buitelanders – Bladsy 2

Zuma voer hoëvlaksamesprekings oor oop grense

Hoëvlaksamesprekings oor Suid-Afrika se migrasiebeleid sal Woensdag in Pretoria gevoer word weens druk op die land om oop grense te bevorder.

Suid-Afrika verduur kritiek uit veral ander Afrikalande weens xenofobiese geweld nadat ‘n mesaanval op ‘n Mosambiekse burger, Emmanuel Sithole, wêreldkundig geraak het.

President Jacob Zuma sal vandag en môre met sakeleiers, arbeid en gemeenskapsorganisasies vergader.

Dit volg ‘n dag nadat die weermag in Alexandra, noord van Johannesburg ontplooi is om die polisie te ondersteun.

Voortslepende, lae-intensiteit geweld teen buitelanders het drie weke gelede in die Durban-omgewing verhewig en na Gauteng oorgespoel.

Die Suid-Afrikaanse Hoë Kommissaris in Ghana, Lulama Xingawa, sê sy het dreigemente van vier mense van Ghana ontvang dat die Kommissariaat in Accra aangeval gaan word uit vergelding.

Sy het ontken dat Ghanese in die jongste geweld omgekom het en gesê die Suid-Afrikaanse minister van polisie het bevestig dat geen burgers van Ghana in Suid-Afrika geteiken word nie.

‘n Ghanese burger is onlangs in Durban dood gevind, maar volgens die polisie was dit aan misdaad te wyte.

Xingwana sê veiligheid by die gebou is intussen opgeskerp.

Suid-Afrika moes egter sy konsulaat in Lagos in Nigerië sluit weens betogings oor die xenofobiese voorvalle.

Die Suid-Afrikaanse konsul-generaal in Nigerië, Sam Monaisa, sê Nigeriërs gebruik sosiale media om ‘n reeds-gespanne situasie in Suid-Afrika uit verband te ruk.

Hy het Suid-Afrikaners in dié land gewaarsku om besonder waaksaam te wees en nie onnodig die aandag op hulself te vestig nie.

Protesoptredes is gehou by die konsulaat en die Suid-Afrikaanse Hoë Kommissariaat in Abuja. Die konsulaat sal vir twee dae gesluit wees.

Wat het koning Goodwill presies gesê?

Daar is die afgelope paar dae herhaaldelik na Koning Goodwill Zwelithini se onlangse kommentaar verwys wat sou gelei het tot gewelddadige aanvalle tussen plaaslike inwoners en buitelandse burgers in KwaZulu-Natal.

Sedert die toespraak, het die koning se woordvoerders ontken dat hy inwoners teen buitelanders aangehits het en gesê hy het in werklikheid net verwys na ongedokumenteerde buitelanders.

Uit ‘n vertaling van wat die koning presies gesê het toe hy gepraat het in Pongola verlede maand, blyk dit dat die koning ook sy onderdane berispe het.

Toepaslike dele van die toespraak is vertaal met die hulp van Zoeloe-akademici. Die spreekwoorde is direk vertaal.

Die koning klim onder diegene in wat hul nalatenskap van konings Dinizoeloe en Cetshwayo verwaarloos met hul verworwe vryheid uit luiheid en kriminaliteit.

“In 2015 praat ons van Suid-Afrikaners wat nie wil luister nie. Hulle wil nie werk nie, wat diewe is, kinders verkrag en by huise inbreek, lui mense wat nie grond wil bewerk nie. Daar is mense van ander lande wat na hulle kyk en sal sê ‘kom ons gaan eet die erfenis van daardie dommes’.

“As julle nou buite gaan kyk soos ek praat, sal julle sien hoe lyk hulle winkels. En al die soort goed wat buite hang, onnet en deurmekaar. Hulle het chaos na ons strate gebring, die buitelanders, dis vieslik vuil, jy kan nie eers sien wat binne is nie.

