praag.co.za

Tag: sapd

  • Swart polisiebeamptes voor oor miljoene wat gesteel is

    Agt mense, meestal polisiebeamptes, verskyn na verwagting vandag weer in die Bloemfonteinse landdroshof weens bedrog en korrupsie van meer as R5 miljoen.

    Altesaam 150 vervalste eise is glo in ‘n tydperk van 20 maande aan polisiebeamptes in Bloemfontein uitbetaal.

    ‘n Finansiële klerk, Mpho Selesho, het glo die fiktiewe eise ontvang en goedgekeur. Daarvoor het sy glo meer as R1,8 miljoen verdien. ‘n Sakeman, Jack Tladi van Woodland Hills in Bloemfontein, het glo ook van die geld ontvang.

    Die polisiebeamptes sluit in vier konstabels van die taktiese reaksie-eenheid in Bloemfontein – Mokate Madumisa, Moratoe Motsoeneng, Klaas Sereco en Patrick Sedio. Litaba Dodo en Jacob Mokhethi is luitenant-kolonels wat onderskeidelik in die departement van sigbare polisiëring en openbare orde werk.

    Almal is vroeër op borgtog van R5 000 elk uitgelaat. Hulle staan tereg op meer as 270 aanklagte van vervalsing, bedrog, korrupsie en geldwassery.

    Die aanklagte spruit uit beweerde vals eise wat tussen Januarie 2015 en September 2016 vir kos- en verblyfvoorskotte ingedien is.

    Bron: OFM Nuus

  • Nes van polisiebedrog oopgevlek

    Ses verdagtes, insluitend vyf polisiebeamptes, verskyn na verwagting vandag in die landdroshof in Bloemfontein nadat ‘n nes van bedrog, wat meer as R5 miljoen kan beloop, in die Vrystaatse polisie oopgevlek is.

    Die polisiebeamptes, werksaam by verskeie eenhede, en ‘n amptenaar van die finansies afdeling, is gisteroggend deur die Valke in hegtenis geneem.

    Dit volg nadat ‘n voorlopige ondersoek na die finansies van verskeie eenhede wat verlede jaar gedoen is, aangedui het dat grootskaalse bedrog moontlik gepleeg is.

    Woordvoerder van die Valke, Philani Nkwalase, sê die moontlikheid dat nog polisiebeamptes in hegtenis geneem kan word is nie uitgesluit nie.

    Bron: OFM Nuus

  • Polisie beveg misdaad ‘sonder lugreëling’

    Polisie beveg misdaad ‘sonder lugreëling’

    Die Openbare Dienste Kommissie (ODK) het gister sy kommer uitgespreek oor die impak wat hoë misdaadsyfers en slegte werksomstandighede het op die moraal van polisiebeamptes in die groter Bloemfontein area.

    Provinsiale ODK Kommissaris Henk Boshoff sê die moraal van polisiebeamptes is baie laag alhoewel hulle lojaal bly en hard werk onder baie moeilike omstandighede.

    Hierdie bevinding is gemaak tydens inspeksies by drie polisiekantore – Bainsvlei, Bloemspruit en Kopanong . Twee van dié kantore het van die hoogste moord en geweldsmisdaadsyfers in die provinsie.

    ‘n Ernstige tekort aan polisiebeamptes is ook tydens die inspeksies gevind. Boshoff het ‘n dringende beroep gedoen op regeringsdepartemente om saam te span en dringend in te gryp.

    Hy sê alhoewel daar tans gekyk word na die opgradering van polisiekantore – wat die aanstel van meer beamptes kan beteken – sal die werkslas en die tekort aan kantoorspasie aangespreek moet word.

    Boshoff sê by een van die polisiekantore moet drie beamptes vanuit ‘n beknopte kantoor sonder lugreëling werk.

    Bron: OFM

  • Polisie glo betrokke by Bothaville-plaasaanval

    Polisie glo betrokke by Bothaville-plaasaanval

    Vrystaat Landbou (VL) het hom sterk uitgespreek oor die beweerde betrokkenheid van polisiebeamptes by ‘n aanval op drie vroue en twee jong kinders op ‘n plaas by Bothaville.

