptome is erg en sy het die gevaargebiede besoek.

    Die simptome kan ook weens cholera of malaria wees.

  • Redakteur se moordenaars vas

    Drie verdagtes is in Nigerië in hegtenis geneem in verband met die moord op ‘n redakteur van die Guardian-koerant.

    “Die drie verdagtes is Maandag gearresteer vir die moord op Bayo Ohu,” het Frank Mba, ‘n polisiewoordvoerder in Lagos gesê.

    Hy het gesê die verdagtes het erken dat hulle by die moord op 20 September betrokke was. Ohu se skootrekenaar en selfoon wat op die dag gesteel was, is in hul besit gevind.

    Ohu, ‘n 45-jarige assistant-nuusredakteur, was deur gewapende mans in die noordelike gebied van Egbeda geskiet, terwyl hy gereed gemaak het om ‘n kerkdiens by te woon. Die joernalis is verskeie kere geskiet nadat hy sy voordeur oopgemaak het.

    Godwin Agbroko en Abayomi Ogundeji, twee senior joernaliste wat by ThisDay blad werk, is in 2006 en 2008 in soortgelyke voorvalle geskiet.

    игр дла девочоктопкарго развод