“Ek weet die politici hou nie daarvan om oor hierdie goed te praat nie, want die slegte mense word stemgeregtiges na vyf jaar. Die leiers moet my vergewe, maar in sulke omstandighede moet ek uitpraat.

“As iemand wat nie vyf jaar hoef te wag nie, [luide gelag] as Zoeloekoning wat groot respek in oral in die wêreld afdwing vir die bevryding van Afrika, sal ek nie stilbly as mense wat geen reg het, met hierdie land speel nie. Dit is tyd vir ons om ons sê te sê. Ek vra die regering om ons te help.

“Ons moet ons luise vang. Ons moet die miere van ons koppe haal en hulle in die son laat. Die buitelanders moet hulle tasse pak en gaan. [luide toejuiging]”

Gigaba loof buitelanders se bydrae tot SA

Buitelandse burgers moet nie aangeval word nie, omdat die meeste ‘n positiewe bydrae tot die land lewer, het die minister van Binnelandse Sake Malusi Gigaba Donderdag in die Parlement gesê

“Om mee te begin wil ons graag uitdruklik verklaar dat die meeste buitelandse burgers ‘n baie positiewe bydrae tot die samelewing maak,” het hy gesê.

Hy het xenofobiese aanvalle in Durban en ander dele van die land veroordeel tesame met president Jacob Zuma en al die opposisie partye.

Gigaba het gesê baie buitelanders in hospitale en skole sorg vir Suid-Afrikaners.

Hulle het ook die nasionale fiskus vergoot, alhoewel hulle hul geld uit Suid-Afrika stuur na hul eie lande.

Die Durbanse middestad was Donderdag ‘n chaotiese toneel van skokgranate, rubberkoeëls, traangas, en ‘n groot polisieteenwoordigheid toe ‘n vredesoptog wat gehou is om xenofobiese aanvalle te beëindig, in verdere geweld en plundery ontaard het.

‘n Burger van Burundi Moses Sefumama, moes gered word van ‘n skare deur die metropolisie in Durban, het News24 berig. Inwoners kla dat buitelanders dwelms aan kinders smous.

Die polisie moes mensekettings in die strate vorm met hul bevelvoerder wat skree “hou die lyn, hou die lyn” terwyl tierende swart skares probeer deurbreek.

Pres. Zuma het in sy toespraak in die parlement gesê die land sal ferm bly staan teen “rassisme, xenofobie, homofobie en seksisme.”

Motors aan die brand gesteek in Johannesburg

‘n Aantal motors in Jeppestown, Johannesburg is verlede nag aan die brand gesteek in die voortslepende geweld teen buitelanders.

‘n Groot polisiesteenwoordigheid is in die gebied ontplooi om geweld te probeer bekamp. Die motors het vermoedelik aan Mosambiekse burgers behoort.

Verskeie winkels in die Johannesburgse middestad is ook geplunder en gevandaliseer te midde van die xenofobiese golf wat tans oor die land tans spoel.

Intussen is ‘n Ethiopiese man steeds in ‘n ernstige toestand in die hospitaal nadat hy aan die brand gesteek is in ‘n beweerde xenofobiese aanval aan die Oos-Rand van Gauteng.

Inwoners van Greenfields wat kwaad is vir hulle wyksraadslid, het na bewering die Ethiopiër, Fayis Abeyo aangeval en sy winkel geplunder.

In Ledig in Noordwes het inwoners ook buitelanders geteiken weens ontevredenheid met die munisipaliteit.

Buitelandse winkels in Johannesburg sluit na dreigemente

Winkels in buitelandse besit in Johannesburg se middestad het begin om hul deure te sluit ná gerugte dat ‘n skare dreig om op ‘n plunderveldtog te gaan.

Nuus24 berig dat die meeste winkels op Breëstraat reeds gesluit is.

Eyewitness News het getwiet dat daar dreigemente van geweld in die sentrum Johannesburg is en sommige winkels is alreeds geplunder

‘n Polisiewoordvoerder Wayne Minnaar sê die metropolisie monitor die situasie.