    Voorsitter van dié organisasie se komitee vir wet en orde, Tommie Esterhuyse, sê dit is onmoontlik vir boere om hulself te beskerm teen aanvalle van dié aard.

    Dit kom nadat vier mans, wat hulself voorgedoen het as polisiebeamptes, verlede Vrydag kort na 19:00 op die plaas, Oorwin, aangekom het. Hulle het glo aan die plaaseienaar,‘n ouerige vrou, en haar familielede, gesê hulle wil die huis vir dwelms deursoek.

    Volgens die polisie se Stephen Thakeng het die plaaseienaar haar honde elders gaan toemaak sodat die mans toegang tot die huis kon verkry. Daarna het die aanvallers aangedring op geld en die vroue met ‘n vuurwapen gedreig. Hulle het ook gedreig om een van die jong kinders op ‘n warm stoofplaat te brand as daar nie aan hul eise voldoen word nie. Esterhuyse sê die voorval is ‘n groot bron van kommer.

    Die feit dat drie weerlose vroue en kinders onder valse voorwendsels met onaanvaarbare driegemente aangehou is, laat opnuut die vraag ontstaan, hoe weerlose gemeenskappe hulself kan beskerm.

    Een van die vier rowers is dieselfde aand by Orkney, ná plaaslike boere onraad vermoed het, deur die polisie in hegtenis geneem. Thakeng het bevestig dat ‘n vyfde man sedert gister vir ondervraging aangehou word. Volgens VL is dié man glo werksaam op die plaas. Thakeng sê die polisieondersoek is in ‘n sensitiewe stadium. Hy wou nie bevestig of polisiebeamptes betrokke was by die rooftog nie.

    ‘n Vuurwapen, ‘n onbekende bedrag geld en drie selfone is in die rooftog gebuit. Die 26-jarige Paballo Molaudi van Klerksdorp het gister in die plaaslike landdroshof op ‘n aanklag van gewapende roof en dat hy hom as ‘n polisiebeampte voorgedoen het, verskyn. ‘n Polisie-glimbaadjie, R2 800 en twee selfone, wat vermoedelik gesteel is, is in Molaudi se besit gevind. Hy sal na verwagting eerskomende Maandag aansoek om borgtog doen.

    OFM-nuus verkies om weens veiligheidsredes nie die slagoffers se name bekend te maak nie. Die slagoffers het nie ernstige beserings opgedoen nie, maar is steeds erg getraumatiseerd.

  • Polisiebeampte wat verkragtingdossiere glo laat verdwyn, kry borg

    ‘n Bloemfonteinse polisiebeampte, wat na bewering dossiere uit die hof gesteel het, en ‘n plaaslike swart sakeman verskyn na verwagting vandag weer in die plaaslike landdroshof.

    Patricia Pitt, van die Parkweg-polisiekantoor, is vroeër op borgtog van R3 000 vrygelaat terwyl Thulani Qhiti in aanhouding bly.

    Pitt het glo dossiere by die Bloemfonteinse landdroshof gesteel. Qhiti word in een van die gesteelde dossiere weens beweerde verkragting ondersoek.

    Albei staan tereg op aanklagte van diefstal en dwarsboming van die gereg.

  • SA verkies tot Interpol se Uitvoerende Komitee

    Suid-Afrika is die eerste Afrika-land wat hierdie week verkies is tot uitvoerende komitee van Interpol, het die Valke Donderdag gesê.

    Meer as 190 lande in die Algemene Vergadering van Interpol het gestem dat Suid-Afrika op die Uitvoerende Komitee verteenwoordig word.

    Die vergadering is hierdie week van Maandag tot Donderdag in Kigali, Rwanda gehou.

    Die Suid-Afrikaanse Minister van Polisie Nkosinathi Nhleko het gesê die aanstelling is ‘n eer. Hy het gesê die aanstelling is ‘n aanduiding dat die Suid-Afrikaanse Polisiediens (SAPD) “voortgaan om ‘n leidende rol in internasionale polisiëring te speel.”

    Nhleko het gesê die aanstelling versterk Suid-Afrika se standpunt oor die stryd teen misdaad.

    Hy het gesê Suid-Afrika is verbind daartoe om die nuwe aanstelling beskou as ondersteuning “om die belange van die vasteland in die globale stryd teen internasionale georganiseerde misdaad te bevorder.”

    Die komitee het 13 lede en die Suid-Afrikaanse afvaardiging op die komitee sal onder leiding van brigadier Anbuen Naidoo, hoof van Interpol se Nasionale Sentrale Buro (NCB) in Pretoria staan.

    Die NCB het onlangs deel geword van die Direktoraat vir Prioriteitsmisdaadondersoek (Valke) en sal met globale wetstoepassingsagentskappe skakel.

    Nhleko het gesê: “Die Valke se leidende rol sal Suid-Afrika se voetspoor versterk in die bou van kriminele databasisse en saamwerk met ander internasionale agentskappe op polisiëring in oorgrensondersoeke, operasies en arrestasies.”

  • Phiyega geskors hangende ‘n ondersoek

    President Jacob Zuma het aangekondig dat die Nasionale Polisiekommissaris, Riah Phiyega geskors is met volle vergoeding.

    Haar skorsing is hangende ‘n raad van ondersoek wat haar geskiktheid om die pos te beklee sal bekyk.

    ‘n Aanbeveling van die Marikana Kommissie het tot die ondersoek gelei .

    Phiyega se rol in die dood van 44 mense wat deur die polisie geskiet is met die Lonmin-platinumstaking in 2012 is reeds maande onder bespreking.

    Ontleders meen sy word uitgesonder om die blaam teen adjunk-president Cyril Ramaphosa wat nou betrokke is by Lonmin, te verlig.

    Opposisiepartye het Phiyega se skorsing verwelkom. Die party sê hulle het lank reeds gevra dat die president teen Phiyega moet optree.

    Phiyega is by verskeie skandale betrek.

    Haar skorsing sal deur talle polisielede verwelkom word omdat sy nie uit ‘n polisie-agtergrond kom nie. Sy is dikwels gekritiseer oor haar tekort aan polisie-ervaring.

  • SAPD probeer byna 50 moorde per dag vergoeilik

    SAPD probeer byna 50 moorde per dag vergoeilik

    Alhoewel die minister van Polisie, Nathi Nhleko en genl. Riah Phiyega, nasionale polisiehoof, die jongste misdaadsyfers deur die statistikus-generaal en Statistieke Suid-Afrika laat nagaan het, meen ontleders dat dit nog veel hoër is as wat die regering wil voorhou.

    Met moord, motorkapings en huisrooftogte, is ​Suid-Afrika nóg gevaarlikers as ‘n jaar gelede met geweldsmisdade deur swart aanvallers wat die afgelope jaar verder gestyg het.

    Moord het met 4,6% gestyg, motorkapings met 14,2% en huisrooftogte met 5,2%. Dit is die derde agtereenvolgende jaar dat die reeds hoë moordsyfer styg.

    Ten minste 48 mense word daagliks in Suid-Afrika vermoor, maar dit kan nog hoër wees.

    Dwelmverwante misdade (8,3%), bestuur onder die invloed van drank of dwelms (9,4%) en seksuele aanranding weens polisiegedrag (87,5%) het ook toegeneem.

    Phiyega het nietemin Dinsdag volgehou dat sekere misdade oor die afgelope tien jaar afgeneem het, soos misdade teen vroue en kinders.

    Phiyega meen ook die toenemende aantal vuurwapens in die land bly ‘n ernstige probleem. Sy het in die parlement gesê die probleem duur voort ten spyte van die polisie se pogings om vuurwapens op te spoor en te vernietig.

    Phiyega sê die vuurwapenwet behoort verder verstewig te word om van onwettige vuurwapens ontslae te raak.

    Die jongste misdaadsyfers toon egter ‘n afname van 246 voorvalle in die onwettige besit van vuurwapens.

    Byna 700 polisielede is die afgelope jaar egter in hegtenis geneem vir hul betrokkenheid by misdaad.

    Die houvas oor die land deur georganiseerde misdaad is ook duidelik uit die jongste misdaadstatistiek.