Geweld het die afgelope week vanaf gebiede buite Durban na die middestad versprei en polisieversterkings moes uit ander dele van die provinsie ingeroep word.

By Ledig naby Sun City in Noordwes is ook voorvalle van plundery en brandstigting teen buitelanders aangemeld.

Intussen het die VN se voormalige Hoëkommissaris vir Menseregte, Navi Pillay, in Durban oor voortgesette xenofobiese aanvalle in Suid-Afrika gepraat.

Pillay het gesê Suid-Afrika moet ‘n strenger immigrasiebeleid instel en strenger beheer neem oor landsgrense.

Sy het Suid-Afrika se oop grense gekritiseer.

Die voormalige VN-amptenaar is deel van ‘n taakspan wat deur die KwaZulu-Natalse regering aangestel is om aandag te gee aan die geweld wat reeds vyf lewens geëis het, waaronder ook die van ‘n minderjarige.

Byna 2000 buitelanders is reeds na skuilplekke uitgedryf.

Die organisasie, Regslui vir Menseregte, sê die regering maatreëls in te stel om die integrasie van buitelanders in die samelewing te vergemaklik.

Hulle het gesê die regering en wetstoepassingsagentskappe moet optree om die huidige vlaag van geweld te ontlont.

Volgens Regslui vir Menseregte voel Suid-Afrikaners dat buitelanders hulle werksgeleenthede bedreig en dit lei tot misdaad en vreemdelingehaat.

Malawi het vroeër aangekondig dat hy sy burgers uit Suid-Afrika sal repatrieer na die toename in xenofobiese geweld.

Zimbabwe het gesê die aanvalle teen sy burgers in Durban sal nie betrekkinge tussen die twee lande beïnvloed nie.

Zuma se seun wil van buitelanders ontslae raak

President Jacob Zuma se seun, Edward, het ter ondersteuning van koning Goodwill Zwelithini se omstrede oproep beaam dat buitelanders uit Suid-Afrika gedeporteer behoort te word.

“Ons moet bewus wees dat as ‘n land sit ons op ‘n tydbom van hulle [buitelanders] wat die hele land oorneem.

“Die rede waarom ek dit sê is omdat sommige van die buitelanders werk vir private sekuriteit maatskappye waar hulle in diens geneem word vir goedkoop arbeid. Hierdie maatskappye hardloop weg vir die nakoming van Suid-Afrikaanse arbeidswetgewing,” sê die president se oudste seun.

‘Buitelanders moet die land te verlaat’

Zuma het aan Nuus24 in ‘n onderhoud gesê hy het ten volle saamgestem met Zwelithini se sentimente dat “buitelanders die land behoort te verlaat.”

Zwelithini het na bewering dié kommentaar gelewer by ‘n morele herlewingsbyeenkoms in Pongola, KwaZulu-Natal, twee weke gelede.

Die Zoeloe-koning het glo gesê dat buitelanders die aard van Suid-Afrikaanse samelewing aantas omdat hulle voordeel trek uit die swak en ongedissiplineerde gedrag van inheemse swartes.

Zwelithini het ook glo gesê: “Ons moedig alle buitelanders aan om hul tasse te pak en te gaan.”

Ten spyte van die Suid-Afrikaanse Menseregtekommissie wat tans die Zoeloe-koning se uitsprake ondersoek, het Zuma junior gesê as ‘n burger van Suid-Afrika, het hy ten volle saamgestem met die koning.

Hy het gesê sommige buitelanders het nie wettige dokumentasie wat hulle toelaat om in die land te wees nie.

Voormalige soldate ‘n gevaar

Die tydbom, sê Zuma, is dat sommige buitelanders gewapen is en ‘n paar van hulle was voorheen soldate in hul eie lande.