    Die 2014-2015 syfers toon dramatiese stygings in vragmotorkapings (tot 29,1% teenoor die vorige jaar) en motorkapings (tot 14,2%), asook dwelmverwante misdaad.

    Hierdie patroon, meen ‘n kriminologieprofessor aan Unisa, Anthony Minnaar, hou verband met georganiseerde misdaad.

    “In ‘n onlangse VN-verslag oor georganiseerde misdaad is verklaar dat Suid-Afrika ‘n swaartepunt is in die verskaffing aan die res van Afrika van sindikate se gesteelde goedere,” het Minnaar gesê en bygevoeg dat Lagos eers dié posisie beklee het.

    ‘n Polisiekaptein het aan PRAAG gesê daar is geloofwaardige getuienis dat swart aanvallers militêre opleiding in Zimbabwe ontvang en dan oor die grens kom om aanvalle uit te voer.

    Sodra die polisie egter sukses het met die opsporing van dié aanvalsgroepe, word die polisie-eenhede deur die bestuur ontbind.

    Die skuld vir die hoë moordsyfer moet nie op die polisie of die regstelsel gepak word nie, want moord is ’n “maatskaplike fenomeen”, het Nhleko verklaar.

  • Phiyega onder druk oor verwagte geweldsmisdaad-toename

    Phiyega onder druk oor verwagte geweldsmisdaad-toename

    Die nasionale polisiehoof Generaal Riah Phiyega sal na verwagting Dinsdag misdaadstatistiek vrystel wat ‘n dramatiese toename in gewelddadige misdaad toon.

    Volgens City Press is ‘n styging in die koers van moord, verkragting, roof en motorkapings te wagte.

    Maar bronne in die SA Polisiediens (SAPD) het aan City Press gesê die toename in gewelddadige misdaad is nie so hoog soos verlede jaar se skerp styging nie.

    Phiyega is tans onder druk, want sy het tot Maandag om te reageer op President Jacob Zuma se versoek dat sy redes verskaf vir waarom sy nie geskors moet word nie, hangende ‘n ondersoek na haar optrede tydens die Marikana-slagting.

    ‘n Toename in residensiële inbrake en rooftogte by besighede landwyd sal ook na verwagting onthul word. Die toenames is veral in swart gebiede opgemerk.

    In sekere gebiede rondom Gauteng, het geweldsmisdaad toegeneem teen ‘n onrusbarende tempo tussen April verlede jaar en Januarie vandeesjaar.

  • Polisiebeampte kry borg na gewapende roof in uniform

    ‘n Polisiebeampte van Theunissen wat die naweek by sy huis in hegtenis geneem is in verband met ‘n gewapende rooftog verlede maand, is uit op borg.

    Die swart beampte is Woensdag in die plaaslike landdroshof op borgtog van R5000 uitgelaat.

    Vrystaatse polisiewoordvoerder, Ian Gaobepe, sê die 28-jarige Diphaphang Mokoena, wat verbonde is aan die polisie se gemeenskapsdienssentrum, staan tereg op aanklagte van poging tot moord, gewapende roof en ontvoering.

    Hy het glo op 13 Augustus omstreeks 19:00 ‘n plaaslike winkel beroof en ‘n Ethiopiese winkeleienaar met sy amptelike vuurwapen aangehou, ontvoer en aangerand.

    Gaobepe sê Mokoena was in sy uniform geklee tydens die rooftog waarna hy die winkeleienaar agter in ‘n polisiebakkie gegooi het. Mokoena het toe die erg beseerde man vir dood by Meloding in Virginia gelaat.

    Hy het hom glo erg aangerand met sy vuurwapen. Geld, sigarette en selfoonlugtyd alles ter waarde van R5 000 is gesteel.

    Mokoena verskyn weer op 30 September in die hof.

  • Marteling in SA deur polisie laat menseregte-organisasies koud

    Geen internasionale menseregte-organisasie het eens kennis geneem van tien Suid-Afrikaanse polisiebeamptes wat van moord en marteling aangekla word nie, ten spyte daarvan dat sulke organisasies oorverteenwoordig is in die land.