“In Suid-Afrika moet jy ‘n wapenlisensie kry om ‘n wapen te dra. Waar is hulle lisensies? Ons kan nie die moontlikheid van ‘n staatsgreep in die toekoms uitsluit nie. Die regering moet almal wat onwettig in die land is uitskud. Hulle moet weg,” het Zuma gesê.

Hy het gesê buitelanders is die oorsaak van Suid-Afrika se dwelmprobleem.

“Hulle is die rede waarom daar is so baie dwelms in die land is. Hulle voorsien en verkoop die dwelms aan gemeenskappe in ons land. Neem Radovan Krejcir byvoorbeeld wat in die land gekom het, want hy het geweet dat hy misdaad kan pleeg en daarmee wegkom,” het Zuma gesê met verwysing na die Tsjeggiese voortvlugtige tans in aanhouding.

“Ek praat nie net oor buitelanders uit Afrika-lande nie, ek praat ook oor Asiërs en Europeërs. Hulle is ‘n ware sekuriteitsbedreiging vir die land en die polisie kan hulle nie vang nie, want hulle kan nie opgespoor word nie, want sommige van hulle het nie behoorlike dokumentasie nie,” het Zuma gesê.

Buitelanders in rep en roer oor Zoeloekoning se aanmerking

Meer as ‘n honderd buitelanders het by die polisiestasie op Isipingo in KwaZulu-Natal saamgedrom om aanklagte van aanranding en intimidasie in te dien, nadat tien van hulle winkels in die dorp, suid van Durban, geplunder is.

Hulle sê dit is veroorsaak deur Koning Goodwill Zwelithini se aanmerking dat hulle die land behoort te verlaat, het RSG berig.

Die plundery en aanvalle hou vermoedelik ook verband met vroeëre betogings by ‘n plaaslike pakhuis tussen Umlazi en Isipingo.

Buitelanders sê hulle leef in vrees, en het meer sigbare polisiëring in die omgewing gevra.

Dertien vas na plundery in Noordwes

Dertien persone is in Stella in Noordwes in hegtenis geneem vir openbare geweld nadat buitelanders se winkels geplunder is.

“Die polisie het ‘n klopjag uitgevoer op ‘n kroeg in Rekgaratlhile en die alkohol gekonfiskeer,” het Kealeboga Molale, woordvoerder van die polisie, gesê.

“Die gemeenskap was glo ontevrede hieroor en ongeveer 200 lede van die gemeenskap het op die twee buitelanders se winkels toegeslaan en dit geplunder.”

Die groep is Saterdagaand omstreeks 20:00 in hegtenis geneem. Hulle sal na verwagting binnekort in die Vryburg-landdroshof verskyn.

Polisie ontplooi in Limpopo teen xenofobiese geweld

Geweld teen Somaliërs in Ga-Sekgopo, oos van Pietersburg (Polokwane) in Limpopo, het daartoe gelei dat hulle hul moes hul winkels verlaat.

Lt.kol. Moatshe Ngoepe, woordvoerder van die polisie, het gesê die polisie is ontplooi. “Die situasie is tans kalm en ‘n saak van openbare geweld word ondersoek,” het hy gesê.

‘n Somaliër is glo betrap met die selfoon van ‘n moordslagoffer. Die man is drie weke gelede vermoor. Inwoners het die Somaliër daarvan beskuldig dat hy verantwoordelik is vir die moord.

Volgens die polisie het een van die moordenaars moontlik die selfoon aan die Somaliër gegee, of verkoop of vir herstel ingehandig. ‘n Moordverdagte is intussen in hegtenis geneem.

Een verdagte is in hegtenis geneem in verband met die moord en nog ‘n persoon het homself Sondag aan die polisie oorgegee.

Sedert Sondag het geweld en plundery in 11 gebiede in Sekgopo die Somalies immigrante uit hul winkels gedwing.

Somaliese winkeleienaars in die gebiede het gesê hulle leef in vrees, aangesien plaaslike swart inwoners dreig om hulle lewend aan die brand te steek.