    Die tien is borgtog in die Tembisa-landdroshof aan die Oos-Rand geweier.

    Hulle het ‘n 37-jarige man verlede jaar in Ivory Park in hegtenis geneem en hom na bewering onderweg na die polisiekantoor gemartel.

    Die polisielede is Donderdag in hegtenis geneem. Die Onafhanklike Polisie Ondersoekdirektoraat ondersoek die saak.

    Dit volg kort nadat die Hooggeregshof in Pretoria agt oudpolisiemanne skuldig bevind het aan die moord op die taxibestuurder, Mido Macia.

  • Polisiebrutaliteit skok wit Suid-Afrikaners opnuut

    Die minister van Polisie, Nathi Nhleko het onthul dat meer as eenduisend-eenhonderd polisielede tussen April en Junie vanjaar alleen, van wangedrag aangekla is, het RSG berig.

    Dit is gemiddeld 350 polisielede per maand wat aangekla is. Die minister het die inligting in ‘n geskrewe reaksie op ‘n parlementêre vraag bekendgemaak.

    Nhleko sê die polisiediens probeer om die tugverhore binne die voorgeskrewe twee maande af te handel.

    Hy sê bykans 140 van die sake is nog nie afgehandel nie vanweê die komplekse aard daarvan en getuies wat nie beskikbaar is nie.

    Dié onthulling is gemaak te midde van skerp reaksie op ‘n internet-video oor vermeende polisiewreedheid teen wit mans by die Douglasdale-polisiestasie in Johannesburg.

    Die getuienis van hernude polisiebrutaliteit, is verfilm toe ‘n wit man, ene Anton, die swart polisiebeamptes gesmeek het om nie sy vriend Shane verdere kwaad aan te doen nie.

    Shane is bewusteloos gelaat toe die swart polisiebeampte hom om die keel beetgekry het en verwurg het. Tonele van Shane se slap, klaarblyklik lewelose liggaam het kykers geskok.

    Die voorval het verlede week plaasgevind in Fourways en volg kort na ‘n vroeëre voorval van ‘n woede-uitbarsting deur die SAPD in die Edenvale area.

    Die video is byna 100 000 keer reeds op YouTube in die afgelope 24 uur gekyk.

    Die bewerings word deur die Onafhanklike Polisieondersoekdirektoraat ondersoek.

  • Polisiebeamptes wat Masbieker sleep skuldig aan moord

    Die vonnisoplegging van agt voormalige polisiebeamptes wat skuldig bevind is in verband met die moord op die Mosambiekse taxi-bestuurder Mido Macia, is tot 22 September uitgestel.

    Al agt is Dinsdag in die hooggeregshof in Pretoria skuldig bevind, het RSG berig.

    Macia is in 2013 in Daveyton aan die Oosrand agter ‘n polisievoertuig aangesleep. Hy is later in die polisieselle dood.

    Regter Bert Bam het van die beskuldigdes se getuienis dat hulle deur Macia aangerand is voor sy inhegtenisneming, verwerp.

    Intussen het Macia se familie en die Nasionale Vervolgingsgesag die uitspraak verwelkom.

  • Twee polisiebeamptes voor vir motorkaping

    Twee Bloemfonteinse polisiebeamptes wat glo ‘n taxi gekaap het, sal Dinsdag na verwagting weer in die plaaslike landdroshof verskyn.

    Mojalelfa Bonties van die Parkweg-polisiekantoor en Delikile Nomandla van die Bloemspruit-polisiekantoor, is vroeër op borgtog van R800 elk vrygelaat.

    Polisiewoordvoerder, Chaka Marope, sê hulle het glo ‘n taxi gehuur en toe in ‘n woordewisselling met die taxibestuurder betrokke geraak.

    Een van die beamptes het glo in die stryery ‘n vuurwapen op die bestuurder gerig, waarna hy die voertuig gestop en uitgespring het om hulp te kry. Die twee beamptes het glo toe probeer om met die taxi weg te ry.

    Bonties en Nomandla staan tereg op ‘n aanklag van die rig van ‘n vuurwapen en diefstal.