Een van die winkeliers het gesê hy het al sy voorraad verloor tydens die plundertog. “Ons het ons voorraad, kruideniersware, klere en boumateriaal verloor,” het hy gesê.

Ander eienaars is bekommerd dat hulle kollektief verantwoordelik sal gehou word vir een oortreding. “Dit is jammer, want ons is nie eers deel van hierdie selfoonherrie nie, maar omdat ons buitelanders is, word ons ook ingesluit. Ons bly al jare lank in hierdie gemeenskap. Ons was ‘n familie, ons was deel van hulle.”

Buitelander lewendig verbrand deur gepeupel

In die jongste voorval van vreemdelinghaat is ‘n buitelander lewendig aan die brand gesteek deur ‘n verwoede gepeupel in Soweto.

In nog ‘n voorval is twee mense in hegtenis geneem vir diefstal van goedere uit ‘n buitelandse winkel in Thembelihle, Lenasia. Altesaam 180 mense is reeds verlede maand vasgetrek vir ivm plundery en geweld.

Die buitelander is ernstig beseer toe die skare Donderdag in Doornkop in Soweto paraffien oor hom uitgegooi het en hom aan die brand gesteek het nadat hy aangesê is om die plek te verlaat.

Lt. Kay Makhubela, woordvoerder van die polisie, het die voorval bevestig. “Polisiebeamptes het na die toneel gehaas om hom te red. Hy is baie ernstig beseer en is na ‘n hospitaal geneem.”

Niemand is nog in verband met die voorval in hegtenis geneem nie.

Vier buitelanders is in ‘n afsonderlike voorval in hegtenis geneem toe ‘n groep swart plaaslike inwoners hul winkel begin plunder het.

“Een van die buitelanders het ‘n in die lug gevuur,” volgens Makhubela. Die polisie het die vuurwapen daarna gekonfiskeer. Nie een van die plaaslike inwoners is in hegtenis geneem nie.

Verskeie buitelandse winkels loop in Gauteng onder plundery deur nadat die 14-jarige Siphiwe Mahori op 19 Januarie doodgeskiet is.

Mahori was deel van ‘n skare wat ‘n Somaliër se winkel in Snake Park in Soweto wou beroof. Die onrus het van Soweto na Kagiso aan die Wes-Rand oorgespoel, asook Sebokeng in die Vaal, Edenpark in Ekurhuleni en Alexandra in Johannesburg.

Verskeie mense is dood, insluitend ‘n baba wat tydens ‘n stormloop versmoor het.

Die geweld teen buitelanders se ondernemings regoor die land sal ondersoek word, die minister van Klein Sake, Lindiwe Zulu gesê.

“Die verlies van lewens en die vernietiging van eiendom moet in die sterkste moontlike terme veroordeel word,” het Zulu in ‘n verklaring gesê.

Sy het gesê ‘n span sal saamgestel word om die oorsake te ondersoek en aanbevelings te maak.

“Ons doen ‘n beroep op lede van ons gemeenskappe om saam te werk met die polisie en nie die reg in eie hande te neem nie.”

Sy het gesê almal wat in Suid-Afrika woon, insluitend buitelanders, is geregtig op beskerming onder die wet. In terme van die Grondwet, kan asielsoekers en vlugtelinge besighede in Suid-Afrika bedryf.

“Buitelanders wat besighede besit is ook onderhewig aan dieselfde belasting en heffings as Suid-Afrikaners,” het sy egter bygevoeg.

“Ons doen ‘n beroep op lede van ons gemeenskappe om aan staatsdepartemente en ander regeringsagentskappe die ruimte te laat om die situasie aan te spreek.”

Zulu is onlangs gesê buitelanders moet hulle handelsgeheime en sukses met die plaaslike bevolking deel.

“Swart mense was nooit deel van die ekonomie van Suid-Afrika in terme van die besit van enigiets nie. Daarom, as hulle sien dat ander mense van buite suksesvol is, voel hulle asof hulle uit daardie ruimte gesluit word deur buitelanders,” het sy aan Bloomberg op 28 Januarie gesê.

“Dit is belangrik vir buitelanders om hul sukses met Suid-Afrikaners te deel.”

Somaliërs moet winkels op Kaapse Vlakte sluit

Somaliese winkels in die Marikana-lokasie in Philippi op die Kaapse Vlakte moes Woensdagaand inderhaas sluit weens geweld teen buitelanders.

Een persoon is dood, een gewond en verskeie winkels is Dinsdag in die gebied geplunder.

Gemeenskapsleiers het intussen vergader om vrese te probeer weerlê van plundery in die gebied.

Die Seskhona beweging het aangedui dat hulle openbare vergaderings sal hou om die geweld te probeer aanspreek.

Zuma kondig einde van grondeienaarskap aan

Pres. Jacob Zuma het Donderdagaand in sy staatsrede aangedui dat die beginsel van gewillige koper/verkoper van grond betref, binnekort iets van die verlede sal wees.

Hy het ook gesê buitelanders sal verhoed word om grond in Suid-Afrika te besit, alhoewel hulle steeds in aanmerking sal kom vir langtermynlenings.

“Die Wetsontwerp op die Regulering van Grondbesit sal in die verband vanjaar by die parlement ingedien word. Grond het ‘n kritieke faktor geword om die onregte van die verlede reg te stel.”

Volgens die voorgestelde wetsontwerp sal daar ‘n plafon wees vir grondeienaarskap, naamlik slegs 12 000 hektaar.

Zuma het gesê die tweede tydperk om grondeise in te dien is verlede jaar heropen. Hy het gesê 36 000 grondeise is nasionaal ingedien. Die nuwe sperdatum is in 2019.

“Ons ondersoek ook die 50/50-beleidsraamwerk, wat voorstel dat grond aan mense wat op plase woon en werk oorgedra word. Vyftig boerderyondernemings sal geïdentifiseer word as deel van ‘n loodsprojek.”

Zuma het gesê meer as 90,000 hektaar is deur die grondhervormingsprogram aan kleinboere, plaasbewoners en huurarbeiders toegeken. “Die proses om die kantoor van die waardeerder-generaal op die been te bring is onderweg en dit word gedoen in terme van die Wetsontwerp op Eiendomswaardering,” het Zuma gesê.

“Wanneer die wet eers geïmplementeer is sal dit ‘n einde bring aan die staat se afhanklikheid van die beginsel van gewillige koper, gewillige verkoper.”

Polisie by nóg plundery betrek

Aanvalle op buitelanders het na die Noord-Kaap en KwaZulu-Natal versprei waarby polisiebeamptes in sekere gevalle ook betrek word.

Die polisie het glo aan die plundering van buitelanders se winkels in die Noord-Kaap meegewerk.

Twee polisiebeamptes en ‘n polisiereservis is in verband met die gewapende roof van ‘n Somaliese winkel in Kimberley in hegtenis geneem.

Minstens een polisieman is verfilm waar hy verlede week aan die plundery in Soweto deelgeneem het, terwyl die Metropolisie ook verfilm is terwyl hulle in die hitte van aanvalle op spazawinkels nie ‘n vinger lig nie en verveeld toekyk.

Plundery is nou in die Oos-en Wes-Rand, sowel as Alexandra in Sandton, Langlaagte, suid van Johannesburg en op Inanda buite Durban aangemeld.

‘n Noord-Kaapse polisiewoordvoerder, Marriam Mochologi-Maleme, sê hulle beskou die polisie se optrede as ‘n misdaad. Sy het gesê hulle is in hegtenis geneem en sal binnekort in die hof verskyn.

Polisie sê Soweto-geweld is onder beheer

Buitelanders moes uit Soweto vlug, of skuiling gaan soek by polisiestasies in die gebied, ná die jongste vlaag van geweld teen hulle.

Die geweld het Maandagaand uitgebreek nadat ‘n buitelandse winkeleienaar na bewering die 14-jarige Siphiwe Mahori in Snake Park doodgeskiet, omdat Mahori glo sy winkel wou beroof.

Die Gautengse polisiekommissaris, Lesetja Mothiba hou nietemin vol dat die polisie genoeg mannekrag het om die aanvalle onder beheer te bring.

Hy sê egter die polisie se nasionale leierskap is in kennis gestel dat bykomende magte op bystand moet wees.

Die polisie moes inderhaas ontplooi word om die plundery van winkels wat aan buitelanders behoort in Soweto hok te slaan. Volgens Lesetja is meer polisiebeamptes ontplooi in die gebiede wat deur die plundery geraak word.

Die geweld het in Soweto begin, en ook na Diepkloof en Kagiso versprei.

Asad Ali, wat ‘n selfoon-herstelwinkel gehad het, sê hy soek nou ‘n ander plek om sy winkel oop te maak.

Die adjunkvoorsitter van die Somaliese-vereniging van Suid-Afrika, Cassim Ali het die plundery as vreemdelingehaat én misdaad bestempel.

Meer as 120 mense is tot dusver in hegtenis geneem op aanklagte wat wissel van moord tot diefstal en die polisie het beslag gelê op tientalle onwettige vuurwapens.

Mothiba sê hulle is besig met ‘n ondersoek na waar die vuurwapens vandaan kom.

Drie polisiebeamptes, wat nie in uniform geklee was nie, het ‘n Sapa-verslaggewer glo Donderdag gedwing om foto’s van haar selfoon uit te vee wat sy van ‘n Somaliër se winkel in Dobsonville, Soweto, geneem het.

Die verslaggewer is afgetrek deur ‘n polisievoertuig nadat sy die foto’s geneem het.

“Die een beampte het oor my skouer geloer om seker te maak dat ek alles uitvee,” het Mpho Raborife gesê. “Hy het daarna gesê ek mag nie ŉ foto op die toneel neem nie, aangesien dit openbare geweld is, so dit val onder hulle jurisdiksie.

“Hulle het toe gesê ek mag in elk geval nie die foto’s neem nie omdat ek nie toestemming gevra het nie, en ek kan nie net by ŉ toneel opdaag en foto’s neem en dan wegry nie.”

Die polisie het haar verslaggewerskaart en selfoon by haar afgeneem. Daarna het die beamptes volgehou dat sy hulle na die Dobsonville-polisiestasie moet vergesel en geweier dat sy haar werkgewer bel. Hulle is uiteindelik nooit na die stasie nie.

Die polisiebeampte het volgehou dat sy nie daar mag foto’s neem en dit aan die publiek mag ‘uitlek’ nie. Hulle het haar selfoon en verslaggewerskaart teruggegee eers nadat sy die foto’s uitgevee het.

Mark van der Velden, redakteur van Sapa, het gesê die verslaggewer het haarself met haar verslaggewerskaart geïdentifiseer en alhoewel die polisiebeamptes in ŉ polisievoertuig was, het hulle siviele klere aangehad en het hulself nie voldoende geïdentifiseer nie. “Die feite tot dusver dui daarop dat die gedrag van die beamptes uiters onprofessioneel was en dit voldoen nie aan die prosedure nie. Die polisiebeamptes het klaarblyklik moeite gedoen om ŉ joernalis te intimideer en wou inligting in openbare belang onderdruk oor ŉ aktuele nuusstorie oor xenofobie.”

Volgens Van der Velden word die polisie verbied om enige media te dwing om foto’s uit te vee. Hy het bygevoeg dit is nog ŉ voorval van polisiebeamptes wat staande bevele verontagsaam.

Sapa gaan deur die Suid-Afrikaanse Nasionale Redakteursforum (Sanef) ŉ formele klag by die polisiekommissaris se kantoor aanhangig maak.